1. Ni nzira yahi nguma eyo Yobu aminyiramo ndeke Yehova?

 OMW’IKANIRANIA lyosi erya Yobu athunga omo ngebe yiwe, erighuma litholere eribya isiryangibiriranwa​—eryo athunga na Yehova. Erithoka eriwathikya Yobu nuku aghumaya eriyikethera liwe omw’amenge n’amaaka Wiwe aw’eritsomana abaghombe Biwe, Yehova mwakania oko bihangikwa birebe ebikaswekaya. Ng’eky’erileberyako, Yobu mw’ibukibwa ngoku Nyamuhanga akatsomana ebisoro, neryo Nyamuhanga angatsomene na Yobu. (Yobu 38:39-41; 39:1, 5, 13-16) Omw’ighanirya oko bihangikwa birebe, Yobu mwaminya bingyi okwa mibere ya Yehova.

2. Busana naki kyangana thukalira erilebya ndeke ebihangikwa bya Yehova?

² Nethu thwangan’igha bingyi oku Nyamuhanga wethu omw’ilebya ndeke ebihangikwa biwe. Aliwe okwa bundi buthuku kyangana thukalira erikolha ekyo. Thwamabya ithw’ikere omwa tawuni nene, omwa ngebe yethu ya buli kiro ithwangana ghana erilhangira bingyi okwa bya Yehova abirihangika. Nibya nomuthwangabya ithwikere omo kyalu, ithwangana yowa thuthi sithuwithe endambi y’erigha okwa bihangikwa. Neryo thulebaye ekikaleka ikyabya ini kikulhu erihiraho endambi n’akaghalha erilebya ndeke ebihangikwa. Thukendi lebya ngoku Yehova na Yesu bakolesaya ebihangikwa erikangirirya n’ebya thwanga kolha erigha bingyi okwa bihangikwa.

3. Ni kyahi ekikakanganaya ngoku Yehova aby’anzire Adamu iniatsemera ebihangikwa?

³ Yehova aby’anzire omundu w’erimbere iniatsemera ebihangikwa Biwe. Nyamuhanga abere akahangika Adamu, mwamuha  eparadiso eyuwene ey’erikalhamo kandi mwamuha omubiiri w’erilimayo n’erikanyiriryayo. (Enz. 2:8, 9, 15) Thathera akasasani Adamu nga mwatsema bungahi akalhangira esyombutho sikalhasa n’ebimole bikakya. Olhu ka lhwabya lhusunzo, Adamu eritsomana eririma lye Edeni! Yehova kandi mwabwira Adamu athi alhuke ebisoro muthina-muthina by’amena. (Enz. 2:19, 20) Yehova iyuwene-wene anganathwiremo erilhuka obuli kisoro ky’erina; omwakanya k’ekyo, mwaha Adamu y’omubiiri oyo. Ahathe erithika-thika, Adamu abere athali athwamu ng’abilhuke amenaki, mwatsuka eriyitheghereryabyo ndeke, erilebya emibere n’emitse yabyo mirebe. Atholere eribya imwatsemera omubiiri oyo. Omo kwenene, omubiiri oyo mwamuha akaghisa k’eryongera erisima amenge wa Thatha wiwe n’emibere apambiramo n’erikwikiramo ebindu.

4. (a) Ni nzumwa yahi nguma eyikaleka ithwabya ithutholere erilebya ndeke ebihangikwa? (b) Kutsibu-tsibu ni bihangikwa byahi ebya wukatsemera?

⁴ Enzumwa nguma eyikaleka ithwabya ithutholere erilebya ndeke ebihangikwa yiri yithi Yehova anzire ithwakolha ekyo. Akathubwira athi: “Musumbe ameso wenyu endatha, mulhangire oyuwahangika esyongununu esi.” (Isa. 40:26) Yehova mwathasubulira okw’ihangika ebiri omwa lhubulha bisa aliwe kandi mwahangika n’ebiri okwa kihugho n’omwa ngetse ebikaswekaya ebyo thwang’ighirako. (Esy. 104:24, 25) Kandi thalengekania okwa mibere Nyamuhanga abirithukwikiramo. Mwathuhiramo omubere w’erisima obubuya bw’ebihangikwa. Kandi abirileka ikyathokekana ithwe eritsemera ebihangikwa biwe muthina-muthina omw’ithuhiramo amaaka w’erilhangira, eriowa, eriowa wukathulhwako, erisihirwa, n’eribeherwa.

5. Ngoku kiri omwa Abanya Roma 1:20, thukaghasirawa thuthi thuk’igha okwa bihangikwa bya Yehova?

⁵ E Biblia yikabisulha eyindi nzumwa ngulhu eyikaleka ithwabya ithutholere erilebya ndeke ebihangikwa. Bikathweghesaya okwa mibere ya Yehova. (Soma Abanya Roma 1:20.) Ngahathya, thalengekania oko mikwikire eyilhangirikire ndeke omo bihangikwa. Mbwino siyiribisulha amenge wa Nyamuhanga? Kandi thalengekania okwa byalya muthina-muthina ebya thukatsemera. Obo ni bwema obulhangirikire obukakanganaya kw’anzire abandu. Thukabya thukalhangira emibere ya Yehova omo ebyo ahangika, thukamuminya ndeke kandi ithwanza eriyithunda okw’iyo. Neryo lino thulebaye esyonzira ndebe esyo Yehova abirikoleseryamo ebihangikwa eryeghesya abandu amasomo makulhu.

6. N’isomo lyahi erya thwang’igha thukalhangira esyonyonyi sikahuma?

⁶ Yehova awithe endegheka y’erikoleramo ebindu. Obuli mwaka eritsuka Okwakabiri kukayahwa  erihika ahakathi-kathi k’Okwakathano, Abaisraeli ibakalhangira ebirobi bikaghulhuka bikahuma erilholya ebwanga bw’endatha. Nyamuhanga mwabwira Abaisraeli athi: “Ekirobi ky’omwa kyanya kinasi ebirimo byakyo.” (Yer. 8:7) Ngoku Yehova abirihiraho endegheka eyikasondolha esyonyonyi esi, abirihiraho n’obuthuku bw’erikoleramo eritswera liwe. Munabwire thukabya thukalhangira esyonyonyi sikahuma, thuk’ibukibawa ngoku thwangana yikethera ngoku Yehova ‘abirithegheka omughulhu’ w’eriletha enduli y’ekihugho kibi kino.​—Hab. 2:3.

7. Thukabana eriyikethera lyahi thukalhangira enyonyi yikaghulhuka? (Isaya 40:31)

⁷ Yehova akaha abaghombe biwe b’amaaka. Erilhabira omu Isaya, Yehova mwalhaghanisya athi angahere abandu biwe b’amaaka ‘w’erighulhuka endatha n’ebipupa ng’amasamba’ omughulhu bakayowa ibatsekire kutse ibabbunikire muthima. (Soma Isaya 40:31.) Abaisraeli ibabeghere erilhangira amasamba akaghulhuka omwa kyanya omw’ikolesya akayagha akakahethuka isyathahiraho akaghalha kanene. Ekyo ka kikathwibukaya ndeke kithi, ngoku Yehova anabiriha esyonyonyi esyo sy’amaaka, anganaha n’abaghombe biwe b’amaaka! Wukalhangira enyonyi y’amaaka yikaghulhukira haali endatha omo kyanya isiyithapipirya ebipupa byayo bya kutsibu, ambi iwibuka ngoku Yehova angana kuha amaaka w’erisingura ebitsibu byawu.

8. Ni kyahi ekya Yobu igha omw’ilebya ebihangikwa bya Nyamuhanga, kandi nethu thwang’ighaki?

⁸ Thutholere ithwayikethera Yehova. Yehova mwawathikya Yobu eryongera erimuyikethera. (Yobu 32:2; 40:6-8) Omw’ikanirania na Yobu, Nyamuhanga mwakania okwa bingyi by’okwa bihangikwa, imwamuli esyongununu, ebithu, n’ehirabyo. Yehova kandi mwakania n’okwa bisoro nga bino, enganda [enume y’omoli] n’esabayiri. (Yobu 38:32-35; 39:9, 19, 20) Ebyosi ebi mubyaha obwema obukakanganaya ngoku Nyamuhanga awithe amaaka manene, olhwanzo, n’amenge manene. Hakiri hakabya erikanirania eri, kundi Yobu mwayikethera Yehova kwilhaba kera. (Yobu 42:1-6) Kuthya, thukabya thuk’igha okwa bihangikwa, thuk’ibukibawa ngoku Yehova awithe amenge awathehwayo kandi ku ni w’amaaka manene kwithulhaba. Kandi akendi syaghunzaho ebitsibu byethu ebyosi. Ekwenene eyi yangana leka ithwaghumya eriyikethera lyethu omw’iyo.

9-10. Omwisi n’embulha bikathweghesayaki oku Yehova?

⁹ Yesu aby’asi ndeke ebihangikwa. Iyo “ng’omukoli mukulhu,” aby’awithe olhusunzo lhw’erisangira na Thatha wiwe omw’ihangika ebiri omwa buhangwa. (Emi. 8:30) Enyuma waho, Yesu iniane okwa kihugho, mwakolesya ebihangikwa erikangirirya abigha biwe oku Thatha wiwe. Thulebaye amasomo make agho akangiriraya.

¹⁰ Yehova akakanganaya obuli mundu y’olhwanzo. Omw’Ikangirirya ly’okwa Kithwe, Yesu mwakanirya abigha biwe okwa bihangikwa bibiri ebyo abandu bangyi babya bakalhangira mwa bya buli kiro: omwisi n’embulha. Ebyosi bibiri bikayithaghisibawa engebe eribyaho. Yehova angana thwiremo erithendi bihererya abathemuramaya. Omwakanya k’ekyo, omo lhwanzo akaha abosi b’omwisi n’embulha. (Mt. 5:43-45) Yesu mwakolesya erisomo eri akakangirirya abigha biwe ngoku Yehova anzire ithwakangania obuli omundu y’olhwanzo. Obuli eritsemera amalengetsa kutse erilhangira embulha yikawa, thwangan’ibuka olhwanzo lhwa Yehova othuthemo kasolholho. Eky’erileberyako kiwe kyangana thuhiramo omuhwa w’erikangania olhwanzo ng’olho omw’ithulira abandu bosi.

11. Thukahimbawa thuthi thukalebya ndeke esyonyonyi sy’omwa kyanya?

¹¹ Yehova Nyamuhanga akathuha ebiyithawa  byethu by’ekinyamubiri. Omw’ikangirirya ly’okwa kithwe iryan’eryo, Yesu kandi mwabugha athi: “Musamalire esyonyonyi sy’omo kyanya; kusangwa sisyebiba, kutse sisyeghesa, kutse erihirabyo omo bighona; nikwa Thatha wenyu w’elhubulha akalisayasyo.” Obundi abahulikiriri ba Yesu babya ibangana lhangira esyonyonyi sikaghulhuka omughulhu ababwira athi: “Nenyu simuli b’obughuli bunene kwilhabasyo kwehi?” (Mt. 6:26) Eyi ka ni nzira y’olhwanzo ey’erithukakasiryamo ngoku Yehova akendi tsomana ebiyithawa byethu by’ekinyamubiri! (Mt. 6:31, 32) Erisomo erya thukighira okwa bihangikwa eri linemulholha embere erihimba abaghombe abathaleghulha. Mwali wethu omulere omutemburi e Spain mwayiponera busana n’erithendi bana ahuwene ah’erikalha. Abere abirilhangira esyonyonyi sikalya esyonguma n’ebighuma, mwongera erithekana. Akabugha athi, “Esyonyonyi esyo musyanyibukya ngoku Yehova akasitsomana kandi ngoku naghe akendi nyitsomana.” Buthuku buke enyuma waho, mwali wethu mwabana ah’erikalha.

12. Ngoku kiri omu Matayo 10:29-31, ebiswiri bikathweghesayaki oku Yehova?

¹² Yehova akalhangira obuli mundu ahabwiwe mwa w’obughuli. Abere athali athuma abakwenda biwe eriyathulira, Yesu mwabawathikya ngoku bangasingura obuba bw’erihakanisibwa. (Soma Matayo 10:29-31.) Mwakolha ekyo omw’ikania okwa syonyonyi ndebe esyabya syasibwe omwa Israeli: ebiswiri. Omwa biro bya Yesu esyonyonyi esyo syabya sy’obughuli buke. Aliwe mwabwira abigha biwe athi: “Sihali n’akaghuma akakathoghera ahisi [Thatha wenyu athasi].” Neryo mwongerako athi: “Muli b’obughuli bunene kwilhaba obughuli bw’ebiswiri bingyi!” Aho, Yesu mwakakasya abigha biwe ngoku Yehova akabalhangira mwa b’obughuli obuli mundu ahabwiwe, neryo sihabya enzumwa eyangalekire ibasagha eriendereribwa. Ahathe erithika-thika abigha ibakibuka ebinywe bya Yesu bakalhangira ebiswiri ibane omw’ithulira omwa syotawuni n’omwa byalu. Obuli erilhangira akanyonyi, ibuka ngoku Yehova akakulhangiramo w’omughaso kundi nawu wuli w’obughuli “bunene kwilhaba obughuli bw’ebiswiri bingyi!” Omo buwathikya bwiwe, wangan’imanira erihakanisibwa iwunasikire.​—Esy. 118:6.

13. Ni byahi ebikendi thuwathikya eribana amasomo okwa bihangikwa?

¹³ Thwangan’igha awandi masomo mangyi oku Yehova erilhabira omwa bihangikwa. Thuthi? Eky’erimbere, thutholere ithwahiraho endambi y’erisamalira ndeke ebihangikwa. N’ekindi, thutholere ithwalengekania nga bikathweghesayaki oku Yehova. Hanganayira ikyathukalira erikolha ekyo. Géraldine, mwali wethu owe Cameroon, akabugha athi, “Nakulira omwa tawuni nene, neryo munaminya ngoku kikayithagha akaghalha kanene erisamalira ndeke ebihangikwa.” Omusyakulhu w’ekithunga ya Alfonso akasoborera athi, “Nabiriminya ngoku ngayithagha endambi y’eribya ingyuwene erithoka erisamalira ndeke  ebihangikwa bya Yehova n’erighanirya nga bikanyeghesayaki okw’iyo.”

14. Dawudi mw’ighaki akaghanirya okwa bihangikwa bya Nyamuhanga?

¹⁴ Dawudi mwaghanirya kutsibu okwa bihangikwa bya Nyamuhanga. Mwabwira Yehova athi: “Omughulhu ngasamalira olhubulha lhwawu, omubiiri w’eminwe yawu, n’omukera n’esyongununu, ebyo wabirihira aho wabyo; ko mundu niki kwehi? Wuthi wukamw’ibuka?” (Esy. 8:3, 4) Dawudi iniakabya akalhalhamira omwa kyanya omo kiro, isyali kwama kyasubulira lisa okw’isima amaaka w’esyongununu esyo akalhangira. Kandi iniakaghaniraya okwa ekya esyongununu sikamweghesaya oku Nyamuhanga. Mwaminya ngoku Yehova awithe amenge manene n’amaaka manene. Okwa bundi buthuku, Dawudi iniakaghaniraya okwa mibere omubiri wiwe atsutsikanibawa omo nda ya mama wiwe. Iniakabya akaghanirya okwa bindu ebikaswekaya ebi, iniakongera erisima amenge wa Yehova.​—Esy. 139:14-17.

15. Iha eby’erileberyako ebya wabirilhangiriramo emibere ya Yehova omwa bihangikwa. (Esyonyimbo 148:7-10)

¹⁵ Nethu nga Dawudi sikirithuyithaghisaya erighenda haali eribana ekihangikwa ky’erighaniryako. Wamasamalira aho wune, hane ebyanga kw’eghesya okwa mibere mingyi ya Yehova. Ng’eky’erileberyako, wangana minya amaaka wa Yehova wukowa akahuhirya k’eryuba oko mubiri wawu. (Yer. 31:35) Ghaniraya oko menge wa Nyamuhanga wukalhangira enyonyi yikahimba olhuthu. Thalengekania ngoku Yehova ni mutsangya wukalhangira ekyana ky’embwa kikanza erihamba omukira wakyo. Kandi sima Yehova busana n’olhwanzo lhwiwe wukalhangira omubire akasatha n’olhumekeke lhwiwe. Thuwithe ehighisa hinene ehy’erigha oku Yehova kundi ebihangikwa biwe byosi​—ebinene-binene n’ebike-bike, ebiri hakuhi n’ebiri haali​—bikamupipa.​—Soma Esyonyimbo 148:7-10.

16. Thutholere ithwathwamu erikolhaki?

¹⁶ Nyamuhanga wethu ni w’amenge manene kutsibu, oyukatsomana, oyuwakwika ebindu omwa nzira eyikaswekaya, kandi ow’amaaka. Emibere eyi n’eyindi mingyi yilhangirikire ndeke omwa bihangikwa thwamabisamalira ndeke. Ambi ithwe bosi mughulhu wosi ithwahiraho endambi y’eritsemera ebihangikwa n’erilengekania nga bikathweghesayaki oku Yehova. Omw’ikolha ekyo, ithukendyongera eriyithunda hakuhi n’Omuhangiki wethu. (Yak. 4:8) Omo mwatsi owakakwamako, thukendi lhangira ngoku ababuthi banga kolesya ebihangikwa eriwathikya abaana babu eriyithunda hakuhi na Yehova.