1. Ni bitsibu nga byahi ebya bandu ba Yehova banga bana?

MBWINO wunemulhaba omo kitsibu ekikalire? Obundi omundu mulebe omwa kithunga abirikuhithania. (Yak. 3:2) Kutse obundi abawukakolha nabu kutse abawukasoma nabu bakakusekereraya busana n’erikolera Yehova. (1 Pet. 4:3, 4) Kutse obundi abahughu bawu banemwanza erikulemesya emihindano kutse erikanirya abandi okw’ikirirya lyawu. (Mt. 10:35, 36) Ekitsibu kyawu kyamabya ikikalire kutsibu, iwanganayowa ng’oyukanza eribikyako. Aliwe iwangana yikethera ngoku nomuwangabana ekitsibu ekiri kithi, Yehova iniakendi kuha amenge aw’erithoka erithwamu ndeke n’akaghalha k’erighumirakyo.

2. Ngoku kiri omwa Abanya Roma 15:4, erisoma Ekinywe kya Nyamuhanga lyanga thuhambako lithi?

² Omo Kinywe kiwe, Yehova mwahiramo eby’erileberyako eby’abandu abathahikene ebikakanganaya ngoku baghumira ebitsibu ebikalire. Busana naki? Nuku thwanga bighirako. Ebyo bya Yehova asondolha omukwenda Paulo erihandika. (Soma Abanya Roma 15:4.) Thukabya thukasoma emyatsi eyi thukahumulikana kandi ithwabya n’amaha. Aliwe erithoka erighasirwa muyo, sithutholere thukasubulira okw’isoma e Biblia lisa. Thutholere ithwalighira Amasako erihindulha amalengekania wethu n’erihika okwa mithima yethu. Thwanga kolhaki thwamabya ithukayithagha obusondoli obwanga thuwathikya erighumira ekitsibu kirebe? Thwangana kolesya enzira ey’ebiika bbini eno: (1) Saba, (2) Thera akasasani, (3) Ghaniraya, na (4) Bighendereko. Thukendi kania ngoku thwanga kolesya ebiika ebi kighuma okwa kighuma. * N’enyuma waho ithwakolesya enzira ey’eriyegheseryamu eyi erighira okwa byabya omwa ngebe y’Omwami Dawudi n’ey’omukwenda Paulo.

3. Wuthe watsuka erisoma e Biblia, wutholere iwakolhaki, kandi busana naki?

 ³ (1) Saba. Wuthe watsuka erisoma e Biblia, saba Yehova akuwathikaye erilhangira ngoku wanga ghasirwa omwa bya wukasoma. Ng’eky’erileberyako, wamabya iwukasondekanaya amenge aw’erighumira ekitsibu kirebe, saba Yehova akuwathikaye wubane emisingyi omwa Biblia eyanga kusondolha.​—Fil. 4:6, 7; Yak. 1:5.

4. Ni kyahi ekyanga kuwathikya eribya ngawunalhangire ebiri omo mwatsi we Biblia nga binemubya?

⁴ (2) Thera akasasani. Yehova abirithuha amaaka awakaswekaya aw’erithera akasasani. Erithoka eribya nga wunalhangire ebiri omo mwatsi we Biblia nga binemubya, thera akasasani k’ebyabya kandi yihire omwa bisandu by’oyukanibweko. Lengesaya erilhangira ebindu ebyo mundu oyo alhangira n’eriyowa ngoku omundu oyo angabya imwayowa.

5. Erighanirya niki, kandi wanga ghanirya wuthi?

⁵ (3) Ghaniraya. Erighanirya likamanyisaya erilengekania ndeke okwa bya wukasoma kandi ngoku omwatsi oyo akakuhambako. Likakuwathikaya erihambania ndeke emyatsi n’eriyitheghererya buuli omwatsi owawukasoma. Erisoma e Biblia butsir’ighanirya liri ng’erisamalira buyira obutahu-butahu bw’ekisasani kirebe omwa musathu w’eribwamathania nuku ekisasani ekyo kyanga lhangirika. Erighanirya liri ng’eriamathania obutahu-butahu obo haghuma nuku wulhangire ekisasani ekyosi. Erithoka erighanirya, wutholere iwayibulya n’erisubirya okwa bibulyo nga bino: ‘Oyukanibweko omwa mwatsi oyu mwakolhaki erighunzaho ekitsibu kiwe? Yehova mwamuwathikya athi? Nanga kolesya indi ebyo nam’igha erinyiwathikya erighumira ebitsibu?’

6. Busana naki thutholere ithwaghendera okwa bya thuk’igha?

⁶ (4) Bighendereko. Yesu mwabugha athi thwamathendi ghendera okwa bya thuk’igha, ithuli ng’omundu oyukahimba enyumba yiwe okwa museghe. Akakolha kutsibu akahimbayo, aliwe iniabya iniakalhuhira busa. Busana naki? Kundi ekiyagha ikikendibya kikahitha n’olhusi eriboghera kuyo, iyikendilhuaho iyathera. (Mt. 7:24-27) Kuthya, thwamasaba, thukathera akasasani, n’erighanirya, aliwe thukathendi ghendera okwa bya thuk’igha, ithukendibya ithukalhuhira busa. Neryo erikirirya lyethu lyamalengwako omw’ibana ebitsibu kutse eriendereribwa, isi ryendighuma. Aliwe, thwam’igha, n’eribighenderako, ithukendi thwamu ndeke, obuholho bwethu ibwongera, n’erikirirya lyethu iryongera erighuma. (Isa. 48:17, 18) Omw’ikolesya ebiika bbini ebya thwamabirikaniako, thulebaye ebyo thwang’igha okwa byabya omo ngebe y’Omwami Dawudi.

7. Ni mwatsi wahi we Biblia owathukayakanayako?

⁷ Omunywani kutse omuhughu wawu ane athakughoberya? Byamabya ikwabiri bithya, iwukendi ghasirwa omw’ilebya omwatsi wa Abusaloma mughalha w’Omwami Dawudi, oyuwaghoberaya thatha wiwe n’erianza erimulyako obwami.​—2 Sam. 15:5-14, 31; 18:6-14.

8. Ni kyahi ekyo wanga kolha eribana obuwathikya bwa Yehova?

⁸ (1) Saba. Wun’ibukire omwatsi, bwira Yehova nga wukayowa wuthi busana n’erikolhwa nabi. (Esy. 6:6-9) Mubwire ekyonyine-nyine. Neryo saba Yehova akuwathikaye eriminya emisingyi eyanga kuwathikya erighumira ekitsibu ekikalire eki.

9. Omwa bikuhi, wanga bugha wuthiki oko byabya oku Dawudi na Abusaloma?

⁹ (2) Thera akasasani. Lengekanaya oko byabya omo mwatsi oyu, kandi thera akasasani nga mubyahamba bithi oko Mwami Dawudi. Abusaloma mughalha wa Dawudi mwaghunza emyaka inianemulombererya abandu erimwanza. (2 Sam. 15:7) Abusaloma abere akayowa athi obuthuku obutholere bwamahika,  mwathuma abalingyi omwa Israeli yosi eriyathegheka abandu nuku bamulighe ng’omuthabali wabu. Nibya mwathebererya omughuma w’okwa banywani kandi abahani ba Dawudi, ya Ahitofeli, erimuyiyungako. Abusaloma mwaranga ngoku abiribya mwami, kandi mwanza eriyahamba n’er’itha Dawudi, oyuwangabya iniabya alhwere kutsibu okwa buthuku obo. (Esy. 41:1-9) Dawudi mwaminya embitha eyo neryo mwatswa e Yerusalemu. Erighunzerera, amahe wa Abusaloma mwalhwa n’amahe w’abakasighika Dawudi. Amahe wa Abusaloma mwakindwa, na Abusaloma mughalha wa Dawudi am’ithibwa.

10. Ni byahi ebya Mwami Dawudi anganakolire?

¹⁰ N’ekindi, thera akasasani Dawudi nga mwayowa athi ebyosi ebi bikamubyako. Abya anzire Abusaloma kandi iniayikethere Ahitofeli. Aliwe banywani biwe abosi aba mubamughoberya. Mubamuponesya kutsibu kandi nibya bamanza n’erimwitha. Dawudi angana ghanire erithasyayikethera abandi banywani biwe, erilengekania athi nabu babiriyiyunga oku Abusaloma. Angana yitsomene iyuwene, inianza eriyilhuira omwa kihugho ekyo. Kutse anganahwere amani iniabikyako. Aliwe ebi, Dawudi mwathakolhako n’ekighuma. Omwakanya k’ekyo, mwaghumira ekitsibu ekikalire ekyo. Mwathoka athi erikolha ekyo?

11. Dawudi mwakolhaki omwa bitsibu ebikalire?

¹¹ (3) Ghaniraya. Ni misingyi yahi eyo wangabana omo mwatsi oyo? Subiraya ekibulyo kino, “Dawudi erithoka eriyiwathikya, mwakolhaki?” Dawudi mwathakwa obuba kandi mwathathwamu lhuba-lhuba. Kandi mwathalindirirya eriyira ky’erikolha kutse erihwa amani busana n’obuba. Omwakanya k’ekyo, mwasaba Yehova y’obuwathikya. Eryongera okw’ekyo, amasaba n’abanywani biwe b’obuwathikya. Kandi mwalhuaho iniaghendera okwa by’athwamu. Nomwakine indi mwakolhwa nabi, Dawudi mwathaleka eriyikethera abandi kandi mwathahithana. Mwalholha embere eriyikethera Yehova n’abanywani biwe.

12. Yehova mwakolhaki eriwathikya Dawudi?

¹² Yehova mwawathikya athi Dawudi? Omw’isekulya, iwukendi minya ngoku Yehova mwaha Dawudi y’amaaka agho aby’akayithagha erighumira ekitsibu eki. (Esy. 3:1-8; ehinywe ehiri ahighulhu okwa sura) Yehova mwatsumulha erithwamu lya Dawudi. Kandi mwawathikya abanywani ba Dawudi abathaleghulha bakalhwa eritheya omwami wabu.

13. Wanga gherererya wuthi Dawudi omundu amakukolha nabi kutsibu? (Matayo 18:15-17)

¹³ (4) Bighendereko. Yibulhaye, ‘Nanga gherererya indi Dawudi?’ Wutholere iwakolha omwa byalhuba erighunzaho ekitsibu. Iwangana ghendera okw’ihabulha lya Yesu eriri omu Matayo sura 18 ngoku line kutse iwakolesya omusingyi owalimu erikwamana n’emibere eyiriho. (Soma Matayo 18:15-17.) Aliwe si wutholere wukathwamu lhuba-lhuba erikwamana n’eriyowa lyawu. Saba Yehova akuhe erithekana n’amenge agho wukayithagha eribana eky’erikolha. Isiwaleka eriyikethera banywani bawu. Ibya iwunayitheghekire eriligha obuwathikya obw’abakakuha. (Emi. 17:17) Ekikulhu kutsibu, ghendera okw’ihabulha eryo Yehova akakuha omwa Kinywe kiwe.​—Emi. 3:5, 6.

14. Ni mibere yahi eyangaleka iwalengekania okwa biri omu 2 Timoteo 1:12-16; 4:6-11, 17-22?

¹⁴ Mbwino abahughu bawu banemukuhakanisya? Kutse wuli omwa kihugho eyo omubiiri w’abandu ba Yehova aliko olhukako kutse aghanibirwe? Kyamabya ikwakiri kithya, iwangana bana erihumulikana omw’isoma ebiri omu 2 Timoteo 1:12-16 na 4:6-11, 17-22. * Paulo ahandika Amasako aya iniane omwa ngomo.

15. Ni kyahi ekyo wanga saba Yehova?

 ¹⁵ (1) Saba. Wuthe wasoma emyatsi eyo, bwira Yehova ekitsibu kyawu kandi nga kikaleka iwayowa wuthi. Mubwire ekyonyine-nyine. Neryo saba Yehova akuwathikaye wuminye emisingyi eyiri omo myatsi eyihambire okwa bitsibu bya Paulo eyanga kuwathikya eriminya ekyo wanga kolha omughulhu wuwithe ekitsibu.

16. Omwa bikuhi, wanga bugha wuthiki okwa byabya oku Paulo?

¹⁶ (2) Thera akasasani. Thera akasasani iwune omwa mibere eyo Paulo abyamu. Ane omwa ngomo mwe Roma iniane kw’amahulhulha. Oyu si murundi wiwe w’erimbere eribya omwa ngomo, aliwe okwa ndambi eno anasi kw’akayithibawa. Abaghuma b’okwa banywani biwe babirimusighania, kandi abirihwa amani kinyamubiri.​—2 Tim. 1:15.

17. Paulo angana kolireki?

¹⁷ Paulo angana hirire amalengekania okwa bya kera, inialengekania athi kwathabya Mukristayo w’omuhwa, syanga hirirwe omwa ngomo. Angana hithene okwa bandu bosi abali omwa disitrikiti ye Asia abamusighanaya, kandi inialeka erithasyayikethera abandi banywani biwe. Aliwe ebi, mwathakolhako n’ekighuma. Ni kyahi ekyamuthokesaya eribya inianasikire kandi inianawithe amaha?

18. Paulo mwakolhaki akabana ekitsibu?

¹⁸ (3) Ghaniraya. Subiraya ekibulyo kino, “Paulo erithoka eriyiwathikya, mwakolhaki?” Nibya inianasi kw’akayithibawa, Paulo mwathibirirwa ekindu kikulhu​—eriha Yehova y’olhukengerwa. Kandi mwalholha embere erilengekania ngoku angaghumya abandi. Mwayikethera Yehova omw’isaba mughulhu wosi. (2 Tim. 1:3) Omwakanya k’erilengekania kutsibu okwa bamusighanaya, mwasima banywani biwe abamusighika n’erimuwathikya buthaleghulha. Eryongera okw’ekyo, Paulo mwalholha embere erigha Ekinywe kya Nyamuhanga. (2 Tim. 3:16, 17; 4:13) Ekikulhu kutsibu, abya inianasi ndeke-ndeke ngoku Yehova na Yesu bamwanzire. Ibo mubathamusighania, kandi babya ibakendi syamuhemba busana n’eribakolera buthaleghulha.

19. Yehova mwawathikya athi Paulo?

¹⁹ Yehova abya iniabiribwira Paulo athi ang’endereribwe busana n’eribya Mukristayo. (Emib. 21:11-13) Yehova mwawathikya athi Paulo? Mwasubirya emisabe ya Paulo, kandi habere habirilhaba buthuku mwamuha amaaka. (2 Tim. 4:17) Paulo abya iniabirikakasibwa ngoku akendi syahebwa ekihembo ekyo abya iniabirikolera kutsibu. Kandi Yehova mwahira omwa banywani ba Paulo abathaleghulha mw’omuhwa w’erimuwathikya.

20. Wun’ibukire ebiri omwa Abanya Roma 8:38, 39, wanga gherererya wuthi Paulo?

²⁰ (4) Bighendereko. Yibulhaye, ‘Nanga gherererya indi Paulo?’ Nga Paulo, thutholere ithwabya ithunasi ngoku thukendi endereribwa busana n’erikirirya lyethu. (Mk. 10:29, 30) Erithoka erisighalha bathaleghulha oku Yehova omwa bitsibu, thutholere ithwamuyikethera omw’isaba n’erilholha embere n’endegheka yethu eyuwene ey’eriyeghesya. Kandi mughulhu wosi thutholere ithwabya ithun’ibukire ngoku ekighuma ky’okwa bindu bikulhu ebyo thwanga kolha ly’eriha Yehova y’olhukengerwa. Thutholere ithwayikethera ngoku Yehova syendi syathusighania kandi ngoku sihali ekyo omundu wosi-wosi angakolha ekyangathwa olhwanzo olhwathuwithire.​—Soma Abanya Roma 8:38, 39; Ebr. 13:5, 6.

21. Ni kyahi ekya wathikaya Aya na Hector erisingura ebitsibu byabu?

²¹ Mbulha thuli omwa mibereki, thwanganabana akaghalha omwa by’erileberyako ebiri omwa Biblia. Ng’eky’erileberyako, Aya, omutemburi  e Japan, akabugha athi omwatsi wa Yona mwamuwathikya erisingura obuba obw’awithe obw’erithulira ahakabya abandu bangyi. Hector, omunyethu e Indonesia oyo ababuthi biwe si Bema ba Yehova akabugha athi eky’erileberyako kya Ruta kyabirimuhira mw’omuhwa w’erigha oku Yehova n’erimukolera.

22. Emisathu ye Biblia kutse emyatsi eyikabera eryasa eya “Gherereraya Erikirirya Lyabu” yanga kughasira yithi ndeke?

²² Ni hayi aho wangabana eby’erileberyako bye Biblia ebyanga kughumya? Esyovidiyo syethu n’emisathu y’erihulikirira n’emyatsi eyikabera eryasa eya “Gherereraya Erikirirya Lyabu” yikaleka ithwabya nga thunalhangire emyatsi ye Biblia yikabya. * Wuthe walebya, erihulikirira, kutse erisoma emyatsi eyisekwirye ndeke eyi, saba Yehova akuwathikaye wubane mw’esyonzumwa esya wanga ghenderako. Thera akasasani iwune omwa mibere y’oyukanibweko. Ghaniraya okwa ebya abaghombe ba Yehova abathaleghulha aba bakolha kandi ngoku abawathikaya erirwanisya ebitsibu ebikalire. Neryo ghendera okwa bya wamigha. Sima Yehova busana n’obuwathikya obw’anemukuha. Kandi kanganaya ku wukasima obuwathikya obo omw’isondekania esyonzira sy’erihimbiramo abandi n’eribawathikya.

23. Ngoku kiri omu Isaya 41:10, 13, ni kyahi ekyo Yehova akathulhaghanisaya?

²³ Engebe ey’omwa kihugho kino ekithaberweko na Sitani yangana kalha, ihayira ithwabya isithwasi n’eky’erikolha. (2 Tim. 3:1) Aliwe sithutholere thukahangya-hangya kutse eryubaha. Yehova anasi ebyo thukalhabamo. Thwamayithagha obuwathikya, Yehova akalhagha erithuhamba omo byalha biwe by’amali eby’amaaka. (Soma Isaya 41:10, 13.) Busana n’eriyikethera obuwathikya bwiwe, e Biblia yangana thuwathikya erighumira ekitsibu kyosi-kyosi.