1921—Myaka Kikumi Enyuma

BUGHAYA

“NERYO, ni mubiiri wahi owathukalhuaho ithwalhangira omo mwaka ono?” E Watch Tower ey’Okwokubanza 1, 1921, muyabulya Abigha be Biblia ab’omuhwa ekibulyo eki. Omw’isubirya, muyabugha ebiri omu Isaya 61:1, 2, ebya bibukaya omubiiri wabu w’erithulira. “Omwami Mukulhu abirinyihakabya amaghutha, nyirethe engulhu yuwene okwa bandu abakaghalhawa . . . , erithulhagho okwa mwaka w’olhukogho lhw’Omwami Mukulhu, n’ekiro ky’erikisya kya Nyamuhanga wethu.”

ABATHULIRI ABATHUBAHA

Eriberererya omubiiri wabu w’erithulira, abigha be Biblia babya batholere ibabya bathubaha. Babya batholere erithulhughania “engulhu yuwene” okwa bakaghalhawa kuthya n’eribwira ababi okwa “kiro ky’erikisya.”

Mughalha wethu J. H. Hoskin, oyuwabya ikere e Canada, mwathulira buthubaha nomuhanabya erihakanisya. Omwa 1921, mwabana omukangirirya w’Ekimethodist. Mughalha Wethu Hoskin mwatsuka omukania omw’ibugha athi: “Thutholere ithwakania okwa Masako omwa buholho, nibya nomuthwangabya isithulirighirana okwa yindi myatsi, thwangana kania butsira mbaka kandi ithwabya ithune banywani.” Aliwe ekyo mukithabya. Mughalha Wethu Hoskin akabugha athi: “Thwabya ithwamathakania ahabw’esyodakika nyike buyira neryo [omukangirirya] mwahinda olhuyi lhwa kutsibu namalengekania indi n’ebiyo ebinene-binene by’omo byamabirilhaghalira ahisi.”

Omukangirirya oyo mwapura athi: “Busana naki iwuthaghenda okwa bathe Bakristayo?” Mughalha Wethu Hoskin mwathasubirya, aliwe abere akaghenda, mwayibughako athi, ‘Ka yanganalhue ingakania nayu!’

Ekiro ekyakwamako, omukangirirya oyo abere akatebezya omwa kanisa yiwe mwanyibughako. Mughalha Wethu Hoskin akabugha athi: “Omukangirirya mwakunga ekihangulho kiwe, eribwira abandu athi ngali mubehi tsutsutsu oyuwamathahika omwa tawuni eyo kandi athi ngatholere ing’ithibwa.” Ekyo mukithamulemesya, mwalholha embere erithulira kandi mwabana ebibuya bingyi. Akabugha athi: “Munatsemera kutsibu erithulira eyo. Abandi bandu nibya mubabugha bathi, ‘Nganasi ku wuli mundu wa Nyamuhanga!’ kandi mubabugha bathi bakendi nyiwathikya omw’inyiha ekyosi-kyosi ekyo ngayithagha.”

ERIYEGHESYA N’ERIGHA LY’EKA

Eriwathikya abakanzisibawa erikulha-kulhana, Abigha be Biblia mubahulhukya esyondegheka sy’erigha e Biblia omwa The Golden Age. * Endegheka eya Juvenile Bible Study yabya mw’ebibulyo ebyo ababuthi bangakolesya erigha n’abaana babu. Ababuthi “ibakabulhaya abaana babu b’ebibulyo ebi n’eribawathikya eribana eby’erisubirya omwa Biblia.” Ebindi bibulyo, nga “Omwa Biblia muli bitabu bingahi?,” mubyabeghesya ekwenene y’omusingyi. Ebindi, nga “Mbwino obuli Mukristayo w’okwenene atholere iniendereribwa omwa nzira ndebe?,” ibikathegheka abalere eribya bathuliri abathubaha.

Endegheka eya Advanced Studies in the Divine Plan of the Ages yabya mw’ebibulyo ebiseghemere okwa volyumu y’erimbere eya Studies in the Scriptures ibikawathikaya abigha be Biblia abakulire erilengekania. Abasomi bangyi mubaghasirwa omwa syondegheka esi, aliwe The Golden Age ey’omo Kwerikuminibiri 21, 1921, muyaranga yithi esyondegheka syosi esi syamahwaho. Busana naki?

EKITABU KIHYAKA!

Ekitabu The Harp of God

Akakadi akaliko eby’erisoma

Ehikadi ehiri kw’ebibulyo

Abakasondolha mubaminya ngoku Abigha be Biblia abahyaka batholere ibigha ekwenene y’omusingyi omwa nzira eyithondekenie. Busana n’ekyo, ekitabu The Harp of God mukyahulhukibwa omo Kwerikuminakughuma 1921. Abakanzisibawa abaligha ekitabu ekyo nabu mubahandikisibwa okwa ndegheka y’erigha e Biblia ey’ekitabu The Harp. Endegheka y’eriyeghesya eyi muyawathikya abasomi eriminya “ekighendererwa kya Nyamuhanga eky’eritsumulha abandu omw’ibaha engebe y’erikotha.” Muyawathikya yithi?

Omundu iniakabya amaligha ekitabu, iniakahebawa akakadi kake akaliko ebyo akendi soma. Ewiki eyikakwamako, iniahebwa akandi kakadi akaliko ebibulyo ebiseghemere okwa ebyo alyasoma. Okw’ighunzerera ly’akakadi ako ikukabya eby’akendi soma ewiki eyikakwamako.

Obuli wiki ahabw’esyowiki 12, omwigha iniakathunga ekadi mbyaka erilhua omwa kithunga ekya hakuhi nayu. Mughulhu mungyi abakekelhuhire n’abali omwa mibere eyithebalighira erighenda nyumba okwa nyumba abali omwa bithunga ebyo ibabakathuma esyokadi esyo. Ng’eky’erileberyako, Anna K. Gardner, erilhua e Millvale, Pennsylvania, U.S.A., mwabugha athi: “Ekitabu The Harp of God kyabere kikahulhukibwa, mukyaleka mwali wethu Thayle, oyuthethoka erighenda, iniathunga omubiiri mungyi owanga kolha, erithuma obuli wiki esyokadi esiriko ebibulyo.” Endegheka eyo eyikabya yikahwa, omundu mulebe erilhua omwa kithunga iniakabungira omwigha oyo erimuwathikya erilholha embere erigha e Biblia.

Thayle Gardner iniane omwa kaggali kiwe k’abalema

HAKINE MUBIIRI MUNENE OW’ERIKOLHA

Okw’ihwererera ly’omwaka, Mughalha Wethu J. F. Rutherford mwathumira ebithunga byosi by’esyobaruha. Mwabugha athi “omwaka ono Obwami bwamathulhughanibwa kutsibu kandi mwamalhwiririra ebibuya bingyi kwilhaba emyaka eyamathalhaba omwa buthuku bw’erighesa buno.” Neryo mw’ongerako athi: “Hakine mubiiri munene w’erikolha. Muhire omwa bandi mw’omuhwa w’eriyiyunga okwa mubiiri mubuyanga oyu.” Kilhangirikire ndeke ngoku Abigha be Biblia mubaghendera okw’ihabulha eri. Omwa 1922, omwa buthubaha mubathulhughania kutsibu omwatsi w’Obwami.

Abanywani Abathubaha

Abigha be Biblia mubakangania olhwanzo ng’olhw’abasubeneko omw’iwathikania. Babya banywani abathubaha ‘abakabuthawa habw’omughulhu w’obulighe,’ ngoku kikanganibwe ahikwa hano.—Emi. 17:17, NWT.

Kyakabiri biro 31 Okwakathano, 1921, obwithi obwahulhawamo Tulsa Race mubwabya e Tulsa, Oklahoma, U.S.A., enyuma w’omulhume omwiraghulhu erihirwa omwa ngomo n’erihirwa kw’omusango w’erikolha omukali omusungu ya nabi. Ekingungu ky’abalhume abasungu abalhabire omu 1,000 mukyasabambira egurupu nyike ey’abalhume abiraghulhu, amalhwa ayo mwalhuaho inialhandaghana erihika Greenwood ekyalu ekikere mw’abiraghulhu, eyo biba n’erihisya amanyumba n’amaduka awalhabire omu 1,400. Eripoti yikabugha yithi abandu 36 babaholha, aliwe omughanzo w’enyine-nyine angabya iniabya bikumi.

Mughalha Wethu omwiraghulhu kandi Omwigha we Biblia ya Richard J. Hill, oyuwabya ikere e Greenwood, mwabugha ebyabya athi: “Ekiro ky’amalhwa ekyo, thwabya ithune omwa mihindano nga buli kiro. Emihindano yabere yikahwamo muthwowa amasasi omwa tawuni. Amasasi mwabugha erihika omwa kiro.” Aha kyahikira Kyakasathu omwa ngyakya, Okwomukagha 1, emyatsi yabya iyabirikalira ighuma. “Abandu balebe mubasa n’erithubwira bathi thwamabya thwanzire eritheghibwa, omwa byalhuba ithwe bosi thughende omwa Convention Hall.” Neryo Mughalha Wethu Hill haghuma na mukali wiwe n’abaana babu bathanu mubathibitha omo kyumba ekikahindanira mw’abandu banene ekyo ekye Tulsa. Aho, habya ihane abalhume n’abakali abiraghulhu nga 3,000 abatheghibawa n’amahe awathumawa n’egavumente erisyaghunzaho amalhwa.

Okwa buthuku ibwan’obo, Mughalha Wethu Arthur Claus, omusungu, mwakolha erithwamu ery’obuthubaha. “Nabere ing’owa ngoku egurupu y’abakalhwa yinemuthibitha omwa Greenwood, eriba n’erihisya emiyi, munathwamu eriyalebya munywani waghe mwanzwa, Mughalha Wethu Hill.”

Arthur Claus mwakangirirya ekilasi ey’abaana 14 omw’ikolesya ekitabu The Harp of God

Abere akahika ewa Mughalha wethu Hill, mwalhangira omutaka wiwe omusungu iniane n’embundu. Omutaka oyo, kandi munywani wa Mughalha Wethu Hill mwalengekania athi Arthur ni mughuma w’okwa balhwi. Mwamupurira athi: “Wukakolha omwa buthalha bw’omulhume oyo mwaki?”

Arthur akabugha athi: “Kunathamusoborera ndeke, anganyilhasire. Munamukakasya ngoku Mughalha Wethu Hill ni munywani waghe kandi ngoku ngabya inganemusyamulebya mirundi mingyi.” Arthur n’omutaka oyo mubatheya ndeke ebindu bya Hill.

Buthuku buke-buke, Arthur mwaminya ngoku Mughalha Wethu Hill n’eka yiwe bane omo kyumba ekikahindaniramu abandu banene. Arthur mwabwirwa ngoku abandu abiraghulhu sibanga lighirwa erilhuayo hathe ekihamulho ky’Omuthabali mukulhu Barrett, oyubimanire. Arthur mwabugha athi sikyabya kyolho erikania n’omukulhu oyo. Nabere ingamubwira ekirengekanio kyaghe, mwambulya athi: ‘Wunemwendi theya eka eyi n’eribaha ebiyithawa byabu?’ Inganatsemire munaligha.”

Iniane n’ekihamulho omwa byalha, Arthur mwanguha ahakabya eyiri ekyumba ekyo. Mwakiha owundi mukulhu oyuwabugha athi: “Busana naki omuthabali mukulhu iyuwene-wene yuwamasayininga okw’eki! Wunasi ngoku n’iwe wamabya w’erimbere erisyenda hano h’omundu munabwire?” Neryo Mughalha Wethu Hill n’eka yiwe mubabiha omwa bandu abo. Abosi mubayisoka omwa matoka ya Arthur n’erighenda eka.

Mughalha Wethu Claus mwalhangira athi Mughalha Wethu Hill n’eka yiwe bakabya omwa butheya. Eky’erileberyako kiwe ky’obuthubaha mukyahamba ndeke okwa bandi balikyethu. Arthur mwabugha athi: “Omutaka oyuwawathikaya eritheya ebindu bya Hill mw’ongera erisikya Abema ba Yehova. Kandi abandu bangyi mubatsemera omwatsi w’Obwami kundi mubalhangira Abema isibali mw’akasolholho k’erangyi kandi ngoku ithwe bosi ng’abandu ba Nyamuhanga abayihereyo thw’ingene.”

^ enu. 9 The Golden Age muyahulhwamo Consolation omwa 1937 n’omwa 1946 yamahulhwamo Awake!

AKALEBERYO—EGAZETI EY’ERIGHA