Sara * akabugha athi: “Ngali w’esisoni kandi ngayowa nga singasiki. Neryo sindi yowa buholho omwa ab’ekanda-kanda. Aliwe ngayowa buholho eribya n’omundu mwolho n’oyuyikehirye. Omundu ng’oyo ngamubwira eriyowa lyaghe n’ebitsibu byaghe. Banywani baghe b’okwa ndungu ku bali bathya.”

Ebinywe bya Sara bikakanganaya ngoku omuthima mwolho akaleka abandi ibathwanza. Kandi obwolho bukatsemesaya Yehova. Ekinywe kiwe kikathubwira kithi: “Muyire omuthima . . . ow’obwolho.” (Kol. 3:12) Omuthima w’obwolho niki? Yesu mwakangania athi omuthima ow’obwolho? Kandi omubere oyu ang’ongera athi etseme yethu?

Omuthima mwolho ni mubere ogho mundu akathunga amabya ini mundu w’obuholho. Omundu mwolho akakolongana n’abandi inianathekene, ni w’olhukeri kandi amabana ebikalyambaya akabya inianahumulikene n’eriyitheya.

Eribya n’omuthima mwolho si butseke. Ekinywe kye Kigiriki ekya “omuthima mwolho” ikikakolesibawa okwa sabayiri y’omoli eyabirithungwa. Esabayiri eyo yikabya iyikinawithe amani, aliwe yikabya iyabiryeghesibwa eribya nyolho. Kuthya, thukabya thukabya n’omuthima mwolho, thukabya ithwabirikakirya obukale obuthulimu neryo ithwakolongana n’abandi omwa buholho.

Ithwangana bugha thuthi, ‘Ingye sindi mwolho.’ Thuli omwa kihugho ekiri mw’abandu ab’ekanda-kanda n’erithendi yikakirya, neryo kyangana thukalira eribya n’omuthima mwolho. (Abar. 7:19) Neryo, kikayithagha akaghalha eribya n’obwolho, aliwe omulimu abuyirire wa Yehova iniakendi thuwathikya erilengaho eribya n’omubere oyo. (Gal. 5:22, 23) Busana naki thutholere ithwahiraho akaghalha eribya n’obwolho?

Obwolho bukaleka ithwabana abanywani. Nga Sara, oyuli ahighulhu, nethu thukayowa buholho eribya n’abandu ab’omuthima mwolho. Yesu ni ky’erileberyako ekyuwene eky’eribya n’omuthima w’obwolho n’olhukeri. (2 Kor. 10:1) N’abaana abathabya bamwasi mubanza eriyithunda hakuhi nayu.​—Mk. 10:13-16.

Obwolho bukathutheghaya kuthya n’abo thuli nabo. Thwamabya n’omuthima w’obwolho, isithwendi hithana lhuba-lhuba. (Emi. 16:32) Ekyo ikikendi thubalya okwa bulhumi obukalhua omw’ihithania  abandi​—kutsibu-tsibu abo thwanzire. Kandi obwolho bukatheghaya abo thuli n’abo kundi bukaleka ithwayikakirya.

Yesu nomwanabya awithe bingyi eby’erikolha mwakangania abandu bosi b’omuthima w’obwolho. Abangyi omwa biro biwe babya bakanuba n’eriheka ebirithohire, neryo babya ibakayithagha erilhuhukibwa. Bangabya imubayowa ndeke Yesu akababwira athi: “Mwase okw’ingye, . . . kusangwa indi mwolho-mwolho n’ow’omuthima ahehere”!​—Mt. 11:28, 29.

Thwangabya thuthi n’omuthima w’obwolho nga Yesu kw’abya? Thukigha Ekinywe kya Nyamuhanga nuku thuminye Yesu ng’abya akakolongana athi n’abandu n’ekyo abya akakolha omwa mibere eyikalire. Neryo thukabya thukabana ebikalenga okwa muthima wethu ow’obwolho, thukalengaho erigherererya Yesu. (1 Pet. 2:21) Thalebya ebindu bisathu ebyawathikaya Yesu eribya w’omuthima w’obwolho.

Yesu abya ayikehirye. Yesu mwabugha athi ni “mwolho-mwolho n’ow’omuthima ahehere.” (Mt. 11:29) E Biblia yikahulira emibere ibiri eyi yo haghuma kundi obwolho buhambene n’eriyikehya. (Efe. 4:1-3) Busana naki kiri kithya?

Eriyikehya likathuwathikaya erithendibya bandu abakahiririkana busana n’ebya bandi bakathubughako kutse erikolha. Yesu mwakolhaki abandu bakamutsambulikania bathi ni “w’omururu” kandi “mukundirya”? Mwakikangania omwa mibere yiwe ngoku ayo ni mabehi, n’omwa bwolho-bwolho mwakangania ngoku “amenge wa Nyamuhanga akaminyikalha omo mibiiri yagho.”​—Mt. 11:19.

Omundu amabugha nabi okwa rangyi yawu, ekihugho ky’ewenyu, kutse emibere eya wukuliremu, ambi iwamusubirya omwa muthima w’obwolho. Peter, omusyakulhu w’ekithunga e South Africa, akabugha athi: “Namahithana busana n’ekyo mundu alyabugha, Ngayibulhaya indi, ‘Yesu angakolireki?’” Ak’ongerako athi: “Nabir’igha erithendi yilhangira nga ngalengire abandi.”

Yesu abya inianasi ngoku abandu sibahikene. Abigha ba Yesu ibakabya ibananzire erikolha ebihikire, aliwe ihakanayira obuthahikana bwabu ibwabalemesya. Ng’eky’erileberyako, omw’ithumbi Yesu athali aholha, Petero, Yakobo, na Yoane mubalemwa erimusighika ngoku abasaba. Yesu mwalhangira ngoku “omuthima akaligha, nikwa omubiri ni mwolho.” (Mt. 26:40, 41) Kundi Yesu abya inianasi ekyo, mwathahithana oko bakwenda biwe.

Mwali wethu Mandy iniabeghere eritsweba-tsweba abandi, aliwe hathya akalengaho erigherererya omuthima w’obwolho owa Yesu. Akabugha athi, “Ngalengaho eryibuka ngoku ithwe bosi sithuhikene n’erilhangira emibere mibuya y’abandi, ngoku Yehova akakolha.” Mbwino omubere wa Yesu ow’erilhangira erilemererwa ly’abandu, angana kuwathikya erikolongana n’abandi omwa bwolho?

Yesu mwayikethera Nyamuhanga. Yesu iniane okwa kihugho mwaghumira erikolhwa nabi. Mwayitheghereribwa muhanda, amaponwa, n’eriaghalibwa. Nomwabine, mwabya iniane w’omuthima w’obwolho kundi “mwayihira omo byalha by’oyukatswera ebithunganene.” (1 Pet. 2:23) Yesu abya inianasi ngoku Thatha wiwe w’elhubulha akendi mutheya n’okwa buthuku obutholere iniasuyira abakamukolha nabi.

Thwamakolhwa nabi neryo thukahithana, ithwangananza eriyilhwirako neryo ithwakalya emyatsi. Ky’ekikaleka Amasako iniathwibukya athi: “Erihithana ly’abandu siririyira erithunganene lya Nyamuhanga.” (Yak. 1:20) Nomuthwangabya ithunawithe ekyangaleka ithwahithana, obuthahikana bwangana leka ithwakolha ebithuwene.

Mwali wethu Cathy owe Germany iniakalengekanaya athi, ‘Wamathendi yilhwirako, sihali oyuwanga kulhwirako.’ Aliwe abere abirigha eriyikethera Yehova, mwahindulha amalengekania. Akabugha athi, “Lino singakiyilhwira-lhwirako. Lino ngayowa buholho eribya n’omuthima w’obwolho, inganasi ngoku Yehova akendi syaghunzaho ebyosi ebithuwene.” Wamabya iwanakolirwe nabi, erighendera okwa ky’erileberyako kya Yesu eky’eriyikethera Nyamuhanga ikikendi kuwathikya eribya n’omuthima w’obwolho.

Yesu mwabugha athi thwamabya thwanzire eritsema, thutholere ithwabya b’omuthima mwolho. Mwabugha athi: “Obutseme buli oko b’omuthima mwolho.” (Mt. 5:5) Thalhangira aho omuthima mwolho akathuwathikiraya.

Obwolho bukaletha omwa butheke mw’obuholho. Robert owe Australia akabugha athi: “Nabiribwira mukali waghe y’ebindu bingyi ebikahithanaya omw’ithendi kighenderera. Aliwe ebinywe ebikabughawa omw’ihithana bikabya ibyabiribuwa. Iningayowa nabi ingaminya ngoku nabirimuhithania.”

“Ithwe bosi thukathalha omo bingyi,” ebya thukabugha n’amalengekania wethu byanganaletha ebitsibu omwa butheke. (Yak. 3:2) Omwa mibere ng’eyi, omuthima w’obwolho akaleka ithwathekana n’erikakirya ebya thukabugha.​—Emi. 17:27.

Robert mwahiraho akaghalha kanene eribya mwolho n’eriyikakirya. Ni kyahi ekyabirilhwiririramo? Akabugha athi, “Ebiro bino, hamabya erithendi yitheghererania, ngalengaho kutsibu erihulikirira ndeke, erikania omwa muthima mwolho, n’erithendi hithana lhuba-lhuba. Obughuma bwaghe na mukali waghe bwabiryuwana.”

Obwolho bukaleka ithwakolongana ndeke n’abandi. Abakahithana lhuba-lhuba sibalibana abanywani. Aliwe, obwolho bukathuwathikaya ‘eribya n’obuholho obukamathanaya haghuma.’ (Efe. 4:2, 3) Cathy, oyuli omo mwatsi ono, akabugha athi, “Obwolho bukaleka ingatsemera eribya n’abandi, nomwakine indi abandi bandu bakalire.”

Obwolho bukaletha erithekana. E Biblia yikahambanaya “amenge awakalhua endatha” n’erihehera (obwolho) n’obuholho. (Yak. 3:13, 17) Ow’omuthima mwolho awithe “omuthima owakayibombeka,” kutse owathekene. (Emi. 14:30) Martin, oyuwabirihiraho akaghalha eribya n’omubere w’obwolho akabugha athi, “Lino singa kihithana lhuba-lhuba, neryo ngawithe obuholho kandi ngatsemire.”

Ni kwenene, thwangana yithagha erihiraho akaghalha eribya n’omuthima mwolho. Mughalha wethu mughuma, akabugha athi, “Erithabugha okwenene, hakanayira ingakwa ekinigha kinene.” Aliwe, Yehova oyukathuhira mw’omuhwa w’eribya b’omuthima mwolho, akendi thuwathikya. (Isa. 41:10; 1 Tim. 6:11) Angana ‘thuhikania’; ‘iniathuha amaaka.’ (1 Pet. 5:10) Nethu nga Paulo, thwangana gherererya “obwolho n’obubuya bwa Kristo.”​—2 Kor. 10:1.