1. Eparadiso y’obunyakirimu niki, kandi thutholere ithwathwamu erikolhaki?

 MUNABWIRE okwa kihugho kune eparadiso eyiri mw’abandu abanemukolha emibiiri minene. Y’oswiremo abandu abawithe obuholho bw’okwenene. Ababiringira omwa Paradiso eyi babirithwamu erithendi sighaniayo. Kandi banzire abandu bangyi ngoku kyanga thokekana eribayiyungako omwa mibere y’embaghane eyi. Emibere y’embaghane eyi y’eyahi? Eparadiso y’obunyakirimu! a

2. Ni kyahi ekikaswekaya ekihambire okwa paradiso y’obunyakirimu?

² Ekikaswekaya, Yehova abirihiraho omwanya owathalhangirika, omo abandu biwe bali omwa buholho nomwakine indi bali omwa kihugho kya Sitani eky’oswiremo eriponangana, obubi, kandi ekyakabi. (1 Yn. 5:19; Erib. 12:12) Nyamuhanga wethu w’olhwanzo akabya inianalhangire ngoku omughulhu mubi ono akathuhambako nabi kandi akathuha obutheya obo thukayithagha nuku thukulha-kulhane bunyakirimu. Ekinywe kiwe kikakanaya okwa paradiso y’obunyakirimu ng’omwanya ‘w’erisaghiramo’ kandi ‘ng’eririma lyahirawamo amaghetse.’ (Isa. 4:6; 58:11) Busana n’emighisa ya Yehova, abali omwa paradiso eyi bakathoka eribya ibanatsemire kandi ibane omwa butheya omwa biro by’enyuma-nyuma bino ebikalire.​—Isa. 54:14; 2 Tim. 3:1.

3. Ebiri omu Isaya esura 65 mubyabererera bithi omurundi w’erimbere?

³ Erilhabira omwa muminyereri Isaya, Yehova mwasoborera emibere eyo abali omwa paradiso y’obunyakirimu bangaberemo. Wangana bana erisoborera eri omu Isaya esura 65, eyathunga eribererera ly’erimbere omwa 537 E.K.K. Okwa buthuku obo, Abayuda mubalhwikwa erilhua omwa bunyewa mwe Babeli neryo bamasuba ewabu. Yehova mwatsumulha abandu biwe  kandi amabawathikya erithasy’uwania e Yerusalemu n’erisuba-subania ehekalu owabya mwanya mukulhu w’eriramiryamo omwa Israeli.​—Isa. 51:11; Zek. 8:3.

4. Eribererera lya Isaya esura 65 erya munabwire ly’eryahi?

⁴ Eribererera lyakabiri ery’obuminyereri bwa Isaya lyabya omwa 1919 E.K., omughulhu abaramya ba Yehova abamunabwire balhua omwa bunyewa bw’Ebabeli Mukulhu. Neryo e Paradiso y’obunyakirimu muyatsuka erilhandaghana omwa kihugho kyosi. Abathuliri b’obwami ab’omuhwa mubatsukisya ebithunga bingyi kandi bamatsuka erikangania emibere y’Ekikristayo. Abalhume n’abakali ababya balhwi kandi batswatswa mubabya “bandu bahya-bahya abahangikawa omwa kisosekanio kya Nyamuhanga.” (Efe. 4:24) Ni kwenene, emingyi y’okwa mighisa eyo Isaya akanayako yikendi syathunga eribererera eryonyine-nyine omwa buthuku obukasa omwa kihugho kihya-kihya. Aliwe na lino thukaghasirawa kutsibu. Thulebaye eparadiso y’obunyakirimu eyi nga yikathuhambako yithi n’ekikaleka ithwabya isithutholere erisighaniayo.

EMIBERE EYO ABALI OMWA PARADISO Y’OBUNYAKIRIMU BAKABYAMO

5. Ngoku kyabughawa omu Isaya 65:13, ni byahi ebyo thukatsemera omwa paradiso y’obunyakirimu?

⁵ Eribya ibanemulisibwa ndeke bunyakirimu n’erihumulikanibwa. Obuminyereri bwa Isaya bukakanganaya embaghane eyilhangirikire eyiri ahakathi-kathi k’engebe eyo abali omwa paradiso y’obunyakirimu balimu n’engebe yabo abali eyiihya wayo. (Soma Isaya 65:13.) Yehova akaha abaramya biwe b’ebiyithawa bingyi by’obunyakirimu. Thuwithe omulimu wiwe abuyirire, Ekinywe kiwe, n’ebyalya bingyi eby’obunyakirimu, neryo ‘thwanganalya, . . . ithwapulya, . . . [kandi] ithwatsema.’ (Thasyalebaya na Eribisulirwa 22:17.) Mbaghane n’ekyo, abali eyihya w’eparadiso y’obunyakirimu ‘bakwire enzalha . . . , enyotha . . . , [kandi] basyahemuka.’ Sibawithe ebiyithawa byabu by’obunyakirimu.—Amo. 8:11.

6. Ebiri omu Yoeli 2:21-24 bikasoborera bithi eby’obunyakirimu ebyo Yehova akathuha, kandi byanga thughasira bithi?

⁶ Omwa buminyereri bwiwe, Yoeli mwakolesya ebindu ebikayithaghisibawa ng’engano, ebinyu, n’amaghutha erikakangania ngoku Yehova akaha abandu b’ebiyithawa byabu ahathe eriyikukumirira, imwamune ebyalya by’obunyakirimu. (Yoe. 2:21-24) Akakolha ekyo erilhabira omwa Biblia n’ebitabu ebiseghemere okwa Biblia, omuthahulha wethu we Intaneti, kuthya n’emihindano emike-mike n’eminene-minene. Thwanganalya okwa byalya by’obunyakirimu ebi obuli kiro, kandi busana n’ekyo, ithwayowa ndeke bunyakirimu n’eribya buholho.

7. Ni kyahi ekikaleka ithwathunga “obutseme bw’omuthima”? (Isaya 65:14)

⁷ Eribya ibanatsemire n’eritsemera ebyo bawithe. Abandu ba Nyamuhanga ‘bangan’utha obwogho bw’obutseme’ kundi emithima yabu yiri mw’erisima linene. (Soma Isaya 65:14.) Ekwenene eyikahimba n’emilhaghe eyikahumulikanaya eyiri omwa Kinywe kya Nyamuhanga kuthya n’amaha wethu awaghumire ebiseghemere okwa ndongolya y’ekihongo kya Kristo bikaleka ithwathunga “obutseme bw’omuthima.” Erikania okwa bindu ebi ithune n’abalikyethu ab’obunyakirimu kikaleka ithwatsema kutsibu!—Esy. 34:8; 133:1-3.

8. Ni bindu byahi bikulhu bibiri ebikaminyikalhaya eparadiso y’obunyakirimu?

⁸ Ebindu bibiri bikulhu-bikulhu ebikaminyikalhaya eparadiso y’obunyakirimu lhw’olhwanzo n’obughuma ebiri omwa bandu ba Yehova. Obughuma bukaleka ithwathera akasasani engebe nga yikendisyabya yithi omwa kihugho kihya-kihya, omo abaghombe ba Yehova  bakendi syabya n’obughuma n’olhwanzo lhunene kwilhaba munabwire. (Kol. 3:14) Mwali wethu Omukristayo akakanaya okwa kindu ekyo alhangira okwa bandu ba Yehova akatsuka eribanangana nabo: “Isingasi eritsema, nibya n’omwa famile yaghe. Abandu ba Yehova bo natsuka erilhangira bakakangania olhwanzo omwa mikolere.” Owosi-wosi oyuwanzire eribana etseme y’okwenene n’eritsemera ebyo awithe atholere iniabya omwa paradiso y’obunyakirimu. Ekihugho nomukyangabya n’amalengekaniaki okwa baghombe ba Yehova, bawithe erina libuya embere sya Yehova n’abosi abakamuramaya.—Isa. 65:15.

9. Ni mulhaghe wahi owahambire okwa bitsibu by’engebe owali omu Isaya 65:16, 17?

⁹ Erithekana. Isaya 65:14 hakabugha hathi abakathwamu erisighalha eyihya w’eparadiso y’obunyakirimu “basyalira omwa bulighe bw’omuthima, kandi basyayilhakira busana n’ekirimu kibbunikire.” Kandi ibbwa ebindu byosi ebyabirileka abandu ba Nyamuhanga ibabya omwa bulhumi n’obulighe? Erighunzerera, ebindu byosi ebyo ‘sibyendi syasibukwa [kandi] bibisamire okwa meso wa [Nyamuhanga].’ (Soma Isaya 65:16, 17.) Yehova akendi syaghunzaho ebitsibu byethu ebyosi, kandi obuthuku bunemulhaba obulhumi obukasa busana n’eryibuka ebindu ebyo bukendi syahweraho ighuma.

10. Busana naki wukayowa ini mughisa eribya haghuma n’abalikyethu Abakristayo? (Lebaya n’ekisasani.)

¹⁰ Nibya nalino, erighenda okwa mihindano yethu kikaleka ithwahumulikana, ithwathekana, n’erithendi lengekania okwa bitsibu by’ekihugho kibi kino. Thukaleka balikyethu ibathekana thwamakangania emibere ng’olhwanzo, obutseme, obuholho, obwenge, n’omuthima mwolho ebiri omwa kighuma ky’omulimu abuyirire wa Nyamuhanga. (Gal. 5:22, 23) Ka ni mughisa eribya omwa kithunga kya Nyamuhanga! Abakasighalha omwa paradiso y’obunyakirimu bakendisya yilhangirira eribererera ly’omulhaghe wa Nyamuhanga ‘ow’olhubulha lhuhya-lhuhya n’ekihugho kihya-kihya’ omwa buswire.

11. Ngoku kiri omu Isaya 65:18, 19, eparadiso y’obunyakirimu eyo Yehova abirihiraho yitholere iyathuhambako yithi?

¹¹ Erisima n’eritsema. Isaya akabisulha esyonzumwa esikaleka ithwabya ‘b’eritsema n’eritsanga’ omwa paradiso y’obunyakirimu. Nyamuhanga yuwahiraho eparadiso eyi. (Soma Isaya 65:18, 19.) Sikiriswekaya eribya iniakathukolesaya eriwathikya abandu erilhua omwa bithongole by’ekihugho ebirimo enzalha y’obunyakirimu n’erib’ingirya omwa paradiso y’obunyakirimu eyuwenenga! Thukatsema busana n’emighisa eyo thukabana ahabw’eribya omwa kwenene, kandi thukanza ithwabwira abandi ba kuyo.—Yer. 31:12.

12. Emilhaghe eyikanibweko omu Isaya 65:20-24 yikaleka iwayowa wuthi, kandi busana naki?

 ¹² Ithwe ng’abali omwa paradiso y’obunyakirimu thukatsemera amaha wethu. Thalengekania okwa byosi ebyo thukendi syalhangira n’erikolha omwa kihugho kihya-kihya kya Nyamuhanga! E Biblia yikalhaghanisaya yithi: “Sihendi syaswabya lhumekeke olhw’ebiro bike, kutse musyakulhu oyuthe waberererya ebiro biwe.” ‘Thwasyahimba amanyumba n’erikalha mugho. Thwasyahera amalima w’ebinyu n’erirya ebighuma bwagho.’ Sithwendi “syakolera busa” kundi ‘Omwami Mukulhu asyathutsumulha.’ Akathulhaghanisaya obutheya, engebe eyiri mw’etseme kandi eyiwithe ekighendererwa. ‘Thuthe thwabirikira,’ akendi syaminya ebiyithawa by’obuli mundu kandi “akughuthaya obwagha bw’abosi.”—Isa. 65:20-24; Esy. 145:16.

13. Ebiri omu Isaya 65:25 bikakanganaya bithi esyombinduka esyo abandu bakakolha bakatsuka erigha ekwenene?

¹³ Eribya omwa buholho n’obutheya. Omwa buwathikya bw’omulimu wa Nyamuhanga, abangyi abo kera babya bawithe emibere eyiri ng’ey’ebisoro babirikolha esyombinduka nene-nene omwa syongebe syabu. (Soma Isaya 65:25.) Babirileka emibere yabu mibi eyakera. (Abar. 12:2; Efe. 4:22-24) Nomwabine, abandu ba Nyamuhanga sibahikene, neryo thukendi lholha embere erisobya. Aliwe, Yehova abiriletha “abandu bosi” omwa bughuma obuthethwika obuli mw’olhwanzo n’obuholho. (Tito 2:11) Eki ni kithiko-thiko ekyanga kolhwa na Nyamuhanga omuthoki w’Ebyosi musa!

14. ?Ebiri omu Isaya 65:25 mubyabererera bithi oku mughalha wethu mughuma?

¹⁴ Mbwino kwenene abandu bangana hindulha emibere yabu? Thalengekania okwa kyalholirweko kino. Omulhwana oyuwabya akabera erihirwa omwa ngomo athali ahikya emyaka 20, mwasangira kutsibu omwa butswatswa kandi ini mutsurumi. Mwabohwa busana n’eriba ematoka, erithwa amanyumba w’abandu, n’eyindi misango eyikalha-kalire. Iniakabya inianayitheghekire erilhwa n’omundu wosi-wosi. Abere akatsuka erigha ekwenene ye Biblia n’eritsuka erihindana okwa mihindano y’Abema ba Yehova, mwaminya ngoku abiribana ekindu ky’obughuli—eparadiso y’obunyakirimu. Abere abiribya Mwema oyubatizibirwe, iniakabere erilengekania oku Isaya 65:25 nga hakamuhambako hathi. Abya iniabirihindulha engebe yiwe erilhua okw’ibya ng’endale, omundu oyutsurumire amabya ng’ekyana ky’embuli, omundu w’obuholho.

15. Busana naki thwanzire ithwakokya abandi erithuyiyungako omwa paradiso y’obunyakirimu, kandi thwanga kolha ekyo kya thuthi?

¹⁵ Isaya 65:13 hakatsuka n’ebinywe bino: “Omwami Mukulhu athi.” Omulhondo 25 akaghunzerera n’ebinywe bino: “Omwami Mukulhu athya.” Ebinywe biwe bikabererera. (Isa. 55:10, 11) Eparadiso y’obunyakirimu yineho. Yehova abirihiraho olhughanda lhw’abalikyethu olhuli mbaghane. Omughulhu thuli n’abandu biwe, thukabana akaholho kandi ithwabya ithune omwa butheya omwa kihugho kibi kino. (Esy. 72:7) Busana n’esyonzumwa esi, thwanzire eriwathikya abangyi ngoku thwanga thoka erithuyiyungako omwa lhughanda lhwethu lhw’Ekikristayo. Thwangana kolha ekyo omw’ihwerya amalengekania w’okw’iyira abigha.—Mt. 28:19, 20.

EBYO THWANGAKOLHA EBYANGALEKA ABANDI IBANZA ERIYIYUNGA OKWA PARADISO Y’OBUNYAKIRIMU

16. Abandu bakalethawa bathi omwa paradiso y’obunyakirimu?

¹⁶ Obuli mughuma w’okw’ithwe awithe olhukwamirwa lhukulhu olhw’erikolha nuku abandi banze eryasa omwa paradiso y’obunyakirimu. Thwangana berererya olhukwamirwa olhu thwamagherererya Yehova. Syalikaka abandu  eryasa omwa kithunga kiwe. Omwakanya k’ekyo, omwa bolho-bolho ‘akayilethako’ abandu. (Yn. 6:44; Yer. 31:3) Abandu b’emithima myolho abak’igha okwa lhwanzo lhwa Yehova n’emibere yiwe eyuwene bakamwasako ahathe erikakwa. Emibere yethu eyuwene n’ebibuya ebya thukakolha byangaleka bithi abandu ibanza eryasa omwa paradiso y’obunyakirimu?

17. Thwangaleka thuthi abandi ibanza eryasa omwa paradiso y’obunyakirimu?

¹⁷ Enzira nguma eyo thwangalekeramu abandi ibanza eryasa omwa paradiso y’obunyakirimu ly’erikangania abaramya balikyethu b’olhwanzo n’olhukeri. Abahyaka bamahindana okwa mihindano yethu y’ekithunga, thwanzire ibabya n’eriyowa ng’ery’abathabya b’ikirirye abangabya imubahindana okwa mihindano omwa Korinto ya kera. Mubabugha bathi: “Kwenene Nyamuhanga ali omo kathi-kathi kenyu.” (1 Kor. 14:24, 25; Zek. 8:23) Busana n’ekyo, thutholere ithwaghendera okw’ihabulha ly’eribya ‘n’obuholho omo kathi-kathi kethu.’—1 Tes. 5:13.

18. Ni kyahi ekyangaleka abandu ibasa omwa kithunga kyethu?

¹⁸ Mughulhu wosi thutholere ithwalengaho erilhangira Abakristayo balikyethu ngoku Yehova akabalhangira. Thukakolha ekyo omw’ihwerya amalengekania okwa mibere yabu mibuya omwakanya k’ebisobyo byabu, ebyo erighunzerera bikendi syahwaho. Omwa lhwanzo, thwangana ghunzaho erithendi yitheghererangania lyosi-lyosi eriri ahakathi-kathi kethu thwamabya ithune ‘n’emithima eyihehere, n’eribuyirana.’ (Efe. 4:32) Neryo abandu abanzire erithwalhwa omwa mibere eyiri ng’eyo ibakendyanza eryasa omwa paradiso y’obunyakirimu. b

 SIGHALHA OMWA PARADISO Y’OBUNYAKIRIMU

19. (a) Ngoku kikanganibwe omwa kasanduko “ Mubaghenda Kandi Bamasubulha,” ni byahi eby’abandi babiribugha enyuma w’erisuba omwa paradiso y’obunyakirimu? (b) Thutholere ithwathwamu erikolhaki? (Lebaya n’ekisasani.)

¹⁹ Thukatsemera eparadiso y’obunyakirimu! Lino yuwene kwilhaba kera, kandi yirimo abaramya ba Yehova banene kwilhaba kera. Kwesi thulhole embere erihika kera na kera eritsemera eparadiso eyo Yehova abirithuhiriraho. Owosi-wosi oyukanza erihumulikanibwa, eritsema, erithekana, n’eribya omwa butheya atholere iniasa omwa paradiso y’obunyakirimu n’erithendi sighaniayo! Nomwabine, minya ngoku Sitani anemulengaho erithuthebererya nuku thulhwe muyo. (1 Pet. 5:8; Erib. 12:9) Sithutholere thukamulighira akasingura. Thukole kutsibu eritheya obubuya, obubuyirire, n’obuholho bw’eparadiso y’obunyakirimu.