1. Omwa 2 Abanya Korinto 3:1-3, hakathuwathikaya hathi erisima olhusunzo olhwa thuwithe olhw’eryeghesya abigha be Biblia erikulha-kulhana erihika okw’ibatizibwa? (Lebaya ekisasani ky’okwa kidipa.)

WUKAYOWA wuthi wukalhangira omwigha we Biblia ow’omwa bulhambu bw’ekithunga kyenyu akabatizibwa? Omo kwenene kikaleka iwatsema. (Mt. 28:19) Kandi wamabya in’iwe w’eghesaya omwigha muhyaka oyo, wukatsema kutsibu wukalhangira akabatizibwa! (1 Tes. 2:19, 20) Abigha bahyaka ababatizibirwe ni baruha, butsira esy’abo ababeghesaya basa aliwe kandi ni baruha esy’ekithunga kyosi.​—Soma 2 Abanya Korinto 3:1-3.

2. (a) Ni kibulyo kyahi kikulhu ekyo thukayithagha erikaniako kandi busana naki? (b) Omundu akabya athi mwigha we Biblia? (Lebaya omwatsi ahikwa.)

² Ni kibuya erilhangira ngoku omo myaka ini eyihwere, hakuhi abigha be Biblia * nga 10,000,000 obuli kwezi bababya bak’igha omwa kihugho kyosi. Kandi omo myaka iya n’eyo, obuli mwaka, abandu abalhabire ng’omu 280,000 ibakabatizibawa ng’Abema ba Yehova kandi bigha bahyaka ba Yesu Kristo. Thwanga wathikya thuthi abangyi b’okwa syomiliyoni sy’abigha aba eribatizibwa? Kundi Yehova anemughumisirizya eriha abandu b’obuthuku n’akaghisa k’eribya bigha ba Kristo, thwanzire erikolha ekyosi-kyosi ekyo thwanga thoka eribawathikya  erikulha-kulhana erihika okw’ibatizibwa omo byalhuba. Obuthuku bunemuhwayo!​—1 Kor. 7:29a; 1 Pet. 4:7.

3. Thukendi kania okuki omo mwatsi ono owahambire okweghesya abigha be Biblia?

³ Erikangania ngoku omubiiri w’eriyira abigha ni w’erikolha omwa byalhuba, ebyaghanda by’emithahulha mubyabulibwa erilebya nga thwanga thasyongera thuthi eriwathikya abigha bethu be Biblia erikulha-kulhana erihika okw’ibatizibwa. Omo mwatsi ono n’owakakwamako, thukendi lhangira ebyo thwang’ighira okwa batemburi, abamisyonare, n’abalebererya b’omuthimbo abasi bingyi. * (Emi. 11:14; 15:22) Bakasoborera ebyo abakangirirya be Biblia n’abigha babu banga kolha nuku omwigha aghasirawe ndeke. Omo mwatsi ono, thukendi kania okwa bindu bithano ebyo buli mwigha akayithagha erikolha nuku angahika okw’ibatizibwa.

4. Ni kyahi ekyo thutholere ithwaminya okweghesya omundu ye Biblia okwa lhukyo lhwiwe omwa bikuhi?

⁴ Balikyethu bangyi banemw’eghesya abandu be Biblia nibya ibanimene okwa lhukyo lhwabu. Nomwakine indi eyi ni nzira eyuwene ey’eribahira mw’erianzisibwa, mughulhu mungyi erikanirania eri likabya omwa bikuhi kandi siryanga kolhwa obuli wiki. Eryongera erianzisibwa, abandi bakanasaba oyulyanzisibawa y’enamba yiwe y’esimu neryo ibamutherera kutse erimuhandikira emeseji erimubwira mwatsi mulebe owahambire okwa Biblia bathe bayayo. Erikanirania ng’eryo lyangana lholha embere habw’amezi erigha e Biblia n’omundu isiririlyatsuka. Kwenene, omwigha inianahika okw’iyihayo n’eribatizibwa obo bwamabya ibw’obuthuku busa n’akaghalha akakahirawaho erigha Ekinywe kya Nyamuhanga? Eyihi na hake.

5. Ngoku kiri omu Luka 14:28-33, ni kyahi ekya Yesu ahirako omuwatho ekyanga thuwathikya omwa mubiiri wethu w’eriyira abigha?

⁵ Buthuku bughuma, Yesu mwasoborera ebyo mundu atholere erikolha eribya mwigha wiwe. Mwakania okwa mundu oyukanza erihimba enyumba n’oko mwami oyukanza erighenda omo malhwa. Yesu mwabugha athi omuhimbi atholere iniatsuka “er’ikalha ahisi n’erighanza” ebikendi ghunza enyumba yiwe kandi athi n’omwami atholere ‘iniatsuka er’ikalha ahisi n’eriyibulya’ erilebya amahe wiwe ng’anemwendi kolha ekyo banzire erikolha. (Soma Luka 14:28-33.) Yesu eribugha ebi, abya inianasi ngoku omundu oyuwanzire eribya mwigha wiwe atholere iniatsuka  erilengekania ndeke nga kikamanyisayaki erimukwama. Busana n’ekyo, thutholere ithwahira omwa bigha be Biblia mw’omuhwa w’erigha e Biblia obuli wiki. Ekyo thwanga kikolha thuthi?

6. Ni kyahi ekyo thwangana kolha eribana abigha abakakulha-kulhana?

⁶ Tsuka omw’ongera endambi eya mukaghunza imunemwighira oko lhukyo lhwiwe. Obundi iwangana mukanirya oko wandi Masako ng’abiri obuli erimubungira. Omwinye nyumba amabiriyowa buholho erikania nawu ahabw’endambi nene, mubulhaye ngamwangana bana ah’erikalha nuku mulhole embere n’omukania. Erisubirya liwe irikendi kangania ng’abirilhangira omughaso w’erigha e Biblia. Erimuwathikya erikulha-kulhana, iwangana mubulya ng’anganaligha erigha mirundi ibiri omwa wiki. Nomwabine, sikirighunza erigha murundi mughuma kutse ibiri obuli wiki.

7. Omukangirirya angayithegheka athi ndeke okwa buli eryeghesya omwigha we Biblia?

⁷ Iwe ng’omukangirirya, wutholere iwathegheka ndeke obuli eryeghesya. Wangana tsuka omw’isoma omwatsi n’amasako. Minya ndeke esyonzumwa ngulhu-ngulhu. Lengekanaya okwa muthwe w’erisomo, emithwe emike-mike, ebibulyo, amasako awaliko ekinywe “soma,” ebisasani, n’esyovidiyo esyanga wathikya erisoborera omwatsi. Neryo iwun’ibukire omwigha wawu, sangwa walengekania ngoku wanga soborera omwatsi omwa binywe ebyolhobire kandi ndeke nuku kyolhobere omwigha eriyitheghereryagho n’erighendera kugho.​—Neh. 8:8; Emi. 15:28a.

8. Ebinywe by’omukwenda Paulo ebiri omwa Abanya Kolosai 1:9, 10 bikathweghesayaki okw’ihira abigha bethu be Biblia omwa misabe?

⁸ Wukathegheka, bwira Yehova okwa mwigha wawu n’ebiyithawa biwe. Saba Yehova akuwathikaye erikangirirya emyatsi ye Biblia omwa nzira eyikahika oko muthima w’omundu. (Soma Abanya Kolosai 1:9, 10.) Lengaho eriminya ekyosi-kyosi ekyanga kalira omwigha eriyitheghererya kutse eriligha. Wibuke ngoku ekilhubirirwa kyawu ly’eriwathikya omwigha erikulha-kulha erihika okw’ibatizibwa.

9. Omukangirirya anga wathikya athi omwigha eriyitheghekera erigha? Soborera.

⁹ Thuwithe amaha thuthi erilhabira omw’igha e Biblia mughulhu wosi, omwigha we Biblia akendi sima ebyo Yehova na Yesu babirikolha kandi inianza eriminya bingyi. (Mt. 5:3, 6) Erighasirwa ndeke omw’igha, omwigha  we Biblia atholere iniahwerya amalengekania okwa ebyo ak’igha. Erimuwathikya erikolha ekyo, musoborere ngoku ni kikulhu iyo eritsuka erithegheka obuli erigha omw’isangwa asoma omwatsi n’erilengekania ngoku amuhambireko. Omukangirirya anga muwathikya athi? Thegheka omwatsi haghuma n’omwigha erimukangania ngoku eki kyanga kolhwa. * Musoborere ngoku angabana eby’erisubirya okwa bibulyo, kandi ngoku eriramba enzumwa ngulhu-ngulhu kyangana muwathikya eryibuka eky’erisubirya. Neryo mubwire wuthi asubiraye omwa binywe biwe. Amakolha ekyo, iwukendi minya ng’anamayitheghererya omwatsi. Aliwe, hane n’ekindi, ekyo wanga bwira omwigha wawu we Biblia erikolha.

10. Busana naki ni kikulhu erisoma e Biblia buli kiro, kandi ni kyahi ekyo omwigha akayithagha erikolha erighasirwa omw’isomayo?

¹⁰ Eryongera okw’iyo erigha obuli wiki n’omukangirirya wiwe, omwigha iniakendi ghasirwa omw’ikolha ebindu birebe ahabwiwe obuli kiro. Akayithagha erikanirania na Yehova. Athi? Omw’ihulikirira n’erikania na Yehova. Angana hulikirira Nyamuhanga omw’isoma e Biblia buli kiro. (Yos. 1:8; Esy. 1:1-3) Mukanganaye ngoku angakolesya “Endegheka y’Erisoma e Biblia” eyangana printingwa eyiri okwa jw.org. * Kandi, erimuwathikya erighasirwa ndeke omwa ndegheka yiwe y’erisoma e Biblia, muhire mw’omuhwa w’erighanirya okwa bya Biblia yinemumukangirirya ebihambire oku Yehova kandi ngoku angaghendera okwa by’ak’igha.​—Emib. 17:11; Yak. 1:25.

11. Omwigha ang’igha athi erisaba ndeke, kandi busana naki ni kikulhu iyo erisaba Yehova mughulhu wosi?

¹¹ Hira omo mwigha wawu mw’omuhwa w’erikania na Yehova omw’isaba buli kiro. Saba erilhua okwa muthima okw’itsuka n’okw’ighunza ly’obuli erigha, erisaba haghuma n’omwigha n’erimuhira omwa misabe. Akendibya anemuhulikirira emisabe yawu, akend’igha ngoku angasaba erilhua okwa muthima kandi ngoku angasaba Yehova Nyamuhanga erilhabira omwa lina lya Yesu Kristo. (Mt. 6:9; Yn. 15:16) Thalengekania erisoma e Biblia obuli kiro (erihulikirira Yehova) n’erisaba (erikania na Yehova) nga bikendi wathikya bungahi omwigha wawu eriyithunda hakuhi-kuhi na Nyamuhanga! (Yak. 4:8) Eribya n’emibere eyi kikendileka omwigha wawu iniakulha-kulhana erihika okw’iyihayo n’eribatizibwa.

12. Omukangirirya angawathikya athi omwigha eribya munywani wa Yehova?

¹² Ekyo omwigha akaminya mukigha e Biblia kitholere ikyahamba okwa bulengekania n’okwa muthima wiwe. Busana naki? Omuthima wethu​—ni bugha ambu, ebyo thwanzire, eriyisunza, n’eriyowa​—akaleka ithwayira eky’erikolha. Yesu iniakahika okwa bulengekania bw’abandu akakangirirya. Aliwe abandu ibakamukwama kundi nayu iniakahika okwa mithima yabu. (Lk. 24:15, 27, 32) Omwigha wawu akayithagha erilhangira Yehova ng’Omundu, oyo angabya n’engolongana nayu, kandi iniamulhangira nga Thatha wiwe, Nyamuhanga wiwe, kandi Munywani. (Esy. 25:4, 5) Muk’igha, minyikalhaya ndeke emibere mibuya ya Nyamuhanga wethu. (Eri. 34:5, 6; 1 Pet. 5:6, 7) Mbulha mukakanaya oko mwatsi wahi, minyikalhaya Yehova nga ni Mundu oyuli athi. Wathikaya omwigha wawu erilhangira emibere mibuyanga ya Yehova​—olhwanzo lhwiwe, olhukeri, n’erikwira abandi b’obulighe. Yesu mwabugha athi “ekihano kikulhu n’eky’erimbere” ‘ly’erianza Yehova Nyamuhanga wawu.’ (Mt. 22:37, 38) Lengaho eriwathikya omwigha wawu erianza Nyamuhanga erilhua okwa muthima.

13. Iha eky’erileberyako ngoku thwanga wathikya omwigha erigha okwa mibere ya Yehova.

¹³ Wukakanirania n’omwigha wawu, kanganaya ku wanzire Yehova ya kutsibu. Eki ikyangana wathikya omwigha eriminya ngoku nayu atholere iniabya munywani wa Yehova kandi in’igha erimwanza. (Esy. 73:28) Ng’eky’erileberyako, mbwino omwa kitabu ekyo mukigha kutse erisako, mune ebinywe ebikabisulha kindu kirebe ekihambire oku Yehova​—olhwanzo, amenge, obulingirirania, kutse obuthoki bwiwe​—ekikahamba okwa muthima wawu? Kibwire omwigha wawu, kandi leka aminye ngoku eki ni kighuma ky’okwa syonzumwa nyingyi esikaleka iwanza Thatha wethu w’elhubulha. Hane n’ekindi ekyo buli mwigha atholere iniakolha erithoka erikulha-kulhana erihika okw’ibatizibwa.

14. Abaebrania 10:24, 25 hakathubwiraki okwa mihindano y’ekithunga ekyanga wathikya omwigha erikulha-kulhana?

¹⁴ Ithwe bosi thwanzire abigha bethu ibakulha-kulhana erihika okw’ibatizibwa. Enzira nguma enyikulhu eyathwanga bawathikiryamu ly’eribahira mw’omuhwa w’erihindana okwa mihindano y’ekithunga. Abakangirirya abasi bingyi bakabugha bathi abigha abakalhuaho ibasa okwa mihindano  bakakulha-kulhana lhuba. (Esy. 111:1) Abandi bakangirirya bakasoborera abigha babu ngoku bakendyongera erigha bingyi ebihambire okwa Biblia okwa mihindano. Soma Abaebrania 10:24, 25 haghuma n’omwigha wawu, kandi musoborere emighaso eyo angabana amasa okwa mihindano. Mukanganaye evidiyo eya Okwa Kingdom Hall Kukakolhawaki? * Wathikaya omwigha wawu erilhangira erihindana mwa kindu kikulhu omwa ngebe yiwe.

15. Ni byahi ebyo thwanga kolha erihira omwa bigha mw’omuhwa w’erihindana mughulhu wosi?

¹⁵ Wangakolhaki omwigha wawu amabya isyali athahindana kutse isyali hindana mughulhu wosi? Iwune n’omuhwa munene mubwire okwa bya w’igha okwa muhindano owa lino-lino. Ekyo kyangana muhira mw’omuhwa w’erihindana kwilhaba erimukokya buyira okwa mihindano. Muhe Akaleberyo kutse Akatabu k’Omuhindano ak’Engebe Yethu n’Omubiiri Wethu ako munemukolesya okwa mihindano. Mukanganaye ebyo mukend’isyigha okwa muhindano owakakwamako, mubulhaye nga ni kitsweka kyahi ekyamamutsemesya. Ebyo mwigha wawu angalhangira n’eriowa okwa muhindano omurundi w’erimbere byangana mutsemesya kwilhaba ebyo akowa okwa yindi mikonga y’edini. (1 Kor. 14:24, 25) Akendi bana abandi abawithe eky’erileberyako ekyuwene ekyo angagherererya kandi abakendi muwathikya erikulha-kulha erihika okw’ibatizibwa.

16. Ni byahi ebikayithaghisibawa eriwathikya abigha be Biblia erihika okw’ibatizibwa, kandi ni byahi ebyo thukend’igha omo mwatsi owakakwamako?

¹⁶ Thwanga wathikya thuthi abigha erikulha-kulhana erihika okw’ibatizibwa? Thwangana wathikya obuli mwigha erilhangira omughaso w’erigha omw’imuhira mw’omuhwa w’erigha obuli wiki n’eriyitheghekera obuli erigha. Kandi thwanzire erimuhira mw’omuhwa w’erikania na Yehova obuli kiro n’eribya munywani Wiwe. Thwanzire ithwahira omwa mwigha mw’omuhwa w’erihindana okwa mihindano y’ekithunga. (Lebaya akasanduko okwa lhupapura 12, “ Ebyo Abigha Batholere Ibakolha Erihika okw’Ibatizibwa.”) Aliwe, ngoku omwatsi owakakwamako akendi soborera, hane ebindi bindu bithano ebyo abakangirirya be Biblia banga kolha eriwathikya abigha erihika okw’ibatizibwa.