1-2. (a) Abathabali bakisiya ibarangirira bathiki? (b) Ni bibulyo byahi ebikayithagha eby’erisubirya?

THALENGEKANIA abathabali b’ekihugho ibamabiriranga “obuholho n’eriyisyandira,” ekindu ekyabirilindirirwa habw’omughulhu muuli. Bangana yihalhamba bathi ekihugho kyamabiribya mw’obuholho. Abathabali b’ekihugho bakendisyanza thulengekanaye thuthi bangana thoka erighunzaho ebitsibu by’abandu. Aliwe bakendi syabya isibawithe obuthoki bw’eryimania ebikakwamako! Busana naki? Erikwamana n’obuminyereri bwe Biblia, “neryo-neryo erithoghotha lyasyithabo! Nabo sibendi syabalha nahake.”​—1 Tes. 5:3.

² Hane ebibulyo bikulhu ebikayithagha eby’erisubirya: Ni byahi ebikendisyabya omwa “bulighe bunene”? Yehova akendisyanza thukoleki okwa buthuku obo? Kandi thwanga yithegheka thuthi lino erisighalha ithune bathaleghulha omwa buthuku bw’obulighe bunene?​—Mt. 24:21.

3. Erikwamana na Eribisulirwa 17:5, 15-18, Nyamuhanga akendi syathoghothya athi e “Babeli Mukulhu”?

³ Soma Eribisulirwa 17:5, 15-18. “Babeli Mukulhu” akendi thoghothibwa! Ngoku thunalyalhangira, abathabali bakendi syabya isibawithe obuthoki okwa bikendi syabya okwa buthuku obo. Busana naki? Kundi ‘Nyamuhanga [akendi] syahira  omwa mithima yabu erisonda erikolha eriyisunza liwe.’ Eriyisunza eryo ni ryahi? Erihwerekererya amadini wosi w’amabehi, imwamuli n’Ekristendomu. * Nyamuhanga akendi syahira eriyisunza liwe omwa mithima y’amahembe ikumi aw’enyama. Amahembe ikumi akimanira amathabali wosi w’ekipolitiki awakasighika “enyama”​—Obughuma bw’Ebihanda (UN). (Erib. 17:3, 11-13; 18:8) Amathabali ayo akendi syabya akabambira amadini w’amabehi, ekyo kikendi syakangania ngoku obulighe bunene bwamatsuka. Kikendi syabya kindu ekik’ubahisaya ekikendi syahamba okwa buli mundu.

4. (a) Ni nzumwa syahi esyo abathabali bangana syaha bakabambira amadini w’amabehi? (b) Abandu ababya omwa madini ayo bangana syakolhaki?

⁴ Sithwasi abathabali nga bakendi syaha nzumwa syahi sy’eribambira Babeli Mukulhu. Bangana syabugha bathi amadini w’akaleka ihathabya obuholho kandi bathi akabera eriyingirya omwa by’epolitiki. Kutse bangana syabugha bathi amadini ayo abirigaga kutsibu kandi awithe ebindu. (Erib. 18:3, 7) Kikalhangirika ngoku si ba bosi abali omwa madini w’amabehi indi bakendi syathoghothibwa omw’ibambirwa eri. Aliwe, kikalhangirika ngoku abathabali bakendisyaghunzaho amadini. Amadini ayo akendi syabya abirilhusibwaho, abalhue mugho bakendi syalhangira ngoku abasondoli b’amadini balhue bakabatheba kandi obundi bakendi syanza eribayithwako.

5. Yehova abirilhagha athiki busana n’obulighe bunene, kandi busana naki?

⁵ E Biblia siyirikanganaya erithoghothibwa lye Babeli Mukulhu nga likendi syaghunza buthuku bungahi, aliwe ekya thwasi bunemwendi syabya buthuku buke. (Erib. 18:10, 21) Yehova abirilhagha ‘erikuhihya ebiro’ eby’obulighe bunene nuku “abayisoghawa biwe” n’edini y’okwenene balhame. (Mk. 13:19, 20) Aliwe Yehova anzire ithwasyakolhaki obulighe bunene bukatsuka n’erihika okwa lhuhi lhwe Harmagedoni?

6. Busana naki sikiri ghunza erithalhua omwa madini w’amabehi?

⁶ Ngoku kine omwa mwatsi w’ahanyuma, Yehova anzire abaramya biwe ibalhua omwa Babeli Mukulhu. Aliwe eki sikiri subulira okw’ilhua omwa madini w’amabehi. Thutholere ithwathwamu erisighika edini y’okwenene​—eriramya lya Yehova ery’okwenene. Thulebaye esyonzira ibiri esy’erikolera mw’ekyo.

7. (a) Thwanga sighalha thuthi ithunamakirire ebihano bya Yehova ebithunganene eby’esyongeso? (b) Abaebrania 10:24, 25 hakahira hathi omuwatho okw’ihindana lyethu haghuma, kwilhabirirya lino?

⁷ Ey’erimbere, thutholere ithwamakirira ebihano bya Yehova ebithunganene eby’esyongeso. Sithutholere thukaligha emitse mibi y’ekihugho. Ng’eky’erileberyako, sithulilighira obusingiri bwosi-bwosi, imwamuli abandu b’olhubutho lhughuma erithahania n’eyindi mitse yabo. (Mt. 19:4, 5; Abar. 1:26, 27) Eyakabiri, thutholere ithwalholha embere eriramya haghuma n’abalikyethu. Thukakolha eki ahosi-hosi aho thwangabya, mbulha okwa Kisenge ky’Obwami kutse, kyamayithaghisibwa omwa nyumba y’omundu, kutse omwa bubiso-biso. Nomubyangabya bithi, sithwangaleka omubere wethu w’erihindana haghuma omw’iramya. Omo kwenene, thutholere ithwahindana haghuma ‘n’eriyitsinga omw’ekyo thukalhangira ekiro ky’Omukama kikaseghera hakuhi.’​—Soma Abaebrania 10:24, 25.

8. Omwatsi wethu angana syahinduka athi omwa buthuku bw’embere?

⁸ Omwa buthuku bw’obulighe bunene, omwatsi owathukathulhughanaya anganasyahinduka. Lino, thukathulhughanaya engulhu yuwene y’Obwami n’erilengaho eriyira abigha. Aliwe okwa buthuku obo, thwangana syathulhughania omwatsi w’amathwa amanene-manene. (Erib. 16:21) Thwangana syathulhughania ngoku ekihugho kya Sitani kikayathoghothibawa. Endambi yikendi syahika ithwaminya omwatsi ogho thukendisyathulha nga w’owahi, kandi nga thukendi syathulhughaniagho thuthi. Mbwino thukendi syakolesya emibere eyathwamabirikolesya ahabw’emyaka eyilhabire oku kikumi eriberererya omubiiri wethu w’erithulira? Kutse thukendi syakolesya esindi nzira? Sithwasi. Mbulha thukendi syakikolha thuthi, kikalhangirika thukendi syathunga olhusunzo lhw’erithulhughania omwatsi wa Yehova ow’eritswera!​—Eze. 2:3-5.

9. Abathabali bangana syakolhaki, aliwe ni yikethera lyahi erya thuwithe?

⁹ Omwatsi wethu angana syaleka abathabali ibanza eryimania omubiiri wethu. Ngoku lino thunayikethere Yehova erithuwathikya omw’ithulira, n’obuthuku obo thukendi syayithagha obuwathikya bwiwe. Thwangana yikethera ngoku Nyamuhanga wethu akendi syathuha amaaka w’eriberererya erisonda liwe.​—Mika 3:8.

10. Ngoku kiri omu Luka 21:25-28, abandu bangyi bakendisyayithwa bathi omwa buthuku bw’obulighe bunene?

¹⁰ Soma Luka 21:25-28. Okwa bulighe bunene, abandu bakendi syakukubalha bakalhangira ebindu ebyo balhue bayikethere bikahwaho. Bakendi ‘syasisikana’ n’eryubaha bathi bakayakwa bakingira omwa buthuku obukalire aho abandu bakathaberaho. (Zef. 1:14, 15) Okwa buthuku obo, engebe yangana syakalha kutsibu nibya n’okwa bandu ba Yehova. Kundi si thuli b’ekihugho, thwangana syabana ebitsibu birebe. Thwangana syabulha ebindi biyithawa.

11. (a) Ni kyahi ekikendi syaleka abathabali ibabindukira Abema ba Yehova? (b) Busana naki sithutholere thuk’ubaha obulighe bunene?

 ¹¹ Endambi yikendi syahika, abandu abalhue omwa madini awalyathoghothibawa ibahithana bakalhangira Abema ba Yehova ibakina lholha embere eriramya. Ahathe erithika-thika, ekyo kikendi syaletha olhukanda lhunene, nibya n’okwa mithahulha y’erikanirania. Abathabali n’omuthabali wabu, Sitani, bakendi syathupona eribya edini yethu nyisa iy’eyamalhama. Bakendi syabya isibathaberererya ekilhubirirwa kyabu eky’erighunzaho amadini wosi okwa kihugho. Neryo bakendi syathubindukira. Okwa buthuku obo, ebihanda bikendisyabya ibyamabya Gogi owe Magogi. * Bikendi syayiboha haghuma eribambira abandu ba Yehova n’amaaka wabyo wosi. (Eze. 38:2, 14-16) Kyangan’itha obuba erilengekania okwa byosi ebi kundi sithwasi nga bikendisyabya bithi. Aliwe, ekya thwasi: Sithutholere thuk’ubaha obulighe bunene. Yehova akendi syathuha obusondoli bw’erilhamya esyongebe syethu. (Esy. 34:19) Thukendi syathoka ‘erihangana, n’erisumba emithwe [yethu]’ kundi thukendi syaminya ngoku “erithongolibwa [lyethu] likahika hakuhi.” *

12. “Omughombe oyuthereghulha n’ow’amenge” anemuthuthegheka athi busana n’ebikayabya omwa buthuku bw’embere?

¹² “Omughombe oyuthereghulha n’ow’amenge” anemuthuthegheka erisyabya ithune bathaleghulha omwa bulighe bunene. (Mt. 24:45) Eki kyabirikolhwa omwa nzira nene, aliwe thalebya eky’erileberyako kighuma: esyondegheka sy’olhuhindano lhwethu esy’emyaka eya 2016-2018. Emihindano eyo muyathuwathikirye erighumya emibere eya thukayithagha thunemuseghera hakuhi n’ekiro kya Yehova. Omwa bikuhi thuthakania okwa mibere eyo.

13. Thwanga ghumya thuthi obuthaleghulha bwethu oku Yehova, kandi busana naki thutholere ithwakikolha lino?

¹³ Obuthaleghulha: Omuthwe w’olhuhindano lhw’erijoni olhwa 2016 abya “Sighalha Muthaleghulha oku Yehova!” Olhuhindano olhu mulhwathweghesya ngoku thwamabya n’obughuma obughumire na Yehova, ithukendibya bathaleghulha okw’iyo. Muthw’ibukibwa ngoku thwangana yithunda hakuhi na Yehova omw’isaba erilhua okwa muthima n’eriyeghesya ndeke Ekinywe kiwe. Erikolha eki likaleka ithwabana akaghalha ak’erirwanisya nibya n’ebitsibu ebikalire. Enduli y’omughulhu wa Sitani yinemuseghera hakuhi, obuthaleghulha bwethu oku Yehova n’Obwami bwiwe bwangana lengwako kutsibu. Obundi abandu bakendi lholha embere erithusiningulira. (2 Pet. 3:3, 4) Kutsibu-kutsibu eki kyanganabya kundi sithulibya na lhuhandi. Thutholere ithwaghumya obuthaleghulha bwethu lino nuku thwanga syabya bathaleghulha n’omwa bulighe bunene.

14. (a) Ni mbinduka yahi eyikendi syabya okwa baghalha bethu abali okwa kihugho abakasondolha? (b) Busana naki okwa buthuku obo thukendi syayithagha eribya bathaleghulha?

¹⁴ Omwa buthuku bw’obulighe bunene, hakendisyabya embinduka okwa baghalha bethu abali okwa kihugho abakasondolha. Okwa buthuku bulebe, abahakabibwa abosi abakine okwa kihugho bakendi syahindanibwa  elhubulha erisangira omwa lhuhi lhwe Harmagedoni. (Mt. 24:31; Erib. 2:26, 27) Eki kikamanyisaya kithi Akathunga Akakasondolha sikendi sasyabya nethu okwa kihugho. Nomwabine, endeko nene yikendisyabya iyine omwa buyithondeke. Baghalha bethu abatholere abali omwa sindi mbuli bakendi syasondolha. Thukendi syakangania obuthaleghulha bwethu oku Yehova omw’isighika baghalha bethu aba n’omw’ighendera okwa busondoli bwabu obwa Yehova akabaha. Ithwe erilhama thutholere ithwaghendera okwa busondoli bwabu!

15. Thwanga ghumya thuthi eriyiyinia lyethu, kandi busana naki ni kikulhu erikolha ekyo lino?

¹⁵ Eriyiyinia: Omuthwe w’olhuhindano olhwa 2017 abya “Siwulhuhirire!” Olhuhindano olhu mulhwathuwathikya erighumya amaaka wethu w’erighumira ebitsibu. Muthwaminya ngoku eriyiyinia lyethu siriseghemere okw’ibya omwa mibere eyuwene. Thwangana ghumya eriyiyinia lyethu omw’iyikethera Yehova. (Abar. 12:12) Ambi isithw’ibirirawa ekya Yesu alhaghanisaya kino: ‘Omundu oyo wasyayiyinia erihika okwa nduli yo wasyalhamibwa.’ (Mt. 24:13) Omulhaghe oyu akamanyisaya athi thutholere ithwasighalha bathaleghulha nomuthwangabana ebitsibu ebiri bithi. Thwamayiyinirya obuli kitsibu lino, erikirirya lyethu irikendibya irinaghumire obulighe bunene buthe bwatsuka.

16. Obuthubaha bwethu buseghemere okuki, kandi thwanga bughumya thuthi lino?

¹⁶ Obuthubaha: Omuthwe w’olhuhindano olhwa 2018 abya “Wubye Muthubaha!” Olhuhindano olhu mulhwathw’ibukirye ngoku obuthubaha bwethu sibuseghemere okwa maaka wethu. Ng’eriyiyinia, obuthubaha obw’okwenene bukasa omw’iyikethera Yehova. Thwang’igha thuthi eriyikethera Yehova? Omw’isoma Ekinywe kiwe obuli kiro n’erighanirya okwa mibere Yehova alhamirayamu abandu biwe kera. (Esy. 68:20; 2 Pet. 2:9) Abathabali bakendi syabya bakathubambira, thukendi syayithagha obuthubaha n’eriyikethera omu Yehova kwilhaba kera. (Esy. 112:7, 8; Ebr. 13:6) Thwamayikethera Yehova lino, ithukendi thunga obuthubaha obwathukayithagha erimanira eribambira lya Gogi. *

17. Busana naki sithutholere thukasagha e Harmagedoni? (Lebaya ekisasani ky’okwa kidipa.)

¹⁷ Ngoku kiri omwa mwatsi w’ahanyuma, abangyi omw’ithwe thwamabyaho omwa biro by’enyuma-nyuma. Aliwe kandi thunalindirire erilhama okwa bulighe bunene. Olhuhi lhwe Harmagedoni lhwa lhukendi syaghunzaho omughulhu mubi ono. Nomwabine, sithutholere thukasagha. Busana naki? Kundi Nyamuhanga yukendi syalhwa. (Emi. 1:33; Eze. 38:18-20; Zek. 14:3) Yehova akendisyalhaghira, neryo Yesu Kristo iniasondolha amahe wa Nyamuhanga omwa malhwa. Akendi syabya n’abahakabibwa ababirilhubukibwa n’esyongumi sy’abamalaika. Abosi haghuma, bakendi syalhwa na Sitani, esyombinga siwe, n’amahe wabu aw’okwa kihugho.​—Dan. 12:1; Erib. 6:2; 17:14.

18. (a) Yehova abirilhagha athiki? (b) Eribisulirwa 7:9, 13-17 hakathuha erikakasya lyahi okwa buthuku obukasa?

¹⁸ Yehova abirilhagha athi: “Sihali kindu ky’amalhwa ekikahesawa erilhwa nawu ekikendi syaghasa.” (Isa. 54:17) “Endeko nene” y’abaramya bathaleghulha ba Yehova bakendi syalhama okwa bulighe bunene! Neryo bakendi syalholha embere erimuramya. (Soma Eribisulirwa 7:9, 13-17.) E Biblia yikathuha erisika ngoku thukendi syalhama omwa buthuku obukasa! Thunasi ngoku Yehova “akahanganira abathereghulha.” (Esy. 31:23) Abosi abanzire Yehova kandi abakamupipa bakendi syatsema bakalhangira akahamya erina liwe eribuyirire.​—Eze. 38:23.

19. Ni maha mabuyanga wahi awathulindirire hakuhi-kuhi aha?

¹⁹ Thalengekania 2 Timoteo 3:2-5 nga hangabugha hathiki hakakania okwa bandu ab’omwa kihugho kihya-kihya ekithemo Sitani. (Lebaya akasanduko “ Emibere eya Bandu Bakendisyabya Nayu Okwa Buthuku obo.”) Mughalha wethu George Gangas, * oyuwakolha ng’omughuma w’okwa Kathunga Akakasondolha, mwabugha kukyo kw’athya: “Ekihugho kikendi syuwana obuli mundu iniabiribya mulikyethu! Wukisiya iwathunga olhusunzo olhw’eribya omwa kihugho kihya-kihya. Yehova amabya inianeho nawu wukendi syabya iwuneho. Thukendi syabyaho kera na kera.” Aya ka ni maha mabuyanga!