1-2. Mughulhu mungyi ni byahi ebikabya abandu bakabatizibwa, kandi thukendi kania okuki?

 WUNE wathalhangira egurupu ey’abakayabatizibawa? Wukowa erikakasya lyabu omwa mirenge yabu bakasubirya ebibulyo bibiri bathe babatizibwa. Iwalhangira abahughu babu n’abanywani babu ibanatsemire. Abakabatizibawa bakabya bakalhua omwa maghetse, wukowa abandu bakabbanda-bbanda omwa byalha neryo iwalhangira etseme okwa musu w’abamabatizibwa. Hakuhi obuli wiki, esyongumi sy’abandu bakathwa ekiika ekyo, ibayihayo n’eribya Bema ba Yehova Nyamuhanga ababatizibirwe.

² Kandi ibbwa iwe? Wamabya iwunemulengekania okw’ibatizibwa, wuli wa mbaghane omwa kihugho kibi kino kundi ‘wukasonda-sonda Nyamuhanga.’ (Esy. 14:1, 2) Omwatsi ono ahandikirwe busana nawu mbulha wuli mulere kutse wuli mukulhu. Aliwe kandi nethu ithwe thwabiribatizibwa thutholere ithwaghumya erithwamu lyethu ly’erikolera Yehova kera na kera. Neryo ithwe bosi haghuma thukanaye okw’isathu sy’okwa syonzumwa nyingyi esyanga leka ithwakolera Yehova.

3. Busana naki abaghombe ba Yehova banzire ekwenene n’ekithunganene? (Esyonyimbo 19:8; 119:163)

³ Yehova mwabwira abandu biwe athi ‘banze ekwenene.’ (Zek. 8:19) Yesu mwabwira abigha biwe athi bakwamirire ekithunganene. (Mt. 5:6) Eki kikamanyisaya kithi omundu atholere iniathunga eriyisunza linene ery’erikolha ekihikire, ekyuwene, kandi ekihenirye embere sya Nyamuhanga. Wunanzire ekwenene n’ekithunganene? Thuyikethere ngoku wanzirebyo. Wuponire amabehi n’ebyosi ebiwire n’obubi. (Soma Esyonyimbo 19:8; 119:163.) Amabehi akakanganaya emibere ya Sitani, omuthabali w’ekihugho kino. (Yn. 8:44; 12:31) Ekighuma ky’okwa bilhubirirwa bya Sitani ly’erithulha amabehi okwa lina eribuyirire erya Yehova Nyamuhanga. Sitani abirilholha embere  erilhalhania amabehi oku Nyamuhanga wethu eritsuka okw’iyisamambulha ly’omwa Edeni. Mwakania oku Yehova ng’Omuthabali oyuyitsomene iyuwene kandi oyuthe mw’okwenene kandi oyukakagha abandu b’ebibuya. (Enz. 3:1, 4, 5) Amabehi agho Sitani akabugha oku Yehova abirilholha embere eritsandya amalengekania n’emithima y’abandu. Abandu bamathwamu erithendianza ekwenene, Sitani angana leka ibakolha emiringo yosi y’ebindu ebithathunganene n’emikolere mibi.​—Abar. 1:25-31.

4. Yehova abirikangania athi ku ni “Nyamuhanga w’ekwenene”? (Lebaya n’ebisasani.)

⁴ Yehova ni “Nyamuhanga w’ekwenene,” kandi ahathe eriyikukumirira akakangiriraya abo anzire b’ekwenene. (Esy. 31:5) Omw’ikolha ekyo, akabawathikaya, eribalhusya omwa mabehi wa Sitani. Kandi Yehova akakangiriraya abaghombe biwe eribya b’okwenene n’eribya bathunganene. Busana n’eki bakabana erisikibwa n’erithekana okwa lhulengo lhulebe. (Emi. 13:5, 6) Mbwino ane akukolera ebyo wunemw’igha Biblia? Wabiriminya ngoku esyonzira sya Yehova sy’esikaghasira abandu bosi nawu imwawune. (Esy. 77:13) Neryo wanzire erisighika erithunganene lya Nyamuhanga. (Mt. 6:33) Wanzire erilhwira okwa kwenene n’erikangania ngoku ebya Sitani akabugha oku Nyamuhanga wethu, Yehova, ni mabehi. Ekyo wanga kikolha wuthi?

5. Wanga sighika wuthi ekwenene n’ekithunganene?

⁵ Wangana thwamu eribya omwa ngebe eyikabya nga yikabugha yithi: “Ngaghana amabehi wa Sitani, kandi ngamakirira ekwenene. Nganzire Yehova ng’Omuthabali waghe, kandi nganzire ingakolha ebyo akabugha athi bihikire.” Ekyo wanga kikolha wuthi? Hikira Yehova omwa musabe kandi yiheyo okw’iyo, neryo kanganaya eriyihayo eryo embere sy’abandu omw’ibatizibwa. Erianza eky’ekwenene n’ekihikire ni kindu ky’amaaka ekyanga thuhira mw’omuhwa w’erithwamu eribatizibwa.

6. Ni nzumwa syahi esiri omwa Esyonyimbo 45:4 esikaleka iwanza Yesu Kristo?

⁶ Busana naki wanzire Yesu Kristo? Lhangira esyonzumwa ndebe esikaleka esiri omwa Esyonyimbo 45:4, NWT. Hakabugha hathi: “N’omo lhukengerwa lhwawu lholha embere erikinda; Wughendaye esabayiri erihangania ekwenene n’eriyikehya n’erithunganene, N’okuboko kwawu kw’amali kwasyakuthokesya  ebikaswekaya kutsibu.” Yesu anzire ekwenene, eriyikehya, n’erithunganene. Wamabya iwunanzire ekwenene n’erithunganene, isikyendi swekya eribya iwanzire na Yesu Kristo. Thayir’ilengekania ngoku Yesu alhwira okwa ky’ekwenene n’ekihikire omwa buthubaha. (Yn. 18:37) Kandi ibbwa, Yesu akakulha-kulhanaya athi omubere w’eriyikehya?

7. Ni kyahi ekikakutsemesaya okw’iyikehya lya Yesu?

⁷ Yesu akakulha-kulhanaya omubere w’eriyikehya omwa ky’erileberyako kiwe. Ng’eky’erileberyako, olhukengerwa olhwosi akalhuha Thatha wiwe, butsira eriyihalho. (Mk. 10:17, 18; Yn. 5:19) Wukayowa wuthi wukalhangira eriyikehya ng’eryo? Mbwino sikirileka wukanza Mughalha wa Nyamuhanga n’erimukwama? Kwabine bithya. Busana naki Yesu ayikehirye? Kundi anzire Thatha wiwe, oyuyikehirye kandi akamugherereraya. (Esy. 18:35; Ebr. 1:3) Mbwino eki sikirileka wukayithunda hakuhi na Yesu, oyukagherereraya ndeke-ndeke emibere ya Yehova?

8. Busana naki thwanzire Yesu ng’Omwami wethu?

⁸ Thwanzire Yesu ng’Omwami wethu kundi ya Muthabali oyutholere. Yehova iyuwene-wene mwathendeka Mughalha wiwe n’erimusombolha eribya muthabali. (Isa. 50:4, 5) Thalengekania n’okwa lhwanzo lhw’eriyihayo olho Yesu abirikangania. (Yn. 13:1) Yesu ng’Omwami wawu, wutholere iwamwanza kutsibu. Mwasoborera athi abamwanzire kundu​—abo akahulhamo banywani biwe​—bakakanganaya olhwanzo lhwabo omw’ighendera okwa bihano biwe. (Yn. 14:15; 15:14, 15) Ka ni kitsumbi eribya munywani wa Mughalha wa Yehova!

9. Olhubatizo lhw’Abakristayo lhusosene lhuthi n’olhwa Kristo?

⁹ Ekighuma ky’okwa bihano bya Yesu kiri kithi abakamukwama batholere ibabatizibwa. (Mt. 28:19, 20) Mwahiraho eky’erileberyako. Omwa sindi nzira, olhubatizo lhwiwe lhuli mbaghane okwa lhw’abigha biwe. (Lebaya akasanduko “ Embaghane Eyiri Ahakathi-kathi k’Olhubatizo Lhwa Yesu n’Olhubatizo lhw’Abigha Biwe.”) Aliwe omwa sindi nzira, lhunasosene. Abere akabatizibwa, Yesu mwayihayo erikolha erisonda lya Thatha wiwe. (Ebr. 10:7) Abakakwama Kristo bakabatizibawa erikangania embere sy’abandu ngoku babiriyihayo oku Yehova Nyamuhanga. Aliwe nabu nga Yesu, olhubatizo lhwabu lhukakanganaya ngoku engebe yabu yamabya okw’ihira erisonda lya Nyamuhanga ly’embere. Neryo bakakwama eky’erileberyako ky’Omukama wabu.

10. Busana naki erianza Yesu litholere iryathuhira mw’omuhwa w’eribatizibwa?

¹⁰ Wukaligha Yesu ng’Omughalha ekyusa kya Yehova kandi ng’Omwami oyo Nyamuhanga abirisombolha erithuthabalha. Wukalhangira Yesu ng’oyukakanganaya ndeke-ndeke eriyikehya lya Thatha wiwe. Wabiriminya ngoku mwalisya abakwire enzalha, amahumulikania abahwere amani, nibya n’erilhamya abalhwere. (Mt. 14:14-21) Wabirilhangira ngoku akasondolha ekithunga kiwe munabwire. (Mt. 23:10) Kandi wabiriminya ngoku akendi syakolha bingyi omwa buthuku obukasa iyo ng’Omwami w’Obwami bwa Nyamuhanga. Wanga kangania wuthi ku wumwanzire? Omw’ikwama eky’erileberyako kiwe. (Yn. 14:21) Wangana kolha ekyo omw’iyihayo oku Yehova n’eribatizibwa.

11. Iwukendi bugha wuthi ni nzumwa yahi ngulhu eyikaleka ithwabatizibwa, kandi busana naki ikyabya kithya?

¹¹ Ni nzumwa yahi ngulhu eyikaleka ithwabatizibwa? Yesu mwabisulha ekihano kikulhu omwa bihano bya Nyamuhanga, akabugha athi: “Wanze Omukama Nyamuhanga wawu n’omuthima wawu wosi, n’ekirimu kyawu kyosi, n’obulengekania bwawu bwosi, n’amaaka  wawu wosi.” (Mk. 12:30) Mbwino olhwanzo olhwa wuwithire Nyamuhanga kwa lhune lhuthya?

12. Busana naki wanzire Yehova? (Lebaya n’ekisasani.)

¹² Hali nzumwa nyingyi esyangaleka ithwanza Yehova. Ng’eky’erileberyako, wabiriminya ngoku ya “nzuko y’engebe yosi” kandi ngoku yukaha “obuli lhusunzo lhubuya n’obuli lhusunzo lhuwene.” (Esy. 36:9; Yak. 1:17) Obuli kindu kibuya ekyo wukabana kikalhua oku Nyamuhanga wethu omwenge, kandi ow’olhwanzo.

13. Ni kyahi ekikaleka endongolya ikyabya kihembo kibuyanga?

¹³ Endongolya ni kihembo kibuyanga ekyo Yehova abirithuha. Busana naki ithwabugha thuthya? Thalengekania okwa bughuma obuli ahakathi-kathi ka Yehova na Mughalha wiwe. Yesu mwabugha athi: “Thatha waghe anyanzire” kandi “nyanzire Thatha.” (Yn. 10:17; 14:31) Obughuma bwabu obo mubwongera erikamatha ahabw’esyobbiliyoni sy’emyaka. (Emi. 8:22, 23, 30) Thalengekania Nyamuhanga ng’atholere eribya imwabya omwa bulhumi bungahi akalighira Mughalha wiwe eriaghalhwa n’eriholha. Yehova anzire abandu ba kutsibu​—nawu imwawune—​kyaleka ahathe erikakwa iniahayo Mughalha wiwe mwanzwa ng’ekihongo nuku kithokekane okw’iwe n’abandi erisyabyaho kera na kera. (Yn. 3:16; Gal. 2:20) Eyi y’enzumwa ngulhu kutsibu eyikaleka ithwanza Nyamuhanga.

14. Ni kilhubirirwa kyahi ekyuwene kutsibu omwa ngebe ekyo wangayihiriraho?

¹⁴ Olhwanzo olho wuwithire Yehova lhwabiriyongera wunemumw’ighako bingyi. Ahathe erithika-thika wanzire iwayithunda hakuhi nayu lino na kera na kera. Kandi wangana thoka. Omwa lhukeri akakuhira mw’omuhwa w’eritsemesya omuthima wiwe. (Emi. 23:15, 16) Wangana kolha ekyo butsira omwa binywe bisa aliwe n’omwa mikolere. Engebe eyawukathwamu eribyamo yikendi kangania kwenene nga wunanzire Yehova. (1 Yn. 5:3) Eki ky’ekilhubirirwa ekyuwene kutsibu ekyo wanga yihiriraho.

15. Wanga kangania wuthi ku wanzire Yehova?

¹⁵ Wanga kangania wuthi ku wanzire Yehova? Eky’erimbere, iha omusabe w’embaghane ow’eriyihayo oku Nyamuhanga mughuma ow’okwenene. (Esy. 40:8) Neryo kanganaya eriyihayo lyawu eryo embere sy’abandu wukabatizibwa. Ngoku thunalyalhangira okw’itsuka ly’omwatsi ono, eyo yikabya tseme nene kandi mbinduka nene. Wukatsuka engebe mbyaka, butsira ahabwawu, aliwe busana na Yehova. (Abar. 14:8; 1 Pet. 4:1, 2) Ekyo kyanganabya nga ni kiika kinene erithwa, kandi kwabine bithya. Aliwe kikakukyungulira enzira ey’engebe eyuwene kutsibu. Kithi?

16. Ngoku Esyonyimbo 41:12 hakakanganaya, Yehova akendi syahemba athi abakahayo engebe yabu erimukolera?

¹⁶ Yehova y’Omundu oyusingireyo omw’ihithya. Mbulha wukamuha bingahi, mughulhu wosi akakuha bingyi kwilhaba. (Mk. 10:29, 30) Akendi kuha engebe eyikatsemesaya kutsibu, eyiri mw’emighisa, kandi eyiwithe ekighendererwa, nibya n’omwa kihugho ekitsandire kino. Kandi eyo ni nzuko buyira. Olhughendo olho wukatsuka wukabatizibwa silhutholere lhukahwa. Wangana lholha embere erikolera Thatha wawu mwanzwa kera na kera. Olhwanzo olhuli ahakathi-kathi kawu na Thatha wawu lhukendi lholha embere eriyongera, kandi wukendi thoka erisyabyaho kera na kera ng’iyo.​—Soma Esyonyimbo 41:12.

17. Ni kyahi ekyo wangaha Yehova eky’athawithe?

¹⁷ Wukabya wukathwa ekiika ky’eriyihayo n’eribatizibwa, wukabya n’olhusunzo lhw’eriha Thatha wawu y’ekindu ky’obughuli bunene kutsibu.  Abirikuha obuli kindu kibuya, ebikakulethera etseme, ebyo wabiribana. Nawu wanganaha Omwinye olhubulha n’ekihugho y’ekindu ekyo athawithe​—erimukolera buthaleghulha ahathe erikakwa. (Yobu 1:8; 41:11; Emi. 27:11) Ni nzira yahi eyuwene eyo wanga koleseryamo engebe yawu? Ahathe erithika-thika, olhwanzo olho wuwithire Yehova y’enzumwa eyuwene eyanga leka iwabatizibwa.

18. Ni bibulyo byahi ebyo wanga yibulya?

¹⁸ Aliwe wanga subirya wuthi ekibulyo kino, Wune mwendi batizibwa? Niwe wanga subirya ekibulyo ekyo. Aliwe kyangana kuwathikya wamayibulya wuthi, ‘Habwaki ingalindirirya?’ (Emib. 8:36) Ibuka esyonzumwa isathu esyo thwamabirikaniako. Ey’erimbere, wanzire ekwenene n’ekithunganene. Yibulhaye, ‘Ngananzire erisyalhangira omughulhu obuli mundu akendi syabugha okwenene n’erikolha ekihikire?’ Eyakabiri, wanzire Yesu Kristo. Yibulhaye, ‘Ngananzire Mughalha wa Nyamuhanga ng’Omwami waghe, kandi ngananzire erikwama eky’erileberyako kiwe?’ Eyakasathu, ekikulhu kutsibu wanzire Yehova. Yibulhaye, ‘Ngananzire eritsemesya omuthima wa Yehova omw’imukolera nga Nyamuhanga waghe?’ Eby’erisubirya byawu okwa bibulyo ebyo byamabya ini ee, neryo busana naki iwuthabatizibwa? Habwaki iwalindirirya?​—Emib. 16:33.

19. Busana naki siwutholere wukaketa-keta eribatizibwa? Iha eky’erileberyako. (Yoane 4:34)

¹⁹ Wamabya iwukaketa-keta eribatizibwa, lengekanaya okwa ky’erileberyako ekya Yesu akolesaya. (Soma Yoane 4:34.) Lhangira ngoku Yesu mwalinganisya erikolha erisonda lya Thatha wiwe n’ebyalya. Busana naki? Ebyalya bikathughasira. Yesu abya inianasi ngoku obuli kindu ekyo Yehova akathulhaghira athi thukole kikathughasira. Yehova syanzire thukakolha ekyosi-kyosi ekyanga thuhuthalya. Mbwino erisonda lya Yehova busana nawu mune eribatizibwa? Ee. (Emib. 2:38) Neryo iwangana yikethera ngoku erighendera okwa kihano ky’eribatizibwa likendi kughasira. Wamabya isiwanga keta-keta erirya ebyalya ebyawanzire kutsibu, busana naki iwaketa-keta eribatizibwa?

20. Thukendi syakania okuki omo mwatsi owakakwamako?

²⁰ Habwaki iwalindirirya? Abangyi bangana subirya omwa nzira eno, “Sindinahika.” Okwenene kuli kuthi erithwamu eriyihayo oku Yehova n’eribatizibwa ly’erithwamu likulhu kutsibu eryo wanga kolha. Neryo kwesi kikayithagha obuthuku, erikirengekaniako ndeke, n’erihira h’akaghalha kanene eritholera eribatizibwa. Aliwe wamabya kwenene iwunanzire erithwa ekiika ekyo, wanga kolhaki lino eriyithegheka? Thukendi bana eky’erisubirya okwa kibulyo ekyo omo mwatsi owakakwamako.