1. N’ithwamu lyahi likulhu erya bandu bosi batholere ibakolha?

 MUNABWIRE abandu bawithe erithwamu likulhu ery’erikolha. Bane mwendi sighika Yehova Nyamuhanga ng’oyutholere eribya Muthabali w’obuhangwa bwosi, kutse bakendi sighika enzighu yiwe eyikalire, Sitani Diabolo? Sihali eribya oko mbandi ibiri. Erithwamu lyosi-lyosi eryo banga kolha likendi syahamba okwa buthuku bwabu bw’embere. (Mt. 25:31-33, 46) Omwa buthuku bw’obulighe bunene, bakendi syahirwa kw’akaminyikalho ng’abalhamibawe kutse ng’abathoghothibawe.​—Erib. 7:14; 14:9-11; Eze. 9:4, 6.

2. (a) Ebiri omwa Abaebrania 10:35-39 bikathuhira mw’omuhwa w’erikolhaki? (b) Ekitabu ky’Eribisulirwa kyanga thuwathikya kithi?

² Soma Abaebrania 10:35-39. Wamabya iwabirithwamu erisighika obuthabali bwa Yehova, wabirithwamu ndeke. Lino wanzire kutsibu eriwathikya abandi erithwamu ndeke. Busana n’ekyo wangana kolesya emyatsi eyiri omwa kitabu ky’Eribisulirwa eribawathikya. Ekitabu ekikatsemesaya eki kikabisulha ekikendi syahika okwa bakahakanisaya Yehova, aliwe kandi kikakanganaya emighisa eyo abakasighika obuthabali bwiwe buthaleghulha bakendi syabana. Thukakolha ndeke thukayithendya ndeke okwa kwenene ngulhu ng’eyi. Erikolha ekyo, likendi ghumya erithwamu lyethu ly’erilholha embere erikolera Yehova. Eryongera okw’ekyo, thwangana kolesya ebyo thwabir’igha eriwathikya abandi erithwamu ndeke n’eryamakirira erithwamu lyabu eryo.

3. Thukendi kania okuki omo mwatsi ono?

³ Omo mwatsi ono, thukendi kania okwa bibulyo bino: Ni byahi ebyo abandu abakasighika obuthabali bwa Nyamuhanga balindirire? Okwa lhundi lhuhandi, ni byahi ebikendi syahika  okwa bandu abakathwamu erisighika enyama y’olhukulha-kulha, eyikanibweko omwa kitabu ky‘Eribisulirwa?

4. Ni gurupu yahi eya omukwenda Yoane akalhangira iyine na Yesu elhubulha?

⁴ Omwa syonzoli, omukwenda Yoane akalhangira esyogurupu ibiri sy’abakasighika obuthabali bwa Yehova kandi bakathunga emighisa y’engebe y’erikotha. Egurupu y’erimbere yirimu abandu 144,000. (Erib. 7:4) Bakalhusibawa omwa kihugho eribya gavumente, kutse Bwami, haghuma na Yesu omwa lhubulha. Ibo nayu, bakathabalha ekihugho. (Erib. 5:9, 10; 14:3, 4) Omwa syonzoli, Yoane akabalhangira ibanimene haghuma na Yesu okwa Kithwe kye Sioni eky’elhubulha.​—Erib. 14:1.

5. Ni kyahi ekikisiya ikyabya okwa misighalira y’abandu 144,000?

⁵ Ahabw’ebighana bingyi, esyongumi sy’abandu babiribya ibane musombolhwa eribya baghuma b’okwa bandu 144,000. (Lk. 12:32; Abar. 8:17) Aliwe, Yoane mwabwirwa ngoku emisighalira, kutse omughanzo muke buyira w’okw’ibo, babangabere ibane okwa kihugho omwa biro by’enyuma-nyuma. “Abandi bandu” aba, emisighalira, bakendi syahebwa “ekibohi” kyabu ky’erighunzerera eky’eriliwa na Yehova obulighe bunene buthe bwatsuka. (Erib. 7:2, 3; 12:17) Neryo okwa buthuku bulebe omwa bulighe bunene, emisighalira eyi yikendi syathwalhwa elhubulha eriyayiyunga okwa bandi b’okwa 144,000, abaholha inina bathaleghulha. Eyo bakendi syathabalha haghuma na Yesu omo Bwami bwa Nyamuhanga.​—Mt. 24:31; Erib. 5:9, 10.

6-7. (a) Ni yindi gurupu yahi eyo Yoane akathasyalhangira, kandi thukab’igha kwaki? (b) Busana naki emisighalira ‘n’ab’endeko nene’ ibanza eriminya ebiri omwa Eribisulirwa sura 7?

⁶ Enyuma w’erilhangira egurupu y’abakendi syaghenda elhubulha, Yoane akalhangira “endeko nene.” Mbaghane n’abandu 144,000, abali omwa gurupu eyi si banga ghanzwa. (Erib. 7:9, 10) Thukab’igha kwaki? Yoane akabwirawa bino: “Aba ni bandu abakalhua omw’endererya linene, ibabirierya esyokanzu syabu n’eriyirasyo mwa nyeru-nyeru omwa musasi w’Ekyana ky’Embuli.” (Erib. 7:14) Bakendi syabya babirilhama okwa bulighe bunene, “endeko nene” eyi yikendi syikalha okwa kihugho n’eritsemera emighisa minene.​—Esy. 37:9-11, 27-29; Emi. 2:21, 22; Erib. 7:16, 17.

⁷ Mbulha thwabirisombolhwa erighenda elhubulha kutse eribya hano okwa kihugho, thukanayilhangira omwa bikanibweko omwa Eribisulirwa esura 7? Ee. Ka bukendi syabya buthuku obukatsemesaya okwa gurupu ibiri sy’abaghombe ba Nyamuhanga! Thukendi syatsema kutsibu kundi muthwathwamu erisighika obuthabali bwa Yehova. Ni kindi kyahi ekya ekitabu ky’Eribisulirwa kikathubwira okwa bulighe bunene?​—Mt. 24:21.

8. Obulighe bunene bukendi syatsuka buthi, kandi abandu bangyi bakendisya kolhaki?

⁸ Ngoku kiri omo mwatsi w’ahanyuma, eby’ekipolitiki by’ekihugho kino bikisiya ibyabindukira Babeli Mukulhu, amadini wosi w’amabehi. (Erib. 17:16, 17) Eyi y’eyikendi syabya nzuko y’obulighe bunene. Mbwino eki kikendi syaleka abandu bangyi ibathwamu eriramya Yehova? Eyihi. Omwakanya k’ekyo, Eribisulirwa sura 6 hakakanganaya ngoku omwa buthuku obukalire obo, abandu abathekolera Yehova bakendi syasondya obutheya omwa by’epolitiki n’eby’ekisubure by’ekihugho kino, ebikalinganisibawa n’ebithwe. Kundi abandu abo sibendi syasighika Obwami bwa Nyamuhanga, Yehova akendisya balhangira ng’abahakani.​—Lk. 11:23; Erib. 6:15-17.

9. Abandu ba Yehova bakendi syalhangirika bathi ibali mbaghane omwa buthuku bw’obulighe bunene, kandi eki kikendi syalhwiririra mwaki?

 ⁹ Okwenene kuli kuthi, abaghombe ba Yehova abathaleghulha bakendi syalhangirika ibali mbaghane omwa buthuku bw’obulighe obukalire obo. Bakendi syabya iy’egurupu nyisa y’abandu okwa kihugho abakakolera Yehova Nyamuhanga kandi abakaghana erisighika “enyama.” (Erib. 13:14-17) Emimanire yabu y’obuthubaha yikendi syahithania kutsibu abakahakanisaya Yehova. Busana n’ekyo, ebihanda ebiyiyungire haghuma bikendisya bambira abandu ba Nyamuhanga omwa kihugho kyosi. Erisirima eri likanibweko omwa nzira y’obuminyereri ng’eribambira lya Gogi owe Magogi.​—Eze. 38:14-16.

10. Ngoku kiri omwa Eribisulirwa 19:19-21, ni kyahi ekya Yehova akendi syakolha abandu biwe bakabambirwa?

¹⁰ Yehova akendi syakolha kyahi okw’ibambira erikalire eri? Akathubwira athi: “Erihithana lyaghe lyasyakanyirira.” (Eze. 38:18, 21-23) Eribisulirwa sura 19 hakakanaya okwa kikendi syakwamako. Yehova akendi syathuma Mughalha wiwe erilhwira okwa bandu biwe n’erikinda esyonzighu syabu. Yesu “n’emilhondo y’elhubulha”​—abamalaika abathaleghulha haghuma n’abandu 144,000 bakendi syalhwa amalhwa aya. (Erib. 17:14; 19:11-15) Eki kikendi syalhwiririra mwaki? Erithoghotherya ighuma abandu bosi n’ebithongole ebikahakanisaya Yehova!​—Soma Eribisulirwa 19:19-21.

11. Ni kindu kyahi ky’embaghane ekikabya okwa ngunzerero y’ebiri omw’Ibisulirwa?

¹¹ Thalengekania okwa bathaleghulha okwa kihugho nga bakendisya yowa bathi bakalhama okw’ithoghothibirwa ighuma ly’esyonzighu sya Nyamuhanga! Ka bukendisyabya buthuku bw’etseme! Nomwakine indi elhubulha yikendi syabya etseme nene Babeli Mukulhu akathoghothibwa, hane ekindi ekikendi syaletha obutseme bunene okw’aho. (Erib. 19:1-3) Erithwalira haghuma, y’engunzerero y’ebiri omw’Ibisulirwa​—“eriherukya ly’Ekyana ky’Embuli.”​—Erib. 19:6-9.

12. Ngoku kiri omwa Eribisulirwa 21:1, 2, eriherukya ly’Ekyana ky’Embuli likendi syabya mughulhu wahi?

¹² Obuheruki bukendisyabya mughulhu wahi? Abosi 144,000 bakendisyabya ibabirighenda elhubulha olhuhi lhwe Harmagedoni lhuthe lhwatsuka. Aliwe, obo sibwendi syabya ibw’obuthuku bw’eriherukya ly’Ekyana ky’Embuli. (Soma Eribisulirwa 21:1, 2.) Eriherukya ly’Ekyana ky’Embuli likendi syabya enyuma w’olhuhi lhwe Harmagedoni n’esyonzighu syosi sya Nyamuhanga isyabirithoghothibwa.​—Esy. 45:3, 4, 13-17.

13. Eriherukya ly’Ekyana ky’Embuli likamanyisayaki okwa bahambirweko?

¹³ Eriherukya ly’Ekyana ky’Embuli likamanyisayaki okwa bahambirweko? Ngoku eriherukya likamathanaya haghuma omulhume n’omukali, eriherukya ly’omusyo eri likamathanaya haghuma Omwami, Yesu Kristo, ‘n’omuheruki’ wiwe, abandu 144,000. Eritsuka-tsukana n’omukonga ow’engunzerero oyo, abandu 144000 haghuma na Yesu bakendi syatsuka erithabalha ekihugho ahabw’emyaka 1,000.​—Erib. 20:6.

14-15. Eribisulirwa sura 21 hakalinganisaya abandu 144,000 naki? (Lebaya ekisasani ky’okwa kidipa.)

¹⁴ Ekindi, Eribisulirwa esura 21 hakalinganisaya abandu 144,000 n’omuyi owuwene kutsibu “e Yerusalemu, omuyi muhya-muhya.” (Erib. 21:2, 9) Omuyi oyu ahimbire okwa musingyi w’amabwe 12 awahandikireko “amena ikumi n’abiri w’abakwenda erikumi n’ababiri b’Ekyana ky’Embuli.” Busana naki eki mukyatsemesya Yoane? Kundi mwalhangira  erina liwe irinahandikire okwa lighuma ly’okwa mabwe ayo. Olhu ka lhwabya lhusunzo lhunene kutsibu!​—Erib. 21:10-14; Efe. 2:20.

¹⁵ Sihali omuyi owasosire omuyi w’omusyo oyo. Awithe embalhu y’esyamaghetse esitukwire, esyonyuyi 12 esy’esyolulu, esyombimbo n’emisingyi eyikolirwe omo mabwe w’obughuli​—kandi ebipimo byagho bihikene kandi bingene-ngene. (Erib. 21:15-21) Nomwabine, hakabya nga hane ekibulirweko! Lhangira ekyo Yoane akathasyathubwira: “Mundalhangira ehekalu omo muyi oyo, kusangwa Omukama Nyamuhanga, Omuthoki w’Ebyosi, n’Ekyana ky’Embuli bo Hekalu y’omuyi oyo. Kandi omuyi oyo syali n’obwagha bw’eryuba kutse omukera by’erikolerya mugho, kusangwa olhukengerwa lhwa Nyamuhanga lhukakolerayagho n’etara yagho ni Kyana ky’Embuli.” (Erib. 21:22, 23) Abakahulhawamo Yerusalemu nyihya-nyihya bakendi syabya haghuma na Yehova. (Ebr. 7:27; Erib. 22:3, 4) Kwesi, Yehova na Yesu y’ehekalu omo muyi oyo.

16. Ni kyahi ekikendi syabya okwa bandu omwa Buthabali bw’Emyaka Rukumi bw’Obwami bwa Nyamuhanga?

¹⁶ Abahakabibwa bakabunyahirawa bakalengekania oko muyi oyu. Aliwe n’abakatsemera amaha w’erisyabya okwa kihugho nabo batholere ibalengekania kugho. Omwa Buthabali bw’Emyaka Rukumi bw’Obwami bwa Nyamuhanga, e Yerusalemu nyihya-nyihya yikendi syaletha emighisa mingyi. Yoane akalhangira emighisa eyi yikasenda “ng’olhusi lhw’amaghetse w’engebe.” Kandi okwa misike y’olhusi kuli ‘emithi y’engebe’ eyikahulhukaya ebikoma ‘ebikalhamaya ebihanda.’ (Erib. 22:1, 2) Abandu bosi abakendi syabyaho okwa buthuku obo bakendi syathunga akaghisa k’erighasirwa omwa bibuya ebi. Lyolho-lyolho, abandu bosi abowa bakendi syayirwa mw’abahikene. Sihendi syasabya amalhwere, obulhumi, n’erilira busana n’obulighe.​—Erib. 21:3-5.

17. Ngoku kiri omwa Eribisulirwa 20:11-13, ni bahi abakendi syaghasirwa omwa Buthabali bw’Emyaka Rukumi?

¹⁷ Ni bahi abakendi syaghasirwa omwa bibuya ebi? Ab’erimbere, y’endeko nene y’abakendi syasabuka e Harmagedoni, haghuma n’abaana abangana syabuthwa omwa kihugho kihya-kihya. Aliwe Eribisulirwa sura 20 hakathasya lhaghanisaya hathi abaholi bakendisya lhubuka. (Soma Eribisulirwa 20:11-13.) “Abathunganene” abaholha kera, haghuma “n’ababi [“abathathunganene,” NWT],” abathabana akaghisa k’erigha oku Yehova​—abosi bakendi syalhubukibwa okwa kihugho. (Emib. 24:15; Yn. 5:28,  29) Mbwino eki kikamanyisaya kithi obuli mundu akendi syalhubukira okwa kihugho omwa Buthabali bw’Emyaka Rukumi? Eyihi. Abaghana akaghisa k’erikolera Yehova habw’obubi bathe baholha sibendi syalhubukibwa. Mubathunga akaghisa ako aliwe mubakangania ngoku sibatholere engebe okwa kihugho Paradiso.​—Mt. 25:46; 2 Tes. 1:9; Erib. 17:8; 20:15.

18. Okw’ighunzerera ly’emyaka 1,000 emibere yikendi syabya yithi okwa kihugho?

¹⁸ Aha emyaka 1,000 yikendisya hwera, abandu bosi okwa kihugho bakendi syabya ibamabirihikana. Hakendi syabya isihakiri mundu wosi-wosi oyukaghalhawa busana n’ekibi ekyo asighalhaya oku Adamu. (Abar. 5:12) Erithakira ly’ekibi kya Adamu likendi syabya iryabirilhusibirwaho ighuma. Omwa nzira eyo, abali okwa kihugho bakendisya “suba” kundi bakendi syabya bandu abahikene okw’ighunzerera ly’emyaka 1,000.​—Erib. 20:5.

19. Busana naki erilengesibwa ly’erighunzerera likayithayisibawa?

¹⁹ Thunasi ngoku Yesu mwaghana amathebo wa Sitani aw’erianza athwe obuthaleghulha bwiwe. Mwasighalha muthaleghulha akalengwako. Aliwe abandu bosi abahikene bane mwendi syabya ibanayitheghekire erikolha ekyo, Sitani akahebwa akaghisa k’eribalengesya? Obuli mughuma akendi syasubirya ekibulyo ekyo ahabwiwe Sitani akalhua omwa buhya okw’ighunzerera ly’emyaka 1,000. (Erib. 20:7) Abakendi syasighalha bathaleghulha okw’ilengesibwa ly’erighunzerera eri bakendi syabana engebe y’erikotha n’erighunzerera obwiranda bw’okwenene. (Abar. 8:21) Abakayisamambulha bakendi syathoghothibirwa ighuma, haghuma na Diabolo n’esyombinga siwe.​—Erib. 20:8-10.

20. Amaminyereri awakasisimulha awali omw’Ibisulirwa akaleka iwayowa wuthi?

²⁰ Wamayowa wuthi enyuma w’erigha omwa bikuhi okwa bikulhu-bikulhu ebiri omwa kitabu ky’Eribisulirwa? Mbwino sikiritsemesaya kutsibu wukayilhangira omwa maminyereri awakasisimulha aya? Mbwino sikirileka wukanza erikokya abandi erithuyiyungako omw’iramya ly’okwenene erya Nyamuhanga wethu? (Erib. 22:17) Amalengekania n’emithima yethu yinemuhambwako kutsibu busana n’emyatsi eyikasisimulha eyi ey’obuthuku obukasa, ahathe erithika-thika kikathuhira mw’omuhwa w’erisuba omwa by’omukwenda Yoane abugha, athi: “Amina! Omukama Yesu, wase!”​—Erib. 22:20.