Yehova Akalhangira e “Amina” Yawu mwa Kindu Kikulhu
YEHOVA akalhangira eriramya lyethu mwa likulhu. ‘Akathegha amathwe n’eriowa’ abaghombe biwe, kandi akatsomana eripipa lyethu nomulyangabya like lithi. (Mal. 3:16) Ng’eky’erileberyako, thuthalebya ekinywe obundi ekyo thwamabiribugha ahabw’emyaka mingyi. Ekinywe ekyo ni “amina.” Mbwino Yehova akanatsomana n’ekinywe kike ekyo? Ee, akakitsomana! Eriminya nga ni busana naki, thulebaye ekinywe ekyo nga kikamanyisayaki kandi ngoku kikolesibirwe omwa Biblia.
“N’ABANDU ABOSI BASYABUGHA BATHI, AMINA!”
Ekinywe ky’Olhukonzo ekya “amina” kikamanyisaya “kwenene” kutse “kwa binabye bithya.” Kikalhua omwa kinywe ky’Ekihebrania ekikamanyisaya “ibya muthaleghulha,” “ibya muyiketherwa.” Ikikanakolesibawa n’ab’ebilhaghiro. Omundu iniakabya abiriyilhagha iniakabugha athi “amina” erikangania ngoku ebyalyabugha bihikire kandi ngoku amaligha ebyosi-byosi ebyanga lhwiririramu. (Emig. 5:22) Iniakabya amabugha amina abosi ibanowire, ikikaleka iniaberererya eriyilhagha liwe.—Neh. 5:13.
Eky’erileberyako kibuyanga eky’emikoleserye y’ekinywe “amina” kiri omwa Eryibuka Ebihano sura 27. Abaisraeli babere babiringira omwa Kihugho Ekyalhaghanisibawa, babya b’erihindana haghuma ahakathi-kathi k’Ekithwe Ebali ne Kithwe Gerizimu erihulikirira Emighambo yikasubirirwamu. Ibatholere ibahindana butsira erihulikirira buyira aliwe n’eribugha bathi babiriligha Emighambo. Mubakolha eki omw’ibugha bathi “Amina!” ebyanga lhwiririra omwa buthowa bikasomwa. (Ebi. 27:15-26) Thathera akasasani esyongumi sy’abalhume, abakali, n’abaana bakabugha amina omwa mulenge muuli! (Yos. 8:30-35) Ahathe erithika-thika, mubathibirirwa ebyo babugha ekiro ekyo. Kandi Abaisraeli mubaberererya ebinywe byabu, kundi kisakire kithi: “Abaisraeli mubakolera Omwami Mukulhu ebiro byosi bya Yosua, n’oko biro byosi by’abakulhu abakotha kwilhaba Yosua, kandi abaminya omubiiri wosi w’Omwami Mukulhu, ogho akolera Israeli.”—Yos. 24:31.
Na Yesu mwakolesya “amina” erikakasya ngoku ebyo amabugha ni by’okwenene, aliwe mwakolha ekyo omo nzira y’embaghane. Omwakanya k’erikolesyayo akasubirya okwa kiryabughawa, iniakakolesaya e “amina” (ekikahindulhawa omwa Lhukonzo mwa “kwenene” kutse “kundu”) akayabugha ekindu erikangania okwenene kwakyo. Ihakanayira, iniasubirira omwa kinywe, athi “amina amina.” (Mt. 5:18; Yn. 1:51) Neryo aho iniakabya iniakakakasaya abahulikiriri biwe ngoku ahathe erithika-thika ebinywe biwe by’eby’okwenene. Yesu iniakakanaya inianakakasirye athya kundi iyuwithe ehamuli ey’eriberererya emilhaghe yosi ya Nyamuhanga.—2 Kor. 1:20; Erib. 3:14.
“ABANDU BOSI MUBABUGHA BATHI, [AMINA], MUBAPIPA OMWAMI MUKULHU”
Kandi Abaisraeli ibakakolesaya “amina” bakapipa n’erisaba Yehova. (Neh. 8:6; Esy. 41:13) Omw’ibugha ekinywe ekyo okw’ihinda ly’omusabe, abahulikiriri ibakabya ibamakangania ku bakalighirana n’omusabe. Neryo abosi abaliho ibakabya ibamasangira n’eritsemera eriramya Yehova omwa nzira eyi. Ekyo ky’ekyabya Omwami Dawudi akaletha Erisanduku lya Yehova e Yerusalemu. Okwa mukonga owakwamako, mwaha omusabe owakalhua okwa muthima owali omwa mulingo w’olhwimbo owali omu 1 Emyatsi y’Emigulu 16:8-36. Ebinywe biwe mubyahamba oko babya bahindene neryo “abandu bosi mubabugha bathi, [Amina], mubapipa Omwami Mukulhu.” Kwenene, mubatsema eriramya Yehova haghuma ekiro ekyo.
Kuthya n’Abakristayo ab’omwa kighonye ky’erimbere mubakolesya “amina” bakahalhamba Yehova. Abahandiki be Biblia mughulhu mungyi ibakahira ekinywe ekyo ky’omwa syobaruha syabu. (Abar. 1:25; 16:27; 1 Pet. 4:11) Ekitabu ky’Eribisulirwa nibya kikakanganaya ebihangikwa by’ekirimu omwa lhubulha bikaha Yehova y’olhukengerwa omw’ibugha bithi: “Amina! Mupipe Nyamuhanga!” (Erib. 19:1, 4) Abakristayo abakera ibakabera eribugha bathi “amina” bakaghunza erisaba okwa mihindano yabu. (1 Kor. 14:16) Aliwe, sikyabya kinywe ky’erikwama kya subiriramu buthalengekania.
EKIKALEKA E “AMINA” IKYABYA INI KINDU KIKULHU
Enyuma w’eriminya ngoku abaghombe ba Yehova bakolesaya ekinywe “amina,” thwangana lhangira ekikaleka ikyabya ini kikulhu erihinda omusabe ne “amina”. Thukabya thukabughayo okw’ihinda ly’omusabe wethu, thukakanganaya ngoku ebya thulyabugha thukabimanyisaya. Kandi n’omughulhu thukabugha thuthi “amina,” nibya kikuthu-kuthu, oyulyathwembembera omwa musabe akahinda, thukabya ithukakanganaya ngoku thwamalighirana n’ebiryabughawa. Thulebaye n’ebindi ebikaleka e “amina” yethu ikyabya ini kindu kikulhu.
Kikakanganaya ku thunakwama-kwamanie omw’iramya lyethu. Thukanza ithwabugha thuthi “amina” ey’okwenene, neryo thutholere ithwabya n’amalengekania awuwene n’erihulikirira ndeke omusabe. Thukabya ithukaramaya Yehova omughulhu omusabe akahebawa butsira omw’ibugha e “amina” lisa aliwe n’omw’ikwama-kwamania ndeke omusabe.
Thukabya bughuma ng’abaramya. Abosi abahindene bakabya bughuma bakahulikirira omwatsi mughuma owali omwa musabe w’oyukasaba. (Emib. 1:14; 12:5) Thukabya thukabughira haghuma n’abalikyethu abosi thuthi “amina,” thukathasyongera obughuma bwethu. Mbulha thwamabugha omwa mulenge owakowika kutse omwa muthima, “amina” yethu yikaleka Yehova iniathasyathunga eyindi nzumwa y’erikolha ebya thwamamusaba.
“Amina” yethu yikongera eripipa Yehova
Thukapipa Yehova. Yehova akalhangira ebyosi ebya thukakolha thukamuramya. (Lk. 21:2, 3) Akalhangira ekilhubirirwa kyethu n’ebiri omwa muthima wethu. Nomuthwangabya ithukakwama emihindano okwa simu, thutholere ithwaminya ngoku Yehova akowa e “amina” yethu. Yikongera okw’ipipa erya thukamuha ithwe bosi haghuma.
“Amina” yanganabya nga kandu kake, aliwe kwabithe bithya. Ekitabu kighuma ekikakanaya okwa myatsi ye Biblia kikabugha kithi, “Omw’ikolesya ekinywe kighuma eki,” abaghombe ba Nyamuhanga bangana kangania “eriyikethera, eriligha ndeke-ndeke, n’amaha awali omwa mithima yabu.” Ambi obuli “amina” eya thukabugha yitsemesaye Yehova.—Esy. 19:14.
