1. Ni kyahi ekikaleka ithwaligha ngoku thuli omwa “biro by’enyuma-nyuma”?

MBWINO wabuthawa omwaka owa 1914 iniabirihika? Obo, engebe yawu eyosi iwamabyaho omwa “biro by’enyuma-nyuma” by’omughulhu ono. (2 Tim. 3:1) Ithwe bosi thwabiriowa okwa bindu ebya Yesu abugha athi bikendisyabya okwa mughulhu ono. Ebi mwamuli esyonyuhi, enzalha, emisiki, amalhwere, obubi erikanyirira, n’abandu ba Yehova eriendereribwa. (Mt. 24:3, 7-9, 12; Lk. 21:10-12) Kandi thwabirilhangira abandu bakakangania emibere eya omukwenda Paulo akanayako. (Lebaya akasanduko “ Emibere eya Bandu Bawithe Munabwire.”) Ithwe ng’abaramya ba Yehova, thwasi ndeke-ndeke ku thuli omwa “biro by’enyuma.”​—Mika 4:1.

2. Ni bibulyo byahi ebya thutholere ithwasubirya?

² Kundi hamabirilhaba buthuku bunene eritsuka 1914, thutholere ithwabya ithuli okw’ihwererera ‘ly’ebiro by’enyuma-nyuma.’ Kundi enduli yiri hakuhi-kuhi, thutholere ithwabana eby’erisubirya okwa bibulyo bikulhu nga bino: Ni byahi ebikendisyabya okw’ihwererera ‘ly’ebiro by’enyuma-nyuma’? Kandi Yehova anzire ithwabya ithunemukolhaki thunemulindirira ebindu ebyo?

3. Erikwamana n’obuminyereri obuli omu 1 Abanya Tesalonika 5:1-3, ni rangirira lyahi erya ebihanda bikendisyakolha?

³ Soma 1 Abanya Tesalonika 5:1-3. Paulo akahulha “ekiro ky’Omukama.” Ngoku kikolesibirwe hano, obu bw’obuthuku obukendi syatsuka n’eribambirwa lya “Babeli Mukulhu,” amadini  w’amabehi w’ekihugho kyosi, kandi bukendisyahwererera okwa Harmagedoni. (Erib. 16:14, 16; 17:5) “Ekiro” ekyo kithe kyatsuka, ebihanda [amahanga] bikendi syaranga “obuholho n’eriyisyandira!” (Esindi mbindulha sikanabugha sithi: “Obuholho n’obutheya.”) Abathabali b’ekihugho nabu bakanakolesaya ebinywe ng’ebyo bakakania okwa bihugho eribya ibine mukolongana ndeke. * Aliwe erirangirira ‘ly’obuholho n’eriyisyandira’ erya e Biblia yikakanayako likendi syabya mbaghane. Busana naki? Eki kikendisyabya kikabya, abandu banganasya lengekania bathi abathabali bamabirithoka eryuwania ekihugho. Aliwe neryo, “obulighe bunene” bukendisyatsuka “neryo-neryo erithoghotha lyasyithabo”.​—Mt. 24:21.

4. (a) Ni byahi ebya thulindirire erilhangira okw’irangirira ‘ly’obuholho n’eriyisyandira’? (b) Ni byahi ebya thwasi okw’irangirira eryo?

⁴ Thunasi ebindu birebe ebihambire okw’irangirira ‘ly’obuholho n’eriyisyandira.’ Aliwe, hane ebindi ebya thuthasi. Sithwasi ekikendisyakolya okw’irangirira eryo kutse nga likendisyakolhwa lithi. Kandi sithwasi nga kikendisyabya mirundi minene kutse nga likendisyabya murundi mughuma. Mbulha ni kyahi okw’ebi, ekya thwasi kya kino: Sithutholere thukathebibwa thuthi abathabali b’ekihugho banganaletha omwa kihugho mw’obuholho. Aliwe e Biblia yikathubwira yithi thulindirire erirangirira eryo. Ly’erikendisya thukangania ngoku “ekiro ky’Omukama” kikayatsuka!

5. Ebiri omu 1 Abanya Tesalonika 5:4-6 bikathuwathikaya bithi eribya ithunayitheghekere “ekiro ky’Omukama”?

⁵ Soma 1 Abanya Tesalonika 5:4-6. Erihabulha lya Paulo likathubwira ngoku thwanga yitheghekera “ekiro ky’Omukama.” Sithutholere “thukaghotsera ng’abandi ku bakakolha.” Thutholere ithwabya “ithunalholire” n’eribya ithunatheghirye. Ng’eky’erileberyako, thutholere ithwayitheya okw’ibya n’olhuhandi omwa by’ekipolitiki eby’ekihugho kino. Thwamayingirya mubyo, ithukendibya ithwamabya “b’ekihugho.” (Yn. 15:19) Thunasi ngoku Obwami bwa Nyamuhanga busa bwa bukendisyaletha obuholho omwa kihugho.

6. Thwanzire ithwawathikya abandi erikolhaki, kandi busana naki?

⁶ Eryongera okw’ibya ithunalholire, thwanzire n’eriwathikya abandi eriminya ebya Biblia yikabugha yithi bikendisyabya omwa kihugho. Ambi ithwabya ithun’ibukire ngoku obulighe bunene bwamabiritsuka, abandu bakendisyabya isibakiwithe endambi y’eryasa oku Yehova. Ky’ekikaleka omubiiri wethu w’erithulira iniabya ini w’erikolha omwa byalhuba! *

7. Yehova anzire ithwabya ithunemukolhaki?

⁷ Yehova anzire ithwabya ithunemukolha omubiiri w’erithulira omwa buthuku buke  obwamasighalhayo “ekiro” kiwe kithe kyatsuka. Thutholere ithwalhangira thuthi thukakanyirira “omo mubiiri w’Omukama.” (1 Kor. 15:58) Yesu mwabugha ebya thutholere erikolha. Abere akakania okwa bindu bikulhu ebikendisyabya omwa biro by’enyuma-nyuma, mw’ongerako athi: “Engulhu yuwene yitholere iyathulhughanibwa okwa bihanda byosi.” (Mk. 13:4, 8, 10; Mt. 24:14) Thakilengekaniako: Obuli ghenda omw’ithulira, wukabya iwamasangira omw’iberererya obuminyereri bwe Biblia.

8. Omubiiri w’erithulhughania Obwami anemukulha-kulhana athi?

⁸ Thwangabugha thuthiki okw’ikulha-kulhana ly’omubiiri w’erithulhughania Obwami? Obuli mwaka abandu bangyi bakaminya ekwenene. Ng’eky’erileberyako, lengekanaya okw’iyongera ly’abathuliri b’Obwami omwa kihugho kyosi ery’omwa biro by’enyuma-nyuma. Omwa 1914, habya abathuliri 5,155 omwa bihugho 43. Munabwire, hali abathuliri nga miliyoni 8.5 omwa bihugho 240! Nomwabine, omubiiri wethu syaliahwa. Thutholere ithwabya ithune muthulhughania Obwami bwa Nyamuhanga ngoku bwa bukendisyaghunzaho ebitsibu by’abandu ebyosi.​—Esy. 145:11-13.

9. Busana naki thutholere ithwalholha embere erithulhughania omwatsi w’Obwami?

⁹ Omubiiri wethu w’erithulhughania Obwami akendilholha embere erihika aho Yehova akendisyabughira athi amahwa. Hamasighalha buthuku bungahi abandu eriminya Yehova Nyamuhanga na Yesu Kristo? (Yn. 17:3) Sithwasi. Thunasi ngoku erihika aho obulighe bunene bukendisyatsukira, owosi-wosi oyuwithe ‘amalengekania awakaleka iniatholera eribana engebe y’erikotha’ angana hulikirira engulhu yuwene. (Emib. 13:48, NW) Thwanga wathikya thuthi abandu aba, obuthuku buthe bwahwayo?

10. Ni buwathikya bwahi obwa Yehova anemuthuha erikangirirya abandu ekwenene?

¹⁰ Erilhabira omwa kithunga kiwe, Yehova anemuthuha ebyosi ebya thukayithagha erikangirirya abandu ekwenene. Ng’eky’erileberyako, obuli wiki okwa mihindano y’ahakathi-kathi k’eyenga thukathendekawa. Emihindano eyi yikathuwathikaya eriminya ebya thwanga bugha thukanabana omundu kandi thukasubayo. Kandi yikathukangiriraya ngoku thwang’eghesya abigha be Biblia. Kandi ekithunga kya Yehova kyabirithuha Ebya Thukakolesaya Thukakangirirya. Ebindu ebi bikathuwathikaya . . .

•   eritsuka omukania n’abandu,

• erihira omwa bandu mw’eryanzisibwa,

• erihira omwa bandu mw’omuhwa w’eryanza erigha bingyi,

• erikangirirya abigha be Biblia ekwenene, na

• eribwira abakanzisibawa erighenda okwa Muthahulha wethu n’Ebisenge by’Obwami.

Nomwabine, erithabya n’ebindu ebi sikirighunza. Thutholere ithwabikolesya. * Ng’eky’erileberyako, wamasighira omundu y’etrakit kutse egazeti enyuma w’erikanirania nayu, iniakendisighalha akasomayo erihika aho wukendisyasubulira. Ni lhukwamirwa lhwethu eribya ithunemusangira omwa mubiiri w’erithulhughania Obwami obuli kwezi.

11. Busana naki ihabya amasomo w’Eriyeghesya e Biblia Erilhabira Okwa Intaneti?

¹¹ Ekindi eky’erileberyako ngoku Yehova anemuwathikya abandu eriminya ekwenene, lebaya Amasomo w’Eriyeghesya e Biblia Erilhabira Okwa Intaneti awali oko JW.ORG^®. (Ghenda omwa BIBLE TEACHINGS > ONLINE LESSONS.) Busana naki amasomo aya iniahirwaho? Obuli kwezi, abandu bangyi erithimba omwa kihugho kyosi bakasekulhaya omwa masomo aya okwa Intaneti. Amasomo aya anganaleka abandu aba ibatsuka erigha oku Nyamuhanga. Abandi bandu abo wukakanaya nabu bangana ghana erigha e Biblia. Kyamabya ikwakiri kithya, bakanganaye amasomo aya okwa muthahulha wethu kutse bathumire e link eyikakolhaya okwa masomo ayo. *

12. Ni byahi ebya omundu ang’igha omwa masomo w’Eriyeghesya e Biblia Erilhabira Okwa Intaneti?

¹² Amasomo wethu w’Eriyeghesya e Biblia Erilhabira Okwa Intaneti akakanaya okwa myatsi eno: “E Biblia na Mwinyeyo,” “Abakanibweko Kutsibu Omwa Biblia,” na “Omwatsi we Biblia aw’Amaha.” Omw’igha amasomo aya, omundu iniakendiminya:

• Ngoku e Biblia yanga wathikya omundu

• Yehova, Yesu, n’abamalaika nga ni bahi

• Ekyaleka Nyamuhanga iniahangika abandu

• Ekikaleka ihabya eriaghalhwa n’obubi

Amasomo ayo kandi akasoborera ngoku Yehova . . .

• akendisyaghunzaho eriaghalhwa n’olhuholho,

• akendisyalhubukya abaholi, kandi ngoku

• akendisyasubya obwami bwa Nyamuhanga omo mwanya w’amathabali w’abandu awabirilemwa.

13. Mbwino amasomo awali okwa Intaneti amasuba omwa mwanya w’endegheka y’erigha e Biblia? Soborera.

¹³ Amasomo awali okwa Intaneti aya syathasuba omwa mwanya w’endegheka y’erigha e Biblia. Yesu abirithuha omubiiri w’eriyira abigha. Thuwithe amaha thuthi abakanzisibawa bakendisoma amasomo aya, ibasima ebya bak’igha n’eryanza eriminya bingyi. Kyamabya kithya, obundi bangananza erigha e Biblia. Okw’ighunzerera ly’obuli risomo, oyukalisoma akahirawa mw’omuhwa w’erisaba ow’erimw’eghesya e Biblia. Erilhabira okwa muthahulha wethu, omwa kihugho kyosi, obuli kiro abandu abalhabire oku 230 bakasaba eryeghesibwa e Biblia! Erigha busu okwa busu eryo ni ry’omughaso!

14. Erikwamana n’ekihano kya Yesu ekiri omu Matayo 28:19, 20, ni kyahi ekyathukalengaho kutsibu erikolha, kandi busana naki?

¹⁴ Soma Matayo 28:19, 20. Thuk’eghesya abigha be Biblia, thutholere ithwalengaho kutsibu ‘eriyira abigha . . . , erikangiriryabo bakole ebyosi ebyo [Yesu] abirithuhana.’ Thutholere ithwawathikya abandu eriminya ngoku ni kikulhu ibo erisighika Yehova  n’Obwami bwiwe. Eki mwamuli erilengaho erihira omwa bandu mw’omuhwa w’eriyira ekwenene mwa yabu omw’ighendera okwa bya bak’igha, eriyihayo oku Yehova, n’eribatizibwa. Neryo imubakendisyathoka erilhama okwa kiro kya Yehova.​—1 Pet. 3:21.

15. Ni kyahi ekyathuthawithire buthuku, kandi busana naki?

¹⁵ Ngoku thunalyalhangira, hakisighere buthuku buke kutsibu omughulhu mubi ono erihwaho. Busana n’ekyo, sithukiwithe buthuku bw’erigha e Biblia n’abandu abathanzire eribya bigha ba Kristo. (1 Kor. 9:26) Omubiiri wethu ni w’erikolha omwa byalhuba! Hakine abandu bangyi abakayithagha eryowa omwatsi w’Obwami endambi yithe yahwayo.

16. Erikwamana na Eribisulirwa 18:2, 4, 5, 8, ithwe bosi thutholere ithwakolhaki? (Lebaya n’omwatsi ahikwa.)

¹⁶ Soma Eribisulirwa 18:2, 4, 5, 8. Emilhondo eyi yikakanganaya ekindi ekya Yehova anzire abaramya biwe ibakolha. Abakristayo ab’okwenene abosi batholere ibalhangira bathi hakabya embaghane ahakathi-kathi kabu na Babeli Mukulhu. Omwigha we Biblia athali aminya ekwenene, angabya inianabya omwa dini ndebe ey’amabehi. Anganabya inianabya akaghenda okwa mikorwa ey’edini n’erisangira omwa mibiiri yayo. Kutse obundi imwanahayo esyosente erisighikayo. Omwigha we Biblia athali alighirwa eribya muthuliri oyuthabatizibirwe, atholere iniatsuka erithwa engolongana yosi-yosi n’amadini w’amabehi. Atholere iniabahandikira ebaruha ey’eriyithwa kubo kutse eriyighabulira ighuma okwa dini ey’alhuemo n’ekithongole kyosi-kyosi ekyangabya ikihambene na Babeli Mukulhu. *

17. Ni mibiiri nga yahi eyo Mukristayo akayihighulhako, kandi busana naki?

¹⁷ Omukristayo w’okwenene atholere inialhangira athi omubiiri wiwe syahambangene omwa nzira yosi-yosi na Babeli Mukulhu. (2 Kor. 6:14-17) Ng’eky’erileberyako, syangaligha erikolesibwa n’ekanisa kutse ekisomo. N’ekindi, Omukristayo oyukakolesibawa syangaligha eribya akakolha emibiiri okwa mwanya ow’akakulha-kulhanaya eriramya ly’amabehi. Kandi amabya iniawithe omubiiri wiwe, syangalengesya eriligha erikolha omubiiri wosi-wosi owe Babeli Mukulhu. Busana naki ithwathwamu erikolha ekyo? Kundi sithwanzire thukasangira omwa mibiiri n’ebibi by’ebithongole by’amadini ebithisirire embere sya Nyamuhanga.​—Isa. 52:11. *

18. Mughalha wethu mughuma mwamakirira athi emisingyi ye Biblia omwa mubiiri wiwe?

 ¹⁸ Myaka mingyi enyuma, omusyakulhu w’ekithunga oyukayikolesaya mwasabwa eriyakolha omubiiri w’oburande okwa kanisa omwa bulhambu bwiwe. Oyuwamusaba abya inianasi ngoku mughalha wethu oyo akabya inianemubugha athi syanga kolha okwa syokanisa. Aliwe omwinye mubiiri abya iniabiribulha oyukendi kolhagho. Nomwabine, mughalha wethu mwamakirira emisingyi ye Biblia neryo amaghana omubiiri oyo. Ewiki eyakwamako, omwa lhupapura lhw’amakuru mumwahulhuka ekisasani ky’owundi murandi inianemuhira omusalaba w’okwa kanisa. Mughalha wethu kw’aligha omubiiri oyo, ekisasani kiwe ky’ekyangabere omwa makuru. Thalengekania ekyo nga kyangatsandirye bungahi erina liwe omwa Bakristayo balikyabu! Kandi thalengekania, Yehova ng’angayowire athi.

19-20. (a) Ni byahi ebya thwamabirith’igha? (b) Ni bindi byahi ebya thukendithasyaminya?

¹⁹ Erikwamana n’obuminyereri bwe Biblia, ekindi kindu ekikayabya okwa kihugho ky’eky’ebihanda erirangirira “obuholho n’eriyisyandira.” Thukasima Yehova busana n’eby’abirithukangirirya, thunasi ngoku ebihanda sibyangathoka eriletha obuholho bw’okwenene kandi obwa kera na kera. Thutholere ithwakolhaki ekindu eki kithekyabya n’erithoghothya erikendi syakwamako lithe lyabya? Yehova anzire ithwabya ithune mukolha kutsibu erithulhughania omwatsi w’Obwami n’erilengaho eriyira abigha bangyi. Kandi thutholere ithwayihighulha okwa madini wosi w’amabehi. Ekyo mwamuli eriyithwa n’eriyihighulira ighuma okwa mibiiri eyihambangene na Babeli Mukulhu.

²⁰ Hane ebindi bindu ebikendibya okw’ihwererera ly’ebiro ‘by’enyuma-nyuma.’ Kandi hane n’ebindi bindu ebya Yehova anzire ithwakolha. By’ebyahi, kandi thwangayitheghekera thuthi ebyosi ebikayabya ahambere aha? Thukendi bikaniako omwa mwatsi owakakwamako.