OMWATSI W’ERIGHA 26
OLHWIMBO 8 Yehova Ni Busaghiro Bwethu
Yira Yehova mwa Lhukuka Lhwawu
“Sihali lhundi lhukuka nga Nyamuhanga wethu.”—1 SAM. 2:2, NWT.
EKIGHENDERERWA
Minya emibere eyikaleka Yehova iniabya ng’olhukuka kandi ngoku thwanga gherereryayo.
1. Ngoku kiri omwa Esyonyimbo 18:46, Dawudi mwalinganisya Yehova naki?
THULI omwa kihugho omo ebitsibu ebikasa kitsumbukirania byangana leka engebe iyakalha—kutse nibya ibyahindulir’ighuma esyongebe syethu. Ka kikahumulikanaya eribya ithwangana saba Yehova y’obuwathikya! Omwa mwatsi w’ahanyuma muthukan’ibukibwa ngoku Yehova ni Nyamuhanga oyuliho kandi ngoku mughulhu wosi akabya inianayitheghekire erithuwathikya. Thukabya thukabana obuwathikya bwiwe, ekyo kikathukakasaya ngoku “Omwami Mukulhu aneho!” (Soma Esyonyimbo 18:46.) Aliwe Dawudi abere abiribugha ebyo, mwabugha athi Nyamuhanga ni lhukuka lhwiwe. Busana naki Dawudi mwalinganisya Yehova, Nyamuhanga oyuliho, n’ekindu ekithawithe engebe—olhukuka?
2. Busana naki thutholere ithwanza eriminya ekyaleka Dawudi iniahulha Yehova mwa Lhukuka lhwiwe?
2 Omwa mwatsi ono, thukendi lebya ekikaleka Yehova iniahulhwamo lhukuka kandi erilinganisya eryo nga likathweghesayaki okw’iyo. Kandi thukendi minya nga thwanga muyikethera thuthi iyo ng’Olhukuka lhwethu. Erighunzerera, thukendi lebya nga thwanga gherererya thuthi emibere eyikaleka Yehova iniabya ng’olhukuka.
EKIKALEKA YEHOVA INIABYA LHUKUKA
3. Mughulhu mungyi e Biblia yikakolesaya yithi ekinywe “lhukuka”? (Lebaya ekisasani ky’okwa .)
3 E Biblia yikakolesaya ekinywe “lhukuka” ng’eky’erileberyako eky’erithuwathikya eriminya Yehova ng’awithe mibereki. Mughulhu mungyi kikabanika omwa myatsi eyikapipa Nyamuhanga ng’oyuthawithe ekyanga linganisibwa nayu. Ebinywe by’erimbere ebikakanaya oku Yehova ‘ng’Omuhanganiri’ kutse Lhukuka biri omwa Eryibuka Ebihano 32:4. Omwa musabe, Hana mwabugha athi “Sihali lhundi lhukuka nga Nyamuhanga wethu.” (1 Sam. 2:2, NWT) Habakuki mwahulha Yehova mwa “lhukuka.” (Hab. 1:12) Omuhandiki wa Esyonyimbo 73 mwahulha Nyamuhanga mwa ‘kaghalha kiwe [olhukuka].’ (Esy. 73:26) Kandi nibya na Yehova mwayahulhamo ribwe kutse olhukuka. (Isa. 44:8) Leka thukanaye okwa mibere isathu eyo Yehova akakanganaya eyikaleka iniabya ng’olhukuka n’eriminya nga thwanga muyira thuthi mwa Lhukuka lhwethu.—Ebi. 32:31.
Abandu ba Nyamuhanga bakalhangira Yehova ng’Olhukuka olhwanga batheya (Lebaya enungu 3)
4. Ni mwanziraki Yehova ni busaghiro? (Esyonyimbo 94:22)
4 Yehova ni busaghiro. Ngoku omundu anganabisama omwa lhukuka lhunene akayibisa okwa kiyagha kinene, Yehova akathutheghaya thukabana ebitsibu ebikalire omwa ngebe yethu. (Soma Esyonyimbo 94:22.) Akathutheghaya kandi akalhangira athi sithuli ghalhawa erihika kera na kera. Kandi nibya akayilhagha bingyi kw’aho: Erighunzerera akendi syaghunzaho ekyosi-kyosi ekikahamba nabi okwa buholho n’obutheya bwethu.—Eze. 34:25, 26.
5. Yehova angabya athi Busaghiro bwethu obuli ng’olhukuka?
5 Enzira nguma eyo thukakanganirayamo ngoku Yehova ni Busaghiro bwethu obuli ng’olhukuka ly’erimusaba. Thukabya thukasaba, Yehova akathuha obuholho bwiwe obukatheghaya emithima yethu n’amalengekania wethu. (Fil. 4:6, 7) Thulebaye ekyalholirweko kya Artem, mughalha wethu oyuwahirawa omwa ngomo busana n’erikirirya liwe. Mughulhu mungyi iniakabulibawa n’oyukamuthondesaya oyutsurumire oyuwabya akamuhirako akahathikano n’erimuhemulikania. “Omughulhu nabya ingathondesibwa iningabulha obuholho. . . . Mughulhu mungyi iningasaba Yehova. Artem akabugha athi: “Iningasaba obuholho n’amenge. Eritinisirizya ly’oyuwabya akanyithondesya mulithanyihambako. . . . Omwa buwathikya bwa Yehova, munabya ng’oyuwimine enyuma sy’olhuhimbo olhuhimbire omwa mabwe.”
6. Busana naki ithwayikethera Yehova mughulhu wosi? (Isaya 26:3, 4)
6 Yehova ni muyiketherwa. Ng’olhukuka olhuthe segha-seghana, Yehova akabya inianayitheghekire erithuwathikya. Thwangana muyikethera kundi iyo ni “ribwe erya kera na kera.” (Soma Isaya 26:3, 4.) Mughulhu wosi akendibya inianayitheghekire eriberererya emilhaghe yiwe, erihulikirira emisabe yethu, n’erithuha obuwathikya obo thukayithagha. Kandi thwangana yikethera Yehova kundi syali leghulha okwa bakamukolera. (2 Sam. 22:26) Syendi sy’ibirirwa ebyo thukakolha, kandi akendi syabya inianemuthuhemba.—Ebr. 6:10; 11:6.
7. Thukendi yilhangiriraki thwamayikethera Yehova? (Lebaya n’ekisasani.)
7 Yehova akabya Lhukuka lhwethu omughulhu thukamuyikether’ighuma. Thuyikethere ngoku thukendi ghasirwa thwamamowa nibya n’omwa mighulhu eyikalire. (Isa. 48:17, 18) Thukendibya thunemuyilhangirira obuwathikya bwiwe, eriyikethera lyethu omw’iyo likendi y’ongera. Neryo thukendi yithegheka ndeke erilhaba omwa bitsibu ebyo Yehova musa angathulhabyamo. Mughulhu mungyi, hamabya emibere eyo thuthe thwanga saba owosi-wosi y’obuwathikya, thukaminya ngoku Yehova iyo ni muyiketherwa. Vladimir akabugha athi: “Obuthuku obo naghunza omo ngomo bwabya buthuku obuwene omwa bunywani bwaghe na Nyamuhanga. Munigha eriyikethera Yehova ya kutsibu kundi nabya ingyuwene kandi isingwithe ekyo nangakolha.”
Thukayira Yehova mwa Lhukuka lhwethu omughulhu thukamuyikether’ighuma (Lebaya enungu 7)
8. (a) Busana naki thwangana bugha thuthi Yehova syali segha-seghana? (b) Thukaghasirawa thuthi Yehova amabya Lhukuka lhwethu? (Esyonyimbo 62:6, 7)
8 Yehova syali segha-seghana. Ng’olhukuka lhunene, Yehova asikire kandi syali segha-seghana. Emikolere yiwe siyiri hinduka-hinduka kandi n’ekighendererwa kiwe sikiri segha-seghanibawa. (Mal. 3:6) Habere habya eriyisamambulha omw’irima lye Edeni, ekighendererwa kya Yehova mukithahinduka. Ngoku omukwenda Paulo ahandika, Yehova “syalithoka eriyighana.” (2 Tim. 2:13) Eki kikamanyisaya kithi nomuhangabyaki kutse abandi nomubanga kolhaki, Yehova syendi syahindulha emibere yiwe, ebighendererwa biwe, kutse ebihano biwe. Thwamayikethera Nyamuhanga wethu oyuthe segha-seghana, thwangana muyikethera busana n’erithulhamya n’erithuwathikya erighumira emibere eyikalire kutsibu.—Soma Esyonyimbo 62:6, 7.
9. Ekyalholirweko kya Tatyana kikakweghesayaki?
9 Thukayira Yehova mwa Lhukuka lhwethu omw’ihwerya amalengekania w’okwa mibere yiwe n’erithendi birirwa ekighendererwa kiwe. Erikolha ekyo kikendi leka ithwasika thunemuyiyinirya ebitsibu. (Esy. 16:8) Ekyo ky’ekyahika oku mwali wethu ya Tatyana oyuwaboherawa omwa nyumba yiwe busana n’erikirirya liwe. Akabugha athi: “Munayowa ingali ingyuwene, okw’itsuka mukyanyikalira. Mughulhu mungyi iningahwa amani.” Nomwabine, abere alhangira ngoku ekitsibu kiwe kihambire oku Yehova n’ekighendererwa kiwe, mwathoka erikighumira n’erithasyathekana. Akabugha athi: “Eriminya ekikaleka eki ikyabya mukyanyiwathikya eryibuka ngoku ngali omwa mibere eyi ahabw’eribya iningakolera Yehova. Eki kyabiri ngwathikya erithendibya ingayilengekaniako ingyuwene.”
10. Yehova angabya athi Lhukuka lhwethu lino?
10 Omwa biro ebikasa, thukendi lhaba omwa bitsibu ebikendi thuyithaghako eriyikethera Yehova kwilhaba kera. Buno bw’obuthuku bw’erighumya eriyikethera lyethu ngoku Yehova akendi thuha ekyosi-kyosi ekyo thukayithagha erithoka erisighalha bathaleghulha. Ekyo thwanga kikolha thuthi? Soma emyatsi ye Biblia n’ebyalholirweko eby’Abema ebya munabwire. Minya Nyamuhanga ng’abirikangania athi emibere eyikaleka iniabya ng’olhukuka nuku awathikaye abaghombe biwe. Lengekanaya buuli okwa myatsi eyi. Erikolha ekyo kyangana kuwathikya eriyira Yehova mwa Lhukuka lhwawu.
GHERERERAYA EMIBERE YA YEHOVA EYIKALEKA INIABYA NG’OLHUKUKA
11. Busana naki ithwanza erigherererya emibere eyikaleka Yehova iniabya ng’olhukuka? (Lebaya n’akasanduko “ Ekilhubirirwa Busana n’Abaghalha Bethu Abalere.”)
11 Thwamabirilhangira Yehova nga abirikangania athi kwali ng’olhukuka. Lino thulebaye ngoku thwangagherererya emibere yiwe eyikaleka iniabya ng’olhukuka. Thukabya thukakolha ekyo kya ndeke, kwa thukanathoka thuthya erighumya ndeke ekithunga. Ng’eky’erileberyako, Yesu mwahulha Simoni mwa Kefa (ekikahindulhawamo “Petero”), ekikamanyisaya “Olhukuka.” (Yn 1:42) Eki mukyakangania ngoku angabere oyukahumulikanaya n’erighumya abandi omwa kithunga. Abasyakulhu b’ekithunga bakakanibawako “ng’ekitsutsu ky’eribwe linene.” Eki kikakanganaya nga bakatheghaya bathi abali omwa kithunga. (Isa. 32:2) Omo kwenene, ekithunga kikaghasirawa omughulhu balikyethu abosi bakaghereraya emibere eyikaleka Yehova iniabya ng’olhukuka.—Efe. 5:1.
12. Soborera nga thwangabya thuthi busaghiro bw’abandi.
12 Ibya busaghiro. Okwa bundi buthuku, ithwangana thoka eribya busaghiro bwa balikyethu omwa mughulhu w’ebitsinduli, akatabanguko, kutse esyonyuhi. Emibere omwa “biro by’enyuma-nyuma” yinemutsandir’ighuma, ahathe erithika-thika thukendi bana ehighisa hingyi ehy’eriwathikania. (2 Tim. 3:1) Kandi thwangana humulikania balikyethu n’eribakangania olhwanzo olho bakayithagha erikanganibwa. Enzira nguma eyo thwanga kolera mw’ekyo ly’erileka bayowe buholho okwa Kisenge ky’Obwami, ekindu ekyangaleka ekithunga iniabya mwanya owuwene. Thuli omwa kihugho ekiri mw’abandu abatsurumire, abathawithe lhwanzo, kandi ekiri mw’obulighe. Neryo omughulhu balikyethu bakasa okwa mihindano, thwanzire ithwakolha ekyosi-kyosi ekya thwanga thoka nuku bayowe ibanzibirwe, erihumulikanibwa, n’eritheghibwa.
13. Kutsibu-tsibu, abasyakulhu bangabya bathi busaghiro bw’abandi? (Lebaya n’ekisasani.)
13 Abasyakulhu banganabya busaghiro bw’abali omwa kithunga abakaghumira ebitsibu ebiri ng’ekiyagha. Omughulhu hakabya ebitsinduli, n’eriyithaghisibwa ly’obubalya obwa lhuba-lhuba, abasyakulhu bakahira h’emitheghekere y’eriwathikya. Kandi bakaha obuwathikya bw’obunyakirimu. Ikikendy’olhobera balikyethu erihika okwa musyakulhu oyuwasibwe ng’omwolho, oyukalhumirirawa abandi, kandi oyukabya inianayitheghekire erihulikirira. Emibere ng’eyo yikaleka abandi ibayowa ibatsomenwe, neryo ikyabolhobera erighendera okwa busondoli obuseghemere okwa Biblia obo musyakulhu akabaha.—1 Tes. 2:7, 8, 11.
Omughulhu abali omwa kithunga bakabana ebitsibu ebiri ng’ekihunga, abasyakulhu bakabya busaghiro (Lebaya enungu 13) a
14. Thwanga kangania thuthi ngoku thuli bayiketherwa?
14 Ibya muyiketherwa. Thwanzire abandi ibathuyikethera, kutsibu-tsibu omwa mughulhu owakalire. (Emi. 17:17) Thwanga kolhaki nuku thuminyawe ng’abayiketherwa? Thwangana lengaho erikangania emibere ng’eya Nyamuhanga, ng’eriberererya eriyilhagha lyethu n’omw’ikolera okwa buthuku. (Mt. 5:37) Kandi ithwangana wathikya kikayithaghisibwa. Eryongera okw’ekyo, thukalhangira thuthi thukaberereraya asyongwamirwa syethu erikwamana n’obusondoli obwa thukahebawa.
15. Abasyakulhu bamabya bayiketherwa, ekithunga kikaghasirawa kithi?
15 Abasyakulhu abayiketherwa bakaghasira ekithunga. Bathi? Abathuliri bakayowa ndeke bamabya ibangana hikira abasyakulhu, kwilhabirirya omulebererya ow’egurupu yabu ey’erithulira. Abathuliri bakayowa ibanzibirwe bamaminya ngoku abasyakulhu banayitheghekire eribawathikya. Kandi abasyakulhu bamaseghemerya erihabulha lyabu ly’okwa Biblia n’ebitabu by’omughombe oyutheleghulha omwakanya k’amalengekania wabu, abaramya balikyabo bakabayikethera. Balikyethu bawithe esyonzumwa nyingyi esyangaleka ibayikethera omusyakulhu oyuthebisulha omwatsi w’embitha kandi oyukalhangira athi akaberereraya eby’akayilhagha erikolha.
16. Ithwe haghuma n’abandi thwanga ghasirwa thuthi thwamasighalha isithuthasegha-seghana bikahika okw’ikolha ekihikire?
16 Ibya oyuthasegha-seghana. Ithukendi hamba ndeke okwa bandi thwam’imanira okwa kihikire n’erikolha erithwamu eriseghemere ndeke okwa misingyi ye Biblia. Thukabya thukongera erigha oku Yehova n’erighumya erikirirya lyethu, thukongera eribya batheleghulha okw’iyo n’ebihano biwe. Sithuli ab’akathika-thika, abakahinduka-hinduka kutse abakalhuaho ibathebibwa n’esyongangirirya esy’amabehi n’amalengekania w’ekihugho. (Efe. 4:14; Yak. 1:6-8) Erikirirya lyethu omu Yehova n’omwa milhaghe yiwe likaleka ithwabya ithunasikire thukowa emyatsi mibi. (Esy. 112:7, 8) Kandi thukabya ithwangana thoka eriwathikya abangabya ibane mulhaba omwa bitsibu.—1 Tes. 3:2, 3.
17. Abasyakulhu bakaleka bathi abandi ibathekana n’erighuma?
17 Abasyakulhu batholere ibabya abayithondekenie omwa by’esyongeso, ibabya butsira kahinira, abakayithondeka, kandi ab’obuyitheghererya. Abalhume aba bakawathikaya abandi erithekana kandi bakaghumaya ekithunga ‘omw’ihamba ndeke ekinywe ky’ekwenene.’ (Tito 1:9; 1 Tim. 3:1-3) Erilhabira omwa ky’erileberyako kyabu n’eribungira balikyethu, abasyakulhu bakawathikaya abathuliri erihindana mughulhu wosi, erithulira, n’eriyeghesya. Balikyethu bakabya bakalhaba omwa mighulhu eyikalire, abasyakulhu bakalengaho eribibukya ngoku batholere ibahira amalengekania wabu oku Yehova n’ebighendererwa biwe.
18. Busana naki ithwanza eripipa Yehova n’eryongera eriyithunda okw’iyo? (Lebaya n’akasanduko “ Ngoku Wanga yithunda Hakuhi na Yehova.”)
18 Thukabya thwabirilengekania okwa mibere mibuyanga eya Yehova, ithwangana bugha ng’Omwami Dawudi thuthi: “Muhe ewasingya okwa Mwami Mukulhu, omuhanganiri waghe.” (Esy. 144:1) Yehova akendi syasighalha inina Nyamuhanga oyo thwanga yikethera. Omwa ngebe yethu yosi, nibya nomuthwangabya ithwabirikulha, thuwithe esyonzumwa esyangaleka ithwabugha thuthi: “Ni Mwimiri waghe [Lhukuka],” ithunayikethere ngoku mughulhu wosi akendi thuwathikya erikulha-kulhana bunyakirimu.—Esy. 92:14, 15.
OLHWIMBO 150 Sondaya Nyamuhanga Wanabana Omulhamu
a ERISOBORERA EKISASANI: Iniane okwa Kisenge ky’Obwami, mwali wethu anemukania n’abasyakulhu babiri inianayowire buholho.
