1-2. Wamabya isiwuli watholera eribatizibwa, busana naki si wutholere wukahwa amani? (Lebaya ekisasani ky’okwa kidipa.)

 WAMABYA iwanzire eribatizibwa, wabiriyihiriraho ekilhubirirwa ekyuwenenga. Wunayitheghekire erithwa ekiika ekyo lino? Wamabya iwunayitheghekire kandi n’abasyakulhu ibanalighire, isiwalhabaya akaghisa akakakwamako. Wamakolha ekyo iwukendi tsumulhwa omwa mubiiri wa Yehova.

² Okwa lhundi lhuhandi, wunewathabwirwa indi wukinayithagha erikolha esyombinduka wuthe wabatizibwa? Kutse nawu wukanalhangira iwutholere erikolha ekyo? Kyamabya ikwakiri kithya, isiwahwa amani. Wangana kulha-kulhana erihika oko kiika kikulhu ekyo, mbulha wuli mulere kutse mukulhu.

3. Omukulhu Omuetiopia mwabulya Filipo athiki, kandi ni kibulyo kyahi ekikabuthukaho? (Emibiri 8:36, 38)

³ Soma Emibiri 8:36, 38. Omukulhu Omuetiopia mwabulya Filipo omuthuli w’enjiri athi: “Ekyanga nyikakirya eribatizibwa ni kyahi kwehi?” Omulhume Omuetiopia mwanza eribatizibwa, aliwe kwenene anabya ayitheghekere ekiika kikulhu ekyo?

4. Omuetiopia mwakangania athi kw’anzire erilholha embere erigha?

⁴ Omulhume Omuetiopia “abya iniayire e Yerusalemu eriyaramya Nyamuhanga.” (Emib. 8:27) Atholere eribya iniabya iniabirihindukira omwa Kiyuda. Ahathe erithika-thika abya iniabirigha oku Yehova omwa Masako w’Ekihebrania awabuyirire. Aliwe abya iniakinanzire erigha bingyi. Filipo abere asanga-ngana n’omukulhu oyo okwa nzira, ni kyahi eky’asanga omulhume oyo inianemukolha? Abya inianemusoma omukunzo w’omuminyereri Isaya. (Emib. 8:28) Ebyo byabya byalya by’obunyakirimu ebikalha-kalire. Omukulhu oyo mwathasubulira okw’iminya esyongangirirya nyike esy’omusingyi; mwanza erilholha embere erigha.

5. Omuetiopia mwakolhaki busana n’ebyo igha?

⁵ Omulhume oyo abya mukulhu ahisi sy’omwami-kali Kandake ow’Etiopia; abya akabika “ebindu byosi by’omwami-kali.” (Emib. 8:27) Neryo atholere eribya iniabya mulhume oyuwithe esyongwamirwa nyingyi. Nomwabine, mwahiraho endambi y’eriramiryamo Yehova. Erithaminya ekwenene lisa mukithaghunza; mwaghendera okwa by’ak’igha. Neryo mwaghenda olhughendo lhwosi olho erilhua e Etiopia eriyaramya Yehova okwa hekalu e Yerusalemu. Olhughendo olho lhutholere eribya imulhwamuyithaghisyako endambi nene n’esyosente, aliwe omulhume oyo mwahiraho akaghalha bikahika okw’iramya Yehova.

6-7. Olhwanzo olho Omuetiopia aby’awithire Yehova mulhwalholha lhuthi embere eriyongera?

⁶ Omuetiopia mw’ighira oku Filipo kw’eyindi myatsi mikulhu emihyaka, imwamune n’eriminya Masiya nga nindi. (Emib. 8:34, 35) Ahathe erithika-thika, omukulhu oyu mwatsema kutsibu akaminya ebya Yesu abirimukolera. Angakolire kyahi? Anganathwiremo eriyibera ngoku ane, oyuwabya iniabirihindukira omwa Kiyuda kandi inianasikibirwe. Omwakanya k’ekyo, olhwanzo olhw’awithire Yehova na Mughalha wiwe mulhwongera. Mukyamusukuma erikolha erithwamu likulhu omwa ngebe ery’eribatizibwa ng’omwigha wa Yesu Kristo. Abere abilhangira ngoku omulhume oyo anayitheghekire, Filipo mwamubatizya.

⁷ Wamakwama eky’erileberyako ky’Omuetiopia ekyo, nawu iwangana yitheghekera eribatizibwa. Nawu iwukendi thoka eribugha iwunasikire wuthi, “Ekyanga nyikakirya eribatizibwa ni kyahi kwehi?” Thulebaye ngoku wangathwa ebiika ibyan’ebyo: Mwalholha embere erigha, amaghendera okwa by’ak’igha, n’erilholha embere erikulha-kulhania olhwanzo olhw’awithire Nyamuhanga.

8. Ebiri omu Yoane 17:3 bikakuhambako bithi?

⁸ Soma Yoane 17:3. Ebinywe bya Yesu ebi mubyanakuwathikya erithwamu erigha e Biblia? Byabiriwathikya abangyi omw’ithwe. Aliwe kandi, mbwino ebinywe ibyan’ebyo bikanathubwira bithi ithwalholha embere erigha? Ee. Sithwendi syaleka ‘eriminya Nyamuhanga mughuma ow’okwenene.’ (Omu. 3:11) Thukendi lholha embere erigha erihika kera na kera. Thukabya thuk’ongera erigha, kwa thukan’ongera thuthya eriyithunda hakuhi na Yehova.​—Esy. 73:28.

9. Thutholere ithwakolhaki enyuma w’eriminya ekwenene y’omusingyi?

⁹ Ni kwenene, erigha oku Yehova likatsuka okwa syongangirirya sy’omusingyi. Omwa baruha yiwe okwa Baebrania, omukwenda Paulo  mwakania okwa syongangirirya sy’omusingyi ‘ng’emyatsi y’erimbere.’ Abya isyalighaya “erikangirirya ly’eritsuka”; mwalinganisyalyo n’amabere awakaleka omwana iniakulha. (Ebr. 5:12; 6:1) Aliwe kandi mwabwira Abakristayo abosi athi sibasubulire okwa syongangirirya sy’omusingyi sisa aliwe balhole embere eriminya n’ekwenene y’omwakathi ey’Ekinywe kya Nyamuhanga. Mbwino wunakwire enzalha y’eriminya esyongangirirya sy’omwakathi esye Biblia? Wunanzire erilholha embere erikulha, erilholha embere erigha oku Yehova n’ebighendererwa biwe?

10. Busana naki sikiryolhobera abandi erigha?

¹⁰ Nomwabine, abangyi omw’ithwe sikirithwolhobera erigha. Kandi ibbwa iwe? Okwa sukuru, muwan’igha erisoma ndeke n’erianza erigha? Wanabya wukatsemera erigha kandi lyanabya likakughasira? Kutse muwanaghunzerera wuthi kikukalire erisoma ebitabu? Kyamabya ikwakiri kithya, siwuli iwuwene. Aliwe Yehova angana kuwathikya. Ahikene kandi ya Mukangirirya mubuya oyuwabirithabyaho.

11. Yehova akakanganaya athi ku ni “Mukangirirya”?

¹¹ Yehova akabugha athi ni “Mukangirirya” wawu. (Isa. 30:20, 21) Ni Mukangirirya oyukaghumisirizaya, ow’olhukeri, kandi oyukakanganaya obuyitheghererya. Akasondaya omwa bigha biwe mw’ebibuya. (Esy. 130:3) Kandi syalithuyithaghako bingyi kwilhaba ngoku thwanga thoka. Wibuke, mwakolha obwongo bwawu, ekihembo kibuyanga. (Esy. 139:14) Thuwithe eriyisunza ly’obuhangiranwa ery’erianza erigha. Omuhangiki wethu anzire ithwalholha embere erigha erihika kera na kera​—kandi ithwalitsemera. Neryo lino ni ky’amenge ‘erisonda kutsibu’ ekwenene ye Biblia. (1 Pet. 2:2) Hiraho ebilhubirirwa ebya wangahikako, kandi amakirira endegheka yawu y’erisoma e Biblia n’eriyeghesya. (Yos. 1:8) Omwa buwathikya bwa Yehova, iwukendi tsemera erisoma n’eryongera erimw’ighako.

12. Busana naki thutholere ithw’igha okwa ngebe n’erithulira lya Yesu?

¹² Mughulhu wosi hiraho endambi y’erighanirya okwa ngebe ya Yesu n’erithulira liwe. Ekyanga thuwathikya erikolera Yehova ly’erikwama olhughobe lhwa Yesu, kutsibu-tsibu omwa mughulhu owakalire ono. (1 Pet. 2:21) Ahathe eribisirira Yesu mwakania okwa bitsibu ebya bigha biwe bangabwene. (Lk. 14:27, 28) Aliwe abya inianayikethere ngoku abigha biwe ab’okwenene bangathokire, ngoku nayu athoka. (Yn. 16:33) Igha bingyi okwa ngebe ya Yesu, kandi yihirireho ebilhubirirwa by’erimugherererya omwa ngebe yawu eya buli kiro.

13. Ni kyahi ekya wutholere erilholha embere erisaba Yehova, kandi busana naki?

¹³ Eriminya lisa siririghunza. Omughaso walyu mukulhu y’emibere likakuwathikirayamo erigha bingyi oku Yehova n’erikulha-kulhania emibere ng’erimwanza n’erimw’ikirirya. (1 Kor. 8:1-3) Wukalholha embere erigha, ongera erisaba Yehova wuthi akanyaye erikirirya lyawu. (Lk. 17:5) Akasubiraya emisabe ng’eyo ahathe eriyikukumirira. Erikirirya ery’okwenene eriseghemere okw’iminya ndeke Nyamuhanga wethu likendi kuwathikya erikulha-kulhana.​—Yak. 2:26.

14. Omukwenda Petero mwakangania athi omughaso w’erighendera okwa bya thuk’igha? (Lebaya n’ekisasani.)

¹⁴ Omukwenda Petero mwakangania ngoku ni kikulhu abakakwama Kristo erilholha embere erighendera okwa bya bak’igha. Mwakania oko mwatsi we Biblia owahambire oku Noa. Yehova mwabwira Noa athi erilhabira omw’ighunga ly’amaghetse, akayathoghothaya abandu babi ab’omwa biro ebyo.  Erithaminya ngoku erighunga ly’amaghetse likayasa kyabya isikyanga leka Noa n’eka yiwe bakalhama. Wibuke ngoku Petero aby’akakania okwa mughulhu ogho ‘Noa abya akahimbiramo obwathu’ Erighunga ly’Amaghetse isiriri lyabya. (1 Pet. 3:20) Ni kwenene, Noa n’eka yiwe mubaghendera okwa bya bigha erilhua oku Nyamuhanga omw’ihimba obwathu bunene. (Ebr. 11:7) Neryo Petero mwalinganisya ebyo Noa akolha n’olhubatizo, akahandika athi: “Omwatsi oyo ni kisosekanio ky’olhubatizo busana n’erilhama lyenyu.” (1 Pet. 3:21) Ni bugha ambu, thwangana linganisya ebya wukakolha lino eriyitheghekera eribatizibwa n’omubiiri ogho Noa n’eka yiwe bakolha ahabw’emyaka bakahimba obwathu. Ni byahi ebya wutholere erikolha nuku wuyitheghekere eribatizibwa?

15. Eriyisubamu ly’okwenene mwamuliki?

¹⁵ Ekighuma ky’okwa bindu by’erimbere-mbere ekya thutholere erikolha ly’eriyisubamu erilhua okwa muthima. (Emib. 2:37, 38) Eriyisubamu ly’okwenene likakolhaya okw’ikolha embinduka y’okwenene. Wunewaleka omutse wosi-wosi owakaponesaya Yehova, ng’eribya omwa ngebe y’obutswatswa, erinywa ethaba, kutse erikolesya ebinywe by’ebitsumi? (1 Kor. 6:9, 10; 2 Kor. 7:1; Efe. 4:29) Wamabya isiwuli wakolha ekyo, lholha embere erilengaho erikolha esyombinduka. Kanaya n’oyukakweghesaya e Biblia, kutse saba abasyakulhu b’ekithunga b’obuwathikya n’obusondoli. Wamabya iwuli mulere kandi iwukine eka n’ababuthi bawu, lholha embere eribasaba obuwathikya bw’erileka omutse mubi awangakukakirya okw’ibatizibwa.

16. Endegheka eyuwene y’obunyakirimu mwamuliki?

¹⁶ Kandi ni kikulhu erikwama-kwamania endegheka eyuwene ey’obunyakirimu. Ekyo mwanganabya erihindana okwa mihindano n’erisangira muyo. (Ebr. 10:24, 25) Kandi wamabiritholera erisangira omwa mubiiri w’Ekikristayo ow’erithulira, hiragho okwa ndegheka yawu. Wukendibya wunemwongera erisangira omwa mubiiri ow’akalhamaya esyongebe oyo, kwa wunemwendyongera wuthya eritsemeragho. (2 Tim. 4:5) Wamabya iwukine mulere kandi iwukine eka, yibulhaye: ‘Mbwino ababuthi baghe bakatsuka erinyibukya imunahindana okwa mihindano kutse  erisangira omw’ithulira? Kutse nganayibukaya ingyuwene-wene?’ Omw’ikolha ebindu ng’ebyo ahabwawu, wukabya iwukakanganaya erikirirya lyawu n’olhwanzo ebya wuwithire Yehova Nyamuhanga kandi ku wukamusima. Eyi ni mibiiri ‘y’erikenga Nyamuhanga,’ ebihembo ebyo wukaha Yehova. (2 Pet. 3:11; Ebr. 13:15) Ebihembo byosi ebyo thukahayo ithunanzire kandi ahathe erikakwa bikatsemesaya Nyamuhanga wethu. (Thasyalebaya na 2 Abanya Korinto 9:7.) Thukakolha ebi kundi thwanzire eriha Yehova ebyuwene kutsibu.

17-18. Ni mubere wahi mukulhu owakendi kuwathikya erikulha-kulhana erihika okw’ibatizibwa, kandi busana naki? (Matayo 22:37)

¹⁷ Wukendibya wunemulholha embere erikulha-kulhana erihika okw’ibatizibwa, wukendi bana ebitsibu. Abandi bakendi kusiningulira busana n’erikirirya lyawu erihyaka; nibya bangana kuhakanisya kutse erikwendererya. (2 Tim. 3:12) Wukendibya wunemulengaho erirwanisya omubere mubi, iwangana yisanga iwabirithasyasubiragho. Kutse iwangana lemwa erighumisirizya kandi iwayiponera kundi wamabya nga siwathahika lhuba okwa kilhubirirwa kyawu. Ni kyahi ekyanga kuwathikya erighuma? Omubere mukulhu​—erianza Yehova.

¹⁸ Olhwanzo olhwa wuwithire Yehova ni mubere mubuyanga, ekindu kibuyanga ekyo wuwithe. (Soma Matayo 22:37.) Olhwanzo olhukamathire olhwa wuwithire Nyamuhanga lhwangana leka iwaghumira ndeke ebitsibu ebya wukabana. Mughulhu mungyi e Biblia yikakanaya okwa lhwanzo olhuthyusa olho Yehova awithire abaghombe biwe. Obu ni bughuma obukamathire obuthe bwanga thwika, obuthe bwangahwaho. (Esy. 100:5) Wuhangikirwe omwa kisosekanio kya Nyamuhanga. (Enz. 1:26) Wanga kangania wuthi olhwanzo olhuli ng’olho?

19. Wang’ongera wuthi erisima ebyosi ebyo Yehova abirikukolera? (Abanya Galatia 2:20)

¹⁹ Tsuka omw’ibya oyukasima. (1 Tes. 5:18) Obuli kiro, yibulhaye, ‘Yehova abirikangania athi kw’anyanzire?’ Neryo lhangira wuthi wukasima Yehova omwa misabe yawu, eryahulha ebindu ebyonyine-nyine ebyo abirikukolera. Lhangira emibiiri yiwe y’olhwanzo nga niwe akolerayo, ngoku omukwenda Paulo ayilhangirira ekyo oku Yehova. (Soma Abanya Galatia 2:20.) Yibulhaye, ‘Ngananzire erimukangania  naghe ku ngamwanzire?’ Olhwanzo olho wuwithire Yehova lhukendi leka iwalholha embere erirwanisya erilengwako n’erighumira ndeke ebitsibu ebyawukabana. Lhukendi leka iwamakirira endegheka yawu y’obunyakirimu, eribera erikangania obuli kiro ku wanzire Thatha wawu.

20. Eriyihayo oku Yehova mwamuliki, kandi ni thwamu likulhu lithi?

²⁰ Endambi yikendi hika, olhwanzo olhwa wuwithire Yehova ilhwaleka iwaha omusabe w’embaghane. Wukendi yihayo oku Nyamuhanga. Wibuke, wamabiriyihayo oku Yehova, wukabya n’amaha mabuyanga ano: Eribya wiwe kera na kera. Eriyilhagha ly’eriyihayo oku Yehova likaleka iwayiyinia omwa mibere yosi. Siririyithagha erithasyasubwamo. Ni kwenene, thukabya thukayihayo, thukabya ithwamathwa ekiika kikulhu kutsibu. Aliwe, thalengekania oku kino: Wukendi kolha erithwamu lingyi omwa ngebe, erindi iryuwana kutsibu, aliwe sihali erind’ithwamu erya wukendi syakolha erilengire ery’eriyihayo oku Yehova. (Esy. 50:14) Sitani akendi lengaho eritsekya olhwanzo olho wuwithire Thatha wawu, inianawithe amaha athi wukendi leghulha. Isiwaleka Sitani akasinga! (Yobu 27:5) Olhwanzo lhunene olho wuwithire Yehova lhukendi leka iwamakirira eriyihayo lyawu n’erilholha embere eriyithunda hakuhi na Thatha wawu w’elhubulha.

21. Busana naki ithwabugha thuthi olhubatizo si ghunza aliwe ni tsuka?

²¹ Enyuma w’eriyihayo oku Yehova, kanaya n’abasyakulhu b’ekithunga kyenyu okwa kindi kiika kikulhu ky’erihikako. Aliwe, mughulhu wosi, wibuke ngoku olhubatizo si ghunza, ni tsuka. Ni nzuko y’engebe ey’erikolera Yehova erihika kera na kera. Neryo lino ghumaya olhwanzo olho wuwithire Thatha wawu. Yihirireho ebilhubirirwa by’erighumya olhwanzo lhwawu obuli kiro. Erikolha ebi likendi kuhikya okw’ibatizibwa. Ekyo kikendisyabya kiro kibuyanga. Aliwe eryo likendi syabya ini tsuka. Ambi olhwanzo olho wuwithire Yehova na Mughalha wiwe ilhwalholha embere eryongera erihika kera na kera!