1-2. Soborera ngoku emisingyi ye Biblia yanga thuhambako kutsibu emibere eyathulimu yikahinduka.

 OKWA kiro kyabu ky’obulunga, omughole w’obulhume n’ow’obukali ababiryuwana bakahulikirira ndeke omukania owaseghemere okwa Biblia owahambire okwa butheke akalhabibwa. Emisingyi eyikakanibawako omwa mukania oyo si mihyaka okw’ibo. Aliwe eritsuka ekiro ekyo n’erilholha embere, okw’ibo omwatsi oyo akabya w’omughaso munene. Busana naki? Kundi bakendi ghendera kugho omwa butheke bwabu.

² Kwabine bithya n’omughulhu Abakristayo abathahenie bakabya babuthi. Ahabw’emyaka mingyi banganabya ibabiryowa emikania nga y’eyo eyikakanaya okw’ilembera abaana. Aliwe lino emisingyi eyo yikabya iyikendi bahambako kutsibu. Bakayabya n’omwana wabu-wabu ow’erilembera. Olho ka ni lhukwamirwa lhunene kutsibu! Ahathe erithika-thika, emibere mihyaka yangana hindulha amalengekania agho thuwithe okwa misingyi ye Biblia eya thunasi. Eyi y’enzumwa nguma eyikaleka abaramya ba Yehova ibasoma Amasako, kandi ngoku abami be Israeli banabwirawa erikolha ekyo, bakaghaniraya kugho ‘ebiro byosi’ by’engebe yabu.​—Ebi. 17:19.

3. Thukendi kania okuki omo mwatsi ono?

³ Ababuthi, muwithe olhusunzo lhunene lhw’okwa syonzunzo nene-nene esy’Omukristayo angathunga, ni bugha ambu, erikangirirya abaana benyu oku Yehova. Aliwe simwanzire erisubulira okw’ikwama kyababwira okwa myatsi eyihambire oku Nyamuhanga wethu. Mwanzire eriwathikya abaana benyu erimwanza  kutsibu. Mwanga kolhaki eriwathikya abaana benyu erianza Yehova? Omo mwatsi ono, thukendi kania okwa misingyi ini ye Biblia eyanga bawathikya inywe ng’ababuthi. (2 Tim. 3:16) Kandi thukendi lhangira ngoku abandi babuthi Abakristayo babirighasirwa omw’ighendera okw’ihabulha lye Biblia.

4. Ni musingyi wahi mughuma owanga wathikya ababuthi erikangirirya abaana babu erianza Yehova erilhua okwa muthima? (Yakobo 1:5)

⁴ Omusingyi 1: Musondaye obusondoli bwa Yehova. Musabe Yehova abahe amenge agho mukayithagha eriwathikya abaana benyu erimwanza. (Soma Yakobo 1:5.) Iyo yutholere kutsibu eribaha amenge. Hane esyonzumwa nga sy’esyo esikaleka. Thuthalengekania okw’ibiri. Ey’erimbere, Yehova asi bingyi bikahika okw’ibya mubuthi. (Esy. 36:9) N’eyakabiri, mughulhu wosi erihabulha ly’amenge eryo akaha likaghasa.​—Isa. 48:17.

5. (a) Ni byahi ebya kithunga kya Yehova kyabirihulhukya eriwathikya ababuthi? (b) Ngoku kikanganibwe omo vidiyo, wam’ighaki okwa mibere Mughalha Wethu na Mwali Wethu Amorim balembereramu abaana babu?

⁵ Erilhabira omwa Kinywe kiwe n’ekithunga kiwe, Yehova akathuha ebyalya bingyi eby’obunyakirimu ebiseghemere okwa Biblia ebyanga bawathikya erikulya abaana benyu ibananzire Yehova. (Mt. 24:45) Ng’eky’erileberyako, mwangana bana amenge mangyi awakakolha ndeke omo myatsi eyikabera eryasira omo katsweka “Obuwathikya Busana n’Amaka,” eyaghunza myaka ngay’eyo iyinemwasira omwa gazeti ye Awake! kandi lino yine okwa muthahulha wethu. Kandi esyovidiyo nyingyi esiri okwa jw.org sirimo eribulibwa n’eby’erilhangirirako ebyanga wathikya ababuthi erighendera okw’ihabulha lya Yehova bakalembera abaana babu. *​—Emi. 2:4-6.

6. Thatha mughuma akayowa athi okwa busondoli obo iyo na mukali wiwe bakabana omwa kithunga kya Yehova?

⁶ Ababuthi bangyi babirikangania erisima busana n’obuwathikya obwa Yehova akaha erilhabira omwa kithunga kiwe. Thatha oyukahulhawamo Joe akaligha athi: “Si mubiiri mwolho erikulirya abaana basathu b’omwa kwenene. Mughulhu wosi ingye na mukali waghe thukasaba Yehova y’obuwathikya. Kandi  mughulhu mungyi thwabiriyowa omwatsi kutse evidiyo iyamasira okwa buthuku obutholere erithuwathikya erighenda-ghendania n’emibere eya thulimu. Omo ngebe yethu yosi thwabiribya ithunemusondekania obusondoli bwa Yehova.” Joe na mukali wiwe babirilhangira ngoku ebya thukahebawa ng’ebyo binemuwathikya abaana babu eriyithunda hakuhi na Yehova.

7. Busana naki ni kikulhu ababuthi erilengekania okwa ky’erileberyako ekya bakahiraho? (Abanya Roma 2:21)

⁷ Omusingyi 2: Mukangiriraye omwa ky’erileberyako kyenyu. Abaana bakabya ibanasamalire ababuthi babu kandi mughulhu mungyi bakabagherereraya. Ni kwenene, sihali omubuthi oyuhikene. (Abar. 3:23) Nomwabine bithya, ababuthi ab’amenge bakakolha ngoku banga thoka erihiriraho abaana babu eky’erileberyako ekyuwene. (Soma Abanya Roma 2:21.) Thatha mughuma akakania okwa baana, akabugha athi: “Bali ng’epamba eyikanyunyira obuli kindu.” Akongerako athi: “Ibakendi thubwira omughulhu eky’erileberyako kyethu sikithahambana n’ebya thukalengaho eribakangirirya.” Neryo thwamabya ithwanzire abaana bethu banze Yehova, ambi olhwanzo olhwa thumuwithire ilhwabya ilhunaghumire kandi ilhunalhangirikire.

8-9. Ebya Andrew na Emma babugha byamakweghesyaki?

⁸ Hali nzira nyingyi esyo ababuthi banga kangiriryamo abaana babu erianza Yehova. Lhangira ebya mughalha wethu Andrew ow’emyaka 17 akabugha: “Mughulhu wosi ababuthi baghe ibakahira omuwatho w’okwa mughaso w’erisaba. Obuli omwa kiro, Thatha iniakasaba haghuma naghe nomunangabya ingabirisaba. Ababuthi baghe mughulhu wosi ibakathwibukaya bathi: ‘Wangana kania na Yehova mirundi mingyi ngoku wanzire.’ Omuwatho ogho babya bakahira okwa musabe mwanyihambako kutsibu, kandi lino ngayowa buholho erisaba Yehova kandi ngamulhangira nga Thatha w’olhwanzo.” Ababuthi, isimwayowa olhwanzo olhwa muwithire Yehova nga silhwanga hamba okwa baana benyu.

⁹ Thulebaye n’eky’erileberyako kya Emma. Thatha wiwe abere akasighania eka yabu, mwasigha mama wiwe y’omwa mabanza manene. Emma akabugha athi: “Mughulhu mungyi mama iniakabya isyawithe esyosente, aliwe mughulhu wosi iniakabya inianemukania okwa mibere Yehova akatsomaniramo abaghombe biwe. Iningalhangira ngoku alighire ekyo omwa mibere akathwaliramo engebe yiwe. Mama iniakakolha erikwamana n’eby’akathulira.” Thuk’ighaki? Ababuthi bangana kangirirya abaana babu omwa ky’erileberyako nibya n’omwa mibere eyikalire.​—Gal. 6:9.

10. Ni highisa hyahi ehyo ababuthi bangyi Abaisraeli babya bawithe ehy’erikanirania n’abaana babu? (Eryibuka Ebihano 6:6, 7)

¹⁰ Omusingyi 3: Mukanaye n’abaana benyu mughulhu wosi. Yehova mwabwira Abaisraeli athi bakangiriraye abaana babu okw’iyo mughulhu wosi. (Soma Eryibuka Ebihano 6:6, 7.) Ababuthi abo babya bawithe ehighisa hingyi omwa musibo wosi ehy’erikanirania n’abaana babu n’eribakangirirya erianza Yehova erilhua okwa muthima. Ng’eky’erileberyako, omulhwana Omuisraeli iniangana ghunza esyosaha na thatha wiwe akamuwathikya erihera ebirimwa kutse erihulhulha. Mwali wabu iniangana siba na mama wiwe akamuwathikya erisona, erilhuka, n’erikolha eyindi mibiiri y’eka. Ababuthi n’abaana ibakabya bakakolha haghuma, ibakabya ibangana kania oko myatsi mingyi ey’omughaso. Ng’eky’erileberyako, ibangana kania okwa mubere wa Yehova ow’obubuya n’erilebya ngoku anemuwathikya eka yabu.

11. Ni kaghisa kahi ako ababuthi Abakristayo bawithe ak’erikanirania n’abaana babu?

 ¹¹ Munabwire, emyatsi yabirihinduka. Omwa bihugho bingyi, ababuthi n’abaana sibali bana endambi y’erisiba haghuma. Ababuthi banganabya ibane okwa mubiiri n’abaana ibane okwa sukuru. Busana n’ekyo, ababuthi batholere ibasondya endambi y’erikanirania n’abaana babu. (Efe. 5:15, 16; Fil. 1:10) Eriramya ly’eka likaha akaghisa ng’ako. Mughalha wethu omulere oyukahulhawamo Alexander akabugha athi: “Mughulhu wosi thatha waghe akahiraho endegheka y’eriramya ly’eka, kandi syali lighira ekyosi-kyosi kikakakiryayo. Thukabya thwabirigha, ithwakania.”

12. Ni kyahi ekya omuthwe w’eka atholere iniabya inian’ibukire bikahika okw’iramya ly’eka?

¹² Wamabya iwuli muthwe w’eka, wanga kolhaki erilhangira wuthi abaana bawu bakatsemera eriramya ly’eka? Busana naki iwuth’igha n’abaana bawu ekitabu kyethu ekihyaka ekyuwene ekya Tsemera Engebe Kera na Kera! Erigha eri likendi baha akaghisa akuwene ak’erikanirania ndeke. Wanzire abaana bawu ibakubwira eriyowa lyabu n’ebikabalyambaya, neryo omw’iramya ly’eka isiwabya ng’oyukalhabaya omukania kutse eribatsweba-tsweba. Kandi isiwatsuruma abaana bawu bamabugha ebithahambene n’Amasako. Omwakanya k’ekyo, tsema kundi bamabya b’okwenene bakakubwira eriyowa lyabu, kandi bahire mw’omuhwa w’erikolha ekyo. Iwukendi thoka eriwathikya abaana bawu iwunalyaminya eriyowa lyabu.

13. Ni hindi highisa hyahi ehyo ababuthi bawithe ehy’eriwathikiryamo abaana babu eriyithunda hakuhi na Yehova?

¹³ Ababuthi, musondekanaye omwa musibo wosi mw’ehighisa hy’eriwathikiryamo abaana benyu eriyithunda hakuhi na Yehova. Isiwalinda endambi y’erigha wuthi y’endambi nyisa eyawanga kangiriryamo abaana bawu oku Nyamuhanga wethu w’olhwanzo. Lhangira ekyo mama oyukahulhawamo Lisa akabugha: “Muthwawathikya abaana bethu omw’ikolesya ebihangikwa eribakangirirya oku Yehova. Ng’eky’erileberyako, embwa yethu iyakabya yikakolha akandu akakabasekaya, ithukakolesaya ako ng’akaghisa eribakangania ngoku Yehova ni Nyamuhanga oyutsemire oyuwanzire engebe ngoku thwanzireyo.”

14. Busana naki ni kikulhu ababuthi eriwathikya abaana babu erisombolha ndeke abanywani? (Emisyo 13:20)

 ¹⁴ Omusingyi 4: Muwathikaye abaana benyu erisombolha abanywani abuwene. Ekinywe kya Nyamuhanga kikakanganaya ndeke-ndeke ngoku abanywani bethu bakathuhambako​—ndeke kutse nabi. (Soma Emisyo 13:20.) Ababuthi, munasi abanywani b’abaana benyu? Mune mwathabalholhako n’eribya nabu habw’akathambi? Mwanga kolhaki eriwathikya abaana benyu eribana abanywani abanzire Yehova? (1 Kor. 15:33) Mwangana bawathikya erisombolha ndeke abanywani omw’ikokya balikyethu balebe abimene ndeke bunyakirimu eribayiyungako omwa mibiiri y’eka yenyu.​—Esy. 119:63.

15. Ni kyahi ekya babuthi banga kolha eriwathikya abaana babu eribya n’abanywani abuwene?

¹⁵ Thalengekania okwa kyalholirweko kya thatha oyukahulhawamo Tony. Akasoborera ekyo iyo na mukali wiwe babirikolha eriwathikya abaana babu eribya n’abanywani abuwene: “Ahabw’emyaka, ingye na mukali waghe thwabirikokya abalikyethu ab’emyaka muthina-muthina kandi abalhuire omwa mibere eyithasosene. Thukalya haghuma nabu kandi ibasangira omw’iramya lyethu ly’eka. Eyi ni nzira ngulhu ey’eriminyiramo abanzire Yehova kandi abakamukolera ibanatsemire. Thwabiribana omughisa w’erikokya abalebererya b’omuthimbo, abamisyonare, n’abandi ib’ikalha ewethu. Ebyalholirweko byabu, omuhwa wabu, n’omuthima wabu w’eriyihayo byabirihamba ndeke okwa baana bethu kandi byabiribawathikya eriyithunda hakuhi na Yehova.” Ababuthi, muthwemu eriwathikya abaana benyu eribana abanywani abuwene.

16. Kandi ibbwa omwana amabugha athi syanzire erikolera Yehova?

¹⁶ Kandi ibbwa, wamabya iwabirikolha ngoku wanga thoka, aliwe omughuma w’okwa baana bawu iniabugha athi syanzire erikolera Yehova? Isiwaghunzerera wuthi wabirilemwa iwe ng’omubuthi. Ithwe bosi imwamune n’abaana bawu, Yehova abirithuha ekihembo ky’obughabe bw’eriyithwiramo, amaaka w’erithwamu nga thukendi kolera Nyamuhanga kutse eyihi. Omwana wawu amabya iniabirithwamu erisighania  Yehova, isiwahwa amaha, kiro kighuma angana syasubulha. Ibuka omusyo w’omwana oyuwatsaha. (Lk. 15:11-19, 22-24) Omulhwana oyo mwalhua omo nzira y’erithunganene, aliwe erighunzerera mwasubulha. Abandi ibangana bugha bathi: “Oyo abya musyo. Kwenene eki ikyanabya omo ngebe yethu ya buli kiro?” Ee, kyanganabya! Ekyo ky’ekyabya oko mulhwana oyukahulhawamo Elie.

17. Ekyalholirweko kya Elie kyamakuhimba kithi?

¹⁷ Elie akabya akakania okwa babuthi biwe, akabugha athi: “Mubakolha ekyo banga thoka erinyikangirirya erianza Yehova n’Ekinywe kiwe, e Biblia. Aliwe omwa myaka yaghe y’obulengwa, munatsuka eriyisamambulha.” Elie mwatsuka eribya omwa ngebe ibiri, kandi mwaghana obuwathikya obwosi bw’obunyakirimu obo ababuthi biwe bamuha. Abere abirilhua eka, mwayingirya omwa mitse mibi. Nomubyanabya bithya, ihakanayira iniabwira omughuma w’okwa banywani biwe okwa Biblia. Elie akabugha athi: “Iningabya ingongera eribwira munywani waghe oku Yehova, ikwangan’ongera indya eriyisanga ingabirilengekania oku Yehova. Ahathe erithika-thika, lyolho-lyolho embutho y’ekwenene ye Biblia eyabya isiyathalhasa omo muthima waghe​—embutho eyo ababuthi baghe balengaho kutsibu erinyiheramo—​muyatsuka erilhasa.” Endambi muyahika, Elie amasuba omwa kwenene. * Thalengekania ababuthi biwe nga mubatsema bungahi habw’eribya imubalengaho erimukangirirya erianza Yehova iniakine mulere!​—2 Tim. 3:14, 15.

18. Wukayowa wuthi okwa babuthi abakahiraho akaghalha erikangirirya abaana babu erianza Yehova?

¹⁸ Ababuthi, mwabirihebwa olhusunzo lhubuyanga, ni bugha ambu, erilembera olhulengo lhuhyaka olhw’abaramya ba Yehova. (Esy. 78:4-6) Oyo si mubiiri mwolho, kandi thukabasima erilhua okwa muthima busana n’akaghalha kanene akamukahiraho eriwathikya abaana benyu! Mwamalholha embere eriwathikya abaana benyu erianza Yehova ngoku mwanga thoka n’eribakulya omw’ikunga n’erikangirirya liwe, imukendi yikethera ngoku Thatha wethu w’elhubulha ow’olhwanzo akendi tsema.​—Efe. 6:4.