1. Ni kyahi ekyaleka Yesu iniasaba Yehova athi atheghaye abigha biwe?

OMW’ITHUMBI liwe ly’erighunzerera okwa kihugho, Yesu abya inianemulengekania okwa bitsibu ebya bigha biwe bangabwene. Busana n’olhwanzo olho aby’awithire abigha biwe, Yesu mwasaba Thatha wiwe athi ‘atheghayebo oko mubi.’ (Yn. 17:14, 15) Yesu abya inianasi ngoku akendibya abirisuba elhubulha, Sitani Diabolo akendi lholha embere erilhwa n’owosi-wosi oyukanza erikolera Yehova. Neryo kwesi, abandu ba Yehova bangayithaghire obutheya.

2. Thwangaminya thuthi ngoku Yehova akendisubirya emisabe yethu?

² Yehova mwasubirya omusabe wa Yesu busana n’olhwanzo olho abya awithire Mughalha wiwe. Thwamalengaho eritsemesya Yehova, nethu iniakendithwanza kandi iniasubirya emisabe yethu y’erisaba obuwathikya n’obutheya. Iyo ng’Omuthwe w’erihiika oyutsomene, omo lhwanzo Yehova akendi lholha embere eritsomana abaana biwe. Bithe bithya, erina liwe irikendi hambwako kutsibu!

3. Busana naki munabwire thukayithagha obutheya bwa Yehova?

³ Thukayithagha obutheya bwa Yehova kwilhaba kera. Sitani abirighuswa erilhua elhubulha ‘inianahithene kutsibu.’ (Erib. 12:12) Abirileka abakathwendereraya ibalengekania bathi bakabya bakathwendererya bakabya ibamakolha “omubiiri wa Nyamuhanga.” (Yn. 16:2) Abandi, abath’ikirirye omu Nyamuhanga, bakathwendereraya kundi thuli mbaghane okwa bandu b’omwa kihugho. Nomubanga kolha ebi, thutholere ithwasika. Busana naki? Kundi Ekinywe kya Nyamuhanga kikabugha kithi: “Omukama syali leghulha, kandi asyabasikya n’eribatheya oko mubi oyo.” (2 Tes. 3:3) Yehova akathutheghaya athi? Thukanaye okwa syonzira ibiri.

4. Ngoku kiri omwa Abanya Efeso 6:13-17, ni kyahi ekyo Yehova abirithuha erithutheya?

⁴ Yehova abirithuha ekyambalho ky’amalhwa ekyangathutheya okwa bithegho bya Sitani. (Soma Abanya Efeso 6:13-17.) Ekyambalho ky’amalhwa eky’obunyakirimu eki kighumire kandi kikakolha ndeke! Aliwe ikikendi thutheya ithunalyambalha obuli kighuma ky’okwa kyambalho ekyo​—ahathe erilhusyakyo. Obuli kindu ky’okwa kyambalho ekyo kik’imaniraki? Leka thulebaye.

5. Omwatsi w’ekwenene ng’omukoba niki, kandi busana naki thutholere ithwambalhagho?

⁵ Omwatsi w’ekwenene ng’omukoba ak’imanira ekwenene eyiri omwa Kinywe kya Nyamuhanga, e Biblia. Busana naki thutholere ithwambalha omukoba kutse omukabba oyu? Kundi Sitani “ni ise w’amabehi.” (Yn. 8:44) Amabirighunza esyongumi n’esyongumi sy’emyaka inianemubugha amabehi n’erithebya “ekihugho kyosi”! (Erib. 12:9) Aliwe ekwenene eyiri omwa Biblia yikathutheghaya okw’ithebibwa. Thukambalha thuthi omukabba oyu? Thukakolha eki omw’igha ekwenene eyihambire oku Yehova, omw’imuramya omo “kirimu n’omo kwenene,” n’omw’ibya b’okwenene omo myatsi yosi.​—Yn. 4:24; Efe. 4:25; Ebr. 13:18.

6. Erithunganene ng’ekindu ky’amalhwa ekikatheghaya ekikuba niki, kandi busana naki thutholere ithwakyambalha?

⁶ Erithunganene ng’ekindu ky’amalhwa ekikatheghaya ekikuba kik’imanira ebihano bya Yehova ebithunganene. Busana naki thutholere ithwakyambalha? Ngoku ekindu ky’amalhwa ekikatheghaya ekikuba kikanatheghaya omuthima wonyine-nyine w’omusirikali okw’ihuthalibwa, ekindu ky’erithunganene eki kikatheghaya omuthima wethu kutse omundu w’omwakathi okw’itsandibwa omwa myatsi mibi y’ekihugho kino. (Emi. 4:23) Yehova anzire ithwamwanza n’erimukolera n’omuthima wethu wosi. (Mt. 22:36, 37) Neryo Sitani anzire erighabania omuthima wethu nuku thwanze ebindu by’ekihugho kino​—ebindu ebyo Yehova aponire. (Yak. 4:4; 1 Yn. 2:15, 16) Kandi ekyo kyamathendikolha iniakendi lengesya erithubahisya erianza thuthwe ebihano bya Yehova.

7. Thukambalha thuthi erithunganene ng’ekindu ky’amalhwa ekikatheghaya ekikuba?

⁷ Thukambalha ekindu ky’amalhwa ky’erithunganene omw’iligha ebihano bya Yehova ebihambire okwa kihikire n’ekithahikire kandi n’erighendera okwa bihano ebyo. (Esy. 97:10) Abandi banganayowa ebihano bya Yehova nga bikabahira kw’olhukako. Aliwe thwamaleka erighendera okwa misingyi ye Biblia, ithukendibya ng’omusirikali oyukalhusaya ekindu ekikatheghaya ekikuba kandi ibane omwa malhwa habw’erilengekania athi kirithohire. Obo ibukendibya ini bukiru! Okwa banzire Yehova, ebihano biwe “sibikalire,” aliwe bikalhamaya esyongebe.​—1 Yn. 5:3.

8. Kikamanyisayaki eribya n’ebiryathu by’erithulha engulhu yuwene?

⁸ Kandi Paulo akathubwira athi ithwabya n’ebiryathu by’erithulha engulhu yuwene y’obuholho. Ni bugha ambu, mughulhu wosi ithwabya ithunayitheghekire erithulha engulhu yuwene y’Obwami. Thukabya thukabwira abandi okwa mwatsi we Biblia, erikirirya lyethu likaghuma. Omo kwenene, kikahimba thukaIhangira abandu ba Yehova erithimba omwa kihugho kyosi bakakolesya esyonzira syosi-syosi erithulhughania engulhu yuwene​—omughulhu bali okwa mubiiri, okwa sukuru, omwa myanya y’esuburu n’erithulira nyumba okwa nyumba, ibane omwa kathali, bakabungira abahughu abathe Bema ba Yehova, bakakanirania n’abanywani, nibya n’omughulhu kibakalire erilhua eka. Thwamakwa obuba thukaleka erithulira,  ithukendibya ng’omusirikali oyukalhusaya ebiryathu biwe iniane omwa malhwa; ebisandu biwe ibikendilhuaho ibyahuthalha. Busana n’ekyo, iniakendilemwa eriyilhwirako kandi inialemwa erighendera okwa bilhaghiro bya kamanda wiwe.

9. Busana naki thutholere ithwaheka engabo y’erikirirya?

⁹ Engabo y’erikirirya yik’imanira erikirirya eryathuwithe omu Yehova. Thuyikethere ngoku akendiberererya emilhaghe yiwe yosi. Erikirirya eryo likathuwathikaya “eririmya emisoha yosi y’omuliro y’omubi.” Busana naki thutholere ithwaheka engabo eyi? Kundi yikathutheghaya okw’ithebibwa omwa syongangirirya sy’abakayisamambulha okw’ikirirya kutse okw’isagha abakathusiningulira. Thwamathendibya n’erikirirya, isithwendibya n’amaaka w’erighana akahathikano abandi bakanza thuthwe ebihano bya Yehova. Aliwe, obuli erilhwira okw’ikirirya lyethu okwa mubiiri kutse okwa sukuru, thukabya ithwamabya ithunahekire engabo yethu. (1 Pet. 3:15) Obuli erighana omubiiri owaliko esyosente nene ow’ang’ingirira endegheka yethu y’eriramya, thukabya ithwamabya ithunahekire engabo yethu. (Ebr. 13:5, 6) Kandi obul’ikolera Yehova nomuhangabya erihakanisibwa, engabo yethu yikabya iyine muthutheya.​—1 Tes. 2:2.

10. Esapeho y’omulhamu niki, kandi busana naki thutholere ithwambalhayo?

 ¹⁰ Akakira k’omulhamu w’amaha agho Yehova akathuha​—amaha ngoku akendisya thulhamya okwa lhuholho n’erihemba abosi abakakolha erisonda liwe. (1 Tes. 5:8; 1 Tim. 4:10; Tito 1:1, 2) Ngoku akakira kutse esapeho y’ekyuma yikanatheghaya omuthwe w’omusirikali, amaha w’omulhamu akatheghaya amaaka wethu w’erilengekania. Omwa nziraki? Amaha ayo akaleka ithwahwerya amalengekania okwa milhaghe ya Nyamuhanga kandi akathuwathikaya eribya n’amalengekania awatholere thukabana ebitsibu. Thukambalha thuthi esapeho eyi? Thukambalhayo omw’ihambania amalengekania wethu n’awa Nyamuhanga. Ng’eky’erileberyako, thukahira amaha wethu oku Nyamuhanga butsira okwa by’obughuda.​—Esy. 26:2; 104:34; 1 Tim. 6:17.

11. Omuyali w’omulimu niki, kandi busana naki thutholere ithwakolesyagho?

¹¹ Omuyali w’omulimu ky’Ekinywe kya Nyamuhanga, e Biblia. Omuyali oyo awithe amaaka w’erithwa amabehi w’emiringo yosi n’erilhusya abandu omwa bukobe bw’esyongangirirya sy’amabehi n’emitse mibi. (2 Kor. 10:4, 5; 2 Tim. 3:16, 17; Ebr. 4:12) Thuk’igha erikolesya ndeke omuyali oyu omw’iyeghesya n’omw’ithendekwa eryo thukabana omwa kithunga kya Nyamuhanga. (2 Tim. 2:15) Eryongera okwa kyambalho ky’amalhwa, Yehova akathuha ekindi kindu ky’amaaka ekikathutheghaya. Ni kyahi?

12. Ni kindi kyahi ekyo thukayithagha, kandi busana naki?

¹² Omusirikali oyuwasi ndeke eby’amalhwa akaminya ngoku syangathoka erilhwa n’amahe manene iyuwene; akaminya ngoku akayithagha obuwathikya bw’abandi basirikali balikyabu. Kuthya, sithwangathoka erilhwa na Sitani n’abandu biwe ithwibene; thukayithagha obuwathikya bw’abalikyethu. Yehova abirithuha ‘abalikyethu Abakristayo’ abali omwa kihugho kyosi abaliho erithuwathikya.​—1 Pet. 2:17.

13. Ngoku kiri omwa Abaebrania 10:24, 25, emihindano yethu yikathughasira yithi?

¹³ Enzira nguma eyo thukabaniramo obuwathikya ly’erihindana okwa mihindano. (Soma Abaebrania 10:24, 25.) Thwamahwa amani​—ngoku kikanathubyako ithwe bosi​—emihindano yikathusubaya mw’amani. Ebya baghalha bethu n’abali bethu bakasubiraya erilhua okwa muthima bikathuhimba. Emikania eyiseghemere okwa Biblia n’ebitsweka ebya bakalhabaya bikaghumaya erithwamu lyethu ery’erikolera Yehova. Kandi erikanirania lyethu eryuwene emihindano yithe yatsuka kandi yikahwamo likathuhimba. (1 Tes. 5:14) Eryongera okw’ekyo, emihindano yethu yikathuha akaghisa k’eribana obutseme obukasa busana n’eriwathikya abandi. (Emib. 20:35; Abar. 1:11, 12) Emihindano yethu yikathuwathikaya n’omwa sindi nzira. Emihindano yethu yikathuwathikaya eribya bathuliri kandi bakangirirya babuya. Ng’eky’erileberyako, thuk’igha erikolesya ndeke ebiri omwa Ebya Thukakolesaya Thukakangirirya. Neryo yitheghekere ndeke emihindano. Omwa mihindano, hulikirira ndeke. Ghendera okwa bya wuk’igha omwa mihindano. Omw’ikolha ebindu ng’ebi iwukendibya “musirikali mubuya wa Kristo Yesu.”​—2 Tim. 2:3.

14. Ni bundi buwathikya bwahi obwa thuwithe?

¹⁴ Kandi thuwithe obuwathikya bw’esyomiliyoni n’esyomiliyoni sy’abamalaika ab’amaaka. Thalengekania okwa ekyo mumalaika mughuma musa angakolha! (Isa. 37:36) Neryo ibbwanu lengekanaya okwa ky’amahe w’abamalaika ab’amaaka bangakolha. Sihali mundu kutse embinga eyanga singa mahe wa Yehova aw’amaaka. Kikabughawa indi Omwema mughuma  erimwongerako Yehova ni mahe mangyi. (Abat. 6:16) Ekyo ni kwenene! Ambi iwabya iwun’ibukire ebyo, oyowukakolha nayu, omunya sukuru, kutse omuhughu amabugha kutse erikolha ekindu ekyanga kughunza amani. Wibuke ngoku siwuli iwuwene omwa malhwa aya. Obusondoli bwa Yehova bwa wukaghenderako.

15. Ngoku kiri omu Isaya 54:15, 17, busana naki omubiiri w’abandu ba Nyamuhanga syendisy’imanibwa?

¹⁵ Hali nzumwa nyingyi esikaleka ekihugho ekiri omwa buthabali bwa Sitani ikyathupona. Sithulibya na lhuhandi omwa by’epolitiki kandi sithuliyingiraya omwa syonyuhi. Thukathulhughanaya erina lya Nyamuhanga, ithwakangania ngoku Obwami bwiwe busa bwa bukendisyaletha obuholho, kandi thukasighika ebihano biwe ebithunganene. Thukabisulha ngoku omuthabali w’ekihugho kino ni mubehi tsutsutsu kandi ni mwithi. (Yn. 8:44) Kandi thukathulhughanaya ngoku ekihugho kya Sitani kikisiya ikyathoghothibwa. Aliwe, Sitani n’abakamukwama sibendisy’imania omubiiri wethu w’erithulira. Ithwe thukendi lholha embere eripipa Yehova, omw’ikolesya enzira yosi-yosi ngoku thwanga thoka! Nomwakine indi Sitani anawithe obuthoki, syali athathoka erikakirya omwatsi wethu w’Obwami erihika okwa bandu omwa kihugho kyosi. Eki kikathokekana busana n’obutheya bwa Yehova.​—Soma Isaya 54:15, 17.

16. Yehova akendisyalhamya athi abandu biwe okwa bulighe bunene?

¹⁶ Ni kyahi ekya thulindirire? Omwa bulighe bunene, Yehova akendi syathulhamya omwa nzira ibiri esikaswekaya. Ey’erimbere, akendisyalhamya abaghombe biwe abathaleghulha omughulhu akendisyahamulha abami b’ekihugho erithoghothya Babeli Mukulhu, amadini wosi w’amabehi. (Erib. 17:16-18; 18:2, 4) Eyakabiri, akendisyalhamya abandu biwe akaghunziraho ighuma ekihugho kya Sitani okwa Harmagedoni.​—Erib. 7:9, 10; 16:14, 16.

17. Thukaghasirawa thuthi thwamasighalha bathaleghulha oku Yehova?

¹⁷ Thwamasighalha bathaleghulha oku Yehova, sihali ekya Sitani angakolha ekyanga thulemesya erisyabana engebe y’erikotha. Aliwe ibbwa, iyo yukendi syathoghothibwa kera na kera. (Abar. 16:20) Neryo wambale ebyambalhu by’amalhwa ebyosi​—kandi isiwabilhusaya! Isiwalhwa amalhwa iwuwene. Sighika balikyethu. Kandi ghendera okwa busondoli bwa Yehova. Wamakolha ekyo, iwukendi yikethera ngoku Thatha wethu w’olhwanzo ow’elhubulha akendi kughumya n’erikutheya.​—Isa. 41:10.