1, 2. (a) Omubiiri mukulhu kutsibu omwa ngebe ya Yesu abya igho wahi, kandi busana naki? (b) Thutholere ithwakolhaki erithoka ndeke ‘erikolha haghuma na Nyamuhanga’?

YESU KRISTO abya mubatsi n’enyuma waho amabya mukangirirya. (Mariko 6:3; Yoane 13:13) Ebyosi mwabikolha ndeke. Ng’omubatsi, mwigha erikolesya ebindu biwe erithoka erikolha omwa mithi mw’ebindu by’omughaso. Kandi ng’omukangirirya, oyuwabya asi ndeke Amasako mwawathikya abandu eriyitheghererya ekwenene eyiri omwa Kinywe kya Nyamuhanga. (Matayo 7:28; Luka 24:32, 45) Yesu abere ahikya myaka 30, mwaleka obubatsi n’eribya mukangirirya kundi abya inianasi ngoku oyu wa mubiiri mukulhu kutsibu owatholere iniakolha. Mwabugha athi erithulhughania engulhu yuwene y’Obwami bwa Nyamuhanga ni kighuma ky’okwa byaleka Nyamuhanga iniamuthuma okwa kihugho. (Matayo 20:28; Luka 3:23; 4:43) Yesu mwahwerya engebe yiwe omw’ithulha engulhu yuwene, kandi aby’anzire n’abandi ibakolha ekyo.​—Matayo 9:35-38.

² Abangyi omw’ithwe sibabatsi, aliwe ithwe bosi thuli bakangirirya abak’eghesaya abandi b’engulhu yuwene. Omubiiri oyu ni mukulhu kutsibu kundi na Nyamuhanga ane omwa mubiiri oyu. Kandi nibya, thukahulhawamo ‘abakakolha  haghuma na Nyamuhanga.’ (1 Abanya Korinto 3:9; 2 Abanya Korinto 6:4) Thukalighirana n’omuhandiki w’esyonyimbo oyuwabugha athi: “Enzumwa y’emighambo yawu ni mwatsi w’ekwenene.” (Esyonyimbo 119:159, 160) Ekinywe kya Yehova ni kwenene. Ky’ekikaleka ithwanza erikakasya thuthi thune ‘mukangirirya ndeke-ndeke omwatsi w’ekwenene’ omw’ithulira lyethu. (Soma 2 Timoteo 2:15.) Neryo thukabya ithunemulengaho eryongera erithoka ndeke erikolesya e Biblia, ekindu kikulhu ekya thukakolesaya omw’ikangirirya abandi oku Yehova, Yesu, n’Obwami. Erithuwathikya erithoka omubiiri wethu w’erithulira, ekithunga kya Yehova kyabirithuha ebindi bindu by’omughaso, kandi nabyo thutholere ithwaminya ngoku thwangabikolesya. Ebindu ebi bine omwa Ebya Thukakolesaya Thukakangirirya.

3. Ni kyahi ekya thutholere ithwahira kw’omuwatho omw’ithulira, kandi Emibiri 13:48 yikathuwathikaya yithi erikolha ekyo?

³ Wanganabulha ekikaleka ithwabyahulha mwa Ebya Thukakolesaya Thukakangirirya butsira Ebya Thukakolesaya Thukathulira. Kundi “erithulira” ly’erithulhughania omwatsi, aliwe “erikangirirya” ly’erisoborera omwatsi nuku omundu ayitheghereraye ebyo amowa neryo iniathwamu erighendera okwa by’amigha. Omwa buthuku buke obwamasakayo, thutholere ithwahira omuwatho okw’itsukisya abigha be Biblia n’erikangirirya abandu ekwenene nuku bangabya bigha ba Kristo. Eki kikamanyisaya kithi thutholere ithwasondya n’omuhwa abosi abali “n’amalengekania awatholere busana n’engebe y’erikotha” n’eribawathikya eritsuka erikolera Yehova.​—Soma Emibiri 13:44-48. *

4. Thwangabana thuthi abali “n’amalengekania awatholere busana n’engebe y’erikotha”?

⁴ Thwangabana thuthi abali “n’amalengekania awatholere busana n’engebe y’erikotha”? Okwa Bakristayo ab’erimbere, enzira nyisa ey’eribaniramu abandu abo lyabya iry’erithulira. Yesu mwabwira abigha biwe athi: “Omughulhu mukahika okwa muyi kutse okwa kayi, mwingire, mubulhaye nga hane mundu oyo wangabakokya.” (Matayo 10:11) Nethu munabwire thutholere ithwakolha ekiri ng’ekyo. Aliwe abandu bamabya isibaleghene, ibawithe emiyiheko, kutse isibatsomene Nyamuhanga, isithwalengekanaya thuthi bakendi hulikirira engulhu yuwene. Thukasondaya abandu abatsomene, abayikehirye, kandi abanzire eriminya ekwenene. Thwangana linganisya erisondya abandu ng’ekya Yesu abya akakolha iniane mubatsi. Iniakatsuka erisondya omuthi owatholere ow’erikolha mw’ekindu, olhuyi, engomo, kutse ekindi. Neryo iniakimaya ebindu biwe by’erikolesya, iniakolesya amenge wiwe, n’erikolha ekindu. Kuthya namunabwire, thukatsuka erisondya abandu batsomene, neryo ithwakolesya ebindu byethu eby’erikolesya n’ebyathwasi eribawathikya eribya bigha.​—Matayo 28:19, 20.

5. Ni kyahi ekya thutholere ithwaminya okwa bindu ebiri omwa Ebya Thukakolesaya Thukakangirirya? Iha eky’erileberyako. (Lebaya ebisasani ebiri okw’itsuka.)

⁵ Omwa by’erikolesya, obuli kindu kikabya ikinawithe omubiiri wakyo. Ng’eky’erileberyako, thalengekania okwa bindu ebyo Yesu akolesaya iniane mubatsi. Iniakayithagha eby’eripimamo, erirambamo, erithemamo, erithobolhamo, n’eby’eribatsamo, kuthya n’eby’erilingiriraniamo n’erimathikania haghuma ebyo abiribatsa. Kuthya, obuli kindu omwa Ebya Thukakolesaya Thukakangirirya  kinawithe omubiiri wakyo. Neryo thulebaye ngoku thwanga kolesya ebindu by’omughaso ebi.

6, 7. (a) Wabirikolesya wuthi esyokadi esikakangirira e jw.org? (b) Busana naki thukakolesaya esyokada esikakokaya okwa mihindano?

⁶ Esyokadi esikakangirira e jw.org. Ehi ni hindu hike-hike ehikakolha ndeke eribwira abandu nga thuli bahi n’eribakangirira omuthahulha wethu owe jw.org. Okwa muthahulha wethu, banganaminya bingyi ebithuhambireko nibya n’erisaba eryeghesibwa e Biblia. Abandu abalhabire omu 400,000 babirikolesya e jw.org erisaba eryeghesibwa e Biblia, kandi n’abandi bangyi bakakolha ekyo buli kiro! Wanganalhangira wuthi wukabya iwune n’esyokadi sy’erisikolesya wukakania n’abandu abo wukabana.

⁷ Esyokada. Ekada eyikakokaya okwa mihindano yiri kw’erikokya lino: “Wukakokibawa erigha e Biblia n’Abema ba Yehova.” Neryo yikathasyabugha yithi wanganakolha eki “okwa mihindano yethu” “kutse iwune n’oyo wuk’igha nayu.” Neryo ekada yikabwira abandu nga thuli bahi kandi iyakokya “abasi ku bali n’obwagha bwa Nyamuhanga” erigha nethu e Biblia. (Matayo 5:3) Aliwe, abandu bakalighirawa eryasa okwa mihindano yethu mbulha balighire erigha e Biblia kutse eyihi. Bamasa okwa mihindano yethu, ibakendi lhangira ngoku bangan’igha bingyi omwa Biblia.

8. Busana naki ni kikulhu abandu erihindana hakiri murundi mughuma? Iha eky’erileberyako.

⁸ Ni kikulhu eribya ithune mukokya abandu okwa mihindano yethu hakiri murundi mughuma. Busana naki? Kundi bamasa, ibakendi lhangira ngoku Abema ba Yehova bakakangiriraya ekwenene ye Biblia n’eriwathikya abandu eriminya Nyamuhanga, ekindu ekya madini w’amabehi athekolha. (Isaya 65:13) Ng’eky’erileberyako, Ray na mukali wiwe Linda abe Amerika mubalhangira embaghane eyi myaka mirebe enyuma. Ibikirirye omu Nyamuhanga kandi ibanzire erimuminya ndeke. Neryo mubathwamu erithimba omwa makanisa wosi awali omwa tawuni yabu n’erisondyamu ebindu bibiri bathe bayiyunga okwa kanisa eyo. Eky’erimbere, ibatholere ibigha kindu kirebe omwa kanisa eyo, n’ekyakabiri, abandu ab’omwa kanisa eyo ibatholere ibambalha ng’abandu abakabugha bathi bakakolera Nyamuhanga. Mukyabathwalira myaka mingyi kundi habya esyokanisa nyingyi. Aliwe mubayiponera. Mubathigha ekyosi-kyosi, n’abandu b’omwa makanisa ibakambalha kithya-kithya. Babere babirihika omwa y’erighunzerera okwa syababya batheghekire erihikako, Linda mwaghenda okwa mubiiri na Ray amasuba eka. Akasuba eka, mwalhaba ahali Ekisenge ky’Obwami. Mwayibwira athi, ‘Leka ng’ingiremu n’erilebya ebikakolekamu.’ Omo kwenene, abya inamabana ekyo babya bakasondya! Obuli mundu okwa Ekisenge ky’Obwami iniatsangire, iniawithe olhukeri kandi ibambere ndeke. Ray mw’ikalha okwa bithumbi by’embere kandi mwanza ebyo igha! Eki kikathwibukaya ebya mukwenda Paulo abugha okwa mundu oyukahindana omurundi w’erimbere n’eribugha athi: “Kwenene Nyamuhanga ali omo kathi-kathi kenyu.” (1 Abanya Korinto 14:23-25) Enyuma waho, Ray mwabya akahindana obuli kiro ky’eyenga. Neryo mwatsuka eribya akasa okwa mihindano y’omwakathi-kathi k’ewiki. Linda nayu mwatsuka eribya akahindana, kandi nomwakine indi obuli mughuma aby’awithe emyaka eyilhabire omu 70, mub’igha e Biblia kandi bamabatizibwa.

9, 10. (a) Busana naki esyotrakit syolhobire erikolesya? (b) Soborera ngoku thwanga kolesya etrakit Obwami bwa Nyamuhanga niki?

⁹ Esyotrakit. Thuwithe esyotrakit munani omwa bya thukakolesaya. Silhobire erisikolesya, kandi sikakolha ndeke omw’itsukisya omukania. Aha ey’erimbere yikathahulhukibirwa omwa 2013, esyokopi nga bbiliyoni ithano syabiriprintingwa! Esyotrakit esi sikolirwe omwa mibere eyisosene. Neryo wamabiriminya erikolesya enguma y’okw’isyo, iwangana kolesya esyosi! Wanga kolesya wuthi etrakit eritsukisya omukania n’omundu?

¹⁰ Obundi wanzire erikolesya etrakit Obwami bwa Nyamuhanga niki? Kanganaya omundu ekibulyo ekiri okwa trakit kw’embere n’eribulya wuthi: “Wunewathayibulya Obwami bwa Nyamuhanga nga niki? Mbwino iwukendi bugha wuthi. . . ?” Mubulhaye ng’amasombolha kyahi okwa by’erisubirya bisathu. Omwakanya k’erimubwira eky’erisubirya kiwe nga kihikire kutse nga kiwire, sukulha ahali akatsweka “Ekya Biblia Yikabugha” akali omwakathi n’erisoma amasako awakanganibweho, Danieli 2:44 na Isaya 9:6. Mukaghunzerera, bulhaya ekibulyo ekiri enyuma omw’isi sy’omuthwe “Eky’erilengekaniako”: “Engebe yikendi syabya yithi omw’ithabalha ly’Obwami bwa Nyamuhanga?” Iwangana syasubirya ekibulyo ekyo mukathasyakania. Iwanganakolesya erisomo lyo 7 ery’ebrokyuwa Engulhu Yuwene Erilhua oku Nyamuhanga!, enguma y’okwa ebya thukakolesya eritsukisya abigha be Biblia.

11. Esyogazeti syethu sitheghekirwe erikolhaki, kandi thutholere ithwaminyaki okw’isyo?

¹¹ Esyogazeti. Akaleberyo na Awake! sy’esyogazeti esikahulhukibawa n’erihindulhwa kutsibu omwa kihugho! Kundi abandu erilhua omwa bihugho bingyi muthina-muthina bakasoma esyogazeti esi, emyatsi y’okwa kidipa yikolirwe omwa mibere eyikatsemesaya abandu ehosi-hosi. Thutholere ithwakolesya esyogazeti esi eriwathikya abandu erihira embere eby’omughaso munene omwa ngebe munabwire. Aliwe, thutholere ithwatsuka eriminya obuli gazeti nga yitheghekirwe busana n’abandu bahi.

12. (a) E Awake! yitheghekirwe busana na bahi, n’ekighendererwa kyayu ni kyahi? (b) Ni byalholirweko byahi ebyuwene ebya wabana lino-lino omw’ikolesyayu?

¹² E Awake! yitheghekirwe busana n’abandu abasi bike kutse abathasiki okwa Biblia. Banganabya isibawithe ekyo basi okwa syongangirirya sy’Ekikristayo, banganabya isibali yikethera edini, kutse ibathaminya ngoku e Biblia yangana bawathikya omwa ngebe yabu. Ekighendererwa kikulhu kye Awake! ly’erikakasya abasomi bayu ngoku Nyamuhanga aneho. (Abanya Roma 1:20; Abaebrania 11:6) Kandi yikalengaho eriwathikya abasomi bayu erikirirya ngoku e Biblia ‘kwenene . . . ni kinywe kya Nyamuhanga.’ (1 Abanya Tesalonika 2:13) Esyo Awake! isathu esya 2018 siwithe emithwe: “Ekyangaletha Obutseme,” “Esyombitha 12 Esy’Amaaka Awabirithoka,” na “Obuwathikya Busana n’Abali Omwa Bulighe bw’Eriholerwa.”

13. (a) Akaleberyo ak’erighaba katheghekirwe busana na bahi? (b) Ni byalholirweko byahi ebyuwene ebya wabana lino-lino omw’ikakolesya?

¹³ Ekighendererwa kikulhu ky’Akaleberyo ak’erighaba ly’erisoborera abandu abasikirye Nyamuhanga ne Biblia okwa lhulengo lhulebe esyongangirirya sye Biblia. Banganabya ibanasi bindu birebe okwa Biblia, aliwe isibali yitheghererya ndeke-ndeke ebya yikakangiriraya. (Abanya Roma 10:2; 1 Timoteo 2:3, 4)  Ehileberyo hisathu ehya 2018 hikasubiraya ebibulyo bino: “Mbwino e Biblia Yikine y’Omughaso?,” “Ni Byahi Ebiri Omwa Buthuku Obukasa?,” na “Nyamuhanga Anakutsomene?”

14. (a) Esyovidiyo ini esiri omwa Ebya Thukakolesaya Thukakangirirya sikolirwe erikolhaki? (b) Ni byalholirweko byahi ebyuwene ebya wabiribana omw’ikangania esyovidiyo esi?

¹⁴ Esyovidiyo. Omwa buthuku bwa Yesu, omubatsi iniakabya n’ebindu ebikayithaghisaya erikolesya akaghalha bisa. Aliwe lino, ababatsi banawithe n’ebyuma ng’emisumeni, emithwero, n’esyoranda ebikakolesaya amasenyerezi. Munabwire thukabya thukathulira, eryongera okwa bitabu, thuwithe esyovidiyo esyuwene esy’erikangania abandu. Esindi sy’okw’isyo sine omwa bya thukakolesaya: Busana Naki Kitholere Erigha e Biblia?, Erigha e Biblia Likabya Lithi?, Okwa Kingdom Hall Kukakolhawaki?, na Abema ba Yehova​—Ni Bahi? Esyovidiyo esikuhi-sikuhi syangana kanganibwa omwa dakika nyike okw’ibiri kandi sikakolha ndeke wukanabana omundu. Esyovidiyo enyiri-nyiri syangana kolesibwa okw’isubayo n’okw’abo abanawithe obuthuku. Esyovidiyo esi ni by’erikolesya ebyuwene kundi syanganahira omwa bandu mw’omuhwa w’erigha e Biblia n’eryasa okwa mihindano yethu.

15. Omundu erilebya enguma y’okwa syovidiyo syethu omwa mubughe wiwe kyanga muhambako kithi? Iha eky’erileberyako.

¹⁵ Ng’eky’erileberyako, mwali wethu mughuma mwabana omukali oyuwahuma e Micronesia oyukabugha omubughe we Yapese. Mwali wethu mwamukangania e vidiyo eya Busana Naki Kitholere Erigha e Biblia? omwa Yapese. Evidiyo yabere yikatsuka, omukali mwabugha athi: “Oyu ni mubughe waghe. Namasweka! Emibughire yiwe yikakanganaya ku ni w’okwa kitsinga kyethu. Akabugha omubughe waghe!” Enyuma waho, mwabugha athi akayasoma n’erilebya obuli kindu ekiri omwa mubughe wiwe okwa jw.org. (Thasyalebaya na Emibiri 2:8, 11.) Ekindi ky’erileberyako ky’ekya mwali wethu owe Amerika oyo omwisengesana wiwe ikere omwa kindi kihugho. Mwamuthumira elinki ey’evidiyo iyaneyo omwa mubughe wiwe. Mwalebya e vidiyo n’erithumira mwali wethu oyu y’emeseji eyikabugha yithi: “Mungatsemera akatsweka akakakanganaya omubi akabya iyukathabalha ekihugho. Mungasaba eryeghesibwa e Biblia.” Kutsibu-tsibu eki kikatsemesaya kundi ikire omwa kihugho ey’omubiiri wethu aghanirwe!

16. Soborera ekighendererwa ky’obuli brokyuwa: (a) Hulikirira Nyamuhanga Wanasyabyaho Kera na Kera. (b) Engulhu Yuwene Erilhua oku Nyamuhanga! (c) Ni Bahi Abakakolha Erisonda lya Yehova Munabwire?

¹⁶ Esyobrokyuwa. Thwanga kangirirya thuthi omundu ekwenene oyuthasi erisoma ndeke kutse oyuthawithe ekitabu kyosi-kyosi ekiseghemere okwa Biblia omwa mubughe wiwe? Ithwangana kolesya ebrokyuwa Hulikirira Nyamuhanga Wanasyabyaho Kera na Kera. * (Lebaya omwatsi ahikwa.) Eky’erikolesya ekyuwene kutsibu eritsukisya abigha be Biblia y’ebrokyuwa Engulhu Yuwene Erilhua oku Nyamuhanga! Iwangana kangania omundu y’amasomo 14 awali enyuma n’erimubulya nga ni ryahi eryo amatsemera kutsibu. Neryo mutsuke erigha omw’ikolesya erisomo eryo. Wune wathalengesya eki wukasubayo?  Ebrokyuwa eyakasathu omwa ebya thukakolesaya y’eya Ni Bahi Abakakolha Erisonda lya Yehova Munabwire? Yikolirwe erikangirirya abigha be Biblia ebihambire okwa kithunga kyethu. Eriminya ngoku wangakolesya ebrokyuwa eyi okwa buli mwigha we Biblia, lebaya Akatabu k’Omuhindano ak’Engebe Yethu ng’Abakristayo n’Omubiiri Wethu ak’Okwakasathu 2017.

17. (a) Obuli kitabu ky’erigha kiwithe ekighendererwaki? (b) Abosi abakabatizibawa batholere ibakolhaki, kandi busana naki?

¹⁷ Ebitabu. Enyuma w’eritsuka erigha n’omundu omw’ikolesya ebrokyuwa, okwa ndambi yosi-yosi wangana musubya omwa kitabu E Biblia Yanga Thukangiriryaki? Ekitabu eki kyangana wathikya abandu eriminya esyongangirirya sye Biblia esy’omusingyi. Omwigha amabya anemukulha-kulhana n’erighunza ekitabu ekyo, iwanganalholha embere erigha nayu ekitabu “Muyibike omo Lhwanzo Lhwa Nyamuhanga.” Eky’erikolesya eki kikendi kangirirya omwigha ngoku angakolesya emisingyi ye Biblia omwa ngebe yiwe. Wibuke, nibya n’enyuma w’eribatizibwa, omuhyaka atholere inialholha embere erigha ah’akendi ghunzira ebitabu byosi bibiri. Eki kikendi muwathikya eribya n’erikirirya erighumire omu Yehova n’erisighalha muthaleghulha okw’iyo.​—Soma Abanya Kolosai 2:6, 7.

18. (a) Timoteo w’erimbere 4:16 hakathuhira mw’omuhwa w’erikolhaki ithwe ng’abakangirirya b’ekwenene, kandi imukendi lhwiririraki? (b) Ekighendererwa kyethu ky’erikolesya Ebya Thukakolesaya Thukakangirirya ni kyahi?

¹⁸ Ithwe Bema ba Yehova, thuwithe olhukwamirwa lhw’erikangirirya abandu “ebinywe by’ekwenene by’engulhu yuwene” ebyangana bakolya okwa ngebe y’erikotha. (Abanya Kolosai 1:5; soma 1 Timoteo 4:16.) Erithuwathikya erikolha eki, thuwithe Ebya Thukakolesaya Thukakangirirya omuli ebyosi ebyo thukayithagha. (Lebaya akasanduko “ Ebya Thukakolesaya Thukakangirirya.”) Thubikolesaye ngoku thwanga thoka. Obuli mughuma w’okw’ithwe angana sombolha eky’erikolesya kandi mughulhu wahi. Aliwe wibuke, ekighendererwa kyethu siry’erikwama kya ghaba ebitabu, kandi sithuliha ebitabu okwa bandu abathanzire omwatsi wethu. Ekighendererwa kyethu ly’erigha n’abandu abatsomene, abayikehirye, abanzire eriminya Nyamuhanga, abandu abali “n’amalengekania awatholere busana n’engebe y’erikotha.”​—Emibiri 13:48; Matayo 28:19, 20.