OYUKALEBAYA emibere y’obuthuku anemulebya ebikakanganibawa okwa kuma kiwe. Inialhangira ekiyagha kinene ekikasyatsandaya obulhambu obuli mw’abandu banene. Kundi atsomene esyongebe sy’abandu, akakolha ekyosi-kyosi eribabwira kithe kyabya.

Na Yehova anemubwira abandu okwa “kanyabungu” akakalire kutsibu kwilhaba ekindi kindu kyosi-kyosi ekikalire ekya bangowa omwa ripoti eyihambire okwa by’obuthuku. Ekyo anemukikolha athi? Kandi thukaminya thuthi ngoku abiriha abandu b’obuthuku obukaghunza? Eribana eby’erisubirya, thutsuke erilebya okw’ikunga erya Yehova aha omwa buthuku bwakera.

Omwa Biblia, Yehova iniakakanaya okw’iletha “akanyabungu,” kutse eritswera, okwa bandu abakaghana erikwama ebihano biwe omw’ikighenderera. (Emi. 10:25; Yer. 30:23) Iniakasangwa akunga abandu n’eribabwira athi bakole esyombinduka erikwamana n’erisonda liwe. (2 Bam. 17:12-15; Neh. 9:29, 30) Eribawathikya erikolha esyombinduka, mughulhu mungyi iniakakolesaya abaghombe biwe abathaleghulha abali okwa kihugho erithulha eritswera liwe n’eriwathikya abandu eriminya ngoku kikayithaghisibawa erikolhwa omwa byalhuba.​—Amo 3:7.

Noa ni mughuma w’okwa baghombe abo. Habw’emyaka mingyi, buthubaha mwabwira abandu babi kandi abithi ab’omwa buthuku bwiwe okw’Ighunga ly’Amaghetse eryabya irikayabya omwa kihugho kyosi. (Enz. 6:9-13, 17) Kandi mwababwira ekya batholere ibakolha ibo erilhama​—ekyaleka enyuma waho iniahulhwamo “omuthuli w’erithunganene.”​—2 Pet. 2:5.

Nomwakine indi Noa mwahiraho akaghalha, abandu abo mubagheghena omwatsi ogho Nyamuhanga amuha. Mubathakangania erikirirya. Busana n’ekyo mubaholha omughulhu Erighunga ly’Amaghetse ‘lyasa n’erithwalha abosi.’ (Mt. 24:39; Ebr. 11:7) Enduli yabu yabere yinemuseghera hakuhi, mubabya isibangayihambulya bathi Nyamuhanga mwathabakunga.

Ihakanayira, Yehova iniakunga abandu “akanyabungu” k’eritswera liwe ikakisiya ikatsuka. Nomwabine, iniakalhangira athi abahambirweko bakahebawa obuthuku obukaghunza eriyira eky’erikolha. Ng’eky’erileberyako, mwasangwa abwira Abanya Misiri okwa Bihunzo Ikumi. Ng’okwa kihunzo ky’omusanju, Yehova mwathuma Musa na Haruni eribwira Farao n’abaghombe biwe okwa mbulha y’amathwa. Kundi kyabya ini ky’eribya ekiro ekikakwamako, mbwino Nyamuhanga mwanabaha obuthuku obukaghunza eribana ah’eribisama? E Biblia yithi: “N’oyowabya akubaha ekinywe ky’Omwami Mukulhu omwa kathi-kathi k’abaghombe ba Farao mwasaghirya abaghombe biwe n’esyonyama siwe omwa manyumba. N’oyuwabya athekenga ekinywe ky’Omwami Mukulhu mwasigha abaghombe biwe n’esyonyama siwe omwa lhulisiryo.” (Eri. 9:18-21) Thukalhangira, Yehova imwatsuka eriha erikunga erikaghunza, neryo oyuwowa mwalhama okwa kihunzo ekyo.

Farao n’abaghombe biwe nabu mubatsuka eribwirwa okwa kihunzo ky’erikumi. Aliwe busana n’obukiru mubathowa. (Eri. 4:22, 23) Busana n’ekyo, ehimbere hyabu muhyaholha. Ekyo kyabya ky’obulighe bunene! (Eri. 11:4-10; 12:29) Mbwino banganabanire obuthuku bw’erighendera okw’ikunga eryo? Ee! Musa mwalhuaho iniamanyisya Abaisraeli okwa kihunzo ky’erikumi n’eribabwira eky’erikolha erilhamya amaka wabu. (Eri. 12:21-28) Ni bandu bangahi abaghendera okwa binywe bya Musa? Abandu hakuhi miliyoni isathu, imwamuli Abaisraeli n’endeko nene ‘ey’abathulhungana  mubo’ ey’abathe Baisraeli n’Abanya Misiri, mubalhama okw’itswera lya Yehova n’erilhua e Misiri.​—Eri. 12:38.

Erikwamana n’eby’erileberyako ebi, Yehova iniakalhangira athi abandu bakahebawa obuthuku obukaghunza erighendera okw’ikunga liwe. (Ebi. 32:4) Nyamuhanga iniakakolha athya busana naki? Omukwenda Petero mwabugha athi Yehova “syanzire omundu n’omughuma akahera nikwa anzire abandu bosi ibabindulha emithima yabu n’erileka ebibi.” (2 Pet. 3:9) Nyamuhanga mwatsomana abandu. Abya anzire ibabindulha emithima yabu n’erighendera okw’ihabulha, eritswera liwe lithe lyahika.​—Isa. 48:17, 18; Abar. 2:4.

Namunabwire, abandu bosi batholere ibaghendera okw’ikunga likulhu erinemubya omwa kihugho kyosi. Yesu iniane okwa kihugho, mwabugha athi omughulhu mubi ono akendi syathoghothibwa okwa “bulighe bunene.” (Mt. 24:21) Erikwamana n’eritswera ly’obuthuku obukasa eryo, mwaha obuminyereri obukakanaya okwa ebyo abamukwamire bangalhangire n’erilhabamo obuthuku obo bukayahika. Neryo Yesu mwahulha ebindu bikulhu ebya thunemulhangira munabwire bikabya omwa kihugho kyosi.​—Mt. 24:3-12; Lk. 21:10-13.

Erikwamana n’obuminyereri obo, Yehova anemubwira obuli mundu erighondera obuthabali bwiwe bw’olhwanzo. Anzire abowa ibabana engebe eyuwene lino n’emighisa y’obuthuku obukasa omwa kihugho kiwe kihya-kihya ekithunganene. (2 Pet. 3:13) Yehova erighumya erikirirya lyethu omwa milhaghe yiwe, abirithuha omwatsi owakalhamaya esyongebe​—“engulhu yuwene y’Obwami,” eya Yesu abugha athi “yasyatsuka erithulhughanibwa omwa kihugho kyosi busana n’eriminyisya ebihanda byosi.” (Mt. 24:14) Nyamuhanga abiritheghekania abaramya biwe ab’okwenene “eriminyisya,” kutse erithulha omwatsi wa Nyamuhanga omwa bihugho nga 240. Yehova anzire abandu bangyi ibaghendera okw’ikunga liwe n’erilhama okwa kiro ky’eriherya eky’eritswera liwe erithunganene.​—Zef. 1:14, 15; 2:2, 3.

Neryo kwesi, ekikulhu si ry’eriyibulya Yehova ng’akanaha abandu obuthuku obukaghunza athali atswera. Kundi ebyo thwamabirilhangira bikakanganaya ngoku akabahabo. Omwakanya k’ekyo, thutholere ithwayibulya: Abandu bane mwendi ghendera okw’ikunga lya Nyamuhanga obuthuku buthe bwahwayo? Ithwe ng’abathuli b’omwatsi wa Nyamuhanga thulhole embere eriwathikya abandu bangyi ngoku thwanga thoka nuku balhame okwa nduli y’omughulhu ono.