1. Ni kyahi ekyasibwe okwa baghalha bethu abalere?

BAGHALHA bethu abalere, ni bingyi ebyo mwanga kolha. Abangyi omw’inywe muwithe akaghalha kanene. (Emi. 20:29) Mukakolha bingyi omwa kithunga. Obundi munanzire imwabya baghombe abawathikya. Aliwe, mwangana lengekania muthi abandi bakabalhangira nga mukine balere kutse nga simwasi bingyi eritholera erihebwa olhukwamirwa olhu. Nomwakine indi mwanganabya imukine balere, hane ebya mwanga kolha lino ebyanga leka abandi omwa kithunga ibabayikethera n’eribasikya.

2. Omo mwatsi ono thukendi kania okuki?

² Omo mwatsi ono, thukendi kania okwa ngebe y’Omwami Dawudi. Kandi omwa bikuhi thukendi lebya ebyabya omwa ngebe ya Asa na Yosafati​—abami babiri be Yuda. Thukendi lebya ebitsibu muthina-muthina ebyo abalhume basathu aba babana, ekyo bakolha bikabahikako, n’ebyo baghalha bethu abalere bang’ighira okwa by’erileberyako byabu.

3. Ni nzira yahi nguma eyo abalere banga wathikiryamu abakulire abali omwa kithunga?

³ Dawudi iniakine mulere, mw’igha erikolha ebyo abandi balhangira mwa by’omughaso. Kilhangirikire ngoku abya mundu w’obunyakirimu, kandi mwakulha-kulhania amaaka wiwe aw’eriimba, neryo amakolesyagho eriwathikya Saulo, omwami oyo Nyamuhanga asombolha. (1 Sam. 16:16, 23) Abalhwana munawithe ebyo mwasi erikolha ebyanga ghasira  abandi omwa kithunga? Abangyi omw’inywe munabiwithe. Ng’eky’erileberyako, obundi mukanalhangira ngoku abandi balikyethu abakulire bakasima bakakangiriribwa ngoku banga kolesya ndeke esyotabbuleti syabu n’ebindi byuma by’ekieletroniki bakayeghesya n’okwa mihindano. Amenge agho muwithe okwa bindu ng’ebyo angana wathikya kutsibu abakulire ng’abo.

4. Nga Dawudi, ni mibere yahi eyo baghalha bethu balere batholere ibabya nayu? (Lebaya ekisasani ky’okwa kidipa.)

⁴ Omwa ngebe yiwe eya buli kiro, Dawudi mwakangania ku ni mundu oyutsomene kandi muyiketherwa. Ng’eky’erileberyako, iniakine mulere, mwakolha kutsibu erilisya esyombuli sya thatha wiwe. Oyu abya mubiiri owakalire kutsibu. Enyuma waho, Dawudi mwabwira Omwami Saulo athi: “Omughombe wawu abere akalisya esyombuli sy’ise wiwe, n’omughulhu endale kutse edubu syasa n’eritsimba ekyana ky’embuli omo kihyo, munakwamayo, munaswiryayo, n’erinyeghulyayo omo buno bwayu.” (1 Sam. 17:34, 35) Dawudi mwayowa ini lhukwamirwa lhwiwe eritsomana esyombuli, kandi buthubaha mwasilhwirako. Baghalha bethu abalere bangana gherererya Dawudi omw’iberererya ndeke olhukwamirwa lhwosi-lhwosi olho bakahebawa.

5. Ngoku kiri omwa Esyonyimbo 25:14, ni kindu kyahi kikulhu ekyo baghalha bethu abalere banga kolha?

⁵ Dawudi iniakine mulere abya awithe obunywani obukamathire na Yehova. Oku Dawudi obunywani obo bwabya bukulhu kutsibu kwilhaba obuthubaha bwiwe n’amaaka wiwe aw’eriwatha enanga. Yehova abya Nyamuhanga wa Dawudi kandi Munywani wiwe​—Omunywani wiwe w’okwa ndungu. (Soma Esyonyimbo 25:14.) Baghalha bethu abalere, ekikulhu kutsibu ekyo mwangakolha ly’erikamathya obughuma bwenyu na Thatha wenyu w’elhubulha, kandi ekyo kyangana leka imwahebwa esindi nzunzo.

6. Ni malengekania wahi awathahikire agho abandi babya bawithe oku Dawudi?

⁶ Dawudi mwabya w’erighumira amalengekania awathahikire agho abandi babya bamuwitheko. Ng’eky’erileberyako, Dawudi abere akayihayo erilhwa na Goliata, Omwami Saulo mwalengaho erimughania, omw’imubwira athi: “Wukine mulhwana.” (1 Sam. 17:31-33) Ahanyumaho, mughalha wobu Dawudi mwamubwira athi syatsomene esyombuli. (1 Sam. 17:26-30) Aliwe, Yehova mwathalhangira  Dawudi nga ni mulere kutse oyuthatsomene. Abya inianasi Dawudi ya ndeke. Kandi Dawudi eriyikethera Munywani wiwe, Yehova, erimuha amaaka, Dawudi mwitha Goliata.​—1 Sam. 17:45, 48-51.

7. Omwatsi wa Dawudi akakweghesayaki?

⁷ Ebya Dawudi alhabamu bikakweghesayaki? Thukaminya ngoku thutholere ithwaghumisirizya. Kikathwalha buthuku abakwasi erilhua omo bwana eriligha ngoku wamabirikulha. Aliwe wutholere iwayikethera ngoku Yehova syali samalira emisosere y’eyihya. Anakwasi kandi anasi ebyo wanga thoka erikolha. (1 Sam. 16:7) Ghumaya obughuma bwawu na Nyamuhanga. Dawudi mwakolha ekyo omw’ighanirya ndeke okwa bihangikwa bya Yehova. Dawudi mwaghanirya kutsibu okwa ekyo ebihangikwa ebyo bikamweghesaya okwa Muhangiki wiwe. (Esy. 8:3, 4; 139:14; Abar. 1:20) Ekindi ekyo wanga kolha ly’erisaba Yehova y’akaghalha ako wukayithagha. Ng’eky’erileberyako, abandi abawukasoma nabu bakanakusekereraya busana n’eribya iwuli Mwema wa Yehova? Byamabya ikwabiri bithya, saba Yehova akuwathikaye erighumira ekitsibu eki. Kandi ghendera okw’ihabulha eriri omwa Kinywe kiwe n’omwa bitabu byethu ebiseghemere okwa Biblia n’omwa syovidiyo. Obuli lhangira Yehova akakuwathikya erighumira ekitsibu kirebe, eriyikethera lyawu omw’iyo likongera. Eryongera okw’ekyo, abandi bakendibya bakalhangira ku wuyikethere Yehova, nabu ibakendi ku yikethera.

8-9. Ni kyahi ekya wathikaya Dawudi erilinda inianaghumisirizirye erihika aho abera mwami, kandi baghalha bethu balere banga mwighirakoki?

⁸ Thulebaye ekindi kitsibu ekyo Dawudi abana. Dawudi abere abirihakabibwa ng’omwami, mwabya w’erilinda ahabw’emyaka mingyi imwatsuka erithabalha ng’omwami we Yuda. (1 Sam. 16:13; 2 Sam. 2:3, 4) Omwa buthuku obo, ni kyahi ekyamuwathikaya erilinda inianaghumisirizirye? Omwakanya k’erihwa amani, Dawudi mwahira amalengekania okwa by’angathoka eribya iniane mukolha. Ng’eky’erileberyako, Dawudi iniane e Filisitini ng’omuthibithi, mwakolesya obuthuku obo erilhwa n’esyonzighu sye Israeli. Omw’ikolha ekyo, mwatheya emithano y’ekihugho kye Yuda.​—1 Sam. 27:1-12.

⁹ Baghalha bethu abalere bang’ighiraki oku Dawudi? Kolesaya akaghisa kosi-kosi akawukabana erikolera balikyethu. Lengekanaya okwa ky’erileberyako kya mughalha wethu oyukahulhawamo Ricardo. * Eritsuka bulere, inianzire eribya mutemburi w’omughulhu wosi. Aliwe abasyakulhu mubamubwira bathi syali ahika. Omwakanya k’erihwa amani kutse erihithana, Ricardo mwongera erisangira omwa mubiiri w’erithulira. Akabugha athi: “Ngabya ingasubya ameso w’enyuma, ngalhangira ikyabya kibuya ingye erilholha embere erikulha-kulhana. Munalengaho erisuba oko wosi-wosi oyukanzisibawa n’eriyitheghekera ndeke ab’erisubako. Ekyo mukyaleka ingabana n’omwigha w’eryeghesya e Biblia. Nabere ngane musangira kutsibu omwa mubiiri w’erithulira, munongera erisika.” Lino Ricardo ni mutemburi w’omughulhu wosi kandi mughombe omuwathikya.

10. Buthuku bughuma, Dawudi mwakolhaki athali athwamu?

¹⁰ Thalengekania okwa kindi ekyabya omwa ngebe ya Dawudi. Omughulhu Dawudi n’abalhume biwe babya omw’ibisama bakasagha, mubasighania amaka wabu bakayalhwa. Ibane eyo, esyonzighu syabu musyathahirira amanyumba wabu n’eriheka ab’eka yabu ng’abanyewa. Dawudi anganalengekenie athi kundi  asi ndeke eby’amalhwa akendilhuaho iniaha amenge aw’erilhamiryamo abanyeghawa abo. Omwakanya k’ekyo, Dawudi mwasaba Yehova y’obusondoli. Omwa buwathikya bw’omuhereri Abiatari, Dawudi mwabulya Yehova athi: “Nyikwame omulhondo oyu kwehi?” Yehova mwabwira Dawudi athi aghende kandi amamughumya athi akendi singura. (1 Sam. 30:7-10) Eki kikakweghesayaki?

11. Wanga kolhaki wuthe wathwamu?

¹¹ Saba abandi b’amenge wuthe wathwamu. Hika okwa babuthi bawu. Kandi wangana bana amenge awuwene omw’ikanirania n’abasyakulhu abasi bingyi. Yehova ayikethere abalhume abasombwerwe aba, nawu wangana bayikethera. Yehova akabalhangira ‘ng’olhusunzo’ omwa kithunga. (Efe. 4:8) Iwukendi ghasirwa omw’igherererya erikirirya lyabu n’omw’ihulikirira amenge awuwene agho bakakuha. Leka thulebaye ebyo thwang’ighira oko Mwami Asa.

12. Ni mibere yahi eyo Omwami Asa abya awithe akatsuka erithabalha?

¹² Omwami Asa iniakine mulhwana, abya ayikehirye kandi ini muthubaha. Ng’eky’erileberyako, abere akasuba omo bwa thatha wiwe Abiya, Asa mwatsukisya omuhigho w’erighunzaho eriramya ly’esyosanamu. Kandi ‘mwahana Abayuda athi basonda-sondaye Omwami Mukulhu Nyamuhanga wa bathatha wabu, n’erikolha emighambo n’ebihano.’ (2 Emy. 14:1-7) Kandi omughulhu Zera Omuetiopia n’abasirikali 1,000,000 basyalhwa ne Yuda, Asa mwasaba Yehova y’obuwathikya, athi: “Omwami Mukulhu, sihali wundi nga we ow’eriwathikya, omo kathi-kathi ko w’amaaka n’oyuthawithe amaaka; iwe Mwami Mukulhu Nyamuhanga wethu wuthuwathikaye; kusangwa thukayikethera we.” Ebinywe ebi bikakanganaya ngoku Asa abya ayikethere ngoku Yehova awithe amaaka w’erimulhamya n’abandu biwe. Asa aby’ayikethere Thatha wiwe w’elhubulha, kandi ‘Yehova mw’itha Abaetiopia.’​—2 Emy. 14:8-12.

13. Ni kyahi eky’obulighe ekyahika oku Asa, kandi busana naki?

¹³ Ahathe erithika-thika, wukaligha ngoku sikyolho er’imanira amahe w’abasirikali 1,000,000, aliwe Asa mwimaniragho, amakindagho. Aliwe, eky’obulighe, Asa abere akabana ekindi kitsibu ekike, mwathayikethera Yehova. Omwami mubi Baasa owe Israeli,  abere akubahisya Asa, Asa mwayasaba omwami we Suria y’obuwathikya. Erithwamu eryo mulyalhwiririramo ebitsibu! Erilhabira omwa muminyereri wiwe Hanani, Yehova mwabwira Asa athi: “Kusangwa wabiriyikethera omwami we Suria, isiwuli thayikethera Omwami Mukulhu Nyamuhanga wawu, busana n’eki, omulhondo w’omwami we Suria amabalha erilhua omo byalha byawu.” Neryo eritsuka-tsukana naho, Asa mwathahumulha okwa malhwa. (2 Emy. 16:7, 9; 1 Bam. 15:32) Wam’ighaki?

14. Wanga yikethera wuthi Yehova, kandi ngoku kiri omu 1 Timoteo 4:12, ni kyahi ekyangabya wamakolha ekyo?

¹⁴ Ibya iwunayikehirye kandi lholha embere eriyikethera Yehova. Wabere wukabatizibwa, muwakangania erikirirya n’eriyikethera linene omu Yehova. Kandi Yehova mwatsema akakwang’irira omw’ihiika liwe. Lino, ekikulhu ly’erilholha embere eriyikethera Yehova. Kyangana lhangirika nga ni kyolho eriyikethera Yehova wamabya iwuli w’erithwamu okwa bindu bikulhu kutsibu omo ngebe, kandi ibbwa n’okwa bundi buthuku? Ni kikulhu eriyikethera Yehova wukathwamu okwa bindu nga eby’eriyitsemesya, omubiiri, n’ebilhubirirwa byawu! Isiwayikethera amenge wawu. Omwakanya k’ekyo, sondekanaya emisingyi ye Biblia eyihambire okwa mibere eya wulimu, neryo ghendera kuyo. (Emi. 3:5, 6) Wamakolha ekyo, iwukendi tsemesya Yehova kandi iwukendi leka abali omwa kithunga ibakusikya.​—Soma 1 Timoteo 4:12.

15. Ngoku kiri omwa 2 Emyatsi y’Emigulu 18:1-3; 19:2, ni bisobyo byahi ebyo Mwami Yosafati akolha?

¹⁵ Ni kwenene, nawu ng’ithwe bosi, siwuhikene kandi hakanayira iwasobya. Aliwe eki sikitholere kikakukakirya okw’ikolha ebyosi ebyo wanga thoka omwa mubiiri wa Yehova. Lengekanaya okwa ky’erileberyako ky’Omwami Yosafati. Abya awithe emibere mingyi eyuwene. Okw’inatsuka ly’erithabalha liwe, “mwasonda-sonda Nyamuhanga wa thatha wiwe, mwakwama ebihano biwe.” Eryongera okw’ekyo, mwathuma abakulhu erithimba omwa miyi yosi ye Yuda erikangirirya abandu oku Yehova. (2 Emy. 17:4, 7) Aliwe nomwakine indi Yosafati abya mw’okwenene, muhanayira amathwamu nabi. Busana n’erithwamu libi eryo, omughuma w’okwa bimaniri ba Yehova mwamukunga. (Soma 2 Emyatsi y’Emigulu 18:1-3; 19:2.) Omwatsi oyu akakweghesayaki?

16. Ekyalholirweko kya Rajeev kikakweghesayaki?

 ¹⁶ Ligha erihabulhwa kandi lighendereko. Obundi, ng’abandi balhwana bangyi, nawu kikanakukalira erihira omubiiri wa Yehova w’embere omwa ngebe yawu. Isiwahwa amani. Lengekanaya okwa ky’erileberyako kya mughalha wethu omulere oyukahulhawamo Rajeev. Akabya akakania okwa myaka yiwe y’obulengwa, akabugha athi: “Ihakanayira ingabya isingasi ekyo nanga kolha omo ngebe yaghe. Ng’eyindi minyethu mingyi, inganzire eby’amasatha n’eby’eriyitsemesya kwilhaba erighenda okwa mihindano kutse erighenda omw’ithulira.” Ni kyahi ekya wathikaya Rajeev? Omusyakulhu oyutsomene mwamuhabulha. Rajeev akabugha athi: “Mwanyiwathikya erighanirya okwa musingyi owali omu 1 Timoteo 4:8.” Rajeev mwayikehya amaligha erihabulhwa kandi amathasyalebya ndeke ebyo atholere iniahira embere omo ngebe yiwe. Akabugha athi: “Munathwamu erihira ebilhubirirwa by’obunyakirimu by’embere.” Mumwalhwiririraki? Rajeev akabugha athi: “Myaka mike nali thungire erihabulhwa eryo, munatholera erikolha ng’omughombe omuwathikya.”

17. Abakulire bakalhangira bathi abalhwana abakakolera Yehova?

¹⁷ Abakulire bakasima kutsibu inywe balhwana inywe mukakolha “haghuma” nabu omw’ikolera Yehova! (Zef. 3:9) Bakatsemera omuhwa wenyu n’akaghalha kenyu, n’emibere mukakoleramu emibiiri eyo mukahebawa. Muli b’obughuli embere syabu.​—1 Yn. 2:14.

18. Ngoku kiri omwa Emisyo 27:11, Yehova akayowa athi busana n’abalhwana abakamukolera?

¹⁸ Baghalha bethu abalere, isimwibirirawa ngoku Yehova abanzire kandi ngoku abayikethere. Mwabugha athi omwa biro by’enyuma-nyuma, hasyabya amahe w’abalhwana abakayihayo ahathe erikakwa. (Esy. 110:1-3) Anasi ngoku mumwanzire kandi ku mwanzire erimukolera ngoku mwanga thoka. Neryo mughumisirizaye abandi, nenyu muyighumisirizaye. Wamasobya, ambi iwaligha erihabulhwa n’erikungwa eryo wukahebawa, kandi lilhangire ng’erikalhua oku Yehova. (Ebr. 12:6) Kolha n’omuhwa omubiiri wosi-wosi ogho wangahebwa. Kandi ekikulhu kutsibu, omwa byosi wukakolha, leka Thatha wawu w’elhubulha akuyisyethere.​—Soma Emisyo 27:11.