1-3. (a) Erikwamana na Esyonyimbo 5:4-6, Yehova akayowa athi busana n’obubi? (b) Busana naki ithwabugha thuthi eky’erikolha okwa baana kw’eby’obuthundirya sikirilighirana ‘n’emighambo ya Kristo’?

YEHOVA NYAMUHANGA aponire emiringo yosi y’obubi. (Soma Esyonyimbo 5:4-6.) Atholere eribya iniaponire kutsibu ekya baana erikolhwako eby’obuthundirya​—ekibi ekikalire kutsibu, ek’itha esyonye! Kundi thukagherereraya Yehova, ithwe ng’Abema ba Yehova thuponire ekya baana erikolhwako eby’obuthundirya kandi sithuli kilighira omwa kithunga ky’Ekikristayo.​—Abar. 12:9; Ebr. 12:15, 16.

² Omulingo wosi-wosi ow’erikolha okwa baana kw’eby’obuthundirya syali lighirana ‘n’emighambo ya Kristo’! (Gal. 6:2) Busana naki ithwabugha thuthya? Ngoku kiri omo mwatsi w’ahanyuma, emighambo ya Kristo​—ni bugha ambu, ebyosi ebya Yesu akangiriraya omwa binywe n’omwa ky’erileberyako​—yiseghemere oko lhwanzo kandi yikakulha-kulhanaya obulingirirania. Kundi Abakristayo ab’okwenene bakaghondera emighambo eyi, bakakolongana n’abaana omwa nzira eyikaleka ibayowa buholho n’eriyowa ibanzibirwe omo kwenene. Aliwe, erikolha okwa baana kw’eby’obuthundirya, ni kindu ky’eriyitsomana, ekithe ky’obulingirirania ekikaleka omwana iniayowa isyali omwa butheya kandi isyanzibirwe.

³ Eky’obulighe, erikolha okwa baana kw’eby’obuthundirya, ni kitsibu ekiri omwa kihugho kyosi, kandi ekitsibu eki kyabirihamba n’okwa Bakristayo ab’okwenene. Busana naki? “Abandu babi n’abathebya” babirikanyirira, n’abandi bangana lengaho eringira omwa kithunga. (2 Tim. 3:13) Eryongera okw’ekyo, abandi abakayilingiriranaya ng’abakakolera Yehova babirikurwa n’esyongumbu nyibi sy’omubiri kandi babirikolha okwa baana kw’eby’obuthundirya.  Thulebaye ekikaleka erikolha okwa baana kw’eby’obuthundirya iryabya in’ilholho erikalire kutsibu. Neryo thukendi lebya ekya basyakulhu bakakolha omundu omwa kithunga amakolha erilholho erikalire, imwamuli erikolha okwa baana kw’eby’obuthundirya, kandi ngoku ababuthi banga theya abaana babu. *

4-5. Busana naki erikolha oko mwana kw’eby’obuthundirya ni muhalyako?

⁴ Erikolha okwa baana kw’eby’obuthundirya kyangana lyambya omundu kandi ahabw’obuthuku buuli. Kikahamba nabi okwa balyakolhawa byoko kuthya n’abakabalembera​—ab’eka yabu n’abalikyabo Abakristayo. Erikolha okwa baana kw’eby’obuthundirya n’ilholho erikalire kutsibu.

⁵ N’ihalya ok’oyokiryakolhawako. N’ilholho erikalethera abandi obulhumi n’eribaghalya. Ngoku thukendi syalhangira omo mwatsi owakakwamako, oyukakolha okwa baana kw’eby’obuthundirya ekyo ky’akabya iniamakolha​—akahuthalhaya omwana omwa nzira eyikaghalhaya kutsibu. Akaleka omwana iniathayikethera mundu wosi-wosi, akaghunza oko mwana kw’obuholho. Abaana batholere ibatheghibwa okwa bubi ng’obo, n’ababirikolhwa byoko bakayithagha erihumulikanibwa n’obuwathikya.​—1 Tes. 5:14.

6-7. Busana naki erikolha okwa baana kw’eby’obuthundirya n’ihalya okwa kithunga n’okwa bathabali?

⁶ N’ihalya oko kithunga. Mulikyethu oyukakolha okwa baana kw’eby’obuthundirya akatsandaya erina ly’ekithunga. (Mt. 5:16; 1 Pet. 2:12) Obu ka ni buthe bulingirirania okwa syomiliyoni sy’Abakristayo abathaleghulha abanemukolha kutsibu ‘erilhwira erikirirya lyabu’! (Yuda 3) Sithuli lighira abathe yisubamu ababirikolha amalholho awakalha-kalire kandi abakatsandaya erina libuya ly’ekithunga eribya omwakathi-kathi kethu.

⁷ N’ihalya oko bathabali b’ekihugho. Abakristayo batholere ‘ibaghondera abathabali b’ekihugho.’ (Abar. 13:1, NW) Thukakanganaya ku thukabaghondera omw’isikya ebilhaghiro by’egavumente. Mulikyethu amathwa ebilhaghiro, ng’erikolha okwa baana kw’eby’obuthundirya, akabya iniamahalya okwa bathabali b’ekihugho. (Thasyalebaya Emibiri 25:8.) Ni kwenene si mubiiri w’abasyakulhu erilhangira bathi ebilhaghiro by’egavumente bikakwama-kwamanibawa, aliwe sibali lhwira owosi-wosi oyukakolha oko mwana kw’eby’obuthundirya erikolhwako ng’ekilhaghiro ky’egavumente ku kikabugha. (Abar. 13:4) Omukolha-nabi oyu akahulhulha eby’abiba.​—Gal. 6:7.

8. Yehova akalhangira athi amalholho awakakolhawa okwa bandu?

⁸ Eky’obulighe kutsibu, n’ihalya oku Nyamuhanga. (Esy. 51:4) Omundu amahalya oko wundi, akabya iniamahalya n’oku Yehova. Thulebaye eky’erileberyako omwa Mighambo eya Nyamuhanga aha Abaisraeli. Emighambo iyikabugha yithi omundu amiba kutsibu erinyegha mulikyabu iniakabya ‘iniamahalya oku Mwami Mukulhu.’ (Law. 6:2-4) Kuthya, mulikyethu omwa kithunga oyukakolha okwa mwana kw’eby’obuthundirya​—erinyegha kutse erileka omwana oyo iniabulha obuholho​—akabya iniamahalya oku Nyamuhanga. Oyulyakikolha akakinaya erina lya Yehova. Busana n’ekyo, eby’obuthundirya ​—n’ilholho erikalire embere sya Nyamuhanga.

9. Ni myatsi yahi eyiseghemere oko Masako eya kithunga kya Yehova kyabirihulhukya ahabw’emyaka mingyi, kandi busana naki?

⁹ Ahabw’emyaka mingyi, ekithunga kya Yehova kyabirihulhukya emyatsi mingyi eyiseghemere okwa Masako eyihambire okw’ikolha okwa baana kw’eby’obuthundirya. Ng’eky’erileberyako, emyatsi omwa Kaleberyo na Awake! yabirikania okwa byo ababirikolhwako eby’obuthundirya banga kolha erighumira ebironda ebiri okwa muthima, ngoku abandi banga wathikya n’eribahimba, kandi ngoku ababuthi bangatheya abaana babu. Abasyakulhu babirihebwa obusondoli bungyi obuseghemere okwa Masako obuhambire okwa ekya bangakolha omundu amakolha oko mwana kw’eby’obuthundirya. Ekithunga kikalholha embere erilebya ekya basyakulhu banga kolha omundu amakolha erilholho ery’erikolha oko mwana kw’eby’obuthundirya. Busana naki? Nuku enzira y’erikania oko myatsi ng’eyo yihambangane ndeke n’emighambo ya Kristo.

10-12. (a) Ni byahi ebya basyakulhu bakalengekanayako bakawathikya oyuwabirikolha erilholho erikalire, kandi bawithe kilhubirirwaki? (b) Erikwamana na Yakobo 5:14, 15, ni byahi ebya basyakulhu bakalengaho erikolha?

¹⁰ Abasyakulhu bakabya bakakania n’oyuwabirikolha erilholho lyosi-lyosi erikalire, bakabya iban’ibukire ngoku emighambo ya Kristo yikabayithaghako erikolongana n’esyombuli omo lhwanzo n’erikolha ekihikire kandi eky’obulingirirania embere sya Nyamuhanga. Busana n’ekyo, ni bingyi ebya batholere ibalengekaniako bakaminya ngoku omundu mulebe abirikolha erilholho erikalire. Ekilhubirirwa kikulhu ky’abasyakulhu ly’erilhangira bathi erina lya Nyamuhanga likabya irinahenirye. (Law. 22:31, 32; Mt. 6:9) Batsomene kutsibu obunyakirimu bw’abalikyethu omwa kithunga kandi banzire eriwathikya owosi-wosi oyukakolhawako erilholho erikalire.

¹¹ Eryongera okw’ekyo, omukolha-nabi amabya iniali omwa kithunga, abasyakulhu bakalengaho erimuwathikya bunyakirimu kyamabya kyangana thokekana. (Soma Yakobo 5:14, 15.) Omukristayo oyukaghendera okwa syongumbu siwe nyibi n’erikolha erilholho erikalire akabya inialhwere bunyakirimu. Eki kikamanyisaya kithi syakiwithe obughuma obuwene na Yehova. * Thwangana linganisya abasyakulhu n’abadokita. Bakalengaho erilhamya “omukoni,” ni bugha ambu, omukolha-nabi. Erihabulha lyabu eriseghemere okwa Masako lyangana suba-subania obughuma bwiwe na Nyamuhanga, aliwe eki ikikendi thokekana inianalyayisubamu omwa kwenene.​—Emib. 3:19; 2 Kor. 2:5-10.

¹² Omo kwenene, abasyakulhu bawithe olhukwamirwa olhulithohire. Bakatsomana ekihangulho ekya Nyamuhanga abiribaha eritheya. (1 Pet. 5:1-3) Banzire balikyabo ibayowa ekithunga ini mwanya ow’eribyamu buholho. Busana n’ekyo, bakakolha omwa byalhuba bakaminya ngoku omundu mulebe abirikolha erilholho erikalire, imwamuli erikolha okwa baana kw’eby’obuthundirya. Thuthalengekania okwa bibulyo ebiri okw’itsuka ly’enungu  13,  15, na  17.

13-14. Abasyakulhu bakanaghondera ekilhaghiro ky’egavumente ekihambire okw’itsongera oyuwabirikolha oko mwana kw’eby’obuthundirya? Soborera.

 ¹³ Abasyakulhu bakanaghondera ebilhaghiro by’egavumente ebihambire okw’itsongera oyuwabirikolha oko mwana kw’eby’obuthundirya? Ee. Omwa bitsweka ebiri mw’ebilhaghiro ng’ebyo, abasyakulhu bakalengaho erighondera ebilhaghiro by’egavumente eby’eritsongera oyuwabirikolha eby’obuthundirya. (Abar. 13:1) Ebilhaghiro ng’ebyo sibirihakanisaya emighambo  ya Nyamuhanga. (Emib. 5:28, 29) Neryo bamowa okw’ilholho ng’eryo omwa kithunga, ku bakanalhuaho ibasondya bathya obusondoli erilhua okwa kyaghanda ky’omuthahulha ngoku banga ghenda-ghendania n’ebilhaghiro eby’eritsongera omundu oyo.

¹⁴ Abasyakulhu bakakakasaya oyulyakolhawako eby’obuthundirya n’ababuthi biwe n’abandi abasi oko mwatsi oyo ngoku bawithe obughabe bw’erithwalha olhubanza olho oko bathabali. Ibbwa oyukatsongerawa amabya ini mulikyethu neryo kandi omwatsi iniaminywa ehosi? Mbwino Omukristayo oyulyamuthwalha okwa bathabali anatholere iniayowa ng’abirikinia erina lya Nyamuhanga? Eyihi. Oyulyakolha eby’obuthundirya yukabya iniamakinia erina lya Nyamuhanga.

15-16. (a) Erikwamana na 1 Timoteo 5:19, busana naki abasyakulhu bathe bahiraho akathunga akakatswera, hatholere ihabya ihane hakiri balhangiri babiri? (b) Abasyakulhu bakakolhaki bakaminya ngoku mulikyethu abirikolha oko mwana kw’eby’obuthundirya?

 ¹⁵ Omwa kithunga, abasyakulhu bathe bakania oko lhubanza, busana naki ambi ihabya ihane hakiri balhangiri babiri? Eki ni kighuma ky’okwa bihano bye Biblia eby’obulingirirania. Omukolha-nabi amayighana, abalhangiri babiri bakayithaghisibawa abasyakulhu bathe bahiraho akathunga akakatswera. (Ebi. 19:15; Mt. 18:16; soma 1 Timoteo 5:19.) Mbwino eki kikamanyisaya kithi omundu athali atsongerwa okwa bathabali, hatholere ihabya ihane abalhangiri babiri? Eyihi. Eki sikiriyithaghisibawa mbulha abasyakulhu kutse abandi bamatsongera oyuwabirithwa ekilhaghiro ky’egavumente.

¹⁶ Abasyakulhu bakabya bakaminya ngoku mulikyethu abirikolha oko mwana kw’eby’obuthundirya, bakalengaho erighendera okwa kilhaghiro kyosi-kyosi eky’egavumente ekihambire okw’ithulhagho, neryo kandi ibasosothya omwatsi oyo erikwamana n’Amasako. Omundu oyo amayighana, abasyakulhu bakahulikirira ebya balhangiri banga bugha. Hamabya hakiri bandu babiri​—oyulyatsongera n’owundi mundu abangaha obwema​—akathunga akakatswera ikakendi hirwaho. * Hamathendi banika omulhangiri wakabiri sikirimanyisaya kithi oyulyatsongera akayitheba. Nomuhangabya isihali balhangiri babiri abangaha obwema okw’ilholho ery’akolirwe, abasyakulhu bakaminya ngoku erilholho erikalire lyanganabya iryabirikolhwa, erikahamba nabi okwa bandi. Abasyakulhu bakalholha embere eriwathikya abalyahambawako. Eryongera okw’ekyo, abasyakulhu bakabya ibanatheghirye kutsibu nuku omundu oyo aleke eritsandya ekithunga.​—Emib. 20:28.

17-18. Soborera olhukwamirwa lhw’akathunga akakatswera.

 ¹⁷ Akathunga akakatswera kawithe lhukwamirwaki? Ekinywe “akakatswera” sikirimanyisaya kithi abasyakulhu bakatswera, kutse erithwamu mbulha oyulyakolha eby’obuthundirya ng’atholere erisuyirwa n’ab’ehamuli busana n’erithwa ekilhaghiro. Abasyakulhu sibaliyingiraya omwa by’ab’ebilhaghiro; bakasigha emyatsi omwa byalha by’abathabali b’ekihugho. (Abar. 13:2-4; Tito 3:1) Aliwe, abasyakulhu bakatswera, kutse erithwamu omundu oyo ng’abye omwa kithunga kutse eyihi.

¹⁸ Abasyakulhu abali okwa kathunga akakatswera, olhukwamirwa lhwabu lhukabya ini lhw’obunyakirimu, kutse olhw’edini. Omw’ighendera okwa busondoli bw’Amasako, bakathwamu oyulyakolha eby’obuthundirya ng’anabiriyisubamu kutse eyihi. Amathendi yisubamu, akahighithawa, n’ekirango ikyalhabibwa omwa kithunga. (1 Kor. 5:11-13) Amabya iniabiriyisubamu, iniangana sighalha iniane omwa kithunga. Aliwe, abasyakulhu ibakendi mumanyisya ngoku syangathasyatholera erithunga  olhukwamirwa lhwosi-lhwosi kutse erihebwa olhusunzo lhwosi-lhwosi omwa kithunga. Busana n’eritsomana engebe y’abaana, abasyakulhu bangana hikira ababuthi omwa mbiitha n’eribabwira ngoku batholere ibakunga abaana babu eribya hakuhi n’omundu oyo. Abasyakulhu bakabya bakaha amenge ng’ayo, bakalhangira bathi sibali bisulha abandu abo abirihuthalya omw’ilholho ery’akolha.

19-22. Ababuthi banga kolhaki eritheya abaana babu? (Lebaya ekisasani ky’okwa kidipa.)

¹⁹ Oyuwithe olhukwamirwa lhw’eritheya abaana okw’ikolhwako eby’obuthundirya nindi? Ababuthi. * Abaana benyu ni kihembo erilhua oku Nyamuhanga, ‘olhusunzo olhukalhua oku Yehova.’ (Esy. 127:3) Ni lhukwamirwa lhwawu eritheya ekihembo ekyo. Wangakolhaki eritheya abaana bawu okw’ikolhwako eby’obuthundirya?

²⁰ Eky’erimbere, yeghesaye ebihambire okwa by’obuthundirya. Minya nga ni bandu bahi abakakolha okwa baana kw’eby’obuthundirya n’amenge awabakakolesaya eritheba abaana. Ibya iwunasi emibere kutse abandu abangabya b’akabi. (Emi. 22:3; 24:3) W’ibuke ngoku mughulhu mungyi, oyukakolha oko mwana kw’eby’obuthundirya ni mundu oyo omwana akabya inianasi kandi oyo akayikethera.

²¹ Ekyakabiri, lholha embere erikanirania ndeke n’abaana bawu. (Ebi. 6:6, 7) Ekyo mwamuli eribya muhulikiriri mubuya. (Yak. 1:19) Wibuke ngoku abaana bakanasagha erithulhagho ku bakolirweko eby’obuthundirya. Bangana sagha bathi bamathulhagho ibakendi baghania, kutse oyulyabakolhako eby’obuthundirya angana basaghisya omw’ibabwira athi sibathulegho. Wamayilhalikirira wuthi ekindu kibi kyabiribya oko mwana wawu, omwa bwolho-bwolho mubulhaye kandi omw’ighumisirizya muhulikirire.

²² Ekyakasathu, kangiriraya abaana bawu. Erikwamana n’emyaka yabu bakaniraye okwa bihambire okwa myatsi y’engyingo. Bakangiriraye ebya banga bugha n’erikolha omundu amabahamba-hambako omwa nzira eyithatholere. Kolesaya emyatsi eya kithunga kya Nyamuhanga kinemuhulhukya eyihambire okw’itheya abaana bawu.​—Lebaya akasanduko “ Yikangiriraye n’Abaana Bawu.”

23. Thukalhangira thuthi eby’erikolha okwa baana kw’eby’obuthundirya, kandi omwatsi owakakwamako akendi subirya kibulyoki?

²³ Ithwe ng’Abema ba Yehova, thukalhangira erikolha oko baana kw’eby’obuthundirya ng’erilholho erikalire kandi ng’ekibi ekikalire. Busana n’erighondera emighambo ya Kristo, ebithunga byethu sibiritheghaya abakakolha okwa baana kw’eby’obuthundirya okwa byanga lhwiririra omw’ilholho lyabu. Neryo, thwanga kolhaki eriwathikya ababirikolhwako eby’obuthundirya? Omwatsi owakakwamako akendi subirya ekibulyo ekyo.