1, 2. Ni kyahi ekya Diabolo akolesaya eriaghalya abandu ba kutsibu?

EBINDU ng’esimu, esyotara sy’amasanyarazi, ematoka, n’efriji, byabiryuwania engebe. Ebindi ng’esyombundu, esyoguruneti, ethaba, n’esyobbomu esye atomiki, byabirihira engebe y’omwa kabi. Aliwe hane ekyamabirighunza myaka mingyi okwa byosi ebi kandi kyabiriaghalya abandu ba kutsibu. Ky’ekyahi? Amabehi! Eribugha amabehi ly’erithulha ekindu ekya thunasi ngoku si kwenene nuku thuthebaye omundu. Oyuwatsuka eribugha amabehi nindi? Diabolo! Yesu Kristo mwamwahulhamo “ise w’amabehi.” (Soma Yoane 8:44.) Atsuka eribugha amabehi mughulhu wahi?

² Hamabirilhaba myaka mingyi alibughiregho omw’irima lye Edeni. Adamu na Eva babya ibanemutsemera engebe omwa Paradiso eyuwene eyo Yehova abya iniabiribakokotherya. Nyamuhanga mwababwira athi bamalya okwa “bighuma by’omuthi w’eriminya ekibuya n’ekibi,” ibakendi holha. Sitani nomwanabya inianasi eki, mwakolesya enzoka eribwira Eva athi: “Simwendi syaholha nahake.” Ayo w’abya mabehi w’erimbere. Kandi Sitani mwabugha athi: “Nyamuhanga anasi ekiro mwasyalya  kubyo, ameso wenyu asyalibulhwa, kandi ko mwasyabya nga Nyamuhanga, imwabya n’eriminya ekibuya n’ekibi.”​—Enzuko 2:15-17; 3:1-5.

3. Busana naki amabehi wa Sitani abya w’akabi kutsibu, kandi mumwalhwiririraki?

³ Amabehi wa Sitani abya w’akabi kutsibu kundi abya inianasi ngoku Eva amamw’ikirirya n’erirya ekighuma, iniakendi holha. Kandi ekyo ky’ekyanabya kyabere. Eva na Adamu mubathakenga ekihano kya Yehova n’erighunzerera mubaholha. (Enzuko 3:6; 5:5) Eky’obulighe, busana n’ekibi kya Adamu, “olhuholho mulhwahika okwa bandu bosi.” Omo kwenene, “olhuholho mulhwathabalha oko bandu . . . , nibya mulhwathabalha oko bathakolha ekibi ekiringene ng’erilholho lya Adamu.” (Abanya Roma 5:12, 14) Ky’ekikaleka ithwabya isithuhikene kandi ithuthabyaho kera na kera ngoku Nyamuhanga aby’anzire. Omwakanya k’ekyo, thukabyaho “myaka makumi alinda, kutse thwamabya n’amaaka iyabya makumi munani,” n’engebe yethu yoswire ‘mw’amaghaniryo n’obulighe.’ (Esyonyimbo 90:10) Ebyosi ebi byabiribya busana n’amabehi wa Sitani!

4. (a) Ni bibulyo byahi ebyo thutholere ithwasubirya? (b) Erikwamana na Esyonyimbo 15:1, 2, ni bahi abangabya banywani ba Yehova?

⁴ Yesu mwabugha oku Sitani athi: “Syali mw’omwatsi w’ekwenene, kusangwa sihali omwatsi w’ekwenene omwa muthima wiwe.” Sitani syali athahinduka. Akina “theba ekihugho kyosi” omwa mabehi wiwe. (Eribisulirwa 12:9) Aliwe sithwanzire Sitani akathuthebya. Neryo thutholere ithwaminya eby’erisubirya okwa bibulyo bisathu. Sitani anemuthebya athi abandu munabwire? Busana naki abandu bakabugha amabehi? Kandi thwangabya thuthi b’okwenene mughulhu wosi nuku sithuheraye obunywani bwethu na Yehova, nga Adamu na Eva?​—Soma Esyonyimbo 15:1, 2.

5. Sitani anemuthebya athi abandu munabwire?

⁵ Thwangana yitheya okw’ithebibwa na Sitani. Omukwenda Paulo mwabugha athi: “Thunasi esyombitha syayo.” (2 Abanya Korinto 2:11) Thunasi ngoku Sitani yuthabere ekihugho kyosi, imwamuli amadini w’amabehi, esyogavumente esiri mw’obulibathangania, n’eby’obusubure ebiri mw’omururu. (1 Yoane 5:19) Neryo sikirithuswekaya Sitani n’esyombinga siwe erisondolha abandu b’obuthoki ‘erithulha amabehi.’ (1 Timoteo 4:1, 2) Ng’eky’erileberyako, abandi basuburi bakakolesaya amabehi omw’ithererera bakanza erighulya ebindu ebyanga tsandya engebe kutse ibatheba abandu nuku babiheko esyosente.

6, 7. (a) Busana naki ni kya kabi omughulhu abasondoli b’amadini bakabugha amabehi? (b) Ni mabehi wahi agho wabiriowa abasondoli b’amadini bakabugha?

⁶ Kutsibu-tsibu ni ky’akabi omughulhu abasondoli b’amadini bakabugha amabehi. Busana naki? Kundi omundu am’ikirirya esyongangirirya syabu sy’amabehi n’erikolha ebyo Nyamuhanga aponire, inianganaherya akaghisa k’erisyabyaho kera na kera. (Hosea 4:9) Yesu abya inianasi ngoku abasondoli b’amadini ab’omwa buthuku bwiwe babya bakatheba abandu. Omwa buthubaha mwababwira athi: “Obulighe okw’inywe, abakangirirya b’emighambo n’Abafarisayo, abathebya! Kusangwa mukathimba okwa ngetse n’ekihugho eriyira omusomi mughuma; neryo mwamamuyira muthya, imukamuyiramo mwana [we Gehena,]” ni bugha ambu erithoghothibwa  kera na kera. (Matayo 23:15) Yesu mwabugha athi abasondoli b’amadini w’amabehi babya nga thatha wabu Sitani, ‘omwithi.’​—Yoane 8:44.

⁷ Na munabwire hali abasondoli bangyi b’amadini. Bangan’ahulhwamu bapasta, bakangirirya, kutse omwa bindi bitsumbi bingyi. Nabu, bali ng’Abafarisayo, sibali kangiriraya ekwenene eyiri omwa Kinywe kya Nyamuhanga aliwe “bakahinganaya ekwenene ya Nyamuhanga omwa mabehi.” (Abanya Roma 1:18, 25) Ebighuma by’okwa mabehi wabu bya bino, omuliro wa kera na kera, abandu bali mw’akalimu akatheholha, omundu amaholha akahinduka mw’ekindi kindu, kandi Nyamuhanga akaligha ab’olhubutho lhughuma erikolha emyatsi y’engyingo kutse erithahania.

8. Ni mabehi wahi agho abanya politiki bakisiya ibabugha, aliwe ithwe thutholere ithwakolhaki bakabughagho?

⁸ N’abanya politiki babirikolesya amabehi eritheba abandu. Ekighuma ky’okwa mabehi amanene-manene ekya bakisiya ibabugha ly’eribugha bathi babiriletha “obuholho n’eriyisyandira” omwa kihugho. Aliwe “neryo-neryo erithoghotha lyasyithabo.” Neryo sithutholere thukaligha eby’abanya politiki aba, abakabugha bathi emyatsi yinemuwana. Ekwenene yiri yithi thunasi “ndeke-ndeke ngoku ekiro ky’Omukama kyasyasa ng’omurahi oyukasa omwa kiro.”​—1 Abanya Tesalonika 5:1-4.

9, 10. (a) Busana naki abandu bakabugha amabehi, kandi mukalhwiririraki? (b) Ni kyahi ekya thutholere ithwabya ithunasi oku Yehova?

⁹ Munabwire, ab’obuthoki basa sibo bakabugha amabehi. Omwatsi “Ekikaleka Ithwabugha Amabehi,” owahandikawa na Y. Bhattacharjee, akabugha athi “eribugha amabehi kyabiriliwa ng’omubere owahandire omwa bandu.” Ni bugha ambu, abandu bakalengekanaya bathi ni kya buhangiranwa kandi siki eribugha amabehi. Mughulhu mungyi abandu bakabiha erianza eriyitheya, obundi eribisa ebisobyo byabu kutse ebibi ebyo babirikolha. Kandi bakanabiha nuku bakole esyosente kutse erianza eriyighasira omwa mibere mirebe. Omwatsi oyu akathasyabugha athi abandu sibalisagha eritheba “abo bathasi, abo bakakolha nabo, abanywani, kutse abanze babu.”

¹⁰ Amabehi wosi aya mukalhwiririraki? Abandu sibakiyiketherana, n’amanywani abirithwika. Ng’eky’erileberyako, thalengekania omulhume omuyisiwa ng’angayiponera athi akaminya ngoku mukali wiwe mwasingira neryo amamutheba n’erimubisa ekyo akolha. Kutse thalengekania ngoku kyangabya ky’akabi omulhume amanubya mukali wiwe n’abaana, aliwe iniayilingirirania ng’anabanzire kandi ng’anabatsomene omughulhu bali n’abandi. Abandu ng’abo bangana theba abandu, aliwe thutholere ithwibuka ngoku sibanga theba Yehova. E Biblia yikabugha yithi “ebyosi bisanzukere, kandi biminyikere omo meso” wiwe.​—Abaebrania 4:13.

11. Eky’erileberyako ekithuwene ekya Anania na Safira kikathweghesayaki? (Lebaya ekisasani ekiri okw’itsuka.)

 ¹¹ Omwa Biblia mune eky’erileberyako eky’omulhume na mukali wiwe Abakristayo abo Sitani athebaya neryo bamabwira Nyamuhanga y’amabehi. Anania na Safira mubalengesya eritheba abakwenda. Mubaghulya okwa bithaka byabu n’eriha abakwenda b’embindi y’esyosente. Anania na Safira banza eritsemesya abandi omwa kithunga, neryo mubabwira abakwenda bathi mubakaha esyosente esyosi. Aliwe Yehova abya inianasi ngoku bakayitheba, neryo mwabasuyira.​—Emibiri 5:1-10.

12. Ni kyahi ekikendi syahika okwa bakabugha amabehi w’akabi abatheyisubamu, kandi busana naki?

¹² Yehova akayowa athi okwa bandu abakabugha amabehi? Abandu bosi abakabugha amabehi w’akabi kandi abatheyisubamu bakendi syaghuswa omwa “ngetse y’omuliro,” nga Sitani. Ni bugha ambu, bakendi syathoghothibwa kera na kera. (Eribisulirwa 20:10; 21:8; Esyonyimbo 5:6) Busana naki? Kundi Yehova akalhangira ababehi aba ngoku akanalhangira abandi abosi abakakolha ebiri ‘ng’eby’esyombwa’ ni bugha ambu ebikitha Nyamuhanga y’esyonye.​—Eribisulirwa 22:15.

13. Ni byahi ebya thwasi oku Yehova, kandi kikathuhira mw’omuhwa w’erikolhaki?

¹³ Thunasi ngoku Yehova “si mundu, wuthi angabiha” kandi ngoku “Nyamuhanga syali thoka eribiha.” (Emiganzo 23:19; Abaebrania 6:18) ‘Yehova akakwa obusu . . . olhulimi lhw’eribiha.’ (Emisyo 6:16, 17) Thwamabya thwanzire erimutsemesya, thutholere ithwabugha okwenene. Neryo ‘sithuli bihirana.’​—Abanya Kolosai 3:9.

14. (a) Ni kyahi ekikaleka Abakristayo ab’okwenene ibabya ba mbaghane okw’ab’omwa madini w’amabehi? (b) Soborera omusingyi owali omu Luka 6:45.

¹⁴ Ni nzira yahi nguma eyo Abakristayo  b’okwenene bali mbaghane okw’ab’amadini w’amabehi? ‘Thukabugha eby’ekwenene.’ (Soma Zekaria 8:16, 17.) Paulo mwabugha athi: “Thukayikanganaya ng’abaghombe ba Nyamuhanga, . . . thuwithe ekinywe ky’ekwenene.” (2 Abanya Korinto 6:4, 7) Kandi Yesu mwabugha athi abandu bakabugha “ebyoswire omo muthima.” (Luka 6:45) Eki kikamanyisaya kithi oyuli mw’okwenene akabugha okwenene. Akabwira abo athasi, abo akakolha nabu, abanywani, n’abanze biwe okwenene. Thulebaye eby’erileberyako birebe ngoku thwanga kangania ku thunemulengaho eribya b’okwenene omo myatsi yosi.

15. (a) Busana naki ni kibi eribya omwa ngebe ibiri? (b) Ni kyahi ekyanga wathikya abalere erimanira akahathikano ak’ab’olhulengo lhwabu? (Lebaya omwatsi ahikwa.)

¹⁵ Wamabya iwuli mulere, iwangananza eriliwa n’ab’olhulengo lhwawu. Neryo busana n’eki, abandi balere bakabya omwa ngebe ibiri. Bakabya ngabanahenirye omwa by’esyongeso omughulhu bali n’ab’eka yabu n’ekithunga aliwe kwesi ikubathe bathya okwa Intaneti kutse ibane n’abandu abathe kolera Yehova. Bangana bugha kithya-kithya, ibambalha esyongyimba esithatholere, ibahulikirira omuziki owathatholere, ibathamira, ibakolesya ebibatsi ebikathamiraya, ib’ingira omwa buthethane bubiso-biso, kutse ibakolha ebindi bindu bibi. Bakabya ibakatheba ababuthi babu, balikyethu, na Yehova. (Esyonyimbo 26:4, 5) Aliwe Yehova akaminya thwamabugha thuthi thumusikirye kandi ithwakolha ebyo aponire. (Mariko 7:6) Ni kibuya erikolha ekya musyo ono akabugha: “Siwuleke omuthima wawu akatsura [kutse akayighomba] abakolha nabi, nikwa wubye n’eryubaha Omwami Mukulhu ebiro byosi.”​—Emisyo 23:17. * (Lebaya omwatsi ahikwa.)

16. Thutholere ithwasuliririrya thuthi ebibulyo eby’efomu y’omubiiri w’omughulhu wosi?

¹⁶ Wamabya wanzire eribya mutemburi w’omughulhu wosi kutse eringira omwa mubiiri w’omughulhu wosi ow’embaghane, ng’erighenda okwa Beteli, wukusuliriraya efomu. Ni kikulhu eribugha okwenene okwa bibulyo ebihambire okwa maghalha wawu, eby’eriyitsemesya ebyo wanzire, n’esyongeso syawu. (Abaebrania 13:18) Kandi ibbwa wamabya iwabirikolha ekindu ekyo Yehova aponire kutse ekikalyambaya obunyamuthima-thima bwawu kandi isiwathakibwira abasyakulhu? Basabe obuwathikya nuku wanga kolera Yehova n’obunyamuthima-thima obuhenirye.​—Abanya Roma 9:1; Abanya Galatia 6:1.

17. Thutholere ithwakolhaki abakathwendereraya bamathubulya okwa balikyethu?

¹⁷ Wutholere iwakolhaki omubiiri wethu amaghanwa eyo wikere n’ab’obuthoki ibakuhamba n’erikubulya okwa balikyethu?  Wunatholere iwababwira obuli kindu ekyo wasi? Yesu mwakolhaki omuthabali Omuroma akamubulya? Yesu mwakolesya omusingyi we Biblia owakabugha athi hali “omughulhu w’eribya bukuthu n’omughulhu w’eribugha,” kandi ihakanayira iniathabugha kindu! (Omugambuli 3:1, 7; Matayo 27:11-14) Thwamabya ithune omwa mibere ng’eyi, thutholere ithwabya n’amenge kandi ithwayitheya nuku si thuhire balikyethu b’omwa kabi.​—Emisyo 10:19; 11:12.

18. Ni lhukwamirwaki olhwa thuwithe abasyakulhu bamathubulya okwa balikyethu?

¹⁸ Kandi ibbwa omundu omwa kithunga amabya iniabirikolha erilholho erikalire kandi iwunasi? Abasyakulhu bawithe olhukwamirwa lhw’erilhangira bathi ekithunga kikabya ikinahenirye, omwa by’esyongeso neryo ibangana kubulya oko mwatsi oyo. Wangakolhaki, omundu oyo amabya ini munywani wawu kutsibu kutse ini muhughu? E Biblia yithi: “Oyukabugha okwenene akakanganaya ebithunganene.” (Emisyo 12:17; 21:28) Neryo wuwithe olhukwamirwa olhw’eribwira abasyakulhu ekwenene yosi butsira eribisirira. Abasyakulhu bawithe obughabe bw’eriminya okwenene nuku bangabana enzira eyuwene ey’eriwathikiryamu omundu oyo erisuba-subania obughuma bwiwe na Yehova.​—Yakobo 5:14, 15.

19. Thukendi kania okuki omo mwatsi owakakwamako?

¹⁹ Dawudi mwasaba Yehova athi: “Wukasonda omuthima owatheleghulha.” (Esyonyimbo 51:6) Dawudi abya inianasi ngoku ekikulhu y’emisosere yethu y’omw’isi. Mughulhu wosi, Abakristayo ab’okwenene ‘bakabugha eby’ekwenene na balikyabu.’ Eyindi nzira eyikakanganaya ngoku thuli b’embaghane okwa b’amadini w’amabehi ly’erikangirirya ekwenene eyiri omwa Biblia. Omwatsi owakakwamako, thukendi kania ngoku thwanga kolha ekyo omw’ithulira lyethu.