1. Adamu na Eva mubaheryaki, kandi mumwalhwiririraki?

WUKALENGEKANAYA nindi oyutholere erithwamu okwa kitholere eribya kibuya n’ekibi? Adamu na Eva babere balya ekighuma ky’omuthi w’eriminya ekibuya n’ekibi, amalengekania wabu mwalhangirika ngoku sibathayikethera Yehova n’erithwamu liwe. Mubayithwiramu ahabwabu ekitholere eribya kibuya n’ekibi. (Enz. 3:22) Aliwe thalengekania okwa bya baheraya. Mubaherya obunywani bwabu na Yehova. Kandi mubaherya akaghisa k’eribyaho kera na kera, kandi bamasighalirya abaana babu b’ekibi n’olhuholho. (Abar. 5:12) Erithwamu lya Adamu na Eva mulyalhwiririra mw’omunubo.

2-3. (a) Omukulhu Omuetiopia mwakolhaki Filipo akamuthulira? (b) Ni mighisa yahi eyo thukabana thwamabatizibwa, kandi ni bibulyo byahi ebya thukendi kaniako?

² Linganisaya ekya Adamu na Eva bakolha n’ekya omukulhu Omuetiopia akolha Filipo akamuthulira. Omukulhu oyo mwasima kutsibu ekya Yehova na Yesu babya ibabirimukolera neryo amalhuaho iniabatizibwa. (Emib. 8:34-38) Thukabya thukayihayo oku Nyamuhanga, kandi ng’omukulhu oyo, ithwabatizibwa, thukabya ithwamakangania ndeke-ndeke amalengekania wethu. Thukakanganaya ngoku thukasima ekya Yehova na Yesu babirithukolera. Kandi thukakanganaya ngoku thuyikethere Yehova n’eriligha ngoku yutholere erithwamu okwa kitholere eribya ekibuya n’ekibi.

³ Thalengekania okwa mighisa eyo thukabana thwamakolera Yehova! Omughuma w’okw’iyo, w’amaha w’erisyabana ebyosi ebyo Adamu na Eva baheraya, imwamune n’akaghisa k’eribyaho kera na kera. Busana n’erikirirya omu Yesu Kristo, Yehova  akaghanyira ebisobyo byethu n’erithuha obunyamuthima-thima obuhenirye. (Mt. 20:28; Emib. 10:43) Kandi thukabya b’okw’ihiika lya Yehova ery’abaghombe abo akaligha ithunalindirire obuthuku obukasa obuwenenga. (Yn. 10:14-16; Abar. 8:20, 21) N’emighisa eyinalhangirikire eyi, abandi ababiriminya Yehova bakanasaghirira erigherererya Omuetiopia. Ni byahi ebyanga bakakirya eribatizibwa? Kandi bangasingura bathi ebitsibu ebyo?

4-5. Omulhwana ya Avery n’omusika ya Hannah ibawithe kitsibuki?

⁴ Eriyithika-thikira. Ababuthi ba Avery ni Bema ba Yehova. Thatha wiwe asibwe ng’omulemberi mubuya kandi ng’omusyakulhu oyuwene. Nomwabine, Avery mwasagha eribatizibwa. Busana naki? Akabugha athi: “Isindi lengekanaya indi nanganathoka eribya nga thatha.” Avery kandi isyalilengekanaya athi anganathoka esyongwamirwa esyo angahebwa omwa buthuku bw’embere. “Iningasagha erithabwirwa indi ngasabire omwa bandu bangyi, erilhabya emikania, kutse erisondolha egurupu omw’ithulira.”

⁵ Hannah, oyuwithe emyaka 18, nayu iniakayithika-thikira kutsibu. Ababuthi biwe ibakakolera Yehova. Nomwabine, isyalilengekanaya athi anganathoka erighendera okwa bihano bya Yehova. Busana naki? Hannah iniabiryasamo eriyighaya kutsibu. Ihakanayira iniayowa nabi kutsibu neryo iniathwamu eriyihuthalya, neryo ibbwa ikyongera erikalya emyatsi. Akabugha athi: “Isindibwira owosi-wosi ekya nakolire, nibya n’ababuthi baghe, kandi iningalengekanaya indi Yehova syanganza ngabye mughombe wiwe busana n’ebyo ngabya ngayikolhako.”

6. Ni kyahi ekyakakiraya Vanessa eribatizibwa?

⁶ Abanywani. Vanessa, ow’emyaka 22, akabugha athi, “Ingawithe omunywani oyuwene oyo thwabya ithwamabirighunza hakuhi myaka ikumi ithune banywani.” Aliwe, munywani wa Vanessa mwathaghenda-ghendania n’ekilhubirirwa kya Venessa eky’eribatizibwa. Ekyo mukyahamba nabi oku Vanessa, kandi akabugha athi, “Kikanyikalira eribana abanywani, neryo munasagha indi namathwa obunywani obu, isingendi syasabana owundi munywani ng’oyo.”

7. Omusika oyukahulhawa mo Makayla aby’akasaghaki, kandi busana naki?

⁷ Erisagha erilemwa. Makayla abya awithe myaka ithanu mughalha wabu akahighithwa omwa kithunga. Anemukulha, mwalhangira ngoku emibere ya mughalha wabu yabir’itha ababuthi biwe b’obulighe. Makayla akabugha athi: “Munasagha indi namabatizibwa,  inanganasobya, inahighithwa, n’eryongera obulighe bw’ababuthi baghe.”

8. Omulhwana oyukahulhawamo Miles mwasaghaki?

⁸ Erisagha erihakanisibwa. Thatha wa Miles Omwema, abere abirikomolha mama wa Miles, mwathahya owundi mukali Omwema, aliwe mama wa Miles iyo syabya Mwema. Miles akabugha athi: “Mun’ikalha na mama waghe habw’emyaka 18, kandi ingasaghire erimubwira indi nganzire eribatizibwa. Inabirilhangira ngoku ayithwa thatha akabya Mwema wa Yehova. Munasagha indi akendi nyitsurumira.”

9. Ni kyahi ekyangabya wukaminya ngoku Yehova akaghumisirizaya kandi ku ni w’olhwanzo?

⁹ Adamu na Eva mubasombolha erithendi kolera Yehova kundi mubalemwa erimuthungira olhwanzo olhughumire. Nomwabine, Yehova mwabalighira eribyaho myaka minene nuku babuthe abaana n’eriyithwiramu nga bakendi kulya bathi abaana abo. Ebyalhua omw’ithwamu lya Adamu na Eva ery’eriyithongolha oku Yehova mubyalhuaho ibyakangania ndeke-ndeke ku bwabya bukiru. Omwana wabu omukulhu mwitha mughalha wabu oyuthe kw’olhubanza, n’endambi yamahika obwithi n’erithendi tsomana abandi byamusulha omwa bandu. (Enz. 4:8; 6:11-13) Nomwabine, Yehova yuwabya inianawithe enzira y’erilhamiryamu abaana bosi ba Adamu na Eva abanzire erimukolera. (Yn. 6:38-40, 57, 58) Wukendibya wunemwongera erigha ngoku Yehova akaghumisirizaya kandi ku ni w’olhwanzo, wukendyongera erimwanza. Kandi wukendyanza erighana enzira eya Adamu na Eva basombolha neryo iwayihayo oku Yehova.

10. Busana naki erighanirya oku Esyonyimbo 19:7 lyangana kuwathikya erikolera Yehova?

¹⁰ Lholha embere erigha oku Yehova. Wukendibya wunemwongera erigha oku Yehova, wukendyongera erisika ngoku wangana thoka erimukolera. Avery, oyulyakanibawako, akabugha athi: “Munasika omw’isoma n’erighanirya oko mulhaghe owali omu Esyonyimbo 19:7.” (Soma.) Avery abere akalhangira ngoku Yehova akaberereraya omulhaghe oyo, olhwanzo lhwiwe busana na Nyamuhanga mulhw’ongera. Olhwanzo silhuli thuha erisika  lisa aliwe kandi lhukathuwathikaya erihira ameso w’oku Yehova n’ebyo anzire. Hannah, oyulyakanibawako akabugha, athi: “Omw’isoma n’eriyeghesya e Biblia, munalhangira ngoku iningabya ingayihuthalya, ininga ponesaya na Yehova.” (1 Pet. 5:7) Hannah mwabya mundu oyukakolesaya ebiri omwa Kinywe kya Nyamuhanga. (Yak. 1:22) Mumwalhwiririraki? Akabugha athi: “Nabere ingalhangira ngoku eriowa Yehova likanyighasira, mun’ongera erimwanza kutsibu. Lino ngakakasirye ngoku mughulhu wosi Yehova akendi nyisondolha ingayithagha obuwathikya bwiwe.” Hannah mwathoka erisingura omutse w’eriyihuthalya. Mwayihayo oku Yehova n’eribatizibwa.

11. Vanessa mwakolhaki eribana abanywani abuwene, kandi eki kikathweghesayaki?

¹¹ Sombolha ndeke abanywani bawu. Vanessa, oyulyakanibawako, endambi muyahika amalhangira ngoku munywani wiwe akaleka iniathakolera Yehova. Neryo mwathwa obunywani. Aliwe mwathasubulira aho. Mwahiraho akaghalha eribana abanywani bahyaka omwa kithunga. Akabugha athi eky’erileberyako kya Noa n’eka yiwe mukyamuwathikya. Athi: “Ibali omwa bandu abathabya banzire Yehova, aliwe ibawithe amanywani awuwene omw’inywanangana.” Vanessa abere abiribatizibwa, mwabya mutemburi. Lino akabugha athi, “Eki kyabirinyiwathikya eribana abanywani abuwene butsira omwa kithunga ekyo ngalimo kisa aliwe n’omwa bindi bithunga.” Nawu wanganabana abanywani abuwene omw’isangira omwa mubiiri ogho Yehova abirithuha.​—Mt. 24:14.

12. Ni mulingo wahi ow’eryubaha ogho Adamu na Eva bathabya nagho, kandi mumwalhwiririraki?

¹² Ibya n’eryubaha eritholere. Hane eryubaha erikathughasira. Ng’eky’erileberyako, thutholere ithubaha eriponesya Yehova. (Esy. 111:10) Adamu na Eva ku babya n’eryubaha ng’eryo, sibanga yisamambwire oku Yehova. Aliwe mubayisamambulha. Babere babirikolha ekyo, ameso wabu mwakingukalha, ni bugha ambu, mubaminya ndeke-ndeke ku ni bakolha-nabi. Ekibi n’olhuholho mubyabya ibyabanga sighalirya abaana babu. Kundi mubabya ibangana lhangira, kutse eriyitheghererya emibere eyo balimo, mubakwa esisoni  busana n’eribya ibali busa neryo mubayiswika​—Enz. 3:7, 21.

13-14. (a) Erikwamana na 1 Petero 3:21, busana naki sithutholere thukubaha kutsibu olhuholho? (b) Thuwithe nzumwa syahi esyangaleka ithwanza Yehova?

¹³ Nomwakine indi thutholere ithubaha eriponesya Yehova, sithutholere thukabya n’eryubaha linene ery’erisagha olhuholho. Yehova abirithukolera enzira y’eribana engebe y’erikotha. Thwamakolha erilholho aliwe thukayisubamo ndeke, Yehova iniakendi thughanyira. Iniakendi thughanyira busana n’erikirirya lyethu omwa embanulho y’ekihongwa kya Mughalha wiwe. Enguma y’okwa syonzira ngulhu-ngulhu sy’erikanganiryamu erikirirya ly’eriyihayo oku Nyamuhanga n’eribatizibwa.​—Soma 1 Petero 3:21.

¹⁴ Thuwithe nzumwa nyingyi esyanga leka ithwanza Yehova. Eryongera okw’ithuha ebindu bibuya ebya thukatsemera buli kiro, akathukangiriraya ekwenene eyimuhambireko n’ebighendererwa biwe. (Yn. 8:31, 32) Abirithuha ekithunga ky’Ekikristayo erithusondolha n’erithusighika. Akathuwathikaya omwa bitsibu byethu lino, n’erithuha amaha w’erisyabyaho kera na kera omwa mibere eyihikene obuthuku obukasa. (Esy. 68:19; Erib. 21:3, 4) Thukabya thukaghanirya okwa bingaha n’ebya Yehova abirithukolera erikangania ku athwanzire, thukongera erimwanza. Kandi thukabya thukanza Yehova, thukathunga eryubaha eritholere. Thukubaha erihithania Oyo thwabiryanza kutsibu.

15. Makayla mwasingura athi ekitsibu ky’erisagha erilemwa?

¹⁵ Makayla, oyo thulyakanayako, mwasingura obuba obw’erilemwa omughulhu ayitheghereraya erighanyira lya Yehova. “Munaminya ngoku ithwe bosi sithuhikene kandi ngoku thukasobaya. Aliwe kandi munalhangira ngoku Yehova athwanzire kandi ngoku iniakendi thughanyira busana n’embanulho.” Erianza Yehova mulyaleka amayihayo okw’iyo n’eribatizibwa.

16. Miles mwawathikibwa athi erisingura ekitsibu ky’erisagha erihakanisibwa?

¹⁶ Miles, oyuwabya akasagha athi mama wiwe akendi hakanisya erithwamu liwe ly’eribatizibwa, mwasondya obuwathikya okwa mulebererya w’omuthimbo. Miles akabugha athi: “Nayu omubuthi mughuma yuwabya Mwema wa Yehova. Mwanyiwathikya erighanirya okwa kya nangabugha erilighisya mama ngoku n’ingye ngayithwiramu eribatizibwa kandi ngoku si thatha oyukanyikaka.” Mama wa Miles mwathatsemera erithwamu liwe. Erighunzerera, mwalhua ewa mama wiwe, n’eryamakirira erithwamu liwe. Akabugha athi: “Erigha okwa bibuya ebya Yehova abirinyikolera mukyanyitsemesya kutsibu. Nabere ingaghanirya kutsibu okwa kihongwa kya Yesu eky’embanulho, munalhangira ngoku Yehova anyanzire kutsibu. Ekyo mukyaleka namayihayo oku Yehova n’eribatizibwa.”

17. Ni kaghisa kahi ako thuwithe?

¹⁷ Omughulhu Eva alya ekighuma ky’omuthi omw’irima lye Edeni, mwaghana Thatha wiwe. Adamu abere amuyiyungako, mwakangania ku syalisima ebibuya byosi ebya Yehova abya iniabirimukolera. Ithwe bosi thuwithe akaghisa k’erikangania ngoku sithuli lighirana n’erithwamu erya Adamu na Eva bakolha. Omw’ibatizibwa, thukakanganaya Yehova ngoku thwikirirye ku yutholere erithwamu okwa kitholere eribya kibuya n’ekibi. Thukakanganaya ku thwanzire Thatha wethu kandi ku thumuyikethere.

18. Wanga thoka wuthi erikolera Yehova?

¹⁸ Thwamabiribatizibwa thutholere ithwalholha embere erikolha ebya Yehova anzire, butsira ebyo ithwe thwanzire. Esyomiliyoni sy’abaghombe ba Yehova banemukolha ekyo obuli mwaka. Wanganabya ng’ibo wamalholha embere eryongera eriyitheghererya Ekinywe kya Nyamuhanga, e Biblia; erihindana mughulhu wosi na balikyethu; n’eribya n’omuhwa w’eribwira abandi okwa bya wuk’igha oku Thatha wawu w’olhwanzo. (Ebr. 10:24, 25) Wukathwamu, hulikirira erihabulha erya Yehova akakuha erilhabira omwa Kinywe kiwe n’ekithunga kiwe. (Isa. 30:21) Neryo ebyosi ebyo wukakolha ibikendi thokekana.​—Emi. 16:3, 20.

19. Wutholere iwabya iwun’ibukireki mughulhu wosi, kandi busana naki?

¹⁹ Wukabya wukalholha embere erilhangira ngoku wukaghasirawa omwa busondoli bwa Yehova, wuk’ongera erimwanza n’erianza ebihano biwe. Neryo isihendibya ekyosi-kyosi ekya Sitani angaletha ekyanga kw’ohya erileka erikolera Yehova. Thayilhangira emyaka rukumi embere. Wukendisyabya wukasubya ameso w’enyuma wukendi syalhangira ngoku muwathwamu ndeke eribatizibwa!