1. Abangyi omw’ithwe, ni kyahi ekyabiribakalira erikolha?

 WUNE wathahiraho ekilhubirirwa ky’obunyakirimu aliwe ikyakukalira erihikako? b Kyamabya ikwakiri kithya, siwuli iwuwene. Ngahathya, Philip mwanza eryuwania emisabe yiwe n’eryongera emirundi y’erisabiramo, aliwe mukyamukalira eribana endambi y’erisaba. Ekilhubirirwa kya Erika lyabya iry’erihika lhuba okwa mihindano y’eriyathulira; nomwabine, iniakabya inianemukerererwa hakuhi okwa buli muhindano. Tomáš mwalengesya mirundi nga y’eyo erisoma e Biblia eyosi. Akabugha athi: “Isindi tsemera erisoma e Biblia. Munalengesya emirundi isathu, aliwe okwa buli murundi iningasubulira okwa Balawi.”

2. Busana naki sithutholere thukahwa amani thwamabya ithuwithe ekilhubirirwa ky’obunyakirimu ekyo thuthe thwahikako?

² Lino wamabya iwunawithe ekilhubirirwa ekya wuthe wahikako, wuminye ngoku si bulemwa. Nibya n’erihika okwa kilhubirirwa kike mughulhu mungyi kikayithagha obuthuku n’akaghalha. Eribya iwukinanzire erihika okwa kilhubirirwa kyawu kikakanganaya ngoku wukalhangira obughuma bwawu na Yehova mwa bw’obughuli kandi ku wanzire erimukolera ngoku wanga thoka. Yehova akalhangira akaghalha akawukahiraho mwa k’obughuli. Ni kwenene, syali kuyithaghako bingyi kwilhaba ngoku wanga thoka. (Esy. 103:14; Mika 6:8) Neryo wutholere iwahiraho ekilhubirirwa ekya wangana hikako, erikwamana n’emibere eyawulimo. Wamabirikolha ekyo, wangakolhaki erihika okwa kilhubirirwa kyawu? Thukanaye okwa menge malebe.

3. Busana naki omuhwa akayithaghisibawa?

³ Omuhwa akawathikaya kutsibu erihika okwa bilhubirirwa by’obunyakirimu. Ow’omuhwa akabya n’eriyisunza linene ery’erihiraho akaghalha erihika okwa kilhubirirwa kiwe. Ithwangana linganisya omuhwa n’omuyagha owakasukuma obwathu erihika eyo bukaya. Omuyagha amalholha embere erihitha, oyukaghendaya obwathu inianganahika aho akaya. Kandi omuyagha amahitha kutsibu, oyukaghendaya obwathu iniangana hika lhuba. Kuthya, thwamongera eribya n’omuhwa, ku thwangan’ongera thuthya erihika okwa bilhubirirwa byethu. Mughalha wethu David owe El Salvador athi: “Wamabya n’omuhwa, wukalengaho erihiraho akaghalha. Wukalengaho erithendi lighira ekyosi-kyosi erikulemesya erihika okwa kilhubirirwa kyawu.” Neryo wangakolhaki eryongera omuhwa wawu?

4. Ni kyahi ekya thwangahira omwa musabe? (Abanya Filipi 2:13) (Lebaya n’ekisasani.)

⁴ Saba Yehova akwongere omuhwa. Erilhabira omwa mulimu wiwe, Yehova angana kuhiramo omuhwa w’erihika okwa kilhubirirwa kyawu. (Soma Abanya Filipi 2:13.) Okwa bundi buthuku thukahiraho ekilhubirirwa kundi thunasi ngoku thutholere ithwakolha ekyo, kandi ekyo kya kitholere. Aliwe omo kwenene thwanganabya isithuwithe eriyisunza ly’erikihikako. Eki ky’ekyabya oku mwali wethu Norina e Uganda. Abya iniabiriyihiriraho ekilhubirirwa ky’eryeghesya omwigha we Biblia, nomwakine indi syabya awithe omuhwa habw’eriyowa isi mukangirirya mubuya. Ni kyahi ekyamuwathikaya? Akabugha athi: “Munatsuka erisaba Yehova buli kiro indi angwathikaye ngongere eriyisunza lyaghe ly’eryeghesya omwigha. Munakolha erikwamana n’emisabe yaghe, namahiraho akaghalha k’eryuwania erikangirirya lyaghe. Enyuma w’amezi make, munalhangira ngoku eriyisunza lyaghe lyabiryongera. Omwa mwaka iwan’oyo, munatsukisya abigha be Biblia babiri.”

5. Thutholere ithwaghanirya okuki nuku thwongere omuhwa wethu?

⁵ Ghaniraya okwa bya Yehova abirikukolera. (Esy. 143:5) Omukwenda Paulo mwaghanirya okwa lhukogho olho Yehova abya iniabirimukangania, kandi eki mukyamuhiramo omuhwa w’eryongera erikolera Yehova. (1 Kor. 15:9, 10; 1 Tim. 1:12-14) Kuthya, wukabya wukongera erighanirya okwa bya Yehova abirikukolera, omuhwa w’erihika okwa kilhubirirwa kyawu kw’akanongera athya. (Esy. 116:12) Thuthalebya ekya wathikaya mwali wethu owe Honduras erihika okwa kilhubirirwa kiwe ky’eribya mutemburi w’omughulhu wosi. Akabugha athi: “Ngaghaniraya oko lhwanzo lhunene olho Yehova anyiwithire. Mwanyiretha omwa bandu biwe. Akanyitsomana n’erinyitheya. Erighanirya ng’eryo likaghumaya olhwanzo olho ngamuwithire n’eryongera omuhwa waghe.”

6. Ni kindi kyahi ekyanga thuwathikya eryongera omuhwa wethu?

⁶ Hira amalengekania okwa mighisa y’erihika okwa kilhubirirwa kyawu. Lhangira ekya wathikaya Erika, oyukanibweko okw’itsuka, bikahika  okwa kilhubirirwa kiwe ky’eritheya obuthuku. Akabugha athi: “Munaminya ngoku nabya ingathalha okwa bingyi habw’erikerererwa okwa muhindano w’eriyathulira. Aliwe omw’ihika lhuba, ikikaleka ingaramukya balikyethu n’eribya haghuma nabu. Kandi iningathoka erihulikirira okwa menge awanga ngwathikya eritsemera n’eryuwania erithulira lyaghe.” Erika mwahira amalengekania w’okwa mighaso y’eritheya obuthuku, kandi mwahika okwa kilhubirirwa kiwe. Ni mighaso yahi eyo wanga hirako amalengekania? Ekilhubirirwa kyawu kyamabya ikihambire okw’isoma e Biblia kutse okw’isaba, lengekanaya nga kyanga ghumya kithi obughuma bwawu na Yehova. (Esy. 145:18, 19) Ekilhubirirwa kyawu kyamabya ini kulha-kulhania omubere mulebe w’Ekikristayo, hira malengekania w’okwa mibere kikendyuwaniryamo obughuma bwawu n’abandi. (Kol. 3:14) Busana naki iwuthakolha elisti y’esyonzumwa esyosi esikaleka iwanza erihika okwa kilhubirirwa kyawu? Ibya iwunemulebya elisti eyo. Tomáš, oyukanibweko okw’itsuka akabugha athi: “Hamabya esyonzumwa nyingyi esyanga leka ingahika okwa kilhubirirwa kyaghe, neryo ngabya isinangathasyabikyako.”

7. Ni kyahi ekya wathikaya Julio na mukali wiwe erihika okwa kilhubirirwa kyabo?

⁷ Siba n’abakendi kuhira mw’omuhwa. (Emi. 13:20) Lhangira ekya wathikaya Julio na mukali wiwe erihika okwa kilhubirirwa kyabu ky’erikanyirirya omubiiri wabu w’erithulira. Akabugha athi: “Muthwasombolha abanywani abasighika ekilhubirirwa kyethu, kandi ithukakikanayako nabu. Abangyi omw’ibo babya ibabirihika okwa bilhubirirwa ng’ebyo, neryo ibakathuha amenge awanga wathikya. Kandi ibakabya ibanemuthubulya esyondegheka syethu nga syamahikahi, n’erithuhiramo omuhwa omughulhu thukayithaghagho.”

8. Ni kyahi ekyangabya thwamabya b’erihiraho akaghalha erihika okwa kilhubirirwa kyethu omughulhu thuwithe omuhwa lisa? (Lebaya n’ekisasani.)

⁸ Aliwe, okwenene kuli kuthi, ithwe bosi hakanabya ebiro ithwayowa isithuwithe omuhwa. Mbwino eki kikamanyisaya kithi sithwanga hiraho akaghalha erihika okwa kilhubirirwa kyethu? Eyihi. Ngahathya: Omuyagha inianganabya kaghalha kanene akakasukuma obwathu erihika eyo bukaya. Nomwabine, omuyagha akira-kirene omwa kaghalha, kandi okwa bindi biro, hanganaghana eribya omuyagha. Mbwino eki kikamanyisaya kithi oyukaghendaya obwathu syendi thasyalholha embere? Eyihi n’ahake. Ng’eky’erileberyako, awandi mathu awithe eyingyini; awandi awithe esyongahya. Oyukaghendaya obwathu angana kolesya ebi erilholha embere erihika eyo akaya. Omuhwa wethu angana linganisibwa n’omuyagha; omuhwa owathuwithe syasosene. Kandi okwa bindi biro, ithwangana yowa isithuwithe omuhwa w’erihiraho akaghalha erihika okwa kilhubirirwa kyethu. Neryo thwamabya b’erihiraho akaghalha erihika okwa kilhubirirwa kyethu omughulhu thuwithe omuhwa lisa, isithwendi syakihikako. Aliwe ngoku oyukaghendaya obwathu akanasondaya  esindi nzira sy’erihika aho akaya, nethu thwangana hiraho akaghalha erihika okwa kilhubirirwa kyethu nibya n’omughulhu thuthawithe omuhwa. Nomwakine indi eki kikayithagha eriyikakirya, ebikalhwiririramo bikaghasa. Thuthe thwakania okwa bya thwanga kolha, thutsuke erikania okwa kibulyo ekyanga buthukaho.

9. Nina kibi erilengaho erihika okwa kilhubirirwa n’omughulhu thukayowa isithuwithe omuhwa w’erikolha ekyo? Soborera.

⁹ Yehova anzire ithwamukolera ithunatsemire kandi ahathe erikakwa. (Esy. 100:2; 2 Kor. 9:7) Neryo mbwino thunatholere erilengaho erihika okwa kilhubirirwa ky’obunyakirimu thwamayowa isithuwithe omuhwa? Thulebaye eky’erileberyako ky’omukwenda Paulo. Mwabugha athi: “Ngaghalhaya omubiri waghe, n’erighondyagho.” (1 Kor. 9:25-27) Paulo mwayikaka erikolha ekitholere nibya n’omughulhu ayowa inianzire erikolha ekindi. Mbwino Yehova mwanasima omubiiri wa Paulo? Ee! Kandi Yehova mwamuhemba busana n’akaghalha ako ahiraho.—2 Tim. 4:7, 8.

10. Ni mighaso yahi eyikasa busana n’erilengaho erihika okwa kilhubirirwa kyethu n’omughulhu thuthawithe omuhwa?

¹⁰ Kuthya, Yehova akatsema akalhangira thukalengaho erihika okwa kilhubirirwa kyethu nibya n’omughulhu thukayowa isithuwithe omuhwa w’erikolha ekyo. Akatsema kundi anasi ku thukakolha ekyo habw’erimwanza, nomwakine indi mughulhu wosi thwangana ghana erikolha ekyo kundi thukyanzire. Ngoku Yehova anatsumulha Paulo, nethu akendi thutsumulha busana n’akaghalha ako thukahiraho. (Esy. 126:5) Kandi thukendibya thunemuyilhangirira eritsumulha lya Yehova, ithwangana tsuka eribya n’omuhwa. Mwali wethu erilhua Poland ya Lucyna akabugha athi: “Okwa bundi buthuku, sindyanza erighenda omw’ithulira, kutsibu-tsibu namabya ingalhuhire. Nomwabine, etseme eyo ngabana nabirighenda omw’ithulira, ni kihembo ekyuwene.” Neryo leka thulebaye ebya thwanga kolha omughulhu thuthawithe omuhwa.

11. Yehova angathuwathikya athi erighumya omubere wethu w’eriyikakirya?

¹¹ Saba Yehova y’eriyikakirya. Eriyikakirya w’amaaka w’erisondolha eriyowa n’emikolere yethu. Mughulhu mungyi ekinywe ekyo kikamanyisaya eriyihighulha okw’ikolha ekiwire. Aliwe kandi eriyikakirya likayithaghisibawa erithuhira mw’omuhwa w’erikolha ekihikire, kutsibu-tsibu omubiiri amabya iniakalire kutse thwamayowa isithuwithe omuhwa. Wibuke, eriyikakirya ni kitsweka ky’okwa mikolere y’omulimu, neryo saba Yehova akuhe omulimu abuyirire erikuwathikya erikulha-kulhania omubere mukulhu oyo. (Lk. 11:13; Gal. 5:22, 23) David, oyukanibweko okw’itsuka, akasoborera ngoku omusabe amuwathikaya. Mwanza erithasyongera eriyeghesya mughulhu wosi. Akabugha athi: “Iningasaba Yehova indi angwathikaye nga kulha-kulhanaye omubere w’eriyikakirya. Omwa buwathikya bwiwe, munathoka eritsuka endegheka eyuwene ey’eriyeghesya kandi namaghenda-ghendania nayo.”

12. Omusingyi owali omwa Omugambuli 11:4 akahamba athi okwa bilhubirirwa by’obunyakirimu?

¹² Isiwalinda eribya omwa mibere eyuwene. Omwa kihugho kino, thwangana ghana eribya omwa mibere eyuwene. Thwamalindirirayo, ithwangana ghana erisyahika okwa kilhubirirwa kyethu. (Soma Omugambuli 11:4.) Mughalha wethu ya Dayniel akabugha athi: “Sihali emibere eyihikene. Thukahiraho emibere eyuwene thukakwama kyatsuka.” Mughalha wethu e Uganda ya Paul akahulha eyindi nzumwa eyikaleka ithwabya isithutholere eriyilhagha-lhagha: “Thwamatsuka nomuhane emibere eyikalire, thukaha Yehova y’eky’eritsumulha.”—Mal. 3:10.

13. Ni mighaso yahi eyiri omw’itsuka ekilhubirirwa mwa kike-kike?

¹³ Tsuka mwa kake-kake. Thwangana bulha  omuhwa kundi ekilhubirirwa kyethu kikabya nga kikalire kutsibu erihikako. Wamabya iwuli omwa mibere eyo, mbwino siwanga tsutsanga ekilhubirirwa kyawu mwa kike-kike? Ekilhubirirwa kyawu kyamabya ini kulha-kulhania omubere mulebe, busana naki iwuthatsuka erikanganiagho omwa nzira nyike-nyike? Ekilhubirirwa kyawu kyamabya in’isoma e Biblia eyosi, busana naki iwuthatsuka omw’ihiraho endegheka y’eribya wukasomayo habw’akathambi kake? Tomáš, oyukanibweko okw’itsuka, mukyamukalira erihika okwa kilhubirirwa kiwe eky’erisoma e Biblia eyosi omwa mwaka. Akabugha athi: “Munaminya ngoku nabya inabirisombolha esipidi eyinyikalire. Neryo munathwamu erithasyatsuka, aliwe lero, munahiraho endegheka y’erisoma embindi y’esura obuli kiro n’erighanirya kuyo. Busana n’ekyo, munatsuka eritsemera erisoma.” Tomáš’ abere anemwongera eritsemera ekyo, mwatsuka erisoma ahabw’endambi nyiri. Erighunzerera, mwasoma e Biblia eyosi. c

14. Ni byahi ebikathulemesaya ebya thwanga bana?

¹⁴ Eky’obulighe, nomuthwangabya n’omuhwa mungahi kutse eriyikakirya lingahi, paka ithwanganabana ebikathulemesaya. Ng’eky’erileberyako, “ebikawa kitsumbukirania” byanganathulira endambi eya thukayithagha erihika okwa kilhubirirwa kyethu. (Omu. 9:11, NWT) Thwangana bana ekitsibu ekyanga thughunza amani n’akaghalha. (Emi. 24:10) Obuthahikana bwethu bwangana leka ithwakolha omwa nzira eyithe yanga thuwathikya erihika okwa kilhubirirwa kyethu. (Abar. 7:23) Kutse thwangana yowa ithulhuhire. (Mt. 26:43) Ni byahi ebyanga thuwathikya erisingura ebikathulemesaya?

15. Hamabya ebikathulemesaya, mbwino ekyo kikamanyisaya kithi thwabirilemwa? Soborera. (Esyonyimbo 145:14)

¹⁵ Wibuke ngoku eribana ebikakulemesaya sikirimanyisaya kithi wamalemwa. E Biblia yikabugha yithi thwanganabya ithunemubana ebitsibu. Aliwe kandi yikakanganaya ndeke-ndeke ngoku thwangana lengaho erihika okwa bilhubirirwa  byethu, kwilhabirirya omwa buwathikya bwa Yehova. (Soma Esyonyimbo 145:14.) Mughalha wethu Philip, oyukanibweko okw’itsuka, akapima erithoka liwe omwa nzira eno: “Erithoka lyaghe siriseghemere okwa mirundi eyo ngalemerawamo. Aliwe liseghemere okwa mirundi eyo ngalengeserayamo erithasyalholha embere n’ekilhubirirwa kyaghe.” David, oyukanibweko okw’itsuka, akabugha athi: “Ngalengaho erilhangira ebikanyilemesaya ng’ehighisa hy’erikangania Yehova nga ngamwanzire bungahi butsira ng’ebikanyikakiraya.” Kwesi, omw’ilholha embere nomuhane ebikalemesaya, wukakanganaya Yehova ku wanzire erimutsemesya. Yehova k’atholere eribya iniakatsema akalhangira wukalholha embere erilengaho erihika okwa kilhubirirwa kyawu!

16. Ebikalemesaya byanga thweghesyaki?

¹⁶ Lhangira ebikakulemesaya ng’eby’erighirako. Lengekanaya okwa kyaleka ikyabya, kandi yibulhaye, ‘Nanganayira eky’erikolha eriyihighulha okwa kindi ekyanga nyilemesya?’ (Emi. 27:12) Aliwe okwa bundi buthuku, ebikathulemesaya byangana kangania ku sithwanga thoka erihika okwa kilhubirirwa ekyo ngoku thulhue thulengekenie. Wamabya iwuli omwa mibere eyo, kubungulha ekilhubirirwa kyawu erilebya nga wangana thasyakithoka. d Yehova isyendi kulhangira ng’oyuwabirilemwa habw’erithendihika okwa kilhubirirwa ekya wuthe wanga thoka.—2 Kor. 8:12.

17. Busana naki thutholere ithwabya ithun’ibukire ebya thwabirithathoka erikolha?

¹⁷ Ibya iwun’ibukire ebya wabirithathoka. E Biblia yikabugha yithi “Nyamuhanga syalikolha ekithathunganene. Syang’ibirirwa omubiiri wenyu.” (Ebr. 6:10) Neryo nawu isiwibirirawagho. Lengekanaya okwa bya wabirithathoka erikolha—mbulha n’ikulha-kulhania obunywani na Yehova Nyamuhanga, eribwira abandi okw’iyo, kutse eribatizibwa. Ngoku wanakulha-kulhana n’erihika okwa bilhubirirwa by’obunyakirimu kera, wangana lholha embere erikulha-kulhana erihika okwa kilhubirirwa ekya wuwithe lino.—Fil. 3:16.

18. Ni kyahi ekya thutholere ithwabya ithun’ibukire thunemulengaho erihika okwa kilhubirirwa kyethu? (Lebaya n’ekisasani.)

¹⁸ Omwa buwathikya bwa Yehova, wangana hika okwa kilhubirirwa kyawu, ngoku oyukaghendaya obwathu akanahika eyo akaya inianatsemire. Aliwe wibuke, abangyi abakaghendaya obwathu nabo bakatsemera olhughendo. Kuthya, wunemulengaho erihika okwa kilhubirirwa kyawu ky’obunyakirimu, ambi isiwibirirawa erilhangira ngoku Yehova anemukuwathikya n’erikutsumulha omwa lhughendo lhwawu, kandi ekyo kikendi leka iwatsema. (2 Kor. 4:7) Wamathendi leghulha, iwukendi bana emighisa minene kutsibu.—Gal. 6:9.