Awandi maminyereri omwa chati eno akakanaya okwa bindu ebikabererera oko buthuku bughumerera. Awosi akakanganaya ngoku thuli omo “mughulhu w’enduli y’emighulhu.”​—Dan. 12:4.

• Erisako Erib. 11:7; 12:13, 17; 13:1-8, 12

  Obuminyereri “Enyama” yabirithabalha abandu habw’emyaka eyilhabire oku 3,000. Okwa mughulhu w’enduli, omuthwe wayu w’omusanju akahuthalha. Enyuma waho, ekironda kikalhama “n’ekihugho kyosi” kikakwama enyama. Sitani akakolesaya enyama ‘erilhwa n’abandi bandu b’olhubutho lhw’omukali.’

  Eribererera Enyuma w’Erighunga ly’Amaghetse, esyogavumente sy’abandu esikahakanisaya Yehova sikahangana. Enyuma w’emyaka nga 3,000, omwa Lhuhi lhw’Ekihugho Kyosi lhw’Erimbere, Obuthabali bwe Bwengereza bukahwa amani. Bukathasyathunga amani e Amerika yikabuyiyungako. Omwa buthuku bw’enduli, Sitani akakolesaya amathabali wosi w’okwa kihugho eriendererya abandu ba Yehova.

• Erisako Dan. 11:25-45

  Obuminyereri Amalhwa ahakathi-kathi k’omwami w’elhuthambi lhw’endatha n’omwami w’elhuthambi lhw’eyikwa omwa biro by’enduli.

  Eribererera E Germany yikalhwa ne Anglo-America. Omwa 1945 e Soviet Union n’abakasighikayo bakabya mwami w’elhuthambi lhw’endatha. Omwa 1991, e Soviet Union yikawa, neryo endambi yikahika, e Russia n’abakasighikayo bakabya mwami w’elhuthambi lhw’endatha.

• Amasako Isa. 61:1; Mal. 3:1; Lk. 4:18

  Obuminyereri Yehova akathuma “omukwenda” ‘eryuwania enzira’ Obwami bw’Ekimasiya buthe bwatsuka. Omukwenda akatsuka “erithulha engulhu yuwene y’okwa bera.”

  Eribererera Eritsuka 1870, C. T. Russell n’ababya nayu bakakolha kutsibu erilebya ebya Biblia yikakangiriraya. Omo myaka eya 1880, bakatsuka erihira omwa baghombe ba Nyamuhanga mw’omuhwa w’erithulira. Bakahulhukaya emyatsi nga “Abathuliri 1,000 Bakayithaghisibawa” na “Erihakabibwa Eribya Bathuliri.”

• Erisako Mt. 13:24-30, 36-43

  Obuminyereri Enzighu yikahera ebithi by’omwa ngano neryo bikakulha n’eribisa engano erihika okwa buthuku bw’erighesa; neryo ebithi bikalhusibawa omwa ngano.

  Eribererera Eritsuka 1870 erilholya embere, kik’olhoba eriminya Abakristayo ab’okwenene n’ab’amabehi. Omwa buthuku bw’enduli, Abakristayo ab’okwenene bakahindanibawa n’erihighulhwa omwa Bakristayo b’amabehi.

• Erisako Dan. 2:31-33, 41-43

  Obuminyereri Ebisando by’ekyuma n’eribumba biri okwa sanamu eyikolirwe omwa byuma muthina-muthina.

  Eribererera Eribumba lik’imanira abandu ababuli kiro abathaberweko n’Obuthabali bw’Ekihugho Kyosi obwe Anglo-America aliwe ibahangana eribuhakanisya. Abandu abo bakatsekaya amaaka w’obuthabali bw’ekihugho kyosi obu eribya isibukiwithe amaaka awali ng’ekyuma.

• Erisako Mt. 13:30; 24:14, 45; 28:19, 20

  Obuminyereri “Engano” yikahirawa omwa “kighona” neryo “omughombe oyuthereghulha n’ow’amenge” akasombolhawa erimanira “abaghombe b’enyumba.” “Engulhu yuwene y’Obwami” yikatsuka erithulhughanibwa “omwa kihugho kyosi.”

  Eribererera Omwa 1919 omughombe oyuthereghulha n’ow’amenge akasombolhawa nuku asondole abandu ba Nyamuhanga. Eritsuka okwa buthuku obo n’erilholya embere, Abigha be Biblia bak’ongera erithulira lyabu. Munabwire, Abema ba Yehova bakathulira omwa bihugho ebilhabire omu 200 n’erihulhukya ebitabu ebiseghemere okwa Biblia omwa mibughe eyilhabire omu 1,000.

• Amasako Dan. 12:11; Erib. 13:11, 14, 15

  Obuminyereri Enyama ey’amahembe abiri yikabwira abandu okwa kihugho yithi bakole “esanamu busana n’enyama” kandi yikaha “omuka okwa sanamu.”

  Eribererera Obuthabali bw’Ekihugho Kyosi obwe Anglo-America bukatsukisaya ekithongole eky’Amahanga Awayitherene. Awandi mahanga akasighika ekithongole eki. Erighunzerera, omwami w’elhuthambi lhw’endatha nayu akayiyunga okwa kithongole eki​—aliwe akakolha ekyo omwa 1926 erihika 1933 misa. Amahanga Awayitherene akahebawa eripipwa eritholere Obwami bwa Nyamuhanga. Ekyo ky’ekyanabiribya n’okwa Bughuma bw’Ebihanda (UN).

• Erisako Dan. 8:23, 24

  Obuminyereri Omwami oyukalire ‘akaheraya n’eriswekya.’

  Eribererera Obuthabali bw’Ekihugho Kyosi obwe Anglo-America bwabiritha bandu bangyi n’eritsandya kutsibu. Ng’eky’erileberyako, omwa Lhuhi lhw’Ekihugho Kyosi Olhwakabiri, e Amerika muyatsandya kutsibu yikathogherya okwa syonzighu sye Amerika ne Bwengereza kw’esyobbomu.

• Amasako Dan. 11:31; Erib. 17:3, 7-11

  Obuminyereri “Enyama” eyiwithe amahembe ikumi yikalhua omwa buhya kandi ni mwami w’omunani. Ekitabu kya Danieli kikahulha omwami oyu mo “enye y’eriherya.”

  Eribererera Ekithongole eky’Amahanga Awayitherene kikahwa amani omwa Lhuhi lhw’Ekihugho Kyosi Olhwakabiri. Enyuma w’olhuhi, ekye UN ‘kikahanganibawa.’ Ng’ekithongole eky’Amahanga Awayitherene, e UN nayo yikahebawa olhukengerwa olhutholere Obwami bwa Nyamuhanga. E UN yikendi bindukira amadini.

• Amasako 1 Tes. 5:3; Erib. 17:16

  Obuminyereri Ebihanda bikarangirira “obuholho n’eriyisyandira,” neryo “amahembe ikumi” ne “nyama” bikabambira “omumalaya” n’erimuthoghothya. N’enyuma waho, nabyo bikathoghothibawa.

  Eribererera Ebihanda byangana syabugha bithi byabiriletha obuholho n’obwiranda omwa kihugho. Neryo ebihanda ebikasighika e UN ibyathoghothya amadini w’amabehi. Eyi yikendi syabya nzuko y’obulighe bunene. Obulighe obo bukendi syaghunzaho ekihugho kya Sitani ekyosi okwa Harmagedoni.

• Amasako Eze. 38:11, 14-17; Mt. 24:31

  Obuminyereri Gogi akabambira abandu ba Nyamuhanga. Neryo abamalaika bakahindanaya “abayisoghawa.”

  Eribererera Omwami w’elhuthambi lhw’endatha, haghuma n’esindi gavumente, bakabambira abandu ba Nyamuhanga. Buthuku buke, eribambira eri lyalitsukire, emisighalira y’abahakabibwa bakathwalhawa elhubulha.

• Amasako Eze. 38:18-23; Dan. 2:34, 35, 44, 45; Erib. 6:2; 16:14, 16; 17:14; 19:20

  Obuminyereri “Oyuwikere” oko “sabayiri nyeru-nyeru” akakinda ndeke omw’ithoghothya Gogi n’amahe wiwe. “Enyama” yikaghusawa “omo ngetse ey’omuliro eyikaghulhumira n’ekirimi,” n’esanamu nene yikathulhangawa.

  Eribererera Yesu, Omwami oyukathabalha Obwami bwa Nyamuhanga akalhamaya abandu ba Nyamuhanga. Iyo n’abandu 144,000 n’amahe wiwe w’abamalaika, akathoghothaya ebihanda ebiyiyungire haghuma, ekihugho kya Sitani eky’ekipolitiki.