OMWATSI W’ERIGHA 21
OLHWIMBO 107 Nyamuhanga Ni ky’Erileberyako ky’Olhwanzo
Ngoku Wanga Bana ow’Eringira Nayu Omwa Butheke Oyutholere
“Omukali mughenge nindi wanga mubana kwehi? Kusangwa enzwere yiwe yilhabire esyolulu sya kutsibu.”—EMI. 31:10.
EKIGHENDERERWA
Emisingyi ye Biblia eyikakanganaya ngoku omundu angabana ow’eringira nayu omwa butheke oyutholere kandi ngoku abandi omwa kithunga bangawathikya abahuru abakanza eringira omwa butheke.
1-2. (a) Ni byahi ebya Abakristayo abahuru batholere ibalengekaniako bathe batsuka obuthethane? (b) “Obuthethane” niki? (Lebaya “Erisoborera Ebinywe.”)
WUNANZIRE eringira omwa butheke? Nomwakine indi obutheke si ky’ekindu kikulhu ekikaletha etseme, Abakristayo bangyi abahuru, mbulha ni balere kutse bakulhu, balindirire eribana ow’eringira nayu omwa butheke. Ni kwenene, wuthe watsuka obuthethane, wutholere iwabya iwunayitheghekire omwa by’esyosente, bunyakirimu, n’omw’iyowa. a (1 Kor. 7:36) Wamakolha ekyo, iwanganasyabya n’obutheke obuwene.
2 Nomwabine, mughulhu mungyi sikyolho eribana ow’eringira nayu omwa butheke oyutholere. (Emi. 31:10) Kandi nibya nomuwanga bana omundu oyo wukanza eriminya ndeke, ikyangana kalha eritsukisya obuthethane. b Omo mwatsi ono, thukendi kania okwa byanga wathikya Abakristayo abahuru eribana ow’eringira nayu omwa butheke oyutholere n’eritsukisya obuthethane. Kandi thukendi minya ngoku abandi omwa kithunga banga wathikya abakanza eringira omwa butheke.
NGOKU WANGABANA OW’ERINGIRA NAYU OMWA BUTHEKE OYUTHOLERE
3. Ni byahi ebya Omukristayo omuhuru atholere inialengekaniako akasondya ow’eringira nayu omwa butheke?
3 Wamabya iwunanzire eringira omwa butheke, ni kibuya eriminya nga wanzire mibereki oko mundu oyo wang’ingira nayu omwa butheke wuthe watsuka obuthethane. c Bithe bithya, iwangana yisanga iwabirisigha ow’eringira nayu omwa butheke oyutholere kutse iwatsuka obuthethane n’omundu oyuthakutholere. Ni kwenene, owosi-wosi ow’eringira nayu omwa butheke oyutholere atholere iniabya ini Mukristayo oyubatizibirwe. (1 Kor. 7:39) Aliwe sibugha indi obuli mundu oyubatizibirwe wangan’ingira nayo omwa butheke. Neryo iwangana yibulya wuthi: ‘Ngawithe bilhubirirwaki? Ni mibere yahi eyo ngalhangira mwa y’omughaso okwa oyo nang’ingira nayu omwa butheke? Ebyo ngamusondayako nina by’obuyitheghererya?’
4. Ni byahi ebyo abandi bakahira omwa misabe yabu?
4 Ahathe erithika-thika, wabirisaba busana n’eribana ow’eringira nayu omwa butheke wamabya iwunakyanzire. (Fil. 4:6) Ni kwenene, Yehova syali lhaghanisaya eriha owosi-wosi y’ow’eringira nayu omwa butheke. Aliwe atsomene ebiyithawa n’eriyowa lyawu, kandi angana kuwathikya wukasondya ow’eringira nayu omwa butheke. Neryo lholha embere erimubwira eriyisunza n’eriyowa lyawu. (Esy. 62:8) Saba erihebwa erighumisirizya n’amenge. (Yak. 1:5) John, d mughalha wethu omuhuru owe United States, akasoborera ebyo akahira omwa misabe yiwe: “Ngabwira Yehova nga ni mibereki eyo nganzire okwa oyo nang’ingira nayu omwa butheke. Ngasaba erihebwa ehighisa hy’eribaniramo ow’eringira nayu omwa butheke oyutholere. Kandi ngasaba Yehova indi angwathikaye erikulha-kulhania emibere eyikendi leka ingabya iba mubuya.” Tanya, mwali wethu erilhua e Sri Lanka, akabugha athi: “Nganemusondya ow’eringira nayu omwa butheke oyutholere, ngasaba Yehova erinyiwathikya erisighalha muthaleghulha, inganawithe amalengekania awuwene, kandi inganatsemire.” Nomuwanga ghana eribana ow’eringira nayu omwa butheke oyutholere aho naho, Yehova akayilhagha erilholha embere erikutsomana kinyamubiri n’omw’iyowa.—Esy. 55:22.
5. Ni highisa hyahi ehyo Abakristayo abahuru bawithe ehy’eribananganiramo n’omundu oyuwanzire Yehova? (1 Abanya Korinto 15:58) (Lebaya n’ekisasani.)
5 E Biblia yikathuhira mw’omuhwa ‘w’erikanyirira [erikolha bingyi] omwa mubiiri w’Omukama.’ (Soma 1 Abanya Korinto 15:58.) Wunemukolha bingyi omwa mubiiri wa Yehova n’erisiba n’abalikyethu muthina-muthina, siwendi subulira okw’itsemera erisiba n’abalikyethu abakakuhimba lisa aliwe wukendi bana n’ehighisa hy’eribanangana n’abandi bahuru, nabo ng’iwe, abanemuhwerya amalengekania w’okw’ikolera Yehova. Kandi wunemulengaho eritsemesya Yehova, wukendi bana etseme y’okwenene.
Wamabya iwunemuyihwerya omwa mubiiri wa Yehova n’erisiba n’abalikyethu muthina-muthina, iwangana banangana n’abandi abananzire eringira omwa butheke (Lebaya enungu 5)
6. Ni kyahi ekya Abakristayo abahuru batholere ib’ibuka banemusondya ow’eringira nayu omwa butheke?
6 Aliwe eky’eriyitheyako kya kino: Isiwahweraya amalengekania w’okw’isondya ow’eringira nayu omwa butheke. (Fil. 1:10) Etseme y’okwenene siyiseghemere okwa ky’eribya iwuli omwa butheke kutse eyihi, aliwe okwa bughuma bwawu na Yehova. (Mt. 5:3) Kandi omughulhu wuli muhuru, iwangana thunga obwiranda bunene obw’erikanyirirya omubiiri wawu. (1 Kor. 7:32, 33) Kolesaya obuthuku obu bwa ndeke. Jessica, mwali wethu owe United States oyuwathahibawa iniakisiya iniahikya emyaka 40, akabugha athi, “Munayihwerya omwa mubiiri w’erithulira, kandi ekyo mukyaleka ingabya inganatsemire nomunanabya ingananzire erithahibwa.”
GHUMISIRIZAYA WUKANZA ERIMINYA OMUNDU MULEBE
7. Busana naki ni ky’amenge eriminya ndeke oyo wukanza eringira nayu omwa butheke habw’obuthuku, wuthe wakangania ku wumwanzire? (Emisyo 13:16)
7 Kandi ibbwa wamayowa wuthi omundu mulebe anganatholera iwe eringira nayu omwa butheke? Mbwino wunatholere iwakangania aho n’aho ku wabirimwanza? E Biblia yikabugha yithi ow’amenge akatsuka erilengekania athali ayira eky’erikolha. (Soma Emisyo 13:16.) Neryo iwukendibya iwamakangania amenge wamayitheghererya omundu ya ndeke ahabw’akathuku wuthe wakangania ku wumwanzire. Aschwin owe Netherlands akabugha athi: “Eriyowa buyira lyanganasa lhuba-lhuba, aliwe kandi lyangana lhuaho iryahwa. Neryo wamaghumisirizya wukalebya ndeke omundu mulebe, isiwendi tsukisya obuthethane obuseghemere okw’iyowa.” Eryongera okw’ekyo, wunemulebya ndeke omundu mulebe, iwangana minya ngoku si y’oyukutholere.
8. Omuhuru angaminya athi ndeke ow’eringira nayu omwa butheke oyutholere?(Lebaya n’ekisasani.)
8 Wanga kolhaki erithoka eriminya ndeke omundu mulebe? Okwa mihindano y’ekithunga kutse okw’iyitsemesya, iwangana lhangira ebindu birebe ebihambire okwa obunyakirimu, emibere, n’emikolere y’omundu oyo. Banywani biwe ni bahi, kandi ni byahi ebyo akakanayako? (Lk. 6:45) Ebilhubirirwa biwe binasosene n’ebyawu? Iwangana kania n’abasyakulhu b’omwa kithunga kyabu kutse owundi Mukristayo oyukulire oyunamwasi ndeke. (Emi. 20:18) Iwangana bulya omundu oyo ng’asibwe athi kutse ngawithe mibereki. (Ruta 2:11) Wunemulebya ndeke omundu, lhangira wuthi akabya inianayowire buholho. Sikaya eriyowa liwe, esyombitha siwe, kandi lhangira wuthi siwulibya aho ali obuli ndambi.
Wuthe wakangania ku wanzire omundu mulebe, omwa menge kandi habw’akathuku minya omundu oyo ya ndeke (Lebaya enungu 7-8)
9. Wuthe wahika okwa oyo wukanza eringira nayu omwa butheke, wutholere iwakakasya kyahi?
9 Wanga ghunza mughulhu mungahi iwune mulebya ndeke omundu wuthe wakangania ku wumwanzire? Wamalhuaho wukahika okwa mundu, iniangana lengekania athi wamamuhikako isiwuthalengekania. (Emi. 29:20) Okwa lhundi lhuhandi, wamalhabya buthuku buuli, iniangana kulhangira ng’oyukathika-thika, kutsibu-tsibu omundu oyo amabya iniabiriminya ku wumwanzire. (Omu. 11:4) Wibuke, wuthe wahika okwa mundu mulebe, siwutholere wukakasya wuthi wukend’ingira nayu omwa butheke. Aliwe wutholere iwakakasya ku wunayitheghekere obutheke kandi ngoku omundu oyo anganabya iy’oyukutholere.
10. Wanga kolhaki wamaminya ngoku omundu akwanzire aliwe iwe isiwumwanzire?
10 Kandi ibbwa wamaminya ngoku omundu mulebe akwanzire? Wamabya isiwumwanzire, kikanganaye ndeke omwa mikolere. Isikyendibya kibuya erileka omundu akalengekania athi obundi wunamwanzire kandi ikwabithe bithya.—1 Kor. 10:24; Efe. 4:25.
11. Omwa bihugho eyo abandi bakatheghekaniraya abandi b’obuthethane kutse eryingira omwa butheke, ni byahi ebyo batholere ibabya iban’ibukire?
11 Omwa bindi bihugho, ababuthi kutse abandi abakulire ibangana sombolera omuhughu wabo omuhuru y’ow’eringira nayu omwa butheke. Omwa bindi bihugho, ab’omw’eka kutse abanywani b’omuhuru bakamusonderaya ow’eringira nayu omwa butheke oyutholere neryo ibahiraho emitheghekere nuku omulhume n’omukali babanangane banalebya nga banatholerene. Wamasabwa eritheghekanirya abandu balebe b’obuthethane kutse eryingira omwa butheke, minya ebyo obuli mughuma anzire. Wamaminya ow’eringira nayu omwa butheke oyutholere, lengaho eriminya bingyi okwa mibere y’omundu oyo, kutsibu-tsibu obunyakirimu bwiwe. Obughuma obwa hakuhi na Yehova bulengire esyosente, esukuru, kutse ekitsumbi. Aliwe wibuke ngoku, mughalha wethu na mwali wethu abahuru n’ibo batholere ibathwamu nga bingire omwa butheke.—Gal. 6:5.
ERITSUKA OBUTHETHANE
12. Wamanza eritsukisya obuthethane n’omundu mulebe, wanga bwira wuthi omundu oyo?
12 Wamanza eritsuka obuthethane n’omundu mulebe, wanga kangania wuthi ku wumwanzire? e Wangana hiraho emitheghekere y’erikanirania n’omundu oyo, obundi ahali abandu bangyi kutse okwa simu. Soborera ebighendererwa byawu omwa nzira eyilhangirikire. (1 Kor. 14:9) Kyamayithaghisibwa, iha omundu oyo y’obuthuku bw’erilengekania ng’akendi subirya athiki. (Emi. 15:28) Kandi omundu amabya isyanzire eritsukisya obuthethane, sikaya eriyowa liwe.
13. Wanga kolhaki omundu amakukangania kw’akwanzire? (Abanya Kolosai 4:6)
13 Kandi ibbwa omundu amakangania kw’akwanzire? Kyangabya imukyayithagha obuthubaha omundu oyo erikuhikako, neryo ibya w’olhukeri kandi oyukasikaya. (Soma Abanya Kolosai 4:6.) Wamabya iwukayithagha obuthuku erithoka erilengekania nga wulighe eritsuka obuthethane, bugha. Nomwabine, lengaho erisubirya omwa byalhuba. (Emi. 13:12) Wamabya isiwanzire, kanganaya ekyo omwa lhukeri kandi omwa nzira eyilhangirikire. Lhangira ngoku Hans, mughalha wethu we Austria, asubiraya mwali wethu akamuhikako: “Munamubwira erithwamu lyaghe omwa menge aliwe omwa nzira eyilhangirikire. Munakolha ekyo aho naho kundi mundanza akabya n’amaha awatheyo. Busana n’ekyo, kandi munabya ingayitheya okwa mibere ngakolonganiramo nayu.” Okwa lhundi lhuhandi, wamabya iwunanzire eritsuka obuthethane n’omundu oyo, mubwire eriyowa lyawu kandi nga wanzire obuthethane bwenyu ibwabya buthi. Ebyo wanzire byanganaghana erisosana n’eby’owundi, erikwamana n’ekalikya yenyu kutse esindi nzumwa.
ABANDI BANGA WATHIKYA BATHI ABAKRISTAYO ABAHURU?
14. Thwanga wathikya thuthi Abakristayo abahuru omwa ebya thukabugha?
14 Ithwe bosi thwanga wathikya thuthi Abakristayo abahuru abakanza eringira omwa butheke? Enzira nguma ly’eriyitheya okwa bya thukabugha. (Efe. 4:29) Ithwangana yibulya thuthi: ‘Nganahira okwa banzire eryingira omwa butheke kw’akahathikano? Namalhangira dada na ndugu abahuru ibanemukania, nganalengekanaya indi bali omwa buthethane?’ (1 Tim. 5:13) Eryongera okw’ekyo, isithwaleka Omukristayo omuhuru akayowa ng’abulirweko kundi syali omwa butheke. Hans, oyulyukanibawako okw’itsuka, akabugha athi: “Abandi baghalha bethu bakabugha bathi, ‘Busana naki iwuthathahya? Siwukiri mulere.’ Ebinywe ng’ebyo bikaleka abahuru ibayowa isibasimirwe kandi kik’ongera erileka ibayowa nga ni b’eryingira omwa butheke.” Kwesi ka kyuwene erisondya ehighisa hy’erisimiramo Abakristayo abahuru!—1 Tes. 5:11.
15. (a) Erikwamana n’omusingyi owali omwa Abanya Roma 15:2, thutholere ithwalengekania okuki thuthe thwawathikya omundu mulebe eribana ow’eringira nayu omwa butheke? (Lebaya n’ekisasani.) (b) Ni nzumwa syahi esyo wuly’igha omwa vidiyo eyi?
15 Kandi ibbwa thwamalengekania thuthi mughalha wethu na mwali wethu balebe bangana kolha obutheke obuwene? E Biblia yikathubwira yithi thulengekanaye okw’iyowa ly’abandi. (Soma Abanya Roma 15:2.) Abahuru bangyi sibalyanza abandi bakabakangania ow’eringira nayu omwa butheke oyutholere, kandi thutholere ithwasikya eriyowa lyabu. (2 Tes. 3:11) Abandi ibanganasima obuwathikya bulebe, aliwe isithway’ingiraya omo myatsi yabo. f (Emi. 3:27) Abandi bahuru sibalyanza erikwama kyabahikako omwa nzira eyilhangirikire. Lydia, mwali wethu omuhuru owe Germany, akabugha athi: “Wangana kokya mughalha wethu na mwali wethu omwa gurupu nene. Kwamakyaha mughalha wethu na mwali wethu y’akaghisa k’eribanangana neryo basighire ebindi.”
Egurupu y’abandu yikaha Abakristayo abahuru b’akaghisa k’eribananganiramo (Lebaya enungu 15)
16. Abakristayo abahuru batholere ib’ibukaki?
16 Ithwe bosi—abahuru n’abali omwa butheke—thwanganabya omwa ngebe eyiri mw’etseme kandi eyuwene! (Esy. 128:1) Neryo wamabya iwanzire eringira omwa butheke aliwe isiwuli wabana oyo wang’ingiramo nayu, lholha embere erihwerya amalengekania w’okw’ikolera Yehova. Mwali wethu owe Macao ya Sin Yi akabugha athi: “Obuthuku obwa wangaghunza iwuwene muhuru lino ni buke kutsibu okwa bwa wukendi syaghunza n’omwanze wawu omwa Paradiso. Lhangira obuthuku obo mwa bw’obughuli kandi bukolesaye ndeke.” Neryo ibbwa wamabya iwabiribana ow’eringira nayu omwa butheke oyutholere n’eritsuka obuthethane? Omo mwatsi owakakwamako, thukendi syakania okwa ebyo wangakolha erithoka eribya n’obuthethane obukalhwiririra mw’ebibuya.
OLHWIMBO 137 Abakali Abathaleghulha, Bali Bethu Abakrisitayo
a Erikuwathikya eriminya nga wunayitheghekire, lebaya okwa jw.org kw’omwatsi “Obuthethane—Ekitsweka 1: Nanamabirihika Eryingira Omwa Buthethane?”
b ERISOBORERA EKINYWE: Omo mwatsi ono n’owakakwamako, “obuthethane” bw’obuthuku obo omulhume n’omukali bakaminyaniramo ndeke nuku bathwemu nga banatholerene eryingira omwa butheke. Obuthethane bukatsuka omughulhu omulhume n’omukali bakakanganaya ku banzene, kandi bukalholha embere erihika aho bakathwiramo eryingira omwa butheke kutse erithwa obuthethane.
c Erikyolhobya, omwa syonungu esikakwamako, thukendi kania okwa ow’eringira nayu omwa butheke oyutholere eribya nga ni mughalha wethu. Ni kwenene, emisingyi eyi yihambire n’oku bali bethu.
d Awandi mena abirihindulhwa.
e Omwa sindi kalikya, mughulhu mungyi mughalha wethu yukahika oku mwali wethu akatsukisya obuthethane. Nomwabine, si kibi mwali wethu erithwamu erihika oku mughalha wethu. (Ruta 3:1-13) Eriminya bingyi, lebaya omwatsi “Abalere Bakabulhaya . . . Nanga Bwira Nyithi Omulhume y’Eriyowa Lyaghe?” omwa Awake! ey’Okwerikumi 22, 2004.
f Lebaya okwa jw.org kw’evidiyo Ababirithoka Erilhwira Erikirirya—Abakristayo Abahuru.