1. Abandi bakayowa bathi bikahika okw’ikania n’abandi omw’ithulira? (Lebaya n’ekisasani.)

 NG’ABANDU ba Yehova, thukathulira abandi kundi thwanzire Thatha wethu w’elhubulha kandi thwanzire ithwawathikya abaliranwa bethu erimuminya. Omo kwenene, abathuliri bangyi bakatsemera omubiiri w’erithulira. Aliwe kikanakalira abandi eritsemeragho. Busana naki? Abandi ibanganakwa esisoni kutse ibayowa nga sibanga thoka. Abandi sibali yowa buholho erighenda omwa miyi y’abandu isibathakokibwa. Abandi bangana sagha bathi ibangana ghana eribahulikirira. Abandi babirikangiriribwa eriyihighulha okw’ikakalhukana n’abandi. Nomwakine indi banzire Yehova ya kutsibu, kikanakalira balikyethu aba eribwira abandu abo bathe bathalholhako okwa ngulhu yuwene. Nomwabine, banasi ngoku omubiri oyu ni mukulhu, kandi bakasangira mugho mughulhu wosi. Yehova katholere eribya iniakatsema!

2. Kyamabya ikikakukalira eribana etseme omw’ithulira, busana naki siwutholere wukahwa amani?

² Mbwino hakanayira ikyakukalira eribana etseme omw’ithulira busana n’eriyowa ng’eryo? Kyamabya ikwakiri kithya, isiwahwa amani. Iwe eriyowa nga siwanga thoka kyangana kangania ngoku omw’iyikehya siwanzire eriyihweryako amalengekania kandi siwanzire erithera obuhaka n’abandi. Kandi sihali oyuwanzire abandi bakaghana erimuhulikirira, kutsibu-tsibu amabya iniakanza eribakolera ekibuya. Thatha wawu w’elhubulha anasi ndeke eriyowa lyawu kandi anzire iniakuha obuwathikya obo wukayithagha. (Isa. 41:13) Omwa mwatsi ono, thukendi kania okwa bindu bithano ebyanga wathikya ebihambire okw’ighumira eriyowa ng’eryo kandi ngoku thwangabana etseme omw’ithulira.

 LEKA EKINYWE KYA NYAMUHANGA KIKUGHUMAYE

3. Ni kyahi ekyawathikaya omuminyereri Yeremia erithulira abandi?

³ Ahabw’emyaka mingyi, omwatsi wa Nyamuhanga abiribya inianemughumya abaghombe biwe omughulhu bawithe omubiiri owakalire ow’erikolha. Thalengekania okwa ky’erileberyako ky’omuminyereri Yeremia. Mwasagha omughulhu Yehova amuha olhukwamirwa lhw’erithulira. Yeremia mwabugha athi: “Sinyasi eribugha, kusangwa indi mulhwana.” (Yer. 1:6) Ni kyahi ekyamuwathikaya erithulira buthubaha? Ekinywe kya Nyamuhanga mukyamuha amaaka. Mwabugha athi: ‘Kiri ng’omuliro owakaghulhumira owabohere omo makuha waghe, naghe namalhuha eriyiyinia.’ (Yer. 20:8, 9) Nomwakine indi obulhambu bwa Yeremia bwabya mw’abandu abakalire, omwatsi ogho abwirawa indi athule mwamuha amaaka agho ayithagha nuku akole omubiiri.

4. Ni kyahi ekikabya thukasoma Ekinywe kya Nyamuhanga n’erikighaniryako? (Abanya Kolosai 1:9, 10)

⁴ Ekinywe kya Nyamuhanga kikaha Abakristayo b’amaaka. Akahandikira ekithunga kye Kolosai, omukwenda Paulo mwabugha athi erigha ekwenene kyangahirire omu balikyabo mw’omuhwa ‘w’erilendera ngoku Omukama anzire’ banemulholha embere “erikolha emibiiri yosi mibuya ya Nyamuhanga.” (Soma Abanya Kolosai 1:9, 10.) Emibiiri mibuya eyi mwamuli erithulha engulhu yuwene. Neryo omughulhu thukasoma Ekinywe kya Nyamuhanga n’erikighaniryako, erikirirya lyethu omu Yehova likaghuma kandi thukaminya ekikaleka ikyabya kikulhu eribwira abandi b’engulhu yuwene.

5. Thwanga ghasirwa thuthi omw’isoma e Biblia n’eriyeghesya?

⁵ Erithoka erighasirwa omwa Kinywe kya Nyamuhanga, thutholere ithwayihighulha okw’iharabana thukasoma, thukayeghesya, n’erighanirya. Yithondolhaye. Wamasoma erisako erikakukalira eriyitheghererya, isiwalikyuruka. Omwakanya k’ekyo, kolesaya e Watch Tower Publications Index kutse Obusondoli obw’Erisekulya Omwa Bitabu eby’Abema ba Yehova nuku wubane erisoborera erihambire okw’isako eryo. Wamayithondolya wukayeghesya, iwukendi ghumya eriyikethera lyawu ngoku Ekinywe kya Nyamuhanga kihikire. (1 Tes. 5:21) Wukabya wuk’ongera eriyikakasirya ngoku e Biblia yihikire, kwa wukan’ongera wuthya eritsemera eribwira abandi okwa bya wuk’igha.

 YITHEGHEKERE NDEKE ERITHULIRA

6. Busana naki thutholere ithwayitheghekera ndeke erithulira?

⁶ Wamayitheghekera ndeke erithulira, iwangana kania n’abandi isiwukwire buba. Yesu mwawathikya abigha biwe eriyithegheka athali abathuma omw’ithulira. (Lk. 10:1-11) Ahabw’eribya imubaghendera okwa bya Yesu abakangiriraya, abigha mubatsema kutsibu busana n’ebyo bathoka erikolha.—Lk. 10:17.

7. Thwanga yitheghekera thuthi erithulira? (Lebaya n’ekisasani.)

⁷ Thwanga yitheghekera thuthi erithulira? Thutholere ithwalengekania okwa ebya thukendi bugha, kandi ithwabibugha omwa mibere y’obuli kiro n’omwa binywe byethu. Kandi ni ky’omughaso erilengekania okwa by’erisubirya bibiri kutse bisathu ebikanyirire omwa bandu abali omwa bulhambo kandi ithwaminya nga thwanga subirya thuthi okwa buli kighuma. Neryo thukakania n’abandu, thwangana lengaho erithekana, erisenyenyia, n’eribanywana.

8. Abakristayo bali bathi ng’omubiiri w’ekithaka owakanibweko omwa ky’erileberyako kya Paulo?

⁸ Omukwenda Paulo mwasoborera olhukwamirwa lhwethu omwa mubiiri w’erithulira omughulhu abugha athi: “Ithwe thuwithe obutheke [eby’obughuli] obu omwa mubiiri w’ekithaka.” (2 Kor. 4:7) Eby’obughuli ebi by’ebyahi? W’omubiiri owakalhamaya esyongebe ow’erithulha engulhu yuwene. (2 Kor. 4:1) Omubiiri w’ekithaka ni bahi? B’abaghombe ba Nyamuhanga, abakabwira abandi b’engulhu yuwene. Omwa buthuku bwa Paulo, abasuburi ibakakolesaya ehinagha eriheka ebindu by’obughuli, ng’ebyalya, obwabu, n’esyosente. Kuthya, Yehova akathuha omwatsi w’obughuli ow’engulhu yuwene. Omwa buwathikya bwa Yehova, thwangana thunga amaaka awakayithaghisibawa erithoka erithulha omwatsi wethu buthaleghulha.

SABA ERIHEBWA OBUTHUBAHA

9. Thwanga singura thuthi ery’ubaha abandu n’erisagha thuthi bakendi ghana erithuhulikirira? (Lebaya n’ekisasani.)

⁹ Okwa bundi buthuku, ithwangana sagha abandu kutse erisagha thuthi bakendi ghana erithuhulikirira. Thwanga singura thuthi ekitsibu ekyo? Thalengekania okwa musabe w’abakwenda omughulhu babwirawa indi isibathulira. Omwakanya k’erisagha, mubasaba Yehova bathi abawathikaye ‘babughe ekinywe  kiwe n’erithendyubaha lyosi.’ Aho naho Yehova mwasubirya emisabe yabu. (Emib. 4:18, 29, 31) Hamayira thukasagha abandu, nethu thutholere ithwasaba Yehova y’obuwathikya. Saba Yehova nuku olhwanzo olho wuwithire abandu lhusingure ekitsibu ky’erisagha abandu.

10. Yehova akathuwathikaya athi eriberererya olhukwamirwa lhwethu ng’Abema biwe? (Isaya 43:10-12)

¹⁰ Yehova abirithusombolha eribya Bema biwe, kandi akayilhagha erithuwathikya eribya bathubaha. (Soma Isaya 43:10-12.) Thalengekania okwa syonzira ini nyisa esyo akakoleramo ekyo. Eky’erimbere, Yesu akabya iniane nethu thukathulha engulhu yuwene. (Mt. 28:18-20) Ekyakabiri, Yehova abirisombolha abamalaika erithuwathikya. (Erib. 14:6) Ekyakasathu, Yehova abirithuha omulimu wiwe abuyirire ng’omuwathikya w’erithwibukya ebyo thwabir’igha. (Yn. 14:25, 26) Ekyakani, Yehova abirithuha balikyethu erikolha haghuma nethu. Omwa buwathikya bwa Yehova n’obw’olhughanda lhw’abalikyethu ab’olhwanzo, thunawithe ebyosi ebyo thukayithagha eribya bathubaha n’erilholha embere erithulira.

GHENDA-GHENDANAYA N’EMIBERE EYIRIHO, KANDI IBYA N’AMALENGEKANIA AWATHOLERE

11. Iwune omw’ithulira, wanga kolhaki eribana abandu bangyi? (Lebaya n’ekisasani.)

¹¹ Wukanahwa amani wameya okwa miyi mingyi isikuli bandu? Busana naki iwuthayibulya wuthi: ‘Abandu b’omwa bulhambu bwaghe bakabya hayi okwa ndambi eno?’ (Emib. 16:13) ‘Mbwino bali okwa mubiiri kutse babirighenda omwa kathali?’ Kyamabya ikwakiri kithya, mbwino siwanga bana abandu bangyi wamathulira okwa nzira? Mughalha wethu oyukahulhawamo Joshua akabugha athi, “Nabiribana ehighisa hingyi ehy’erithulira ingalhaba ahali amaduka mangyi n’ahakimana esyomatoka nyingyi.” Iyo na mukali wiwe, Bridget, babiribana bandu bangyi omwa miyi bakathulira omw’igholho na Kyasande omw’ithungyi.—Efe. 5:15, 16.

12. Thwanga minya thuthi ebyo abandu bikirirye n’ebyo banzire eriminya?

¹² Abandu bamathendi kangania ery’anzisibwa, lengaho eriminya ebyo bikirirye kutse ebyo banzire eriminya. Joshua na Bridget bakakolesaya ekibulyo ekiri embere  okwa trakit nuku batsukisaye omukania. Ng’eky’erileberyako, bakabya bakakolesya e trakit E Biblia wukalhangirayo wuthi? bakabugha bathi: “Abandi bakalhangira e Biblia ng’ekitabu kya Nyamuhanga, n’abandi ibakathika-thika. Iwe wuwithe amalengekaniaki?” Ekyo kikaleka ihabya erikanirania.

13. Busana naki thutholere ithwayilhangira ng’ababiribana ebibuya omw’ithulira nibya n’omughulhu abandu sibathahulikirira? (Emisyo 27:11)

¹³ Ithwe eribana ebibuya omw’ithulira sikiseghemere okwa bikalhwiririramo. Busana naki? Kundi thukabya ithwabirikolha ekya Yehova na Mughalha wiwe banzire ithwakolha—thukabya ithwabiriha obwema. (Emib. 10:42) Nibya n’omughulhu sithuthabana ow’erikania nayu kutse omughulhu omwatsi wethu amaghanwa, thwangana tsema kundi thunasi ku thukatsemesaya Thatha wethu w’elhubulha.—Soma Emisyo 27:11.

14. Busana naki thutholere ithwatsema owundi muthuliri amabana omwa bulhambu mw’oyukanzisibawa?

¹⁴ Kandi thwangana tsema owundi muthuliri amabana omwa bulhambu mw’omundu oyuwanzisibirwe. Akaleberyo kakalinganisaya omubiiri wethu n’erisondya omwana oyuwabirithalha. Ni bandu bangyi abakamusondaya, kandi bakamusondaya ehosi-hosi. Akabya akabanika, oyulyamubana musa s’iyo akatsema—abosi bakatsema. Kuthya, omubiiri w’eriyira abigha ni w’erikolera haghuma. Abosi bakayithaghisibawa erithoka erighunza obulhambu, kandi abosi bakatsema omuhyaka akatsuka erihindana.

HWERAYA AMALENGEKANIA OKWA LHWANZO OLHO WUWITHIRE YEHOVA N’ABANDU

15. Erighendera okwa biri omu Matayo 22:37-39 kyanga thuwathikya kithi eryongera omuhwa wethu w’erithulira? (Lebaya n’ekisasani ky’okwa .)

¹⁵ Thwangan’ongera omuhwa wethu omwa mubiiri w’erithulira omw’ihwerya amalengekania okwa lhwanzo olho thuwithire Yehova n’abandu. (Soma Matayo 22:37-39.) Thalengekania Yehova ng’akatsema bungahi akalhangira thukakolha omubiiri kandi abandu ng’abanga tsema bungahi bakatsuka erigha e Biblia! Kandi lengekanaya okwa ky’eribya abandu abakathuhulikirira ibakendi syalhamibwa.—Yn. 6:40; 1 Tim. 4:16.

16. Thwangabya thuthi ithunatsemire omughulhu sithwanga thoka erilhua eka? Iha eky’erileberyako.

¹⁶ Mbwino siwanga thasyathoka erilhua eka busana n’esyonzumwa ndebe? Kyamabya  ikwakiri kithya, hira amalengekania w’okwa ebyo wangakolha erikangania ku wanzire Yehova n’abandu. Omwa buthuku bw’ekihunzo ky’ekorona [COVID-19], Samuel na Dania mubakingirwa ewabu. Omwa buthuku obukalire obo, ibakabya ibanemuthulira okwa simu, erihandika esyobaruha, n’erisondolha abigha be Biblia okwa Zoom. Samuel iniakathulira abo abya akeya okwa sipatara eyo abya akathambirirwako ekansa. Akabugha athi: “Ebitsibu bikathughunza amani omwa bulengekania, kinyamubiri, na bunyakirimu. Thutholere ithwatsema thukakolera Yehova.” Ebyo bine aho, Dania mwayithinira kandi amahirwa okwa ngyingo ahabw’amezi asathu. Neryo mwayithagha eribya omwa kaggali k’abalema ahabw’amezi mukagha. Akabugha athi: “Munalengaho erikolha ebyosi ebyo nangathoka omwa mibere eyo ngalimo. Munathoka erithulira omunasi oyo wabya akanyibungira, kandi iningakanaya n’ababya bakathulethera ebindu. Kandi munathoka eribya ingakanirania okwa simu n’oyukakolera aho bakaghuliraya emibatsi.” Emibere eyo Samuel na Dania babyamo muyaleka ibathakolha bingyi, aliwe mubakolha ngoku banga thoka kandi mubabana etseme bakakolha ekyo.

17. Wanga ghasirwa wuthi ndeke omwa menge awamahebwa omwa mwatsi ono?

¹⁷ Amenge awamahebwa omo mwatsi ono akakolha ndeke amakolesibirwa haghuma. Obuli nzumwa yiri ng’ekindu ekikakolesibawa wukatsumba ebyalya birebe. Ebyosi ebikakolesibawa wukatsumba ebyalya byamahirwa haghuma, ebyalya ibikendi siha. Omw’ikolesya amenge wosi aya, ithukendi thoka erighumira eriyowa erithuwene n’eryongera eribana etseme omw’ithulira.