1. Busana naki abangyi bakabulha edini y’okwenene nga y’eyahi?

 MUNABWIRE hali madini mangyi awakayahulhamo Bakristayo kandi awakabugha athi akaramaya Nyamuhanga omo nzira ey’akaligha. Ekyo ky’ekikaleka abandu bangyi ibabulha eyihikire nga y’eyahi! Bakabulhaya bathi, “Mbwino hane edini nguma ey’okwenene, kutse amadini wosi akatsemesaya Nyamuhanga?” Mbwino omo bulengekania bwethu thunalighire ndeke ngoku ebya thukakangiriraya y’ekwenene kandi ngoku eriramya eryo Abema ba Yehova bakakwama munabwire lya Yehova akaligha? Mbwino kwenene kinathokekene eriligha emyatsi eyi? Thulebaye obwema obukakanganaya ekyo.

2. Ni kyahi ekyaleka omukwenda Paulo inialigha kw’abiribana ekwenene? (1 Abanya Tesalonika 1:5)

² Omukwenda Paulo aby’alighire ndeke kw’abiribana ekwenene. (Soma 1 Abanya Tesalonika 1:5.) Eriligha liwe eryo siryabya liseghemere okw’iyowa buyira. Paulo abya mwigha w’Ekinywe kya Nyamuhanga ow’omuhwa. Aby’ikirirye ngoku “Amasako wosi Nyamuhanga yuwatheghekanayagho.” (2 Tim. 3:16) Ni byahi ebyo igha omw’iyeghesya liwe? Paulo mwabana omo Masako obwema obulhangirikire obukakanganaya ngoku Yesu abya iya Masiya oyuwalhaghanisibawa—obwema obwa basondoli b’edini y’Ekiyuda bathwamu erigheghena. Abasondoli b’edini abathebya abo ibakabugha bathi bak’imanira Nyamuhanga aliwe ibakamughana omo mibiiri yabu. (Tito 1:16) Erithendibya ng’ibo, Paulo mwathasombolha omo Biblia mw’ebitsweka birebe ebyo angaligha. Abya inianayitheghekire erikangirirya n’erighendera ‘okw’iyisunza lyosi lya Nyamuhanga.’​—Emib. 20:27.

3. Mbwino thutholere ithwatsuka eribana eby’erisubirya okwa bibulyo byethu byosi, imuthwaligha ku thwabiribana ekwenene? (Lebaya n’akasanduku “ Emibiiri n’Amalengekania wa Yehova​—‘Si Byanga Thoka Erighanzwa.’”)

 ³ Abandi bakayowa bathi edini y’okwenene yitholere iyabya iyangana thoka erisubirya obuli kibulyo, nibya n’ebibulyo ebya Biblia yithe yanga subirya. Ekyo ikyanathokekana? Thulebaye eky’erileberyako kya Paulo. Mwahira omwa balikyabu mw’omuhwa ‘w’erilebya ndeke emyatsi yosi,’ aliwe kandi mwaligha ngoku habya ihane myatsi mingyi eyo athayitheghereraya. (1 Tes. 5:21) Mwahandika athi: “Thwasi bike, thukalhangira bike ng’omo kiyo.” (1 Kor. 13:9, 12) Paulo mwathayitheghererya obuli kindu; nethu kuthya. Aliwe Paulo mwayitheghererya ekwenene y’omusingyi eyihambire oku Yehova. Abya iniabiriminya ebikaghunza ebyaleka inialigha kw’abiribana ekwenene!

4. Thwanga ghumya thuthi erikakasya lyethu ku thwabiribana ekwenene, kandi ni byahi ebihambire okwa Bakristayo b’okwenene ebya thukendi kaniako?

⁴ Enzira nguma eya thwanga ghumiryamo erikakasya lyethu ku thwabiribana ekwenene ly’erilinganisya emiramirye eya Yesu ahiraho n’emiramirye ey’Abema ba Yehova munabwire. Omo mwatsi ono, thukendi lebya ngoku Abakristayo b’okwenene (1) bakaghana eriramya esyosanamu, (2) bakasikaya erina lya Yehova, (3) banzire ekwenene, na (4) banzene kutsibu.

5. Thuk’ighaki oku Yesu bikahika okwa nzira eyitholere ey’eriramiryamo Nyamuhanga, kandi thwanga ghendera thuthi okwa by’akangiriraya?

⁵ Busana n’olhwanzo lhunene olho aby’awithire Nyamuhanga, Yesu mwaramya Yehova musa, omughulhu abya elhubulha n’omughulhu abya okwa kihugho. (Lk. 4:8) Mwakangirirya abigha biwe erikolha ekiri ng’ekyo. Yesu n’abigha biwe abathaleghulha mubathakolesya esyosanamu omw’iramya. Kundi Nyamuhanga ni Mulimu, sihali ekya mundu angakolha  ekyang’imanira olhukengerwa lhwa Yehova! (Isa. 46:5) Kandi ibbwa erikolha esyosanamu sy’abakahulhawamo ababuyirire n’eribasaba? Omo kihano kyakabiri eky’okwa Bihano Ikumi, Yehova mwabugha athi: ‘Si wusyeyikokotheraya esanamu eyikahesawa, kutse ekisosekanio ky’ekindu n’ekighuma ekiri endatha omwa lhubulha, kutse ekiri eyikwa omwa kihugho, siwusyunamirabyo.’ (Eri. 20:4, 5) Ebinywe ebyo bilhangirikire ndeke okwa banzire eritsemesya Nyamuhanga.

6. Ni miramirye yahi eya Bema ba Yehova bakakwama munabwire?

⁶ Abasomire ebyakera mubabugha bathi Abakristayo abakera babya bakaramya Nyamuhanga musa. Ng’eky’erileberyako, ekitabu History of the Christian Church kikabugha kithi Abakristayo abakera “banga ponire” omwatsi w’erihira esyosanamu omo myanya y’eriramiryamo. Munabwire, Abema ba Yehova bakakwama eky’erileberyako ekya Bakristayo ab’omwa kighana ky’erimbere bahiraho. Sithulisaba esyosanamu “sy’ababuyirire” kutse abamalaika; nibya sithuli saba Yesu. Sithuli ramaya ehiminyikalho hy’erihanga. Haliki sihaliki, thwabirithwamu erighendera okwa binywe bya Yesu bino: “Wasyaramya Omukama [Yehova] Nyamuhanga wawu.”​—Mt. 4:10.

7. Ni mbaghane yahi eyilhangirikire eyiri ahakathi-kathi k’Abema ba Yehova n’awandi madini?

⁷ Munabwire, abangyi bakanza ibahulikirira abasondoli b’edini abasibwe. Omuhwa owabawithire abandu ng’abo akaleka ibahika n’okwa kiika ky’eribaramya. Abandu bakusulha omo makanisa wabu, ibaghulha ebitabu byabu, n’erihayo esyosente nyingyi erisighika ebithongole by’abasondoli abo. Abandi bakaligha ekyosi-kyosi ekya basondoli abo bakabugha. Mbulha ibbwa banga yitsangura bungahi Yesu iyuwene-wene alyababuthukirako! Aliwe, abaramya ba Yehova ab’okwenene ibo sibawithe abakulhu b’edini. Nomwakine indi thukasikaya abakasondolha, thukaligha engangirirya ya Yesu eyilhangirikire eno: “Inywe bosi muli balikyethu.” (Mt. 23:8-10) Sithuliramaya abandu, mbulha ni bakangirirya b’edini kutse abathabali b’ekipolitiki. Kandi sithuli sighika ebithongole byabu. Omwakanya k’ekyo, thukabya butsira lhuhandi omwa by’ekipolitiki kandi thukayihighulha okwa kihugho. Omo nzira esi, thukabya ba mbaghane okwa madini mangyi awakayahulhamo Bakristayo.​—Yn. 18:36.

8. Thukaminya thuthi ngoku Yehova anzire erina liwe iryahebwa olhukengerwa kandi iryaminywa ehosi?

⁸ Buthuku bughuma, Yesu mwasaba athi: “Thatha, wulethe olhukengerwa oko lina lyawu!” Yehova iyuwene-wene mwasubirya omusabe oyo omo mulenge munene erilhua elhubulha, erilhaghanisya athi akendi letha olhukengerwa okwa lina liwe. (Yn. 12:28) Omw’ithulira liwe lyosi, Yesu mwaha erina lya Thatha wiwe ly’olhukengerwa. (Yn. 17:26, NWT) Neryo ni ky’amenge erilengekania thuthi Abakristayo ab’okwenene bakayisyethera erikolesya erina lya Nyamuhanga n’erilibwirako abandi.

9. Abakristayo ab’omwa kighana ky’erimbere mubakangania bathi ku basikirye erina lya Nyamuhanga?

⁹ Omo kighana ky’erimbere E.K., buthuku buke ekithunga ky’Ekikristayo kyalitsukire, Yehova ‘mwatsuka erikangya olhwanzo lhwiwe busana n’ebihanda eriyisogha omwakathi-kathi kabu abandu busana n’erina liwe.’ (Emib. 15:14) Abakristayo ab’omwa kighana ky’erimbere abo, ibakayisyethera erikolesya erina lya Nyamuhanga n’erilibwirako abandi. Mubakolesya erina lya Nyamuhanga lya kutsibu omw’ithulira lyabu n’omwa bitabu byabu. * Mubakangania  ku ni bandu busana n’erina lya Nyamuhanga.​—Emib. 2:14, 21.

10. Ni bwema bwahi obukakanganaya ngoku Abema ba Yehova ni bandu busana n’erina lya Yehova?

¹⁰ Mbwino Abema ba Yehova nina bandu busana n’erina lya Yehova? Thulebaye obwema buno. Munabwire, abasondoli bangyi b’amadini omo buthoki bwabu babirikolha ekyosi-kyosi ngoku banga thoka erilhangira bathi bakabisa ekwenene eyikabugha yithi Nyamuhanga anawithe erina. Babirilhusya erina eryo omo syombindulha syabu sye Biblia, n’ekindi, babirithanga erikolesya erina eryo omo bisomo byabu. * Mbwino hane omundu wosi-wosi oyuwanga ghania eky’eribugha indi Abema ba Yehova basa babakaha erina lya Yehova ly’ekitsumbi n’erisikya ebitholereryo? Thunemuminyikalya erina lya Nyamuhanga lya kutsibu kwilhaba eyindi dini yosi-yosi! Omo nzira eyo, thunemukolha ekyosi-kyosi ekya thwanga thoka erilhangira thuthi thukatheghaya ekitsumbi ky’erina lyethu, Abema ba Yehova. (Isa. 43:10-12) Thwabirihulhukya esyokopi sye Biblia eya New World Translation of the Holy Scriptures esilhabire omo miliyoni 240, eyikakolesaya erina lya Yehova omo myanya eyo abandi bahinduli be Biblia babirililhusyamo. Kandi thukahulhukaya ebitabu bingyi ebiseghemere okwa Kinywe kya Nyamuhanga, e Biblia ebikakolesaya erina lya Yehova omo mibughe eyilhabire omu 1,000!

11. Abakristayo abakera mubakangania bathi ku banzire ekwenene?

¹¹ Yesu aby’anzire ekwenene, ni bugha ambu, ekwenene eyihambire oku Nyamuhanga n’ebighendererwa Biwe. Yesu mwaghendera oko kwenene eyo, kandi mwabwira abandi oko kwenene eyo. (Yn. 18:37) Abigha ba Yesu nabu babya banzire kutsibu ekwenene. (Yn. 4:23, 24) Nibya n’omukwenda Petero mwakania okwa Kikristayo ‘ng’enzira y’ekwenene.’ (2 Pet. 2:2) Busana n’erianza ekwenene ya kutsibu, Abakristayo abakera mubaghana esyongangirirya sy’amadini, emirwa, n’amalengekania w’abandu ebithahambangene n’ekwenene. (Kol. 2:8) Namunabwire, Abakristayo ab’okwenene bakalengaho ‘erikwama ndeke omwatsi w’ekwenene’ omw’ilhangira bathi ebya bikirirye ebyosi n’engebe yabu biseghemere okwa Kinywe kya Yehova.​—3 Yn. 3, 4.

12. Ni kyahi ekikabya abakathusondolha bakaminya ngoku eriyitheghererya lyethu likayithagha eryuwanibwa, kandi busana naki bakathwamu erikolha ekyo?

¹² Munabwire abandu ba Nyamuhanga sibali bugha bathi mughulhu wosi bakayitheghereraya obuli kindu kyosi ekiri omwa Biblia. Okwa bundi buthuku, babirikolha ebisobyo omo syongangirirya syabu n’omwa busondoli bw’ekithunga. Ekyo si kitholere kikathuswekya. Amasako akakikanganaya ndeke-ndeke ngoku eriminya erihikire likaghenda likongera obuthuku bunemulhaba. (Kol. 1:9, 10) Yehova akabisulha ekwenene lyolho-lyolho, kandi thutholere ithwabya ithunayitheghekire erilinda omw’ighumisirizya ekyakakalha ky’ekwenene kikaghenda kikakanya. (Emi. 4:18) Abakathusondolha bakabya bakaminya ngoku eriyitheghererya lyethu oko mwatsi mulebe w’ekwenene likayithagha eryuwanibwa, sibali sagha erikolha esyombinduka esyo. Nomwakine indi amadini mangyi aw’Ekikristendomu akakolha esyombinduka eritsemesya abandu babu kutse erianza eriminywa omo kihugho, esyombinduka esikakolhawa omo kithunga kya Yehova sikakolhawa erithuthunda hakuhi na Nyamuhanga n’erikwama emiramirye eya Yesu atsukisaya. (Yak. 4:4) Sithuli kolha esyombinduka busana n’esyombinduka esikabya omwa kihugho, aliwe busana n’eriyitheghererya ndeke Amasako. Thwanzire ekwenene!​—1 Tes. 2:3, 4.

13. Ni mubere wahi mukulhu owa Bakristayo ab’okwenene bakakanganaya, kandi akalhangirika athi omo Bema ba Yehova munabwire?

¹³ Okwa mibere yosi eyabya yikaminyikalya ekithunga ky’Ekikristayo omo kighana ky’erimbere, omubere mukulhu abya ilhw’olhwanzo. Yesu mwabugha athi: “Mwamabya n’olhwanzo, omughuma busana n’owundi, abandu abosi basyaminya kwa muli bigha baghe.” (Yn. 13:34, 35) Munabwire, Abema ba Yehova omo kihugho kyosi bakatsemera olhwanzo n’obughuma ebya bawithirene. Erithendibya ng’awandi madini, ithwe thuli lhughanda lhughuma nomwakine indi thuli b’omwa bihugho, erangyi, n’ekalikya ebithasosene. Thukayilhangirira olhwanzo lhw’okwenene olhu okwa mihindano emike-mike n’eminene-minene. Obo ni bwema obukaghumaya eriligha lyethu ngoku enzira yethu y’eriramiryamo ya Yehova akaligha.

14. Ngoku kiri omwa Abanya Kolosai 3:12-14, ni nzira yahi ngulhu eyathwanga kanganiryamo ku thwanzene kutsibu?

¹⁴ Amasako akathubwira athi “mukwe omuhwa w’erianzana kutsibu.” (1 Pet. 4:8) Enzira nguma eya thukakanganirayamo olhwanzo ng’olho ly’erighanyirana n’eribuyirana ebisobyo byethu. Kandi thukasondekanaya ehighisa hy’erihithiryamo n’erikokeryamo abosi omwa kithunga, nibya n’abangabya ibabirithuhithania. (Soma Abanya Kolosai 3:12-14.) Omo kwenene olhwanzo ng’olho ky’ekiminyikalho kikulhu eky’Abakristayo ab’okwenene.

15. Ni mwa sindi nzira syahi esyathukakwamiramo emiramirye eya Bakristayo b’erimbere bahiraho?

¹⁵ N’omwa sindi nzira thukakwama emiramirye eyo ekithunga ky’Ekikristayo eky’omwa kighana ky’erimbere kyahiraho. Ng’eky’erileberyako, emithondekere y’ekithunga kyethu ky’Ekikristayo—mwamuli abalebererya abakabalhama, abasyakulhu, n’abaghombe abawathikya—yisosene n’emitheghekere ey’abakwenda bahiraho omwa kighana ky’erimbere. (Fil. 1:1; Tito 1:5) Amalengekania awathuwithe oko myatsi y’engyingo, erilhangira omusasi kw’abuyirire, n’eriyisunza lyethu ly’eritheya ekithunga okwa bakolha-nabi abatheyisubamo, ebyosi biseghemere okwa mitheghekere eyahirawaho omo kighana ky’erimbere.​—Emib. 15:28, 29; 1 Kor. 5:11-13; 6:9, 10; Ebr. 13:4.

16. Ebiri omwa Abanya Efeso 4:4-6 bikathweghesayaki?

¹⁶ Yesu mwabugha athi abangyi banga bughire bathi ni bigha biwe, aliwe athi abosi sibangabere b’okwenene. (Mt. 7:21-23) Kandi Amasako mwalhaghulha athi omo biro by’enyuma-nyuma, abangyi ‘banga kwamire omuhanda w’ekisomo.’ (2 Tim. 3:1, 5) Aliwe, e Biblia yikabugha ndeke-ndeke yithi hali “erikirirya lighuma” erya Nyamuhanga akaligha.​—Soma Abanya Efeso 4:4-6.

17. Munabwire ni bahi abakakwama Yesu n’erikwama erikirirya lighuma ly’okwenene?

¹⁷ Munabwire, ni bahi abakwamire erikirirya lighuma ery’okwenene? Thwamabirilebya obwema. Thwamabirilhangira emiramirye eya Yesu ahiraho kandi ey’Abakristayo ab’omwa kighana ky’erimbere bakwama. Kwesi eky’erisubirya ni kighuma—Abema ba Yehova. Ni lhusunzo eribya baghuma b’okwa bandu ba Yehova n’eriminya ekwenene eyihambire oku Yehova n’ebighendererwa biwe! Neryo kwesi thulhole embere eryamakirira ekwenene ithunalighire ndeke.