1-2. Omundu atholere iniakolhaki athali abatizibwa?

 AHABW’EMYAKA ithano eyihwere, abandu abalhabire omu muliyoni babiribatizibwa eribya Bema ba Yehova. Abangyi b’okw’ibo, ng’omwigha Timoteo ow’omwa kighana ky’erimbere bakangiriribawa ekwenene “eritsuka omo bwana.” (2 Tim. 3:14, 15) Abandi baminya Yehova ibanakulire, abandi nibya ibabirikekelhuha. Myaka mirebe enyuma, omukali oyo Abema ba Yehova b’eghesaya e Biblia mwabatizibwa iniawithe myaka 97!

² Wamabya iwuli mwigha we Biblia kutse ababuthi bawu ini Bema, wunemulengekania okw’ibatizibwa? Ekyo ni kilhubirirwa kibuyanga! Aliwe, wuthe wabatizibwa, wutholere iwatsuka eriyihayo oku Yehova. Omwatsi ono akendi soborera eriyihayo nga likamanyisayaki. Kandi akendi kangania ekyangaleka iwuthasagha erithwa ekiika ekyo, kuthya n’eribatizibwa, wukahika w’erikolha ekyo.

ERIYIHAYO NIKI?

3. Iha eby’erileberyako bye Biblia eby’abandu abahebawayo oku Yehova.

³ Omwa Biblia, eriyihayo kikamanyisaya erihighulhwa busana n’ekighendererwa ekibuyirire. Abaisraeli babya kihanda ekiyihereyo oku Yehova. Aliwe abandi omwa kihanda ekyo babya bayihereyo oku Yehova omwa nzira y’embaghane. Ng’eky’erileberyako, Haruni iniakambalha “akakira kabuyirire” ak’eriyihayo—akapande k’esyamaghetse akakakangabasanaya akabya kakabya okwa kitambara kiwe kw’embere. Akapande k’esy’amaghetse ako ikakakanganaya ngoku ahiwirwe erikolha olhukwamirwa lhw’embaghane—ng’omuhereri mukulhu w’Abaisraeli. (Law. 8:9) N’Abanaziri nabu ibayihereyo oku Yehova  omwa nzira y’embaghane. Ekinywe “Omunaziri,” ekilhuire omwa kinywe ky’Ekihebrania nazirʹ, kikamanyisaya “Oyuhiwirwe,” kutse “Oyuhebirweyo.” Abanaziri babya b’erighendera okwa bikakiryo ibyahirawaho busana nabo ebyabya omwa Mighambo ya Musa.—Emig. 6:2-8.

4. (a) Ni mwanziraki abayihereyo oku Yehova bahiwirwe busana n’ekighendererwa ekibuyirire? (b) Kikamanyisayaki ‘eriyighana’? (Lebaya n’ekisasani.)

⁴ Wukabya wukayihayo oku Yehova, wukabya iwamathwamu eribya mwigha wa Yesu Kristo n’erilhangira erikolha erisonda lya Nyamuhanga mwa kikulhu kutsibu omwa ngebe yawu. Eriyihayo ly’Ekikristayo likendi kuyithagha kwaki? Yesu mwabugha athi: “Omundu amanza erinyikwama, ayighane.” (Mt. 16:24) Ekinywe ky’Ekigiriki ekyahindulhawamo “ayighane” kyangana thasyahindulhwa mwa “erithendibyaho busana nawu iwuwene-wene.” Iwe ng’omughombe wa Yehova oyuyihereyo, wukendi yithagha erighana ekyosi-kyosi ekithehambangana n’erisonda liwe. (2 Kor. 5:14, 15) Ekyo mwamuli erighana ‘emikolere y’omubiri,’ ng’obusingiri. (Gal. 5:19-21; 1 Kor. 6:18) Mbwino ebikakiryo ng’ebyo bikendi kukalirya engebe? Ekyo sikyangabya wamabya iwunanzire Yehova kandi iwunalighire ngoku ebihano biwe ni by’erikughasira. (Esy. 119:97; Isa. 48:17, 18) Mughalha wethu Nicholas akakanaya kubyo omwa nzira eno, “Wangana lhangira ebihano bya Yehova ng’olhughuthu lhw’engomo olhukakukakiraya okw’ikolha ebya wanzire kutse ng’olhukakutheghaya okwa ndale erikukolha nabi.”

5. (a) Wukayihayo wuthi oku Yehova? (b) Ni mbaghane yahi eyiri ahakathi-kathi k’eriyihayo n’eribatizibwa?(Lebaya n’ekisasani.)

⁵ Wukayihayo wuthi oku Yehova? Wukamulhagha omwa musabe wuthi wukendi muramya iyo musa kandi wuthi erisonda liwe ly’erikendibya embere omwa ngebe yawu. Omo  kwenene, wukabya iwamalhagha Yehova wuthi wukendi lholha embere erimwanza “n’omuthima wawu wosi, n’ekirimu kyawu kyosi, n’obulengekania bwawu bwosi, n’amaaka wawu wosi.” (Mk. 12:30) Eriyilhagha lyawu wukalikolha iwune iwuwene, likabya ahakathi-kathi kawu na Yehova. Mbaghane n’ekyo, eribatizibwa likakolhawa embere sy’abandu; likakanganaya abandi ngoku wabiriyihayo. Eriyihayo lyawu ni yilhagha libuyirire, kandi Yehova anzire iwaliberererya, ngoku nawu wunakyanzire.—Omu. 5:4, 5.

BUSANA NAKI IWAYIHAYO OKU YEHOVA?

6. Ni kyahi ekikahira omo mundu mw’omuhwa w’eriyihayo oku Yehova?

⁶ Enzumwa ngulhu eyikaleka iwayihayo oku Yehova yiri yithi wumwanzire. Olhwanzo lhwawu silhuseghemere okw’iyowa lisa. Omwakanya k’ekyo, lhw’imanire okw’iminya erihikire n’eriyitheghererya eby’obunyakirimu, ery’emyatsi eyo w’igha oku Yehova eyaleka olhwanzo olhwa wumuwithire ilhw’ongera. (Kol. 1:9) Eriyeghesya lyawu ly’Amasako lyabirikulighisya (1) ngoku kwenene Yehova aneho, (2) ngoku e Biblia ni Kinywe kiwe ekyasondolibawa, na (3) ngoku akakolesaya ekithunga kiwe eriberererya erisonda liwe.

7. Ni byahi ebya thutholere ithwabya ithunemukolha thuthe thwayihayo oku Nyamuhanga?

⁷ Abakayihayo oku Yehova batholere ibaminya esyongangirirya sy’omusingyi esiri omwa Kinywe kya Nyamuhanga kandi ibaghendera okwa bihano byakyo. Bakabwira abandi okwa ebya bikirirye emibere eyo balimo yamabalighira. (Mt. 28:19, 20) Olhwanzo olhwa bawithire Yehova lhwabiryongera, kandi banzire ibaramya Yehova musa. Mbwino nawu  kwabine bithya? Wamabya n’olhwanzo olhuli ng’olhu, isiwendi lhangira eriyihayo n’eribatizibwa ng’ekindu ekya wukakolha erithanza eritsemesya omukangirirya wawu we Biblia kutse ababuthi bawu; kutse eribilhangira ng’ekindu ekyawukakolha nuku wulingirirane omwa banywani bawu.

8. Erisima likakuhiramo lithi omuhwa w’erithwamu eriyihayo oku Yehova? (Esyonyimbo 116:12-14)

⁸ Erithwamu eriyihayo oku Yehova ni kindu ekikayiretha wukalengekania okwa byosi ebyo abirikukolera. (Soma Esyonyimbo 116:12-14.) E Biblia yihikire yikakania oku Yehova ng’Oyukaha “obuli lhusunzo lhubuya n’obuli lhusunzo lhuwene.” (Yak. 1:17) Olhusunzo kutse ekihembo ekilengireyo ky’ekihongo kya Mughalha wiwe, Yesu. Nawu thakilengekaniako! Endongolya yabirileka ikyathokekana iwe eribya n’obughuma bw’ahakuhi na Yehova. Kandi abirikuha amaha w’erisyabyaho kera na kera. (1 Yn. 4:9, 10, 19) Eriyihayo oku Yehova ni enzira y’erikanganiryamo ku wukasima olhwanzo lhunene olhwabirithakanganibwa, kuthya n’eyindi mighisa eyosi eyo Yehova abirikuha. (Ebi. 16:17; 2 Kor. 5:15) Erisima ng’eryo likanganibwe omw’isomo 46 enzumwa 4, ery’ekitabu Tsemera Engebe Kera na Kera! omuli evidiyo y’esyodakika isathu eya Erilethera Nyamuhanga y’Ebihembo Byawu.

WANAMABIRIHIKA ERIYIHAYO N’ERIBATIZIBWA?

9. Busana naki omundu syatholere akayowa iniamakakwa eriyihayo?

⁹ Wangana yowa nga siwuli wahika eriyihayo n’eribatizibwa. Obundi wukinayithagha erikolha esyombinduka omwa ngebe yawu nuku wughenda-ghendanaye n’ebihano bya Yehova, kutse obundi wukinayithagha obuthuku erighumya erikirirya lyawu. (Kol. 2:6, 7) Abigha abosi sibali kulha-kulhanira okwa lhulengo lhughuma, n’abaana abosi sibalitholera eriyihayo n’eribatizibwa okwa myaka mighumerere. Lengaho erilebya erikulha-kulhana lyawu ly’obunyakirimu erikwamana n’ebya wukathoka erikolha butsira omw’iyilinganisya n’abandi.—Gal. 6:4, 5.

10. Wangakolhaki wamalhangira wuthi siwuli wahika eriyihayo n’eribatizibwa? (Lebaya n’akasanduko “ Okw’abo Abanemukulibirwa Omwa Kwenene.”)

¹⁰ Nomuwangayowa nga siwuli wahika eriyihayo oku Yehova, lhangira wuthi ekyo kikabya inina kilhubirirwa kyawu. Saba Yehova atsumule akaghalha ako wukahiraho erikolha esyombinduka esikayithaghisibawa. (Fil. 2:13; 3:16) Iwangana yikethera ngoku akendyowa erisaba lyawu kandi kw’akendi kusubirya.—1 Yn. 5:14.

EKIKALEKA ABANDI IBASAGHA

11. Yehova akendi thuwathikya athi erisighalha bathaleghulha okw’iyo?

¹¹ Abandi abanabirihika eriyihayo n’eribatizibwa bakanasagha. Bangana yibulya bathi, ‘Ibbwa enyuma waho namasyakolha erilholho erikalire neryo ingahighithwa?’ Wamabya iwuwithe obuba obo, yikethere ngoku Yehova akendi kuha obuli ekya wukayithagha “erilendera ngoku Mukama anzire, n’erikolha ebiro byosi ebikamutsemesaya.” (Kol. 1:10) Akendi kuha n’amaaka w’erikolha ekihikire. Abirisangwa akangania ngoku anganakolha ekyo omwa mibere abirikolonganiramo n’abandi bangyi. (1 Kor. 10:13) Eyo y’enzumwa nguma eyikaleka abake kutsibu ibabya ibabakahighithawa omwa kithunga ky’Ekikristayo. Yehova akaha abandu biwe b’ebyabakayithagha erithoka erisighalha bathaleghulha.

12. Thwanga yihighulha thuthi okw’ikolha erilholho erikalire?

¹² Obuli mundu oyuthahikene akalengawako erikolha ebithuwene. (Yak. 1: 14)  Aliwe, mbulha wamaligha erighendera okw’ilengwako eryo—erithwamu ni ryawu. Ekwenene yiri yithi erighunzerera n’iwe wangathwamu nga wukendi kolesya wuthi engebe yawu. Nomwakine indi abandi bangana bugha bathi sithuwithe ekya thwangakolha okw’amalengekania aw’akathwasamo, wangan’igha eriyikakirya. Kandi nomwakine indi amalengekania mabi anganabya inianemukwasamo, wangana yikakirya okw’ighendera kugho. Busana n’ekyo, saba obuli kiro. Ghenda-ghendanaya n’endegheka yawu eyuwene ey’eriyeghesya Ekinywe kya Nyamuhanga. Hindana okwa mihindano y’Ekikristayo. Bwira abandi okwa ebya wikirirye. Erithwa ebiika ebi mughulhu wosi kikendi kuha amaaka w’erighendera okw’iyilhagha lyawu ly’eriyihayo. Kandi isiw’ibirirawa ngoku Yehova akendi kuwathikya erikolha ekyo.—Gal. 5:16.

13. Ni ky’erileberyako kyahi kibuya ekya Yozefu abirithuhiriraho?

¹³ Ikikendi kw’olhobera erighendera okw’iyihayo lyawu wamasangwa wathwamu ebya wangakolha wukalengwako. E Biblia yikathubwira okwa bandu abo ahathe erithika-thika bakolha ekyo, nomwakine indi nabu babya bandu abathahikene. Ng’eky’erileberyako, muka Potifari mwabera erithetha Yozefu. Aliwe mwasighalha inianamakirire erithwamu liwe. E Biblia yikathubwira yithi “mwaghana,” n’eribugha athi: “Nangakolha erilholho lingaha eri lyo nyithi, n’erihalya oku Nyamuhanga kwehi?” (Enz. 39:8-10) Omo kwenene, Yozefu abya inianasi ekyo angakolha nibya n’omukali oyo athali amulengako. Ekyo mukyaleka ikyamw’olhobera erikolha ekihikire akalengwako.

14. Thwang’igha thuthi erighana erikolha ebithuwene?

¹⁴ Wanga kangania wuthi erithwamu ng’erya Yozefu? Wanganathwamu lino ekyawanga kolha wamalengwako. Igha erighana aho n’aho ebindu ebya Yehova aponire, nibya n’erileka eribilengekaniako. (Esy. 97:10; 119:165) Omwa nzira eyo isiwendi bulha eky’erikolha wukalengwako. Iwukendibya iwunasi eky’erikolha. Iwukendibya iwunasi enzira ey’erikwama.

15. Omundu angakangania athi ‘kw’anemusonda-sonda’ Yehova? (Abaebrania 11:6)

¹⁵ Okw’iwe, wanganabya iwunasi ku wabiribana ekwenene kandi ngoku wanzire erikolera Yehova n’omuthima wawu wosi, aliwe ihabya ihakine ekikaleka iwasagha eriyihayo n’eribatizibwa. Iwangana lengekania okwa ky’erileberyako  ky’Omwami Dawudi. Iwangana lemba-lemba Yehova wuthi: “Iwe Nyamuhanga, wunyirengeko, wuminye obulengekania bwaghe; wunyirengeko, wuminye amalengekania waghe. Wusondaye nga hane eritheba omwisi waghe, wunyisondole omwa nzira y’erikotha.” (Esy. 139:23, 24) Yehova akatsumulha “abakamusonda-sonda.” Erikolha kutsibu nuku wuhike okwa kilhubirirwa ky’eriyihayo n’eribatizibwa kikamukanganaya ku wunemukolha ikyan’ekyo.—Soma Abaebrania 11:6.

LHOLHA EMBERE ERIYITHUNDA HAKUHI NA YEHOVA

16-17. Yehova akayilethako athi abanemukulibirwa omwa kwenene? (Yoane 6:44)

¹⁶ Yesu mwabugha athi abigha biwe bakalethawa na Yehova. (Soma Yoane 6:44.) Thalengekania ekyo nga kikaswekaya bungahi kandi nga kikakuhambako kithi. Yehova akalhangira omwa buli mundu oyo akayilethako mw’ekindu kibuya. Akalhangira obuli mundu mwa w’obughuli. (Ebi. 7:6) Kwabine bithya n’okw’iwe.

¹⁷ Aliwe, kyanganabya indi wuli mulere oyunemukulibirwa omwa kwenene. Iwangana yowa nga wukasukumawa. Nomwabine, e Biblia yikabugha yithi: “Muyithunde hakuhi na Nyamuhanga, nayu akendiyithunda hakuhi nenyu.” (Yak. 4:8; 1 Emy. 28:9) Wamalengaho eriyithunda hakuhi na Yehova, nayu iniakendi yithunda hakuhi nawu. Yehova syalikwama kyakulhangira ng’omughuma w’okwa gurupu. Akaletha obuli mughuma—imwamune n’obuli mundu oyunemukulibirwa omwa kwenene. Omundu ng’oyo akabya akatsuka eriyithunda hakuhi na Yehova, Nayu kw’akanakolha ekyo ky’athya, ngoku kiri omu Yakobo 4:8.—Thasyalebaya na 2 Abanya Tesalonika 2:13.

18. Thukendi syakania okuki omo mwatsi ow’akakwamako? (Esyonyimbo 40:8)

¹⁸ Wukabya wukayihayo oku Yehova n’eribatizibwa, wukakanganaya omuthima ng’owa Yesu. Ahathe erikakwa mwayihayo oku Thatha wiwe erikolha ekyosi-kyosi ekyabya akabugha athi akole. (Soma Esyonyimbo 40:8; Ebr. 10:7) Omo mwatsi owakakwamako, thukendi syakania okwa bikendi kuwathikya erilholha embere erikolera Yehova buthaleghulha n’enyuma w’eribatizibwa.