1-2. Ni bitsibu byahi ebyo Abema bangyi bakabana?

OMUKWENDA Paulo mwahira omu Timoteo kuthya n’Abakristayo abosi mw’omuhwa w’eriberererya ndeke omubiiri wabu w’erithulira. (2 Tim. 4:5) Ithwe bosi thukalhangira erihabulha lya Paulo mwa likulhu. Aliwe hane ebitsibu. Abangyi b’okwa balikyethu bakayithagha obuthubaha erithoka erisangira omwa mubiiri w’erithulira. (2 Tim. 4:2) Ng’eky’erileberyako, thalengekania oku balikyethu abikere omwa myanya eyo omubiiri wethu ali kw’olhukako kutse aghanibirwe. Bakatsama esyongebe syabu erisangira omw’ithulira!

² Abandu ba Yehova bakabana ebitsibu muthina-muthina ebyanga baghunza amani. Ng’eky’erileberyako, abangyi bakabya ini b’erikolha kutsibu erithoka eribana ebiyithawa by’amaka wabu. Bananzire erikolha bingyi omwa mubiiri w’erithulira, aliwe ah’ewiki yikahwera bakabya ibabirilhuha. Abandi bakakolha bike omwa mubiiri w’erithulira busana n’erilhwalha lhughumerere kutse erikulha omo myaka; nibya banganabya isibanga thasyathoka erighenda. N’abandi bakabera eriyowa nga si bawithe mughaso. Mary, * mwali wethu oyuwikere omwa Middle East, akabugha athi: “Kikayithagha akaghalha kanene erirwanisya amalengekania waghe awathatholere awakaleka ingahwa amani omwa bulengekania. Neryo ngayowa nabi kundi kikanyilira obuthuku n’akaghalha ebyo nanga kolesya omw’ithulira.”

3. Omo mwatsi ono thukendikania okuki?

³ Mbulha thuli omwa mibere eyiri yithi, Yehova anganathuha akaghalha k’erighumira ebitsibu byethu nibya kandi ithwalholha embere erimukolera ngoku thwanga thoka. Thuthe thwalebya Yehova ng’angathuwathikya athi, thutsuke erilebya ngoku aha Paulo na Timoteo b’akaghalha k’eriberererya omubiiri wabu w’erithulira nomuhanabya ebitsibu.

4. Ni bitsibu byahi ebyo Paulo abana?

⁴ Paulo mwabana bitsibu bingyi. Kutsibu-tsibu mwayithagha akaghalha omughulhu ahunzawa, aswiribawa omwa mabwe, n’erihirwa omwa ngomo. (2 Kor. 11:23-25) Ahathe eribisirira, Paulo mwakikangania ngoku nayu ihakanayira iniarwanisya amalengekania awathatholere. (Abar. 7:18, 19, 24) Kandi mwaghumira “endwalha y’omubiri” eyo abya anzire Nyamuhanga iniamulhusyako.​—2 Kor. 12:7, 8.

5. Ni byahi ebyo Paulo athoka erikolha nomwanabya omwa bitsibu?

⁵ Yehova mwaha Paulo y’akaghalha k’erikolha omubiiri wiwe nomwanabana ebitsibu byosi ebi. Thalengekania okwa bya Paulo athoka erikolha. Ng’eky’erileberyako, inianaboherwe omwa nyumba​—e Roma​—n’omuhwa munene mwalhwira okwa ngulhu yuwene embere sy’abasondoli Abayuda kandi obundi n’embere sy’abakulhu b’egavumente. (Emib. 28:17; Fil. 4:21, 22) Kandi mwathulira Abatheya bangyi n’abosi ababya bakasyamulebya. (Emib. 28:30, 31; Fil. 1:13) Okwa buthuku ibwa n’obo, Paulo mwasondolibwa erihandika esyobaruha esinemuwathikya n’Abakristayo b’okwenene erihika namunabwire. Kandi, eky’erileberyako kya Paulo mukyaghumya ekithunga kye Roma, ekyaleka balikyabu ib’ongera “erikangania obuthubaha eribugha ekinywe kya Nyamuhanga ahathe eryubaha.” (Fil. 1:14, NWT) Nomwakine indi ihakanayira Paulo iniathakolha ebyosi ebyo alhue anzire erikolha, mwalengaho kutsibu erikolha ekyo angathoka, kandi ekyo mukyamuwathikya “erithulha ngulhu yuwene.”​—Fil. 1:12.

6. Ngoku kiri omwa 2 Abanya Korinto 12:9, 10, ni kyahi ekyathokesaya Paulo eriberererya omubiiri wiwe w’erithulira?

⁶ Paulo mwaminya ngoku ebyosi ebyo akolha omwa mubiiri wa Yehova byabya busana n’akaghalha ka Nyamuhanga butsira akiwe. Mwabugha athi obuthoki bwa Nyamuhanga “bukahikana omo bwolho” bwiwe. (Soma 2 Abanya Korinto 12:9, 10.) Erilhabira omwa mulimu abuyirire, Yehova mwaha Paulo y’akaghalha k’eriberererya ndeke omubiiri wiwe​—nomwanendereribawa, erihirwa omwa ngomo, n’eribana ebindi bitsibu.

7. Ni bitsibu byahi ebyo Timoteo aby’atholere erirwanisya nuku aberereraye omubiiri wiwe w’erithulira?

⁷ Iniakine mulere, Timoteo oyuwabya akakolha haghuma na Paulo, nayu mwayikethera obuthoki bwa Nyamuhanga erimuwathikya  erikolha omubiiri wiwe. Timoteo mwaghenda na Paulo omwa syongendu siwe nyiri-nyiri esy’obumisyonare. Kandi Paulo mwamuthuma omwa sindi ngendo eribungira n’eriyahimba ebithunga. (1 Kor. 4:17) Timoteo angabya inianabya akayowa nga syanga thoka. Obundi ky’ekyaleka Paulo iniamubwira athi: “Siwuleke omundu akakupona [erikughaya] busana n’obulhwana bwawu.” (1 Tim. 4:12) Kandi okwa buthuku obu, Timoteo abya inianawithe erihwa omwa mubiri​—‘eribera erilhwalha-lhwalha.’ (1 Tim. 5:23) Aliwe Timoteo abya inianasi ngoku omulimu abuyirire wa Yehova ow’amaaka akendimuha akaghalha ako akayithagha erithulha engulhu yuwene n’eriwathikya balikyabu.​—2 Tim. 1:7.

8. Yehova akaghumaya athi abandu biwe munabwire?

⁸ Munabwire, Yehova akaha abandu biwe “obuthoki bunene” nuku balhole embere erimukolera buthaleghulha. (2 Kor. 4:7) Thulebaye ebindu bbini ebyo Yehova akathuha erithughumya n’erithuwathikya erisighalha bathaleghulha okw’iyo: omusabe, e Biblia, balikyethu, n’omubiiri w’erithulira.

9. Omusabe angathuwathikya athi?

⁹ Erighumibwa erilhabira omwa musabe. Ngoku kiri omwa Abanya Efeso 6:18, Paulo akathuhira mw’omuhwa w’erisaba Nyamuhanga “omo mighulhu yosi.” Nyamuhanga erithusubirya, akendithuha akaghalha. Jonnie, oyuwikere e Bolivia mwabana obuwathikya obo akabana ebitsibu bingyi. Mukali wiwe na babuthi ba Jonnie mubalhwalha kutsibu okwa buthuku bughumerere. Jonnie mwanuba akathwanira abosi basathu. Mama wiwe mwaholha, kandi mukyathwalha buthuku mukali wiwe na thatha wiwe erisalha balhama. Jonnie, akabya akasubya ameso w’enyuma, akabugha athi, “Iningabya ingayibulha-bulha kutsibu, mughulhu wosi ekyabya kikangwathikya iry’eribugha ekyonyine-nyine ingasaba.” Yehova mwaha Jonnie y’akaghalha ako ayithagha erithoka erisika. Ronald, omusyakulhu w’ekithunga e Bolivia, mwaminya ngoku mama wiwe abirilhwalha ekansa. Enyuma w’okwezi kughuma, mwaholha. Ni kyahi ekyamuwathikaya erighuma? Akabugha athi: “Erisaba Yehova kikaleka inamubwira ebyosi ebiri okwa muthima n’eriyowa lyaghe lyosi. Nganasi kw’akanyiyitheghereraya kwilhaba n’omundu wosi-wosi, nibya kwilhaba naghe ingyuwene-wene.” Hakanayira ebitsibu byethu ibyathubundamirya nibya ithwabya isithwasi n’ebya thwangahira omwa musabe. Aliwe Yehova akabugha athi ithwamusaba nomukyangathukalira erimuthondogholera amalengekania n’eriyowa lyethu.​—Abar. 8:26, 27.

10. Ngoku kiri omwa Abaebrania 4:12, busana naki ni kikulhu erisoma e Biblia n’erighanirya okwa byathukasoma?

¹⁰ Erighumibwa erilhabira omwa Biblia. Ngoku Paulo anabana akaghalha n’erihumulikana omwa Masako, nethu thwangana yiketheragho. (Abar. 15:4) Thukasoma Ekinywe kya Nyamuhanga n’erighanirya kukyo, Yehova angana kolesya omulimu wiwe erithuwathikya eriyitheghererya ndeke ngoku Amasako angathuwathikya omwa mibere eyathulimu. (Soma Abaebrania 4:12.) Ronald, oyo thulyakanayako, akabugha athi: “Ngatsemire kundi munabya n’endegheka y’erisoma ekitsweka kirebe omwa Biblia obuli omwa kiro. Ngaghaniraya kutsibu okwa mibere ya Yehova n’okwa mibere y’olhwanzo eyo akakolonganiramo n’abaghombe biwe. Eki kikanyiha akaghalha.”

11. E Biblia muyawathikya yithi mwali wethu oyuwabya omwa bulighe?

¹¹ Thwanganabya n’amalengekania awatholere okwa mibere eyo thulimu thwamaghanirya okwa Kinywe kya Nyamuhanga. Thalengekania okwa mibere e Biblia yawathikirayamo omukwakali oyuwabya omwa bulighe bw’eriholerwa.  Omusyakulhu mwamuhabulha athi iniakendi bana ebyanga muwathikya amasoma ekitabu kya Yobu. Abere akolha ekyo, okw’itsuka mwatsweba Yobu busana n’amalengekania wiwe awathahikire. Omwa malengekania wiwe mwahabulha Yobu athi: “Yobu! Leka erilengekania okwa bitsibu byawu bisa!” Aliwe neryo mwaminya ngoku nayu amalengekania wiwe ane ng’awa Yobu. Eki mukyamuwathikya erihindulha amalengekania wiwe n’erileka iniathoka erighumira obulhumi bw’eriholerwa mwira wiwe.

12. Yehova akathughumaya athi omw’ikolesya abaramya balikyethu?

¹² Erighumibwa erilhabira omu balikyethu Abakristayo. Eyindi nzira eyo Yehova akakolesaya erighumya Abakristayo ly’erikolesya abaramya balikyethu. Paulo mwahandika athi akakandira ‘erisikania emithima’ n’abalikyabu. (Abar. 1:11, 12) Mary, oyo thulyakanayako, akatsemera eribya n’abalikyethu. Akabugha athi: “Yehova abirikolesya baghalha bethu na bali bethu nibya abathabya basi n’ebyo ngalhabamo. Ibakanyibwira ekikahimba kutse erinyihandikira, kandi ikyabya ikyanga yithagha. Ekyo kandi kikaleka ingathoka eriyihanuzya okwa balikyethu abanabirilhaba omwa byanga lhabamo, kandi ing’ighira okwa ky’erileberyako kyabu. Kandi mughulhu wosi abasyakulhu bakaleka ingayowa ingali w’obughuli omwa kithunga.”

13. Thwangasikania thuthi emithima okwa mihindano?

¹³ Omughuma w’okwa myanya eyuwene ey’erihimbanganiramo kw’okwa mihindano. Okwa mihindano, busana naki iwuthabya w’erimbere erighumya abandi omwa binywe by’olhwanzo ebikalhua okwa muthima n’eby’erisima? Ng’eky’erileberyako, omuhindano mughuma abere athali atsuka, omusyakulhu oyukahulhawamo Peter mwabwira mwali wethu oyuli omwa butheke n’oyuthe Mwema athi: “Siwangaminya nga kikathuhimba bungahi erikulhangira hano. Mughulhu wosi wukalhangira wuthi abaana bawu mukagha bakayithegheka ndeke eryasa okwa mihindano n’eriyithegheka erisubirya.” Ameso wiwe imune ebiyiri-yiri busana n’erisima, mwasubirya athi: “Omu kwenene siwasi ekyo nga ngalhue ngakiyithagha bungahi munabwire.”

14. Erisangira omwa mubiiri w’erithulira kikathuwathikaya kithi?

¹⁴ Erighumibwa erilhabira omwa mubiiri w’erithulira. Thukabya thukabwira abandi okwa kwenene ye Biblia, thukayowa buholho, ithwathunga amani, mbulha bahulikirire kutse eyihi. (Emi. 11:25) Mwali wethu oyukahulhawamo Stacy mwayilhangirira ngoku erithulira likathughumaya. Omuhughu wiwe abere akahighithwa, mwayowa nabi kutsibu, iniakabera eriyibulya athi, ‘Mbwino hane ekyo nanga kolire erimuwathikya?’ Mukyakalira Stacy erileka erilengekania okwa kitsibu eki. Ni kyahi ekyamuwathikaya erighumira ekitsibu eki? Erithulira! Abere anemusangira omw’ithulira, mwatsuka erihwerya amalengekania wiwe okwa bandu b’omwa bulhambu bwiwe abakayithagha obuwathikya bwiwe. Akabugha athi: “Omwa buthuku obo, Yehova mwanyiha omwigha we Biblia oyuwakulha-kulhana lhuba-lhuba. Ekyo mukyanyihimba kutsibu. Ekyabirinyiwathikya kutsibu omwa ngebe yaghe ly’erighenda omw’ithulira.”

15. Ebya Mary abugha byamakweghesyaki?

¹⁵ Busana n’emibere eyo balimu, abandi banganayowa ngasibanga thoka erikolha bingyi omwa mubiiri w’erithulira. Wamabya ikwa wukayowa wuthya, wibuke ngoku Yehova akatsema wamabya iwunemukolha ngoku wangathoka. Thasyalengekanaya okwa ky’erileberyako kya Mary. Abere akahumira omwa kithunga ekikakolesaya owundi mubughe, mwayowa nga syendithoka. Akabugha athi, “Ahabw’obuthuku,  ekyanabya inanganakolha lyabya ery’erisubirya ekyolhobire kutse erisoma erisako kutse erighaba etrakit omw’ithulira.” Eki mukyaleka iniayilhangira mo wa bbule akayilinganisya n’abasi ndeke omubughe wayo. Aliwe mwahindulha amalengekania wiwe. Mwatsukiraho eriminya ngoku Yehova anganamukolesya nomwakine indi syasi omubughe wa ndeke. Akabugha athi, “Ekwenene eyikalhamaya engebe yilhobire, kandi ekwenene eyo y’eyikahindulha esyongebe sy’abandu.”

16. Ni kyahi ekyanga wathikya abathe banga thoka erilhua eka erithunga akaghalha?

¹⁶ Yehova akalhangira kandi akasima eriyisunza lyethu ery’erianza erisangira omw’ithulira nomuthwangabya isithwangalhua eka. Angana thuha akaghisa k’erithulira abathwaniri kutse abathambiri. Thwamalinganisya ebya thukakolha lino n’ebya thwakolha kera, ithwanganahwa amani. Aliwe thwamaminya ngoku Yehova anemuthuwathikya, ithukendi thunga akaghalha ako thukayithagha erighumira ekitsibu kyosi-kyosi kandi ithunatsemire.

17. Ngoku kiri omwa Omugambuli 11:6, busana naki thutholere ithwalholha embere erithulira nomwakine indi sithuli lhangira ebikalhwiririramo aho naho?

¹⁷ Sithwasi nga ni mbutho yahi ey’ekwenene eyo thukahera eyikendi lhasa n’erikulha. (Soma Omugambuli 11:6.) Ng’eky’erileberyako, Barbara, mwali wethu oyuli omo myaka eye 80, mughulhu wosi akathulira omw’ikolesya esimu n’esyobaruha. Omwa nguma y’okwa syobaruha siwe, mwahiramo e Watchtower ey’Okwakasathu 1, 2014, eyiwithe omuthwe “Ebya Nyamuhanga Abirikukolera.” Isyathaminya, abya iniabirithumira ebaruha eyo y’abathahenie ababya isibakiri Bema ba Yehova. Mubasoma egazeti eyo ngendo nyingyi. Omulhume mwayowa Yehova ng’anemukania nayu busu okwa busu. Abathahenie abo mubatsuka erihindana n’erighunzerera mubasuba oku Yehova​—enyuma w’emyaka 27 ibanahighithirwe. Thathera akasasani Barbara nga mwaghumibwa bungahi n’erithunga akaghalha akalhangira ebibuya ebyalhwiririra omwa baruha nguma eyo!

18. Thwanga kolhaki erighasirwa omwa maaka wa Nyamuhanga?

¹⁸ Yehova akathuha esyonzira nyingyi esyo thwanga baniramo amaaka wiwe manene. Thukabya thukakolesya eby’akathuha​—ng’omusabe, e Biblia, balikyethu Abakristayo, n’omubiiri w’erithulira​—thukakanganaya ku thuyikethere amaaka wa Yehova n’eriyisunza liwe ery’erithuwathikya. Kwesi mughulhu wosi thuyikethere Thatha wethu w’elhubulha, oyuwanzire “eriyikangya mo w’amaaka busana n’ab’omuthima ahikene okw’iyo.”​—2 Emy. 16:9.