1. Omughuma w’okwa mibere ya Yesu eyikatsemesaya kutsibu ni wahi? Soborera.

OMUGHUMA w’okwa mibere ya Yesu eyikatsemesaya kutsibu w’ow’eriyitheghererya ebitsibu eby’ithwe bandu abathahikene thukabana. Yesu iniane okwa kihugho, mwathoka ‘eritsema haghuma n’abakatsema’ kandi ‘amalira haghuma n’abakalira.’ (Abar. 12:15) Ng’eky’erileberyako, abigha biwe 70 babere bakalhua omw’ithulira ibanatsemire, Yesu “mwatsema kutsibu omo mulimu abuyirire.” (Lk. 10:17-21) Aliwe kandi, abere akalhangira obulighe obwa banywani ba Lazaro balimu busana n’olhuholho lhwiwe, Yesu “mwakwa obulighe bo kutsibu omo muthima wiwe, kandi mwakwa engitsi.”​—Yn. 11:33.

2. Ni kyahi ekyathokesaya Yesu erilhumirirwa abandu?

² Ni kyahi ekya thokesaya omundu oyuhikene oyu eribya w’olhukeri n’erikwira abandu b’ekibi b’obulighe? Eky’erimbere, Yesu inianzire abandu. Ngoku kine omo mwatsi w’ahanyuma, “obutseme [bwiwe] bwabya haghuma n’abaghalha b’abandu.” (Emi. 8:31) Olhwanzo olho mulhwaleka iniaminya ndeke amalengekania w’abandu. Omukwenda Yoane akasoborera athi: “Abya asi ebiri omo mithima y’abandu.” (Yn. 2:25) Yesu iniakayihira omwa kisuku ky’abandi. Abandu mubalhangira ngoku abanzire kandi mubahulikirira ndeke omwatsi w’Obwami. Thukabya thukongera eriyihira omwa kisuku ky’abandu, kwa thukan’ongera thuthya eriberererya omubiiri wethu w’erithulira.​—2 Tim. 4:5.

3-4. (a) Thwamalhumirirwa abandi, ithukendi lhangira thuthi omubiiri wethu w’erithulira? (b) Thukendi kania okuki omo mwatsi ono?

³ Omukwenda Paulo abya asi ngoku atholere iniathulira, kuthya nethu. (1 Kor. 9:16) Aliwe, thwamalhumirirwa abandi, isithwendi lhangira erithulira lyethu ng’omuheke. Ithukendianza  erikangania ngoku thutsomene abandu kandi ku thwanzire eribawathikya. Thukyasi ngoku “erihithya likaletha obutseme kwilhaba erihabwa.” (Emib. 20:35) Thwamabya ithune n’amalengekania aya thukathulira, ithukendyongera eritsemera erithulira lyethu.

⁴ Omo mwatsi ono thukendi lebya ngoku thwanga lhumirirwa abandi omw’ithulira. Eky’erimbere, thukendi lebya ekya thwang’igha okw’iyowa erya Yesu abya awithire abandu. Neryo, ithwakania okwa syonzira ini esya thwanga gherereryamu eky’erileberyako kiwe.​—1 Pet. 2:21.

5-6. (a) Ni bahi abo Yesu alhumirirawa? (b) Ni kyahi ekyaleka Yesu iniakwira abandu abo athulira b’obulighe, ngoku kyabya ikyabiribuwa omu Isaya 61:1, 2?

⁵ Lebaya eky’erileberyako ngoku Yesu akanganaya erilhumirirwa abandi. Buthuku bughuma, Yesu n’abigha biwe mubathulha engulhu yuwene buthalhuhuka. Mubathabana ‘n’endambi y’erirya.’ Neryo Yesu mwathwalha abigha biwe “ahathe bandu ibobene” bangaya ‘lhuhuka hake.’ Aliwe, endeko nene muyanguha eyo Yesu n’abigha biwe babya bakaghenda. Yesu mwabya akahikayo n’erilhangira abandu, mwakolhaki? “Mwakwirabo bulighe * kusangwa babya ng’esyombuli esithawithe mulisya. Neryo mwatsuka erikangiriryabo emyatsi mingyi.”​—Mk. 6:30-34.

⁶ Lhangira enzumwa eyaleka Yesu iniakwa obulighe, eyabya iyikakanganaya erilhumirirwa. Erisako likabugha lithi abandu “babya ng’esyombuli esithawithe mulisya.” Obundi Yesu mwalhangira abandi b’okw’ibo ini bera kandi ibakakolha kutsibu eribana ebiyithawa by’amaka wabu. Obundi abandi babya ibabiriholerwa abanze babu. Byamabya ikwabiri bithya, Yesu imwayitheghererya emibere yabu. Ngoku kikanibweko omo mwatsi owahwere, Yesu nayu angabya imwabana ebighuma by’okwa bitsibu ebi. Yesu abya atsomene abandi,  kandi mukyaleka iniabalethera omwatsi w’erihumulikania.​—Soma Isaya 61:1, 2.

7. Thwangagherererya thuthi eky’erileberyako kya Yesu?

⁷ Eky’erileberyako kya Yesu kikathweghesayaki? Nga Yesu, thuthimbirweko n’abandu abali “ng’esyombuli esithawithe mulisya.” Bawithe bitsibu bingyi. Thuwithe ekya bakayithagha​—omwatsi w’Obwami. (Erib. 14:6) Neryo omw’igherererya Omukama wethu, thukathulha engulhu yuwene kundi thukakwira “abera, n’abandu bolho-bolho” b’obulighe. (Esy. 72:13) Thukakwira abandu b’obulighe, kandi thwanzire eribawathikya.

8. Ni nzira nguma yahi eya thwanga kanganiryamu erilhumirirwa abandi omw’ithulira? Iha eky’erileberyako.

⁸ Ni kyahi ekyanga thuwathikya erilhumirirwa abo thukathulira? Thwanzire ithwayihira omwa bisandu by’abathukasanga omw’ithulira n’eribathwalha omwa mibere thwanganzire ibathuthwalha nethu thulyabya in’ithwe ibo. * (Mt. 7:12) Thulebaye esyonzira ini ngoku thwangakolha ekyo. Ey’erimbere, lengekanaya okwa biyithawa by’obuli mundu. Thukathulira engulhu yuwene, olhukwamirwa lhwethu lhuli ng’olhwa dokita. Dokita mubuya akalengekanaya okwa biyithawa by’obuli mulhwere. Akabulhaya ebibulyo n’erihulikirira ndeke omulhwere akasoborera ngoku akayowa. Omwakanya k’eriha omulhwere y’omubatsi ow’amatsuka erilengekaniako, dokita anganatsuka erisamalira omulhwere habw’akathuku neryo iniamuha omubatsi owatholere. Kuthya, sithutholere thukalengesya erikolesya enzira ngumerere okwa buli mundu thukathulira. Aliwe, thutholere ithwayitheghererya emibere n’amalengekania w’obuli mundu.

9. Ni kyahi ekya thuthatholere thukakwama kyalengekania? Soborera.

⁹ Wukakania n’omundu omw’ithulira, isi wakwama kya lengekanaya wuthi wunasi emibere yiwe kutse eby’ikirirye n’ekikaleka iniab’ikirirya. (Emi. 18:13) Aliwe, omwa menge kolesaya ebibulyo eriminya ekihambire okwa mundu n’eby’ikirirye. (Emi. 20:5) Kyamabya ikinatholere omwa kalikya yenyu, bulhaya ebihambire okwa mubiiri wiwe, eka yiwe, eby’alholireko, n’amalengekania wiwe. Thukabya thukabulya ebibulyo, thukaleka ibathubwira ekikaleka ibayithagha engulhu yuwene. Thwamabiri kiminya, ithwangana kangania erilhumirirwa busana n’ebiyithawa byabu ebyonyine-nyine n’eribaha obuwathikya obwa bakayithagha, nga Yesu kw’akolha.​—Thasyalebaya na 1 Abanya Korinto 9:19-23.

10-11. Ngoku kiri omu 2 Abanya Korinto 4:7, 8, ni nzira yahi eyakabiri ey’erikanganiryamu erilhumirirwa abandi? Iha eky’erileberyako.

¹⁰ Eyakabiri, lengesaya erithera akasasani k’engebe eyabalimu. Omwa nzira ndebe, ithwangana yitheghererya emibere yabu.  Erithwalira haghuma, nethu thukabana ebitsibu ebikahika okwa bandu bosi abathahikene. (1 Kor. 10:13) Thunasi ngoku engebe omwa kihugho kino yangana kalha kutsibu. Yehova yukaleka ithwathoka eriyiyinia. (Soma 2 Abanya Korinto 4:7, 8.) Aliwe thalengekania okwa bakasondekanaya amayisya omwa kihugho kino bathe bughuma ndeke na Yehova. Nga Yesu, thukabakwira obulighe, kandi ithwanza eribalethera “engulhu yuwene y’eritsema.”​—Isa. 52:7.

¹¹ Lengekanaya okwa ky’erileberyako kya mughalha wethu oyukahulhawa mwa Sergey. Sergey athe igha ekwenene, abya w’esisoni kandi mukuthu. Ikimukalire erikania n’abandi. Erighunzerera, mwaligha erigha e Biblia. Sergey akabugha athi: “Nabere ngane mw’igha e Biblia, munigha ngoku Abakristayo batholere ibabwira abandi okw’ikirirya lyabu. Omo kwenene munayowa isinanga kolha ekyo.” Nomwabine, mwalengekania okwa bathe baminya ekwenene, neryo amaminya ngoku engebe yabu yitholere eribya iyikalire kutsibu kundi sibasi Yehova. Akabugha athi: “Ebindu bihyaka ebyo nabya ing’igha mubya nyilethera etseme nene n’erithekana omwa muthima. Munaminya ngoku n’abandi batholere ib’igha ekwenene eyi.” Erilhumirirwa lya Sergey lyabere linemw’ongera, n’obuthubaha bw’erithulira mubw’ongera. Sergey akabugha athi: “Ekikaswekaya kutsibu, eribwira abandi okwa Biblia mukyaleka ingasika. Kandi eribwira abandi okwa byang’ikirirye mukyaghumya erikirirya lyaghe.” *

12-13. Busana naki thutholere ithwaghumisirizya abo thukakangiriraya omw’ithulira? Iha eky’erileberyako.

¹² Eyakasathu, ghumisirizaya abo wukakangiriraya. Wibuke, banganabya isibali bathalengekania oko kwenene ndebe ye Biblia eya thwasi ndeke. Kandi omo kwenene, abangyi banzire kutsibu ebyo b’ikirirye. Bangana lhangira edini yabu mwa kindu kikulhu kundi yikaleka ibabya bughuma n’ab’eka yabu, ekalikya yabu, n’abataka babu. Thwanga bawathikya thuthi?

 ¹³ Thalengekania okw’ilinganisya lino: Bikabya bithi hamabya erihimba ekilhalho kihyaka kundi ekiriho kyabiritseka n’eritsanda? Mughulhu mungyi, abandu bakalholha embere erikolesya ekilhalho ekikulhu ekihyaka ikinemuhimbwa. Ekihyaka kikabya kyosulha, ekikulhu imukyahimbulhwa. Kuthya, thuthe thwabwira abandu erileka esyonyikirirya syabu “esya kera,” thwangana yithagha eritsuka eribawathikya erianza ekwenene “enyihya”​—erikangirirya lye Biblia eryo bathabeghere. Aho ibakendi thoka erisighania amalengekania wabu awakera. Kyangana thwalha obuthuku eriwathikya abandu erikolha esyombinduka ng’esyo.​—Abar. 12:2.

14-15. Thwanga wathikya thuthi abasi bike kutse abathasi ekyosi-kyosi okwa maha w’engebe y’erikotha okwa kihugho Paradiso? Iha eky’erileberyako.

¹⁴ Thwamaghumisirizya abandu omw’ithulira, isithwendi lengekania thuthi bakendi lhuaho ibaligha kutse eriyitheghererya ekwenene ye Biblia bakan’owayo. Aliwe, eribalhumirirwa irikendi leka ithwabawathikya erighanirya okwa Masako habw’obuthuku bulebe. Ng’eky’erileberyako, thalebya ngoku thwanga ghanirya n’omundu okwa maha w’engebe y’erikotha okwa kihugho paradiso. Abangyi basi bike kutse nibya sibasi ekyosi-kyosi okwa ngangirirya eyi. Banganabya ibikirirye bathi omundu amabiriholha ebiwe ibyamahweraho. Kutse ibangana lengekania bathi ababuya abosi bakaghenda elhubulha. Thwanga bawathikya thuthi?

¹⁵ Mughalha wethu kw’akawathikaya athya abandu eriyitheghererya eki. Akatsuka omw’isoma Enzuko 1:28. Neryo iniabulya omundu Nyamuhanga ng’abya anzire abandu ibikalha hayi kandi omwa mibereki. Abangyi bakabugha bathi, “Okwa kihugho, omwa tseme.” Neryo, akathasyasoma Isaya 55:11 n’eribulya ekighendererwa kya Nyamuhanga nga kyabirihinduka. Mughulhu mungyi, bakasubiraya bathi eyihi. Erighunzerera, akasoma Esyonyimbo 37:10, 11 n’eribulya obuthuku bw’embere nga bukendisyabya buthi. Erikolesya e Biblia omwa nzira eyi, abiriwathikya bandu bangyi eriyitheghererya ngoku Nyamuhanga akinanzire abandu babuya ibasyabya omwa Paradiso okwa kihugho.

16-17. Erikwamana na Emisyo 3:27, ni byahi ebya thwanga kolha erikangania erilhumirirwa? Iha eky’erileberyako.

¹⁶ Eyakani, sondekanaya esyonzira sy’erikanganiryamu ku wutsomene. Ng’eky’erileberyako, mbwino thwameya omundu iniahathathene? Thwangana musaba ekighanyiro n’erimulhagha erisyasubulha okwa ndambi eyuwene. Kandi ibbwa amabya iniakayithagha obuwathikya okwa kabiiri kake? Kutse ibbwa omundu amabya isyangalhua eka busana n’obulhwere kutse erikulha omo myaka, neryo iniakayithagha ow’erithuma? Omwa mibere ng’eyo ithwangana muwathikya.​—Soma Emisyo 3:27.

¹⁷ Mwali wethu mughuma mwawathikya  omw’ikolha akandu kake aliwe mwamalhua ebibuya. Eritsomana liwe mulyamusukuma erihandikira eka eyabya iyabiriholerwa omwana. Omwa baruha eyo mwabya imune Amasako awakahumulikanaya. Ebaruha muyabahambako yithi? Mama w’omwana mwahandika athi: “Muligholho nabya omwa bulighe bunene. Ebaruha yawu muyikanathuwathikya kutsibu. Singasi nga nangakusima indi. Nangabya imunasomireyo muligholho emirundi eyilhabire oku 20. Ebaruha yawu yabya y’olhukeri, eritsomana, n’erihumulikania. Wasingya kutsibu-tsibu.” Ahathe erithika-thika, thukabana ebibuya bingyi thwamalengesya eriyitheghererya engebe ku yikalire abakaghalhawa neryo ithwayira eky’erikolha eribawathikya.

18. Erikwamana 1 Abanya Korinto 3:6, 7 ni malengekaniaki awathutholere ithwabya nagho?

¹⁸ Ni kwenene thwanzire eribya n’amalengekania awatholere okwa lhukwamirwa lhwethu omw’ithulira. Thwangana kolha owethu eriwathikya abandi erigha oku Nyamuhanga, aliwe sithuli kolha ekitsweka kikulhu eky’omubiiri oyu. (Soma 1 Abanya Korinto 3:6, 7.) Yehova yukayiretha kw’abandu. (Yn. 6:44) Neryo, omundu eriligha kutse erighana engulhu yuwene kikasighikira okwa muthima wiwe. (Mt. 13:4-8) Wibuke ngoku abandu bangyi mubathaligha omwatsi wa Yesu​—kandi iyuwabya Mukangirirya mukulhu oyuwabirithabyaho! Neryo, isithwahwa amani abandu bangyi abathukalengaho eriwathikya bamathendi hulikirira.

19. Ni bibuya byahi ebikasa busana n’erilhumirirwa abandi omw’ithulira?

¹⁹ Ithukendi bana ebibuya thwamalhumirirwa abandi omw’ithulira. Ithukendyongera eritsemera omubiiri wethu w’erithulira. Ithukendi bana obutseme bunene obukasa busana n’erihithya. Kandi ithukendi leka ikyolhobera abawithe “amalengekania awakaleka ibatholera eribana engebe y’erikotha” eriligha engulhu yuwene. (Emib. 13:48, NW) Neryo “okwa mighulhu yosi thukabana akathambi, thukole ebibuya oko bandu bosi.” (Gal. 6:10) Neryo ithukendi bana obutseme bw’erilethera Thatha wethu w’elhubulha y’olhukengerwa.​—Mt. 5:16.