1. Ni kyahi ekya omundu atholere iniatsuka erikolha athe ahimba enyumba?

THALENGEKANIA omundu iniathwamu erihimba enyumba. Anasi enyumba eyo anzire erihimba. Mbwino anemwendi kwama kya yaghulha eby’erikolesya n’eritsukiraho erihimba? Eyihi. Athe atsuka, hane ekindu kikulhu ekyo atholere erikolha​—erighanza ebikayithaghisibawa. Busana naki? Kundi akayithagha eriminya ng’anawithe esyosente esyanga ghunza enyumba eyo. Amasangwa abaririra ndeke, ahathe erithika-thika iniakendi ghunza erihimba enyumba yiwe.

2. Ngoku kiri omu Luka 14:28-30, wuthe wabatizibwa wutholere iwatsuka erighanirya okuki?

² Erianza Yehova n’erisima ebyo abirikukolera kyanabirileka iwalengekania okw’ibatizibwa? Kyamabya kithya, wutholere iwathwamu ng’omulhume oyukanza erihimba enyumba. Busana naki ithwabugha thuthya? Thalebya ebinywe bya Yesu ebiri omu Luka 14:28-30. (Soma.) Yesu abya iniakakanaya okwa bikayithaghisibawa eribya mwigha wiwe. Ithwe erimukwama, thutholere ithwabya ithunayitheghekire erighumira ebitsibu birebe n’eriyithalya okwa bindi bindu. (Lk. 9:23-26; 12:51-53) Kwesi wuthe wabatizibwa, ambi iwatsuka erilengekania buuli okwa bya wukendi lhabamo. Neryo aho iwukendibya iwamayitheghekera ndeke erikolera Nyamuhanga buthaleghulha ng’Omukristayo oyubatizibirwe.

3. Thukendi kania okuki omo mwatsi ono?

³ Ikyanabya ky’omughaso eriyisinga erighumira ebitsibu n’eriyithalya okwa bindi bindu wanamathabatizibwa? Ahathe erithika-thika! Eribatizibwa likakolhaya okwa mighisa mingyi lino n’ey’obuthuku obukasa. Thukanaye okwa bibulyo bikulhu-bikulhu birebe ebihambire okwa lhubatizo. Erikolha ekyo  likendi kuwathikya erisubirya ekibulyo kino, “Nanamabirihika eribatizibwa?”

4. (a) Eriyihayo oku Nyamuhanga niki? (b) Ngoku kiri omu Matayo 16:24 kikamanyisayaki eriyighana?

⁴ Eriyihayo oku Nyamuhanga niki? Wuthe wabatizibwa, wutholere iwayihayo oku Nyamuhanga. Wukabya wukayihayo okw’iyo, wukamusaba erilhua okwa muthima n’erimubwira ku wukendi mukolera omwa ngebe yawu yosi erihika kera na kera. Wukabya wukayihayo oku Nyamuhanga, wukayighana. Yesu mwabwira abigha biwe athi: “Omundu amanza erinyikwama, ayighane, aheke omuthi wiwe w’obwaghali, anyikwame.” (Mt. 16:24, NW) Wukabya iwamabya wa Yehova, kandi olho ni lhusunzo lhunene. (Abar. 14:8) Wukamubwira wuthi eritsuka endambi eyo, ekikulhu omwa ngebe yawu ly’erimukolera, butsira eriyitsemesya. Eriyihayo lyawu n’ilhahirya, ni bugha ambu, eriyisema kutse eriyilhagha embere sya Nyamuhanga. Yehova syalithukaka erikolha ekyo. Aliwe thwamayilhagha, akanza ithwaberererya.​—Esy. 116:12, 14.

5. Hali mbaghaneki ahakathi-kathi k’eriyihayo oku Nyamuhanga n’eribatizibwa?

⁵ Eriyihayo oku Nyamuhanga lihambene lithi n’eribatizibwa? Wukabya wukayihayo, wukakikolha omwa mbiitha; iwe na Yehova. Eribatizibwa likakolhawa embere sy’abandu, mughulhu mungyi okwa lhuhindano. Wukabya wukabatizibwa, wukabya iwamakangania abandi ngoku wabiriyihayo oku Yehova. * Neryo kwesi eribatizibwa lyawu likaleka abandi ibaminya ku wanzire Yehova Nyamuhanga wawu n’omuthima wawu wosi, engebe, obulengekania, n’amaaka wawu wosi kandi ngoku wabirithwamu erimukolera erihika kera na kera.​—Mk. 12:30.

6-7. Ngoku kiri omu 1 Petero 3:18-22, ni nzumwa syahi ibiri esikaleka eribatizibwa iryabya iritholere?

⁶ Nina kikulhu indi wuthanatha batizibwa? Thalebya ebinywe ebiri omu 1 Petero 3:18-22. (Soma.) Ngoku obwathu bwanakanganaya erikirirya lya Noa, eribatizibwa likaleka abandi ibaminya ku wabiriyihayo oku Yehova. Ibbwa aliwe linayithaghisibirwe? Ndeke-ndeke. Petero mwahulha enzumwa eyikaleka. Eky’erimbere, liriho busana “n’erilhama” lyawu. Eribatizibwa lyangana thulhamya thwamakolha ebikakanganaya ngoku thwikirirye Yesu n’erikirirya ngoku mwathuholera, amalhubukibwa n’erisuba elhubulha, kandi ngoku “ali oko byalha by’amali bya Nyamuhanga.”

⁷ Ekyakabiri, eribatizibwa likaleka ithwathunga “obunyamuthima-thima obuwene.” Thukabya thukayihayo oku Nyamuhanga n’eribatizibwa, thukabya ithwam’ingira omwa bunywani bw’embaghane nayu. Busana n’eribya ithwabiriyisubamu ndeke n’erikirirya omwa mbanulho, Nyamuhanga akaghanyira ebibi byethu. Neryo thukabya n’obunyamuthima-thima obuwene embere siwe.

8. Ni nzumwa syahi esyangaleka iwathwamu eribatizibwa?

⁸ Iwe erithwamu eribatizibwa litholere iryaseghemera okuki? Iwe erigha ndeke e Biblia, lyabirileka iwaminya bingyi ebihambire oku Yehova​—emibere yiwe n’esyonzira siwe. Ebya wabirimwighako byabirikuhambako n’erileka iwamwanza kutsibu. Erianza Yehova ya yitholere iyabya nzumwa ngulhu eyikaleka iwathwamu eribatizibwa.

9. Kikamanyisayaki eribatizibwa omwa lina ly’Ise n’ery’Omughalha n’ery’omulimu abuyirire, ngoku kiri omu Matayo 28:19, 20?

⁹ Eyindi nzumwa eyangaleka iwathwamu  eribatizibwa ly’eribya iwabiriminya n’eriligha ekwenene ye Biblia. Thalebya ekya Yesu abugha akaha ekihano ky’eriyira abigha. (Soma Matayo 28:19, 20.) Yesu mwabugha athi abakabatizibawa batholere ibabatizibwa “omo lina ly’Ise, n’ery’Omughalha, n’ery’omulimu abuyirire.” Eki kikamanyisayaki? Wutholere iwikirirya n’omuthima wawu wosi ekwenene ye Biblia eyihambire oku Yehova; Mughalha wiwe, Yesu; n’omulimu abuyirire. Eyo ni myatsi y’ekwenene ey’amaaka kandi yangana kuhambako kutsibu. (Ebr. 4:12) Thulebaye emighuma y’okw’iyo.

10-11. Ni kwenene yahi eyihambire oku Thatha eyo wabirigha n’eriligha?

¹⁰ Thasyasubaya ameso w’enyuma oko kiro waminya ekwenene eyihambire okw’Ise: Erina liwe “ni Yehova,” yuli “Endatha oko kihugho kyosi,” kandi iyo musa ya “Nyamuhanga w’ekwenene.” (Esy. 83:18, NW; Yer. 10:10) Ni Muhangiki wethu, kandi “erilhama ni” lya Yehova. (Esy. 3:8; 36:9) Abirihiraho emitheghekere y’erithulhamya okwa kibi n’olhuholho n’erithuha amaha w’eribyaho kera na kera. (Yn. 17:3) Iwe eriyihayo n’eribatizibwa kikakanganaya ku wuli Mwema wa Yehova. (Isa. 43:10-12) Wukendibya omw’ihiika ly’ekihugho kyosi ery’abaramya ba Yehova abakayisyethera eryahulhwa omo lina lya Nyamuhanga n’erilibwirako abandi.​—Esy. 86:12.

¹¹ Ka ni lhusunzo lhunene eriminya erikangirirya lye Biblia erihambire oku Thatha! Wukabya wukaligha ekwenene eyi, omuthima wawu akakusukuma erianza eriyihayo oku Yehova n’eribatizibwa.

12-13. Ni kwenene yahi eyihambire oku Mughalha eyo wabirigha n’eriligha?

¹² Muwakolhaki wuk’igha ekwenene eno eyihambire oku Mughalha? Omwa bukulhu, Yesu y’owakabiri omwa buhangwa bwosi. Ni Muthongolya wethu. Mwahayo engebe yiwe busana nethu. Thwamakangania omwa mikolere yethu ngoku thw’ikirirya omwa ndongolya, ebibi byethu ibikendi ghanyirwa, ithwabya banywani ba Nyamuhanga, kandi ithwasyabana engebe y’erikotha. (Yn. 3:16) Yesu ni Muhereri wethu Mukulhu. Anzire thughasirawe omwa mbanulho n’erithunga obunywani obukamathire na Nyamuhanga. (Ebr. 4:15; 7:24, 25) Iyo ng’Omwami w’Obwami bwa Nyamuhanga, Yehova akendisyamukolesya eriyira erina liwe mwa libuyirire, erighunzaho obubi, n’eriletha emighisa ya kera na kera omwa kihugho Paradiso. (Mt. 6:9, 10; Erib. 11:15) Yesu ni ky’erileberyako ekyo thwanga kwama. (1 Pet. 2:21) Mwathuhiriraho eky’erileberyako omw’ihayo engebe yiwe erikolha erisonda lya Nyamuhanga.​—Yn. 4:34.

¹³ Wamaligha ebya Biblia yikakangiriraya oku Yesu, iwukendianza Mughalha omwanzwa wa Nyamuhanga. Olhwanzo olho ilhukendi leka iwakolesya engebe yawu erikolha erisonda lya Nyamuhanga, ngoku Yesu akolha. Neryo, iwukendianza eriyihayo oku Yehova n’eribatizibwa.

14-15. Ni kwenene yahi eyihambire okwa mulimu abuyirire eyo wabirigha n’eriligha?

¹⁴ Ni kyahi ekyasa omwa malengekania wuk’igha ekwenene eno eyihambire okwa mulimu abuyirire? Si nyamuhanga, aliwe ni kaghalha ka Nyamuhanga akakakolha. Yehova mwakolesya omulimu abuyirire erisondolha abahandiki be Biblia, kandi omulimu akathuwathikaya eriyitheghererya n’erikolesya ebyo thuk’igha muyo. (Yn. 14:26; 2 Pet. 1:21) Erilhabira omwa mulimu wiwe, Yehova akathuha “obuthoki bunene.” (2 Kor. 4:7) Omulimu akathuthokesaya erithulha engulhu yuwene, erirwanisya erilengwako, erighumira erihwa amani, n’eriyiyinirya ebitsibu. Akathuwathikaya eribya n’emibere mibuyanga ‘ey’emikolere eyikalhua oko mulimu.’ (Gal. 5:22) Ahathe  eriyikukumirira, Nyamuhanga akaha omulimu wiwe abakamuyikethera n’abakamusabagho erilhua okwa muthima.​—Lk. 11:13.

¹⁵ Kikatsemesaya kandi kikahumulikanaya eriminya ngoku abaramya ba Yehova bangana yikethera omulimu abuyirire eribawathikya erikolera Nyamuhanga! Wamabiriligha ekwenene eya wuk’igha eyihambire okwa mulimu abuyirire, iwukendianza eriyihayo oku Nyamuhanga n’eribatizibwa.

16. Ni byahi ebya thwamabirith’igha?

¹⁶ Erithwamu lyawu ery’eriyihayo oku Nyamuhanga n’eribatizibwa, ni kiika kikulhu. Ngoku thwamabirigha, wutholere iwabya iwunayitheghekire eriligha ebyanga lhwiririramo​—ebitsibu n’eby’eriyithalyako. Aliwe emighisa ya minene. Olhubatizo lhwangana kulhamya, kandi ilhwaleka iwabya n’obunyamuthima-thima obuwene embere sya Nyamuhanga. Enzumwa ngulhu eyangaleka iwathwamu eribatizibwa lhw’olhwanzo olhwa wuwithire Yehova Nyamuhanga. Kandi wutholere iwikirirya n’omuthima wawu wosi ekwenene eyo wabirigha oku Thatha, Mughalha, n’omulimu abuyirire. Erikwamana n’ebya thwamabirigha, wanga subirya wuthiki ekibulyo kino, “Nanamabirihika eribatizibwa?”

17. Ni bindu nga byahi ebya wutholere iwatsuka erikolha wuthe wabatizibwa?

¹⁷ Wamayowa iwabiritholera eribatizibwa, ahathe erithika-thika, ni bingyi ebyo wabirikolha erighumya obughuma bwawu na Yehova. * Busana n’erigha e Biblia, wabiriminya bingyi ebihambire oku Yehova na Yesu. Wabirithunga erikirirya. (Ebr. 11:6) Wabiriyikethera kundu emilhaghe ya Yehova eyiri omwa Biblia, n’eriligha ngoku busana n’erikirirya omwa kihongo kya Yesu lyangana syakulhamya oko kibi n’olhuholho. Wabiriyisubamo; wabiriyikubya bwomo busana n’amalholho agho wabirikolha, n’erisaba Yehova y’ekighanyiro. Wabirihindulha engebe; iwunasikire wabirighana engebe nyibi eyo wabyamo kera n’eritsuka engebe eyikatsemesaya Nyamuhanga. (Emib. 3:19) Wunayitheghekire eribwira abandi okw’ikirirya lyawu. Muwatholera eribya muthuliri oyuthabatizibirwe n’eritsuka omubiiri w’erithulira haghuma n’ekithunga. (Mt. 24:14) Yehova akakuyisyethera busana n’erikolha ebindu ebyosi ebi. Wabirimutsemesya kutsibu.​—Emi. 27:11.

18. Ni bindi bindu byahi ebya wutholere erikolha wuthe wabatizibwa?

¹⁸ Wuthe wabatizibwa, hane ebindi bindu bike ebyo wutholere erikolha. Ngoku thwabirilhangira, wutholere iwayihayo oku Nyamuhanga. Iwune iwuwene, musabe erilhua okwa muthima, n’erimulhagha ngoku wukendi kolha erisonda liwe omwa ngebe yawu yosi. (1 Pet. 4:2) Neryo, bwira omusangania w’akathunga k’abasyakulhu ngoku wanzire eribatizibwa.  Akendi bwira abasyakulhu balebe, ibakania nawu. Isiwasagha erikania nabu. Wibuke ngoku baghalha bethu aba banakwasi kandi bakwanzire. Bakendi lhaba nawu omwa syongangirirya sy’omusingyi esye Biblia esyo wabirigha. Bakanza baminye nga wunayitheghererye emisingyi eyo kandi nga wunasi ngoku ni kikulhu eriyihayo n’eribatizibwa. Bamaligha bathi wutholere, ibakendi kubwira ngoku wukendi batizibwa okwa lhuhindano olhukendibya.

19-20. Ni byahi ebya wukendi yithagha erikolha wabiribatizibwa, kandi ekyo wangakikolha wuthi?

¹⁹ Wamabiribatizibwa, ni byahi ebya wukendi yithagha erikolha? * Wibuke ngoku eriyihayo ni yilhagha kandi ngoku Yehova anzire iwaliberererya. Neryo enyuma w’eribatizibwa, wutholere iwaberererya eriyilhagha lyawu. Ekyo wanga kikolha wuthi?

²⁰ Isiwayisolholha okwa kithunga. Wamabiribatizibwa, wukabya iwamabya mughuma w’okwa kithunga kya “balikyethu Abakristo.” (1 Pet. 2:17) Balikyethu omwa kithunga y’eka yawu y’obunyakirimu. Erihindana mughulhu wosi, kikendi kamathya obunywani bwawu nabu. Soma Ekinywe kya Nyamuhanga n’erikighaniryako buli kiro. (Esy. 1:1, 2) Wabirisoma ekitsweka kirebe omwa Biblia, ghaniraya kutsibu okwa bya wukalhua okw’isoma. Neryo ebinywe ebyo ibikendi hika okwa muthima wawu. ‘Wubye wukasaba’ buthumbya. (Mt. 26:41) Emisabe yawu eyikalhua okwa muthima yikendi kuthunda hakuhi na Yehova. “Mutsuke erisonda Obwami bwa Nyamuhanga.” (Mt. 6:33) Wangana kolha ekyo omw’ihira omubiiri w’erithulira w’embere omwa ngebe yawu. Erisangira mughulhu wosi omw’ithulira, kikendi ghumya erikirirya lyawu, kandi wangana wathikya abandi eribya n’amaha w’erisyabyaho kera na kera.​—1 Tim. 4:16.

21. Eribatizibwa likendi leka iwabanaki?

²¹ Iwe erithwamu eriyihayo oku Yehova n’eribatizibwa n’ithwamu likulhu eryo wanga kolha. Ni kwenene hane ebikayithaghisibawa. Mbwino n’inubira busa? Eyihi nahake! Ebitsibu byosi ebyo wangabana omwa kihugho kino ni ‘by’akathambi kake.’ (2 Kor. 4:17) Mbaghane n’ekyo, eribatizibwa kikendi leka iwabana engebe eyuwene lino ‘n’engebe eyiri ngebe kundu’ eyikasa. (1 Tim. 6:19) Neryo kisi, lengekanaya ndeke n’erisaba busana n’ebya wanga bugha okwa kibulyo kino, “Nanamabirihika eribatizibwa?”