OMWATSI W’ERIGHA 24
OLHWIMBO 24 Mwase Okwa Kithwe kya Yehova
Sighalha Iwune Oyukokibirwe na Yehova Kera na Kera!
“Omwami Mukulhu, nindi wasy’ikalha omwa hema yawu kwehi?”—ESY. 15:1.
EKIGHENDERERWA
Eriminya ebikayithaghisibawa nuku thulhole embere ithune banywani ba Yehova, n’erilebya ng’anzire ithwakolongana thuthi n’abanywani biwe.
1. Thwanga ghasirwa thuthi omw’iyithendya okwa Esyonyimbo 15:1-5?
OMWA mwatsi w’ahanyuma, muthw’ighire ngoku abaghombe ba Yehova abayihereyo bangan’ikalha omwa hema yiwe y’omusyo, bamakulha-kulhania obughuma bw’ahakuhi nayu. Aliwe thutholere ithwakolhaki iyo erithukokya? Esyonyimbo 15 hakakanaya bingyi okwa mwatsi oyu. (Soma Esyonyimbo 15:1-5.) Olhwimbo olhu lhukathubwira ebyo thwanga kolha ebyanga thuwathikya eriyithunda hakuhi na Nyamuhanga.
2. Ni kyahi ekyangabya imukyaleka Dawudi iniakania okwa hema ya Yehova?
2 Esyonyimbo 15 hakatsuka n’ebinywe bino: “Omwami Mukulhu, nindi wasy’ikalha omwa hema yawu kwehi? Nindi wasy’ikalha e Sioni, ekithwe kyawu kibuyirire, kwehi?” (Esy. 15:1) Akakania okwa “hema” ya Yehova, omuhandiki w’esyonyimbo Dawudi angabya iniabya akalengekania okwa hema y’erihindanamo, eyabya e Gibeoni ahabw’obuthuku bulebe. Kandi Dawudi mw’ahulha ekithwe kya Nyamuhanga ekibuyirire, obundi akamanyisya e Sioni eyiri e Yerusalemu. Eyo, kilomita nga 10 eyikwa we Gibeoni, Dawudi mwatsimba ehema eya erisanduko ly’endaghane lyangahirwamo erihika aho omwanya ogho lyangaberemo ahabw’obuthuku buuli angahimbirwe—2 Sam. 6:17.
3. Busana naki thutholere ithwanza eriminya ebiri omwa Esyonyimbo 15? (Lebaya n’ekisasani.)
3 Ni kwenene, Abaisraeli bangyi babya isibali lighirawa erikolera omwa hema y’erihindanamo, ni bake ababya bak’ingira omwa hema eyibikiremo erisanduko ly’endaghane. Aliwe abaghombe ba Yehova abathaleghulha abosi bangan’ikalha omwa hema yiwe y’omusyo omw’ibya banywani biwe n’erilholha embere ibane bathya. Ekyo ni kindu ekyo ithwe bosi thwanzire. Esyonyimbo 15, hak’ahulha emibere mirebe eyo thutholere ithwakulha-kulhania n’erikangania erithoka erisighalha banywani ba Yehova.
Abaisraeli omwa buthuku bwa Dawudi ibakathera akasasani omwa bulengekania ak’erikokibwa omwa hema ya Yehova (Lebaya enungu 3)
WULENDERE BUTSIRA KAHINIRA N’ERIBERA ERIKOLHA EBITHUNGANENE
4. Thukaminya thuthi ngoku Yehova syalithuyithaghako olhubatizo lhusa? (Isaya 48:1)
4 Omwa Esyonyimbo 15:2, NWT, omunywani wa Nyamuhanga akahulhawamo “oyukalendera butsira kahinira, n’eribera erikolha ebithunganene.” Ekinywe “oyukalendera” na “eribera erikolha” bikamanyisaya erikolha mughulhu wosi kandi buthaleka. Aliwe kwenene, ithwanalendera “butsira kahinira”? Ee. Nomwabine indi sihali mundu oyuhikene, Yehova iniakendi thulhangira ng’abakalendera “butsira kahinira” thwamalengaho erimwowa. Thukabya thukayihayo oku Nyamuhanga n’eribatizibwa, thukabya thwamatsuka erilendera nayu. Wuminye ngoku omwa buthuku bwe Biblia, omundu eribya iniali omwa kihanda kye Israeli isikirilhuaho kikamanyisya kithi abirikokibwa na Yehova. Abandi ibakamulhakira aliwe “butsira omo kwenene, kutse omo lithunganene.” (Soma Isaya 48:1.) Abaisraeli ab’emithima myolho babya b’erigha okwa ebya Yehova akabayithaghako n’eribighenderako. Kuthya, erithoka erisimwa na Yehova munabwire, ni bingyi ebikathuyithaghisibawako kwilhaba eribatizibwa n’eribya bughuma n’ekithunga ky’Ekikristayo. Thutholere ithwalholha embere “eribera erikolha ebithunganene.” Ekyo thwanga kikolha thuthi?
5. Eriowa Yehova omwa myatsi yosi mwamuliki?
5 Embere sya Yehova, erilendera “butsira kahinira” “n’eribera erikolha ebithunganene” sikirisubulira okw’isangira mughulhu wosi omwa bikakolhawa omo mwanya w’eriramiryamo. (1 Sam. 15:22) Thutholere ithwalengaho eriowa Nyamuhanga omwa ngebe yethu yosi, nibya n’omuthwangabya ithuli ithwibene. (Emi. 3:6; Omu. 12:13, 14) Ni kikulhu eriowa Yehova nibya n’omwa hindu ehyangabya nga ni hike-hike. Erikolha ekyo likaleka ithwakangania ku thumwanzire, ikyaleka nayu iniathwanza kutsibu.—Yn. 14:23; 1 Yn. 5:3.
6. Ngoku kiri omwa Abaebrania 6:10-12, ni kyahi ekilengire obuthaleghulha obwa thwakanganaya kera?
6 Yehova akasima kutsibu ebyo thwamukolera kera. Nomwabine, obuthaleghulha obwa thwakanganaya kera busa sibuli leka thukalholha embere ithune omwa hema ya Yehova. Eki kikanganibwe ndeke-ndeke omwa Abaebrania 6:10-12. (Soma.) Yehova syalibirirawa ebibuya ebyo thwakolha kera. Aliwe anzire ithwamuha eriramya erikalhua okwa muthima “erihika okwa nduli.” Akendi syabya munywani wethu erihika kera na kera “thwamathendi leghulha.”—Gal. 6:9.
BUGHA OKWENENE OMWA MUTHIMA WAWU
7. Eribugha ekwenene omwa mithima yethu mwamuliki?
7 Oyuwanzire erikokibwa omwa hema ya Yehova atholere iniabya ‘akabugha ekwenene omwa muthima wiwe.’ (Esy. 15:2) Eki sikirisubulira okw’ithendi bugha amabehi. Yehova anzire ithwabya b’okwenene omwa byosi ebya thukakolha n’eribugha. (Ebr. 13:18) Ekyo ni kikulhu, kundi “abahengemire ninye okwa Mwami Mukulhu; nikwa obwira bwiwe buli haghuma n’abathunganene.”—Emi. 3:32.
8. Ni mubere wahi ogho thutholere ithwayihighulhako?
8 Abakabugha okwenene okuli omwa mithima yabu sibali yilingiriranaya nga ni bowa ahali abandu bangyi kandi ibane muthwa ebihano bya Nyamuhanga bubiso-biso. (Isa. 29:13) Bakayihighulha okw’ikolha omwa buthebya. Omuthebya anganatsuka erithika-thikira amenge awali omwa bihano birebe ebya Yehova. (Yak. 1:5-8) Anganaghana eriowa Yehova omwa myatsi eyo akalengekanaya athi si y’omughaso munene. Neryo, hamabya nga sihathabya akabi akakalhwiririra omwa buth’owa bwiwe, inianganathwa ebihano bya Nyamuhanga kinyamwisi kandi eriramya liwe irikendibya ly’obuthebya. (Omu. 8:11) Aliwe ithwe thwanzire ithwabya b’okwenene omwa myatsi yosi.
9. Thwang’ighaki okw’ibanangana ly’erimbere erya Yesu na Natanaeli? (Lebaya n’ekisasani.)
9 Eribanangana ly’erimbere erya Yesu na Natanaeli likathweghesaya omughaso w’eribya n’omuthima owathemo mathebo. Filipo abere akaletha munywani wiwe Natanaeli eyiri Yesu, ekindu ekithe kyang’ibiriranwa mukyabya. Nomwabine indi Yesu abya isyali athalholha oku Natanaeli, mwabugha athi: “Lebaya, Omuisraeli kwenene, oyuthe mwamathebo.” (Yn. 1:47) Ni kwenene Yesu mwalhangira abandi bigha biwe ibali mw’okwenene, aliwe smwalhangira Natanaeli isyalimo amathebo nahake. Ng’ithwe, Natanaeli syabya ahikene. Aliwe isyalimo amathebo kandi iniali mw’okwenene omwa myatsi yosi. Yesu mwatsemera ekyo kandi mwasima Natanaeli busana n’ekyo. Ikakikendibya kibuya Yesu amathubugha kw’ekyo!
Filipo mwakangania Yesu ya munywani wiwe Natanaeli, omulhume oyuwathabyamo mathebo. Mbwino ekiri ng’ekyo kyangana buwa okw’ithwe? (Lebaya enungu 9)
10. Busana naki thutholere ithwayihighulha okw’ikolesya nabi ekihembo ky’erikania? (Yakobo 1:26)
10 Ebingyi ebikathuyithaghisibawako ebiri omwa Esyonyimbo 15 bihambene n’emibere thukakolonganiramo n’abandi. Esyonyimbo 15:3, NWT, hakabugha hathi oyukakokibawa omwa hema ya Yehova “syalikanaya nabi okwa bandi, syalikolha okwa muliranwa wiwe ekithuwene kyosi-kyosi, kandi syalitsandaya okwa banywani biwe kw’erina.” Erikolesya emikanirye yethu ya nabi kyangana hamba nabi okwa bandi n’erileka ithuthatholera erisighalha omwa hema ya Yehova.—Soma Yakobo 1:26.
11. Erikania okwa bandi kwa nabi ly’eryahi, kandi ni kyahi ekikakolhawa okwa abakakanaya okwa bandi kwa nabi abatheyisubamu?
11 Omuhandiki w’esyonyimbo mwakania okwa oyukakanaya nabi okwa bandi. Erikania okwa bandi kwa nabi ly’eryahi? Erithwalira haghuma, ly’eribugha ebinywe by’amabehi ebyangana tsandya okwa mundu kw’erina. Abakakanaya okwa bandi kwa nabi, abathe yisubamu bakalhusibawa omwa kithunga ky’Ekikristayo.—Yer. 17:10.
12-13. Ni mwa mibere nga yahi thwangabya ithune mutsandya okwa banywani bethu kw’erina omwa buthaminya? (Lebaya n’ekisasani.)
12 Esyonyimbo 15:3 hakathasya thw’ibukaya ngoku oyo Yehova akakokaya syalikolha okwa muliranwa wiwe ekithuwene kyosi-kyosi. Ekyo kyangabya imwamuliki?
13 Omw’ithendi kighenderera, ithwangana kania okwa mundu kwa nabi omw’ilhalhania omwatsi owathuwene. Ng’eky’erileberyako: (1) mwali wethu inialekeraho erikolha omubiri w’omughulhu wosi, (2) abathahenie ibabya isibakikolera okwa Beteli, kutse (3) mughalha wethu iniabya isyakikolha ng’omusyakulhu w’ekithunga kutse mughombe muwathikya. Mbwino ikyanganabya kibuya eriteberezya esyonzumwa esyangabya isy’esyaleka embinduka eyi iyabya n’eribwira abandi amalengekania ayo? Hanganabya ihane esyonzumwa esyalekire embinduka eyi iyabya esyo thuthasi. Eryongera okw’ekyo, oyukakokibawa omwa hema ya Yehova “syalikolha okwa muliranwa wiwe ekithuwene kyosi-kyosi, kandi syalitsandaya okwa banywani biwe kw’erina.”
Kyangan’olhoba erilhalhania omwatsi owathuwene okwa bandi, kandi eki ikyanganabya in’ikania okwa bandi kwa nabi (Lebaya enungu 12-13)
SIKAYA ABAKUBAHA YEHOVA
14. Soborera ngoku abo Yehova akakokaya ‘bakaghana owosi-wosi ow’emitse mibi.’
14 Esyonyimbo 15:4 hakabugha hathi omunywani wa Yehova “akaghana owosi-wosi ow’emitse mibi.” Ekyo thwanga kikolha thuthi? Ng’abandu abathahikene, sithuwithe obuthoki obw’eriminya Nyamuhanga ng’anabirighana omundu mulebe. Busana naki? Ni ky’obuhangiranwa erinywana abandu balebe busana n’emibere eyo bawithe kandi ithwaghana erinywana abandi. Busana n’ekyo, thutholere ithwaghana abo Yehova akaghana basa busana ‘n’emitse mibi’ yabu. (1 Kor. 5:11) Abo mwamuli abakakolha ebindu bibi abathe yisubamu, abathesikaya ebyo thwikirirye, kutse abangahamba nabi okwa bunyakirimu bwethu.—Emi. 13:20.
15. Ni nzira yahi nguma eyo thwanga sikiryamu “abak’ubaha Yehova”?
15 Mbaghane n’ekyo, Esyonyimbo 15:4, NWT, hakathubwira hathi thusikaye “abak’ubaha Yehova.” Neryo thukasondaya esyonzira sy’erikanganiryamo abanywani ba Yehova b’olhukeri n’erisikya. (Abar. 12:10) Thuthi? Enzira nguma y’eno, ngoku kiri omwa Esyonyimbo 15:4, oyo Yehova akakokaya omwa hema yiwe “syaliyisubako omwa by’akayilhagha, nomukyangabya ikyangana mulhumya.” Omo kwenene, erithendi berererya ebya thukayilhagha kikaponesaya abandi. (Mt. 5:37) Ng’eky’erileberyako, Yehova anzire abo akakokaya ibaberererya eriyilhagha lyabu ery’obutheke. Kandi Yehova akatsema ababuthi bakalengeho eriberererya ebyo bakalhagha abaana babu. Olhwanzo olhwa thuwithire Nyamuhanga n’abandu lhukendi thusukuma erilengaho ngoku thwanga thoka eriberererya ebyo thukayilhagha.
16. Ni yindi nzira yahi eyo thukakanganirayamo ku thusikirye abanywani ba Yehova?
16 Eyindi nzira eyo thwanga sikiryamu abanywani ba Nyamuhanga mw’omw’ibya bakokya kandi benge. (Abar. 12:13) Obuthuku bw’eriyitsemesya obwa thukaghunza n’abalikyethu bukathuwathikaya erighumya obunywani obwa thuwithe nabu n’obwa thuwithe na Yehova. Nibya, omw’ikokya abandi, thukabya ithwamagherererya Yehova.
ISIWANZA ESYOSENTE SYO KUTSIBU
17. Busana naki esyosente isyakanibwako omwa Esyonyimbo 15?
17 Thukasoma ngoku oyo Yehova akakokaya “akabweka esyofranka siwe iniathabulya endundi, kandi syaliheka ekithuliro [ebraibu] busana n’erihandikirira omundu oyutheko lhubanza.” (Esy. 15:5) Busana naki esyosente isyakanibwako omwa lhwimbo lhukuhi olhu? Kundi erithunga amalengekania awathatholere okwa syosente kyangana ponesya abandi kandi ikyahamba okwa bunywani bwethu na Nyamuhanga. (1 Tim. 6:10) Omwa buthuku bwe Biblia, abandi ibakaghalhaya balikyabo abanakwa omw’ibasaba amaghoba okwa syosente esyo babya bakababweka. Kandi abandi batsweri ibakaligha ebraibu neryo ibatswera abathawithe lhubanza omwa buthe bulingirirania. Yehova aponire emikolere ng’eyi.—Eze. 22:12.
18. Ni bibulyo byahi ebyanga thuwathikya eriyilebya ng’athuwithe malengekaniaki okwa syosente? (Abaebrania 13:5)
18 Kyuwene eriyilebya nga thuwithe malengekaniaki okwa syosente. Yibulhaye: ‘Nganabera erilengekania okwa syosente n’ebyo sikaghulha? Namayibweka esyosente, nganakerererawa erisithuha, omw’ibugha nyithi omundu oyulyanyibwekasyo syali yithaghasyo? Mbwino eribya n’esyosente likaleka ingayowa ingali w’omughaso aliwe ikyaleka ikyakalha ingye eribya mwenge? Nganatswera balikyethu indi banzire ebindu bya kutsibu habw’erithabya ibawithe esyosente? Ngananywana abagaga kwilhaba abanakwa?’ Thwabirithunga olhusunzo lhunene olhw’erikokibwa na Yehova. Thwangana theya olhusunzo olho omw’iyitheya okw’anza esyosente sya kutsibu. Thwamakolha ekyo, Yehova isyendi syathusighania!—Soma Abaebrania 13:5.
YEHOVA ANZIRE BANYWANI BIWE
19. Ni nzumwa yahi ngulhu eyiri omwa ebyo Yehova akathuyithaghako?
19 Esyonyimbo 15 hakaghunzerera n’omulhaghe ono: “oyukakolha emyatsi eyi syendi syaheribwa.” (Esy. 15:5) Hano omuhandiki w’esyonyimbo akabisulha enzumwa ngulhu eyiri omwa ebya Nyamuhanga akathuyithaghako. Yehova anzire ithwatsema. Ky’ekikaleka iniathuha obusondoli obukendi thulethera emighisa n’obutheya.—Isa. 48:17.
20. Abo Yehova akakokaya balindirireki?
20 Abo Yehova akakokaya bangana lindirira obuthuku obuwene obukasa. Abahakabibwa abatheleghulha bakendisya lighirwa eringira omwa “byumba bingyi by’erikalhamo” ebyo Yesu abiribatheghekera elhubulha. (Yn. 14:2) Abawithe amaha w’erisyabya okwa kihugho balindirire emilhaghe eyiri omwa Eribisulirwa 21:3. Omo kwenene, ithwe bosi thukayowa ini kitsumbi eribya Yehova iniabirithukokya eribya banywani biwe, erikalha omwa hema yiwe erihika kera na kera!
OLHWIMBO 39 Kolha Erina Libuya na Nyamuhanga
