1. N’ithwamu lyahi eryuwene kutsibu eryo mundu wosi-wosi angakolha?

MUGHULHU mungyi, ebyo babuthi bakathwamu bikahamba oko baana babu ahabw’obuthuku buuli. Ababuthi bamathwamu nabi, ibangana lethera abaana babu b’ebitsibu. Aliwe bamathwamu ndeke, bakaha abaana babu b’akaghisa k’eribya omwa ngebe eyitsemire kandi eyuwene. Aliwe, n’abaana nabu batholere ibathwamu ndeke. Erithwamu eryuwene kutsibu eryo mundu wosi-wosi angakolha ly’erikolera Thatha wethu w’elhubulha ow’olhwanzo, Yehova.​—Esy. 73:28.

2. N’ithwamu lyahi eryuwene eryo Yesu n’ababuthi biwe bakolha?

² Ababuthi ba Yesu mubathwamu eriwathikya abaana babu erikolera Yehova, kandi erithwamu eryo babuthi bakolha mulyakangania ngoku ekyo ky’ekyabya kilhubirirwa kyabu kikulhu omwa ngebe. (Lk. 2:40, 41, 52) Yesu nayu mwathwamu ndeke kyamamuwathikya eriberererya olhukwamirwa liwe omwa kighendererwa kya Yehova. (Mt. 4:1-10) Yesu mwakulha amabya mulhume w’olhukeri, muthaleghulha, kandi muthubaha​—omwana oyo buli mubuthi oyukubaha Nyamuhanga angatsemera n’eriyisyethera.

3. Ni bibulyo byahi ebyo thukendi subirya omo mwatsi ono?

³ Omo mwatsi ono, thukendi kania okwa bibulyo bino: N’ithwamu lyahi eryuwene eryo Yehova akolha busana na Yesu? Ni kyahi ekyo babuthi Abakristayo bang’ighira okw’ithwamu ly’ababuthi ba Yesu, ya Yozefu na Maria? Kandi ni kyahi ekyo Abakristayo abalere bang’ighira okw’ithwamu lya Yesu?

4. N’ithwamu lyahi likulhu eryo Yehova akolha busana na Mughalha wiwe?

⁴ Yehova mwasombolera Yesu y’ababuthi abuwene. (Mt. 1: 18-23; Lk. 1:26-38) Ebinywe bya Maria ebikalhua oko muthima ebiri omwa Biblia bikakanganaya ngoku abya anzire Yehova ya kutsibu n’Ekinywe kiwe. (Lk. 1:46-55) Kandi na Yozefu erighendera okwa busondoli bwa Yehova mukyakangania ngoku akubaha Nyamuhanga kandi ku anzire erimutsemesya.​—Mt. 1:24.

5-6. Ni byahi ebyo Yehova alighira Mughalha wiwe erilhabamo?

⁵ Wibuke ngoku Yehova mwathasombolera Yesu y’ababuthi abagaga. Obuhere obo Yozefu na Maria bahayo Yesu abiributhwa bukakanganaya ku babya banakwa. (Lk. 2:24) Yozefu angabya iniabya inianawithe akanya kake ak’erirandiramo hakuhi n’ewiwe e Nazareti. Bangabya ibabya omwa ngebe nyolho, kutsibu-tsibu eka yabu yikongera eribya mw’abaana nga musanju.​—Mt. 13:55, 56.

⁶ Yehova mwatheya Yesu okwa bindi bitsibu birebe, aliwe mwathamutheya okwa bitsibu ebyosi. (Mt. 2:13-15) Ng’eky’erileberyako, Yesu abya awithe abahughu abathamw’ikiriraya. Thalengekania Yesu nga mwayiponera bungahi eribya n’abahughu abo erimbere mubaghana erimuligha nga Masiya. (Mk. 3:21; Yn. 7:5) Kandi nibya, Yesu angabya imwaghumira olhuholho lhwa thatha wiwe oyuwamukulhaya, ya Yozefu. Olhuholho olho lhwangabya imulhwaleka Yesu, ng’omwana omukulhu, iniabya w’erikolha omubiiri ogho thatha wiwe abya akakolha omw’eka. (Mk. 6:3) Yesu abere anemukulha, mwabya n’olhukwamirwa lhw’eritsomana ebiyithawa by’eka yabu. Angabya imwakolha kutsibu erisighika eka yabu. Neryo mwaminya erilhuha nga niki wamabirikolha kiro kyosi.

7. (a) Ni bibulyo byahi ebikendi wathikya abathahenie erilembera abaana babu? (b) Erikwamana na Emisyo 2:1-6, ni kyahi ekya babuthi batholere ibakangirirya abaana babu erikolha?

⁷ Mwamabya imuli omwa butheke kandi imwanzire eributha, muyibulhaye: ‘Thune bandu abayikehirye, abatsomene eby’obunyakirimu abo Yehova angasombolha erilembera omwana ow’obughuli oyukendi buthwa?’ (Esy. 127:3, 4) Wamabya iwuli mubuthi, yibulhaye: ‘Nganemukangirirya abaana baghe omughaso w’erikolha kutsibu?’ (Omu. 3:12, 13) ‘Ngane mulengaho ngoku nanga thoka eritheya abaana baghe okwa kabi ak’ekinyamubiri n’ak’eby’esyongeso akabangabana omwa kihugho kya Sitani?’ (Emi. 22:3) Siwangatheya abaana bawu okwa bitsibu ebyosi  ebyo banga bana. Ekyo ni kindu ekithe kyanga thokekana. Aliwe lyolho-lyolho kandi omo lhwanzo wangana bawathikya eriyitheghekera ebitsibu omw’ibakangirirya ngoku banga yikethera Ekinywe kya Nyamuhanga. (Soma Emisyo 2:1-6.) Ng’eky’erileberyako, omuhughu amathwamu erighana eriramya ly’okwenene, wathikaya abaana bawu baminye ngoku ni kikulhu erisighalha muthaleghulha oku Yehova omw’igha Ekinywe kya Nyamuhanga. (Esy. 31:23) Kutse mwamaholerwa, kanganaya abaana bawu ngoku banga kolesya Ekinywe kya Nyamuhanga erighumira obulighe n’eribana obuholho.​—2 Kor. 1:3, 4; 2 Tim. 3:16.

8. Ngoku kiri omwa Eryibuka Ebihano 6:6, 7, ni kyahi ekyo Yozefu na Maria bakolha?

⁸ Ababuthi ba Yesu ab’okwa kihugho mubawathikya Yesu erikulha inianasimirwe na Nyamuhanga; mubaghendera okwa busondoli obwa Yehova akaha ababuthi. (Soma Eryibuka Ebihano 6:6, 7.) Yozefu na Maria babya banzire Yehova ya kutsibu, kandi ekilhubirirwa kyabu lyabya iry’erihira omwa baana babu mw’omuhwa w’eribya n’olhwanzo ng’olho.

9. N’ithwamu lyahi likulhu eryo Yozefu na Maria bakolha?

⁹ Yozefu na Maria mubathwamu eribya n’endegheka eyuwene ey’obunyakirimu. Ahathe erithika-thika, ibakaghenda okwa mihindano ey’obuli wiki omwa sinagogi, e Nazareti, kuthya n’okwa Kiro ky’Erikyuruka eky’obuli mwaka e Yerusalemu. (Lk. 2:41; 4:16) Bangabya ibabya bakakolesya esyongendo esyo esy’erighenda e Yerusalemu erikangirirya Yesu n’abaana babu okwa bihambire okwa bandu ba Yehova, obundi bakahika omwa bipindi ebikanibweko omo Masako. Eka ya Yozefu na Maria yabere yinemukanya, kyangabya imukithabya kyolho ibo erighenda-ghendania n’endegheka yabu y’obunyakirimu. Aliwe mubahembwa busana n’erikolha ekyo! Kundi mubahira eriramya Yehova ly’embere, eka yabu muyayithunda hakuhi na Yehova.

10. Ni masomo wahi agho ababuthi Abakristayo bang’ighira oku Yozefu na Maria?

¹⁰ Ni byahi ebyo babuthi abakubaha Nyamuhanga bang’ighira oku Yozefu na Maria? Ekikulhu kutsibu, mukangiriraye abaana benyu omwa binywe n’omwa mikolere ngoku mwanzire Yehova ya kutsibu. Muminye ngoku ekihembo kikulhu ekyo mwangabaha ly’eribawathikya  erianza Yehova. Kandi ekighuma ky’okwa masomo makulhu agho mwanga kangirirya abaana benyu ly’eribeghesya ngoku bangamakirira endegheka yabu y’eriyeghesya, erisaba, erihindana, n’erisangira omw’ithulira. (1 Tim. 6:6) Kandi nibya, mutholere imwaha abaana benyu b’ebindu ebyo bakayithagha kinyamubiri. (1 Tim. 5:8) Aliwe wibuke ngoku obughuma obo abaana bawu bawithe na Yehova bw’obukendi syaleka ibalhama okwa mughulhu mubi ono n’eringira omwa kihugho kihya-kihya kya Nyamuhanga, butsira ebindu ebyo bawithe. *​—Eze. 7:19; 1 Tim. 4:8.

11. (a) Erihano eriri omu 1 Timoteo 6:17-19 lyanga wathikya lithi ababuthi erithwamu ndeke bakalembera abaana babu? (b) Ni bilhubirirwa byahi ebyo eka yawu yanga lengekaniako, kandi ni mighisa yahi eyangana lhwiririramo? (Lebaya akasanduko “ Ni Bilhubirirwa Byahi Ebyo Wukendi Yihiriraho?”)

¹¹ Kikatsemesaya erilhangira ababuthi bangyi Abakristayo bakathwamu ndeke eriwathikya ab’eka yabu bunyakirimu! Bakakolera Yehova ya haghuma mughulhu wosi. Bakahindana okwa mihindano emike-mike n’eminene-minene. Kandi bakasangira omw’ithulira. Nibya awandi maka anemuthoka eriyathulira omwa bulhambu obuthe thulirawa kutsibu. Abandi bakabungira okwa Beteli kutse ibasighika eby’obuhimbe. Amaka awakathwamu erikolha emibiiri eyi bakayihayo omwa by’esyosente, kandi nibya kyanganabya isikyolho okw’ibo. Aliwe omo kwenene emighisa eyo bakabana yikaleka ibabya baghuda bunyakirimu. (Soma 1 Timoteo 6:17-19.) Mughulhu mungyi abaana abakakulira omwa maka ng’aya bakalholha embere erikolha ebindu bibuya ebi, kandi sibaliyikubayabwomo! *​—Emi. 10:22.

12. Ni kyahi ekya Yesu abya atholere erikolha abirikulha?

¹² Mughulhu wosi, Thatha wa Yesu ow’elhubulha akathwamu ndeke, n’ababuthi biwe ab’okwa kihugho nabu mubathwamu ndeke. Aliwe, Yesu abere abirikulha, mwabya w’eriyithwiramu. (Gal. 6:5) Nayu, iniawithe obughabe bw’eriyithwiramu ng’ithwe. Anganathwiremu eriyitsomana n’erithendi kolha erisonda lya Yehova. Aliwe, mwathwamu eribya n’obughuma obuwene na Yehova. (Yn. 8:29) Eky’erileberyako kiwe kyanga wathikya kithi abalere munabwire?

13. N’ithwamu lyahi likulhu eryo Yesu akolha iniakine mulere?

¹³ Yesu iniakine mulere, mwathwamu eriowa ababuthi biwe. Mwathaghana obusondoli bw’ababuthi biwe ambu kundi asi bingyi kubalenga. Aliwe, “mwabya akowa ebyo bamubwira.” (Lk. 2:51) Ahathe erithika-thika, Yesu mwakolha ndeke olhukwamirwa lhwiwe ng’omwana omukulhu. Mwalengaho kutsibu  erighira oku thatha wiwe oyuwamukulhaya kw’eby’oburande nuku asighike eka yabu.

14. Thukaminya thuthi ngoku Yesu abya mwigha mubuya w’Ekinywe kya Nyamuhanga?

¹⁴ Ababuthi ba Yesu bangabya imubamubwira okw’ibuthwa liwe ery’omwa nzira y’ekithiko-thiko n’ebyo abathumwa ba Nyamuhanga babya ibabirimubughako. (Lk. 2:8-19, 25-38) Ebyo mubithaghunza; Yesu kandi mwayeghesya Amasako. Thukaminya thuthi ngoku Yesu abya mwigha mubuya w’Ekinywe kya Nyamuhanga? Iniakine mulere, abakangirirya e Yerusalemu “mubasweka busana n’amenge wiwe n’erisubirya liwe.” (Lk. 2:46, 47) Kandi inianawithe emyaka 12 buyira, Yesu abya iniabiriyikakasirya ngoku Yehova ya Thatha wiwe.​—Lk. 2:42, 43, 49.

15. Yesu mwakangania athi ku mwathwamu erikolha erisonda lya Yehova?

¹⁵ Yesu abere akaminya olhukwamirwa lhwiwe omwa kighendererwa kya Yehova, mwathwamu eriligha omubiiri wiwe. (Yn. 6:38) Mwaminya ngoku abangyi bangamuponire, kandi angabya imwakilengekaniako kutsibu. Aliwe, mwathwamu erighondera Yehova. Yesu abere akabatizibwa omwa 29 E.K., ekilhubirirwa kiwe lyabya iry’erikolha ebyo Yehova anzire. (Ebr. 10:5-7) Nibya iniane okwa muthi w’amaghali, Yesu mwalholha embere erikolha erisonda lya Thatha wiwe.​—Yn. 19:30.

16. N’isomo lyahi lighuma eryo baana bang’ighira oku Yesu?

¹⁶ Owa ababuthi bawu. Nga Yozefu na Maria, ababuthi bawu nabu sibahikene. Aliwe, Yehova abiriha ababuthi bawu b’olhukwamirwa lhw’erikutheya, erikuthendeka, n’erikusondolha. Wamalhangira erihabulha lyabu mwa ly’obughuli n’erisikya obuthoki bwabu, emyatsi yawu iyikendyuwana.​—Efe. 6:1-4.

17. Ngoku kiri omu Yosua 24:15, n’ithwamu lyahi eryo balere banga yikolera?

¹⁷ Sombolha oyo wukendi kolera. Wutholere iwayitheghererya ndeke Yehova nga nindi, nga ni byahi ebiri omwa kighendererwa kiwe, kandi erisonda liwe nga likakuhambako lithi. (Abar. 12:2) Neryo aho imuwukendi thoka erikolha erithwamu likulhu omwa ngebe yawu, erithwamu erikolera Yehova. (Soma Yosua 24:15; Omu. 12:1) Wamaghenda-ghendania n’endegheka yawu y’erisoma n’erigha e Biblia, olhwanzo olhwa wuwithire Yehova ilhukendyongera n’erikirirya lyawu iryaghuma.

18. N’ithwamu lyahi eryo balere batholere ibakolha, kandi imukendi lhwiririraki?

 ¹⁸ Ithwamu erihira erisonda lya Yehova ly’embere omwa ngebe yawu. Ekihugho kya Sitani kikabugha kithi wamakolesya amaaka wawu eriyighasira, iwukendi tsema. Okwenene kuli kuthi, abakanza kutsibu ebilhubirirwa by’ekinyamubiri bakayitha omo “malighe mangyi.” (1 Tim. 6:9, 10) Aliwe, wamahulikirira Yehova n’erithwamu erihira erisonda liwe ly’embere omwa ngebe yawu, iwukendi ghasirwa kandi ‘iwathoka ndeke.’​—Yos. 1:8.

19. Ni kyahi ekyo babuthi batholere ibibuka?

¹⁹ Ababuthi, mukole ngoku mwanga thoka eriwathikya abaana benyu erikolera Yehova. Mumuyikethere, kandi akendi bawathikya erithwamu ndeke. (Emi. 3:5, 6) Mwibuke ngoku ebyo mukakolha bikahamba kutsibu okwa baana benyu kwilhaba ebyo mukabugha. Neryo muthwemu ebikendi leka abaana benyu ibabana akaghisa k’erisimwa na Yehova.

20. Ni mighisa yahi eyo abalere bangabana bamathwamu erikolera Yehova?

²⁰ Abalere, ababuthi benyu bangana bawathikya erithwamu ndeke omo ngebe. Aliwe nenyu mutholere imwakolha owenyu erithoka erisimwa na Nyamuhanga. Neryo mugherereraye Yesu kandi muthwemu erikolera Thatha wenyu w’elhubulha ow’olhwanzo. Mwamakolha ekyo, imukendi bana engebe eyuwene kandi eyiwithe ekighendererwa lino. (1 Tim. 4:16) Kandi omwa buthuku obukasa, mukendi thunga engebe eyuwenenga!