Erithoka eritsemesya Yehova, thutholere ithwabya n’erikirirya. Nomwabine, e Biblia yikabugha yithi “si bandu bosi abakikiriraya.” (2 Tes. 3:2) Omukwenda Paulo mwakania okwa babya bakamwendererya athi ni “bandu batsibu n’ababi,” abo abya akayithagha erilhamibwako. Aliwe eby’abugha okw’ikirirya bikahamba n’okwa bandi bandu. Abandi bandu bakathwamu erigheghena obwema obulangirikire obukakanganaya ngoku hane omuhangiki—Nyamuhanga. (Abar. 1:20) Abandi banganabugha bathi banawithe erikirirya okwa lhulengo lhulebe kundi bakayowa ihane ekindu kutse omundu oyuwithe amaaka manene kutsibu. Aliwe erikirirya ng’eryo siryo likayithaghisibawa lisa erithoka eritsemesya Yehova.

Thutholere ithwikirirya ngoku Yehova aneho kandi ngoku akahemba abawithe erikirirya erighumire. (Ebr. 11:6) Erikirirya ni kighuma ky’okwa mikolere y’omulimu wiwe abuyirire. Erisaba Yehova lyangana wathikya omundu erihebwa omulimu abuyirire. (Lk. 11:9, 10, 13) Enzira ngulhu y’eribaniramo omulimu oyo ly’erisoma ekinywe kya Nyamuhanga ekyasondolibawa. Neryo ithwangana lengekania okwa ebya thukasoma n’erilengaho erighendera okwa bya thukigha. Neryo omulimu wa Yehova angana hamba okwa ngebe yethu, erithuwathikya erithunga erikirirya erikamutsemesaya.