1. Abandu ba Yehova omwa kighana ky’erimbere mubabya bathi omwa buyithondeke?

 YEHOVA akabya amaha abandu biwe b’omubiiri, akanza ibakolhagho omwa buyithondeke. (1 Kor. 14:33) Ng’eky’erileberyako, n’isonda lya Nyamuhanga engulhu yuwene erithulhughanibwa omwa kihugho kyosi. (Mt. 24:14) Yehova abirisombolha Yesu erisondolha omubiiri oyo. Yesu akalhangira athi omubiiri oyu akakolhawa omwa buyithondeke. Omwa kighana ky’erimbere, ebithunga byabere binemutsukisibwa omwa myanya muthina-muthina, abasyakulhu mubasombolhwa nuku bahe obusondoli n’erisondolha. (Emib. 14:23) Akathunga k’abasyakulhu akabya e Yerusalemu, akabyamo abakwenda n’abasyakulhu, ikakakolha erithwamu eryo abosi omwa kithunga babya batholere erighenderako. (Emib. 15:2; 16:4) Busana n’erighendera okwa busondoli obo, “esyokanisa musyabana amaaka w’omw’ikirirya, n’erighanza lyabo mulyakanya.”​—Emib. 16:5.

2. Eritsuka 1919, Yehova abiribya inianemuha athi abandu biwe b’obusondoli n’ebyalya by’obunyakirimu?

² Namunabwire Yehova akinalholha embere erihira abandu biwe b’omwa buyithondeke. Erilhua 1919, Yesu abiribya inianemukolesya egurupu nyike y’abalhume abahakabibwa eritheghekania omubiiri w’erithulira n’eriha abamukwamire b’ebyalya by’obunyakirimu. a (Lk. 12:42) Ahathe erithika-thika, Yehova anemutsumulha omubiiri w’egurupu eyo.​—Isa. 60:22; 65:13, 14.

3-4. (a) Iha eky’erileberyako ekikakanganaya nga thukaghasirawa thuthi omw’ibya omwa buyithondeke. (b) Thukendi kania okuki omwa mwatsi ono?

 ³ Ku thwabya isithuli omwa buyithondeke, sithwanga thokire erikolha omubiiri ogho Yesu abirithuha. (Mt. 28:19, 20) Ngahathya, thuthabugha thuthi ku thwabya isithuli hebawa amalhambo w’erithuliramo; obuli mundu angabere akathulira aho anzire. Awandi malhambo angabere akabera erisubwamo n’abathuliri muthina-muthina, aliwe awandi iniaghana erisyahikwamo. Wangana lengekania okwa sindi nzira esyo thwanga ghasirwamo thwamabya omwa buyithondeke?

⁴ Ebyo Yesu akolha okwa kihugho bikaleka ithwalhangira emibere akathondekanirayamo abandu ba Nyamuhanga munabwire. Omwa mwatsi ono, thukendi kania okwa ky’erileberyako ekya Yesu ahiraho kandi ekithunga kyethu ng’akine mukwama kithi eky’erileberyako ekyo. Kandi thukendi kania okwa mibere thwanga kanganiryamo ku thukasima ekithunga kya Yehova.

EKITHUNGA KYETHU KIKAKWAMA EKY’ERILEBERYAKO KYA YESU

5. Ni nzira yahi nguma eyo thukagherererayamo eky’erileberyako kya Yesu? (Yoane 8:28)

⁵ Yesu mw’ighira oku Thatha wiwe w’elhubulha ebyo angakolha n’ebyo ang’abugha. Omw’ikwama eky’erileberyako kya Yesu, ekithunga kya Yehova kikaseghemeraya esyongangirirya syakyo n’obusondoli okwa Kinywe kya Nyamuhanga. (Soma Yoane 8:28; 2 Tim. 3:16, 17) Mughulhu wosi thuk’ibukibawa erisoma Ekinywe kya Nyamuhanga n’erikighenderako. Thukaghasirawa thuthi omw’ighendera okw’ihabulha eri?

6. Ni nzira yahi ngulhu eyo thukaghasirawamo omw’iyeghesya e Biblia?

⁶ Thukaghasirawa kutsibu thwamayeghesya e Biblia omw’ikolesya ebitabu byethu. Ng’eky’erileberyako, thukathoka erilinganisya esyongangirirya sye Biblia n’obusondoli obo thukahebawa omwa kithunga. Thukabya thwamalhangira ngoku obusondoli obo thukahebawa buseghemere okwa Masako, eriyikethera lyethu omwa kithunga kya Yehova likayongera.—Abar. 12:2.

7. Ni mwatsiki ogho Yesu athulha, kandi ekithunga kya Yehova kikaghendera kithi okwa ky’erileberyako kiwe?

⁷ Yesu mwathulha “engulhu yuwene y’Obwami bwa Nyamuhanga.” (Lk. 4:43, 44) Yesu kandi mwalhaghira abigha biwe athi bathulhughanaye ebihambire okwa Bwami. (Lk. 9:1, 2; 10:8, 9) Munabwire abosi abali omwa kithunga kya Yehova bakathulha omwatsi w’Obwami nomubangabya ib’ikere hayi kutse ibawithe syongwamirwa singahi.

8. Thwabirihebwa lhusunzoki?

⁸ Thukalhangira ini lhusunzo eribwira abandi okwa kwenene eyihambire okwa Bwami bwa Nyamuhanga! Sibugha indi obuli mundu anganahebwa olhusunzo olho. Ng’eky’erileberyako, Yesu iniane okwa kihugho, mwathalighira esyombinga erimuminyikalya. (Lk. 4:41) Munabwire, omundu athali asangira omw’ithulira n’abandu ba Yehova, atholere iniatsuka eritholera erihebwa olhusunzo olho. Thukakanganaya ngoku thukasima olhusunzo olho omw’iha obwema ngoku thwanga thoka, ehosi-hosi kandi okwa ndambi yosi-yosi. Nga Yesu, ekilhubirirwa kyethu ly’erihera n’eryuthangirira embutho y’ekwenene eyihambire okwa Bwami eyiri omwa mithima y’abandu.—Mt. 13:3, 23; 1 Kor. 3:6.

9. Ekithunga kikaminyikalhaya kithi erina lya Nyamuhanga?

⁹ Yesu mwaminyikalya erina lya Nyamuhanga. Akasaba Thatha wiwe w’elhubulha, Yesu mwabugha athi: “Nabiriminyikalya erina lyawu.” (Yn. 17:26, NWT) Omw’ikwama eky’erileberyako kya Yesu, ekithunga kya Yehova  kikakolha ekyosi-kyosi ekyo kyanga thoka eriwathikya abandu eriminya erina lya Nyamuhanga. E New World Translation of the Holy Scriptures yabiriwathikya kutsibu omw’isubya erina lya Nyamuhanga omwa myanya eyo litholeremo. E Biblia eyi yineho eyosi kutse omwa bitsweka omwa mibughe eyilhabire omu 270. Omwa ndomeko A4 na A5 ey’embindulha eyi, iwukendi minya bingyi ebihambire okw’isubya erina lya Nyamuhanga omwa Biblia. Endomeko C, eyiri omwa Biblia ey’Eriyegheseryamo, yikakanganaya ndeke-ndeke ngoku erina lya Nyamuhanga litholere iryabya omwa Masako w’Ekigiriki mirundi 237.

10. Ebya omukali owe Myanmar abugha byamakweghesyaki?

¹⁰ Nga Yesu, thwanzire ithwawathikya abandu bangyi ngoku thwanga thoka eriminya erina lya Nyamuhanga. Omukali ow’emyaka 67 owe Myanmar abere abiriminya erina lya Nyamuhanga, mwathoghongya emisoni kandi amabugha athi: “Oyu w’omurundi w’erimbere omwa ngebe yaghe eriowa erina lya Yehova. . . . Mwamabirinyeghesya ekindu kikulhu kutsibu.” Ngoku ekyalholirweko eki kyamakangania, eriminya erina lya Nyamuhanga lyangana hamba kutsibu okwa b’emithima myolho.

LHOLHA EMBERE ERIKANGANIA KU WUKAYIKETHERA EKITHUNGA KYETHU

11. Abasyakulhu banga kangania bathi ku bakayikethera ekithunga kya Yehova?(Lebaya n’ekisasani.)

¹¹ Ni nzira yahi nguma eyo abasyakulhu banga kanganiryamo ku bakayikethera ekithunga kya Nyamuhanga? Bamahebwa obusondoli, abasyakulhu batholere ibabusoma ndeke n’eribughenderako ndeke ngoku bangathoka. Ng’eky’erileberyako, sibali subulira okw’ihebwa obusondoli obuhambire okwa mibere bangalhabiryamo ebitsweka okwa mihindano kandi ngoku bangaha emisabe omwa kithunga, aliwe n’obuhambire okw’itsomana esyombuli sya Kristo. Abasyakulhu abakaghendera okwa busondoli bw’ekithunga bakaleka abali ahisi sy’obusondoli bwabu ibayowa ibane omwa butheya kandi ibananzibirwe.

12. (a) Busana naki thutholere ithwakolongana n’abakathusondolha? (Abaebrania 13:7, 17) (b) Busana naki thutholere ithwahwerya amalengekania w’okwa mibere mibuya ey’abakathusondolha?

¹² Thwamahebwa obusondoli obukalhua okwa basyakulhu, thutholere ithwabughenderako ahathe erikakwa. Omw’ikolha ekyo, thukendi leka ikyolhobera abakasondolha erikolha omubiiri wabu. E Biblia yikathuhira mw’omuhwa w’erighondera n’erisikya abakasondolha. (Soma Abaebrania 13:7, 17.) Okwa bundi buthuku ekyo kyangana kalha. Busana naki? Kundi abalhume aba sibahikene. Aliwe, thwamahira amalengekania w’okw’ilemererwa lyabu omwakanya k’emibere yabu mibuya, ithukendibya ithwamaha esyonzighu syethu syakanya. Omwa nziraki? Eriyikethera lyethu omwa kithunga kya Yehova erikendi keha, ekindu ekyo abahakani bethu banzire ithwakolha. Ni kindu kyahi ekyo thwanga kolha nuku thuminyerere n’erighana ebinyambwirwa ebikalhua okwa syonzighu syethu?

ISIWALIGHIRA ABANDI BAKATSEKYA ERIYIKETHERA LYAWU

13. Esyonzighu sya Nyamuhanga syabirikolhaki nuku ekithunga kya Nyamuhanga kilhangirike nga ni kibi?

¹³ Abakahanisaya Nyamuhanga bakalengaho erileka ebibuya ebya ekithunga kiwe kikakolha bilhangirike nga ni bibi. Ng’eky’erileberyako, muthw’igha omwa Masako ngoku Yehova anzire abaramya biwe ibabya ab’erire kinyamubiiri, omwa by’esyongeso, na bunyakirimu. Akabugha athi owosi-wosi oyukalholha embere erikolha ebibi ahathe eriyisubamo alhusibawe omwa kithunga. (1 Kor. 5: 11-13; 6:9, 10) Thukaghondera ekihano ekiseghemere okwa Masako ekyo. Aliwe abakathuhakanisaya bakalengaho erikolesya ekyo erithutsweba bathi thukamayirira ekyethu, thukatswera-tswera abandi, kandi sithuwithe lhwanzo.

14. Nindi oyukakulha-kulhanaya amabehi awahambire okwa kithunga?

¹⁴ Minyerera enzighu y’ekithunga nga nindi. Sitani yukakulha-kulhanaya amabehi wosi awahambire okwa kithunga. Iyo ni “ise w’amabehi.” (Yn. 8:44; Enz. 3:1-5) Neryo thutholere ithwaminya ngoku Sitani akendi kolesya abakamusighika nuku akulha-kulhanaye amabehi awahambire okwa kithunga kya Yehova. Eki mukyalhangirika omwa kighana ky’erimbere.

15. Ni kyahi ekyo abakulhu b’amadini bakolera Yesu na bigha biwe?

¹⁵ Omwa kighana ky’erimbere, mughulhu mungyi abakasighika Sitani ibakabugha amabehi mangyi oku Mughalha wa Nyamuhanga oyuhikene kandi oyuwakolha ebithiko-thiko. Ng’eky’erileberyako, abakulhu b’amadini mubabwira abandu bathi obuthoki obo Yesu akolesaya bwabya bukalhua ‘okw’omukulhu w’esyombinga.’ (Mk. 3:22) Omughulhu Yesu abya inianemuthondesibwa, abakulhu b’amadini mubabugha bathi ni mutsumi kandi bamatsotsomererya abandu nuku babughe bathi Yesu ithawe. (Mt. 27:20) Enyuma waho, abigha ba Kristo babere banemuthulha engulhu yuwene, ababya bakabahakanisya “mubatsotsererya amalengekania” w’abandu aw’eriendererya Abakristayo abo. (Emib. 14:2, 19) Yikakania okwa Emibiri 14:2, e Watchtower eya 1 Okwerikuminibiri, 1998, muyasoborera yithi: “Abayuda babere babirihakanisya omwatsi ogho Abakristayo babya bakathulha, omw’akasolholho mubalengaho eribwira ab’Ebihanda b’omwatsi w’amabehi owahambire okwa Bakristayo.”

16. Thutholere ithw’ibukaki thwam’owa ebinyambwirwa?

 ¹⁶ Sitani mwathalekeraho eribugha amabehi omwa kighana ky’erimbere. Namunabwire, akinatheba “ekihugho kyosi.” (Erib. 12:9) Wam’owa emyatsi eyithuwene eyihambire okwa kithunga kutse eyihambire okwa baghalha bethu abakasondolha, ibuka ebyo esyonzighu sya Nyamuhanga syakolha oku Yesu n’abigha b’omwa kighana ky’erimbere. Munabwire, abandu ba Yehova banemw’endereribwa n’erikanibwako nabi ngoku e Biblia yanalhaghulha. (Mt. 5:11, 12) Ebinyambwirwa isibyendi thuherya thwamaminya aho bikalhua n’eriyira eky’erikolha aho n’aho. Thwanga yitheya thuthi?

17. Thwanga yihighulha thuthi okw’ihambwako nabi n’ebinyambwirwa? (2 Timoteo 1:13) (Lebaya n’akasanduko “ Ebyo Wanga Kolha Wam’owa Ebinyambwirwa.”)

¹⁷ Ghana ebinyambwirwa. Omukwenda Paulo mwaha obusondoli obuhambire okwa ekya thwangakolha thwam’owa ebinyambwirwa. Mwabwira Timoteo athi ‘athegheke abandu balebe baleke eryahulha emyatsi ey’amabehi’ kandi athi basaghe “ebihaniriro bithya-bithya eby’ekihugho ebithawithe mughaso.” (1 Tim. 1:3, 4; 4:7) Nomwakine indi omwa buthaminya omwana mulere anganasongya ekindu ky’ahisi n’erikihira omwa buno, omundu mukulhu oyunasi akabi akangalhwiririramo syangakolha ekyo. Thukaghana ebinyambwirwa kundi thunasi enzuko yabyo nga nindi. Thukamakirira “ebinywe by’ekwenene.”—Soma 2 Timoteo 1:13.

18. Thwanga kangania thuthi ku thuyikethere ekithunga kya Yehova?

¹⁸ Thwamabirikania okw’isathu sy’okwa syonzira nyingyi esyo ekithunga kya Nyamuhanga kikagherererayamo Yesu. Wunemw’igha e Biblia, lhangira esindi nzira esyo ekithugna kikagherererayamo eky’erileberyako kya Yesu. Wathikaya abandi omwa kithunga kyenyu eryongera eriyikethera ekithunga. Kandi wulhole embere erikangania eriyikethera lyawu omw’ikolera Yehova buthaleghulha n’erisighalha iwune omwa kithunga ekyo anemukolesya eriberererya erisonda liwe. (Esy. 37:28) Ka thulhole embere erilhangira olhusunzo olho thuwithe olhw’eribya bughuma n’abandu ba Yehova ab’olhwanzo kandi abathaleghulha mwa lhw’obughuli.