1-2. (a) Paulo abya omwa mibereki akahandikira abanya Efeso b’ebaruha? (b) Ni bibulyo byahi ebyo thukendi kaniako?

 OMUKWENDA Paulo inianaboherwe omwa nyumba yiwe mwe Roma, mwanza erihira omwa bikirirya balikyabo mw’omuhwa. Abya isyanga babungira busu oko busu, neryo iniakabahandikira esyobaruha. Mwahandikira abanya Efeso b’enguma y’okwa syobaruha esi ng’omwa 60 kutse 61 E.K.​—Efe. 1:1; 4:1.

² Hakuhi myaka ikumi enyuma, Paulo abya iniamabirighunza e Efeso y’obuthuku bulebe, inianemuthulha n’erikangirirya abandu b’engulhu yuwene. (Emib. 19:1, 8-10; 20:20, 21) Aby’anzire balikyabo ba kutsibu kandi mwanza eribawathikya erisighalha bathaleghulha oku Yehova. Aliwe ni kyahi ekyaleka iniahandikira Abakristayo abahakabibwa ebihambire okwa mwirimya n’ekyakakalha? Kandi ni masomo wahi agho Abakristayo bosi bang’ighira okw’ihabulha eri? Leka thulebaye eby’erisubirya oko bibulyo ebi.

ERILHUA OMWA MWIRIMYA ERISUBA OMWA KYAKAKALHA

3. Ni binywe byahi ebya Paulo akolesaya omwa baruha yiwe okw’abanya Efeso?

³ Paulo mwahandikira Abakristayo abe Efeso athi: “Kera mwabya omo mwirimya, nikwa lino muli omo kyakakalha.” (Efe. 5:8) Hano Paulo mwakolesya ekinywe omwirimya n’ekyakakalha erisoborera eribya wa mbaghane kutse erihindulha emibere. Thulebaye ekyangabya iky’ekyaleka Paulo iniabugha athi kera abanya Efeso ‘babya omo mwirimya.’

4. Ni mwa nziraki abanya Efeso babya omwa mwirimya w’edini?

⁴ Omwirimya w’esyodini. Bathe baminya ekwenene n’eribya Bakristayo, abanya Efeso abo Paulo ahandikira babya ibabiribya  bakobe b’esyongangirirya sy’amadini w’amabehi n’ebihaniriro byasyo. Omuyi we Efeso abya mw’ehekalu eyasibwe eya Artemi, eyo abakera babya basi bathi ni nguma y’okwa bindu musanju ebikaswekaya omwa kihugho. Abandu ababya bakaramiryayo ibanzire kutsibu eriramya esyosanamu. Erikolha esyosanamu sy’emyaliro y’edini y’amabehi y’enyamuhanga y’obukali Artemi n’erighulyasyo yabya bbizinesi eyik’ingiraya kutsibu. (Emib. 19:23-27) Eryongera okw’ekyo, omuyi oyo aby’asibwe ng’owakakolerawamo eby’emajiki.—Emib. 19:19.

5. Ni mwa nziraki abanya Efeso babya omwa mwirimya w’eby’esyongeso?

⁵ Omwirimya omwa by’esyongeso. E Efeso yabya yasibwe ng’eyoswire mw’obusingiri n’emibere mibi. Ebinywe ebithisirire kutse eby’ebitsumi ibikowibawa kutsibu ahakabera emisathu omwa muyi oyo kandi nibya n’okwa mikonga y’edini. (Efe. 5:3) Abangyi b’okwa bandu b’eyo ‘isibekwa esisoni,’ ebinywe ebyo eribithwalha ngoku bine bikamanyisaya “eribya kihirithi.” (Efe. 4:17-19) Bathe baminya ekyonyine-nyine ekihikire kutse ekiwire, obunya muthima-thima bw’abanya Efeso isibuli bahandikirira kutse isibali lengekanaya bathi bali kw’olhubanza embere sya Yehova. Kyaleka Paulo iniabakaniako athi “amenge wabo ni mwirimya. Babirighabana n’engebe ya Nyamuhanga.”

6. Ni kyahi ekyaleka Paulo iniabwira abanya Efeso athi “lino muli omwa kyakakalha”?

⁶ Nomwabine, abandi banya Efeso mubathasighalha omwa mwirimya. Paulo mwahandika athi “lino muli omo kyakakalha ky’Omukama.” (Efe. 5:8) Babya ibabiryangirira ekyakakalha ky’ekwenene y’Amasako. (Esy. 119:105) Abanya Efeso aba babya ibabirisighania emikolere y’amadini wabo w’amabehi n’eby’obutswatswa. Babya ‘ibabirigherererya’ Nyamuhanga kandi ibanemukolha ekyosi-kyosi ekya bangathoka eriramya Yehova n’erimutsemesya.—Efe. 5:1.

7. Emibere eyathulimo yisosene yithi n’ey’Abakristayo bangyi abe Efeso?

⁷ Omwa nzira iyan’eyo, nethu thuthe thwaminya ekwenene, thwabya omwa mwirimya w’esyodini n’ow’eby’esyongeso. Abandi b’okw’ithwe babya bakasangira omwa biro  bikulhu by’amadini; abandi babya omwa ngebe y’obutswatswa. Aliwe thwabere thwabiriminya ebihano bya Yehova ebihambire okwa kihikire n’ekiwire, muthwakolha esyombinduka. Muthwatsuka erihambania engebe yethu n’ebihano biwe ebithunganene. Busana n’ekyo thwabiribana emighisa mingyi. (Isa. 48:17) Nomwabine, lino thunemubana ebitsibu. Thutholere ithwaseghera haali okwa mwirimya ogho thwabirisighania ‘n’erisiba ng’abaana b’ekyakakalha.’ Thwanga kolha ekyo kya thuthi?

YIHIGHULE OKWA MWIRIMYA

8. Ngoku kiri omwa Abanya Efeso 5:3-5, abanya Efeso babya batholere ibayihighulha okuki?

⁸ Soma Abanya Efeso 5:3-5. Erithoka eriyihighulir’ighuma okwa mwirimya w’eby’esyongeso, Abakristayo be Efeso babya b’erilholha embere erighana emitse eyikaponesaya Yehova. Ekyo mwabya imwamuli eby’obusingiri n’emibughire eyithisirire. Paulo mw’ibukya abanya Efeso athi batholere ibayihighulha okwa bindu ng’ebi bamabya b’erisyasangira “omo Bwami bwa Kristo na Nyamuhanga.”

9. Busana naki thutholere ithwaghana ekyosi-kyosi ekyanga thukolya okwa busingiri?

⁹ Nethu thutholere ithwalholha embere eriyihighulha okw’isangira omwa “emibiiri y’omwirimya eyithe n’endundi.” (Efe. 5:11) Mughulhu mungyi, ebyalholirweko byabirikangania ngoku omundu akabya ak’ongera erisamalira, erihulikirira, kutse erikania okwa bithisirire, eby’obutswatswa, kwa kikanamw’olhobera kithya erikolha ekibi. (Enz. 3:6; Yak. 1:14, 15) Omwa kihugho kighuma, balikyethu bangyi mubabya “banywani” erilhabira omwa gurupu y’okwa mithahulha y’enganirania. Okw’itsuka, abangyi omw’ibo ibakakanaya okwa myatsi y’obunyakirimu. Aliwe endambi yabere yinemulhaba emikanirye yamatsukiraho eritsanda. Mubatsuka eribya bakakania okwa by’emyatsi y’engyingo. Enyuma waho abangyi b’okw’ibo mubaligha ngoku emikanirye eyithuwene eyi muyabakolya okw’ikolha obusingiri.

10. Sitani akalengaho athi erithutheba? (Abanya Efeso 5:6)

¹⁰ Ekihugho kya Sitani kikalengaho erithutheba, erileka thw’ikiriraye thuthi ebya Yehova akabugha athi ni by’obutswatswa kandi athi biwire si bibi nahake. (2 Pet. 2:19) Eki sikirithuswekaya! Ekighuma ky’okwa bithegho ebya Diabolo abiribya inianemukolesya ly’eribuzya-buzya abandu nuku sibathoke eriminya ekihikire n’ekiwire. (Isa. 5:20; 2 Kor. 4:4) Kwesi ky’ekikaleka syofilimu nyingyi, esyotivi, n’emithahulha ibyakulha-kulhania amalengekania awahukene n’ebihano bya Yehova ebithunganene! Sitani akalengaho erithutheba nuku thulengekanaye thuthi emitse n’emibere y’engebe eyithuwene sibirisubulira okw’ibya ibikalighawa aliwe kandi bikatsemesaya kandi sibiwithe butsibu.—Soma Abanya Efeso 5:6.

11. Ekyalholirweko kya Angela kikakanganaya kithi ekiyithawa ky’erighendera okw’ihabulha ly’amenge eriri omwa Abanya Efeso 5:7? (Lebaya n’ekisasani.)

¹¹ Sitani anzire ithwanywana abandu abakendi leka ikyathukalira eryamakirira ebihano bya Yehova. Ekyo ky’ekyaleka Paulo iniahabulha abanya Efeso athi: “Neryo simusangane nabo,” ni bugha ambu, abakakolha ebithisirire embere sya Nyamuhanga. (Efe. 5:7) Thutholere ithw’ibuka ngoku banywani bethu s’ibo thukabya nabo busu okwa busu basa. Aba mwamuli abo thukakaniranaya nabo okwa mithahulha y’enganirania, ekitsibu ekyo abanya Efeso bathabya bawithe. Angela, a oyuwikere e Asia, mwaminya  ngoku emithahulha y’enganirania yanganabya y’akabi. Akaligha athi: “Kyanganabya kithegho, omw’ithendi minya ikyaleka amaaka wethu w’erilengekania iniabya isyangathasyakolha. Endambi muyahika namabya isingakikilhangira mwa kitsibu eribya ‘n’abanywani’ abathasikirye emisingyi ye Biblia. Erighunzerera, munatsuka erilengekania indi sikiwithe butsibu eribya omwa ngebe eyithetsemesaya Yehova.” Eky’obutseme, abasyakulhu b’olhwanzo mubawathikya Angela erikolha esyombinduka esikayithaghisibawa. Akabugha athi: “Lino ng’usulhaya omwa bulengekania bwaghe mw’emyatsi y’obunyakirimu omwakanya k’emyatsi y’emithahulha y’enganirania.”

12. Ni kyahi ekikendi thuwathikya eryamakirira ebihano bya Yehova ebihambire okwa kihikire n’ekiwire?

¹² Thutholere ithwarwanisya amalengekania w’ekihugho w’eribugha indi obutswatswa bukalighawa. Thunasi kw’awire. (Efe. 4:19, 20) Kyuwene eriyibulya thuthi: ‘Nganayihighulira ighuma okw’ibya n’amanywani wosi aw’athatholere n’abo ngakolha nabo, abo ngasoma nabo, kutse abandi abathe sikaya ebihano bya Yehova ebithunganene? Buthubaha nganaghendera okwa bihano bya Yehova nomwakine indi abandi bakendi nyahulhamo mukiru habw’erikolha ekyo?’ Kandi ngoku kiri omu 2 Timoteo 2:20-22, thwangana yithagha eriyitheya thukasombolha abanywani bethu b’okwa ndungu omwa kithunga ky’Ekikristayo. Thukabya ithun’ibukire ngoku abandi bangana ghana erithuwathikya erisighalha bathaleghulha omwa mubiiri wa Yehova.

MULENDERE “NG’ABAANA B’EKYAKAKALHA”

13. Kikamanyisayaki erisiba “ng’abaana b’ekyakakalha”? (Abanya Efeso 5:7-9)

¹³ Paulo mwahira omw’Abakristayo be Efeso mw’omuhwa athi isibasubulira okw’ighana omwirimya aliwe kandi athi ‘basibe ng’abaana b’ekyakakalha.’ (Soma Abanya Efeso 5:7-9.) Ekyo kikamanyisayaki? Omwa bikuhi, kikamanyisaya eribya n’emibere y’Abakristayo ab’okwenene mughulhu wosi. Enzira nguma y’erikoleramo eki ly’erisoma n’eriyeghesya e Biblia n’ebitabu byethu ebiseghemere okwa Biblia n’omuhwa. Kutsibu-tsibu ni kikulhu eriyithendya okwa ky’erileberyako n’esyongangirirya sya Yesu Kristo, “ekyakakalha ky’ekihugho.”—Yn. 8:12; Emi. 6:23.

14. Omulimu abuyirire angathuwathikya athi?

 ¹⁴ Kandi thukayithagha obuwathikya bw’omulimu abuyirire wa Nyamuhanga nuku thulhole embere eribya n’emibere ‘y’abaana b’ekyakakalha.’ Busana naki? Kundi sikyolho erisighalha ithunahenirye omwa kihugho ekyoswire mw’eby’obutswatswa kino. (1 Tes. 4:3-5, 7, 8) Omulimu abuyirire anganathuwathikya erirwanisya amalengekania w’ekihugho, imwamune amenge w’abandu n’amalengekania awahukene n’awa Nyamuhanga. Kandi omulimu abuyirire anganathuwathikya erikangania “emisindo yosi y’ebibuya, n’ebithunganene.”—Efe. 5:9.

15. Ni mwa nziraki thwangahebwa omulimu abuyirire? (Abanya Efeso 5:19, 20)

¹⁵ Enzira nguma eyathwanga baniramo omulimu abuyirire ly’erisabagho. Yesu mwabugha athi Yehova akendi syaha “omulimu abuyirire oko bakamubulhaya.” (Lk. 11:13) Kandi thukabya thukapipa Yehova ya haghuma okwa mihindano y’Ekikristayo, thukahebawa omulimu abuyirire. (Soma Abanya Efeso 5:19, 20.) Obuwathikya bw’omulimu abuyirire wa Nyamuhanga bukendi thuwathikya eribya omwa ngebe eyikatsemesaya Nyamuhanga.

16. Ni kyahi ekikendi thuwathikya erithwamu ndeke? (Abanya Efeso 5:10, 17)

¹⁶ Omughulhu thuwithe erithwamu likulhu, thutholere ‘ithw’igha ekyo Mukama anzire ithwakolha’ n’erikolha erikwamana nakyo. (Soma Abanya Efeso 5:10, 17.) Omw’iminya emisingyi ye Biblia eyihambire okwa mibere eyathulimo, thukabya ithwamasondekania amalengekania wa Nyamuhanga oko mwatsi. Neryo thukabya thukaghendera okwa misingyi yiwe, thukongera erithwamu ndeke.

17. Erikolesya obuthuku bwethu bwa ndeke mwamuliki? (Abanya Efeso 5:15, 16) (Lebaya n’ekisasani.)

¹⁷ Paulo kandi mwahabulha Abakristayo abe Efeso athi bakolesaye obuthuku bwabo bwa ndeke. (Soma Abanya Efeso 5:15, 16.) “Omubi oyu,” enzighu yethu Sitani, iniakendianza thubye bbize omwa by’ekihugho kino nuku sithubane endambi y’erikolera Nyamuhanga.  (1 Yn. 5:19) Ikikendyongera eryolhobera Omukristayo erihira eby’ekinyamubiri, esukuru, kutse omubiiri by’embere okwa highisa hy’erikolera Yehova. Ekyo kyamabya, ikikendi kangania ngoku amalengekania w’ekihugho abirimuhambako. Ni kwenene, ebindu ebi si bibi, aliwe sibitholere bikabya embere omwa ngebe yethu. Erilendera “ng’abaana b’ekyakakalha,” sithutholere ‘thukalhabya ebiro [byethu] ebi bya buyira,’ ni bugha ambu, erihwerya amalengekania okwa bikulhu kutsibu.

18. Ni biika byahi ebya Donald athwa nuku akolesaye ndeke obuthuku bwiwe?

¹⁸ Sondekanaya ehighisa hy’erikolera Yehova ya bingyi. Eki kya Donald, oyuwikere e South Africa, akolha. Akabugha athi: “Munasamalira emibere eyo ngalimo neryo namalemba-lemba Yehova indi angwathikaye ngakole bingyi omw’ithulira. Munamusaba indi ngabane omubiiri owakendi nyilighira erikolha bingyi omw’ithulira. Omwa buwathikya bwa Yehova munabana omubiiri owatholere. Ingye na mukali waghe muthwatsuka olhughendo lhw’erikolha haghuma omubiiri w’omughulhu wosi.”

19. Thwanga lholha thuthi embere erilendera “ng’abaana b’ekyakakalha”?

¹⁹ Ebaruha ya Paulo okwa banya Efeso yitholere eribya imuyabawathikya ndeke omo ngebe yabu y’Ekikristayo. Kandi erihabulha eryasondolibawa eryo nethu lyangana thuwathikya. Ngoku thwabirilhangira, lyangana thuwathikya erisombolha ndeke eby’eriyitsemesya n’abanywani. Lyangana thuhira mw’omuhwa w’erilholha embere eriyihwerya omwa kyakakalha ky’ekwenene omw’ibya n’endegheka y’eriyeghesya e Biblia mughulhu wosi. Kandi likahira omuwatho okwa mughaso w’omulimu abuyirire, ow’akaleka ithwabya n’emibere eyuwene. Erighendera okw’ihabulha erya Paulo ahandika kyangana thuwathikya erikolha erithwamu eryuwene, erihambene n’amalengekania wa Yehova. Omw’ikolha ebindu ebi, thukendi thoka eriyihighulha okwa mwirimya w’ekihugho kino kandi ithwasighalha omwa kyakakalha!