OMWATSI W’ERIGHA 23
OLHWIMBO 28 Eribya Munywani wa Yehova
Erikokya Lya Yehova Likulhu ery’Erikalha Omwa Hema Yiwe
“Ah’erikalha [ehema] haghe hasyabya haghuma nabu, naghe nasyabya Nyamuhanga wabo.”—EZE. 37:27.
EKIGHENDERERWA
Ery’ongera erisima lyethu busana n’erikokya lya Yehova ery’erikalha omwa hema yiwe y’omusyo n’emibere akathutsomaniramo iyo ng’Oyukathukokaya.
1-2. N’ikokya lyahi erya Yehova akaha abaramya biwe abathaleghulha?
YEHOVA niki kyawu? Iwangana subirya wuthi, ‘Yehova ni Thatha waghe, ni Nyamuhanga waghe, kandi ni munywani waghe.’ Yehova anawithe n’ebindi bitsumbi. Aliwe, nawu wukanamulhangira ng’Oyukakukokaya?
2 Omwami Dawudi mwalinganisya obunywani obuli ahakathi-kathi ka Yehova n’abaramya biwe abathaleghulha n’obughuma obuli ahakathi-kathi k’oyukakokaya n’abakakokibawa. Mwabulya athi: “Omwami mukulhu, nindi wasy’ikalha omwa hema yawu kwehi? Nindi wasy’ikalha e Sioni ekithwe kyawu kibuyirire kwehi?” (Esy. 15:1) Ebinywe ebyasondolibawa ebi bikathuwathikaya eriminya ngoku Yehova anganathukokya, ni bugha ambu eribya banywani biwe. Mbwino eri s’ikokya likulhu erikalhua oku Yehova?
YEHOVA AKATHUKOKAYA ERIKALHA OMWA HEMA YIWE
3. Nindi oyo Yehova atsuka erikokya, kandi Yehova n’oyo akokaya mubayowa bathi?
3 Yehova athali ahangika, abya iniane iyuwene. Aliwe buthuku bulebe mwakokya Mughalha wiwe akambere omwa hema yiwe y’omusyo. Yehova mwatsemera kutsibu olhukwamirwa lhwiwe ng’Omukokya. E Biblia yikabisulha ngoku Yehova mwatsemera Mughalha wiwe. Kuthya n’oyo atsuka erikokya mwatsemera “emighulhu yosi embere siwe.”—Emi. 8:30.
4. Ni bandi bahi abo Yehova akokaya enyuma waho erikalha omwa hema yiwe?
4 Neryo Yehova mwahangika abandi bandu b’ekirimu, nabu amabakokya erikalha omwa hema yiwe. Abamalaika biwe bakahulhawa mwa ‘baghalha ba Nyamuhanga’ kandi bakanibweko ng’abakatsemera eribya haghuma nayu. (Yobu 38:7; Dan. 7:10) Ahabw’obuthuku bulebe, obunywani na Yehova ibukathokekana okw’ab’ikere elhubulha basa, eyo Yehova ikere. Enyuma waho, mwaha n’abandu okwa kihugho b’akaghisa ak’erikalha omwa hema yiwe. Abaghuma b’okwa banywani abo babya Enoka, Noa, Abrahamu, na Yobu. Abaramya b’okwenene abo mubahulhwa mw’abanywani ba Nyamuhanga, kutse abalendera “haghuma na Nyamuhanga.”—Enz. 5:24; 6:9; Yobu 29:4; Isa. 41:8
5. Thuk’ighaki omwa buminyereri obuli omwa Ezekieli 37:26, 27?
5 Ahabw’ebighana bingyi, Yehova mwalholha embere erikokya banywani biwe. (Soma Ezekieli 37:26, 27.) Ng’eky’erileberyako, omwa buminyereri bwa Ezekieli thuk’igha ngoku Nyamuhanga anzire abaramya biwe abathaleghulha ibabya n’obughuma obwa hakuhi nayu. Akayilhagha erikolha “endaghano y’obuholho haghuma nabo.” Obuminyereri obo bukakanaya okwa buthuku omughulhu abawithe amaha w’erisyaghenda elhubulha n’abawithe amaha w’erisyabya okwa kihugho bakendi syaberamo omwa bughuma omwa hema y’omusyo “ng’ekihangulho kighuma.” (Yn. 10:16) Ekyo kine mubya lino!
NYAMUHANGA AKATHUTSOMANA AHOSI-HOSI AHO THULI
6. Ni mwanziraki omundu angabya oyukokibirwe omwa hema ya Yehova, kandi ehema yiwe yikabanika hayi?
6 Omwa buthuku bwe Biblia, ehema y’omundu iniakabya mwanya w’erihumulikaniramo n’erimutheya okw’ihinduka-hinduka ly’emibere y’obuthuku. Oyukakokibawa omwa hema eyo iniakaminya ngoku akendi tsomanwa ndeke. Thukabya thukayihayo oku Yehova, thukabya ithwamakokibwa omwa hema yiwe y’omusyo. (Esy. 61:4) Thukatsemera ebyalya bingyi by’obunyakirimu n’eribya bughuma n’abandi ababirikokibwa omwa hema ya Yehova. Ehema yiwe siyiri omwa mwanya mulebe mughuma musa. Obundi wanaghendire omwa kindi kihugho, eriyahindana okwa lhuhindano lhw’embaghane n’eribanangana n’abandi abatsemire busana n’eribya omwa hema ya Nyamuhanga. Yanganabya ehosi-hosi aho abaramya ba Yehova abowa bangabya.—Erib. 21:3.
7. Busana naki ithwabugha thuthi abathaleghulha ababiriholha bakine abakokibirwe omwa hema ya Yehova? (Lebaya n’ekisasani.)
7 Kandi ibbwa abathaleghulha ababiriholha? Ithwanabugha thuthi bakine abakokibirwe omwa hema ya Yehova? Ee! Busana naki ithwabugha ekyo? Kundi abali ng’abo Yehova akina bibukire. Yesu mwasoborera athi: “Nikwa Musa mwakangania ko abaholi bakalhubukibawa. Omo masako awakahulha ekisaka ekyaka, akahulha Omukama, ‘mwa Nyamuhanga wa Abrahamu, na Nyamuhanga wa Isaka, na Nyamuhanga wa Yakobo.’ Neryo iyo si Nyamuhanga w’abaholi, nikwa ni Nyamuhanga w’abaliho busana nayu.”—Lk. 20:37, 38.
Nibya n’abathaleghulha ababiriholha bangana lhangirwa ng’abakokibirwe omwa hema ya Nyamuhanga (Lebaya enungu 7)
THUKAGHASIRAWA ALIWE THULI B’ERIYIRA EKY’ERIKOLHA
8. Abo Yehova akakokaya bakaghasirawa bathi omw’ibya omwa hema yiwe?
8 Ngoku ehema eyonyine-nyine yikanabya mwanya w’erilhuhukiramu n’eritheya okw’ihinduka-hinduka ly’emibere y’obuthuku, ehema ya Yehova yikatheghaya abo akakokaya okwa kabi k’obunyakirimu n’okw’ithendibya n’amaha. Thwamasighalha bughuma na Yehova, Sitani syanga thukolha kw’ekyosi-kyosi ekyanga thuhuthalya erihika kera na kera. (Esy. 31:23; 1 Yn. 3:8) Omwa kihugho kihya-kihya, Yehova akendi syalholha embere eritheya banywani biwe abathaleghulha okw’akabi k’obunyakirimu n’olhuholho.—Erib. 21:4.
9. Yehova anzire abo abirikokya ibakolhaki?
9 Omo kwenene, ni kitsumbi kinene erikokibwa omwa hema ya Yehova—eribya bughuma nayu n’erilholya obughuma obo bw’embere. Thutholere ithwakolhaki thwamanza erisighalha omwa hema yiwe? Omundu amakukokya ewiwe, iwukendianza eriminya eby’anzire iwakolha. Ng’eky’erileberyako, anganabya inianzire iwalhusya esyongetha wuthe w’ingira omwa nyumba, kandi iwukendi kolha ekyo. Kuthya, thwanzire ithwaminya ebya Yehova akayithagha okw’abo abanzire erisighalha omwa hema yiwe. Olhwanzo olhwa thuwithire Yehova lhukaleka ithwalengaho erikolha ebyosi “ebikamutsemesaya” ngoku thwanga thoka. (Kol. 1:10) Ni kwenene Yehova ni munywani wethu, aliwe kandi ni Nyamuhanga wethu kandi Thatha, oyutholere erisikibwa. (Esy. 25:14) Thun’ibukire ekyo, mughulhu wosi thutholere ithwamusikya, omw’ithend’ibirirwa iyo nga nindi. Erisikya ngeryo likendi thuwathikya eriyihighulha okwa byanga muhithania. Ahathe erithika-thika, thwanzire ithwalendera na Nyamuhanga wethu ithunahenirye.—Mika 6:8.
NGOKU YEHOVA AKANGANAYA KW’ATHAWITHE KASOLHOLHO OMWA MBWARARA
10-11. Emibere Yehova akolonganiramu n’Abaisraeli omwa mbwarara ye Sinai muyakangania yithi ku syawithe akasolholho?
10 Yehova akabya akakolongana n’abakakokaya syalikanganaya akasolholho. (Abar. 2:11) Thwangana yitheghererya erithend’ibya n’akasolholho lya Yehova erilhabira omwa mibere akolonganiramu n’Abaisraeli omwa mbwarara ye Sinai.
11 Abere abirilhusya abandu biwe b’omwa bukobe bwe Misiri, Yehova mwasombolha abahereri erikolera okwa hema y’erihindanamo. Abalawi mubahebwa eyindi mibiiri y’erikolera okwa hema eyibuyirire. Mbwino abakolera okwa hema y’erihindanamo, kutse ababya hakuhi nayu, ba Yehova atsomana kwilhaba abandi? Eyihi! Yehova syawithe akasolholho.
12. Yehova mwakangania athi ko syawithe kasolholho iyo ng’Oyuwakokaya ekihanda ekihyaka ekyo abya iniamabirihiraho? (Eriluayo 40:38) (Lebaya n’ekisasani.)
12 Obuli mughuma omwa kilhaliriro aby’awithe akaghisa ak’eribya bughuma na Yehova, mbulha awithe olhukwamirwa lhw’embaghane kutse nomwangabya in’ikere hakuhi kutse haali okwa hema y’erihindanamo. Ng’eky’erileberyako, Yehova mwalhangira athi ekihanda ekyosi kye Israeli kikalhangira ekithiko-thiko ky’enduyi y’ekithu n’enduyi y’omuliro owabya endatha sy’ehema y’erihindanamo. (Soma Eriluayo 40:38.) Ekithu ikikabya kikatsuka erighenda, n’abali haali okwa hema y’erihindanamo ibakakilhangira, ibaboha ebindu byabo, ibasambulha esyohema syabo, n’erighenda haghuma n’ekihanda ekyosi. (Emig. 9:15-23) Abosi ibakowa emirenge ey’embaghane ey’esyongubi ibiri esy’ebitsipa erimanyisya obuli mughuma ngoku endambi y’erihongoka yamahika. (Emig. 10:2) Kilhangirikire ngoku eribya hakuhi n’ehema y’erihindanamo isiky’ekikakanganaya ngoku omundu awithe obughuma bwa hakuhi na Yehova. Omwakanya k’ekyo, Yehova abya iniangana kokya obuli mundu oyuli omwa kihanda kihyaka kandi iniabana obusondoli n’obutheya bwiwe. Namunabwire, nomuthwangabya ithwikere hayi okwa kihugho, thwangana ghasirwa omw’itsomana, n’obutheya bwa Yehova obw’olhwanzo.
Emitheghekere ya Yehova ey’ehema y’erihindanamo muyakangania ku syawithe akasolholho (Lebaya enungu 12)
EBY’ERILEBERYAKO EBYA MUNABWIRE EBIKAKANGANAYA NGOKU YEHOVA SYAWITHE KASOLHOLHO
13. Munabwire, ni nzira yahi nguma eyo Yehova akakanganirayamu ku syawithe kasolholho?
13 Abaghuma b’okwa bandu ba Nyamuhanga bikere hakuhi n’ekyaghanda kikulhu ky’ekihugho kyosi kutse ebyaghanda by’omuthahulha eby’Abema ba Yehova. Abandi bakakolera n’omwa myanya eyo. Busana n’ekyo, abandi bakakolha okwa mibiiri eyikakolhawa omwa myanya eyo n’eribya ibangana kolongana n’abakasondolha. Abandi bakakolha ng’abalebererya abakabalhama kutse omwa yindi miringo y’omubiiri w’embaghane w’omughulhu wosi. Wamabya iwuli mughuma w’okwa bangyi abo lino bathesangira omw’ebi, wuminye ngoku Oyukathukokaya Yehova anzire abosi abo akathwamu erikokya. Kandi atsomene obuli mundu ahabwiwe. (1 Pet. 5:7) Abandu ba Yehova abosi bakahebawa ebyalya by’obunyakirimu, obusondoli, n’obutheya ebyo bakayithagha.
14. Ni kindi ky’erileberyako kyahi ekikakanganaya ngoku Yehova syawithe akasolholho iyo ng’Oyukathukokaya?
14 Ekindi ky’erileberyako ekikakanganaya ngoku Yehova ng’Oyukathukokaya syawithe kasolholho, ly’eribya iniakalhangira athi munabwire abandu erithimba omwa kihugho kyosi bakabana e Biblia. Erimbere Amasako Abuyirire mwahandikwa omwa mibughe isathu: Ekihebrania, Ekiaramaiki, n’Ekigiriki. Mbwino abangathoka erisoma e Biblia eyiri omwa mibughe eyo yahandikawamo erimbere babangathunga obughuma bw’ahakuhi na Yehova kwilhaba abathe bangathoka erisomayo? Eyihi.—Mt. 11:25.
15. Ni kyahi ekikakanganaya ngoku Yehova syawithe akasolholho? (Lebaya n’ekisasani.)
15 Ithwe erisimwa na Yehova siriseghemere okw’ibya ithusomire kutse okwa maaka awathuwithe ow’erigha emibughe. Omwakanya k’eriha amenge wiwe w’abandu abasomire kali-kali basa, Yehova akahagho abandu bosi okwa kihugho, mbulha basomire kutse eyihi. Ekinywe kiwe ekya sondolibawa, e Biblia, kyabirihindulhwa omwa syongumi sy’emibughe; ikyaleka abandu erithimba omwa kihugho kyosi ibaghasirwa omwa syongangirirya esirimo n’erigha ngoku bangabya banywani biwe.—2 Tim. 3:16, 17.
Eribya abandu bangyi ibangana bana e Biblia munabwire kikakanganaya kithi ngoku Nyamuhanga syawithe akasolholho? (Lebaya enungu 15)
SIGHALHA ‘IWUNALIGHIRWE’ NA YEHOVA
16. Ngoku kiri omwa Emibiri 10:34, 35, thwanga sighalha thuthi ithunalighirwe na Yehova?
16 Ni lhusunzo lhunene Yehova erithukokya omwa hema yiwe y’omusyo. Ni mukokya oyulengethukireyo omwa lhukeri n’olhwanzo oyuwabirithabyaho. Eryongera okw’ekyo, syawithe kasolholho, ak’angirira ithwe bosi nomuthwangabya ithwikere hayi, ithukulire omwa mibereki, ebyo thusomire, erangyi, ekihanda, emyaka, mbulha thuli balhume kutse bakali. Nomwabine, akakokaya abakaghendera okwa bihano biwe basa.—Soma Emibiri 10:34, 35.
17. Ni hayi aho thukendi syabana eyindi myatsi eyihambire okw’ikokibwa omwa hema ya Yehova?
17 Omwa Esyonyimbo 15:1, Dawudi mwabulya ebibulyo bino: “Omwami mukulhu, nindi wasy’ikalha omwa hema yawu kwehi? Nindi wasy’ikalha e Sioni ekithwe kyawu kibuyirire kwehi?” Omuhandiki w’esyonyimbo mwasondolibwa erisubirya ebibulyo ebyo. Omwatsi owakakwamako akendi syakania okwa bindu birebe ebyo thwanga kolha erisighalha ithunalighirwe na Yehova.
OLHWIMBO 32 Sighika Yehova!
