OMWATSI W’ERIGHA 20
OLHWIMBO 67 ‘Wuthule Engulhu Yuwene’
Leka Olhwanzo Lhukuhire mw’Omuhwa w’Erilholha Embere Erithulira!
“Engulhu Yuwene yitholere iyathulhughanibwa okwa bihanda byosi.”—MK. 13:10.
EKIGHENDERERWA
Ngoku olhwanzo lhukathusukuma erikolha omubiiri w’erithulira n’omuhwa kandi n’omuthima wosi.
1. Ni byahi ebyo thw’igha okwa muhindano ow’obuli mwaka owa Bema ba Yehova owa 2023?
OKWA muhindano owa buli mwaka owa Bema ba Yehova owa 2023, a muthwabwirwa embinduka omwa bighuma by’okwa byo thwikirirye kandi muthwowa ekirango ekikasisimulha ekihambire okwa mubiiri wethu w’erithulira. Ng’eky’erileberyako, muthw’igha ngoku abandu balebe bangana syahebwa akaghisa ak’eriyiyunga okwa bandu ba Yehova nibya n’enyuma w’erithoghothibwa lye Babeli Mukulhu. Kandi muthwaminya ngoku eritsuka omwa Okwerikuminakughuma 2023, abathuliri b’Obwami sibendi thasyabya bakaha eripoti eyiri kw’ebyosi ebyo bakolire omwa mubiiri w’erithulira. Mbwino esyombinduka ng’esyo sikaleka omubiiri wethu ow’erithulira iniabya isyakiri mukulhu, eribya isyakiyithaghisibawa nga kera? Eyihi nahake!
2. Busana naki omubiiri wethu w’erithulira akongera eriyithaghisibwa obuli kiro kinemulhaba? (Mariko 13:10)
2 Obuli kiro kikabya kinemulhaba, omubiiri wethu w’erithulira akayongera eriyithaghisibwa kutsibu. Busana naki? Kundi obuthuku bunemuhwayo. Thalengekania okwa byo Yesu abya iniabirilhaghulha okwa mubiiri w’erithulira ow’omwa biro by’enyuma-nyuma. (Soma Mariko 13:10.) Erikwamana n’owundi mwatsi omwa kitabu kya Matayo owali ng’oyo, Yesu mwabugha athi engulhu yuwene yanga thulhughanibirwe omwa kihugho kyosi “enduli” yithe yasa. (Mt. 24:14) Ebinywe ebyo bikamanyisaya erihweraho ighuma ly’Omughulhu mubi wa Sitani. Yehova abirihiraho “ekiro ekyo, kutse esaha” busana n’emyatsi eyikisigha iyabya. (Mt. 24:36; 25:13; Emib. 1:7) Obuli kiro ekikalhaba kikathusegheraya hakuhi n’obuthuku obo. (Abar. 13:11) Thunalindire, thutholere ithwalholha embere erithulira erihika aho enduli yikendi syasira.
3. Ni kyahi ekikathuhira mw’omuhwa w’erithulira?
3 Thunemughanirya okwa mubiiri wethu w’erithulira, kyuwene erilengekania okwa kibulyo kikulhu kino: Busana naki thukathulha engulhu yuwene? Omwa bikuhi, olhwanzo lhukathuhira mw’omuhwa w’erithulira. Ebya thukakolha omwa mubiiri w’erithulira bikakanganaya olhwanzo lhwethu—olhwanzo olhwa thuwithire engulhu yuwene, olhwanzo olhwa thuwithire abandu, kwilhaba aho, olhwanzo olhwa thuwithire Yehova n’erina liwe. Leka thukanaye okwa buli kighuma.
THUKATHULIRA KUNDI THWANZIRE ENGULHU YUWENE
4. Thukayowa thuthi omughulhu thukowa engulhu yuwene?
4 Wangan’ibuka nga muwayowa wuthi wukabwirwa omwatsi mulebe owuwene—obundi omundu omwa famile mwabutha omwana kutse nibya omundu amakuha omubiiri ogho wabya wukayithagha kutsibu? Ahathe erithika-thika, muwanza kutsibu eribwira ab’omwa famile yenyu n’abanywani bawu b’omwatsi owuwene oyu. Muwanayowa wuthya omughulhu w’owa engulhu eyilengire esyosi—engulhu yuwene ey’Obwami bwa Nyamuhanga?
5. Muwayowa wuthi wukaminya ekwenene eyiri omwa kinywe kya Nyamuhanga? (Lebaya n’ebisasani.)
5 Thalengekania ng’amuwayowa wuthi wukaminya ekwenene eyiri omwa Kinywe kya Nyamuhanga. Muwaminya ngoku Thatha wawu w’elhubulha akwanzire, ngoku anzire wubye mughuma w’okw’ihika ly’abaramya biwe, ngoku abiriyilhagha erighunzaho obulhumi n’eryaghalhwa lyosi, ngoku wanganabya n’amaha aw’erisyalhangira abanze bawu ababiriholha bakalhubuka omwa kihugho kihya-kihya—n’ebindi bingyi. (Mk 10:29, 30; Yn 5:28, 29; Abar. 8:38, 39; Erib. 21:3, 4) Ekwenene eyo muyakutsemesya. (Lk. 24:32) Muwanza ebyo w’igha, kandi wabya isiwanga yihunira n’ekwenene y’obughuli eyi!—Lebaya na Yeremia 20:9.
Omughulhu thwaminya engulhu yuwene, thwabya isithwanga yihunira n’ekwenene y’obughuli eyi! (Lebaya enungu 5)
6. Ni kyahi ekya wuk’ighira okwa ky’erileberyako kya Ernest na Rose?
6 Thalengekania okwa ky’erileberyako kino. Mughalha wethu ya Ernest b abya w’emyaka ng’ikumi thatha wiwe akaholha. Akabugha athi: “Munayibulya: ‘Mbwino abirighenda elhubulha? Kutse mbwino syanga thasyabyaho?’ Iningakwa okwa baana abakinawithe abathatha wabu kw’erihale.” Ernest iniakaghenda omw’irimbo, iniakukama ahali eyisinda ya thatha wiwe, iniasaba athi: “Kisi, Nyamuhanga, nganza eriminya thatha waghe ng’ali hayi.” Enyuma w’emyaka nga 17 thatha wiwe aliholire, Ernest mwaligha eryeghesibwa e Biblia. Mwatsema akaminya ngoku abaholi sibasiki, eribya ng’abali omwa thulho thunene, kandi ngoku omwa Biblia muli emilhaghe ey’erilhubuka ery’omwa buthuku obukasa. (Omu. 9:5, 10; Emib. 24:15) Erighunzerera, mwabana eby’erisubirya okwa bibulyo ebyabya ibyabirimulyambya ahabw’obuthuku buuli! Ernest mwatsemera kutsibu ekwenene eyo abya ak’igha. Mukali wiwe, Rose, mwamuyiyungako omw’igha e Biblia kandi nayu mwanza omwatsi w’Obwami. Mubabatizibwa omwa 1978. N’omuhwa munene mubathulira ab’efamile yabu, abanywani, n’abandi okwa kwenene y’obughuli eyo b’igha. Busana n’ekyo, Ernest na Rose babiriwathikya abandu abalhabire oku 70 erikulha-kulhana erihika okw’ibatizibwa.
7. Ni kyahi ekikabya ekwenene ye Biblia yikayihanda omwa mithima yethu? (Luka 6:45)
7 Kilhangirikire ngoku olhwanzo olhwa thuwithire ekwenene ye Biblia lhukabya lhukayihanda omwa mithima yethu, sithwanga hunirayo. (Soma Luka 6:45.) Thukayowa ng’abigha ba Yesu ab’omwa kighana ky’erimbere ababugha bathi: “Sithwanga thoka erireka eribugha ebyo thwabirilholhako n’ebyo thwabiriowa.” (Emib. 4:20) Thwanzire ekwenene ya kutsibu indi thwanzire eribwirayo abandu bangyi ngoku thwanga thoka.
THUKATHULIRA KUNDI THWANZIRE ABANDU
8. Ni kyahi ekyanga thuhira mw’omuhwa w’eribwira abandi okwa ngulhu yuwene? (Lebaya akasanduko “ Anza Abandu—Yira Abigha.”) (Lebaya n’ekisasani.)
8 Nga Yehova na Mughalha wiwe, thwanzire abandu. (Emi. 8:31; Yn. 3:16) Thukakwa obulighe bunene busana ‘n’abathawithe Nyamuhanga’ kandi abali “butsira amaha.” (Efe. 2:12) Busana n’ebitsibu byabo, ibangana yowa ibali omwa kyuna kiri-kiri, kandi n’ithwe thuwithe omuhuha owanga bakurayo—engulhu yuwene y’Obwami bwa Nyamuhanga. Olhwanzo n’olhukeri ebya thubawithire bikaleka ithwahiraho akaghalha eribahikyako engulhu yuwene. Omwatsi w’obughuli oyo angan’usulya omwa mithima yabo mw’amaha, iniabawathikya eribya omwa ngebe eyuwene lino, kandi ibabya ibangana syabana ‘engebe kundu’—engebe y’erikotha—omwa kihugho kihya-kihya kya Nyamuhanga.—1 Tim. 6:19.
Olhwanzo n’olhukeri ebya thuwithire abandu bikaleka ithwahiraho akaghalha eribahikyako engulhu yuwene (Lebaya enungu 8)
9. N’ikunga lyahi eryo thukaha erihambire okwa buthuku obukasa, kandi busana naki? (Ezekieli 33:7, 8)
9 Kandi olhwanzo olhwa thuwithire abandu lhukaleka ithwababwira ngoku enduli y’omughulhu mubi ono yiri hakuhi-kuhi. (Soma Ezekieli 33:7, 8.) Thukakwira abataka n’abahughu bethu abathikirirye b’obulighe. Abangyi bakakwama kyakolha emibiiri yabo y’obuli kiro isibasi ebikendibya omwa buthuku bw’embere—“obulighe bunene isibwebwathabya okw’itsuka ly’ekihugho, erihika na lino, kutse sibwendisyaswabya buthya na kera.” (Mt. 24:21) Thwanzire ibaminya ebikendi syabya okwa mughulhu oyo ow’eritswera—amadini w’amabehi akendi syalhusibwaho n’erithoghothibwa ly’omughulhu mubi ono iryakwamako okwa Harmagedoni. (Erib. 16:14, 16; 17:16, 17; 19:11, 19, 20) Thwanzire ikyasyathokekana abangyi eriowa erikunga eryo neryo ibathuyiyungako omw’iramya ly’okwenene. Thwanzire abandu bangyi ngoku kyanga thokekana ibaligha erikungwa n’erithuyiyungako omw’iramya ly’okwenene munabwire. Kandi ibbwa abo lino bathaghendera okw’ikunga, imwamune n’abahughu bethu banzwa?
10. Busana naki kikayithaghisibawa kutsibu eribya thune mukunga abandi?
10 Ngoku kyanasoborerawa omwa mwatsi w’ahanyuma, kyanganabya in’isonda lya Yehova erilhamya abandu abakabindulha emithima yabu bakalhangira erithoghothibwa lye Babeli Mukulhu. Kyamabya ikwakiri kithya, kwesi ikik’ongera eriyithaghisibwa eribakunga. Thalengekania okwa kino: Ebyo thukababwira munabwire byangana syaleka ibayira ekya bak’ibuka. (Lebaya na Ezekieli 33:33.) Obundi bakendi sy’ibuka erikunga eryo thwabaha neryo ikyaleka ibanza erithuyiyungako omw’iramya ery’okwenene obuthuku buthe bwahwayo. Ng’omutheya ow’engomo owe Filipi oyuw’abindulha omuthima wiwe busana ‘n’omusiki munene,’ obundi abandi abatheligha munabwire bakendi syahindulha emithima yabu ahabw’erithoghothibwa lya Babeli Mukulhu erikendi sya suka-sukania ekihugho.—Emib. 16:25-34.
THUKATHULIRA KUNDI THWANZIRE YEHOVA N’ERINA LIWE
11. Thukaha thuthi Yehova y’olhukengerwa, erisikya, n’amaaka? (Eribisulirwa 4:11) (Lebaya n’ekisasani.)
11 Enzumwa ngulhu eyikaleka ithwathulha engulhu yuwene yiri yithi thwanzire Yehova Nyamuhanga n’erina liwe eribuyirire. Thukalhangira erithulira lyethu ng’enzira ey’eripipa Nyamuhanga oyo thwanzire. (Soma Eribisulirwa 4:11.) N’omuthima wosi thukaligha ngoku Yehova Nyamuhanga atholere erihebwa olhukengerwa, erisikya, n’amaaka erilhua okwa baramya biwe abathaleghulha. Thukamuha olhukengerwa n’ekitsumbi thukabwira abandi b’okwa bwema obulhangirikire ngoku ‘yuwahangika ebindu ebyosi’ kandi ngoku thuliho ahabw’eribya imwathuha engebe. Thukamuha amaaka—amaaka wethu—thukakolesya endambi, akaghalha, n’ebya thuwithe erisangira ndeke omwa mubiiri w’erithulira emibere eya thulimo yamathulighira. (Mt. 6:33; Lk. 13:24; Kol. 3:23) Omwa bikuhi, thukatsemera erikania oku Nyamuhanga oyo thwanzire. Kandi thukayowa ithutholere eribwira abandi okwa rina liwe n’ekya likamanyisaya. Busana naki?
Thukaha Yehova y’amaaka wethu omughulhu thukakolesaya endambi yethu, akaghalha, n’ebyo thuwithe erisangira omw’ithulira ngoku thwanga thoka emibere eya thulimo yamathulighira (Lebaya enungu 11)
12. Thuk’eraya thuthi erina lya Yehova omw’ithulira lyethu?
12 Olhwanzo olhwa thuwithire Yehova lhukaleka ithw’erya erina liwe. (Mt. 6:9) Thwanzire ithwasangira omw’ilhusya okwa lina liwe kw’obukine obwa Sitani abirilihirako omw’ibugha amabehi. (Enz. 3:1-5; Yobu 2:4; Yn. 8:44) Omw’ithulira ly’ethu, thukabya ithunayitheghekire erilhwira oku Nyamuhanga wethu, eribwira abosi abakathuhulikirira b’ekwenene eyimuhambireko. Thwanzire obuli mundu iniaminya ngoku omubere wiwe mukulhu ni lhwanzo, ngoku emithabalire yiwe yithunganene kandi ni y’obulingirirania, kandi ngoku Obwami bwiwe bukisigha ibwaghunzaho ery’aghalhwa lyosi n’erilethera abandu b’obuholho n’etseme. (Esy. 37:10, 11, 29; 1 Yn. 4:8) Thukabya thukalhwira oku Yehova omw’ithulira lyethu, thuk’eraya erina liwe. Kandi thukatsema kundi thukaminya ku thunemukolha erikwamana n’erina lyethu. Thuthi?
13. Busana naki thukayisyethera eryahulhwamo Abema ba Yehova? (Isaya 43:10-12)
13 Yehova abirithusombolha eribya ‘balhangiri [Abema]’ biwe.” (Soma Isaya 43:10-12.) Myaka mirebe enyuma, ebaruha erilhua okwa kathunga akakasondolha muyabugha yithi: “Ekitsumbi ekilengireyo ekya obuli mughuma w’okw’ithwe angabya nakyo ly’ery’ahulhwamo Mwema wa Yehova.” c Busana naki ikyabya kithya? Thulebaye eky’erileberyako. Wamanza omundu oyuwanga kulhwirako omwa koti, iwukendi sombolha omundu oyo wasi kandi oyo wukayikethera, omundu oyunawithe emibere eyuwene eyangaleka abandi ibaligha obwema obwakahayo. Omw’ithusombolha eribya Bema biwe, Yehova abirikangania kw’athwasi ndeke kandi kw’akayikethera ku thukendi mulhwirako nga Nyamuhanga mughuma ow’okwenene. Thukayowa ithuli b’ekitsumbi eribya Bema biwe erihika okw’ibya ithukakolesaya obuli kaghisa ak’erilhwira okwa rina liwe n’erirwanisya amabehi mangyi awakamubughawako. Omw’ikolha ekyo, thukakolha erikwamana n’erina erya thukayisyethera eribya nalyo, Abema ba Yehova!—Esy. 83:18; Abar. 10:13-15.
THUKENDI LHOLHA EMBERE ERITHULIRA ERIHIKA OKWA NDULI
14. Ni kyahi ekikatsemesaya ekikendi syabya omwa buthuku obukasa?
14 Ka thulindirire omughulhu ow’akasisimulha! Omwa buwathikya bwa Yehova, thuwithe amaha ngoku abangyi bakendi syaligha ekwenene obulighe bunene buthe bwatsuka. Kandi, thune mutsema busana n’ekikendi syathokekana nibya n’omwa buthuku obukalire omw’ibyaho ly’abandu—obulighe bunene—thukendibya ithunemulhangira abandu bangyi bakalhua omwa kihugho kya Sitani ekitsandire n’erithuyiyungako omw’iramya Yehova!—Emib. 13:48.
15-16. Thukendi lholha embere erikolhaki, kandi erihika mughulhu wahi?
15 Ekyo kine aho, thuwithe omubiiri ow’erikolha. Thuwithe olhusunzo lhw’erisangira omw’ithererera erithendi syasubwamu—erithulhughanibwa ly’engulhu yuwene y’Obwami bwa Nyamuhanga omwa kihugho kyosi. Okwa buthuku ibwan’obo, thutholere ithwabya ithunemukunga abandu. Abandu batholere ibaminya ngoku enduli y’omughulhu mubi ono yine museghera hakuhi-kuhi. Neryo endambi y’eritswera yikendisyabya yikahika bakendi syaminya ngoku omwatsi ogho thwabya thukathulha alhua oku Yehova Nyamuhanga.—Eze. 38:23.
16 Neryo, thukendi thwamu erikolhaki? Olhwanzo olhwa thuwithire engulhu yuwene, abandu, ibbwa kwilhaba n’aho olhwathuwithire Yehova Nyamuhanga n’erina liwe—lhukendi leka ithwalholha embere erithulira ithunayitheghekire, omwa byalhuba, kandi n’omuhwa erihika aho Yehova akendi sy’abughira athi, “Omubiiri amahwa!”
OLHWIMBO 54 “Enzira y’Eyi”
a Omuhindano w’Abema ba Yehova ow’obuli mwaka mwabya omwa Okwerikumi 7, 2023, okwa Kyumba ky’Olhuhindano ky’Abema ba Yehova ekye Newburgh, e New York, omwa Amerika. Endegheka yosi muyakanganibwa enyuma w’aho okwa JW Broadcasting®—Ekitsweka 1 omwa Okwerikuminakughuma 2023, n’Ekitsweka 2 omwa Okwokubanza 2024.
b Lebaya Omwatsi “E Biblia Yikahindulha Esyongebe—Eby’Erisubirya Ebyuwene Ebiri Omwa Biblia Mubyanyitsemesya,” owabya omwa Akaleberyo ak’Okwakabiri 1, 2015.
