1. Ni kyahi ekyo ababuthi bakasunzira abaana babu?

 ABABUTHI, thunasi ngoku mwanzire eriwathikya abaana benyu eriminya Yehova n’erimwanza. Aliwe Nyamuhanga syalilhangirawa. Wangawathikya wuthi abaana bawu erimulhangira ng’Omundu n’eriyithunda hakuhi nayu?​—Yak. 4:8.

2. Ababuthi bangakangirirya bathi abaana babu okwa mibere ya Yehova?

² Enzira ngulhu y’eriwathikiryamu abaana eriyithunda hakuhi na Yehova ly’eribeghesya e Biblia. (2 Tim. 3:14-17) Aliwe e Biblia yikabisulha eyindi nzira eyo abalere bang’ighiramo oku Yehova. Omwa kitabu ky’Emisyo, kilhangirikire ngoku thatha ak’ibukaya mughalha wiwe athi isy’ibirirawa emibere ya Yehova, eyikabisulhawa omwa bihangikwa. (Emi. 3:19-21) Thukendi kania okwa syonzira ndebe esyo ababuthi bangakoleseryamo ebihangikwa erikangirirya abaana babu okwa mibere ya Yehova.

3. Ni buwathikya bwahi obo ababuthi batholere ibaha abaana babu?

³ E Biblia yikabugha yithi “emyatsi ya Nyamuhanga eyithalholhawako . . . yabiriminyikalha ndeke-ndeke omo bindu ebyo ahangika.” (Abar. 1:20) Ababuthi, obundi mukatsemera erisiba n’abaana benyu mukayayitsemesya. Mukolesaye endambi eyo eriwathikya abaana benyu erilhangira ebihangikwa nga bikahambangana bithi n’emibere ya Yehova. Omw’eki, thulebaye ebyo ababuthi bang’ighira okwa ky’erileberyako kya Yesu.

4. Yesu iniakakolesaya athi ebihangikwa erikangirirya abigha biwe? (Luka 12:24, 27-30)

 ⁴ Lhangira ngoku Yesu akolesaya ebihangikwa akakangirirya. Buthuku bughuma, mwabwira abigha biwe athi basamalire ebikororo n’ebiranga-ranga. (Soma Luka 12:24, 27-30.) Yesu angana thwiremo eryahulha ekisoro kutse ekirimwa kyosi-kyosi, aliwe mwasombolha ekinyonyi n’ekimole ebyo abigha biwe babya ibanasi ndeke. Abigha bangabya ibabya ibanemulhangira ebikororo ibinemughulhuka n’ebimole ibinakirye. Mbwino wangana thera akasasani Yesu inianemukangania ebindu ebi akakania? Kandi mwakolhaki enyuma w’eryahulha eby’erileberyako ebi? Mwakangirirya abigha biwe b’erisomo likulhu erihambire okw’ihithya n’olhukeri lhwa Thatha wiwe w’elhubulha: Yehova akendilisya n’eryambalya abaghombe biwe abathaleghulha ngoku akanakolha okwa bikororo n’ebimole.

5. Ni bihangikwa byahi ebyo ababuthi banga kolesya erikangirirya omwana wabu oku Yehova?

⁵ Ababuthi, munemwendi gherererya enzira ya Yesu ey’erikangiriryamo? Iwangana bwira omwana wawu okwa kihangikwa ekyo iwe wukatsemera, ng’ekisoro ekya wanzire kutse ekirimwa. Wukakolha ekyo, ibya iwunasi erisoborera eky’erileberyako ekyo nga kikabisulhaki oku Yehova. Neryo iwangana bwira omwana wawu wuthi nayu akubwire ekisoro kutse ekirimwa eky’anzire. Wamakolesya ekihangikwa eky’anzire, obundi iniangana kuhulikirira ndeke wukakania okwa mibere ya Yehova.

6. Eky’erileberyako kya mama wa Christopher kyamathweghesyaki?

⁶ Mbwino ababuthi batholere ibaghunza endambi nene bakasekulya oko kisoro kutse ekirimwa kirebe bathe bakanirania n’abaana babu okwa ebya ekihangikwa ekyo kikabisulha oku Yehova? Kwa bithe bithya. Yesu mwathasoborera binene bikahika okwa mirire y’ebikororo kutse okw’ikatha-kathania ly’emikwikire y’ebiranga-ranga. Ni kwenene, hanganayira omwana wawu inianza erisoborera linene erihambire oko bihangikwa, aliwe okwa bundi buthuku erithabisamalira buyira kutse eriha ekibulyo byangana leka iniakenga. Lhangira ebya mughalha wethu Christopher akibuka ebyabya omwa bulere bwiwe, akabugha athi: “Mama iniakathukaniraya bike erithuwathikya erisima ebihangikwa ebithuthimbireko. Ng’eky’erileberyako, ithukabya thwamabya hakuhi n’ebithwe, iniakabugha athi: ‘Thasamalira ebithwe birya ku ni binene-binene kandi ku byuwene! Mbwino Yehova syaliswekaya?’ Kutse omughulhu thuli ahali engetse, iniangana bugha athi: ‘Thasamalira amaaka w’ebisunda ebi! Mbwino Nyamuhanga si w’amaaka manene?’ Ebinywe bike ebyo ibikaleka ithwalengekania kandi ibikathuhambako kutsibu.”

7. Wangathendeka wuthi abaana bawu erilengekania okwa bihangikwa?

⁷ Abaana bawu bakendibya banemukulha, bathendeke ngoku bang’ongera erighanirya okwa bihangikwa n’eriyira ebya bak’igha okwa mibere ya Yehova. Wangana kania okwa kighuma ky’okwa bihangikwa bya Yehova n’eribulya abaana bawu wuthi, “Eki kyamakweghesyaki oku Yehova?” Wangana sweka wukowa ebya bakendi bugha.​—Mt. 21:16.

8. Ni kaghisa kahi eko ababuthi Abaisraeli babya bawithe bakalhaba “omo nzira”?

⁸ Ababuthi Abaisraeli mubabwirwa indi bakangiriraye abaana babu b’ebinywe by’ebihano bya Yehova omughulhu bakalendera “omo nzira.” (Ebi. 11:19) Esyonzira isilhabangenie omwa kyalu kye Israeli. Ebisoro muthina-muthina, esyonyonyi, n’ebimole ibikabya ibyangana lhangirwa. Esyofamile esy’Abaisraeli ibakabya bakalhaba omwa syonzira, ababuthi ibakabya ibanawithe akaghisa k’erikangirirya abaana babu okwa bihangikwa bya Yehova. Inywe babuthi, nenyu mwanganabya imunawithe ehighisa ng’ehyo ehy’erikolesya  ebihangikwa erikangirirya abaana benyu. Thuthalebya abandi babuthi ngababirikolha ekyo kya bathi.

9. Wang’ighaki oku Punitha na Katya?

⁹ Mama oyukahulhawamo Punitha, oyuwikere omwa tawuni nene e India, akabugha athi: “Thukabya thukabungira abahughu bethu ab’omwa kyalu, thukalhangira ako ng’akaghsa k’erikangirirya abaana bethu okwa bihangikwa bya Yehova ebikaswekaya. Ngayowa abaana baghe ibakayitheghereraya ndeke ebihangikwa ithwabirilhua omwa syotawuni esirimo abandu banene n’esyomatoka.” Ababuthi, abaana benyu sibendisy’ibirirwa endambi eya mwaghunza nabu omwa mwanya owuwene. Katya, mwali wethu erilhua e Moldova, akabugha athi: “Emighulhu eyuwene eya ng’ibuka eyabya omwa bulere bwaghe y’endambi eya nabya ingaghunza n’ababuthi baghe omwa kyalu. Ngabasima kutsibu busana n’erinyikangirirya eritsuka omwa bwana eryimana hake n’erilebya ebya Yehova abirihangika n’erilhangira emibere yiwe omwa bihangikwa.”

10. Ababuthi bangakolhaki kyamabakalira erighenda omwa kyalu? (Lebaya akasanduku “ Obuwathikya Okwa Babuthi.”)

¹⁰ Kandi ibbwa wamabya isiwangathoka erighenda omwa kyalu? Amol, nayu oyuwikere e India, akabugha athi: “Eyo ng’ikere, ababuthi bakakolha habw’esyosaha nyingyi, neryo sikyanga thokekana erighenda omwa kyalu. Aliwe, wanganalhangira ebihangikwa bya Yehova n’erikania okwa mibere yiwe iwune omwa kasithu kake ak’erilhuhukiramo kutse okwa buseku bw’enyumba kw’endatha.” Wamasamalira ndeke, iwangana bumbura hakuhi nawu ebihangikwa bingyi ebya wanga kangania abaana bawu. (Esy. 104:24) Obundi iwangana lhangira esyonyonyi, othuhuka, ebirimwa, n’ebindi bingyi. Karina, erilhua e Germany, akabugha athi: “Mama waghe anzire ebimole, neryo ingakine kasika kalere iniakanyikanganaya ebimole ebyuwene thukayibungya-bungya  haghuma.” Ababuthi, kandi mwangana kolesya esyovidiyo n’ebitabu bingyi ebihambire okwa bihangikwa ebya ekithunga kyethu kyabirihulhukya erikangirirya abaana benyu. Kwesi, mbulha wuli omwa mibereki, wangana wathikya abaana bawu erilhangira ebya Nyamuhanga abirikolha. Neryo thulebaye emighuma y’okwa mibere ya Yehova eyawanga bwirako abaana bawu.

11. Ababuthi bangawathikya bathi abaana babu erilhangira olhwanzo lhwa Yehova?

¹¹ Eriwathikya abaana bawu erilhangira olhwanzo lhwa Yehova, iwangana kania okwa mibere y’olhwanzo eya ebisoro bingyi bikatsomaniramo ebyana byabyo. (Mt. 23:37) Kandi iwangana kania okwa mibere mibuya muthina-muthina eya thukatsemera kutsibu omwa bihangikwa. Karina, oyo thulyakanayako akabugha athi: “Ithunemuyibungya-bungya, mama iniakanyihiramo omuhwa w’eryimana hake n’erilebya ngoku obuli kimole ni ky’embaghane kandi ngoku obubuya bwakyo bukakanganaya olhwanzo lhwa Yehova. Enyuma w’emyaka, ngakinasamalira ndeke ebimole​—emiringo yabyo muthina-muthina, ngoku bikolirwe, n’erangyi. Bikinalholha embere erinyibukya ngoku Yehova athwanzire kutsibu.”

12. Ababuthi banga wathikya bathi abaana babu erilhangira amenge wa Nyamuhanga? (Esyonyimbo 139:13, 14) (Lebaya n’ekisasani.)

¹² Wathikaya abaana bawu erilhangira amenge wa Nyamuhanga. Ahathe erithika-thika Yehova awithe amenge manene kwithulhaba. (Abar. 11:33) Ng’eky’erileberyako, iwangana soborera abaana bawu ngoku amaghetse awakahindukamo bithu w’akalhuamo embulha eyikawa omwa myanya muthina-muthina. (Yobu 38:36, 37) Kandi iwangana kania okwa mikwikire eyikaswekaya ey’omubiri w’omundu. (Soma Esyonyimbo 139:13, 14.) Thalebya ngoku thatha oyukahulhawamo Vladimir akolha ekyo. Akabugha athi: “Kiro kighuma, mughalha waghe mwayithinira okwa kaggali kiwe neryo amahuthalha. Enyuma w’ebiro bike, ekironda mukyalhama. Ingye na mukali waghe muthwamusoborera ngoku Yehova mwahira omwa mubiri mw’amaaka w’eriyisuba-subania. Muthwamukangania ngoku sithuli thwathalhangira ekiri ng’eki omwa ebya bandu bakakolha. Ng’eky’erileberyako, ematoka siyiriyikanika enyuma w’erithunga e aksidenti. Ekyabya  oku mughalha waghe eki mukyaleka iniayitheghererya amenge wa Yehova.”

13. Ababuthi bangawathikya bathi abaana babu erilhangira amaaka wa Nyamuhanga? (Isaya 40:26)

¹³ Yehova akathubwira athi thusamalire endatha n’erilengekania okwa maaka wiwe awakaswekaya awakaleka esyongununu isyabya aho sine. (Soma Isaya 40:26.) Wangana hira omwa baana bawu mw’omuhwa w’erisamalira endatha n’erighanirya. Thalebya ekya Tingting, mwali wethu erilhua e Taiwan, ak’ibuka ekyabya omwa bulere bwiwe: “Mama abere akanyithwalha eriyotha omuliro omwa kiro, eyithe ebitara by’omwa tawuni, muthwalhangira ndeke esyongununu. Oyo w’omughulhu nabya ingayibulha-bulha busana n’akahathikano n’eribulha nga nganemwendi thoka erilholha embere erikolera Yehova buthaleghulha. Mama waghe mwanyihiramo omuhwa erilengekania okwa maaka agho Yehova akolesaya erihangika esyongununu syosi esyo n’eryibuka ngoku ahathe erithika-thika angana kolesya amaaka ayo erinyiwathikya eryimanira erilengwako lyosi-lyosi. Nabere nabirisamalira ebihangikwa okwa lhubungo olho, munanza eriminya Yehova ya ndeke, kandi munaghumya erithwamu lyaghe ly’erimukolera.”

14. Ababuthi banga kolesya bathi ebihangikwa eriwathikya abaana babu erilhangira ngoku Yehova ni Nyamuhanga oyutsemire?

¹⁴ Ebihangikwa bya Yehova bikakanganaya ngoku atsemire kandi ngoku ni mutsangya. Abanya sayansi babirilhangira ngoku ebisoro bingyi bikasatha, imwamune esyonyonyi n’amahere. (Yobu 40:20) Abaana bawu banebathaseka bakalhangira ekisoro kikasatha? Obundi babirilhangira ekyana ky’akapusu kikasatha omwa kapira akakolirwe omwa syohuzi kutse ebibwana bikasatha haghuma. Ekindi kiro abaana bawu bamaseka bakalhangira ekisoro kikakolha akandu akakasekaya, busana naki iwuthab’ibukya ku thukakolera Nyamuhanga oyutsemire?​—1 Tim. 1:11, NWT.

15. Ni byahi ebyanga wathikya ababuthi eriminya amalengekania w’abaana babu? (Emisyo 20:5) (Lebaya n’ekisasani.)

¹⁵ Okwa bundi buthuku, kyangana kalira ababuthi erileka abaana babu bababwire okwa  bitsibu byabu ebya bakabana. Eyo yamabya iy’emibere eya wulimu, iwanganayithagha eriminya amalengekania w’abaana bawu. (Soma Emisyo 20:5.) Abandi babuthi kikab’olhobera erikolha ekyo bakatsemera ebihangikwa ibane haghuma n’abaana babu. Busana naki? Enzumwa nguma yiri yithi okwa buthuku obo hakabya bike ebyanga lengemerya abaana n’ababuthi babu. Thatha e Taiwan oyukahulhawamo Masahiko akabugha eyindi nzumwa eno: “Omughulhu thwabiriyayitsemesya n’abaana bethu​—erihethukira okwa bithwe kutse erighenda okwa bbichi​—mughulhu mungyi bakayowa buholho. Neryo kikathwolhobera erikanirania nabu n’eriminya amalengekania wabu.” Katya, oyo thulyakanayako, akabugha athi: “Iningabya ingalhua okwa sukuru, mama waghe iniakanyithwalha omwa kasithu akuwene ak’erilhuhukiramo. Omwa mibere eyithekene ng’eyo, iningayowa buholho erimubwira ebiryabya okwa sukuru kutse ebikanyilyambaya.”

16. Esyofamile syanga lhuhuka sithi n’eritsanga sikatsemera ebihangikwa bya Yehova?

¹⁶ Kandi ebihangikwa bya Yehova byanganaha esyofamile obuthuku bw’erilhuhukiramu n’eritsangiramo, ekindu ekikaghumaya obughuma bwabu. E Biblia yikabugha yithi hali “omughulhu w’eriseka” “n’omughulhu w’erisatha.” (Omu. 3:1, 4) Erilhabira omwa mibiiri yiwe, Yehova abirithuha emyanya eyuwene eyathwanga yitsemeseryamo. Esyofamile nyingyi syanzire eriyitsemesya haghuma omwa paka, omwa kyalu, okwa bithwe, kutse okwa bbichi. Abandi baana banzire erithibitha-thibitha n’erisathira omwa paka, erisamalira ebisoro, kutse eriziha omwa lhusi, n’omwa ngetse. Ka thuwithe emyanya mingyi eyuwene ey’eriyitsemeseryamo, eyithuthimbireko eya Yehova abirihangika!

17. Busana naki ababuthi batholere ibawathikya abaana babu eritsemera ebihangikwa bya Nyamuhanga?

¹⁷ Omwa kihugho kihya-kihya kya Nyamuhanga, ababuthi n’abaana bakendi syatsemera ebihangikwa bya Yehova kwilhaba kera. Erithendibya nga munabwire, sihali ekikendi syaleka ithwasagha ebisoro; nabyo sibyendi syathusagha. (Isa. 11:6-9) Thukendi syabya n’endambi eyithehwayo ey’eritsemera ebya Yehova abirikolha. (Esy. 22:26) Aliwe babuthi, isimwalinda obuthuku obo erihika imumwawathikya abaana benyu eritsemera ebihangikwa. Mukendibya munemukolesya ebihangikwa erikangirirya abaana benyu oku Yehova, obundi ibangana lighirana n’ebya Omwami Dawudi abugha: “Iwe Mwami Mukulhu, wabirihangika myatsi mingyi.”​—Esy. 104:24.