1-2. Ni nzumwa yahi nguma eyikaleka ithwanza eriminya ebiri omwa kitabu ky’Eribisulirwa?

 WUNE wathalebya e alubbamu y’omundu mulebe? Wukalebya ebisasani iwalhangiramu abandu bangyi abo wuthasi. Aliwe ekisasani kighuma ikyakuhambako obulengekania. Busana naki? Kundi nawu wune kukyo. Wukakisamalira ndeke, iwalengaho eryibuka omughulhu mwakitherawa n’aho mwakithererawa. Kandi iwalengaho eriminyerera obuli mundu oyuli okwa kisasani ekyo. Ekisasani ekyo kikakuhambako kutsibu.

² Ekitabu ky’Eribisulirwa kiri ng’ekisasani ekyo. Busana naki? Habw’esyonzumwa ng’ibiri. Ey’erimbere, ekitabu eki kyahandikawa busana nethu. Omwa mulhondo w’erimbere, thukasoma thuthi: ‘Omo kitabu eki musakire emyatsi eyo Yesu Kristo abisulha. Eribisulha eri Nyamuhanga amuhalyo erikumbulira abaghombe biwe emyatsi eyikendi syabya lhuba.’ (Erib. 1:1) Kwesi, ebiri omwa kitabu eki sibyahandikawa busana n’abandu abosi aliwe busana nethu, ithwe baghombe ba Nyamuhanga abayihereyo. Ithwe ng’abandu ba Nyamuhanga, sithutholere thukasweka thukaminya ngoku thunemusangira omw’ibererera ly’amaminyereri awali omwa kitabu ekikatsemesaya eki. Ni bugha ambu, thukayilhangira “omwa kisasani.”

3-4. Erikwamana n’ekitabu ky’Eribisulirwa, amaminyereri awalimo angabererere mughulhu wahi, kandi ekyo kitholere ikyahamba kithi okwa buli mughuma w’okw’ithwe?

³ Enzumwa eyakabiri yihambire okwa mughulhu w’eribererera ly’amaminyereri aya. Omukwenda Yoane iniamabirikulha omo myaka mwaminyerera omughulhu oyo akabugha  athi: ‘Oko kiro ky’Omukama, Omulimu mwambikako.’ (Erib. 1:10) Yoane abere akahandika ebinywe ebyo ng’omwa 96 E.K., “ekiro ky’Omukama” kyabya isikiri kya yaberwa erihika. (Mt. 25:14, 19; Lk. 19:12) Aliwe erikwamana n’amaminyereri we Biblia, ekiro ekyo kyatsuka 1914, Yesu akayirwa mw’Omwami elhubulha. Eritsuka-tsukana n’omwaka oyo, amaminyereri awali omw’Ibisulirwa awahambire okwa bandu ba Nyamuhanga mwatsuka eribererera. Omo kwenene, obuthuku obwa thulimu bukahulhawamo “ekiro ky’Omukama”!

⁴ Kundi thuli omwa buthuku obukasisimulha obu, n’ithwe thutholere erilengekania kutsibu okw’ihabulha ly’olhwanzo eriri omwa Eribisulirwa 1:3: “Obutseme buli n’omundu oyukasoma ekitabu eki, kandi obutseme buli n’abandu abakowa ebinywe by’eriminyerera eri, n’abakakwama emyatsi eyisakire omo kitabu eki! Kusangwa emyatsi eyi yikendi syabererera lhuba.” Neryo kwesi, thutholere ‘ithwasoma’ omwa mulenge owakowika, nuku ‘thwowe ebinywe by’eriminyerera eri n’eribikwama.’ Ebighuma by’okwa binywe ebi ebyo thutholere ithwakwama by’ebyahi?

5. Ekitabu ky’Eribisulirwa kikahira kithi omuwathu okwa kiyithawa ky’erilhangira thuthi Yehova akaligha eriramya lyethu?

⁵ Eritsuka okwa sura y’erimbere y’ekitabu ky’Eribisulirwa, thuk’igha ngoku Yesu anasi ndeke ebinemubya omwa bithunga by’abandu biwe. (Erib. 1:12-16, 20; 2:1) Yesu mwakangania ekyo omwa myatsi eyo athuma omwa bithunga musanju eby’omwa Asia Enyike. Omo myatsi eyo, mwaha obusondoli obulhangirikire obwanga wathikirye Abakristayo b’omwa kighana ky’erimbere erilhangira bathi Yehova akaligha eriramya lyabu. N’ekindi, ebiri omwa myatsi eyo bihambire n’okwa bandu bosi ba Nyamuhanga munabwire. Ekyo kikathweghesayaki? Omusondoli wethu, Kristo Yesu, anasi ndeke nga thwimene thuthi bunyakirimu. Thuli omwa butheya bwa Yesu; akabya inianalhangire obuli kindu. Anasi ebya thutholere erikolha nuku Yehova alhole embere erithusima. Ni busondoli bwahi obo aha obwa thutholere ithwakwama munabwire?

6. (a) Ngoku kiri omwa Eribisulirwa 2:3, 4, ekithunga ky’Efeso kyabya kiwithe kitsibuki? (b) Eki kikathweghesayaki?

⁶ Soma Eribisulirwa 2:3, 4. Sithutholere thukaherya olhwanzo lhwethu lhw’erimbere olho thwabya thuwithire Yehova. Omwatsi ogho Yesu athumira ab’omwa kithunga ky’Efeso mwakangania ngoku babya ibabiriyiyinia kandi ngoku babya ibabirilholha embere erikolera Yehova buthaleka nomubanabana ebitsibu muthina-muthina. Nomwabine, babya ibabiriherya olhwanzo lhwabu lhw’erimbere. Mubayithagha erisuba-subania olhwanzo olho​—bithe bithya, eriramya lyabu siryanga lighirwe. Kuthya nethu munabwire, sithutholere thukasubulira okw’iyiyinia. Thutholere ithwayiyinia ahabw’esyonzumwa esitholere. Nyamuhanga wethu syali subulira okw’itsemera ebya thukakolha lisa aliwe kandi n’okwa kikaleka ithwabikolha. Ebilhubirirwa byethu ni bikulhu embere siwe kundi anzire eriramya lyethu iryaseghemera oko lhwanzo lhunene n’erisima ebya thumuwithire.​—Emi. 16:2; Mk. 12:29, 30.

7. (a) Ngoku kiri omwa Eribisulirwa 3:1-3, ni kitsibu kyahi ekya Yesu alhangira omwa banya Sardi? (b) Thutholere ithwakolhaki?

⁷ Soma Eribisulirwa 3:1-3. Thutholere ithwalholha embere eribya ithunabukire kandi ithunatheghirye. Ab’omwa kithunga kye Sardi babya bawithe ekitsibu ekiri mbaghane.  Nomwakine indi kera banabya bawithe omuhwa w’erikolera Yehova, babya isibakiwithe omuhwa. Neryo Yesu mwababwira athi ‘babuke.’ N’ikunga lyahi eryo thuk’ighira okw’eki? Ni kwenene, Yehova syendisy’ibirirwa omubiiri wethu. (Ebr. 6:10) Aliwe, sithutholere thukalengekania thuthi ebya thwakolha kera omwa mubiiri wa Yehova bikaghunza. Nomwakine indi thuwithe erilemererwa lingyi kwilhaba kera, thutholere ithwalholha embere eriyihwerya omwa “omubiiri w’Omukama,” n’erisighalha ithunabukire kandi ithunatheghirye erihika okwa nduli.​—1 Kor. 15:58; Mt. 24:13; Mk. 13:33.

8. Omwatsi okwa balikyethu be Laodikia akathweghesayaki? (Eribisulirwa 3:15-17)

⁸ Soma Eribisulirwa 3:15-17. Thutholere ithwabya n’omuhwa kandi ithwaramya n’omuthima wethu wosi. Omwatsi wa Yesu okwa banya Laodikia mwakangania ekindi kitsibu ky’embaghane. Babya “kange-kange” omw’iramya lyabu. Busana n’obuthatsomana bwabu, Yesu mwababwira athi ni ‘bahanya n’ab’obulighe.’ Babya batholere erikangania omuhwa munene busana na Yehova n’eriramya liwe. (Erib. 3:19) Ekyo kikathweghesayaki? Omuhwa wethu amabya iniabirikeha okwa lhulengo lhulebe, thutholere ithwongera erisima eby’obunyakirimu ebya thuwithe. (Erib. 3:18) Sithwanganza erilighira eky’erisondekania engebe eyuwene kikathulengemerya, kikaleka thukaghana erihira eby’obunyakirimu by’embere.

9. Ngoku kiri omwa myatsi ya Yesu okwa Bakristayo be Pergamo ne Tuatera, ni kabi kahi ako thutholere ithwayihighulhako?

⁹ Thutholere ithwaghana esyongangirirya sy’abakayisamambulha okw’ikirirya. Yesu mwakunga balikyethu balebe abe Pergamo busana n’erilethaho erighabulhana. (Erib. 2:14-16) Mwasima abe Tuatera habw’eriyihighulha okwa “rikumbo lya Sitani erikalire,” kandi mwabahira mw’omuhwa athi ‘bahambe ndeke’ ekwenene. (Erib. 2:24-26) Abakristayo b’eyo ababya batsekire bunyakirimu abaligha erithebibwa omwa syongangirirya sy’amabehi babya batholere ibayisubamo. Kandi ibbwa ithwe munabwire? Thutholere ithwaghana esyongangirirya syosi-syosi esihukene n’amalengekania wa Yehova. Abakayisamambulha okw’ikirirya banganabya ‘ibakwamire omuhanda w’ekisomo,’ aliwe ‘ibakaghana obuthoki bwakyo.’ (2 Tim. 3:5) Kyolhobire eriminyerera n’erighana esyongangirirya sy’amabehi thwamabya ithuli bigha b’Ekinywe kya Nyamuhanga ab’omuhwa.​—2 Tim. 3:14-17; Yuda 3, 4.

10. Ni rindi isomo lyahi erya thwang’ighira okwa bya Yesu abwira ab’omwa kithunga kye Pergamo ne Tuatera?

 ¹⁰ Sithutholere thukasangira, eritsemera, kutse erilighira omulingo wosi-wosi w’obusingiri. Balikyethu abe Pergamo ne Tuatera babya ibanawithe ekindi kitsibu. Yesu mwatsweba abandi omwa bithunga ebyo busana n’erithendi yihighulha okwa busingiri. (Erib. 2:14, 20) Ekyo kikathweghesayaki? Isithwalengekanaya thuthi kundi thwabirikolera Yehova habw’emyaka mingyi kandi thuthi kundi lino thuwithe esyonzunzo nga sy’esyo kikendi leka Yehova iniathathusuyira thwamasangira omwa kyosi-kyosi ekihambene n’eby’obutswatswa. (1 Sam. 15:22; 1 Pet. 2:16) Anzire ithwamakirira ebihano biwe eby’esyongeso, ekihugho nomukyang’ongera eritsandira ighuma omwa by’esyongeso.​—Efe. 6:11-13.

11. Ni kyahi ekya thwamabirith’igha? (Lebaya n’akasanduku “ Amasomo Busana Nethu Munabwire.”)

¹¹ Omwa bikuhi thwanga bugha thuthiki okwa bya thwamabirith’igha? Thwamabirilhangira ekiyithawa ky’erilhangira thuthi Yehova akaligha eriramya lyethu. Thwamabya ithunemukolha ekindu ekyangaleka eriramya lyethu irithaliwa, thutholere ithwakolha esyombinduka aho n’aho. (Erib. 2:5, 16; 3:3, 16) Aliwe Yesu mwakangania ekindi kindu omo myatsi eyo athumira ebithunga. Ky’ekyahi?

12. Ni byahi ebya Yesu abwira balikyethu abe Simurna ne Filadelfia ebya thutholere ithwalengekaniako munabwire? (Eribisulirwa 2:10)

¹² Lino thulebaye omwatsi ogho Yesu athumira ekithunga kye Simurna ne Filadelfia. Mwabwira Abakristayo b’eyo athi isibasagha eriendereribwa, kundi obuthaleghulha bwabu bwangalekire ibahembwa. (Soma Eribisulirwa 2:10; 3:10) Ekyo kikathweghesayaki munabwire? Thutholere ithwabya ithunalindirire eriendereribwa kandi ithunayitheghekire eririghumira. (Mt. 24:9, 13; 2 Kor. 12:10) Busana naki eryibukibwa eri ni likulhu?

13-14. Emyatsi eyiri omwa Eribisulirwa sura 12 yikahamba yithi okwa bandu ba Nyamuhanga?

¹³ Ekitabu ky’Eribisulirwa kikathubwira ngoku abandu ba Nyamuhanga bangendereribwe omwa buthuku bwethu​—“ekiro ky’Omukama.” Eribisulirwa sura 12 hakakanaya okwa lhuhi olhwabuthuka elhubulha Obwami bwa Nyamuhanga bukanatsuka erithabalha. Mikaeli​—Yesu Kristo ow’olhukengerwa​—n’amahe wiwe mubalhwa na Sitani n’esyombinga. (Erib. 12:7, 8) Busana n’ekyo, esyonzighu sya Nyamuhanga esyo musyakindwa n’erighuswa okwa kihugho, ekyabirilethera abandu b’eriaghalhwa linene. (Erib. 12:9, 12) Aliwe eki kikahamba kithi okwa bandu ba Nyamuhanga?

¹⁴ Ekitabu ky’Eribisulirwa kikathasyathubwira ekya Sitani anemukolha. Syawithe ngoku angathasyaghenda elhubulha, neryo akahweraya ekinigha kiwe okwa misighalira y’abahakabibwa, abak’imanira Obwami bwa Nyamuhanga okwa kihugho kandi abawithe  omubiiri ‘w’erithulhagho lya Yesu.’ (Erib. 12:17; 2 Kor. 5:20; Efe. 6:19, 20) Obuminyereri obu bwabiribererera buthi?

15. “Abalhangiri babiri” abali omwa Eribisulirwa sura 11 bak’imanira bahi, kandi ni kyahi ekyabahikako?

¹⁵ Sitani mwaleka esyonzighu sya Nyamuhanga isyabambira baghalha bethu abahakabibwa ababya bakasondolha omubiiri w’erithulhughania Obwami. Ab’embere-mbere omw’ibo babakanibweko nga “balhangiri babiri” ab’ithawa. * (Erib. 11:3, 7-11) Omwa 1918, balikyethu munani b’okwa bakasondolha abo mubahirwa kw’esyombanza sy’amabehi, kandi bamahirwa omwa ngomo habw’obuthuku buuli. Okwa malengekania w’abandu, omubiiri w’abahakabibwa aba mwabya ‘ng’am’ithibwa.’

16. Ni kindu kyahi ekikaswekaya ekyabya omwa 1919, aliwe eritsuka n’aho Sitani abirilholha embere erikolhaki?

¹⁶ Kandi obuminyereri obuli omwa Eribisulirwa sura 11 bukakanganaya ngoku “abalhangiri babiri” bangasubire okwa ngebe enyuma w’akathambi kake. Omw’ibererera ly’obuminyereri obo, ekindu ekikaswekaya mukyabya omwa mwaka owakwamako balikyethu aba balihirirwe omwa ngomo. Omwa Kwakasathu 1919 baghalha bethu abahakabibwa abo mubalhusibwa omwa ngomo, n’enyuma waho mubalhusibwako emisango. Aho n’aho baghalha bethu mubasuba okwa mubiiri​—omubiiri w’Obwami. Aliwe ekyo mukithaleka Sitani akalekera aho eribambira abandu ba Nyamuhanga. Eritsuka okwa buthuku obo, Sitani abirisenderya okwa bandu bosi ba Nyamuhanga ‘kw’olhusi’ lhw’eriendererya. (Erib. 12:15) Omo kwenene, obuli mughuma w’okw’ithwe akayithagha ‘eriyitsingirira n’erikirirya.’​—Erib. 13:10.

17. Nomwakine indi Sitani abiribya inianemubambira abandu ba Nyamuhanga, ni buwathikya bwahi obwa bathalengekenie obwa babiribana?

¹⁷ Eribisulirwa sura 12 hakathasyakanganaya ngoku abandu ba Nyamuhanga bangabwene obuwathikya bulebe obukalhua aho bathalengekenie. “Ekithaka” kyangabere ng’ekikanywa “olhusi” lhw’eriendererya. (Erib. 12:16) Ekyo ky’ekyanabiribya. Okwa bundi buthuku, abandi banya bilhaghiro ab’omwa kihugho kya Sitani abakalengekanaya ndeke, babirilhwira okwa bandu ba Nyamuhanga. Mirundi mingyi abaghombe ba Yehova babirisinga esyombanza esyabirileka ibathunga obwiranda nga bwan’obo. Babirikolesya bathi obwiranda obu? Babirikolesya ndeke akaghisa kosi-kosi  ako bakabana erikolha omubiiri ogho Yehova abiribaha. (1 Kor. 16:9) Omubiiri oyu mwamuliki?

18. Omubiiri wethu mukulhu omwa biro by’enyuma-nyuma bino w’owahi?

¹⁸ Yesu mwalhaghulha athi abandu biwe bangathulhughenie “engulhu yuwene y’Obwami” bwa Nyamuhanga omwa kihugho kyosi enduli yithe yasa. (Mt. 24:14) Omw’ikolha ekyo, bakaghasirawa omwa buwathikya bw’omumalaika, kutse egurupu y’abamalaika abakanibweko ng’abawithe “engulhu yuwene y’erikotha erikangiriryayo okwa bandu abikere omo kihugho, oko buli kithunga ky’abandu, n’obuli kihanda, n’obuli mubughe, n’okwa bandu.”​—Erib. 14:6.

19. Ni wundi mwatsi wahi ogho abanzire Yehova batholere ibathulhughania?

¹⁹ Engulhu yuwene y’Obwami si gho mwatsi musa ogho abandu ba Nyamuhanga bawithe erithulha. Kandi batholere ibasighika omubiiri w’abamalaika abakanibweko omwa Eribisulirwa sura 8 erihika 10. Abamalaika aba bakarangirira obulighe obukwamangene okw’abo abakaghana Obwami bwa Nyamuhanga. Neryo kwesi, Abema ba Yehova babiribya ibanemuthulhughania omwatsi w’eritswera, owakalinganisibawa ‘n’amathwa n’omuliro,’ eribisulha eritswera lya Nyamuhanga okwa bithongole muthina-muthina by’ekihugho kibi kya Sitani. (Erib. 8:7, 13) Abandu batholere ibaminya ngoku enduli yiri hakuhi nuku bakole esyombinduka nene-nene omwa ngebe yabu, banalhama okwa kiro ky’erihithana lya Yehova. (Zef. 2:2, 3) Aliwe abangyi sibali ligha omwatsi oyu. Thukayithagha obuthubaha erithulhughaniagho. Omwa buthuku bw’obulighe bunene, omwatsi w’erighunzerera ow’eritswera akendi syahithania abandu ba kutsibu.​—Erib. 16:21.

20. Thukendi syakania okuki omo myatsi ibiri eyikakwamako?

²⁰ Omo kwenene thutholere ithwakwama “ebinywe by’eriminyerera eri” kundi nethu thune omw’ibererera ly’ebya thukasoma omwa kitabu ky’Eribisulirwa. (Erib. 1:3) Aliwe thwanga ghumira thuthi buthaleghulha eriendereribwa n’erilholha embere erikolha owethu ow’erithulhughania emyatsi eyi buthubaha? Ni bindu bibiri ebikendi thughumya: eky’erimbere, ebyo ekitabu ky’Eribisulirwa kikabisulha okwa syonzighu sya Nyamuhanga, n’ekyakabiri, emighisa y’obuthuku obukasa eya thukendi syabana thwamasighalha bathaleghulha. Thukendisya kania okw’ebyo omo myatsi ibiri eyikakwamako.