1-2. Omo mwatsi ono thukendikania okuki?

LINO thuwithe obwema bungyi obukakanganaya ngoku thuli okw’ighunzerera ly’ebiro by’enyuma-nyuma eby’omughulhu mubi ono. Yehova na Yesu Kristo bakisiya ibathoghothya esyogavumente esyosi esikahakanisaya Obwami Bwiwe. Ekyo kithe kyabya, omwami w’elhuthambi lhw’endatha n’omwami w’elhuthambi lhw’eyikwa bakendi lholha embere erilhwa ibo basana-basa kandi n’erilhwa n’abandu ba Nyamuhanga.

² Omo mwatsi ono, thukendi kania okwa buminyereri obuli omu Danieli 11:40–12:1. Thukendi minya omwami w’elhuthambi lhw’endatha lino nga nindi kandi ithwakania okwa kyangaleka ithwaghumira ebitsibu ebikayasa ithunasikire.

3-4. Omwami w’elhuthambi lhw’endatha nindi munabwire? Soborera.

³ E Soviet Union yabere yabiriwa omwa 1991, abandu ba Nyamuhanga ababya omwa buthabali obo ‘mubawathikibwa hake’​—eribya bwiranda habw’obuthuku bulebe. (Dan. 11:34) Ekyo mukyaleka ibathulira bwiranda n’omughanzo w’abathuliri ababya omwa bihugho ebiri omwa Soviet Union mwalhuaho iniayongera. Lyolho-lyolho, e Russia n’abakasighikayo mubabya omwami w’elhuthambi lhw’endatha. Ngoku kikanibweko omo mwatsi w’ahanyuma, egavumente eryahulhwamo mwami w’elhuthambi lhw’endatha kutse omwami w’elhuthambi lhw’eyikwa, yitholere iyaberererya ebindu bisathu: (1) eriendererya abandu ba Nyamuhanga, (2) omwa mibere yayu iyakangania ku ni nzighu ya Yehova n’abandu biwe, na (3) iyatsimbanako n’omwami oyo bawitheneko obuyighu eribya n’obuthoki.

 ⁴ Lhangira ekyangaleka ithwabugha thuthi munabwire omwami w’elhuthambi lhw’endatha ni Russia n’abakasighikayo. (1) Babiribambira abandu ba Nyamuhanga bakahira okwa mubiiri w’erithulira kw’olhukako n’eriendererya balikyethu bangyi abali omwa myanya eyo bathabereko. (2) Ebyo bikakanganaya ku baponire Yehova n’abandu biwe. (3) Banemulhwa n’omwami w’elhuthambi lhw’eyikwa, Obuthabali bw’Ekihugho Kyosi obwe Anglo-America. Thulebaye ebyo Russia n’abakasighikayo babirikolha n’ekikaleka ibyakangania ku y’omwami w’elhuthambi lhw’endatha.

5. Danieli 11:40-43 hakakanaya okuki, kandi ni byahi ebyabya okwa buthuku obo?

⁵ Soma Danieli 11:40-43. Ekitsweka ky’obuminyereri eki kikakanaya okwa buthuku bw’ebiro by’enyuma-nyuma. Ekitsweka eki kikakanaya okw’ilhwa ly’omwami w’elhuthambi lhw’endatha n’omwami w’elhuthambi lhw’eyikwa. Ngoku Danieli anabugha, okwa mughulhu w’enduli, omwami w’elhuthambi lhw’eyikwa asyabandana n’omwami w’elhuthambi lhw’endatha ‘omw’isukumana.’​—Dan. 11:40, NW.

6. Ni byahi ebikakanganaya ngoku abami babiri babiribya ikubanemusukumana?

⁶ Omwami w’elhuthambi lhw’endatha n’omwami w’elhuthambi lhw’eyikwa bakalholha embere eritsimbanako eribya n’obuthoki bunene omwa kihugho. Ng’eky’erileberyako, thulebaye ebyabya enyuma w’Olhuhi lhw’Ekihugho Kyosi Olhwakabiri, e Soviet Union n’abakasighikayo bakatsuka erithabalha okwa bihugho bingyi eby’omwa Yuropu. Omwami w’elhuthambi lhw’eyikwa mwayiyunga okwa mahe w’ekihugho awakahulhawamo NATO. Omwami w’elhuthambi lhw’endatha n’ow’elhuthambi lhw’eyikwa bakalholha embere erikolesya esyosente nene nuku babye n’amahe awakalire. Omwami w’elhuthambi lhw’endatha n’ow’elhuthambi lhw’eyikwa mubalhwa ibo basana-basa, owundi erisighika esyonzighu sy’owundi omwa Afirika, Asia, ne Latin America. Lino-lino, e Russia n’abakasighikayo babirithunga obuthoki bunene erithimba omwa kihugho. Kandi babiringira omo malhwa n’omwami w’elhuthambi lhw’eyikwa omw’ikolesya e Intaneti. Abami abo babirihandikirirana bathi owundi akakolesaya esyoprogramu sy’ekombyuta erianza eritsandya ebindu byabu eby’ekisubure n’eby’ekipolitiki. Ngoku kine omwa buminyereri bwa Danieli, omwami w’elhuthambi lhw’endatha akalholha embere eribambira abandu ba Nyamuhanga.​—Dan. 11:41.

7. “Ekihugho Kibuya” niki?

⁷ Danieli 11:41 hakabugha hathi omwami w’elhuthambi lhw’endatha asyingira “omo Kihugho Kibuya.” Ekihugho ekyo ky’ekyahi? Kera, ekihugho kye Israeli ky’ekyabya kihugho “ekikakanga oko bihugho byosi.” (Eze. 20:6) Aliwe kyabya kithya kundi y’eyabya eriramya ly’okwenene. Eritsuka Pentekote 33 E.K., “ekihugho” ekyo kyabiribya isi kihugho kirebe, kundi abandu ba Yehova bayitsatsangire omo kihugho kyosi. Neryo munabwire “Ekihugho Kibuya” y’emibiiri eyo bandu ba Yehova banemukolha imwamuli ebindu ng’eriramya Yehova erilhabira omwa mihindano n’omubiiri w’erithulira.

8. Omwami w’elhuthambi lhw’endatha abiringira athi omwa “Kihugho Kibuya”?

⁸ Omwa biro by’enyuma-nyuma, omwami w’elhuthambi lhw’endatha abiribya ikwan’emw’ingira omwa “Kihugho Kibuya.” Ng’eky’erileberyako, omughulhu e Nazi Germany yabya mwami w’elhuthambi lhw’endatha,  kutsibu-tsibu omwa lhuhi lhw’ekihugho kyosi olhwakabiri, omwami oyo mwingira omwa “Kihugho Kibuya” ak’endererya n’eritha abandu ba Nyamuhanga. E Soviet Union yabere yikabya mwami w’elhuthambi lhw’endatha enyuma w’Olhuhi lhw’Ekihugho Kyosi Olhwakabiri, omwami oyo mw’ingira omwa “Kihugho Kibuya” ak’endererya abandu ba Nyamuhanga omw’iyababohera haali-haali.

9. Omo myaka ya lino-lino, e Russia n’abakasighikayo babiringira bathi omwa “Kihugho Kibuya”?

⁹ Omo myaka ya lino-lino, e Russia n’abakasighikayo nabu babiringira omwa “Kihugho Kibuya.” Bathi? Omwa 2017, omwami w’elhuthambi lhw’endatha owa munabwire oyu, mwahirire okwa mubiiri w’abandu ba Yehova kw’olhukako n’erihira abandi balikyethu b’omwa ngomo. Kandi abirihira n’okwa bitabu byethu kw’olhukako, imwamune ne Biblia eye New World Translation. Abirinyegha ne ofisi yethu eyiri omwa Russia kuthya n’Ebisenge by’Obwami n’emyanya eyikabya mw’emihindano eminene-minene. Busana n’emyatsi eyi, omwa 2018 Akathunga Akakasondolha mukabughire kathi e Russia n’abakasighikayo y’omwami w’elhuthambi lhw’endatha. Nomwakine indi abandu ba Yehova banemwendereribwa kutsibu, sibalilhwa n’egavumente yosi-yosi kutse erianza erihindulhayo. Omwakanya k’ekyo, bakaghondera ekihano kye Biblia eky’erihira omwa misabe “abosi abakathabalha,” kutsibu-tsibu abandu ng’abo bakathwamu okwa kindu ekyanga hamba okwa bwiranda bw’eriramya.​—1 Tim. 2:1, 2.

10. Omwami w’elhuthambi lhw’endatha anemwendi syakinda omwami w’elhuthambi lhw’eyikwa? Soborera.

¹⁰ Obuminyereri obuli omu Danieli 11:40-45 kutsibu-tsibu bukakanaya okwa mibiiri y’omwami w’elhuthambi lhw’endatha. Mbwino eki kikamanyisaya kithi akendi syakinda omwami w’elhuthambi lhw’eyikwa? Eyihi. Omwami w’elhuthambi lhw’eyikwa akendi syabya inianeho Yehova na Yesu bakathoghothya amathabali wosi w’abandu okwa lhuhi lhwe Harmagedoni. (Erib. 19:20) Busana naki ithwabugha thuthya? Thalebya ebiri omwa buminyereri obuli omu Danieli n’omwa Eribisulirwa.

11. Danieli 2:43-45 hakakanaya okuki? (Lebaya ekisasani ky’okwa kidipa.)

¹¹ Soma Danieli 2:43-45. Omuminyereri Danieli akakanaya okwa syogavumente sy’abandu esyabiryendererya abandu ba Nyamuhanga. Sikakanibawako ng’ebitsweka muthina-muthina by’esanamu nene ey’ekyuma. Egavumente y’abandu ey’erighunzerera omwa bitsweka ebyo by’ebisando by’esanamu ebikolirwe omwa kyuma ekithulhungene n’eribumba. Ebisandu bik’imanira Obuthabali bw’Ekihugho Kyosi obwe Anglo-America. Obuminyereri obo bukakanganaya ngoku obuthabali obu bukendi syabya ibuneho Obwami bwa Nyamuhanga bukathulhanga n’erithoghothya esyogavumente sy’abandu.

12. Omuthwe w’omusanju ow’enyama ak’imaniraki, kandi busana naki ekyo kihikire?

¹² Omukwenda Yoane nayu akakanaya okwa mathabali w’ekihugho kyosi awabirihamba nabi okwa bandu ba Yehova. Yoane akakanaya okwa mathabali aya ng’enyama eyiwithe emithwe musanju. Omuthwe w’omusanju ow’enyama eyo ak’imanira Obuthabali bw’Ekihugho Kyosi obwe Anglo-America. Eki kihikire kundi sihali owundi muthwe owakathasyalhasa okwa nyama eyo. Omuthwe w’omusanju ow’enyama eyi akendi syabya inianeho Kristo n’amahe wiwe w’elhubulha bakasyathoghothyagho n’enyama yosi. *​—Erib. 13:1, 2; 17:13, 14.

13-14. “Gogi ow’ekihugho kye Magogi” nindi, kandi ni kyahi ekikendi syaleka iniabambira abandu ba Nyamuhanga?

¹³ Obuminyereri bwa Ezekieli bukathubwira ebyangana syabya omwami w’elhuthambi lhw’endatha n’ow’elhuthambi lhw’eyikwa bathe bathoghothibwa. Amaminyereri awali omu Ezekieli 38:10-23; Danieli 2:43-45; 11:44–12:1; na Eribisulirwa 16:13-16, 21 akabya ng’akakanaya okwa bighumerera. Kyamabya ikwakiri kithya, kino ikyathukalengekanaya eribya.

¹⁴ Buthuku buke obulighe bunene bwalitsukire, “abami b’ekihugho kyosi” bakendisyabya bihanda ebiyiyungire haghuma. (Erib. 16:13, 14; 19:19) Ebihanda ebiyiyungire haghuma ebi bya Masako akahulhamo “Gogi ow’ekihugho kye Magogi.” (Eze. 38:2) Ebihanda ebiyiyungire haghuma ebi bikendi syabambira abandu ba Nyamuhanga n’erianza eribaghunzaho. Ni kyahi ekikendi syaleka ibakolha ekyo? Omwa buminyereri obuhambire okwa buthuku obu, omukwenda Yoane mwabugha athi mwalhangira amathwa manene-manene akathoghongera okwa syonzighu sya Nyamuhanga. Amathwa ayo angan’imanira omwatsi owakalire ow’eritswera ogho abandu ba Yehova bakendi syathulha. Omwatsi oyu akabya ng’owakendi syaleka Gogi owe Magogi inianza eribambira abandu ba Nyamuhanga n’erianza eribaghunzaho okwa kihugho.​—Erib. 16:21.

15-16. (a) Danieli 11:44, 45 hangabya ihakakanaya okuki? (b) Ni kyahi ekikendi syahika oko mwami w’elhuthambi lhw’endatha na Gogi owe Magogi?

¹⁵ Omwatsi owakalire oyu n’eribambira ery’erighunzerera ery’esyonzighu sya Nyamuhanga byangabya iby’ebikanibweko omu Danieli 11:44, 45. (Soma.) Danieli akabugha athi “esyongulhu esikalhua [ebulhua lyuba, NW], n’ebwanga bw’elhuthambi lhw’endatha” syasyahangya-hangya omwami w’elhuthambi lhw’endatha erileka iniabya “n’erihithana linene.” Omwami w’elhuthambi lhw’endatha akendi syanza ‘eriherya abandu bangyi.’ Hano ekinywe “bangyi” kikabya nga kikamanyisaya abandu ba Yehova. * Danieli angabya iniakanaya okw’ibambirwa ly’abandu ba Nyamuhanga ery’erighunzerera.

 ¹⁶ Omwami w’elhuthambi lhw’endatha haghuma n’esindi gavumente sy’ekihugho bakendileka Omuthoki w’ebyosi iniahithana n’eriletha olhuhi lhwe Harmagedoni. (Erib. 16:14, 16) Okwa buthuku obo, omwami w’elhuthambi lhw’endatha n’ebihanda bya Gogi owe Magogi bikendi syathoghothibwa, kandi sihali “mundu wasyamuwathikya.”​—Dan. 11:45.

17. Mikaeli “omunya-mwami mukulhu” oyukanibweko omu Danieli 12:1 nindi, akakolhaki lino, kandi akisiya iniakolhaki?

¹⁷ Omulhondo w’erimbere ow’esura 12 ey’ekitabu kya Danieli akakanaya bingyi ngoku omwami w’elhuthambi lhw’endatha n’abakamusighika bakendi syathoghothibwa kandi ngoku thukendi syalhamibwa. (Soma Danieli 12:1.) Omulhondo oyu akamanyisayaki? Mikaeli ni rindi lina ly’Omukama wethu oyunemuthabalha, Kristo Yesu. Eritsuka 1914, Obwami bwiwe mubwatsuka erithabalha omo lhubulha, kandi abiribya inianemutheya abandu ba Nyamuhanga. Akisiya iniahangana, kutse eriyira eky’akakolha, okwa lhuhi lhwe Harmagedoni. Amalhwa ayo akendi syabya kindu ky’erighunzerera ekyo Danieli akahulhamo “endambi y’obulighe” obuthe bwathabya. Obuminyereri bwa Yoane obuli omwa Eribisulirwa bukahulha obuthuku obukakolhaya okwa malhwa aya mwa ‘eriendererya linene’ kutse obulighe bunene.​—Erib. 6:2; 7:14.

18. Busana naki ithwalindirira obuthuku obukasa ithunasikire?

¹⁸ Thwangana lindirira obuthuku obukasa ithunasikire kundi Danieli na Yoane bakakanganaya ngoku abakakolera Yehova na Yesu bakendi syalhamibwa okwa bulighe bunene. Danieli akabugha athi abakendi syalhamibwa amena wabo ‘anasakire omo kitabu.’ (Dan. 12:1) Amena wethu akahandikawa athi omwa kitabu ekyo? Thutholere ithwakangania ndeke ku thw’ikirirye omu Yesu, Ekyana ky’Embuli kya Nyamuhanga. (Yn. 1:29) Thutholere ithwayihayo oku Nyamuhanga n’eribatizibwa. (1 Pet. 3:21) Kandi thutholere ithwasighika Obwami bwa Nyamuhanga omw’iwathikya abandi erigha oku Yehova.

19. Thutholere ithwakolhaki lino, kandi busana naki?

¹⁹ Buno bw’obuthuku obw’erighumya eriyikethera lyethu omu Yehova n’ekithunga kiwe ekiri mw’abaghombe biwe abathaleghulha. Buno bw’obuthuku obw’erisighika Obwami bwa Nyamuhanga. Thwamakolha ebyo, ithukendi syalhamibwa Obwami bwa Nyamuhanga bukathoghothya omwami w’elhuthambi lhw’endatha n’omwami w’elhuthambi lhw’eyikwa.