Nabuthawa 1955, kandi in’ingye mulere omwa balhwana basathu. Nakulira ebwanga bw’eyikwa bw’omwalu we Finland, omwa kitsweka lino ekyasibwe mwa Vantaa.

Mama waghe abatizibawa ng’Omwema ba Yehova myaka mike ingakisiya ingabuthwa. Aliwe, thatha waghe mwahakanisya ekwenene neryo isyangalighira mama waghe erithweghesya ithwe baana kutse erighenda nethu okwa mihindano. Neryo iniakathukangiriraya ekwenene ye Biblia ey’omusingyi omughulhu thatha athe eka.

Eritsuka bulere, munathwamu erighondera Yehova. Ng’eky’erileberyako, buthuku bughuma ingane ow’emyaka musanju, omuhalimu waghe mwanyitsurumira kundi isinangalya e verilättyjä (emiggati ye Finland eyirimo omusasi). Omwa byalha bighuma, mwakakya erithema lyaghe nuku ngathande obuno, n’ebindi imune efoka eyiriko akahandi k’omuggati oyo n’erilengaho erikakagho omwa buno bwaghe. Munathoka eripusya efoka eyo.

Nabere ingahikya emyaka 12, thatha waghe mwaholha. Enyuma waho, munabya inangana hindana okwa mihindano. Baghalha bethu omwa kithunga mubanyitsomana, kandi eki mukyanyihira mw’omuhwa w’erikulha-kulhana bunyakirimu. Munatsuka erisoma e Biblia obuli kiro n’eriyeghesya ebitabu byethu by’Ekikristayo n’omuhwa. Emibere mibuya y’eriyeghesya eyi muyaleka ingatholera  eribatizibwa ingane w’emyaka 14, biro 8 Okwomunani, 1969.

Nabere inganaghunza esukuru, munatsuka obutemburi bw’omughulhu wosi. Enyuma w’amayenga make buyira, munaghenda eyiri obuyithawa bunene, e Pielavesi, hakuhi n’omuyi mukulhu we Finland.

E Pielavesi, yanabana omusika oyuwabya abere mukali waghe mwanze, ya Sirkka. Omubere wiwe w’eriminya aho amaaka wiwe akasubulira n’obunyakirimu bwiwe bunene mubyanyitsemesya. Isyali sondekanaya obuminywa kutse obugaga obw’ekihugho. Ithwe bosi babiri muthwanza erikolera Yehova ngoku thwangathoka, mbulha ni lhusunzoki. Munamuherukya biro 23 Okwakasathu, 1974. Omwakanya k’eriyayitsemesya ithwe ng’abaghole, muthwaghenda e Karttula, eyabya obuyithawa bunene bw’abathuliri b’Obwami.

Erilhua okw’inatsuka ly’obutheke bwethu, Yehova abirithukangania ngoku akendi thutsomana kinyamubiri thwamahira Obwami bwiwe bw’embere. (Mt. 6:33) Ng’eky’erileberyako, e Karttula, thwabya isithuwithe ematoka. Okw’itsuka, ithukaghenda okwa ggali. Aliwe, omwa buthuku bw’embulha iyikabya ekihuhiriro kinene kutsibu. Erithoka erithulira omwa bulhambu bunene bw’ekithunga, muthwayithagha ematoka. Aliwe sithwabya thuwithe esyosente sy’erighulhayo.

Isithuyitsulirye, mughalha wethu, omukulhu waghe mwathubungira. Mwathukangania olhwanzo amathuha ematoka yiwe. Omusolho wayo abya inianathuhire. Thwabya b’erighulha amaghutha masa. Neryo aho, muthwathunga ematoka eyo thwabya thukayithagha.

Yehova mwathukangania kw’anemuthutsomana kinyamubiri. Owethu lyabya iry’erihira Obwami bwa Nyamuhanga bw’embere.

Thwabere thune omwa Sukuru y’Abatemburi omwa 1978, Raimo Kuokkanen, a omughuma w’okw’abakangirirya bethu mwathuhira mw’omuhwa w’erisulirirya efomu y’Esukuru ye Gilead. Neryo muthwatsuka erigha Olhusungu ithunawithe ekilhubirirwa ky’erisyasoma okwa sukuru eyo. Aliwe, omwa 1980, thuthe thwasulirirya, muthwakokibwa okwa kyaghanda ky’omuthahulha e Finland. Okwa buthuku obo, abanya Beteli isibalisuliriraya efomu y’erighenda okwa Gilead. Aliwe ithwanzire ithwakolera Yehova aho akalhangira athi h’ahatholere,  butsira aho thwanzire. Neryo muthwayayo. Nomwabine, muthwalholha embere erigha Olhusungu kundi obundi ithwangana thungire akaghisa k’erisulirirya efomu ye Gilead.

Myaka mike enyuma waho, Akathunga Akakasondolha mukaha abanya Beteli b’akaghisa k’erisulirirya efomu y’erighenda okwa Gilead. Muthwalhuaho ithusulirirya esyofomu butsira ambu kundi sithutsemere eribya okwa Beteli. Ekyo kukyathabya kithya! Ekya thwabya thwanzire lyabya iry’erikolera eyiri obuyithawa thwamabya thunatholere. Muthwakokibwa okwa Gilead kandi thwamaghunza omo Kwomwenda 1985, omwa klasi eya 79. Muthwathumwa e Colombia.

E Colombia, mubatsuka erithuthuma okwa kyaghanda ky’omuthahulha. Munalengaho erikolha ngoku nangathoka erikolha olhusunzo lhwaghe, aliwe enyuma w’omwaka mughuma, munayowa ithukayithagha erihebwa olhundi lhusunzo. Omurundi waghe w’erimbere omwa ngebe yaghe yosi, munasaba olhundi lhusunzo. Neryo enyuma waho, muthwathumwa ng’abamisyonare omwa tawuni ye Neiva, omwa kitsweka kye Huila.

Nabiribya inganemutsemera erithulira. Ingane mutemburi omuhuru e Finland, ihakanayira ingathulira erilhua omwa ngyakya-ngyakya erihika omw’igholho omwa thwirimya. Ithwe ng’abathahenie abahyaka, ingye na Sirkka ithukaghunza ekiro kyosi omw’ithulira. Ithukabya thukakolera omwa bulhambu bwa haali, ihakanayira ithwakesya omwa matoka yethu. Eki ikikakehaya okwa lhughendo kandi ikikaleka ithwatsuka lhuba ekiro ekikakwamako.

Ithune omwa bumisyonare, muthwathasyathunga omuhwa ogho thwabya nagho omw’ithulira. Ekithunga kyethu mukyakulha-kulhana, kandi balikyethu abe Colombia ibawithe erisikya, olhwanzo, kandi ibakasima.

Hakuhi ne Neiva eyo thwabya thukakolera yabya iyine esyotawuni esithe mw’Abema. Iningayibulhaya engulhu yuwene nga yikendi syahikayo mughulhu wahi. Aliwe, busana n’abarebbo, emyanya eyo isiyuwene okwa bagheni. Neryo iningasaba indi ambi omundu omwa nguma y’okwa syotawuni esyo iniasyabya Mwema. Iningalengekanaya indi omundu ng’oyo ang’ighire ekwenene iniane omwa Neiva. Aliwe kandi iningasaba indi ambi omundu oyo amabibatizibwa iniakulha-kulhana bunyakirimu n’erisuba omwa tawuni yabu eriyathulirayo. Singabya ngasi ngoku Yehova abya inianawithe enzira eyuwene kwilhaba eyo nabya ingalengekania.

Buthuku buke enyuma waho, munatsuka erigha e Biblia n’omulhwana oyukahulhawamo Fernando González. Abya ikere e Algeciras, enguma y’okwa syotawuni esithabya mw’Abema. Fernando iniakaghenda olhughendo lhw’esyokilomita 50 eryasa e Neiva okwa mubiiri. Iniakathegheka ndeke obuli erigha kandi mwalhuaho iniatsuka erihindana okwa mihindano eyosi. Eritsuka okwa wiki y’erimbere eyo atsukiramo erigha, Fernando iniakasorokaya abandi omwa tawuni yabu n’eribakangirirya okwa ebyo ak’igha omw’igha liwe lye Biblia.

Fernando mwabatizibwa omo Kwokubanza 1990, mezi mukagha alitsukire erigha. Enyuma waho mwabya mutemburi w’omughulhu wosi. Algeciras muyabya yabiribya Omwema mughuma, muky’olhobera ab’okwa kyaghanda erithumayo  abatemburi b’embaghane. Omwa Kwakabiri 1992, ekithunga mukyatsuka omwa tawuni eyo.

Mbwino Fernando mwanakehya omuhwa wiwe w’erithulira ewabu? Eyihi! Abere abirithahya, iyo na mukali wiwe mubahumira e San Vicente del Caguán, eyindi tawuni eyithabya mw’Abema. Eyo mubawathikya okw’itsukisyayo ekithunga. Omwa 2002, Fernando mwasombolhwa ng’omulebererya w’omuthimbo, kandi iyo na mukali wiwe, Olga, bakinalholha embere omwa mubiiri w’eribalhama.

Ekyalholirweko eki, mukyanyeghesya ngoku ni kikulhu erisaba busana n’omubiiri mulebe ow’ahambene n’emibiiri yethu y’ekiteokrasi. Yehova akakolha ebya thuthe thwangakolha. Kundi nibya, omubiiri w’erighesa ni wiwe, si wethu.—Mt. 9:38.

Omwa 1990 muthwasombolhwa erikolha omubiiri w’eribalhama. Omuthimbo wethu w’erimbere abya omwa muyi mukulhu e Bogotá. Olhusunzo olhu mulhwathwitha obuba. Ingye na mukali waghe thuli bandu ba buli kiro abathawithe ekindu ky’embaghane ekya basi. Kandi sithwabya thubeghere eribya omwa muyi ow’ahuha-huhene. Nomwabine, Yehova mwaberererya eriyilhagha liwe eriri omu Abanya Filipi 2:13, NWT: “Kundi ni Nyamuhanga oyukabaha akaghalha busana n’eriyisunza liwe, n’eribaha omuthima w’erianza n’amaaka w’eriyira eky’erikolha.”

Enyuma waho, muthwathumwa ng’abalebererya omwa bulhambu bwe Medellín, omuyi owangalyahulha okw’itsuka. Abandu b’eyo babya ibabiribeghera amalhwa w’okwa syombalhu neryo isibakikilhangira nga kitsibu. Ng’eky’erileberyako, buthuku bughuma inganemw’eghesya omwigha we Biblia, amasasi mwatsuka eribugha eyihya w’enyumba eyo thwabyamo. Nabya iningayawa okwa kithaka, aliwe omwigha iyo mwalholha embere n’erisoma enungu, inianathekene. Abere akaghunza erisoma enungu, mwambwira athi akathahulhukira eyihya. Enyuma w’akathuku kake, mwasa n’abaana babiri n’eribugha inianathekene athi, “Bolho-bolho, ngalyayenda abaana baghe.”

Ihakanayira okwa bundi buthuku ithwabya omwa kabi. Buthuku bughuma ithune omwa mubiiri w’enyumba okwa nyumba, mukali waghe mwasa akathibitha eyo ngali, iniabirikwa engitsi nene. Mwabugha athi omundu amamughusa kw’erisasi. Ekyo mukyanyitha obuba bunene. Aliwe enyuma waho muthwaminya ngoku oyulyaghusa erisasi syalyalighusa oku Sirkka; alyalighusa okwa mulhume oyulyalhaba hakuhi na Sirkka.

Endambi muyahika thwam’igha erighumira amalhwa w’okwa mbalhu. Erisika ly’abalikyethu ab’eyo ababirilhaba omwa mibere eyi nibya n’eyikalire kutsibu mulyathuhimba. Muthwayibwira thuthi Yehova amabya inianemubawathikya, nethu akendi thuwathikya. Mughulhu wosi ithukaghendera okw’ihabulha ly’abasyakulhu, ithwayitheya, n’erisigha ebindi by’omwa byalha bya Yehova.

Ni kwenene, eyindi mibere isi y’akabi ngoku thwabya thukalengekania. Munowa emirenge ng’ey’abakali ibanemutsurumirana eyihya w’enyumba eyo thwabyako omw’ithulira. Munathanza eribalhangira bakatsurumirana, neryo omwinye nyumba mwambwira athi thuyikale eyihya. Enyuma waho, muthwaminya ngoku kwesi “eritsurumirana” lyabya ahakathi-kathi k’ehinyonyi hibiri  ehikahulhawamo kasuku ehyabya hikagherererya emirenge y’abataka.

Omwa 1997, munasombolhwa ng’omukangirirya w’Esukuru y’Abaghombe Abawathikya. b Mughulhu wosi iningatsemera erihindana okwa syosukuru sy’ekiteokrasi, aliwe isindi nathalengekania indi ingathunga olhusunzo lhubuyanga olhw’erikangirirya okwa syosukuru esi.

Enyuma waho, munakolha ng’omulebererya w’edistrikiti. Endegheka eyo yabere yahwaho, munasuba omwa bulebererya bw’omuthimbo. Neryo ahabw’emyaka eyilhabire omu 30, nabiritsemera erikolha ng’omukangirirya kandi mulebererya oyukabalhama. Esyonzunzo esi syabirinyirethera mighisa mingyi. Aliwe, sibugha ambu obuli kindu kyabya kyolho. Leka ngasoborere.

Ngali mundu oyughumire. Eki kyabirileka ingathoka erighumira emibere eyikalire. Aliwe okwa bundi buthuku, hakanayira ingalhabirirania ingalengaho erihengulha emyatsi eyihambire okwa bithunga. Okwa bundi buthuku, iningahathikana indi abandi banze abandi n’eribakangania obuyitheghererya. Eky’obulighe, obo bw’obuthuku naghe ngalemawa erikangania emibere iyan’eyo.—Abar. 7:21-23.

Busana n’erilemererwa lyaghe, ihakanayira ingayiponera kutsibu. (Abar. 7:24) Buthuku bughuma, munabwira Yehova omwa musabe indi nganzire ingaleka obumisyonare ingasuba e Finland. Erigholho-gholho eryo, munaghenda okwa mihindano. Erihumulikania eryo n’ahebawa mulyanyilighisya ngoku ngatholere ingasighalha ingane omwa mubiiri w’obumisyonare n’erilholha embere eryuwania erilemererwa lyaghe. Erihika na lino, emibere Yehova asubirayamo omusabe eyo kikanyihambako kutsibu. Ery’ongera okw’ekyo, ngasima kutsibu emibere yiwe y’olhukeri eyo abirinyiwathikiryamo erirwanisya erilemererwa lyaghe.

Ingye na Sirkka thukasima Yehova ya kutsibu busana n’erithuha olhusunzo lhw’erikolesya obuthuku bungyi bw’engebe yethu omwa mubiiri w’omughulhu wosi. Kandi ngasima Yehova busana n’erinyihererya omukali w’olhwanzo kandi omuthaleghulha habw’emyaka yosi eyi.

Ngakisiya ingahikya emyaka 70 kandi ngendi leka olhusunzo lhwaghe ng’omukangirirya kandi mulebererya oyukabalhama. Nomwabine, eki sikirinyighunza amani. Busana naki? Kundi ngakakasirye ngoku kutsibu-tsibu ekikaha Yehova y’ekitsumbi ly’erimukolera iwunasi aho amaaka wawu akasubulira kandi ngoku thukamupipa ithunawithe omuthima w’olhwanzo kandi ow’erisima. (Mika 6:8; Mk. 12:32-34) Eriha Yehova y’ekitsumbi, sithuliyithagha eribya n’olhusunzo lhw’embaghane.

Ngabya ingalengekania okwa syonzunzo esyo nabirihebwa, ngaminya ngoku singahebawasyo habw’eribya ingali w’omughaso kwilhaba abandi; kutse singahebawa esyonzunzo esi habw’eribya ingawithe amaaka malebe w’embaghane. Ekyo kwa kithe kithya! Omwakanya k’ekyo, Yehova anyiha esyonzunzo esi busana n’olhukogho lhwiwe. Mwanyiha esyonzunzo esi nomunganawithe erilemererwa. Ngakyasi ngoku nabirithoka eriberererya esyonzunzo esi busana n’obuwathikya bwa Yehova busa. Omwa nzira eyi, erilemererwa lyaghe lyabirikangania ngoku Nyamuhanga ni w’amaaka.—2 Kor. 12:9.