1-2. N’ithwamu lyahi likulhu eryo Abayuda ababya bikere e Babeli babya b’erikolha? (Ezera 1:2-4)

 EKIRANGO kyabya ikyamabirilhaba! Abayuda ababya ibamabirighunza omwa bunyewa mwe Babeli mw’emyaka nga 70, babya ibamabya bwiranda erisuba ewabu, e Israeli. (Soma Ezera 1:2-4.) Yehova musa yuwanga lekire eki ikyathokekana. Busana naki ithwabugha thuthya? E Babeli isiyirilhwika abanyewa bayo. (Isa. 14:4, 17) Aliwe e Babeli yabya iyabirikindwa, kandi omuthabali muhyaka abya iniabiribwira Abayuda athi basube ewabu. Busana n’ekyo, obuli Muyuda, kwilhabirirya emithwe y’eka, abya w’erithwamu: erilhua e Babeli kutse erisighalhayo. Erithwamu eryo lyangabya isiryabya lyolho. Busana naki?

² Kyangabya imukyakalira abangyi abakulire omo myaka erighenda olhughendo olho. Kandi kundi abangyi b’okwa Bayuda babuthirawa e Babeli, eyo yababya basi hasa. Okw’ibo, e Israeli, kyabya kihugho ky’abathatha-kulhu wabo. Kikalhangirika abandi Bayuda babya ibabirigagira e Babeli ya kutsibu, neryo kyangabya imukyabakalira erisighania emiyi yabu eyuwene kutse esyobbizinesi syabo n’eriyikalha omwa kihugho ekya bathabeghere.

3. Ni mughisa wahi ogho emisighalira y’Abayuda abathaleghulha abangasubire e Israeli bangabwene?

³ Okwa Bayuda abathaleghulha, emighaso y’erisuba e Israeli yabya yilengire kutsibu ekyosi-kyosi ekya bangayitheryeko. Omughisa munene lyabya iry’eriramya lyabu. Nomwakine indi e Babeli yabya esyohekalu sy’abakafiri esilhabire omu 50, omwa muyi oyo si mwabya ehekalu ya Yehova. Siyabya ekiherero ekyo Abaisraeli banga herereko obuhere ngoku Emighambo ya Musa yabya yikabugha, kandi siyabya abahereri abayithondekenie abangahayo obuhere obo. Eryongera okw’ekyo, abalhume n’abakali abakafiri ababya isibalisikaya Yehova kutse ebihano biwe babya banene kutsibu okwa bandu ba Yehova. Neryo esyongumi  sy’Abayuda ababya bakubaha Nyamuhanga babya bakakandira erisuba ewabu eyo banga suba-subanirye eriramya ly’okwenene.

4. Ni buwathikya bwahi obo Yehova alhaghanisaya Abayuda abasuba e Israeli?

⁴ Olhughendo lhwonyine-nyine olhukalire olhw’erilhua e Babeli eriya e Israeli lhwangathwere mezi ng’ani, aliwe Yehova mwalhaghanisya athi ekyosi-kyosi ekyangabere nga kikabalemesaya erisubayo kyanga lhusibirweho. Isaya mwahandika athi: “Mutheghekanaye enzira busana n’Omwami Mukulhu omo mbwarara! Muthungananaye omo mbwarara embalhu nene busana na Nyamuhanga wethu. . . . N’ekithaka kithalingirirene kiyirawe mo bwerere, n’ahakwangukire habye omusya munene.” (Isa. 40:3, 4) Thathera akasasani kano: enzira nene eyilhabire omwa mbwarara, omusya munene owatherekerere. K’abya mughisa okwa bangalhabire muyo! Kyanga bolhobere kutsibu erilhaba omwa nzira nene eyitherekerere kwilhaba erihethuka n’eryandaghalha kutse erithimba okwa bithwe, ehithwe, kutse emisya. Kandi banganguhire.

5. Ni rina lyahi eryahebawa enzira nene y’omusyo ey’erilhua e Babeli eriya e Israeli?

⁵ Munabwire, esyonzira nene sikaminyikalibawa busana n’erina kutse enamba. Enzira nene ey’omusyo eya Isaya akanayako nayo yabya yiwithe erina. Thukasoma thuthi: “Enzira nene yasyabyayo, n’embalhu, nayo yasyahulhwa mo mbalhu y’eribuyirire; abatsandire sibendi syalhaba muyo.” (Isa. 35:8) Omulhaghe oyu aby’akahamba athi okwa Baisraeli okwa buthuku obo? Kandi akathuhambako athi munabwire?

6. Busana naki enzira eyi muyahulhwamo eyibuyirire?

⁶ “Embalhu y’eribuyirire”—enzira nene eyi ka yiwithe erina eryuwene! Busana naki enzira eyi muyahulhwamo eyibuyirire? Ekihanda ky’Abaisraeli ekisuba-subanibirwe sikyangaberemo “abatsandire”—Omuyuda wosi-wosi oyuwanga thwiremo eribya mutswatswa, eriramya esyosanamu, kutse erikolha ebindi bibi ebikalire. Abayuda abangasubireyo bangabere “kihanda kibuyirire” embere sya Nyamuhanga wabo. (Ebi. 7:6) Aliwe ekyo mukithamanyisya kithi, abalhua e Babeli mubathayithagha erikolha esyombinduka erithoka eritsemesya Yehova.

7. Ni mbinduka syahi esyo abandi Bayuda babya batholere erikolha? Iha eky’erileberyako.

⁷ Ngoku kikanganibwe okw’itsuka, abangyi b’okwa Bayuda babuthirawa e Babeli, kandi kilhangirikire abangyi babya ibabiribeghera amalengekania n’ebihano by’Abanya Babeli. Myaka mingyi Abayuda b’erimbere balisubire e Israeli, Ezera mwaminya ngoku abandi Bayuda babya ibabirithahya abakali abakafiri. (Eri. 34:15, 16; Ezr. 9:1, 2) Kandi enyuma waho, Omuthabali Nehemia mwasweka akaminya ngoku abaana ababuthirawa e Israeli babya sibali bath’igha omubughe w’Ekiyuda. (Ebi. 6:6, 7; Neh. 13:23, 24) Abaana abo banganzire bathi Yehova n’erimuramya bathasi Olhuhebrania—omubughe mukulhu ogho Ekinywe kya Nyamuhanga kyahandikawamo? (Ezr. 10:3, 44) Neryo Abayuda abo babya b’erikolha esyombinduka nene-nene, aliwe kyanga bolhobere erisikolha ibane e Israeli, eyo eriramya ly’okwenene lyabya iriri okw’isuba-subanibwa lyolho-lyolho.—Neh. 8:8, 9.

8. Busana naki ebyabya kera bitholere ibyathuhambako munabwire? (Lebaya ekisasani ky’okwa kidipa.)

⁸ Abandi ibangana lengekania bathi, ‘Ekyo kikaswekaya, aliwe mbwino ebyabya okwa Bayuda kera binathuhambireko munabwire?’ Ahathe erithika-thika bikathuhambako, kundi thuli ng’abakalendera omwa “mbalhu y’eribuyirire.” Mbulha thuli bahakabibwa kutse ‘ab’esindi mbuli,’ thutholere ithwasighalha omwa  “mbalhu y’eribuyirire” yinemuthuthwalha omwa paradiso y’obunyakirimu n’erithukolya okwa mighisa y’Obwami ey’obuthuku obukasa. b (Yn. 10:16) Eritsuka 1919 E.K., esyomiliyoni sy’abalhume, abakali, n’abaana babirilhua omwa Babeli Mukulhu, amadini wosi w’amabehi, kandi babiritsuka erilendera omwa nzira y’omusyo eyo. Obundi wuli mughuma w’okw’ibo. Nomwakine indi enzira eyo yakyungulhawa myaka nga 100 enyuma, omubiiri w’eritheghekaniayo atsuka bighana bingyi kera.

9. Ngoku kiri omu Isaya 57:14, omubiiri w’eritheghekania ‘embalhu y’eribuyirire’ abirikolhwa omwa nziraki?

⁹ Okwa Bayuda abalhua e Babeli, Yehova mwalhangira athi ebikathwikalhaya bikalhusibawa omwa nzira. (Soma Isaya 57:14.) Kandi ibbwa ‘embalhu y’eribuyirire’ eya munabwire? Ahabw’ebighana bingyi ebyakolhaya okwa mwaka wa 1919, Yehova mwakolesya abalhume abakamubaha eriwathikya erikokothya enzira eyikalhua omwa Babeli Mukulhu. (Thasyalebaya na Isaya 40:3.) Mubakolha omubiiri w’eritheghekania owayithaghisibawa—omubiiri w’erikokothya enzira y’obunyakirimu—erileka kisyathokekana okwa b’emithima myolho erilhua omwa Babeli Mukulhu n’eringira omwa paradiso y’obunyakirimu, eyo eriramya lya Yehova ery’okwenene lyabya iryabirisuba-subanibwa. Omubiiri w’eritheghekania “enzira” oyu mwabyaki? Thulebaye emighuma y’okwa mibiiri y’eritheghekania eyakolhawa.

10-11. Eriprintinga n’erihindulha e Biblia byabiriwathikya bithi okw’ilhandaghania omwatsi we Biblia? (Lebaya n’ekisasani.)

¹⁰ Eriprintinga. Erihika ahakathi-kathi k’ekighana 15, e Biblia iyikahandikawa omwa byalha. Omubiiri oyo mwaghunza buthuku buuli, kandi esyokopi sye Biblia syabya nyike kandi isikalire ebbeyi. Aliwe habere habirihirwa ekyuma ekikaprintinga, muky’olhoba kutsibu erihulhukya e Biblia n’erighabayo.

¹¹ Erihindulha. Ahabw’ebighana, e Biblia yabyaho kutsibu-tsibu omwa Lhulatini, omubughe owabya akayitheghereribwa n’abasomire basa. Aliwe eriprintinga lyabere likakanyirira, abandu abakubaha Nyamuhanga mubongera omubiiri w’erihindulha e Biblia omwa mibughe eyikabughawa n’abandu ba buli kiro. Neryo abasomi be Biblia ibakalinganisaya ebyo abakulhu b’amadini babya bakabakangirirya n’ebya Biblia yikakangiriraya.

12-13. Iha eky’erileberyako ekikakanganaya ngoku Abigha be Biblia ab’emithima myolho ab’omwa kighana kye 19 batsuka eribisulha esyongangirirya sy’amadini w’amabehi.

¹² Ebitabu ebikakolesibawa omw’igha e Biblia. Abigha be Biblia abayitheghirye mub’igha bingyi okwa byabasoma omwa Kinywe kya Nyamuhanga. Kandi ekyaponesaya kutsibu abakulhu b’amadini bangyi ly’eribya abigha be Biblia abo ibabya isibali yihunira n’ebya babiribumbura. Ng’eky’erileberyako, omwa kighana 19, abalhume ng’ab’abo ab’emithima myolho mubatsuka erihulhukya esyotrakit esyabisulha esyongangirirya sy’amabehi esy’amakanisa.

¹³ Ng’omwa 1835 omulhume oyukubaha Nyamuhanga ya Henry Grew mwahulhukya etrakit eyikakanaya okwa mibere y’abaholi. Omwa trakit eyo, mwakolesya Amasako erikakasya ngoku engebe eyithehonda ni kihembo erilhua oku Nyamuhanga, butsira indi ni kindu ekyo ithwe bosi thukabuthawa nakyo, ngoku amakanisa mangyi aby’akakangirirya. Omwa 1837 omuherezya w’edini ya George Storrs mwabana ekopi y’etrakit eyo inianemughendya etreyini. Mwasomayo kandi amaligha ngoku abiribana ekwenene ngulhu. Mwathwamu eribwira abandi okwa by’igha. Omwa 1842 mwalhabya emikania mingyi eyihambire okwa  muthwe owakasisimulha ono “Erithabulya—Mbwino n’Ababi Banawithe Engebe Eyithehonda?” Ebya George Storrs ahandika mubyahamba kutsibu oko mulhwana ya Charles Taze Russell.

14. Mughalha Wethu Russell n’abo abya nabu mubaghasirwa bathi omwa mubiiri w’eritheghekania enzira y’obunyakirimu owakolhawa kera? (Lebaya n’ekisasani.)

¹⁴ Mughalha Wethu Russell n’abo abya nabo mubaghasirwa bathi omwa mubiiri w’eritheghekania enzira y’obunyakirimu owakolhawa kera? Omw’igha lyabu, mubathoka erikolesya esyo lexicons, concordances, n’esindi mbindulha muthina-muthina esye Biblia, ebyosi ebya theghekawa bathebatsuka omubiiri wabo. Kandi mubaghasirwa omw’isekulya lye Biblia ery’abalhume nga Henry Grew, George Storrs, n’abandi. Mughalha Wethu Russell n’abo abya nabo, nabu mubawathikya okw’itheghekania enzira y’obunyakirimu omw’ihulhukya ebitabu bingyi n’esyotrakit ebikakanaya okwa myatsi ye Biblia.

15. Ni bibuya byahi ebyabya omwa 1919?

¹⁵ Omwa 1919, e Babeli Mukulhu muyabya isyanga thasyakakirya abandu ba Nyamuhanga. Omwa mwaka oyo, muhabya “omughombe oyutheleghulha n’ow’amenge,” oyuwasira okwa buthuku nuku athangirire ab’emithima myolho omwa “mbalhu y’eribuyirire” embyaka. (Mt. 24:45-47) Thukasima n’abathaleghulha abakera “abatheghekanaya enzira,” kundi mukyawathikya abakalendera muyo eryongera eriminya ebighendererwa bya Yehova. (Emi. 4:18) Kandi mubabya ibangana thoka erighendera okwa bihano bya Yehova. Yehova syali bugha athi abandu biwe bakolere murundi mughuma esyombinduka esikayithaghisibawa. Aliwe abiribya inianemwerya abandu biwe. (Lebaya akasanduko “ Yehova ak’Eraya Abandu Biwe Lyolho-lyolho.”) Ka thukendi syatsema ithwe bosi thukathoka eritsemesya Nyamuhanga wethu omwa buli kindu ekyathukakolha!—Kol. 1:10.

16. Eritsuka 1919, ni sugha lyahi eryabirikolhwa okwa “mbalhu y’eribuyirire”? (Isaya 48:17; 60:17)

¹⁶ Obuli nzira yikayithagha eribya iyinemusuwa. Eritsuka 1919, eritheghekanibwa ‘ery’embalhu y’eyibuyirire’ lyabiribya irinemulholha embere, nuku kithokekane abandu bangyi erilhua omwa Babeli Mukulhu. Omughombe oyutheleghulha n’ow’amenge oyuwabya iniamabirisombolhwa mwatsuka omubiiri, kandi omwa 1921, mwahulhukya ekitabu ekikakolesibawa omw’igha e Biblia ekyakolhawa eriwathikya abakatsuka erigha e Biblia. Erighunzerera esyokopi hakuhi miliyoni mukagha esy’ekitabu ekyo, The Harp of God, musyahulhukibwa omwa mibughe 36, kandi abangyi mubaminya ekwenene erilhabira mukyo. Lino-lino, muthwathungire ekitabu kihyaka ekyuwene ekikakolesibawa omweghesya abigha be Biblia, Tsemera Engebe Kera na Kera! Omwa biro by’enyuma-nyuma bino, Yehova abirikolesya ekithunga kiwe eribya ikinemuthuha ebyalya by’obunyakirimu eriwathikya ithwe bosi erilholha embere erilendera omwa “mbalhu y’eribuyirire.”—Soma Isaya 48:17; 60:17.

17-18. ‘Embalhu y’eribuyirire’ yikakolhaya hayi?

¹⁷ Ithwangana bugha thuthi omundu akabya akaligha erigha e Biblia, akabana akaghisa k’erilendera omwa “mbalhu y’eribuyirire.” Abandi bakalendera omwa nzira eyo habw’akathuku kake neryo ibasighaniayo. Abandi babirithwamu eribya ibanemulendera omwa nzira eyo erihika aho bakendi syahikira aho yikahwera. Yikahwera hayi?

¹⁸ Okw’abo abawithe amaha w’erisyaghenda elhubulha, ‘embalhu y’eribuyirire’ yikakolhaya “omo Paradiso, y’eririma lya Nyamuhanga” elhubulha. (Erib. 2:7) Okw’abawithe amaha w’erisyabya okwa kihugho, enzira eyo yikakolhaya okw’ihikana okw’ihwererera ly’emyaka 1,000. Munabwire, wamabya iwunemulendera omwa mbalhu eyo, isiwakebera enyuma. Kandi ambi isiwalhua muyo wuthewaghunza olhughendo lhwawu erihika omwa kihugho kihya-kihya! Thukakusunzira “olhughendo lhubuya.”