1-2. Ni kyahi ekya thwangana yibulya bikahika okwa misabe yethu?

 WUNE wathabulha Yehova ng’akanasubiraya emisabe yawu? Kyamabya ikwakiri kithya, siwe musa. Balikyethu bangyi babiriyowa bathya, kutsibu-tsibu omughulhu bawithe ebitsibu. Thwamabya ithunemwaghalhwa, nethu ikyangana thukalira erilhangira ngoku Yehova anemusubirya emisabe yethu.

² Leka thulebaye ekyanga leka ithwayikethera ngoku Yehova akasubiraya emisabe y’abaramya biwe. (1 Yn. 5:15) Kandi thukendi kania okwa bibulyo bino: Busana naki hanganayira ikyasond’ilhangirika Yehova nga syalisubiraya emisabe yethu? Yehova anemusubirya emisabe yethu omwa nziraki munabwire?

3. Busana naki Yehova anzire ithwamusaba?

³ Amasako akathukakasaya ngoku Yehova athwanzire kutsibu kandi ngoku thuli b’obughuli embere siwe. (Hag. 2:7; 1 Yn. 4:10) Kikaleka iniathubwira athi thumusabe obuwathikya omw’imusaba. (1 Pet. 5:6, 7) Anzire iniathuwathikya erisighalha ithune hakuhi nayu n’erithoka erighumira ndeke ebitsibu ebya thunemulhabamo.

4. Thukaminya thuthi ngoku Yehova akasubiraya emisabe y’abaramya biwe? (Lebaya n’ekisasani.)

⁴ Omwa Biblia, mughulhu mungyi thukasoma ngoku Yehova mwasubirya emisabe y’abaramya biwe. Ni ky’erileberyako kyandi ekya wanga lengekaniako? Kandi ibbwa eky’Omwami Dawudi? Mwabana esyonzighu nyingyi esikalire omwa ngebe yiwe yosi, kandi mughulhu mungyi iniakasondaya obuwathikya bwa Yehova omw’isaba. Buthuku bughuma, mwasaba athi: “Mwami  Mukulhu, wowe erisaba lyaghe, wuhulikirire erilhaka lyaghe! Wuli muthunganene, siwuli leghulha, neryo wunyisubiraye!” (Esy. 143:1) Yehova mwasubirya emisabe ya Dawudi ey’erisaba erilhamibwa. (1 Sam. 19:10, 18-20; 2 Sam. 5:17-25) Dawudi inianasikire mwabugha athi: “Omwami Mukulhu ali hakuhi oko bosi abakamubirikira.” Nethu thwanganabya n’eriyikethera ng’eryo.—Esy. 145:18.

5. Mbwino emisabe y’abaramya ba Yehova abakera, mughulhu wosi iyikanasubawamo ngoku babya bakalengekania? Iha eky’erileberyako. (Lebaya n’ekisasani.)

⁵ Yehova anganaghana erisubirya emisabe yethu ngoku thulhue thulengekenie. Ekyo ky’ekyabya oku mukwenda Paulo. Mwasaba Nyamuhanga athi amulhusayeko “endwalha y’omubiri.” Mirundi isathu, kutsibu-tsibu Paulo mwasaba busana n’ekitsibu ekikalire eki. Yehova mwanasubirya emisabe eyo? Ee, aliwe butsira omwa nzira eyo Paulo aby’akalengekania. Omwakanya k’erilhusyaho ekitsibu, Yehova mwamuha amaaka agho ayithagha nuku alhole embere erimukolera buthaleghulha.—2 Kor. 12:7-10.

6. Okwa bundi buthuku, busana naki kyangana sond’ilhangirika Yehova nga syathasubirya emisabe yethu?

⁶ Nethu kuthya ithwanga bana eky’erisubirya ekiri mbaghane okwa kya thulhue thulengekenie. Thwangana yikethera ngoku Yehova anasi enzira eyuwene ey’erithuwathikiryamo. Nibya awithe “obuthoki bw’erikolha ebyosi ebya thukabulhaya kutse ebya thukalengekanaya.” (Efe. 3:20) Busana n’ekyo, eky’erisubirya kiwe okwa misabe yethu kyanganasa okwa ndambi kutse omwa nzira eya thuthalhue thulengekenie.

7. Busana naki thwangana yithagha erihindulha ebya thukasaba? Iha eky’erileberyako.

⁷ Thwangana yithagha erihindulha ebya thukasaba thunemwongera eriminya ndeke erisonda lya Yehova. Thalengekania okwa ky’erileberyako kya Martin Poetzinger. Buthuku buke alithahirye, Mughalha Wethu Poetzinger mwahirwa omwa ngomo omwa kampu y’Abanazi. Okw’itsuka, mwasaba Yehova athi amuwathikaye alhue omwa kampu nuku ayatsomane mukali wiwe n’erithasyatsuka omubiiri w’erithulira. Aliwe enyuma w’esyowiki ibiri, mwathalhangira ekikakanganaya ngoku Yehova abirimukyungulira enzira y’erilhwikwa. Neryo mwatsuka erisaba athi: “Kisi Yehova, nyikanganaye ekya wanzire ingakolha.” Neryo mwatsuka erilengekania okwa ebya bandi balikyabo banemulhabamo omwa kampu. Abangyi omw’ibo babya ibanemuyibulha-bulha  busana n’abakali babu n’abaana babu. Neryo Mughalha Wethu Poetzinger mwasaba athi: “Yehova, wasingya busana n’olhusunzo lhwaghe lhuhyaka. Nyiwathikaye ngaghumaye n’erihimba balikyethu.” Mwaghunza omwa kampu mw’emyaka mwenda inianemukolha ekyonyine-nyine ekyo asaba!

8. Ni kindu kikulhu kyahi ekya thutholere ithwibuka thukasaba?

⁸ Thutholere ithwibuka ngoku Yehova awithe ekighendererwa kandi akendi syakiberererya okwa ndambi ey’abirihiraho. Ekighendererwa ekyo mwamuli erighunziraho ighuma ebitsibu byosi ebikathulyambaya kutsibu munabwire—ebitsibu ng’ebitsinduli, amalhwere, n’olhuholho. Yehova akendi syaberererya ekighendererwa kiwe erilhabira omwa Bwami bwiwe. (Dan. 2:44; Erib. 21:3, 4) Aliwe, erihika okwa buthuku obo, Yehova akinalighira Sitani erithabalha ekihugho. b (Yn. 12:31; Erib. 12:9) Yehova kwabya w’erighunzaho ebitsibu by’abandu lino, obuthabali bwa Sitani bwangabere nga bwabirithoka okwa lhulengo lhulebe. Neryo thunemulinda Yehova eriberererya emilhaghe yiwe, sikirimanyisaya kithi syali thuwathikaya. Thulebaye esyonzira esya Yehova akathuwathikirayamo.

9. Yehova angathuwathikya athi thukabya b’erithwamu? Iha eky’erileberyako.

⁹ Akathuha amenge. Yehova akayilhagha erithuha amenge agho thukayithagha nuku thuthwemu ndeke. Kutsibu-tsibu thukayithagha amenge wa Nyamuhanga thukakolha erithwamu erikahamba okwa ngebe yethu, nga thusighale bahuru kutse nga thwingire omwa butheke. (Yak. 1:5) Thulebaye ekyalholirweko kya mwali wethu omuhuru ya Maria. c Inianatsemire, abya inianemukolha ng’omutemburi w’omughulhu wosi akabanangana na ndugu. Akabugha athi: “Obunywani bwethu bwabere bunemwongera, ku thwan’ongera thuthya erianzana. Munaminya ku ngali w’erithwamu. Munasaba kutsibu kandi habw’omughulhu muuli oko mwatsi oyo. Munayithagha obusondoli bwa Yehova, aliwe kandi munaminya ngoku Yehova syanga nyithwiramu.” Akayowa athi Yehova mwasubirya emisabe yiwe y’erisaba amenge. Athi? Abere anemusekulya omwa bitabu byethu, mwathoka eribana emyatsi mirebe eyamuwathikaya erisubirya ebibulyo biwe. Kandi mwaghendera okw’ihabulha ly’amenge erya mama wiwe omuthaleghulha amuha. Erihabulha eryo mulyawathikya Maria erilebya ndeke eriyowa liwe. Erighunzerera, mwathoka erithwamu ndeke.

10. Ngoku kiri omwa 2 Abanya Korinto 4:7, Yehova akendi kolhaki eriwathikya abaramya biwe? Iha eky’erileberyako. (Lebaya n’ekisasani.)

¹⁰ Akathuha amaaka w’eriyiyinia. Ngoku anakolera  omukwenda Paulo, Yehova akendi thuha amaaka agho thukayithagha eriyiyinirya ebitsibu byethu. (Soma 2 Abanya Korinto 4:7.) Thulebaye ngoku Yehova awathikaya mughalha wethu ya Benjamin erighumira emibere eyikalire. Omwa bunyethu bwiwe bwosi, Benjamin n’ab’efamile yabu babya bikere omwa syokampu sy’abathibithi e Africa. Benjamin akabugha athi: “Mughulhu wosi iningasaba Yehova, erimusaba indi ambe amaaka w’erikolha ebikamutsemesaya. Yehova mwasubirya emisabe yaghe omw’imba erithekana, obuthubaha bw’erilholha embere erithulira, n’ebitabu ebikanyiwathikaya erisighalha inganaghumire bunyakirimu.” Ak’ongerako athi: “Erisoma okwa byalholirweko by’Abema balikyethu n’eriminya ngoku Yehova abawathikaya eriyiyinia mukyaghumya erithwamu lyaghe ly’erisighalha muthaleghulha.”

11-12. Yehova angathwamu athi erikolesya erihiika lyethu ly’obunyakirimu erisubirya emisabe yethu? (Lebaya n’ekisasani.)

¹¹ Akakolesaya erihiika lyethu ly’obunyakirimu. Omw’ithumbi Yesu athali ahayo engebe yiwe, mwasaba erilhua okwa muthima. Mwalemba-lemba Yehova athi amubalhaye okwa kihemu ky’eryahulhwamo mutsumi. Omwakanya k’erikolha ekyo, Yehova mwawathikya Yesu omw’imuthumira omughuma w’okwa bamalaika balikyabo erimughumya. (Lk. 22:42, 43) Nethu Yehova angana thuwathikya omughulhu omughuma w’okwa balikyethu akathuhimba omw’ithutherera kutse erithubungira. Ithwe bosi thwangana sondekania ehighisa hy’eribwiriramo balikyethu ‘b’ekinywe kibuya.’—Emi. 12:25.

¹² Thuthalebya ekyalholirweko kya mwali wethu Miriam. Mayenga make mwira wiwe aliholire, Miriam mwasighalha eka y’eyuwene, inianemuyibulha-bulha kandi iniabiribbunika muthima. Iniakalira buthahuna kandi iniakayithagha ow’erikania nayu. Akabugha athi: “Nabya isingwithe akaghalha k’eritherera owosi-wosi, neryo munasaba Yehova. Ngabere ingakinalira n’erisaba, mubanyitherera. Abya ini musyakulhu w’ekithunga, omunywani.” Miriam mwabana erihumulikanibwa erilhua okwa musyakulhu oyo na mukali wiwe. Mwaligha ngoku Yehova yulyahira omu ndugu oyo mw’omuhwa w’erimutherera.

13. Iha eky’erileberyako ekikakanganaya ngoku Yehova angana kolesya abathemuramaya erisubirya emisabe yethu.

 ¹³ Angana kolesya abandu abathemuramaya. (Emi. 21:1) Okwa bundi buthuku, Yehova anganasubirya emisabe y’abandu biwe omw’ihira omwa bathikirirye mw’omuhwa w’eribawathikya. Ng’eky’erileberyako, mwahira omu Mwami Artasasta mw’omuhwa w’eriligha erisaba lya Nehemia ery’erighenda e Yerusalemu eriyawathikya okw’ithasyahimba omuyi. (Neh. 2:3-6) Namunabwire, Yehova anganahira omwa bathemuramaya mw’omuhwa w’erithuwathikya omughulhu thuli omwa buyithawa.

14. Ekyalholirweko kya Soo Hing kyamakuhimba kithi? (Lebaya n’ekisasani.)

¹⁴ Mwali wethu Soo Hing mwayowa Yehova imwamuwathikya erilhabira omu dokita wiwe. Mughalha wiwe awithe ebitsibu binene eby’obwongo erighana. Omwana wiwe oyo abere akathunga e aksidenti eyikalire, iyo na mwira wiwe mubaleka omubiiri nuku bamuthwanire. Busana n’ekyo, mubabana ebitsibu by’esyosente. Soo Hing mwabugha athi mwayowa ng’omunzeledi owabirikakibwa erihika okw’ihwayo. Mwabwira Yehova y’ebyosi ebiri okwa muthima, erimusaba obuwathikya. Dokita wabu mwabatsomana kutsibu. Eki mukyaleka ibahebwa obuwathikya bw’egavumente n’eribana ah’eripangisya aho bangathoka. Enyuma waho, Soo Hing mwabugha athi: “Muthwayilhangirira obuwathikya bwa Yehova omo mwatsi oyu. Omo kwenene ‘Akasubiraya erisaba.’”—Esy. 65:2.

15. Ni kyahi ekyawathikaya mwali wethu eriminya ngoku emisabe yiwe yinemusubwamo?

¹⁵ Mughulhu mungyi emisabe yethu siyirisubawamo omwa syonzira esilhangirikire ndeke. Aliwe erisubirya erya thukathunga ly’erya thukayithagha erithoka erisighalha bathaleghulha oku Thatha wethu w’elhubulha. Neryo ibya iwunemusamalira emibere eyo Yehova akasubirayamo emisabe yawu. Mwali wethu Yoko mwayowa Yehova nga syalisubiraya emisabe yiwe, aliwe mwatsuka eribya akahandika eby’akasaba Yehova. Enyuma w’obuthuku, mwalebya omwa katabu kiwe neryo mwaminya ngoku Yehova abirisubirya emingyi y’okwa misabe yiwe, nibya n’eyo abya iniabiribirirwa. Mughulhu wosi, thutholere ithw’imana hake n’erilengekania okwa mibere Yehova anemusubiryamo emisabe yethu.—Esy. 66:19, 20.

16. Thwanga kangania thuthi erikirirya bikahika okwa musabe? (Abaebrania 11:6)

 ¹⁶ Thukakanganaya erikirirya butsira omw’ikwama kyasubulira okw’isaba Yehova lisa aliwe n’omw’iligha eky’erisubirya kiwe omwa nzira yosi-yosi eyo kyamasiramo. (Soma Abaebrania 11:6.) Thulebaye eky’erileberyako kya Mike na mukali wiwe, Chrissy. Babya bawithe ekilhubirirwa ky’erikolera okwa Beteli. Mike akabugha athi, “Muthusulirirya ahabw’emyaka mingyi kandi muthwasaba Yehova ngendo na ngendo okwa kilhubirirwa eki, aliwe muthuthakokibwa.” Mike na Chrissy mubasighalha ibanayikethere ngoku Yehova anasi enzira eyuwene eyo angabakoleseryamo omwa mubiiri wiwe. Mubalholha embere erikolha ngoku bangathoka, erikolha ng’abatemburi b’omughulhu wosi eyiri obuyithawa n’eriwathikya okwa buhimbe bw’ekiteokrasi. Munabwire bane omwa mubiiri w’eribalhama. Mike akabugha athi, “Mughulhu wosi Yehova mwathasubirya emisabe yethu ngoku thwabya thwanzire, aliwe abirisubiryayo omwa nzira eyuwene kwilhaba ngoku thwabya thulengekenie.”

17-18. Ngoku kiri omwa Esyonyimbo 86:6, 7, thutholere ithwayiketheraki?

¹⁷ Soma Esyonyimbo 86:6, 7. Omuhandiki w’esyonyimbo Dawudi aby’ayikethere ngoku Yehova aby’akowa n’erisubirya emisabe yiwe. Wanganabya n’eriyikethera ng’eryo. Eby’erileberyako ebya thwamabirikaniako omo mwatsi ono bikathukakasaya ngoku Yehova anganathuha amenge n’amaaka ebya thukayithagha eriyiyinia. Anganakolesya erihiika lyethu ly’obunyakirimu kutse nibya abathemuramaya lino erithuwathikya omwa nzira ndebe.

¹⁸ Nomwakine indi mughulhu wosi Yehova angana ghana erisubirya emisabe yethu ngoku thulhue thulengekenie, thunasi kw’akendi subiryayo. Akendi thuha ebyonyine-nyine ebya thukayithagha kandi oko ndambi eyathukabiyithaghirako. Neryo omw’ikirirya lholha embere erisaba, iwunayikethere ngoku Yehova akendi kutsomana lino kandi kw’akendi ‘syughuthya obwagha bw’abosi’ omwa kihugho kihya ekikasa.—Esy. 145:16.