1-2. Ngoku kiri omu Emibiri 8:27-31, 35-38, ni kyahi ekyaleka omukulhu Omuetiopia iniabatizibwa?

WUNANZIRE eribya mwigha wa Kristo oyubatizibirwe? Olhwanzo n’erisima byabirileka abangyi ibathwamu erikolha ekyo. Lebaya eky’erileberyako eky’omukulhu oyuwabya akakolera omwami-kali w’Etiopia.

² Omuetiopia mwalhuaho iniabatizibwa akaminya ekyo Amasako akabugha. (Soma Emibiri 8:27-31, 35-38.) Ni kyahi ekyaleka iniathwamu? Ahathe erithika-thika mwasima Ekinywe kya Nyamuhanga; abya akasoma emilhondo mirebe omwa kitabu kya Isaya iniane omwa ggali yiwe. Neryo Filipo abere akakania nayu, omulhume oyo mwasima ebya Yesu abirimukolera. Aliwe ni kyahi ekyaleka omukulhu oyo iniaghenda e Yerusalemu? Kundi abya iniabirianza Yehova. Thukaminya thuthi? Abya iniakalhua e Yerusalemu okw’iramya Yehova. Kikalhangirika ngoku omulhume oyu abya iniabirileka edini yiwe eyabuthirawamu n’eriyiyunga okwa kihanda ekiyihereyo oku Nyamuhanga ow’ekwenene. Olhwanzo olhw’aby’awithire Yehova lhwo lhwanaleka iniakolha ekindi kiika kikulhu, eky’eribatizibwa n’eribya mwigha wa Kristo.​—Mt. 28:19.

3. Ni byahi ebyanga kakirya omundu eribatizibwa? (Lebaya akasanduko “ Omwa Muthima Wawu Muliki?”)

³ Olhwanzo olhwa wuwithire Yehova lhwangana leka iwabatizibwa. Aliwe kandi olhwanzo lhwangana kukakirya erikolha ekyo. Lhuthi? Thalebya eby’erileberyako bino. Wangananza kutsibu abahughu n’abanywani bawu abathe Bema, neryo iwakwa obuba wuthi wamabatizibwa, ibakendi kupona.  (Mt. 10:37) Kutse wanganaza emitse eyo wunasi Nyamuhanga kw’aponire, neryo ikyakukalira erilekayo. (Esy. 97:10) Kutse wanganabya imuwakulha imukasangira omwa biro bikulhu eby’amadini w’amabehi. Neryo iwanganabya iwanzire ebitsange ebiri omw’isangira omwa biro bikulhu ebyo. Busana n’ekyo, ikyangana kukalira erileka erisangira omwa biro bikulhu ebithetsemesaya Yehova ebyo. (1 Kor. 10:20, 21) Wutholere iwayibulya, “Ni kyahi kutse nindi oyo nganzire kutsibu?”

4. Enzumwa ngulhu eyangaleka iwabatizibwa ni yahi?

⁴ Ni bibuya bingyi ebya wutholere iwanza n’erisima. Ng’eky’erileberyako, nibya wuthe watsuka n’erigha n’Abema ba Yehova, wanganabya iwabya iwunanzire kutsibu e Biblia. Kandi wanganabya iwabya iwunanzire na Yesu. Neryo kundi wabiriminya Abema ba Yehova, wangananza eribya haghuma nabu. Aliwe erithanza ebibuya ng’ebyo sikyendilhuaho kikaleka wukanza eriyihayo oku Yehova n’eribatizibwa. Ekikulhu ekikendi leka iwabatizibwa ly’erianza Yehova Nyamuhanga. Wamanza Yehova kwilhaba ekindi kindu, isiwendi lighira ekyosi-kyosi kutse owosi-wosi erikulemesya erimukolera. Erianza Yehova irikendileka iwanza eribatizibwa n’erisighalha muthaleghulha okw’iyo wabiribatizibwa.

5. Thukendi kania okuki omo mwatsi ono?

⁵ Yesu mwabugha athi thutholere ithwanza Yehova n’omuthima wethu wosi, engebe, amalengekania, n’akaghalha kethu kosi. (Mk. 12:30) Wang’igha wuthi erianza Yehova n’erimusikya kutsibu? Erighanirya oko lhwanzo olho Yehova athuwithire kikaleka nethu ithwamwanza. (1 Yn. 4:19) Omo mwatsi ono, thukendi minya ebindu ebya wutholere iwakolha erianza Yehova n’eribatizibwa.

6. Ngoku kiri omu Abanya Roma 1:20, ni nzira yahi nguma eyo thwang’ighiramu oku Yehova?

⁶ Igha oku Yehova erilhabira omwa bihangikwa biwe. (Soma Abanya Roma 1:20; Erib. 4:11) Ghaniraya okwa menge wa Yehova awakalhangirika omwa birimwa n’ebisoro. Lengesaya erigha okwa mibere omubiri wawu akolirwemo. (Esy. 139:14) Kandi ghanirya okwa kaghalha kanene ako Yehova ahira omo lyuba lyethu. Nibya ibbwa eryuba ni lighuma ly’okwa syobbiliyoni sy’esyongununu. * (Isa. 40:26) Wamakolha ekyo, iwukendiongera erisikya Yehova. Aliwe, eriminya ngoku Yehova awithe amenge n’obuthoki bunene ni katsweka kake ak’okwa musingyi ow’eribya bughuma nayu. Erithoka erighumya olhwanzo olhwa wuwithire Yehova n’eribya munywani wiwe wutholere iwamuminyako bingyi.

7. Erithoka erianza Yehova ya kutsibu, ni kyahi ekyo wutholere iwaligha?

⁷ Wutholere iwaligha ngoku Yehova akutsomene iwe ng’iwe. Kikanakukalira eriligha ngoku Omuhangiki w’olhubulha n’ekihugho anakulholire kandi ku akutsomene? Kyamabya ikwa kiri kithya, wibuke ngoku Yehova “syali haali okw’ithwe oko buli mundu.” (Emib. 17:26-28) “Akasondaya emithima yosi,” kandi akakulhagha ngoku Dawudi anabwira Solomona athi, “wamamusonda-sonda, asyabanika okw’iwe.” (1 Emy. 28:9) Nibya ekikaleka iwabya lino iwunemwigha e Biblia, ly’eribya Yehova iniakabugha athi abirikuletha okw’iyo. (Yer. 31:3) Wam’ongera eriminya ebyosi ebyo Yehova abirikukolera, olhwanzo olhwa wumuwithire ilhukendiongera.

8. Wanga kangania wuthi ku wukasima olhwanzo lhwa Yehova?

⁸ Enzira nguma y’erikanganiryamu ku wukasima  olhwanzo lhwa Yehova ly’erikania nayu omwa musabe. Olhwanzo olhwa wuwithire Yehova lhukendiongera wukamubwira emilyambo yawu n’erimusima busana n’ebyosi ebyo akakukolera. N’obunywani bwawu na Yehova ibukendi ghuma wukalhangira ngoku akasubiraya emisabe yawu. (Esy. 116:1) Iwukendi kikakasya ngoku akwasi ndeke. Aliwe eribya munywani wa Yehova, wutholere iwaminya amalengekania wiwe. Kandi wutholere iwaminya ebyo akakuyithaghako. Enzira nguma nyisa ey’erimuminyiramu, ly’erigha Ekinywe kiwe, e Biblia.

9. Wanga kangania wuthi ku wukasima e Biblia?

⁹ Igha erisima Ekinywe kya Nyamuhanga, e Biblia. E Biblia nyisa mo muli ekwenene eyihambire oku Yehova n’ebyo akutheghekere. Wukakanganaya ku wukasimayo omw’isomayo buli kiro, erithegheka ebya mukend’igha wukeghesibwa e Biblia, n’erighendera okwa bya wuk’igha. (Esy. 119:97, 99; Yn. 17:17) Wunawithe endegheka y’erisoma e Biblia? Wukanaghendera okwa ndegheka eyo, erilhangira wuthi wukasoma e Biblia obuli kiro?

10. Ekighuma ky’okwa bikaleka e Biblia iyabya ya mbaghane ni kyahi?

¹⁰ Ekighuma ky’okwa bikaleka e Biblia iyabya y’embaghane ly’eribya imuli ebihambire oku Yesu ebyabughawa n’abandu abamulholhako. Kya kitabu kisa ekikasoborera ebyonyine-nyine ebyo Yesu abirikukolera. Wamabiriminya ebyo Yesu abugha n’erikolha, iwukendianza erimunywana.

11. Ni kyahi ekikendi kuwathikya erianza Yehova?

¹¹ Igha erianza Yesu, neryo wukendyongera erianza Yehova. Busana naki? Kundi Yesu mwakangania ndeke-ndeke emibere ya Thatha wiwe. (Yn. 14:9) Neryo wam’ongera eriminya Yesu, iwukendyongera eriminya n’erianza Yehova. Thalengekania okwa lhukeri olho Yesu akanganaya ababya baghayirwe​—abanakwa, abalhwere, n’abathawithe kiwathikya. Thalengekania n’okwa menge agho akakuha kandi ngoku engebe yawu yang’uwana wamaghendera kugho.​—Mt. 5:1-11; 7:24-27.

12. Erigha oku Yesu, kikendi leka iwanza erikolhaki?

¹² Olhwanzo olhwa wuwithire Yesu ilhukendi ghuma wunemughanirya kutsibu  okw’iyihayo eryo akolha nuku ebibi byethu bighanyirawe. (Mt. 20:28) Eriminya ngoku Yesu mwaligha erikuholera, kyanganaleka iwayisubamu n’erisaba Yehova y’ekighanyiro. (Emib. 3:19, 20; 1 Yn. 1:9) Kandi wukendibya wukanza Yesu na Yehova, ikikendi kwanguhira eriyithunda oko bandi abawithe amalengekania ng’ayo.

13. Ni kyahi ekyo Yehova abirikuha?

¹³ Igha erianza abali omw’ihiika lya Yehova. Abahughu n’abanywani bawu abathe Bema ba Yehova banganaghana eriyitheghererya ekikaleka iwanza eriyihayo oku Yehova. Nibya bangana kuhakanisya. Yehova akendi kuwathikya omw’ikuha erihiika ly’obunyakirimu. Wamabya bughuma n’erihiika eryo, iwukendi bana olhwanzo n’obuwathikya. (Mk. 10:29, 30; Ebr. 10:24, 25) Endambi iyanganahika ab’okw’iwe ibakuyiyungako erikolera Yehova n’erighendera okwa bihano biwe.​—1 Pet. 2:12.

14. Ngoku kiri omu 1 Yoane 5:3, ni byahi ebyo wabiriyilhangirira okwa bihano bya Yehova?

¹⁴ Igha erisima ebihano bya Yehova n’eribighenderako. Wuthe waminya Yehova, obundi wabya iwabiriyihiriraho ebyawu eby’erighenderako, aliwe lino wukalhangira ngoku ebihano bya Yehova bya byuwene. (Esy. 1:1-3; soma 1 Yoane 5:3.) Lengekanaya okw’ihana eryo e Biblia yikaha abalhume, abakali bathahibwa, ababuthi, n’abaana. (Efe. 5:22–6:4) Etseme y’eka yawu yanabiryongera busana n’erighendera okwa mahano ayo? Emibere yawu yanabiryuwana busana n’erighendera okwa busondoli bwa Yehova obw’erisombolha ndeke abanywani? Etseme yawu yanabiryongera? (Emi. 13:20; 1 Kor. 15:33) Erisubirya lyawu okwa bibulyo ebyo lyanganabya ini ee.

15. Wangakolhaki wamanza eriminya ngoku wanga ghendera okwa misingyi ye Biblia?

¹⁵ Hanganayira ikyakukalira eriminya ngoku wangakolesya emisingyi ye Biblia eyo wuk’igha. Eki ky’ekikaleka Yehova iniakolesya ekithunga kiwe erikuha emyatsi eyiseghemere okwa Biblia eyanga kuwathikya eriminya ekihikire n’ekithahikire. (Ebr. 5:13, 14) Wamasoma n’erigha emyatsi eyi, iwukendi lhangira omughaso wayo okwa buli kindu, kandi iwukendianza eriyiyunga okwa kithunga kya Yehova.

16. Yehova abiritheghekania athi abandu biwe?

¹⁶ Igha erianza n’erisighika ekithunga kya Yehova. Yehova abiritheghekania abandu biwe mwa bithunga-bithunga; na Mughalha wiwe, Yesu, ya mukulhu wabyo ebyosi. (Efe. 1:22; 5:23) Yesu abirisombolha egurupu nyike y’abalhume abahakabibwa eritheghekania omubiiri ogho anzire iniakolhwa munabwire. Yesu mwahulha egurupu y’abalhume eyi mwa “omughombe oyuthereghulha n’ow’amenge,” kandi olhukwamirwa olhu bakalhukolha n’omuhwa erikulisya n’erikutheya bunyakirimu. (Mt. 24:45-47) Enguma y’okwa syonzira esyo mughombe oyuthereghulha akakuwathikirayamu ly’erilhangira athi akahiraho abasyakulhu abatholere erikusondolha n’erikutheya. (Isa. 32:1, 2; Ebr. 13:17; 1 Pet. 5:2, 3) Abasyakulhu banayitheghekire erikolha ekyo bangathoka busana nawu, erikuhumulikania, n’erikuwathikya eryongera erianza Yehova. Aliwe ekighuma ky’okwa bindu by’omughaso munene ebyo banga kukolera ly’erikuwathikya erikangirirya abandi oku Yehova.​—Efe. 4:11-13.

17. Ngoku kiri omu Abanya Roma 10:10, 13, 14, ni kyahi ekikaleka ithwabwira abandi oku Yehova?

¹⁷ Wathikaya abandi erigha erianza Yehova. Yesu mwabwira abigha biwe athi bakangiriraye abandi oku Yehova. (Mt. 28:19, 20) Ithwangana kikolha habw’erithaberererya mukoro. Aliwe wukendibya wuk’ongera erianza Yehova, wukendiyowa ng’omukwenda Petero  na Yoane, ababugha bathi: “Sithwangathoka erireka eribugha ebyo thwabirilholhako n’ebyo thwabiriowa.” (Emib. 4:20) Kikaletha etseme nene eriwathikya omundu erianza Yehova. Thalengekania Filipo nga mwatsema bungahi akawathikya Omuetiopia eriminya ekwenene eyiri omwa Masako n’eribatizibwa! Wukabya wukagherererya Filipo n’erighendera okwa kihano kya Yesu eky’erithulira, wukakanganaya ku wanzire eribya Mwema wa Yehova. (Soma Abanya Roma 10:10, 13, 14.) Neryo aho, iwukendi yibulya ekibulyo ekiri ng’eky’Omuetiopia kino: “Ekyanga nyikakirya eribatizibwa ni kyahi kwehi?”​—Emib. 8:36.

18. Thukendi syakania okuki omwa mwatsi owakakwamako?

¹⁸ Wukabya iwamahika okwa kiika kikulhu kutsibu omwa ngebe yawu wukathwamu eribatizibwa. Kundi eki n’ithwamu likulhu, wutholere iwalebya ndeke ekya kikamanyisaya. Ni byahi ebya wutholere iwaminya okw’ibatizibwa? Ni byahi ebya wutholere iwakolha wuthe wabatizibwa n’enyuma w’eribatizibwa? Omwatsi ow’akakwamako akendisyasubirya ebibulyo ebyo.