1. Ni kyahi ekikatsemesaya abangyi abakanzisibawa abakahindana okwa mihindano yethu? (Lebaya n’ekisasani.)

 THATHERA akasasani omulhume na mukali wiwe ibayahindana okwa Kisenge ky’Obwami eky’Abema ba Yehova omurundi wabu w’erimbere. Bakatsema kutsibu bakathangirirwa ndeke n’erilhangira olhwanzo olho abali omwa kithunga bawithirene. Omwa nzira bakalhua okwa muhindano, omukali akabwira mwira wiwe athi, ‘Abandu aba ni b’embaghane okwa bandi bandu abo thukabana kandi kwenene namatsema eribya haghuma nabu.’

2. Ni kyahi ekyabirileka abandi ibathwikalha?

² Omo kwenene olhwanzo olhw’abali omwa kithunga ky’Ekikristayo ni lhw’embaghane. Nomwabine, Abema ba Yehova sibahikene. (1 Yn. 1:8) Neryo thukabya thuk’ongera eriminya abali omwa kithunga, kwathukan’ongera thuthya erilhangira ebighuma by’okwa bisobyo byabu. (Abar. 3:23) Eky’obulighe, abandi babirilighira ebisobyo by’abandi eribathwikalya.

3. Ni kyahi ekikaminyikalhaya abigha ba Yesu ab’okwenene? (Yoane 13:34, 35)

³ Thasyalengekanaya okw’isako erihirikirire omwatsi ono. (Soma Yoane 13:34, 35.) Ni kyahi ekikaminyikalhaya abigha ba Kristo ab’okwenene? Olhwanzo butsira erihikana. Kandi lhangira ngoku Yesu mwathabugha athi: ‘Mwamabya n’olhwanzo, mwasyaminya ko muli bigha baghe.’ Mwabugha athi: ‘Abandu abosi basyaminya ko muli bigha baghe.’ Kwesi aho Yesu akanganaya ngoku abigha biwe kuthya n’abali eyihya w’ekithunga bangaminyire abigha biwe ab’okwenene busana n’olhwanzo olhuthemo eriyikukumirira olhwa bawithirene.

4. Ni byahi ebya bandi banganza eriminya okwa Bakristayo ab’okwenene?

⁴ Abandi abathe Bema ba Yehova ibangana bulya bathi: ‘Olhwanzo lhukaminyikalhaya lhuthi abigha ba Yesu ab’okwenene? Yesu mwakangania athi abakwenda biwe b’olhwanzo? Kandi munabwire kithokekene kithi erigherererya eky’erileberyako kya Yesu?’ Abema bakakolha ndeke bakaghanirya okwa by’erisubirya okwa bibulyo ebyo. Erikolha ekyo kyangana thuwathikya eryongera erikangania ndeke olhwanzo, kwilhabirirya thukaghumira ebisobyo by’abandi.​—Efe. 5:2.

5. Soborera ebinywe bya Yesu ebiri omu Yoane 15:12, 13.

⁵ Yesu mwakikangania ndeke-ndeke ngoku omulingo w’embaghane ow’olhwanzo angaminyikerye abigha biwe. (Soma Yoane 15:12, 13.) Lhangira ngoku Yesu mwabalhaghira athi: ‘Mwanzane, ngoku nabiribanza.’ Ekyo kikamanyisayaki? Ngoku Yesu aghenda akasoborera, olhu lhw’olhwanzo lhw’eriyihayo​—olhwanzo olhukaleka Omukristayo nibya iniaholha busana na mulikyabo kyamayithaghisibwa. b

6. Ekinywe kya Nyamuhanga kikakanganaya kithi ngoku olhwanzo ni lhukulhu?

⁶ Ekinywe kya Nyamuhanga kikahira omuwatho munene oko lhwanzo. Okwa masako agho bandu banene banzire muli n’ano: “Nyamuhanga ni lhwanzo.” (1 Yn. 4:8) “Wanze mulikyenyu ngoko wuyanzire.” (Mt. 22:39) “Olhwanzo lhukakuningira ebibi bingyi.” (1 Pet. 4:8) “Olhwanzo silhuli lemawa.” (1 Kor. 13:8, NWT) Amasako ayo n’awandi akakanganaya ndeke-ndeke ngoku ni kikulhu erikulha-kulhania n’erikangania omubere mubuyanga oyu.

7. Busana naki Sitani syanga thoka erihira abandu ba haghuma omwa lhwanzo lhw’okwenene?

 ⁷ Abandu banene bakayibulhaya bathi: ‘Wanga minyerera wuthi edini y’okwenene? Amadini wosi akabugha athi akakangiriraya ekwenene, aliwe obuli dini yikakangiriraya byayu oku Nyamuhanga.’ Sitani abirithoka eritheba abandu omw’ihiraho amadini mangyi w’amabehi. Aliwe syanga thoka erihiraho olhughanda lhw’ekihugho kyosi olhw’Abakristayo abanzene. Yehova musa yuwangakolha ekyo. Ekyo kihikire kundi olhwanzo lhw’okwenene lhukalhua oku Yehova, erilhabira omwa mulimu wiwe n’eritsumulha abaramya biwe. (1 Yn. 4:7) Neryo kwesi nina ky’erithika-thikira eribya Yesu imwabugha athi olhwanzo olhuthe mw’eriyikukumirira lho lhwanga minyikerye abaramya b’okwenene?

8-9. Olhwanzo olhw’abandu bangyi bakalhangira omwa Bema ba Yehova lhukabahambako lhuthi?

⁸ Ngoku Yesu analhaghulha, abangyi babiriminyerera abigha biwe ab’okwenene busana n’olhwanzo lhw’okwenene olhwa bawithirene. Ng’eky’erileberyako, mughalha wethu Ian ak’ibuka olhuhindano lhunene lhw’erimbere olho ahindanako, olhwabya omwa kisahu ky’omupira hakuhi n’ewiwe. Habya ihamabirilhaba mezi make Ian alibere okwa kisahu ekyo akalebya eby’amasatha. Akabugha athi: “Embaghane eyabya okwa lhuhindano olhu yabya nene kutsibu. Abema babya bolho kandi ibambithe ndeke, n’abaana babu ibawithe esyongeso esyuwene.” Ak’ongerako athi: “Ekikulhu kutsibu, abandu aba ibakalhangirika ibakatsemera ebyo bawithe kandi ku bawithe obuholho​—ekindu ekyo nabya ingakandira. Sind’ibuka omukania wosi-wosi okwa yalhabibawa ekiro ekyo, aliwe emibere y’Abema ba Yehova muyanyihambako kutsibu.” c Ni kwenene emibere mibuya ng’eyo yikasa busana n’olhwanzo lhw’okwenene olho thuwithirene. Kundi thwanzire balikyethu, thukakolongana nabu omwa lhukeri n’erisikya.

⁹ Mughalha wethu oyukahulhawamo John nayu mwabya n’eriyowa ng’eryo akatsuka erihindana okwa mihindano y’ekithunga, akabugha athi: “Munatsemera kutsibu omubere wabu w’eriyihira okwa bandu . . . ogho obuli mundu aby’awithe​—mubalhangirika nga ni babuyirire. Olhwanzo lhwabu lhw’okwenene mulhwaleka ingaligha ku nabiribana edini y’okwenene.” d Mughulhu wosi, ebyalholirweko ng’ebyo bikakanganaya ngoku abandu ba Yehova b’Abakristayo ab’okwenene.

10. Kutsibu-tsibu ni mughulhu wahi thukabana akaghisa k’erikanganiryamo olhwanzo lhw’Ekikristayo? (Lebaya n’omwatsi ahikwa.)

¹⁰ Ngoku kikanganibwe okw’itsuka, sihali n’omughuma w’okwa bikirirya balikyethu oyuhikene. Hanganayira ibabugha kutse ibakolha ebikathuponesaya. e (Yak. 3:2) Okwa buthuku ng’obo, kutsibu-tsibu thukabana akaghisa k’erikanganiryamo olhwanzo lhw’Ekikristayo omwa mibere thukayithwaliramo. Omw’eki, thwang’ighaki okwa ky’erileberyako ekya Yesu ahiraho?​—Yn. 13:15.

11. Ni mibere yahi eyithuwene eya Yakobo na Yoane bakanganaya? (Lebaya n’ekisasani.)

¹¹ Yesu isyalisondekanaya okwa bigha biwe kw’erihikana. Omwakanya k’ekyo, omo lhwanzo, iniakabawathikaya erihengulha emibere yabu eyithuwene nuku basimawe na Yehova. Buthuku bughuma, ababiri b’okwa bakwenda biwe, Yakobo, na Yoane mubasaba mama wabu bathi abwire Yesu athi asyabaha ebitsumbi  by’embere-mbere omo Bwami. (Mt. 20:20, 21) Aho, Yakobo na Yoane babya ibali kw’ikangania emiyiheko n’eriyilhabirirya.​—Emi. 16:18.

12. Mbwino Yakobo na Yoane basa babakanganaya emibere eyithuwene? Soborera.

¹² Yakobo na Yoane s’ibo basa abakanganaya emibere eyithuwene okwa buthuku obo. Thalhangira ekya bandi bakwenda bakolha: “Omughulhu abandi bigha ikumi bowa eki, mubahithana oku balikyabo abo babiri.” (Mt. 20:24) Thwangana thera akasasani Yakobo, Yoane, n’abandi bakwenda ibanemutsurumirana. Obundi abandi ibanemubugha ebinywe nga bino: ‘Nenyu muli bahi muthi mukasaba ebitsumbi by’embere-mbere omo Bwami? S’inywe basa ababirikolha kutsibu haghuma na Yesu. Nethu ng’inywe thunatholere ithwahebwa esyonzunzo sy’embaghane!’ Mbulha mubabugha kyahi, ahabw’akathuku kake abakwenda mubalighira emibere eyi erihamba nabi oko lhwanzo olhwa bawithirene.

13. Ni kyahi ekya Yesu akolha abakwenda biwe bakasobya? (Matayo 20:25-28)

¹³ Ni kyahi ekya Yesu akolha okwa buthuku obo? Mwathahithana. Mwathabugha athi akayasondaya abakwenda abuwene, abalhume ab’eriyikehya linene kandi abangakolongene omo lhwanzo mughulhu wosi. Omwakanya k’ekyo, omw’ighumisirizya Yesu mwaghanirya n’abalhume abo ababya banzire erikolha ekihikire. (Soma Matayo 20:25-28.) Mwalholha embere erikolongana nabu omo lhwanzo, nomwakine indi oyu syabya murundi wabu w’erimbere kutse ow’erighunzerera abakwenda  erianza eriminya omukulhu omw’ibo nga nindi.​—Mk. 9:34; Lk. 22:24.

14. Abakwenda ba Yesu bakulira omwa mibere eyiri yithi?

¹⁴ Ahathe erithika-thika, Yesu iniakalengekanaya okwa mibere eyo abakwenda biwe bakuliramo. (Yn. 2:24, 25) Bakulira omwa mibere eyo abakulhu b’edini babya bakahira omuwatho okwa bukulhu n’ebitsumbi. (Mt. 23:6) Abakulhu b’edini y’Ekiyuda nabu ibakayithwalha mw’abathunganene kutsibu. f (Lk. 18:9-12) Yesu mwaminya ngoku amalengekania ng’ayo angahambire okwa malengekania agho abakwenda bayiwitheko n’awabawithe okwa bandi. (Emi. 19:11) Aby’awithe amalengekania awatholere okwa ebyo aby’akayithagha okwa bigha biwe kandi isyali tsuruma bakasobya. Abya inianasi ngoku banawithe emithima eyuwene, neryo omw’ighumisirizya mwabawathikya erirwanisya emiyiheko yabu n’emiyilhabiriryo, n’erisubya omo mwanya wabyo mw’olhwanzo.

15. Omwatsi owahambire oku Yakobo na Yoane akathweghesayaki?

¹⁵ Thwangan’igha bingyi oko mwatsi wa Yakobo na Yoane. Mubakolha ekithahikire bakasaba ebitsumbi by’embere-mbere omo Bwami. Aliwe abandi bakwenda nabu mubakolha nabi bakalighira emibere eyo erithabulha obughuma bwabu. Nomwabine, Yesu mwakolongana n’abakwenda biwe abosi 12 omwa lhukeri n’olhwanzo. Thuk’ighaki? Ekikulhu si by’ebisobyo ebyo abandi bakakolha aliwe y’emibere thukayithwaliramo bakasobya. Ni byahi ebyanga thuwathikya? Thwamahithana oku mulikyethu, thutholere ithwayibulya: ‘Busana naki eky’alyakolha ikyangolha nabi kithya? Mbwino eki kikanyibisulhako omubere mubi ogho ngatholere ingakolhako? Sikyangabya indi omundu oyulyanyihithanaya anawithe ekitsibu ekyo anemulhabamo? Nomwakine indi ngasingene erihithana, mbwino sinanga kangania olhwanzo olhw’erithendi yitsomana ingyuwene omw’ithendi kihandako omunwe?’ Thukabya thuk’ongera erikolongana n’abandi omo lhwanzo, kwa thukan’ongera thuthya erikangania ku thuli bigha ba Yesu ab’okwenene.

16. Ni kindi kyahi ekya thwang’ighira okwa ky’erileberyako kya Yesu?

¹⁶ Kandi eky’erileberyako kya Yesu kikathukangiriraya ngoku thutholere ithwalengaho eriyitheghererya balikyethu. (Emi. 20:5) Ni kwenene, Yesu iniakaminya ebiri omwa muthima. Ithwe sithwanga thoka ekyo. Aliwe thwangana ghumisirizya ebisobyo by’abalikyethu. (Efe. 4:1, 2; 1 Pet. 3:8) Kyolhobire erikolha ekyo thwamaminya emibere eya bakuliremo. Thulebaye eky’erileberyako.

17. Omulebererya w’omuthimbo mwaghasirwa athi busana n’eriminya mulikyabo ya ndeke?

¹⁷ Omulebererya w’omuthimbo oyukakolera omwa East Africa ak’ibuka mughalha wethu oyuwabya mutsurumi. Omulebererya mwakolha kyahi? Akabugha athi: “Omwakanya k’eriyihighulha oku mughalha wethu oyo, munathwamu erimuminya ndeke.” Omw’ikolha ekyo, omulebererya mwaminya emyatsi mirebe eyihambire okwa eyo mughalha wethu akulira eyabirihamba okwa mibere yiwe. Omulebererya akongerako athi: “Nabere nabiriminya ngoku mughalha wethu abirihiraho akaghalha erisingura emibere eyawithe busana n’eyo akulira n’esyombinduka esyo amabirithakolha, munamwanza. Muthwabya banywani ndeke.”  Omo kwenene, thwamalengaho eriminya balikyethu, mughulhu mungyi kikathwolhobera eribanza.

18. Ni bibulyo byahi ebya thwanga yibulya mulikyethu amabya iniabirithuhithania? (Emisyo 26:20)

¹⁸ Hanganayira ithwayithagha erihikira mulikyethu oyuwabirithuhithania. Aliwe thukakolha ndeke thukatsuka eriyibulya ebibulyo nga bino: ‘Mbwino nganasi okwenene kwosi kw’omwatsi?’ (Emi. 18:13) ‘Mbwino sikyangabya indi syalyakighenderera?’ (Omu. 7:20) ‘Ngane ngathakolha ekisobyo ekiri ng’ekyo?’ (Omu. 7:21, 22) ‘Erihikira omundu oyo, mbwino sikyendi leka omwatsi akatuma omwakanya k’erighunza ghoho?’ (Soma Emisyo 26:20.) Thwamahiraho endambi y’erilengekania okwa bibulyo ng’ebyo, ithwangana ghunzerera thuthi olhwanzo olhwa thuwithire mulikyethu ilhwangana leka ithuthahanda okwa kisobyo ekyo kw’omunwe.

19. Wamathwamu erikolhaki?

¹⁹ Ibo ng’egurupu, Abema ba Yehova banemukangania ku ni bigha ba Yesu ab’okwenene. Obuli mughuma w’okw’ithwe akakanganaya ku ni mwigha wa Yesu ow’okwenene akakangania balikyethu b’olhwanzo olhuthemo eriyikukumirira nomwakine indi bakasobaya. Omwa nzira eyi, thwangana wathikya abandi eriminya edini y’okwenene n’erithuyiyungako omw’iramya Yehova, Nyamuhanga ow’olhwanzo. Thuthwemu erilholha embere erikangania olhwanzo olhukaminyikalhaya Abakristayo ab’okwenene.