1. Yehova angana kolhaki eriberererya ekighendererwa kiwe?

YEHOVA anganabya ekyosi-kyosi ekyo anganza eribya nuku aberereraye ekighendererwa kiwe. Ng’eky’erileberyako, erithabughako bike, Yehova abiribya Mukangirirya, Mukirania, n’Omuthuli w’engulhu yuwene. (Isa. 48:17; 2 Kor. 7:6; Gal. 3:8) Aliwe, mughulhu mungyi akakolesaya abandu eriberererya ebighendererwa biwe. (Mt. 24:14; 28:19, 20; 2 Kor. 1:3, 4) Kandi Yehova anganaha owosi-wosi amenge n’akaghalha ebya thukayithagha nuku thubye ekyo anzire eriberererya erisonda liwe. Ebyosi ebi ni bighuma by’okwa kya lina liwe likamanyisaya, ngoku abasomi bangyi bakanabugha.

2. (a) Busana naki hanganayira ithwayowa Yehova nga syanga thukolesya? (b) Thukendi kania okuki omo mwatsi ono?

² Ithwe bosi thwanzire Yehova iniathukolesya, aliwe abandi banganayowa nga syanga bakolesya. Busana naki? Kundi bakayowa nga sibanga thoka busana n’erikulha omwa myaka, emibere eyabalimu, kutse amaaka wabu. N’abandi banganayowa ebyo bane mukolha nga bikaghunza neryo ibathalhangira ekiyithawa ky’erithasyakolha bingyi. Omo mwatsi ono, thukendi lhangira ngoku Yehova anganathokesya owosi-wosi eriberererya ekighendererwa kiwe. Neryo thukendi lebya ngoku Yehova aha abaghombe biwe ab’omwa Biblia​—abalhume n’abakali—​omuthima w’erianza n’amaaka w’eriyira eky’erikolha. Erighunzerera, thukendi lebya ngoku thwanga lighira Yehova erithukolesya.

3. Ngoku kiri omu Abanya Filipi 2:13, Yehova angathuha athi omuthima w’erianza erikolha?

³ Soma Abanya Filipi 2:13, NW. * Yehova angana thuha omuthima w’erianza erikolha. Eki angakikolha athi? Obundi ithwangana minya okwa kiyithawa kirebe omwa kithunga. Kutse abasyakulhu ibathusomera abaruha erilhua okwa kyaghanda ky’omuthahulha eyikathubwira okwa buyithawa obuli omwa bundi bulhambu. Ithwangana yibulya, ‘Nanga kolhaki eriwathikya?’ Kutse obundi thwabirihebwa olhusunzo olhukalire, neryo ithwabulha nga thunemwendi lhukolha ndeke. Kutse ithwasoma omwatsi mulebe omwa Biblia, n’eriyibulya, ‘Nanga kolesya indi omwatsi oyu eriwathikya abandi?’ Yehova syendi thukaka erikolha ekyosi-kyosi. Aliwe amalhangira ithune mulengekania okwa ky’erikolha, iniangana thuha omuthima w’erianza n’eriyira eky’erikolha.

4. Yehova angathuha athi amaaka w’eriyira eky’erikolha?

⁴ Kandi Yehova angana thuha amaaka w’eriyira eky’erikolha. (Isa. 40:29) Anganathuha omulimu wiwe abuyirire eryuwania amaaka wethu w’ekibuthiranwa. (Eri. 35:30-35) Yehova angana kolesya ekithunga kiwe erithukangirirya ngoku thwanga kolha emibiiri mirebe. Saba obuwathikya wamayowa nga siwanga thoka omubiiri mulebe. Kandi yowe bwiranda erisaba Thatha wethu w’elhubulha kandi omwenge ‘y’obuthoki bunene.’ (2 Kor. 4:7; Lk. 11:13) Omwa Biblia muli eby’erileberyako bingyi ebikakanganaya ngoku athokesaya abalhume n’abakali omw’ibaha omuthima w’erianza n’amaaka w’eriyira eky’erikolha. Thukakania okwa by’erileberyako ebi, lengekanaya okwa syonzira esya Yehova angakukoleseryamu.

5. Thuk’ighaki okwa mibere n’omughulhu Yehova akoleserayamu Musa erisabulha Abaisraeli?

⁵ Yehova mwathokesya Musa eribya musabuli w’Abaisraeli. Aliwe Yehova amukolesaya mughulhu wahi? Mbwino bw’obuthuku Musa ayowa iniatholere enyuma ‘w’erikangiriribwa omo menge wosi w’Abanya Misiri’? (Emib. 7:22-25) Eyihi, Yehova abere abiriwathikya Musa eribya mundu oyuyikehirye kandi mwolho, ni mwabya amukolesirye. (Emib. 7:30, 34-36) Yehova mwaha Musa y’obuthubaha bw’erikania n’omuthabali w’amaaka owe Misiri. (Eri. 9:13-19) Thuk’ighaki okwa mibere n’omughulhu Yehova akoleserayamu Musa? Yehova akakolesaya abakalengaho erigherererya emibere yiwe n’abakamuyikethera eribaha akaghalha.​—Fil. 4:13, NW.

6. Emibere Yehova akoleserayamu Barzilai eriwathikya Omwami Dawudi yikathweghesayaki?

⁶ Myaka mingyi enyuma waho, Yehova mwakolesya Barzilai eriwathikya Omwami Dawudi. Dawudi n’abo abya nabo babya ‘bawirire kandi ibalhuhire n’erikwa enyotha’ omughulhu bathibitha bakasagha mughalha wa Dawudi, ya Abusaloma. Okwa buthuku obu, Barzilai omwa busyakulhu bwiwe, n’abandi bandu mubatsama engebe yabu eriwathikya Dawudi nabo abya nabo. Barzilai mwathalengekania athi kundi akulire omwa myaka, Yehova syanga thasyamukolesya. Omwakanya k’ekyo, mwakolesya ebyo abya awitheko eriwathikya abaghombe ba Nyamuhanga. (2 Sam. 17:27-29) Kikathweghesayaki? Mbulha thuwithe myaka mingahi, Yehova angana thukolesya eriwathikya balikyethu, obundi abo thuli nabo kutse omwa kindi kihugho, abali omwa buyithawa. (Emi. 3:27, 28; 19:17) Nomuthwangabya isithwangabayihikirako, thwanganahayo erisighika omubiiri w’ekihugho kyosi nuku  esyosente sibye isineho eriwathikya omughulhu syanga yithaghisibwa n’aha syanga yithaghisibwa.​—2 Kor. 8:14, 15; 9:11.

7. Yehova mwakolesya athi Simeoni, kandi eriminya ekyo lyanga thughumya lithi?

⁷ Yehova mwalhaghanisya Simeoni, omusyakulhu muthaleghulha oyuwabya e Yerusalemu athi syendi syaholha athali alholha oku Masiya. Omulhaghe oyo angabya imwahamba oku Simeoni kwa kutsibu, kundi abya iniabirilindirira Masiya habw’emyaka mingyi. Yehova mwahemba Simeoni busana n’erikirirya n’eriyiyinia liwe. Kiro kighuma, ‘omulimu mwathwalha Simeoni y’omwa hekalu.’ Mwalholha okwa lhumekeke Yesu, kandi Yehova mwakolesya Simeoni eribugha obuminyereri obukakanganaya ngoku omwana oyu akendi syabya Kristo. (Lk. 2:25-35) Nomwakine indi Simeoni angabya imwaholha Yesu isyali atsuka omubiiri wiwe, mwasima busana n’olhusunzo olho athunga, kandi akendi syalholha okwa bindu bibuya bingyi omwa buthuku obukasa! Omwa kihugho kihya-kihya, omulhume muthaleghulha oyo akendi syalhangira obuthabali bwa Yesu bukalethera abandu abali okwa kihugho emighisa mingyi. (Enz. 22:18) Nethu thwanganasima olhusunzo lhwosi-lhwosi olhwa Yehova akathuha omwa mubiiri wiwe.

8. Yehova angathukolesya athi ngoku akolesaya Barnaba?

⁸ Omwa kighonye ky’erimbere E.K., omulhume omwenge oyukahulhawamo Yozefu mwaligha Yehova erimukolesya. (Emib. 4:36, 37) Obundi kundi Yozefu abya asi ndeke erihumulikania abandi, ky’ekyaleka abakwenda ibamwahulhamo Barnaba, ekikamanyisaya “Mughalha w’Erihanda Omuthima.” Ng’eky’erileberyako, Saulo abere abiribya Mukristayo, abangyi omwa balikyethu mubamusagha kundi ibanasi kw’abya akendererya ekithunga. Aliwe, Barnaba mwamuyihirako, kandi Saulo angabya imwasima kutsibu obuwathikya obo. (Emib. 9:21, 26-28) Enyuma waho, abasyakulhu e Yerusalemu mubalhangira ekiyithawa ky’erihumulikania balikyethu ababya bikere haali omwa Antiokia eye Suria. Mubathumandi? Barnaba! Mubasombolha ndeke. Thukabwirawa indi Barnaba “mwahanabo athi abosi bakwame Omukama n’omuthima asikire.” (Emib. 11:22-24) Namunabwire, Yehova angana thuwathikya eribya “mughalha w’erihanda omuthima” okwa balikyethu Abakristayo. Ng’eky’erileberyako, angana thuwathikya erihumulikania ababiriholerwa ab’okw’ibo. Angana thuhira mw’omuhwa w’eribungira kutse eritherera oyulhwere kutse oyubbunikire omuthima n’erimubwira ebinywe by’erihumulikania. Wune mwendi lighira Yehova akukolesaye ngoku akolesaya Barnaba?​—1 Tes. 5:14.

9. Thuk’ighaki okwa mibere Yehova awathikirayamu mughalha wethu ya Vasily eribya mulisya w’obunyakirimu oyutholere?

⁹ Yehova mwawathikya mughalha wethu ya Vasily eribya mulisya w’obunyakirimu oyutholere. Vasily abere akasombolhwa eribya musyakulhu inianawithe myaka 26, mwayowa isyanga thoka eriwathikya ekithunga bunyakirimu, kutsibu-tsibu abawithe ebitsibu. Aliwe, mwabana erithendekwa ndeke erilhua okwa basyakulhu abasi bingyi n’omw’ighenda okwa Sukuru y’Omubiiri w’Obwami. Vasily mwakulha-kulhana. Ng’eky’erileberyako, mwayihiriraho ebilhubirirwa birebe. Abere akaberererya obuli kighuma, lyolho-lyolho mwahwa mw’obuba. Akabugha athi: “Ebyabya bikanyitha obuba lino bikanyilethera etseme. Yehova akabya akanyiwathikya eribana erisako eritholere ery’erihumulikaniamu mulikyethu omwa kithunga, kikaleka ingayowa ndeke.” Baghalha bethu, nenyu nga Vasily  mwamalighira Yehova eribakolesya, inianganabaha amaaka w’erikolha esyongwamirwa esirithohire omwa kithunga.

10. Abigaili mwakolhaki, kandi eky’erileberyako kiwe kikathweghesayaki?

¹⁰ Dawudi n’abalhume biwe abathaleghulha babya ibanemuhigha-highanibwa n’Omwami Saulo, neryo mubayithagha obuwathikya. Abalhume ba Dawudi mubasaba Omuisraeli omugaga ya Nabali y’ebyalya bike, ebyo angathoka. Mubayowa ibatholere erimusaba kundi babya ibanemutheya ekihangulho kiwe omwa mbwarara. Aliwe omukurungu Nabali mwaghana eribaha ekyosi-kyosi. Dawudi mwahithana neryo amanza eriy’itha Nabali n’obuli mwana w’obulhume omw’eka ya Nabali. (1 Sam. 25:3-13, 22) Aliwe, mukali wa Nabali ya Abigaili, abya mubuya kandi w’amenge. Mwakangania obuthubaha, mwawa embere sya Dawudi n’eribugha athi isyutha omusasi omw’iyikisirya. Omwa menge mwamubwira athi abirekere Yehova. Ebinywe bya Abigaili eby’eriyikehya n’emikolere y’amenge mubyahamba okwa muthima wa Dawudi. Mwalhuaho inialhangira ngoku Yehova yulyamuthuma. (1 Sam. 25:23-28, 32-34) Abigaili abya iniabirithunga emibere eyangaleka Yehova iniamukolesya. Kuthya, bali bethu Abakristayo abakabya n’amenge n’obuyitheghererya Yehova angana bakolesya erighumya amaka wabu n’abandi omwa kithunga.​—Emi. 24:3; Tito 2:3-5.

11. Bali ba Salumu mubakolhaki, kandi munabwire ni bahi abakabagherereraya?

¹¹ Myaka mingyi enyuma waho, bali ba Salumu babya baghuma b’okwa abo Yehova akolesaya erisuba-subania esyombimbo sye Yerusalemu. (Neh. 2:20; 3:12) Nomwakine indi thatha wabu abya mughuma w’okwa bakulhu, bali ba Salumu mubayihayo erikolha omubiiri owakalire oyo. (Neh. 4:15-18) Ibo si babya ng’Abanya Tekoa, ‘abathawathikaya’ okwa mubiiri. (Neh. 3:5) Thalengekania bali ba Salumu nga mubatsema bungahi omubiiri akahwa omwa biro 52 buyira! (Neh. 6:15) Omwa biro byethu bino, bali bethu bakayihayo ibanatsemire erikolha emibiiri y’embaghane eyibuyirire​—erihimba n’erisugha amanyumba awabirihebwayo oku Yehova. Amenge wabu, omuhwa, n’obuthaleghulha bwabu bikayithaghisibawa omubiiri oyu erithokekana.

12. Yehova angathukolesya athi ngoku akolesaya Tabita?

¹² Yehova mwathulha okwa muthima wa Tabita “erikolha emibiiri mibuya n’eriwathikya,” kutsibu-tsibu abakwakali. (Emib. 9:36) Kundi ini mwenge kandi w’olhukeri, abangyi mubamulira akaholha. Aliwe mubatsema kutsibu omukwenda Petero akamulhubukya. (Emib. 9:39-41) Thuk’ighaki oku Tabita? Mbulha thuli balere kutse thukulire, balhume kutse bakali, ithwe bosi thwangana wathikya abalikyethu.​—Ebr. 13:16.

13. Yehova mwakolesya athi mwali wethu w’esisoni oyukahulhawamo Ruth, kandi mwabugha athiki?

¹³ Mwali wethu Ruth ow’esisoni mwanza eribya mumisyonare. Iniakine mulere iniakanguhirawa erighenda nyumba okwa nyumba akaghaba esyotrakit. Akabugha athi: “Iningatsemera omubiiri oyu.” Aliwe, ikimukalire erimana okwa lhukyo n’erikanirya abandi okwa Bwami ba Nyamuhanga. Nomwabine, mwabya mutemburi inianawithe myaka 18. Omwa 1946, mwaghenda okwa Sukuru ye Gileadi n’enyuma waho amakolera e Hawaii ne Japani. Yehova mwamukolesya omwa nzira y’amaaka erithulhughania engulhu yuwene omwa bihugho ebyo. Iniamabirighunza hakuhi myaka 80 omw’ithulira, Ruth mwabugha athi: “Yehova akanyighumaya. Abirinyiwathikya erisingura esisoni syaghe.  Ngayikethera ngoku Yehova anganakolesya owosi-wosi oyukamuyikethera.”

14. Ngoku kiri omu Abanya Kolosai 1:29, ni kyahi ekya thwangakolha thwamanza Yehova athukolesaye?

¹⁴ Eritsuka kera, Yehova abirikolesya abaghombe biwe eriberererya esyongwamirwa nyingyi muthina-muthina. Akendi leka iwabyaki? Kikendi sighikira okwa kaghalha ako wukendihiraho. (Soma Abanya Kolosai 1:29.) Wamabya iwunanzire Yehova akukolesaye, iniakendi leka iwabya muthuliri w’omuhwa, oyuwasi erikangirirya ndeke, omukirania oyutholere, omukoli w’amenge, omunywani oyukawathikaya, kutse ekyosi-kyosi ekyo anzire eriberererya erisonda liwe.

15. Ngoku kiri omu 1 Timoteo 4:12, 15, ni kyahi ekya baghalha bethu abalere batholere erisaba Yehova eribawathikya erikolha?

¹⁵ Kandi ibbwa nenyu abaghalha bethu abalere inywe mukinakulha? Hali ekiyithawa kinene ekya balhume b’akaghalha eriwathikya omwa kithunga ng’abaghombe abawathikya. Omwa bithunga bingyi muli abasyakulhu bangyi kwilhaba abaghombe abawathikya. Mbwino baghalha bethu abalere mwangananza erikolha bingyi omwa kithunga? Hakanayira abandi baghalha bethu ibabugha bathi, “Ingye erithakolha ng’omuthuliri kikaghunza.” Wamabya ikuwukayowa wuthya, saba Yehova akuwathikaye eribya n’engumbu y’erianza eritholera eribya mughombe muwathikya n’erikuha amaaka w’erikolha ekyosi-kyosi ekya wangathoka erimukolera. (Omu. 12:1) Thukayithagha obuwathikya bwawu!​—Soma 1 Timoteo 4:12, 15.

16. Ni kyahi ekya thutholere erisaba Yehova, kandi busana naki?

¹⁶ Yehova anganaleka iwabya ekyosi-kyosi ekyo anzire eriberererya erisonda liwe. Neryo musabe omuthima w’erianza erikolha omubiiri wiwe, n’erimusaba amaaka agho wukayithagha. Mbulha wuli mulere kutse wukulire, kolesaya obuthuku, akaghalha, n’ebya wuwitheko lino eriha Yehova y’olhukengerwa. (Omu. 9:10) Isiwalighira obuba kutse eriyowa nga siwanga thoka bikaleka wukayithalya okwa highisa hy’obughuli ehy’erikolha ekyosi-kyosi omwa mubiiri wa Yehova. Ni lhusunzo erikolha ekyosi-kyosi ekya thwangathoka eriha Thatha wethu w’olhwanzo olhukengerwa olho atholere!