1. Ni kyahi ekikaleka abandi ibalemwa eriyeghesya?

KIKAYITHAGHA erikolha kutsibu erithoka amayisya ebiro bino. Balikyethu bangyi bakakolha ahabw’esaha nyingyi eribana ebikayithaghawa omwa maka wabu. Abandi bangyi bakakolha syosaha nene obuli kiro erighenda n’erilhua okwa mubiiri. Abandi bakasondaya akasente omw’ikolha kutsibu omubiiri w’erikolesya amani manene. Balikyethu abakakolha kutsibu aba bakalhuha! Neryo abanene bakayisanga isibakiyeghesaya.

2. Ni buthuku bwahi obwa wukabanira mw’endambi y’eriyeghesya?

² Okwenene kuli kuthi, thukathekawa eribana endambi y’eriyeghesya​—eriyeghesya ndeke​—Ekinywe kya Nyamuhanga n’ebitabu byethu by’Ekikristayo. Obughuma bwethu na Yehova n’eribana engebe y’erikotha biseghemere okw’iyeghesya lyethu! (1 Tim. 4:15, 16) Abandi bakabuka omwa ngyakya-ngyakya obuli kiro neryo ibayeghesya eka iyinathekene n’obwongo ibukinathekene. Abandi bakayihiriraho esyodakika nyike omw’igholho erirya ebyalya by’obunyakirimu n’erighanirya kubyo.

3-4. Ni mbinduka syahi esyabirihirwaho omo myatsi eyathukahebawa, kandi busana naki?

³ Ahathe erithika-thika, wukaligha ngoku ni kikulhu eribana endambi y’eriyeghesya. Aliwe ni byahi ebya thutholere ithwayeghesya? Iwangana bugha wuthi, ‘Ni bingyi eby’erisoma. Kikanyikalira erisoma ebyosi.’ Abandi bakathoka eriyirisya ebyalya ebyosi eby’obunyakirimu ebya thukahebawa, aliwe abangyi omwa balikyethu ikyabakalira eribana endambi ey’erikolha ekyo. Akathunga Akakasondolha kanasi ekyo. Busana n’ekyo, lino-lino muhabere obusondoli obw’erikehya okwa myatsi eya thukahebawa okwa syompapura n’okwa Intaneti.

 ⁴ Ng’eky’erileberyako, sithukihulhukaya e Yearbook of Jehovah’s Witnesses, kundi ebyalholirweko bingyi ebikahimba bine okwa jw.org^® n’omwa syondegheka sy’obuli kwezi okwa JW Tivi^®. Egazeti ey’Akaleberyo ey’erighaba na Awake! hathya sikahulhukibawa mirundi isathu misa omo mwaka. Si bugha indi esyombinduka esi syakolhawa nuku thubane endambi y’erikolha eyindi mibiiri. Aliwe syakolhawa nuku thubane endambi y’erikolha “ebikulhu kutsibu.” (Fil. 1:10, NW) Thulebaye ngoku thwanga yihiriraho ebilhubirirwa kandi ngoku thwanga ghasirwa omw’iyeghesya lyethu.

5-6. Ni bitabu byahi ebya thutholere ithwayeghesya ndeke?

⁵ Ni byahi ebya thutholere ithwatsuka eriyeghesya? Thutholere ithwayeghesya Ekinywe kya Nyamuhanga buli kiro. Esyosura sy’erisoma omwa busomi bwe Biblia omwa kithunga syabirikehibwa nuku thubane obuthuku bw’erighanirya n’erisekulya okwa byathulyasoma. Ekilhubirirwa kyethu, siry’erighunza obusomi, aliwe ly’erilighira omwatsi we Biblia erihika okwa muthima n’erithuthunda hakuhi na Yehova.​—Esy. 19:14.

⁶ Ni bindi byahi ebya thutholere ithwayeghesya ndeke? Thwanzire ithwathegheka Akaleberyo ak’Erigha n’Erigha lye Biblia ery’Ekithunga kuthya n’eyindi myatsi ey’omwa muhindano wa hakathi-kathi k’eyenga. Kandi thutholere ithwasoma n’esyogazeti esy’Akaleberyo na Awake!

7. Mbwino thunatholere ithwahwa amani thwamathendi thoka eriyeghesya ebyosi ebiri okwa muthahulha wethu n’okwa JW Tivi?

⁷ Wangana bugha wuthi, ‘Oke, ibbwa emyatsi n’esyovidiyo ebikabya okwa muthahulha wethu owe jw.org, n’emyatsi eyikakanganibawa okwa JW Tivi? Ni bingyi!’ Thalebya eky’erileberyako kino: Omwa huteri mukabya byalya bingyi muthina-muthina ebisihire. Aliwe abakasa omwa huteri sibanga thoka erirya okwa byosi. Neryo bakalya ebyo banga thoka. Kuthya, wamabya isiwanga thoka eriyeghesya ebyosi ebikasira okwa Intaneti, isiwahwa amani. Soma kutse erilebya ebya wanga thoka. Thukanaye eriyeghesya nga mwamuliki kandi ngoku thwanga ghasirwa omw’iyeghesya lyethu.

8. Ni byahi ebya thwanga kolha thukayeghesya Akaleberyo, kandi erikolha ekyo lyanga kughasira lithi?

⁸ Eriyeghesya mwamuli erisoma iwune n’ekilhubirirwa ky’erighanirya. Si kwama kya soma-soma buyira omwatsi owahebirwe n’eriramba eby’erisubirya. Ng’eky’erileberyako, wukathegheka Akaleberyo ak’Erigha, ambi iwatsuka erilebya ebikendi kanibwako ebiri okw’itsuka ly’omwatsi. Enyuma waho, iwalebya omuthwe w’omwatsi, n’emithwe mike-mike n’ebibulyo by’eriyibukya. Neryo, iwasoma omwatsi lyolho-lyolho kandi ndeke. Lebaya ndeke ebinywe ebihirikirire enungu, mughulhu mungyi ebikabya okw’itsuka ly’obuli nungu. Bikakuwathikaya eriminya enzumwa eya nungu yikakanayako. Wukasoma omwatsi wosi, lengekanaya obuli nungu nga yikasighika yithi emithwe mike-mike n’omuthwe mukulhu. Handika ebinywe ebya wuthalhue wasi n’esyonzumwa ebya wanga thasyasekulyako.

9. (a) Busana naki thutholere ithwalebya ndeke amasako thukigha Akaleberyo kandi thuthi? (b) Ngoku kiri omu Yosua 1:8, eryongera okw’isoma amasako, ni kyahi ekya thutholere erikolha?

⁹ Erigha Akaleberyo n’igha e Biblia. Busana n’ekyo, lebaya ndeke amasako, kwilhabirirya awakendi somwa ekithunga kik’igha omwatsi oyo. Lebaya ndeke ebinywe ebiri  omwa masako nga bikasighika bithi enzumwa eyiri omwa nungu. N’ekindi, ghaniraya oko masako agho wukasoma, kandi lengekanaya nga wanga kolesyagho wuthi omwa ngebe yawu.​—Soma Yosua 1:8.

10. Erikwamana na Abaebrania 5:14, busana naki ababuthi batholere ibeghesya abaana babu ngoku banga yeghesya n’erisekulya?

¹⁰ Ni kwenene, ababuthi banzire abaana babu ibatsemera Eriramya ly’Eka ery’obuli yenga. Aliwe, nomwakine indi ababuthi batholere ibalengekania okwa bya bangahira omw’iramya lyabu ly’eka, isibayowa bathi batholere ibakolha ng’omusathu owaseghemere okwa biri omwa Biblia kutse ebindi ng’ebyo obuli yenga. Nomwakine indi Eriramya ly’Eka lyangana kolhwa omw’ilebya endegheka ye JW Tivi, kutse erikolha ekindu kirebe, obundi ng’erikolha ekiri ng’obwathu bwa Noa, ni kikulhu abaana nabu erikangiriribwa ngoku banga yeghesya. Ng’eky’erileberyako, batholere ibaminya ngoku banga thegheka emihindano y’ekithunga, kutse ngoku banga sekulya oko mwatsi owabalyabulibawa okwa sukuru. (Soma Abaebrania 5:14.) Bamayeghesya omwatsi mulebe we Biblia omw’iramya ly’eka, ikikendi leka ibathoka erikwama-kwamania ndeke emyatsi eyikalhabibawa okwa mihindano y’ekithunga, emike-mike, n’eminene-minene, eyithebyako mughulhu wosi erilebya evidiyo. Ni kwenene, endambi eya mwanga ghunza omw’iramya ly’eka yikasighikira oko myaka y’abaana n’emibere yabu.

11. Busana naki ni ky’omughaso erikangirirya abigha bethu be Biblia eriyeghesya ndeke ahabwabu?

¹¹ Abigha bethu be Biblia nabu batholere ibigha ngoku banga yeghesya. Kundi ni bahyaka, thukatsema thukalhangira ibabirithegheka n’eriramba eby’erisubirya thukigha nabu kutse okwa mihindano. Aliwe thutholere ithwakangirirya abigha bethu ngoku banga sekulya kandi ngoku banga yeghesya ibobene. Omo nzira eyo, ebitsibu ibikendibya bikabahikako, omwakanya k’eryanguha erisondya obuwathikya okwa balikyethu, ibakendi minya ngoku banga yisonderya obuwathikya omw’isekulya omwa bitabu byethu.

12. Ni bilhubirirwa byahi ebya thwangabya nabyo thukayeghesya?

¹² Wamabya iwuli mundu oyuthyanza erigha, iwangana lengekania wuthi sihali ekiro wukendi syatsemera eriyeghesya. Aliwe wangana thoka. Wangana tsuka omw’iyeghesya habw’endambi nyike neryo iwaghenda wuk’ongera endambi eyo lyolho-lyolho. Ibya n’ekighendererwa  wukayeghesya. Thunasi ngoku ekilhubirirwa kyethu kikulhu ly’erianza eriyithunda hakuhi na Yehova. Ekilhubirirwa ekya thwanga hikako lhuba ly’erisubirya ekibulyo ekya mundu abiribulya kutse erisekulya okwa kitsibu ekyo thuwithe.

13. (a) Soborera ebya omulere oyuli omwa sukuru angakolha erilhwira eby’ikirirye. (b) Wangakolesya wuthi erihabulha eriri omu Abanya Kolosai 4:6?

¹³ Ng’eky’erileberyako, wuli mulere oyukine omwa sukuru? Abawukasoma nabu banganabya abosi ibak’ibuka ebiro byabu by’amabuthwa. Wanganabya iwanzire eribasoborera erilhua omwa Biblia ekikaleka iwuthasangira omwa magheni aw’eryibuka ebiro byabu by’amabuthwa, aliwe obundi iwayowa nga siwanga thoka. Neryo wukayithagha eriyeghesya oko mwatsi oyo! Wangana kolha eki habw’ebighendererwa bibiri: (1) erighumya erikirirya lyawu ngoku amagheni w’eryibuka ebiro by’amabuthwa akaponesaya Nyamuhanga na (2) eryuwania amaaka wawu w’erilhwira ekwenene. (Mt. 14:6-11; 1 Pet. 3:15) Iwangana tsuka eriyibulya, ‘Abangasoma nabu bakaha esyonzumwa syahi esikaleka ibibuka ebiro by’amabuthwa?’ Neryo omw’ikolesya ebitabu byethu, sekulhaya ndeke. Erisoborera ebyo wikirirye isikyendi kalha ngoku wulhue wukalengekania. Abandu banene bak’ibuka ebiro by’amabuthwa ahabw’erithabya ibakalengekanaya bathi obuli mundu wosi akab’ibuka. Wamabana enzumwa nguma kutse ibiri, iwangana subirya omundu oyukabulhaya nuku aminye.​—Soma Abanya Kolosai 4:6.

14-16. (a) Wanga kolhaki nuku wuminye ebihambire okwa kitabu kirebe kye Biblia ekya wuthasi ndeke? (b) Omw’ikolesya amasako awakanganibwe, soborera ngoku wanga yitheghererya ndeke ekitabu kya Amosi. (Lebaya n’akasanduko “ Ebya Wukasoma Omwa Biblia Bibye nga Binemukoleka.”)

¹⁴ Thubughe thuthi okwa muhindano thukendi sy’igha buuli okwa kitabu kye Biblia ekya handikawa n’omuminyereri mulebe, obundi oyo wuthasi ndeke. Ekya wutholere iwatsuka erikolha ly’erianza eriminya ndeke ebya omuminyereri oyo ahandika. Ekyo wanga kikolha wuthi?

¹⁵ Erimbere, yibulhaye: ‘Ni byahi ebyo ngasi okwa muhandiki w’ekitabu eki? Abya inindi, abya ikere hayi, abya akakolha mubiiriki?’ Ebihambire oko muhandiki oyo byangana leka iwaminya ebinywe ebyo akolesaya akahandika kutse eby’erilhangirirako ebyo akolesaya. Wukasoma e Biblia, sondaya ebinywe ebikendi leka iwaminya omuhandiki oyo ng’abya mundu oyulyathi.

¹⁶ N’ekindi, ikikendi kuwathikya eriminya ekitabu ekyo nga kyahandikawa mughulhu wahi. Ekyo wangana kikolha omw’ilebya “Erithondekana ly’Ebitabu bye Biblia” eriri okwa lhupapura 1662-1663 omwa Biblia eya New World Translation of the Holy Scriptures. Kandi, iwangana lebya echati ey’abaminyereri n’abami omwa Appendix A6. Ekitabu kye Biblia ekyawukasoma kyamabya ini ky’obuminyereri, ikikendibya kibuya eriminya emibere eyabyaho kikahandikwa. Ni mibere yahi mibi kutse emitse eya omuminyereri anza erihengulha? Ni bahi ababyaho okwa buthuku bwiwe? Eriminya omwatsi wa ndeke, wangana yithagha erilebya omwa bindi bitabu bye Biblia. Ng’eky’erileberyako, eriyitheghererya ndeke ebyabyaho omwa buthuku bw’omuminyereri Amosi, iwukendi ghasirwa omw’irebya emyatsi omwa kitabu kya 2 Abami na 2 Emyatsi y’Emigulu. Eryongera okw’ekyo, iwangana lebya n’ebya Hosea ahandika, oyuwangabya iniabyaho omwa buthuku bughumerere na Amosi. Ebyosi ebi ibikendi kuwathikya eriminya ebyabyaho okwa buthuku bwa Amosi.​—2 Bam. 14:25-28; 2 Emy. 26:1-15; Hos. 1:1-11; Amo 1:1.

17-18. Omw’ikolesya eby’erileberyako ebiri omwa nungu kutse eky’erileberyako ekya wuwithe, kanaya ngoku n’ehindu ehikalhangirika nga hike-hike hyangana leka iwatsemera eriyeghesya lyawu.

¹⁷ Ni kibuya erisoma e Biblia iwune n’omuthima ow’erianza eriminya bingyi. Ng’eky’erileberyako, thubughe thuthi, wukasoma esura 12 ey’obuminyereri bwa Zekaria, eyikakanaya okwa lhuholho lhwa Masiya. (Zek. 12:10) Omughulhu wukasoma omulhondo owa 12, iwasoma wuthi “ekithunga ky’enyumba ya Natani” kyasyalira busana n’olhuholho lhwa Masiya. Omwakanya k’erikwama kyalhaba, iwangana n’imana hake n’eriyibulya: ‘Ekithunga kya Natani na Masiya bihambene bithi? Mbwino hane ekya wanga kolha eriminya bingyi?’ Iwangana kolha “ow’erisosothya.” Ng’eky’erileberyako, iwangana lebya amasako awakangirirwe omwa New World Translation of the Holy Scriptures. Hali amasako abiri awakakangirirawa omwa Zekaria 12:12. Ery’erimbere likathuthwalha oku 2 Samweli 5:13, 14, ahakakanganaya ngoku Natani abya mughuma w’okwa baghalha b’Omwami Dawudi. Eryakabiri erikangirirwe ni Luka 3:23, 31, erikakanganaya ngoku Yesu abya mwitsikulhu wa Natani erilhabira omu Maria. (Lebaya Akaleberyo, Okwomunani 2017, olhup. 32, enu. 4.) Neryo iwanzisibwa! Wulhue iwunasi ngoku obuminyereri mubwabugha buthi Yesu angabere mughalha wa Dawudi. (Mt. 22:42) Aliwe Dawudi aby’awithe baghalha abalhabire oku 20. Ka kikatsemesaya erilhangira ngoku Zekaria akakanaya okwa kithunga kya Natani erilira busana n’olhuholho lhwa Yesu.

¹⁸ Thasyalebaya ekindi ky’erileberyako. Omwa sura y’erimbere omwa Luka, thukasoma thuthi omumalaika Gabrieli mwabungira Maria n’erimubwira oko mwana oyo akendi butha: ‘Asyabya mukulhu, kandi asyahulhwa  mo Mughalha wa Nyamuhanga w’Endatha Kutsibu. Omukama Nyamuhanga asyamuha ekithumbi ky’obwami kya thatha-kulhu wiwe Dawudi. Asyathabalira ekihanda kya Yakobo kera na kera.’ (Lk. 1:32, 33) Ithwangana yisanga ithwabirihira omuwatho okwa kitsweka ky’erimbere eky’omwatsi wa Gabrieli, ekya Yesu eribya “Mughalha wa Nyamuhanga w’Endatha Kutsibu.” Aliwe Gabrieli kandi mwabugha athi Yesu ‘angathabere’ ng’Omwami. Neryo ithwangana yibulya Maria ng’angayitheghererye athi ebinywe bya Gabrieli ebyo. Mbwino mwanalengekania athi Gabrieli akabugha athi Yesu akendi suba omwa mwanya w’Omwami Herode​—kutse omughuma w’okwa bakendi syasubuka Herode? Yesu kwabya mwami, Maria angabere nya-mwami, n’eka yiwe iy’ikalha omwa kikali. Aliwe, omwa Biblia simuli aho Maria abwira Gabrieli ekiri ng’ekyo; kandi sihali n’ahothukasoma indi Maria mwasaba erihebwa ekitsumbi omo Bwami, ngoku abigha ba Yesu babiri bakolha. (Mt. 20:20-23) Omwatsi oyu akaleka ithwaminya ngoku Maria abya mukali oyuyikehirye kutsibu!

19-20. Ngoku kiri omu Yakobo 1:22-25 na 4:8, ebilhubirirwa byethu by’eriyeghesya ni byahi?

¹⁹ Thutholere ithwibuka ngoku ekilhubirirwa kyethu kikulhu eky’eriyeghesya Ekinywe kya Nyamuhanga n’ebitabu byethu ly’eriyithunda hakuhi na Yehova. Kandi thwanzire ithwongera erilhangira ku ‘thusosire’ n’esyombinduka esya thutholere erikolha nuku thutsemesaye Nyamuhanga. (Soma Yakobo 1:22-25; 4:8.) Okwa buli yeghesya thutholere ithwatsuka erisaba Yehova y’omulimu wiwe. Thutholere ithwamulemba-lemba erithuwathikya erighasirwa ndeke omwa bya thukigha n’eriyilhangira ngoku akathulhangira.

²⁰ Ambi ithwe bosi ithwabya ng’omundu wa Nyamuhanga oyukanibweko n’omuhandiki w’esyonyimbo athi: ‘Emighambo y’Omwami Mukulhu ni butseme bwiwe, ak’igha Emighambo yiwe omo musibo n’omo kiro. N’ebyosi omundu oyu akakolha bikatsumulhawa.’​—Esy. 1:2, 3.