1. Ni bindu bibiri byahi ebyo thwangana kakasya?

YEHOVA NYAMUHANGA anzire abaramya biwe. Athulha inianabanzire, kandi akendi syalholha embere eribya inianabanzire. Kandi anzire eribanza lithunganene kutse obulingirirania. (Esy. 33:5) Neryo thwangana kakasya ebindu bibiri: (1) Yehova akayowa nabi abaghombe biwe bakakolhwa nabi. (2) Akendi lhangira athi abandu biwe bakakanganibawa obulingirirania. Omo mwatsi w’erimbere, * muthwaminya ngoku Emighambo eya Nyamuhanga aha Abaisraeli erilhabira omu Musa yabya yiseghemere oko lhwanzo. Iyikahiraho obulingirirania​—obulingirirania okwa bosi, nibya n’abathe banga thoka eriyitheya. (Ebi. 10:18) Emighambo eyo yikabisulha ngoku Yehova akatsomana kutsibu abaramya biwe.

2. Ni bibulyo byahi ebyo thukendi subirya?

² Emighambo ya Musa yahwaho omwaka 33 E.K. ekithunga ky’Ekikristayo kikatsukisibwa. Mbwino Abakristayo bangabere butsira mighambo eyikabatheghaya eyiseghemere oko lhwanzo kandi eyikakulha-kulhanaya obulingirirania? Eyihi na hake! Abakristayo mubathunga emighambo mihyaka, emighambo ya Kristo. Omo mwatsi ono, thukendi tsuka eriminya emighambo emihyaka eyo nga niki. Neryo thukendi subirya ebibulyo bino: Busana naki ithwabugha thuthi emighambo eyi yiseghemere oko lhwanzo? Busana naki ithwabugha thuthi yikakulha-kulhanaya obulingirirania? Omwa mighambo eyi, abawithe obuthoki banga kolongana bathi n’abandi?

3. Ni byahi ebiri omwa “emighambo ya Kristo” eyiri omu Abanya Galatia 6:2?

³ Soma Abanya Galatia 6:2. Abakristayo bali ahisi ‘sy’emighambo ya Kristo.’ Yesu mwathathondogholera n’erihandikira abamukwamire b’emighambo, aliwe mwabaha obusondoli, ebihano, n’emisingyi eribasondolha. “Emighambo ya Kristo” mwamuli ebyosi ebya Yesu akangiriraya. Erithoka eriyitheghererya ndeke emighambo eyi, thulebaye bino.

4-5. Yesu mwakolesya nzira syahi erikangirirya, kandi mwakangirirya mughulhu wahi?

⁴ Yesu mwakolesya nzira syahi erikangirirya? Erimbere, mwakangirirya abandu omwa by’abugha. Ebinywe biwe ibiwithe amaaka kundi iniakabugha ekwenene eyihambire oku Nyamuhanga, mwakangirirya ekighendererwa ky’okwenene eky’engebe, kandi mwakangania ngoku Obwami bwa Nyamuhanga b’obukendi syaghunzaho eriaghalhwa ly’abandu abosi. (Lk. 24:19) Kandi Yesu mwakangirirya omwa ky’erileberyako kiwe. Omwa ngebe yiwe, mwakangania emibere eyo abamukwamire batholere ibabya nayo.​—Yn. 13:15.

⁵ Yesu mwakangirirya mughulhu wahi? Mwakangirirya omughulhu aby’akakolha omubiiri wiwe w’Obwami hano okwa kihugho. (Mt. 4:23) Kandi buthuku buke alilhubukire mwakangirirya abigha biwe. Ng’eky’erileberyako, mwabuthukira okwa ndeko y’abigha​—obundi abalhabire omu 500​—n’eribaha ekihano ‘ky’eriyira abigha.’ (Mt. 28:19, 20; 1 Kor. 15:6) Yesu ng’omuthwe w’ekithunga mwalholha embere erikangirirya abigha biwe abirisuba elhubulha. Ng’eky’erileberyako, ng’omwa 96 E.K., Kristo mwasondolha omukwenda Yoane erihimba Abakristayo abahakabibwa n’eribahabulha.​—Kol. 1:18; Erib. 1:1.

6-7. (a) Erikangirirya lya Yesu lihandikire hayi? (b) Thukakenga thuthi emighambo ya Kristo?

⁶ Ebya Yesu akangiriraya bihandikire hayi? Ebitabu bbini by’Enjiri birimo bingyi by’okwa bya Yesu abugha n’erikolha okwa kihugho. Awandi Masako w’Ekigiriki​—awahandikawa n’abalhume abasondolibawa n’omulimu abuyirire kandi ababya bawithe “obulengekania bw’Omukama”​—akathasyongera erithuwathikya eriyitheghererya amalengekania agho Yesu awithe oko myatsi.​—1 Kor. 2:16.

⁷ Erisomo: Erikangirirya lya Yesu likahamba  okwa mibere yosi y’engebe. Neryo emighambo ya Kristo yikahamba okwa bya thukakolha eka, ahathukakolera kutse okwa sukuru, n’omwa kithunga. Thukaminya emighambo eyi omw’isoma Amasako w’Ekigiriki n’erighanirya kugho. Thukaghondera emighambo eyi thukaghendera okwa busondoli, ebihano, n’emisingyi eyiri omwa masako ayo. Thwamakenga emighambo ya Kristo, thukabya ithukakenga Nyamuhanga wethu w’olhwanzo, Yehova, oyuli Nzuko y’ebyosi ebya Yesu akangiriraya.​—Yn. 8:28.

8. Emighambo ya Kristo yiseghemere okuki?

⁸ Enyumba eyuwene eyihimbire oko musingyi owaghumire yikaleka abikere muyo ibayowa buholho. Kuthya, emighambo eyuwene eyiseghemere oko lhwanzo yikaleka abakaghonderayo ibayowa buholho. Emighambo ya Kristo yiseghemere oko musingyi owuwene kutsibu​—olhwanzo. Busana naki ithwabugha thuthya?

9-10. Ni by’erileberyako byahi ebikakanganaya ngoku ebya Yesu akolha byabya busana n’olhwanzo, kandi thwanga mugherererya thuthi?

⁹ Eky’erimbere, ebyosi ebya Yesu akolha abikolha busana n’olhwanzo. Erikwira abandi b’obulighe, kutse olhukeri ni kangania olhwanzo. Busana n’omubere ng’oyo ow’erikwira abandu b’obulighe, Yesu mwakangirirya esyondeko, amalhamya abalhwere, amalisya abakwire enzalha, n’erilhubukya abaholi. (Mt. 14:14; 15:32-38; Mk. 6:34; Lk. 7:11-15) Nomwakine indi ebindu ng’ebyo mubyamulira obuthuku n’akaghalha, Yesu mwahira ebiyithawa by’abandi by’embere. Ekikulhu kutsibu, mwakangania olhwanzo lhunene omw’ihayo engebe yiwe busana n’abandi.​—Yn. 15:13.

¹⁰ Erisomo: Thwangana gherererya Yesu omw’ihira ebiyithawa by’abandi by’embere. Kandi thwangana mugherererya omw’igha erikwira abali omwa bulhambu bwethu b’obulighe. Omubere w’erikwira abandi b’obulighe amaleka thukathulira n’erikangirirya engulhu yuwene, ithukendibya ithukaghondera emighambo ya Kristo.

11-12. (a) Ni kyahi ekikakanganaya ngoku Yehova athutsomene kutsibu? (b) Thwanga gherererya thuthi olhwanzo lhwa Yehova?

¹¹ Ekyakabiri, Yesu mwakangania olhwanzo lhwa Thatha wiwe. Omw’ithulira liwe, Yesu mwakangania ngoku Yehova atsomene kutsibu abaramya biwe. Mwakangania eki omo nzira nyingyi. Ng’eky’erileberyako, mwakangirirya bino: Obuli mughuma w’okw’ithwe ni w’omughaso kandi ow’obughuli embere sya Thatha wethu w’elhubulha. (Mt. 10:31) Yehova anayitheghekire eriangirira embuli eyabirihera eyikayisubamu n’erisuba omwa kithunga. (Lk. 15:7, 10) Yehova mwakangania kw’athwanzire omw’ihayo Mughalha wiwe ng’embanulho busana nethu.​—Yn. 3:16.

¹² Erisomo: Thwanga gherererya thuthi olhwanzo lhwa Yehova? (Efe. 5:1, 2) Thukalhangira balikyethu mwa b’omughaso kandi ab’obughuli, kandi ithunatsemire thukangirira “embuli eyithere” eyikasuba oku Yehova. (Esy. 119:176) Thukakanganaya ku thwanzire balikyethu omw’iyihayo busana nabu, ng’eribawathikya omughulhu bali omwa buyithawa. (1 Yn. 3:17) Thwamatsomana abandi omo lhwanzo, ithwamakenga emighambo ya Kristo.

13-14. (a) Ngoku kiri omu Yoane 13:34, 35, Yesu mwalhaghira abigha biwe athi bakanganayeki, kandi busana naki eki ni kihano kihya-kihya? (b) Thukakenga thuthi ekihano kihya-kihya?

¹³ Ekyakasathu, Yesu mwalhaghira abigha biwe erikangania olhwanzo olhw’eriyihayo. (Soma Yoane 13:34, 35.) Ekihano kya Yesu ni kihya-kihya kundi kikathuyithaghako erikangania olhwanzo olhuthabya omwa Mighambo eya Nyamuhanga aha Abaisraeli: Thutholere ithwanza balikyethu ngoku Yesu athwanza. Eki kikayithagha olhwanzo olhw’eriyihayo. * Thuli b’erianza balikyethu nibya kwilhaba ku thuyanzire.  Thutholere ithwabanza erihika okwa kiika ky’erihayo engebe yethu busana nabu, ngoku Yesu athukolera.

¹⁴ Erisomo: Thukakenga thuthi ekihano kihyaka? Omwa bikuhi, omw’iyihayo busana n’abaghalha bethu n’abali bethu. Sithulisubulira okw’iyihayo busana nabu omwa bindu binene-binene lisa​—aliwe kandi thukayihayo n’omwa hindu hike-hike. Ng’eky’erileberyako, omughulhu thukalengaho kutsibu erithwalha mulikyethu oyukekelhuhire okwa mihindano, kutse eriyithalya oko bya thwanzire busana n’eritsemesya omwikirirya mulikyethu, kutse erisaba ekihumuro oko mubiiri wethu nuku thuyawathikaye ahawire ekitsinduli, thukabya ithukakenga emighambo ya Kristo. Kandi thukabya ithukawathikaya omw’ileka ekithunga kibye mwanya w’obuholho n’obutheya busana n’obuli mundu.

15-17. (a) Emikolere ya Yesu muyakangania yithi amalengekania agho awithe oko bulingirirania? (b) Thwanga gherererya thuthi Yesu?

¹⁵ “Eribanza erithunganene” kutse obulingirirania, ngoku kikolesibirwe omwa Biblia, kikamanyisaya erikolha ebya Nyamuhanga akabugha athi bihikire n’eribikolha butsira kasolholho. Busana naki ithwabugha thuthi emighambo ya Kristo yikakulha-kulhanaya obulingirirania?

¹⁶ Eky’erimbere, lebaya ngoku emikolere ya Yesu muyakangania obulingirirania bwiwe. Omwa buthuku bwiwe, abasondoli b’edini y’Ekiyuda ibaponire abathe Bayuda, ibakayowa nga balengire Abayuda abathe omwa dini y’Ekiyuda, kandi isibali sikaya abakali. Aliwe, Yesu iniakakolongana n’abosi ndeke kandi butsira kasolholho. Mwalighira abathe Bayuda abamwikirirayamu erimukwama. (Mt. 8:5-10, 13) Mwathulira abosi butsira kasolholho, abaghuda n’abera. (Mt. 11:5; Lk. 19:2, 9) Isyali tsuruma kutse eritsuma akakolongana n’abakali. Aliwe iniakakanganaya abakali b’erisikya n’olhukeri, imwamune n’abakalhangirawa ng’abathawithe mughaso.​—Lk. 7:37-39, 44-50.

¹⁷ Erisomo: Thwangana gherererya Yesu omw’ithendibya n’akasolholho thukakolongana n’abandi kandi thukathulira abosi abanzire erihulikirira​—nomubangabya omwa mibere eyiri yithi kutse dini yahi. Abalhume Abakristayo bakakwama eky’erileberyako kya Yesu omw’ikolongana n’abakali omw’isikya. Thwamakolha ebindu ng’ebyo, ithwamakenga emighambo ya Kristo.

18-19. Ni byahi ebya Yesu akangiriraya ebihambire okwa bulingirirania, kandi ni masomo wahi agho thuk’igha omw’ikangirirya liwe?

¹⁸ Ekyakabiri, lebaya ebya Yesu akangiriraya ebihambire oko bulingirirania. Mwakangirirya emisingyi eyanga wathikya abamukwamire erikolongana n’abandi ndeke. Ng’eky’erileberyako, lengekanaya okwa Kihano Ekibuyanga. (Mt. 7:12) Ithwe bosi thwanzire ithwakolhwa ndeke. Busana n’ekyo, thutholere ithwakolongana n’abandi ndeke. Thwamakolha ekyo, ikyangana leka ibathukolha ndeke. Kandi ibbwa thwamabya ithwabirikanganibwa obuthe bulingirirania? Aho kandi Yesu mwakangirirya abamukwamire eriyikethera ngoku Yehova akendi “lhangira athi obulingirirania bukakolhawa okwa bakamulirira omw’ithungyi n’omwa kiro.” (Lk. 18:6, 7, NW) Ebinywe ebyo ni mulhaghe: Nyamuhanga wethu ow’obulingirirania analhangire ebitsibu ebyo thukalhabamo omwa biro by’enyuma-nyuma bino, kandi akendi lhangira athi thukakanganibawa obulingirirania okwa buthuku obutholere.​—2 Tes. 1:6.

¹⁹ Erisomo: Thwamaghendera okwa misingyi eya Yesu akangiriraya, ithukendi kangania abandi b’obulingirirania. Kandi thwamabya ithwabirikanganibwa obuthe bulingirirania omwa kihugho kya Sitani, thwangana thunga erihumulikana omw’iminya ngoku Yehova akendi syalhangira athi thukakanganibawa obulingirirania.

20-21. (a) Abawithe obuthoki banga thwalha bathi abandi? (b) Omulhume angakangania athi olhwanzo lhw’eriyihayo, kandi thatha anga thwalha abaana biwe b’athi?

²⁰ Omwa mighambo ya Kristo, abawithe obuthoki banga thwalha bathi abandi? Kundi emighambo eyo yiseghemere oko lhwanzo, abawithe obuthoki batholere ibasikya abo bakasondolha n’eribathwalha omo lhwanzo. Batholere ibibuka ngoku Kristo anzire ithwakangania olhwanzo omwa byosi thukakolha.

²¹ Omw’eka. Omulhume atholere inianza mukali wiwe ngoku ‘Kristo anza ekanisa.’ (Efe. 5:25, 28, 29) Omulhume atholere iniagherererya olhwanzo lhwa Kristo olhw’eriyihayo omw’ihira ebiyithawa bya mukali wiwe embere. Kikakalira abandi balhume erikangania olhwanzo ng’olho, obundi kundi mubathakulira omwa mibere eyirimo erikangania abandi b’obulingirirania n’olhwanzo. Kyangana bakalira erileka emitse mibi, aliwe batholere ibakolha esyombinduka nuku banga kenga emighambo ya Kristo. Omulhume oyukakanganaya olhwanzo lhw’eriyihayo akaleka mukali wiwe iniamusikya. Thatha oyuwanzire abaana biwe syali batsuma omwa mibughire n’omwa mikolere yiwe. (Efe. 4:31) Omwakanya k’ekyo, akakanganaya olhwanzo n’erisima liwe omwa mibere eyikaleka abaana biwe ibayowa buholho ndeke. Abaana bakanza thatha ng’oyo n’erimuyikethera.

22. Ngoku kiri omu 1 Petero 5:1-3, “esyombuli” ni syandi, kandi sitholere isyathwalhwa sithi?

²² Omwa kithunga. Abasyakulhu batholere ibibuka ngoku “esyombuli” si syabu. (Yn. 10:16; soma 1 Petero 5:1-3.) Ebinywe “esyombuli sya Nyamuhanga,” “busana na Nyamuhanga,” na “mwahebawa eritheya” bikibukaya abasyakulhu ngoku esyombuli ni sya Yehova. Anzire esyombuli siwe isyabuya-buywa n’erikanganibwa olhwanzo. (1 Tes. 2:7, 8) Abasyakulhu abakaberereraya olhukwamirwa lhwabu ng’abalisya omo  lhwanzo bakasimawa na Yehova. Balikyethu bakanza n’erisikya abasyakulhu ng’abo.

23-24. (a) Abasyakulhu bawithe lhukwamirwaki bikahika okw’iwathikya oyuwabirikolha ekibi ekikalire? (b) Ni byahi ebya basyakulhu batholere ibalengekaniako bakawathikya omo myatsi ng’eyo?

²³ Abasyakulhu bawithe lhukwamirwaki bikahika okw’ikania n’oyuwabirikolha ekibi ekikalire? Olhukwamirwa lhwabu lhuli mbaghane okwa lhw’abatsweri n’abakulhu ababya ahisi sy’Emighambo eya Nyamuhanga aha Abaisraeli. Omwa Mighambo eyo, abalhume abawithe esyongwamirwa isibalisubulira okw’itswera emyatsi eyihambire okw’iramya lisa aliwe n’okwa bakakakalhukana n’abakathwa ebilhaghiro. Aliwe, omwa Mighambo ya Kristo, abasyakulhu bawithe olhukwamirwa lhw’eriwathikya oyuwabirikolha erilholho erihambire okwa bughuma bwiwe na Yehova. Bakabya ibanasi ngoku Nyamuhanga akalighira abathabali b’ekihugho erikolha okwa bakakakalhukana n’abakathwa ebilhaghiro. Omo mwamuli obuthoki bw’erilihisya omundu kutse erimuhira omo ngomo.​—Abar. 13:1-4.

²⁴ Abasyakulhu bawithe lhukwamirwaki bikahika okw’iwathikya oyuwabirikolha ekibi ekikalire? Bakakolesaya Amasako erilebya ndeke emyatsi n’erithwamu. Bak’ibuka ngoku emighambo ya Kristo yiseghemere oko lhwanzo. Olhwanzo lhukaleka abasyakulhu ibalengekania oku kino: Ni kyahi ekikayithaghisibawa eriwathikya mulikyethu omwa kithunga oyuwabirikolha ekibi ekikalire? Bikabya bikahika okwa mukolha-nabi, olhwanzo lhukaleka abasyakulhu ibalengekania oku bino: Anabiriyisubamu? Thwangana muwathikya erisuba-subana bunyakirimu?

25. Omwatsi owakakwamako akendi syakania okuki?

²⁵ Ka thukasima kutsibu eribya ahisi sy’emighambo ya Kristo! Ithwe bosi thwamalengaho erighonderayo, ithukendi wathikya omw’iyira ekithunga mo mwanya ogho buli mundu angayowa inianzibirwe, mw’omughaso, kandi ow’obuholho. Nomwabine, thuli omwa kihugho ekiri ‘mw’abandu babi’ abakongera “eribya babi.” (2 Tim. 3:13) Thutholere ithwabya ithunatheghirye. Ekithunga ky’Ekikristayo kyangakangania kithi obulingirirania bwa Nyamuhanga bikahika okwa myatsi y’erikolha okwa baana kw’eby’obuthundirya? Omwatsi owakakwamako akendi subirya okwa kibulyo ekyo.