Jack na Marie-Line babiribya haghuma omwa mubiiri w’omughulhu wosi eritsuka 1988. Eribya ibasibwe ng’abakaghenda-ghendanaya n’emibere eyiriho, babirithumwa kutsibu omwa Guadeloupe n’omwa French Guiana. Ebihugho byosi bibiri lino biri omwa busondoli bw’ekyaghanda kye France. Leka thubulhaye Jack na Marie-Line ebibulyo bike.

Ni kyahi ekyabahira mw’omuhwa w’eringira omwa mubiiri w’omughulhu wosi?

Marie-Line: Eritsuka omwa bulere e Guadeloupe, mughulhu mungyi iningathulira na mama waghe ekiro kyosi, kandi abya Mwema wa Yehova ow’omuhwa. Nganzire abandu, neryo nabere nganaghunza esukuru, omwa 1985, munatsuka obutemburi.

Jack: Ingakine mulere, iningasiba n’abalikyethu abali omwa mubiiri w’omughulhu wosi abanzire omubiiri w’erithulira. Iningakolha obutemburi bw’obuwathikya omwa bihumuro by’esukuru. Okwa syowikendi, ihakanayira ithwaghenda omwa bbasi eriyayiyunga okwa bandi batemburi omwa bulhambu bwabu. Ithukathulira ekiro kyosi—neryo ithwaghenda okwa bbichi. Ebiro ebyo ithukatsema kutsibu!

Biro bike nalithahirye Marie-Line omwa 1988, munayibwira indi, ‛Sithuwithe ebikathuhambirira, busana naki ithuth’ongera omubiiri wethu w’erithulira?’ Munayiyunga oku Marie-Line erikolha obutemburi. Enyuma w’omwaka mughuma thwalilhuire okwa sukuru y’abatemburi, muthwasombolhwa eribya batemburi b’embaghane. Muthwathumwa omwa myanya muthina-muthina e Guadeloupe thuthe thwathumwa omwa French Guiana.

Ahabw’emyaka mingyi, mwabirithumwa omwa myanya mingyi. Ni kyahi ekyabiribawathikya erighenda-ghendania n’emibere mihyaka? 

Marie-Line: Baghalha bethu okwa Beteli ye French Guiana babya ibanasi ngoku erisako erya thwanzire kutsibu ni Isaya 6:8. Neryo ibakabya bakathutherera, ibakatsuka omw’itsanga nethu bathi, “Mun’ibukire erisako lyenyu eryo mwanzire kutsibu?” Ithukaminya kandi ku thukayathumawa ehandi, neryo ithwabugha thuthi, “Thwe Babano Hano! Wuthuthume!”

 Ithukayitheghaya okw’ilinganisya omwanya ogho thwamathumwamu n’owathukalhuamu kundi ikyangana leka ithuthatsemera ogho thwamathumwamu. Kandi ithukalengaho erinywana balikyethu b’eyothwamathumwa.

Jack: Kera, abandi banywani bethu ibakananza thuleke erihuma bakanza thubye ithune nabu. Aliwe thwabere thukalhua e Guadeloupe, mughalha wethu mughuma mwathw’ibukya ebinywe bya Yesu ebiri omu Matayo 13:38: “Eririma ky’ekihugho.” Neryo thukabya thukathumwa, thukayibukaya ngoku thukine omw’irima lighumerera, ahosi-hosi aho thwangabya ithuli. Nibya ekikulhu b’abandu n’obulhambu!

Thukabya thukahika omwa bulhambu buhyaka, thukalhangira abandi abaliyo ibanatsemire. Neryo thukalengaho eribya ng’ibo. Ebyalya byanganabya mbaghane, aliwe thukalya ebyo bakalya kandi ithwanywa ebyo bakanywa, ithwaghendera okwa bihambire okwa by’amaghalha ebitholere. Thukalengaho erikania ndeke okwa ehosi eyo thukathumawa.

Marie-Line: Kandi thuk’ighira bingyi okwa balikyethu b’eyo. Ng’ibuka ekyabya thukanahika omwa French Guiana. Embulha yabya iyinemuwa kutsibu, neryo muthwalengekania thuthi thukendi ghenda omw’ithulira yakya. Aliwe neryo mwali wethu mwanyibulya athi, “Wunemwendi ghenda omw’ithulira?” Munasweka, namamubulya indi, “Thuthi?” Mwabugha athi, “Imaya emavuli yawu, thwanaghenda okwa syoggali syethu.” Neryo mun’igha eriyiswika emavule kandi ingane mufugha n’eggali. Ku nath’igha ekyo, sinangabere ingaghenda omw’ithulira omwa buthuku bw’embulha!

Mwamabirihuma emirundi eyiri nga 15. Munawithe ebyo mwangabwira abandi okw’ihuma?

Marie-Line: Erihuma linawithe ebitsibu. Wukayithagha omwanya owuwene owa wangayowamu buholho wukalhua omw’ithulira.

Jack: Ngabeghere erithasyahira erangyi omwa nyumba eya thwamahumiramo. Baghalha bethu okwa muthahulha bamabya ibanasi ku sithwendibyayo buthuku buuli, ihakanayira ibasatha naghe bathi, “Jack, lero lino wulekendihira omwa nyumba mw’eyindi rangyi!”

Marie-Line asi ndeke eriboha ebindu! Akahira ebindu omwa syabbokisi n’erihandikako “eby’ekyoghero,” “eby’ekathi,” “eby’omwa jokoni,” n’ebindi-n’ebindi. Neryo thukabya thukahika eyo thukaya, kik’olhoba eriminya aho obuli kindu kitholere eribya. Akahandika obuli kindu ekiri omwa  buli bbokisi nuku thuthoke eribana ekyo thukayithagha.

Marie-Line: Kundi thwabirigha eribya omwa buyithondeke, kikathwanguhira eritsukiraho omubiiri w’erithulira.

Mukatheghekanaya muthi endambi yenyu nuku muberereraye ndeke omubiiri wenyu w’erithulira?—2 Tim. 4:5.

Marie-Line: Kyabbalaza, thukalhuhuka n’erithegheka emihindano. Eritsuka Kyakabiri, thukaghenda omw’ithulira.

Jack: Nomwakine indi thuwithe esyosaha esyo thutholere erihayo obuli kwezi, ekyo si kya kilhubirirwa kyethu kikulhu. Erithulira kya kindu kikulhu omwa ngebe yethu. Thukatsuka omubiiri w’erithulira thukanalhua eka erihika aho thukendi subira eka.

Marie-Line: Ng’eky’erileberyako, thukabya thukayayitsemesya, ngaghenda n’esyotrakit. Abandi bandu bakathuhikako n’erithusaba ebitabu, nomuthwangabya isithwathababwira thuthi thuli Bema ba Yehova. Ky’ekikaleka ithwayitheya okwa myambalire yethu n’emibere yethu. Abandu bakalhangira ebindu ng’ebyo.

Jack: Kandi thukaha obwema omw’iwathikya abataka. Ngasonga-songaya ebipapura, inayutha akasasiro, n’erikuma-kuma ebithi ebikathoghonga. Abataka bethu bakalhangira ekyo kandi hakanayira ibathubulya bathi, “Wangananyibanira e Biblia?”

Mwabirithulira omwa myanya ya haali. Munawithe eky’embaghane ekya mwanga bugha okwa syongendo esyo?

Jack: E Guiana, yine eyindi myanya eyikalire erihikamo. Omwa wiki ithukanaghenda esyomayiro 370 (esyokilomita 600) kandi omwa syonzira esithuwene. Sithwendi syibirirwa ekiro thwabungira omwa kyalu kye St. Élie, omwa musithu we Amazon. Muthwaghunza esyosaha nyingyi omwa matoka eyikalhaba ahathe nguda n’omwa bwathu bwe injini erisalha thwahikayo. Abandu bangyi b’eyo ini bathakuli b’ehoro. Busana n’erisima ebitabu byethu, abandi mubathuha ehitaho hy’ehoro ng’erihayo lyabu! Omw’igholho-gholho, muthwabakangania enguma y’okwa syovidiyo sy’ekithunga. Abangyi mubalebyayo.

Marie-Line: Omo myaka ya hanyuma, Jack mwanasabwa eriyalhabya omukania w’Eryibuka omwa kyalu kye Camopi. Erihikayo, muthwaghunza esyosaha ini omwa bwathu bwe injini okwa Lhusi Oyapock. Muthwatsema kutsibu.

Jack: Ikikalire erilhaba ahakabya omuhurumuko. Erithakubwira, kikatsemesaya erilhangira omuhurumuko mukayahika kugho. Oyukaghendaya obwathu atholere iniabya inianasi ndeke erilhaba mugho. Aliwe mukyatsemesya. Nomwakine indi yabya Abema ba Yehova 6 basa, abandu nga 50 mubahindana okw’Ibuka, imwamune n’Abaamerika-Abahindi!

Marie-Line: Abalere abanzire eriyihwerya omwa mubiiri wa Yehova bangana lholha okwa bibuya ng’ebi. Wukayithagha eriyikethera Yehova omwa mibere ng’eyi, n’erikirirya lyawu likaghuma. Thukayilhangirira obuwathikya bwa Yehova mughulhu mungyi.

Mwabirigha emibughe mingyi. Mbwino kibolhobere erigha emibughe?

Jack: Eyihi. Ng’igha emibughe eyi nuku ngawathikaye ahali obuyithawa. Munasondolha erigha ly’Akaleberyo omwa Sranantongo * nibya isindi nalhabya ekitsweka ky’obusomi bwe Biblia! Munabulya mughalha wethu nga mubakanayitheghereraya. Mwabugha athi, “Ebindi sithulhue thukabiyitheghererya, aliwe muwukakolha ndeke.” Abaana mubawathikya kutsibu. Namasobya ibakanyihengulha, ekyo abakulhu bathabya bakakolha. Abaana mubaleka in’igha bingyi.

Marie-Line: Omwa bulhambu bughuma, ingawithe mw’abigha abakabugha Olhufaranza, Olhupotigizi, n’Olhusranantongo. Dada mughuma mwanyiha amenge athi ambi ingatsuka erisondolha abigha ab’omubughe ogho ngathasi ndeke neryo ingaghunzerera n’ab’owangasi ndeke. Munalhuaho inalhangira ngoku ayo ni menge awuwene.

 Kiro kighuma, nabya w’erisondolha abigha owundi omwa Lhusranantongo n’owundi omwa Lhupotigizi. Nabere ingatsuka erisondolha omwigha wakabiri, mwali wethu oyo nabya nayu mwabugha athi, “Marie-Line, ngalengekanaya hane ekitsibu!” Munaminya ku ngali kw’ikania n’omukali we Brazil omwa Lhusranantongo omwakanya k’Olhupotigizi!

Mwanzibirwe kutsibu eyo mwabirikolera. Mwabirithoka muthi erinywana balikyethu?

Jack: Emisyo 11:25 hathi: “Omuthima w’erisunza [w’erihithya] asyanenehibwa.” Thukalengaho erisiba n’abandi n’eribawathikya. Bikahika okw’isugha Ekisenge ky’Obwami, abandi baghalha bethu bakanambwira bathi: “Leka abathuliri babakole ekyo.” Aliwe ngabugha indi: “Naghe ngali muthuliri. Neryo hamabya omubiiri w’erikolha, naghe nganza ingakolha kugho.” Nomwakine indi ithwe bosi hakanayira ithwayithagha obuthuku bw’eribya ithwibene, thukabera eriyibukya ngoku ekyo isikyathukakiraya erikolera abandi b’ebibuya.

Marie-Line: Thukalengaho erihira ebiyithawa by’abalikyethu by’embere. Omwa nzira eyo, thukaminya bakayithagha oyuwanga balemberera abaana babu kutse eriyabenderabo okwa sukuru. Neryo thukalebaya endegheka yethu nuku thuthoke eriwathikya. Omwa nzira eyi, obunywani bwethu bukakamatha, ithwabya ithunayitheghekire eribawathikya bakayithagha obuwathikya.

Ni mighisa yahi eyo mwabiribana mukakolera eyiri obuyithawa?

Jack: Omubiiri w’omughulhu wosi abirithulethera etseme. Thwabiribana akaghisa k’erilhangira ebihangikwa bya Yehova bingyi. Nomwakine indi mune ebitsibu, thuwithe obuholho kundi thunasi ku thunawithe obuwathikya bw’abandu ba Nyamuhanga ehosi eyo thukaya.

Ingane munyethu, munahirwa omwa ngomo omwa French Guiana busana n’erighana eribya musirikali. Isindi lengekanaya indi hane ekiro ngendi syasubayo ng’omumisyonare kandi ingathumwa ng’oyukabungira abanya ngomo. Omo kwenene, Yehova ni mwenge, abirithutsumulha!

Marie-Line: Ekyo ngatsemera kutsibu ly’eriyihayo busana n’abandi. Thutsemire eribya omwa mubiiri wa Yehova. Kandi kyabirighumya obutheke bwethu. Hakanayira, Jack iniabugha athi thukokaye mughalha wethu na mukali wiwe ababbunikire muthima okw’irya. Mughulhu mungyi ngabugha indi, “Ekyo kyanganalhue ingalengekania!” Thukayisanga ithwabirilengekania kighuma.

Jack: Munabanikiremo ekansa y’okwa kisubaliro. Nomwakine indi Marie-Line syalyanza eriowa eki, ngamubwira indi: “Mwanithu, namabya w’eriholha omungya, iningendibya ingamaholha isindi nabya musyakulhu kutsibu. Aliwe iningendibya inamaholha ndeke, inganasi ku munakolera Yehova omwa ngebe yaghe yosi, kandi ekyo kikaleka inatsema.”—Enz. 25:8.

Marie-Line: Yehova abirithuha mibiiri minene n’erithuwathikya erikolha ebyo thuthabya thukalengekania thuthi thwangana thoka. Thwabiribana ebibuya bingyi omwa ngebe yethu. Thukaya ehosi-hosi aho ekithunga kikathusaba erighenda, ithunayikethere ngoku Yehova akendi thuwathikya!