1. Busana naki thutholere ithwaramya Yehova musa?

THUTHOLERE ithwaramya Yehova musa kundi ya Muhangiki wethu kandi yuwathuha engebe. (Erib. 4:11) Aliwe, hane ekitsibu. Nomwakine indi thwanzire Yehova kandi thumusikirye, hanganabya ebikathulemesaya erimuha eriramya erimutholere. Thutholere ithwaminya ekyo nga kyangasa kithi. Eritsuka, thulebaye eriramya Yehova musa nga muliki.

2. Ngoku kiri omu Eriluayo 34:14, ni kyahi ekya thukendi kolha eriramya Yehova musa?

² Omwa Biblia, eriyihayo oku Nyamuhanga kikamanyisaya erimwanza kutsibu. Thwamayihayo oku Yehova musa, thukamuramaya iyo musa. Sithwanga lighira omundu wosi-wosi kutse ekindu kyosi-kyosi eribya omwa mwanya wiwe.​—Soma Eriluayo 34:14.

3. Busana naki sithuli ramaya Yehova kitura-muthwe?

³ Sithuli ramaya Yehova kitura-muthwe. Busana naki? Eriramya lyethu liseghemere okwa bya thwabirimwighako. Thwabiryanza emibere yiwe mibuyanga. Thunasi kandi thukaligha ebyo anzire n’ebyo aponire. Thukayitheghereraya n’erisighika ekighendererwa kiwe busana n’abandu. Thukayowa ini lhusunzo eribya iniakathulighira eribya banywani biwe. (Esy. 25:14) Ebyosi ebya thuk’igha okwa Muhangiki wethu bikaleka ithwayithunda hakuhi nayu.​—Yak. 4:8.

4. (a) Ni kyahi ekya Diabolo akakolesaya eritsekya olhwanzo olhwa thuwithire Yehova? (b) Omo mwatsi ono thukendi kania okuki?

 ⁴ Diabolo yukasondolha ekihugho kino, kandi akakikolesaya eryohya esyongumbu syethu sy’obuhangiranwa. (Efe. 2:1-3; 1 Yn. 5:19) Anzire ithwanza n’ebindi bindu nuku sithwanze Yehova musa. Thukendi lebya ebindu bibiri ngoku angakolha eki. Eky’erimbere, akalengesaya erithuhira mw’omuthima w’erianza esyosente, n’ekyakabiri, akalengesaya erithuhira mw’omuthima w’erisombolha eby’eriyitsemesya ebithuwene.

5. Busana naki thutholere ithwayitheya okw’anza esyosente?

⁵ Ni ky’obuhangiranwa erianza eribana eby’erirya ebikaghunza, esyongyimba esitholere, n’ah’eryikalha ahuwene. Aliwe, thutholere ithwayitheya okw’anza esyosente. Abandu bangyi munabwire, banzire esyosente “n’erianza ebindu.” (2 Tim. 3:2) Yesu abya inianasi ngoku abamukwamire banganasa mw’olhwanzo olhu. Mwabugha athi: “Sihali omundu oyuwanga kolera abakama babiri; kusangwa asyakwa omughuma y’obusu, n’erianza owundi. Kutse asyabeghera oko mughuma, iniapona owundi. Simwanga thoka erikolera Nyamuhanga n’ebindu.” (Mt. 6:24) Oyukaramaya Yehova aliwe kandi inianemukolesya obuthuku bunene n’akaghalha omw’isondya obugaga bw’ekihugho kino, akabya ng’oyukakolera abakama babiri. Iniakendibya isyatharamya Yehova musa.

6. Ebinywe ebya Yesu abwira ekithunga kye Laodikia bikathweghesayaki?

⁶ Okw’ihwererera ly’ekighonye ky’erimbere E.K., ab’omwa kithunga kye Laodikia mubayihalhamba bathi: “Nyiwithe ebindu, nabiribya mutheke, sihali ekyo ngabulha.” Aliwe embere sya Yehova na Yesu, babya ‘bahanya,  ab’obulighe, abera, ndimethime, na ndumbu.’ Yesu mwabakunga isi busana n’eribya bagaga, aliwe kundi olhwanzo olhwa babya bawithire ebindu lhwabya ilhulikutsandya obughuma bwabu na Yehova. (Erib. 3:14-17) Thwamalhangira erisondekania ebindu iririmwasa omwa muthima wethu, thutholere ithwakolha omwa byalhuba erihengulha amalengekania wethu. (1 Tim. 6:7, 8) Thwamathendi kolha ekyo, ithukendi tsuka erianza ebindu, na Yehova isyendi ligha eriramya lyethu. Ni “Nyamuhanga w’obuha.” (Ebi. 4:24) Thwanga lemwa thuthi eribya n’amalengekania awatholere okwa syosente?

7-9. Thuk’ighaki okwa kyalholirweko ky’omusyakulhu ya David?

⁷ Thulebaye eky’erileberyako kya David, omusyakulhu w’ekithunga omuyikambi e Amerika. Akayikanayako ng’oyuwabya akakolha kutsibu okwa mubiiri. Ekampuni eyo abya akakoleramu muyamuha omubiiri owuwene n’erimwongera omusara kandi mwaminywa ng’oyuwasi ndeke omubiiri oyo omwa kihugho kyabu. David akabugha athi: “Okwa buthuku obo, munalengekania indi eyi ni mighisa ya Yehova.” Mbwino kwenene yabya mighisa ya Yehova?

⁸ David mwalhangira omubiiri wiwe inialimuhamba okwa bughuma bwiwe na Yehova. Akabugha athi: “Okwa mihindano nibya n’omw’ithulira, iningabya inganemulengekania okwa bitsibu by’okwa mubiiri. Iningakolha esyosente nene, aliwe ebitunturo ini binene, kandi obutheke bwaghe mubwatsuka eribya mw’ebitsibu.”

⁹ David mwalhangira iniatholere erilebya ebilhubirirwa biwe. Akabugha athi: “Inganasikire munathwamu erihindulha emibere eyo ngalimo.” David mwanza erihindulha endegheka yiwe y’omubiiri, neryo mwabwira oyumuhere  omubiiri. Mubyaghenda bithi? David mwalhusibwa okwa mubiiri! Mwakolhaki? Akabugha athi: “Ekiro ekyakwamako, munasaba erikolha ng’omutemburi omuwathikya okuthe eryimana.” Erithoka eribana ebiyithawa byabu, David na mukali wiwe mubatsuka erikolha omubiiri w’eriyonza amanyumba. Enyuma w’obuthuku buke, mwatsuka erikolha ng’omutemburi w’omughulhu wosi, na mukali wiwe mwamuyiyungako. Abathahenie aba mubathwamu erikolha omubiiri ogho abandi bakalhangiramo w’ahisi, aliwe omubiiri ogho bakakolha sikya kindu kikulhu embere syabu. Nomwakine indi emingirirye yabu yabirikeha kutsibu, obuli kwezi bakabya ibabiribana esyanga bawathikya okwa biyithawa byabu. Banzire erihira Yehova y’embere, kandi babiriyilhangirira ngoku akatsomana abakahira Obwami bw’embere.​—Mt. 6:31-33.

10. Thwanga theya thuthi omuthima wethu?

¹⁰ Mbulha thuwithe bike kutse bingyi kinyamubiri, thutholere ithwatheya omuthima wethu. Thuthi? Isiwabya mw’omuthima w’erianza ebindu. Kandi isiwalighira omubiiri wawu akabya embere okwa mubiiri wa Yehova. Wangaminya wuthi eki ku kinemukubyako? Iwangana yibulya bino: ‘Nganabera erilengekania okwa mubiiri waghe w’ekihugho ingane okwa mihindano kutse omw’ithulira? Nganabulha nga nganemwendisyabya ingane n’esyosente esikaghunza obuthuku obukasa? Mbwino esyosente n’ebindu binemuletha ebitsibu omwa butheke bwaghe? Nangana kolha omubiiri ogho abandi bakalhangiramo w’ahisi amabya iniangananyiha obuthuku bw’erikolha bingyi omwa mubiiri wa Yehova?’ (1 Tim. 6:9-12) Thukalengekania okwa bibulyo ebi, ambi ithwibuka ngoku Yehova abirilhagha abakayihayo okw’iyo athi: “Sinendisyakuleka na kera, kandi, sinendisyakusighania n’ahake.” Ky’ekyaleka omukwenda Paulo iniahandika athi: “Simukwamirire erianza esyofranka.”​—Ebr. 13:5, 6.

11. Eby’eriyitsemesya byangahamba bithi okwa mundu?

¹¹ Yehova anzire ithwatsemera engebe, kandi eby’eriyitsemesya byangana leka ithwakolha ekyo. Nibya, Ekinywe kya Nyamuhanga kikabugha kithi “busana n’omundu sihali ekibuya ekilhabire erirya n’eripulya, n’eriyibwira athi omubiiri wiwe ni mubuya.” (Omu. 2:24) Aliwe, eby’eriyitsemesya bingyi ebiri omwa kihugho byangana thuhambako nabi. Bikatsandaya esyongeso sy’abandu, ibyahira omwa bandu mw’omuhwa w’eriligha ​—kutse nibya erianza​—ebyo Ekinywe kya Nyamuhanga kikaghana.

12. Ngoku kiri omu 1 Abanya Korinto 10:21, 22, busana naki thutholere ithwasombolha ndeke eby’eriyitsemesya?

¹² Thwanzire ithwaramya Yehova musa, neryo sithwanga thoka erirya “eby’emeza y’Omukama, n’eby’emeza y’esyombinga.” (Soma 1 Abanya Korinto 10:21, 22.) Erirya n’omundu kikakanganaya ku muli banywani. Thwamasombolha eby’eriyitsemesya ebikakulha-kulhanaya eby’amalhwa, eby’obukumu, eby’obutswatswa, kutse esindi ngumbu n’amalengekania w’omubiri, aho thukabya ithuli okw’irya ebyalya ebiryatheghekawa n’esyonzighu sya Nyamuhanga. Neryo, thukabya ithuli okw’iyitsandya n’eritsandya obughuma bwethu na Yehova.

13-14. Ngoku kiri omu Yakobo 1:14, 15, busana naki thutholere ithwalebya ndeke eriyitsemesya erya thukasombolha? Iha eky’erileberyako.

¹³ Thulebaye esyonzira ndebe esikakanganaya ngoku eriyitsemesya liri ng’ebyalya byonyine-nyine. Thukabya thukalya, n’ithwe thukathwamu ebya thukendi hira omwa buno. Aliwe thwamabiribimera, omubiri akabikolhako n’ekirisya ekiri mubyo ikyaghenda omwa mubiri wethu. Ebyalya ebyuwene bikaleka omubiri iniuwana; ebyalya ebithuwene bikatsandayagho. Siwangalhangira ebikalhwiririramo aho naho, aliwe endambi yikahika ibyalhangirika.

¹⁴ Kuthya, thukabya thukasombolha eby’eriyitsemesya thukabya ithwangana thwamu ebya thwanga hira omwa malengekania wethu. Neryo endambi yikahika, eriyitsemesya eryo iryahamba okwa malengekania n’omuthima wethu. Eriyitsemesya eryuwene lyangana thughasira; erithuwene iryathutsandya. (Soma Yakobo 1:14, 15.) Ebikalhwiririra omw’iyitsemesya erithuwene byangana ghana erilhangirika aho naho, aliwe endambi yikahika ibyalhangirika. Ky’ekikaleka e Biblia iyathukunga yithi: “Simuyithebaye, Nyamuhanga syalisekereribawa, kusangwa ekyo mundu akahera kyo anemwendi syahulhulha. Kusangwa oyukabiba oko syongumbu siwe sy’omubiri wiwe, asyahulhulha erihonda.” (Gal. 6:7, 8) Kwesi ni kikulhu erighana eby’eriyitsemesya ebyosi ebikakulha-kulhanaya ebya Yehova aponire!​—Esy. 97:10.

15. Ni kihembo kyahi ekya Yehova abirithuha?

¹⁵ Abandu ba Yehova bangyi bakatsemera erilebya e JW Tivi^®, e tivi yethu eyiri okwa Intaneti okuli emyatsi eyuwene. Mwali wethu oyukahulhawamo Marilyn mwabugha athi: “E JW Tivi yabirinyiwathikya eryongera eribya n’amalengekania awatholere, kandi sikuli emyatsi eyitsandire. Omughulhu ngali omwa mbwera kutse omwa bitunturo, ngabanako omukania owakahimba kutse endegheka y’Eriramya ly’Eka ey’erilebya. Ekyo kikaleka ingayowa ingali bughuma na Yehova n’ekithunga kiwe. E JW Tivi yabirihindulha engebe yaghe ya kutsibu.” Nawu wunemughasirwa omwa kihembo ekikalhua oku Yehova eki? Eryongera okwa ndegheka y’obuli kwezi, okwa JW Tivi kukabya ikune emyatsi y’erihulikirira, esyovidiyo, n’esyonyimbo esikahumulikanaya esyo wangana hulikirira okwa ndambi yosi-yosi.

16-17. Thwanga kolhaki erikolesya obuthuku obutholere omwa by’eriyitsemesya kandi thwanga kikolha thuthi?

¹⁶ Thutholere ithwalebya ndeke nga ni byahi ebya thukayitsemesayamo kandi nga ni buthuku bungahi obo thukaghunza. Thwamathendi kolha eki, ithukendi kolesya buthuku bunene omw’iyitsemesya kwilhaba obwathukaghunza omwa mubiiri wa Yehova. Abangyi kikabakalira erihiraho olhubibi okwa buthuku obo bakaghunza omw’iyitsemesya. Mwali  wethu ow’emyaka 18 ya Abigail akabugha athi: “Erilebya e TV likaleka ingalhuhuka. Aliwe namathendi yitheya, inangana ghunza buthuku bunene okwa tivi.” Mughalha wethu omulere ya Samuel akabugha athi: “Nganayisanga inganemulebya obuvidiyo bungyi bukuhi-bukuhi okwa Intaneti. Ngatsuka erilebya kaghuma, ingayisanga ingamabirighunza saha ng’isathu kutse ini.”

¹⁷ Wanga kolhaki erikolesya obuthuku obutholere omwa by’eriyitsemesya? Eky’erimbere ly’erilebya nga ni buthuku bungahi obo wukaghunza omwa by’eriyitsemesya. Busana naki iwuthayilebya habw’ewiki? Handika okwa kalenda yawu obuthuku obo wukaghunza okwa tivi, okwa Intaneti, n’erisatha emisathu y’okwa simu yawu. Wamayowa iwukaghunza buthuku bunene, yikolere endegheka. Thegheka eritsuka erikolha eby’omughaso munene, wanahiraho obuthuku bw’eriyitsemesyamu. Neryo, saba Yehova akuwathikaye wughenda-ghendanaye n’endegheka yawu. Aho iwukendi bana endambi n’akaghalha ebya wukayithagha busana n’eriyeghesya, eriramya ly’eka, emihindano, n’erikolera Yehova omw’ithulira n’erikangirirya. Kandi aho isiwendi thasyayowa nabi busana n’obuthuku obo wukakolesaya omwa by’eriyitsemesya.

18-19. Thwanga kangania thuthi ku thukaramaya Yehova musa?

¹⁸ Omukwenda Petero abere abirihandika okw’ihwaho ly’ekihugho kya Sitani n’okw’asa ly’ekihugho kihya-kihya, mwabugha athi: “Neryo abanze, kundi mukalindirira emyatsi eyi, muyitsinge eribanika embere sya Nyamuhanga ng’abandu babuya butsira bithingo, imw’ikere nayu buholho.” (2 Pet. 3:14) Thukabya thwamaghendera okw’ihano eryo n’erilengaho erisighalha ithunahenirye omwa by’esyongeso n’eby’obunyakirimu, thukakanganaya ku thukaramaya Yehova musa.

¹⁹ Sitani n’ekihugho kiwe bakendi lholha embere erianza thuhindule amalengekania wethu. (Lk. 4:13) Aliwe, nomuthwangabana ebitsibu ebiri bithi, sithwendi lighira mundu wosi-wosi kutse kindu kyosi-kyosi eribya omwa mwanya wa Yehova. Thwabirithwamu eriha Yehova ebimutholere iyuwene​—erimuramya iyo musa!